HNUNG TAWLH NGAI LO MI HUAISENTE - 1

In kâng khu luih luih kârah chuan nunau mangang ṭe thâwm chu a ri hut hut a, silai puak ri leh zauh ṭhîn kâra patling na tuar rûm ri leh chem inkhak ri chhuai chhuaite chu hriat a va hrehawmin a va râpthlâk tak em. Zing khua a vâr meuh chuan Vângpui khua chu a kâng ral vek tawh a, in zaruk nufa, Lusei khaw lian tak, Pasalṭha pawh nei ve nuk si chu an inthlahdah luatah an tlâwm a ngai ta. Vângpui khaw mipui tam tak chu Paite ho chuan salah manin an khaw ropui Tlungvêl lamah an kâi haw hnak hnak a, naupang nawi leh tar zual puite chu rilṭâma thi tûrin an kal san ta a. Tlungvêl Lal Songlawia'n a pasalṭha Bialchhâwna leh a tlangvâlte hlawhtling hmel a hmuh meuh chuan a thla thum zu chawi thlàin a lo lâwm a,"HNUNG TAWLH NGAI LO MI HUAISENTE an hlawhchhâm ngai lo ve" tiin a chhuang hle. Ro pui taka râl lu aiin an ri hut hut mai a, an sal mante chu insemin nula tituai nalh deuh pahnih lai chu Bialchhâwna chuan a chang ve bawk a, a vânnei bîk hle.

Tlungvêl khuate'n Lusei khaw lian Vângpui an rûn thu chu a darh chak hle a, Paite khaw hrang hrang ho chuan Tlungvêl khuate chu an huaisen an tiin Lusei ho an han do ngam mai chu an ngaisâng êm êm a, Tlungvêl Lal Songlawia leh a pasalṭha Bialchhâwna chu an ngaisâng hlawm hle a, an hlawhtlinna chuan an hnam pui tlâng hrana lêngte rilruah huaisenna chì tuhin hun rei tak an lo ngam tawh loh Lusei ho beih lêt duhna chu an pâi ṭheuh a, Paite khaw hrang hrang pasalṭhate leh tlangvâlte chu Lusei khaw pakhat Rotlâng khaw rûn tumin an intêl khawm leh ta mup mup mai le. Tlungvêl Lalin Paite khua zawng zawngah palai a tirh avângin Paite khaw dang ho pawh an phûr hle a, an hruaitu atân Pasalṭha Bialchhâwna chu an thlang chhuak bawk a, nasa taka chêt an duh avângin inbuatsaihna hun pawh an mamawh rei dawn a, chu mai bakah an beisei rûk em em Sengzau khaw pasalṭhate an lo la thleng lo bawk a, lo nghah rih mai an tum a ni.

Tlai ni tla tûrin kâwl a ên sen phût mai a, Phûlraw tlâng ṭo lurh kârah chuan a liam zêl bawk a, Rotlâng Lal Zabiaka leh a upate chu leihkapuiah ṭhuin Vângpui khaw ho chhiat tawh chungchâng chu sawiin an thin a rim tlâng hle. Upa min Vuana chuan "Lalpa, kha kan Pasalṭha Ngûrzîka khualpâng zin khan Paite ho chuan min rûn tumin an inbuatsaih mup mup mai a rawn ti tlat mai a, engtin nge chêt kan lo lâk dawn ni" a han ti a, Lal Zabiaka chuan "Ekhai, Nghâka pa hlau mah suh che, kan Paite ho chu an lo thlen hunah kan hup barh mai dâwn a lawm. Kan pasalṭha Ngûrzîka leh Muandawkate an awm chhûng hi chuan ka thla a muang a ni. Mahse, fimkhur erawh a ngai dawn hle mai, Paite ho chan ṭhat lai anih avângin tam tak an rawn thawh chhuah ngei ka ring a ni" a rawn ti ve bawk a, Upa Luaia chuan "Lalpa, Lunglêng khaw lamah palai kan tîr mai dâwn em ni? Leite lama kan tirh bawk chuan Paite ho ai chuan kan tam zawk ngeiin ka ring a ni" a rawn ti a, Upa Min Vuana chuan "Ni e, Lalpa i fapa Vânhmuaka khua Thingsai lamah te pawh tîr i la a ṭha lo'ng maw?" a rawn ti ve bawk a, Lal Zabiaka chuan a upate zînga a rin berte pahnih awka aṭang chuan an zâm a ni tih a hre thei mai a, amah ngei pawhin a huphurh hle tih chiang takin a inhria." Ni e, ka upate remruatna nge nge a ṭha ṭhin e, naktûkah palai tîrh zai chu kan rêl dawn nia" a rawn ti ve ta a, ti chuan zanriah kîl tûrin inlamah an haw ta a. A tûkah chuan tlangvâl pali tê tê a inkawpin Leite, Lunglêng leh Thingsai khaw lamahte chuan an kal ta a, Leite leh Lunglêng khua hi Rotlâng khua aṭanga chawhma kal vêl hleka hla a ni a, khaw inhnaihte in hmu pha reng an ni nghe nghe. Thingsai khua erawh kawng lakah zan khat riah a ngai thung.

