PASALȚHA LIANMAWIA BUNG - 49

Zehtet khaw zawlbuk chhung an zu luh chuan Hratzuala pawh a mutna tur a lo siam mek a, Lianmawia chuan pan phei vatin a bulah chuan a mutna tur chu a va siam ve sawk sawk a, Hratzuala hmel nung deuh sarh avang chuan chanchin țha lam anih ngei ringin a lawmpui hle. An han mu ta a, ti chuan Lianmawia chuan chanchinte zawtin Hratzuala pawh chuan thil a kal tluan ziate chu hrilhin an țhian dun chuan an han inlawm pui leh rih a, ti chuan tawnmang lama an chhai lai dite chhai turin an muhil ta siai siai a. A tuk zing Lianmawia zu haw chu an luhkaa tlangval pakhat lo țhu reng chu hmuin a pan thla vata, a hmel a zu hmuh chian rual chuan "Khai aw, Hranga chu i dam maw? Teh hlawl che chuan" a zu ti a, Hrangseipuia chuan "Ka dam lai tak a ni e, kha i va tho hma ve" a lo ti a Lianmawia chuan "Ekhai, mi hnukhawia țan bîk zawng a zahthlak duh em alawm maw le, kha engtik laiin nge i lo thlen a?" a ti a, chutih lai chuan a nau Sangthanpuii tui chawi zo rawn haw mek a hnung lawka lo ding reng chuan "Leng hnawt ar khuan hnu lawkah khan a lo thleng alawm." a lo ti vat a, Lianmawia chuan "Sangi, ka nu va pui rawh, mipa titinaah inrawlh loh tur" a lo ti vata, Sangthanpuii chuan "Mipa ho ve hi a" tih hlak pahin inchhung lamah chuan a lut a, Lianmawia chuan Hrangseipuia bulah chuan "Ka nau hi zawng, a kum hi a țhan san nasa em maia, a rilru a țhang tel ve si lo hi a pawi anih hi" a ti sap a, Hrangseipuia chuan "Kum a han vei anga, i naute zawng nula hleitling leh hmelțha tak a ni ngei ang. Ka nghak lian mai dawn emaw ni ka ti rilru mek anih hi" a han ti fiamthu a. Inchhung lamah inzui lutin a pa lo tho chhuak ve mek chuan "E Taite, kha Hranga khan thu pawimawh tak a rawn keng tlat mai a, lo sawi dun teh u" a ti a, Lianmawia chuan chhang lem loin tui hmun lam a pana a va inphih fai sawk sawk a, ti chuan leihkapui lamah an kal phei ta a. "Liana, ka pi Țiali chu a ngaihtuahawm khawp mai. Mahse, a fapa U Chawiliana fate leh a tute ang chiaha a en Lal fapa Doliana leh Lal fanu Vanthangpuiite hmel a hmuh leh hunah erawh a zia chho sawtin ka ring. Tukțhuan kil zawh lamah Bualthleng lam chu pan leh nghal ka duh a ni" a ti sap a, Lianmawia chuan "Ekhai, nangmah chauhin i kal bîk tawh lo ang. Kan kal dun dawn nia." a lo ti vat a Hrangseipuia chuan "A tihzia khawp ang, inthlahrunawm viau mah se mahni chauha ram pa lailenga han tei zawng a ninawm țhin emai" a ti a, ti chuan thil dang sawiin an inkawm a, tukțhuan kil hun a lo nih chuan kil sawk sawkin an inpeih fel hnu chuan Liansanga te in lam an pan leh te te a, Pi Țialthangi chanchinte chu hrilhin Dammawia hnena zualko turin tlangval pawh an intirh thute hrilhin ti chuan Bualthleng khaw lam pan chuan an kal ta a.

