PASALṬHA LIANMAWIA BUNG - 6

Bualthleng Zawlbuk thawm ri hut hut chuan khua chu a awp hneh kher mai, rawlthar huaisen Lianmawia'na theihna Sengzau khawrawlthar huaisen Hnêmluaia hmaah a pho lang miau a ni. Nupui nei hlim Pasalṭha Thansanga leh Pasalṭha Hmingthanga te pawhin an nupui tharte theihnghilh ṭhak khawpin hahni lak nguk khawpin an nui ṭhen ṭhaw reng mai a, a dawt leha inbuan Bungtlang rawlthar huaisen Hrangseipuia leh Hnêmluaia ṭhianpa Lingrêma te inbuan pawh mit a ti tlaiin tlangval ho leh pa ho chuan Zawlbuk kai manhla an ti hlawm hle. Val ute'n mut an rawt tâkah chuan Lianmawia pawh Rualkunga nen Zamana nen Hratzuala te nen mu tlâng lehin tawnmang rama lasi nula ṭangnêm a bei tumin an chhing siai siai hlawm a, chu tih lai mêk chuan Bualthleng khua chu ralin an lo hual ve mêk bawka an hruaitupa pasalṭha Sangchhuma chuan "Zanin hi kan chet ṭhat zân anih hlauh chuan nakin zêla Bualthleng khua phuba rawn lak sak tu tur zawng zawngte nen kan chimih theihna hun rem chang tak a ni dawn a, chu vangin kan thlah lo la kal zelte tan leh, ka u phuba lakna'n kan hneh ngei a ngai a ni" tiin ro a han rêl zawm nghal a.