Thingsai Lalpa Vânhmuaka chuan a pa tlangvâl rawn tirhte thu chu ngun takin a ngai thla a, Paite ho thil tum a lo râl hriat rûk chu a dik ngei a ni tih a hre chiang bawk a, a pa tlân chhiat san chu a tum lo kher mai. A pa tlangvâlte lo thlen tûkah la la chuan a tlangvâl sawmsarih chuangte chu Rotlâng khaw lamah a tîr ta a. Rotlâng khua an va thlen chuan Leite tlangvâl sawmnga vêl pawh an lo awm tawh a, Lunglêng khaw tlangvâlte erawh an Lal khawnbawlte zîngah kal tir duh lo tu an awm avângin an rawn la kal thei lo a ni, mahse, Lunglêng khaw lama kal tlangval Thangkhûma leh Zîngchhûanate thu sawi dânah an Lalpa berin kal tîr a duh avângin an rawn thlen ve thuai an ring a ni.

Zân thla êng no riai chuan a lunglêng ṭhinmite lung chu a dum hle a, hla hrilin Lal inah pawh Lal leh upate chu an ri ve hlarh hlarh a, tlangvâlte pawh an nula rîmte nen leihkapuiah ṭhuin an ri ve dar dar ṭhin. Pasalṭha Ngûrzîka leh Muandawkate erawh Ngûrzîkate in lamah awmin an hma lâk dân tûr chu an sawi dûn nep nep a, "Chalzawni nu lo kâwn piah lawkah sawn tlangvâl sawmnga vêl lo biru se, Paite ho nen an inkah vela Paite ho hnung lam aṭanga lo bei thut tûrin Sekawi ram lamah sawn lo biru bawk i la, Sekawi ram lam hi rawn paltlang nachâng an hre hauh dâwn lo a, Saibu lui an rawn kân zawk ngeiin ka ring a ni" tiin Ngûra chuan a ngaihdân chu a han sawi a, Muandawka chuan "Ni e, i ngaihdân chu ka pawm zawng tak a ni. Belkhai ruam lama kan ûm thla thei anih vaih zawngin kan chan a ṭha ngei ang" a rawn ti ve sap bawk a, Ngûra chuan "Ni e, U Dawk, a upa zawk i ni a, nupui fanau nei tawh i ni bawk a, nang chu khaw hmun nghâk tlangvâlte kiangah i lo awm a ni ang chu." a han ti sap a, Dawka chuan "Ekhai, ka nau, i kiangah ngei râl ka bei leh dawn a ni. Kan khaw tan mai ni lo, Lusei hnam tân hian ka bei dawn a ni" tiin a chhâng a, tuibur hmuam da vêl an han ngawih vang vang hnu chuan Dawka bawk chuan "Chhim lam pasalṭha huaisen Chhuahchawngate vânglai kha la ni ngat se chuan Paite ho hi an rawn pâwng ngam hauh lo ang maw le" a han ti leh sap a, Pasalṭha Ngûra chuan "Ni e, Lusei Pasalṭha chhuanawm ber berte an ni a sin maw le, a fapa Lianmawia lah Zehtet khaw ropuina zînga mi ni pha ngat a ni a, an ni ho kha râl kai thei la ni ngat se zawng, an thla zâr hnuaiah Lusei hnam tinte thlamuang takin kan awm leh tûr" a lo ti ve bawk a, Pasalṭha Muandawka chuan "Ni e, i sawi chu a dik ngei e. An hming ringawt pawh kha thlamuan pui tham a ni. Mahse, an hun a liam tawh a, kei pawh ka hun a liam mêk zel anih hi. Ngûra i hun erawh a inṭan chho mêk a, kum naupangtein ram lama thangchhuahpa i ni dêr tawh a, kan khua leh a chheh vêlah nang aia sa kâp thei hi an awm hauh lo a nia. Tun hi i pasalṭhatna râl hmaa i pholanna hun chu a ni"tiin a chher chhuan Pasalṭha la naupang tak Ngûrzîka dârah chuan a bêng thak thak a.