Hratzuala tukțhuan kil zo pawh tei chhuakin Lianmawiate inah a va luta, Lianmawia nu leh a nau chiah a va hmuh chuan "Ka nu, khawnge Liana hi?" a va ti a, Pi Țialthangi chuan hmanhmawh thlak taka Bualthleng khaw lama Hrangseipuia ruala a kal tak thu chu a lo hrilh a, Hratzuala chuan "Mi pawh han hrilh ve awm alawm maw le aw, țhian karah Hranga pawh chu a va inthlahrung ve maw le" a tih nang nang lai tak chuan Upa Chawnga leh Liansanga chu an lo inzui lut hlawl a, Liansanga chuan "E, Hrata hei ka nu hmu tura kal ngei chu ka duh ve si a, ka rualin lo kal ta che" tiin a sawm a, Hratzuala chuan "E, nangin i tihte chuan ka lo kal ange, ka va insiam vat ange" tiin a chhuak ta a.

Bungtlang khaw lamah chuan Pi Țialthangi chu hmana a taksa mawina te kha an chuai tawh a, tar vun chuar ve pangai tak ni tawh mah se, a vun chu a la engin a hmel pawh a la fai vanga, mahse, a taksa a chak lo hle tih chu a mitmeng dul eng lip lepah te leh a kut țang cher rik riakah te chuan a hriat theih a, a pasal nen an hun hman dun hlimawm takin a liam san hnuah hlim ni reng a tawng thei tawh lo a, tunah a lei taksate a lo chuai țan tawh bawk nen, a hrisel loin a khat tawkin buaipui ngaiin a awm chho zeuh zeuh tawh a, Thansanga chuan a nu chu a thi mai ang tih a hlau hle, mahse, a ni telin a nu taksa chu a tla hniam zela, ni lum ai tur tak ngial pawhin hruai chhuah a ngai ta.

Tlai lam zanriah kil hun lai a ni a, Thansanga chuan a fapa Hrangliana leh a nau Thangvelite chu thu țha tinreng a hrilh mawlh mawlh a, "Hei, Taite, nakin lawkah Zawlbuk kai rual i la ni ve anga, tun ațang hian i nun hi i uluk chhoh hle a ngai dawn tih hria ang che. Thangte nang pawh, rawlthar rualte'n an fiam reng reng chein thinrim ringawt loh tur a ni a, mahse, hmeichhia i nihna hmanga an chhaih nawmnah che anih erawh chuan mi hrilh vat zel ang che" a ti sap sap a, khumpui lama a nupuiin a nu chaw a a hrai mêk lam chu enin, a nu dam loh hnu hian an chhungkuaa hlimna tak tak awm țhin kha a bo tial tial tih te a ngaihtuaha, a u lo thleng vat vat se a ti kher mai. Zan lamah chuan a nu rawn kantu an rawn awm nak nak hlawm a, chungte chu lo chhawnin Thansanga chu in pawh chhuahsan loin a awm a, an Lalnu, a farnu ni bawk Thangliani pawh a nu bulah chuan awmin a khat tawkin a mittui a tla leh zauh zauh țhin a, Lal fanu, an tunu ni bawk Saipari pawh a pi bulah chuan a țhu ve kar a, a pi chu a khat tawkin zawhna mawlmang tak tak a zawt leh țhin a, rin ai takin a pi pawhin a hlim pui phiana chau tak chungin a rawn nui ve leh hak hak țhin.

A tuk tlai khaw thim thet thet thet tawhah chuan Zehtet ațangin Liansanga leh Hratzualate an lo thleng ve a, Thansanga te nen an inhmuh chuan an lung a leng thar hle a,an inhmuh chhan lahin a zir si lo. Pi Țialthangi kuta vawn pah chuan "Ka nu i fapa Liansanga ka lo zin a sin" tiin Liansanga chuan Pi Țialthangi chu a han en vang vanga Pi Țialthangi pawh chuan lo nuih pahin "Ekhai aw, ka fapa i va ngaihawm ve? I nupui fanaute an dam a maw?" a lo ti ve a, Liansanga chuan "Aw ka nu, kan dam tlan lai tak a ni e, i ngaihawm em a ka rawn tlawh che anih hi" tiin a kiangah chuan a țhu ve a, Thansanga pawh rawn țhu phei ve in patling ram vak ngai tawh lo, mahni in luma chhungkua uap lum tawh ve ve an ni a, an naupan laia Dama nen an pathum a an pangchan ber ṭhinna an nu Țialthangi kiangah chuan awmin an lung a leng tlâng hle, patling mah ni se an mittui an hru an hru mai a ni.