Zanlai ar khuan rual chuan khua chu an hual fel der tawh mai a, mahse Pasalṭha Thansanga te khua hi chu ti mai mai a rûn chi a ni lo tih hriain Lâwitlang tlangvalte leh an ṭan rual pui Hnahzawl tlangvalte chuan khawfing chah hun nghakin an la ṭhu ṭhap a, tlangval zahnih bawr vel chu an tling ve ngei ang. An hruaitupa Pasalṭha Sangchhuma erawh a fimkhurin Pasalṭha Thansangate huaisen zia a hria a, an ni mai bâkah khaw hran hran aṭangin an ṭhiante an rawn zin khawm bawk tih an hre bawk nen chet sual a tum lo kher mai.
Khawfing chah lai tak chuan khaw mawng lama ṭangin "Ral ral" ti a au thawm an hre ta phut mai, tlangval ho chu tho vat vatin an hmanrua te an chuh nghal sawk sawk a, chu tih lai mêk chuan khua chu hmun hran hran aṭangin a rawn alh nghal hluah hluah bawk a, Lalpa Rengliana zu kai mutui lutuk chu Bungtlang Lalpa Saingurliana chuan sawi harh sawi harh sawk sawkin "Lalpa i khua hian rûn a tawk mêk a ni, i nupui fanau te hruai chhuak vat rawh" a han ti a Lalpa Rengliana chu thinrim taka ding chhuakin "Ngura ka nupui leh ka fapa hi hruai la, kan khaw chhim chhak lam ramhnuaiah hian kal pui la Sawbual ngawah va tawm pui mai ang che, ka vangkhuain min mamawh e" tih pahin a silai chu a ban nghala, pawn a chhuak chiah chu silai puak dawm dawm thawm rite chu a rawn nasa zualin a thangkhawk rum rum hlawm a. Lalpa Rengliana chuan "Ka tawp na ni a thleng ve ta" tih pahin a lam pana lo kal mêk Runthanga chu a nuih suk a "Che dun hle teh ang Runa" tih pahin a pan thla ve nghal bawk a.
Lianmawia pawh Zamana nen Thansanga nupui leh a nu leh a nau hruai chhuakin kawmthlang lamah an chhuk pui vat a, Rualkunga leh Hratzuala pawh Hmingthanga nupui leh Hmingthanga chhungte chu hmun him lam an pan pui ve bawk a. Khatia râl an lo hnaiha an harh rual khan Lianmawia hian a bula mu a ṭhiante bâkah an mahni ang bawka mikhual ve tho Vanthangate, Hnemluaiate, Lingremate bâkah Hrangseipuia te ho chu hrilhin nunau ho hruai chhuah phawt a ṭul thu a hrulha chu tiang chuan ral lam pawh ngaihsak loin nunau ho tan an himna tur bei hmasa a ni. Pasalṭha Sangchhuma leh a hote mi sawmnga vel chu khuaah chuan lutin anmahni lo beih tumtu apiangte chu an lo kap thal tawp tawp a, pawl hrana mi sawm nga vel zet chuan khua chu kal hualin in awm a piang an hal nghal zêl a, nunau rual erawh rawlthar Lianmawia finna leh a  ṭhiante huaisenna a zarah a tam zawk an him phah hlauh thung. Lalpa Rengliana leh Runthanga te kiangah chuan Zehtet Pasalṭha Chhuahchawnga leh Thangkunga chu an awm ve bawk a, silai nei vek an ni bawk a, a kah lah an thiam hmelma ho chu a khat tawkin an lo suat ve char char a, Lalin hnuaiah ṭan khawhin Lal in venhim chu an tum ngar ngar bawk a. Kapthanga leh Chawiliana erawh Neihthanga leh Chhawnsanga te kiangah tel vein hmelma ho chu hnung lam aṭanga beih tumin an hêl mêk zel a. Thansangate ṭhian ho pawhin an chan chhiat zia hriain tawlh chungin silai an kap puak zêl a, Liansanga dar thi zawih zawih chu Thansanga chuan enin "Liana lo va inthiarfihlim la a ṭha ang" a han ti a, Liansanga erawh a nui suk suk duh chauh a. Hmelmate'n silai dahin chemsen nen an rawn bawh ta maw tihah chuan Bualthleng tlangvalte chuan pasalṭha an ngah zia hriain an phur thar hle, haw haw chunga bawhin Hmelma tlangval ho chu an thal zawih zawih a, mahse, Pasalṭha Sangchhuma'n inbawhchilh huna chenrang rawl au tir tura a lo dah ṭhat tlangval sawm hnih rual zet chu khaw lu lam aṭanga lo lutin hnung lam aṭangin Bualthleng tlangvalte chu an rawn thal zawih zawih maia, chu tia an chiai lai tak chuan tlangval dang sawm ruk chuangzet turte nen Bualthleng ho chu hnung lam aṭangin an rawn bawh leh ta phut mai, Bualthleng ho chu an chan a chhiain an khua lah, a alh eng pup bawka, Zawlbuk leh Lal in erawh a la him ve hram hram chauh a ni.
Lalpa Rengliana chuan a bula Runthanga, ngen mu tuar lo a, a nunna thlah mêk tu chu enin "Runa Runa" tiin a ko mawlh mawlh a, Thangkunga leh Chhuahchawnga pawh chuan Runthanga chu an ko ve mawlh mawlh bawk a. Mahse Runthanga chuan an awte chu a hre hla tial tial a, hringlang tlânga lung loh tui dâwn a, pialral lama Pasalṭha Thanhranga kianga leng turin a liam ta, a thi tur chalchâng chu mittui tla zawih zawih chungin a ṭhiante pathum chuan an kuah bet a, Lalpa Rengliana chuan "Runa, Lianmawiate, Hrilate, U Hrangate kha min lo niak rawh aw" tiin a han hawi chhuak leh mitmeng chu, rawlthar nunrawng Rengliana mitmeng hlauh hlauh kha a ni leh ta. A bula ding ngawi reng Chhuahchawnga, hmelma aṭanga ṭhianṭha taka Runthanga nena insiam, inzawmna thuk tak nei, chuan a silai chu dahthlain "Pasalṭha Chhuahchawnga ka lo kal e, naute u lo zam suh u" tia au ṭial ruai ruai chungin a tlan ta phut mai, chu veleh Lalpa Rengliana chuan a Lal puan hlip thlain Pasalṭha Rengliana ti a inchhalin a tlan ve nghal bawk a, Thangkunga pawhin a bula thing la eh loh lian ṭha tel tawl chu kengin hmelma ho chu a bawh phei ve ta.
Lianmawia chuan a pa te ho rawn che ve chu hmu vatin a pa Runthanga a hmuh loh dânah thil thlen dan tur chu a hrethiam ta mai a, thinrim takin a pate bul hnaiah chuan a insawn chho zela tlangval panga lai a thal ve tawh nghe nghe. A kiangah chuan Hratzuala leh Zamana pawh rawn kal ve zêl in Rualkunga chu an zawng ru pah reng bawk a.
Khaw var rual chuan Bualthleng khua chu a khu vut vut tawha, a chhungah chuan hmelma lam leh Bualthleng lam chu an la insam buaih buaih reng a, an inring lo lai beitu mah nise Lâwitlang leh Hnahzawl tlangvalte beisei angin thil a kal si lo, an chan a chhe ta tial tial a, chu ta kârah Pasalṭha Chawiliana au aw an hnung lamah an la hre zui nen, a kianga awm ve Kapthanga te, Pawih pasalṭha huaisen Neihthanga leh a aihnahphahpui Chhawnsanga, vei chem hmang thiam em emte hma chu a rawn kaw duak duak a.