"Tlangvâl huaisen, hnung tawlh ngai lo tûrte u, Lusei khua bei tûrin in inpeih ta e. Vawin niah hian kan kiangah kan hnam zînga kan chhuanvâwr Sengzau Pasalṭhate tel lo mah se, kan theihna te hi Lusei ho bitumna'n chuan a la ṭha mah mah zawk a ni. Hlawhtlinna chang ngei tûrin kal u la, in hnam puite'n kan lo nghâk reng dawn che u nia" tiin Tlungvêl Lal Songlawia chuan thlahna thu a han sawi a, ti chuan Paite tlângvâlte chu Rotlâng khaw lam panin khaw chhak lam panin an kal ta a. Kawng lakah chuan Pasalṭha Bialchhâwna chuan an kal zêl dân tûrte rêlin khaw hran hrana Pasalṭha lo kalvete nen chuan an tlangvâlte chu hneh takin an kîlkawi a, Sengzau khaw ram chin an luh chuan an sawmna ngai pawimawh lo tu an nih avângin khuaah pawh lût duh loin an hêl ngat ngat a, khaw thim fel rualin Sengzau khaw ram chin chu an chhuahsan leh thei ṭawk a ni.

Phûlraw tlâng chhip hring dup leh zawl nuam êm êm maiah chuan Rotlâng Pasalṭha Muandawka te, Leite Pasalṭha Taichhûnga te, Thingsâi Pasalṭha Sanglianate leh ni hmasa lama Lunglêng tlangvâlte rawn thlen puitu Pasalṭha Lengâwiate chu an ding a, Pasalṭha Muandawka chuan Pasalṭha Ngûrzîka nen a an ruahmanna lo siam te chu a kianga ding Pasalṭhate bulah chuan a hrilh hlawm a, an ni pawh chuan a ram leilung hre chiangtute ruahmanna lo siam chu thlâk danglam a ṭulin an hre lem lo bawk a, khuaa an lêt leh hnu chuan tlangvâl sawm thlang chhuakin Saibu lui awmna lama an khaw ram chin perh an târna hmunah râl an lo hnaih leh hnaih loh enthla tûrin an tîr liam ta nghal a. Zan hnih zet awm hmun an zu khuar hnuah chuan Khûma chuan khua chûanin thingkung sâng takah a han lawn a, râl hla takah mei êng chu a hmu ta a, chu veleh hmanhmawh taka chhukin "Zînga, mei khu ka hmu tlat mai hawh teh i va fiah dûn teh ang. Midang erawh hetah hian lo awm u la, khawvâr ruala kan lo lêt lo anih chuan khaw lamah haw vat ang che u" tiin an kal liam nghal a, an kal liam hnu chuan tlangvâl ṭhenkhat chuan Khûma chu hawihhawm lo an ti hle a, "Rawlthar, hmanni lawka Zawlbûk rawn lawi ve, hmeithai fa lehnghalin ro ka rêl e tiin thu min han pêk khanglân chu le, Pasalṭha Ngûrzîka hian duhsak viau lo phei se chu tu zah mah a kâi âwm tawp si lo" tiin pakhat chu a han âng hlak hlak a, an zinga pakhat ve thung chuan "Khatin hmeithai fa anihna hmusit ngawt suh. Thangkhûma leh Zîngchhuante huaisenna hi kan pasalṭhate hian an lo hre ru kar a nih ngei ka ring. Kan kal dawnah pawh Lalpa meuhin kan hruaitu tûra a ruatte an nih hi" tiin a lo hnial kalh vat a.