Chutiang reng renga zan thum an hman ral leh hnu chuan Bungtlang khaw chhungah chuan tlangval pahnih silai keng leh anmahni hruaitu Lal puan bat chunga lo kal leh a kianga upa ni ngeia lang pa pahnih lo kalte chu mi puite chuan an en duh hlawm hle. Chung mite lah chuan an khua chu an lo kal fo tawhna ni awm takin a khaw thleng chu an hriat hmel viau bawk si a, mak an ti kher mai. Thansanga thing ek chuan hla taka amah lo pan mêk tu mi pangate chu en vang vangin "Ekhai aw! Liana, Dama a ni reng mai" tiin a pan phei ta a, in chhung lam ațangin hmanhmawh takin Liansanga chu a lo chhuak ve bawk a. Dammawia nen an inhmuh leh dan chu a danglam ta kher mai, Țhangzing Lalpa thih hnua Lalna chelh mêk tu a ni miau a, chu mai bakah Țiau ral pawih khuate'n Țhangzing Lal fapa rawlthar huaisen Mangliana an tih ṭhin naupangte ni chunga a huaisenna vaiw tam tak sa hlauhawm laka lo ti lang tawh tu hringtupa a ni tlat. Dammawia chuan "Sangte, i dam maw?" tiin Thansanga mitah tak chuan en pahin a chibai a, an invawnna chu an thlah palh ang tih hlau awm takin patling leh patling chu lai hmunah chuan in en tlawk tlawk chungin an inchibai a, rei tak hnuah Dammawia chuan Liansanga lam chu panin mittui parawl kuang chungin "Liana, nang i dam a maw?" tiin rei tak a han chibai ve leh a an rilrua an nunhlui an chhui kir mek, an lung ti leng a an hnuk ti ulh mêk tu chu tuman an hriat pui si lo. Neihthanga chuan "Hawh teh u, in chhung lamah i lut ang u" a rawn tih rual chuan inthlahin Thansanga chuan 'Neiha, i dam a maw? "tiin a rawn chibai ve a, Chhawnsanga chu chibai lehin inchhung lamah chuan an lut ta a. Pi Țhialthangi chu khumah an lo țhut tir a, Dammawia chuan engmah sawi loin a mitah tak enin a va țhut hnaiha. Pi Țialthangi pawh chuan Dammawia chu ngun taka en vang vangin tunge anih a hre chhuak mai thei lo, mahse, tuibur hmuam da vel zet a thlir hnu chuan "Ekhai aw,ka fapa Dama, Lal puante i lo bat a ni maw? Ka va ngai țhin che em." a lo ti a, Dammawia chuan "Ka nu, i la hmelṭha reng anih hi. Ka rualin lo haw ve tawh la, ka bulah awm ve tawh rawh. Sangtea bulah i awm rei tawh bîk emai" tiin a han pangchang der vel a, Pi Țialthangi chuan nuih hak hak pahin "Kei ang tar chhiate chu min ning hma awm emai a" a lo ti ve a, Dammawi zawng a la ngai reng a, a thusawi ho te te pawhin hlimna a la thlen thei zel a ni. Chumi ni chhun leh zan chuan a nu ang chiaha a en Pi Țialthangi chu vawi khat mah a kal hlat san lo a, khaw khat Lal ve meuh anihna chu dah țhain Pi Țialthangi bulah chuan awmin a mutthilh changin a harh hun a nghaka, a harh veleh titipuiin a ti nui leh hak hak ṭhin.