A sir lama Rualkunga lu bung chunga lo let reng Lianmawia te'n an han hmuh meuh chuan an mitmeng chu thinrimna a khatin hmelma tlangval la dam sawmruk bawr vel chu an han bawh leh tak tak mai  zawng, an ralbeih pui Pasalṭha Thanhranga fapa Pasalṭha Thansanga te ṭhianho bâkah, Pasalṭha Chawiliana te pali an la awm bawk, an rualpui Hnêmluaia leh Lingrêma bâkah an Lusei pui Hrangseipuia te nen, an chet dan a nain kâr loah hmelma ho chu an inpe ta mai rêng a.

Lalpa Rengliana bâkah Chhuahchawnga leh Thangkunga thinrim chu tuma'n an dang ngam dêr si lo, hmelma inpe tawhte chu an sâm phei hmiah hmiah a, Pasalṭha Sangchhuma chu Dammawia chuan kek dak awrhin "Ka nun tawh che a, hei hi maw mi rulh lêtna chu, Kiang rawh u, he nau hian ka pawi a sawi nawn leh a ni" a han ti a hnial ngam awm hek suh an lo kal kiang sap sap a.
Pasalṭha Sangchhuma chuan Pasalṭha Dammawia chu a hneh dawn chuang lo tih hriaiin a vawi hnihna'n ngaihdam dilin a ṭhingṭhi leh ta. Mahse chem rawn phe vuai chuan ngaihdam a hlawh lo tih a lan tir chiang ngei mai. Lalpa Rengliana chuan Sangchhuma lu a sah uaihnawp chu chil chhak ṭhawtin a kal kian san nghal a.

Tuk ṭhuan ei a hun ta maw tihah chuan nunau ho chu an khaw kang ral vek tawhah chuan an rawn lut ṭan ta, a tu a te pawh chu an rawn ṭap hawm hawm reng a, tunah chuan khua tih tûr an nei ta lo, Bualthleng khua chu din thar leh rual lohin a kang chhe hneh kher mai le. An ran vulhte lah rilṭamin thawm bengchheng an lo siam ve chhen bawk a. Lalpa Rengliana leh Chhuahchawnga bâkah Thangkunga te chu Runthanga ruang bulah awmin a tu amah an inbe lo a, mipui an thu ngaichang tute an awm tih pawh hre lo ang hmakin an awm a ni. Chawiliana chu rawn ding chhuakin "Aw le, hnehna chang mah i la, kan tawrhna hi pawm thiam a har hle mai. Lal tualah hian ei rel mai i la, tlangval hoin khaw chhunga kan unaute ruang hi i seng fel ang u. Hmelma ho ruang erawh a hlawmin dah zêl u la, ramhnuaiah ramsate chaw atan kan hlan dawn nia" tiin thinrim takin a rawn ṭawng khur hlak hlak a.