Khûma leh Zîngchhûanate ṭhian dûn chu rawlthar tha zâ tih takah zan thimah meichher pawh tel loin ram hrui zâm hnawk nei nuai kârah chuan hmanhmawh takin an kal sawk sawk a, Khûma mei êng hmuhna an va thlen meuh chuan Paite tlangval za thum rual dawn lo ri hut hut chu an va hmu ta a, bûk pawh hmun ruk laiah sain bûk tualah chuan a ṭhen an lo inbuan luih luih bawk a. Khûma chuan "Zînga, an va tam ve le, Lunglêng ho kha lo kal lo phei se chu keini aiin an tam dawn anih hi maw le" a han ti zawi sap a, Zîngchhûana chuan "Khûma hlau mah che, Paite ho chu kan sat hlum zawih zawih mai dawn alawm" a han ti a, Khûma chuan "Silai han neih vete hi a châkawm ṭhin mange" a han ti leh sap a, Zîngchhûana chuan "Ni e, mahse, kan michhiatna hian silai chu min phû tîr hauh si lo anih hi, eng pawh ni se, i lêt leh vat teh ang, tlem tal mut tum i la, zing khawvâr rualin kan haw nghal dawn nia, zan hnih bâk an rawn thang tawh hauh lo ang" a rawn ti a, ti chuan an inkhuarna hmun lam panin an kal ta a.

Leng hâwn ar khaw chhûnga a khûan âl âl lai chuan Paite tlangvâl zathum rual dawn a tam chuan Saibu lui chu an rawn kân fel tawh a, Rotlâng khaw lam aṭanga an awmna lam a hmuh theih loh avângin meichher nen ramhnuaiah chuan an kal a, mahse, Sekawi ram lama biru Pasalṭha Muandawka leh a hote chuan an hmu chiang kher mai. Kawng ṭum pangai an pawh tawh ang tih velah chuan an hnung lam aṭanga bei tûrin an zui ve ta nghal a, chutih mêk lai chuan Pasalṭha Bialchhawna chuan a naute ho chu a fuih sauh sauh a, "Lusei ho, pawih râl hlaua tlanchhiate lo ngam lo lehchhâwngtu kan ni tih hi kan thlahte'n an hriat hunah min zah pui ngei ang. Chu vângin huaisen takin kan bei anga, kan hneh leh ngei bawk ang, sal tam tak kan hâwn anga, kan Lalte tâna chhuan tlâk ni tûrin kan che ang. Thih kan hlau tûr a ni lo a, a ṭul chuan mipa chu kan thi mai tûr a ni. Hei kawng pangai zawh hi a him tawk viau a, tluang taka kan kal chuan zanlai ar khuan hun velah Rotlâng khua chu kan thleng thei êm êm ang"a han ti a, Paite tlangvâl ho chu an phûrin hmelma lu han chhawk hmawk hmawk an chak zia sawiin an ri nak nak a, mahse, chutih lai tak chuan an rin loh takin an chhak lam  aṭangin silai a lo puak ta dur dur mai le, mahni sahimna zawngin a ṭhen an tlân lêt a, a ṭhen an bawk a, a ṭhen hma lam panin an tlân bawk, an buai nuai nuai a ni ber. Pasalṭha Bialchhawna chuan mumal lo taka an che zêl anih chuan an inchân hnem lutuk dawn tih hriain a naute chu a au khawm zung zung a, an lo kalna lam a lêt leh a tum lai tak chuan silai a rawn puak leh ṭhuai ṭhuai ta mai. Hmun hnih aṭanga beih an tawh tâkah chuan an inchân nasa ta hle mai a, duhthlan tûr awm miau hek lo le, Bialchhawna chuan a naute chu hmanhmawh takin thlang lamah a tawlh liam tîr zut zut a, amah chuan hnung dâwlin a khât tawkin silai a puak reng bawk. Belkhai lui an zu thlen rual chuan Sekawi ram lam aṭanga lo kalte zinga tam tak khan an lo lehkhalh hman avângin an inchân belh leh nual bawk a, mahse, Lui lian anih loh avângin awlsam taka dai kaiin lung lian pui pui rinchhanin ṭan khawhin Lusei ho chu an kâp lêt ve ta a. A khawi lam ve ve pawh an fimkhurin silai an hmet puak mai mai duh lo a, zanthimah thla êng hnuaia inhmuh fuh chu thil har tak mai anih avângin silai puak ri pawh a khât hle. Inpawm chilh erawh a khawi lam ve ve pawhin an huphurh tih hriat takin a khât tawka silai puak ri leh, na tuar ri awm leh zauh ṭhin bâk chu thâwm dang a awm lem lo.