A tuk fehreh san hunlai vel chuan Pi Țialthangi thaw chu a rawn buai țan ta tlat maia, rang taka bawlpu ko vatin Bawlpu chuan inchhunga awm te chu chhuak turin a hrilh nghal zung zung a,ti chuan a theih tawpin Pi Țialthangi chu a buai pui ta zung zung a, a zawh fel meuh chuan a thlan tui a far zawih zawih a, ni pawh a her bawih tawh hial a ni. Pi Țialthangi pawh a ziaawm ve leh ta deuh a, tui takin a muhil siai siai a ni. Lo sul haw hun hma deuhah chuan Bualthleng lam mite pawh an lo thleng ve ta a, Chawiliana chuan hma rawn hruaiin a hnunga putar cher chhe tak lo kal ve chu tunge anih ang aw tiin an lo inrin siak a, mahse, an lo hnai deuha an han hmuh chian chuan putar aw zawng a ni lo tih chu pa hmelah chuan an hre chiang hle. Ni, sapui sual kut nasa taka tuartu Hmingthanga hmai vun te chu a ser kual nei nuai a, sakei nen an inbeih laia a lumna lamah a hnungzang a sawh khaw lo a,tun thlengin a kal kun deuh dan dan phah hial a ni. Ral khat ațang chuan putar ni awm tak a ni reng bawk a. Mahse, pasalțha huaisen, a khaw mi leh sate tana a beihna a vanga hetianga awm anihna hi a țhiante leh a chhungte'n an chhuang em em thung. Thansanga chuan inchhung lama a nau Thangliani chu koin "Thangi ka u" a ti sapa rang takin Thangliani pawh lo chhuakin a pasal Lal Saingura'n a lo zui bawk a, Thangliani'n chutia an unau zinga upa ber, a pa awm loh hnua engkima engkima an inghahna a u Chawiliana a hmu leh chu a nu avanga a rilru hahna leh natnate chu rawn thar lehin a u awmah chuan a hmai phumin khaw khat Lal nu chu a țap nghal hawm hawm a, a kut vei lama a awm leh lama chum pahin "Ka u, i lo va kal har ve, chhunah khan ka nu sawn min kal san țep a sin" a ti mawlh mawlh a, Chawiliana chuan sawi mai tur pawh hre loin a hawi kuala a mittui tla tur chu dang hram hramin mittui tla zawih zawih chunga Thansangate leh Hmingthanga lo inchibai kualte chu enin a makpa Saingurliana chu nuih sakin "In dam maw?" a ti lawi rut a, Lal Saingurliana pawh a hnuk a ulh ve nasa tih a țawngkamah a hriat hle a, zawi thawp satin "Dam țhat lai a ni e" a lo ti chhuak țawk a ni. Naupangte a nih laiin a nu leh pate a chan a, a khua an chhuh sak hnuah a nei let leh a, chutah nupui neiin a nupui a nu Pi Țialthangi hi a nu ang chiaha a en a ni a, a tuar ve hle. Chawiliana chuan a nau sama chul pahin "Ka nau, duh tawk rawh, Lal nu inih kha. Hawh teh ka nu chu ka va hmu ve ange" tiin a nau chu a kuaha, a hnunga lo ding ve a nupui Parzaliani leh a fate Hrangvunga leh Zochawisangi bakah Lal fapa Doliana leh Lal fanu Vanthangpuiite chu hui zauhin " Lo kal ru le" tiin inchhung lamah chuan a luh pui ta a. Pi Țialthangi lo kantu mi tlemte te chuan țhut na te an lo kian sap sap a. Pi Țialthangi chu a lo la mutui hle maia, ti harh duh loin Chawiliana chuan a fate ho hnenah chuan an pi chanchin chu chhuang takin a hrilh a. Doliana chuan "Ka pa Chawi, kei leh Vani hi ka pi nen hian thisena inzawmna kan nei hauh lo tih kan hria a, mahse, a ni tluk nu ropui leh hmangaihna ngah hi an awm ka ring lo a ni. Ka pi hian a tute ang chiaha min enin min hmangaih em em si a. Ka tlangval tak tak huna la zawn hmuh leh ngei ka tum ṭhin a, mahse, ka hmuh leh dan hi a danglam tawh hle mai"a ti sap a. A bula țhu Vanthangpuii pawh chu a lo insut ve hruih hruih a. Zan riah kil hun a hnaih tawh avangin Lal in lamah hmeichhe ho chu chhoin ei an han rel a, an peih fel hnu chuan in ei chhawkin Pi Țialthangi rawn harh huna a ei turte pawh an dah sak thlap bawk a. Mahse, harh a hnekin a mutui siai siai hle maia, a tu leh fate tan chu aia hmuhnawm chu a awm chuang lo.