Khuaah chuan han che sang sang hlawmin ei an rel zo an han kilte chu ei thei amang an awm lo a, nunau tam tak him hman mahse an vaiin an him kim vek si lo, naupang an nute ngaia ṭap te, an pa te an ute au lawm lawm rite chuan nutling patling pui puite mittui pawh a ko chhuak zing malh malh teh e. An inpeih fel meuh chuan chawhnu her zet a ni ta. Lalpa Rengliana chu rawn ding chhuakin "Ka khua leh tui duh tak te u, kan khua chu awmna chi ziazang a ni ta lo, kan inṭhen hran ni a lo thleng ta anih hi. In duhna lam lam inpan thei ang. Kan mâkpa te khua Damdep Lalpa bêlin ka kal dawna, a duh apiangte tan zui theih ka ni e" tiin a mittui chu a rawn sur zung zung a. Khaw mipui tam tak chuan zui ve chu an ti tlu ta a. Hmingthanga te chhungkua bâkah Chawiliana pawh a fate pahnih leh a nupui nen Lalpa Rengliana chu an zui ve dawn a ni. Thansanga erawh a nupui, a nu leh a farnu te nen Bungtlang khaw lama pêm ve mai chu ṭha zawkin an hria a, Pi Ṭialthangi kum lam a upa ve tawh bawk nen kawng hla tak kal pui chi niin Thansanga chuan a hre lo a, Zehtet lam a awm chu duh ber mah se, khaw mipui tam tak te belh tur a ni a, Zehtet khaw tan lawmawm viau mah se buaina va thlentu an ni dawn tih a hriaa inthlahrung leh tlawmngai takin Bungtlang lam pan chu a thlang ta zawk a. Dammawia pawh a unaupa Neihthanga zuiin a chhungkua a hruai dawn a ni. Liansanga te chhungkua  erawh Zehtet lamah an awm thung ang.
An han inṭhenhrang tur chu an ṭap hawm hawm hlawm a, Lalpa Rengliana lah pasalṭha tlawmngai tak ni ṭhin a nih avangin khaw dang Lal in a rawn tuam hlawm hmaa chhungkhat laina te va belh duh zawk mi a ni miau si a, an khua an lo tih ve ṭhin, Lalpa Dohranga'n fel leh dik taka ro a lo rêl tawh na Lalpa Rengliana'n huaisen leh ropui taka a lo awp Bualthleng khua chu a tlu chhe ta. Lalpa Rengliana chuan a pasalṭhate chu ko khawmin phuba lak ngei a tumthu leh Bualthleng khua hi la din thar leh ngei a duhthu a sawi a, ti chuan an inṭhen ta a.

Rualkunga ruang an phumna bulah chuan Lianmawia chu mittui tla zawih zawih chungin a dinga, a kianga awm ve Zamana chuan "Liana kal a hun e, pasalṭha thih dân dik takin Ruala chu a thi a ni" hnuk ulh ṭuna a rawn tih tâkah chuan kalin an piah lawka Hratzuala ngui ngiai chunga an silai ken sak chunga lo ding reng lam chu an pan phei chhat chhat a.

Kawngah chuan Zehtet lam leh Bungtlang lama kal tur ho chu a ruala kal tlângin Lalpa Saingurliana chuan hma a hruaia Chhuahchawnga leh Thangkunga te chuan ngawi rengin an zui ve bawk a. Thansanga pawh a nupui leh a nu leh a farnu te kiangah Liansanga te nen kalin an inbe khat hle. Thansanga chuan "Inrûn hi a va ṭha lo tak em. Tunah chuan kan khua a awm ta lo" a rawn ti sap a, Lianmawia rilruah erawh "BUALTHLENG MAWITU PASALṬHA tih thu hi eng tikah ri leh tak ang chu maw?" tih chauh a awm thung.