Khûma chuan an pasalṭha Ngûrzîka bulah chuan "U Ngûr, pawm chilh mai i la, kan chan a ṭha zawk ngei ang maw le, kan tam zawk tawh ngeiin ka ring a ni" a han ti a, Ngûrzîka chuan "Ni lo e, kan chan ṭha zawk dawn mah se kan panna lamah tam tak kan inchân hman dawn a ni. Silai nei ve tho an ni tih hriat a ṭul a sin" tiin a chhang a, Khûma chuan "Chuti anih si chuan Khurthar lui lam aṭanga hêlin i lehkhalh mai i la" a han ti leh a Khûma chuan "Ni lo e, Khuthar lui lama kan hêl chhûngin lo inpawmchilh ta se, kan tân a pawi dawn a ni. Ti hian a pharh thei ang bera inzâr chungin hual i la, zing khawvarah chuan an rawn inpe êm em ang" a ti a, Khûma chuan "Zankhuaa helai hmuna han ṭhut tlawk tlawk chuh" a ti nâng nâng a, Ngûrzîka chuan "Khûma, dawhtheih hi a ngai fo rêng a sin. Ti khan thâwm chhuah lo thei ang ber khan awm rawh, Zînga pawh a ngawih reng kha" a han ti a, Hlunzîka phun nâng nâng ri a hriat chuan a nui suk suk ringawt a.

Paite tlangval ho pawh an mang a ang kher mai, an Pasalṭha Bialchhawna hnenah chuan "Zan thim hnuaia kan inpawmchilh chuan kan chan a ṭha zawk hlauh thei, hetia a khât tawka kan inkah reng chuan khua a lo vâr anga, kan chan a chau ngei ang" an ti a, Bialchhawna chuan "Ni lo e, Lusei ho hi an tam lutuk a ni. Zing khawvar hunah ram leilung hi rawn lang se, pût chhuah theihna lai kan zawng vat anga, kan hnuh veleh kan khaw lam panin kan kal vang vang phawt ang, mahse, phuba erawh kan la leh thung ang" tiin a chhâng a, zan thim anih vanga a naute'n a lungngai hmel an hmu thei lo chu a lawm hle a, pût chhuahna hmu pawh ni se a ram neitu, ram chin hre zawkte chuan an lehkhalh vek tawh a ring a ni. Vawi khat hlawhtlinna an chan vânga an phur ta lutuk chu pawi a ti thar vawng vawng hle a ni.