Leng hnawt ar khuan lai vel chuan Pi Țialthangi chu rawn harhin a hawi kuala, a bul hnaia a tute lo awm țhup chu en kualin a hmelah chuan a chau hle tih a hriat a a fapa Chawiliana te nupa zawnah chuan a mit chu a tawp chata, chutah "Ka hmu leh thei che u hi ka va lawm em. I pa'n min lo nghak reng tawh a ni. A bulah ka kal ve dawn a ni" a rawn ti a, Chawiliana chuan " Ka nu, i tello chuan engtin nge kan awm ang i fate hian i dam tih kan hriatin kan thla a muang a sin" a han ti a, Pi Țialthangi chuan chhan pawh chhang loin a tute ho chu a en kuala, Doliana leh Vanthangpuii te chu nuih luih sak pahin " Lal fapa leh Lal fanu chhuanawm tak lo ni zel rawh u" a ti a, Vanthangpuii mittui chu a sur nghal zung zung a, Doliana pawh a insehruh nasa hle. Chawiliana fate, Thansanga fate leh Thangliani fanute, a tute panga an han țhu tlar țhap a hmuh chuan a hmelah chuan hlim hmel dik tak a lo lang leh a,"Tui min pe teh u" a ti a, Thangliani chuan va la in, Hmingthanga chuan thei leh thei loin a lo ban vata "Ka nu, Hminga ka nih hi, ka lo thleng tlai lutuk a ni. I kianga awm ka chak teh lul nen" a ti a, Pi Țialthangi chuan nuih sak pahin tui chu tlem a han in a, ti chuan mu lehin a thaw chu a zawi tial tial a, a fate leh a tute chuan an lo en reng a, tuibur hmuam da hnu velah chuan a awm chu a rawn insep dawrh dawrh a, Lalnu Thangliani aw rawl chuan chhunzawm nghalin a monute leh a tute țap thawm chuan a rawn zui ve nghal bawk a, mipa ho pawhin tawrh har an ti tlâng hle. Nu ropui, chhel taka a fate hoin a hmel an hmuh leh theih hun nghak țang țang tu chuan a tu leh fate hmel a hmuh kim hnu lawkah pialral lam a pan ta a, amah lo nghak rengtu a pasal, Pasalțha ropui Thanhranga kiangah an tu leh fate chhuanawm zia chu a hrilh ve ngei ang le.

Nu ropui, hmangaihna a khat leh hmeuchhia a zawnga chhel ber chuan a pasal lunghahna hmunah pawh a lu nghat ve loin a ruang chu khaw dangah an phum mai a ngai ta si. Țap thawm avang chuan Bungtlang khaw mipui feh haw hmasa apiangte chuan Thansangate in chu an rawn pan a, an khaw Lalnu hringtu, an zah em em a thi ta mai chu an ui tlang hle.Tlai ni tla tur chu kawlah a eng sen phut mah se, Bungtlang khua chuan a mawina chu a hmu ve hauh lo. A ruang chu lumenin zanah an tlaivar a, a tukah a thlan tur tlangvalte'n thuk taka an laihah chuan an phum ta a. Mipui an țin fel ta maw tihah Chawiliana chuan a naute pahnih chu kuah chungin "Ka pa, ka nu a lo kal kha aw, hlim takin awm tawh rawh u. Keini unah chu min lo ngaihtuah reng reng suh u" tiin a țap ta rawih rawih a, a naute pahnih leh an fate ho chuan rawn chhunzawm vein an nu thlan kianga an rum ri chu Țialthangi'n a hre phak tawh si lo. An chhak deuhah chuan Dammawia leh Liansanga leh Hmingthangate chu lo ding vein an pathum chuan inbe hauh loin ral hla tak an thlir ṭheuh a, an mittui sur zung zung chu dan an tum lo. Lianmawia leh Hratzuala pawh Hrangseipuiate nen Pi Țialthangi fate rum thawm ngaithla chungin an lo ding ve kar a, an hnuk a ulh nasa tlâng hle.

An lungchhe zualpui a reh fel hnu chuan in lam an pan ta a. In chhung an han luta an nu sulhnu hlir an hmu a, an lung a ti lengin hmeichhe ho chu an țap leh rih țhina, mipa ho erawh inti pachangin leihkapuiah țhuin an titi a, an hmelah chuan thihna an tawrh zia lang mah se an nui lui hram hram a ni.