Khaw fing a rawn chat fela leilung a rawn lang dêt dêt ta maw tihah chuan Lusei ho silai chu a rawn puak leh ta zawih zawih mai a, zan thim hnuaia an bihrukna te chu khaw ênga a him loh zia Paite ho chuan hre tharin an buai leh ta mup mup mai, chu chu Lusei ho chuan remchangah lain an rawn hnaih sauh sauh bawk nen Paite ho chu loh theih lohin an inpe ta a. Lusei ho chuan an râl thuamte lâk sakin an phuar mawlh mawlh hlawm a, a ngêng fâl deuhte phei chu Lusei tlangvâl ṭhenkhatte chuan an han piai leh nawk nawk ṭhin bawk a, Pasalṭha Muandawka chuan "Eng vânga min rawn rûn tum nge in nih le?" a han ti a, Paite ho chuan an chhâng ṭha duh hauh lo mai, Muandawka chuan Bialchhawna mitah chuan chiang kelh kawlh taka en chungin "In pawi kan sawi em ni?" a han ti a, Bialchhawna chuan "Lusei hnam tawh phawt chu kan pawi sawitute in ni" a rawn ti hrâwk a, Muandawka chuan "A ṭha e, kan man vek ang che u. In khua pawh kan rûn ngei ang" tiin khaw lam panin a kal nghal nal nal a, midang pawh chuan zui vein Chalzawni lo kâwn an han thlen meuh chuan an Pasalṭha Muandawka hmaa tlangval zaruk rual dawn lo ding khep khup chu an hmu ta mai. Lusei ho chuan an râlthuamte chu hman nghal mai inringin an dah a, mahse, an Lusei puite an nih avângin a beih erawh an bei hmasa êm lo. Pasalṭha Muandawka chuan "An pawi kan sawi hmasak pawh ni hauh lote'n min rawn rûn an tum a, an chan a chhiat hnuah an inpe a ni. Nangni kuta inpe ni loin kan kutah ngei hian an inpe a ni, tin, in awmna hi kan khaw ram chin a ni bawk. Kal kiang mai rawh u, kan Lal hnênah kan hruai phawt a ngai a ni" a lo ti hlawih hlawih a, a aw kî a sân êm avângin a thinrim hle tih an hre thei mai a. Lo dang tute zînga ṭang chuan pa pakhat hi rawn chhuakin "Kei hi, Zehtet Pasalṭha Lianmawia ka ni a, Paite ho ṭhian hi ka ni bawk. Tûnah hian in kal lui anih chuan Sengzau khaw pasalṭhate'n an bei nghal dawn che u, hual beh vek in ni. Lusei leh Paite inkâra inhmelmâkna a awm hi Zehtet khua leh Sengzau khuate hian kan rem ti ngai dawn lo a, chu vângin in mi mante hi chhuah rawh u"a rawn ti a, Rotlâng, Leite, Thingsai leh Lungleng tlangvâlte' n Pasalṭha Lianmawia an han hmu chu an ngaihsân hmel nge hmel loh tih pawh hriat lohin an en vung vung hlawm ringawt a, a thusawi chu a dik ngei em tiin an han hawi kual a, hnim lo che kual dat dat ṭhinte aṭang chuan hual beh an nih zia an hre chiang kher mai. Pasalṭha Lianmawia bulah chuan Pasalṭha tih hriat tak vanglai hmang mêk ni tûr hi a rawn ding ve a, "Kei hi, Sengzau Lal fapa Zâmthanga ka ni a, Pasalṭha Lianmawia'n a sawi ang khan nangni leh keini inkâra inhmelmâkna a awm hi kan rem ti lo a ni" a rawn ti ve leh a, Pasalṭha Ngûrzîka chuan "A ni maw? Vângpui khuate laka i hnam puite'n hnehna an chan hma khan i hnam puite hi dang tûr i ni a sin, engah nge a chan chhe zawk an nih vânga rawn puih tum a, inhmelmâkna awm lo tura i duh thu i rawn sawi?" a han ti lêt sak a, Zâmthanga leh Ngûrzîka te chu an mitah tak inenin a hawi sawn hmasa zawk nih chu an tum lo kher mai." Aw le, kei hi Pasalṭha Singzama Sengzau khua ka ni a, ka ngên a che u, chhuah u la, pangai takin i inṭhen teh ang u. " pakhat chuan a rawn ti leh a, mahse, Ngûrzîka te chuan tawlh mai an tum lo hle a, an inrâl ring hle. Pasalṭha Lianmawia beidawng chuan Sengzau Pasalṭha te chu koin, "Hei le, kan hlawhtlin ka rin hauh loh kha kan hlawhtling ta lo chu a ni reng mai le, an ni hian zah an phu si a, i kal tlang tir phawt mai teh ang u" a han ti a, Pasalṭha Zâmthanga chuan "U Lian, hmelma kan ni dawn a sin" a rawn ti ve leh a, Lianmawia chuan "Ni e, duhthlan tûr dang awm hek lo le, in hnam tan in beih a ngai a, kan hnam tan kan beih ve a ngai bawk si. Eng pawh ni se Rammutna a kan intawng fuh anih pawhin nangni khua leh kan khua chu kan inhêl hram hram zel mai a ni ang chu, loh theih loh tâwp a lo thleng ta anih leh, zahawm takin kan inbei mai a ni ang chu. Tunah erawh nangni leh keini hi inbei thei kan la nih loh avângin kan hnam puite hi chhan lo ve ve rih i la a ṭha ang. Vângpui khuate tawrhna khân Lusei khua a deng chhuak hneh êm a, an hlawhtlinna hian hlimna tak tak a la pe thei hauh lo ang, thinrimnain an khat vek si a"a han ti a, Sengzau Pasalṭha pahnih chuan lu lo buk khum nghut nghutin Zâmthanga chu Ngûrzîka hmaah tak va dingin "Kan rawn tlan chhuak leh ngei dawn a, pakhat pawh hi an thi tûr a ni lo" a han ti a, Ngûrzîka chuan "Lusei sal Thingsûl khuaa awm zawng zawngte kha in rawn hruai a ngai ang, silai fung sawm nen" a ti a, an mitah chuan inen leh vang vangin Pasalṭha Singzama'n a nau a rawn koh tâkah chuan an inṭhen ta a, Paite Pasalṭha pahnihte chu an tlangvâl hruaite nen chuan an khaw lam panin an kal ta a.

Lianmawia chuan "Aw le, tun aṭang chuan Paite ho hi kan leido an ni tih kan hriat a, Lusei ho kan ṭan rual a ngai a ni. Ṭiau râl lam pawih ho an rawn lawr ve chhen bawk si a, Lusei leh Lusei inkâra inhmêlmâkna awm loin kan ṭan rual vek a ngai a ni tih hre tlâng ang u" a rawn ti a, Pasalṭha Muandawka chuan "Kan lo hre reng ang e, buaina kan tawh hunah pawh kan inpui tlâng zêl a ni ang chu" tiin Rotlâng khaw lam an pan ta a.

Hmanhmawh taka kal an nih loh bâkah an mimante nen an nih tâk nuai avângin kawtchhuah an thlen meuh chuan ni pawh sûk chen awrh chauh a ni tawh a, Pasalṭha Muandawka chuan "Khai le i han ṭhu thlan dai tê tê i la, hnehna hla do kan chham a ni ang chu. HNUNG TAWLH NGAI LO MI HUAISENTE kan nih kha" a han ti a, tlangvâl ho chau tawh lutuk, mahni in luma mut hahdam siai siai châk rilru êm êmte thinlungah chuan phûrna nasa tak a tuh a, Pasalṭha Muandawka bawk chuan "Kan ṭhian thi ta te ruang erawh naktuk lamah kan buai pui mai a ngai dawn a ni, tlangvâlte tlawmngaih chhuah a, kan inbeihna hmuna kan kal leh a ngai ang" a rawn ti leh a, chhak deuha Ngûrzîka leh Paite Pasalṭha lo inbe mêk lam chu panin chu Paite Pasalṭha chuan a hming lo chhâlin "Thingsûl Pasalṭha chhuanvawr Bialchhâwna in man ngam a maw? Lusei tenawm ho, phuba ka la leh ngei ang.
Kan tlâwm ve ngai hauh lo a nia"a lo ti a, Ngûrzîka chuan "Ekhai, tlawm lo mah la, kan man tawh che tih hi hre reng rawh" tiin a nuih suk suk a, Bialchhâwna erawh thinrim takin a tûm bûr thung a, Muandawka chuan "Ngûra, zankhuain kan inrâlrin ngei a ngai ang, Paite ho khan min lo bei leh duh mai thei a nia" a han ti a, Ngûra chuan "Ka hoin tlangval sawmhnih vêl kan lo inrâlring reng ange" a lo ti vat a, Muandawka chuan "A ṭha khawp ang" tiin midang awmna lamah chuan kal pheiin a silai chu a han lek chhuak a, Pasalṭha vânglai hmang liam mêk chuan a vânglaite hre chhuakin a mittui tla tûr chu a dang ṭawk ṭawk a, a rammut tâwpna ni tûra lang anih avângin hnuk ulh ṭûn chungin bawh hla a han chhâm ta vang vang a, a tawpah a silai a zên hlang chauh a thun chu a vân vawr zawngin a kâp puak ta dur a.