PASALȚHA LIANMAWIA BUNG - 45

Pasalțha Zatlinga chuan "Kan Lalpa tupa chu lo ni tehreng pawh ni la, Lal fanu hi kan hruai lêt ngei a ngai ang. Rûn an tawk tih kan hriat rual hmanhmawh taka rawn tlan nghal kan ni a, in lo chhuah hman avangin hei chen hi kan rawn zui che u anih hi, kan Lalpa tupa i ni tak meuh anih chuan ngaihngam takin min hruai let tir ngei ang" a rawn ti a, Lianmawia chuan "Ka pu hnenah chuan va hrilh u la, Diltlang Lal fanu hi salah ka man tawh avangin amah chauhin a rawn hruai lêt thei ang. Ka pu kianga ka kal tir anih loh chuan he Lal fanu hi tumahin an hruai lo ang" tih pahin Rolianpuia leh Thleihnaiite kiangah chuan a ding nghal a. Zatlinga chuan thinrim takin "Lusei ho teivet hi ka ngeng chhun zawnga inchet a tam ta hle mai, kan kap hlum vek thei che u tih hria la, Lal fanu kha rawn kal tir rawh" a tih peh meuh chuan boruak chu a sosang ruin tlangvalte chu inring takin an awm țhup tawh a,mahse,zam hauh lovin Lianmawia chuan "Ekhai, min kap duh anih phawt chuan min kap rawh u" tih pahin hma lam a pan nghal a, chutah ring lêng lâwngin "Dapchhuah tlangvalte u, Hriangtlang khaw ho awp behna hnuaia chhan chhuak tu che u zinga mi Pasalțha Lianmawia kha ka ni e. In duh anih chuan in pasalțha thu awihin min kap thei ang. Mahse, ka pu thinrimna berhbu erawh intawndarh ngei ang" a han ti a, Zatlinga lam hawi pah chuan "Lal fanu hi ka pu hnena i hruai ka ring hauh lo chu vangin kan hruai dawna min lo zui anih vaih chuan in chan a chau zawk ang." tiin kal luih a han tum a, Zatlinga thinrim lutuk chuan "Dapchhuah tlangvalte u, kan farnu chu Lusei ho kutah kan hnutchhiah anga maw?" a han ti a, mahse, mak takin chhangtu an awm hauh lo, a aia ring zawkin "Lusei ho laka kan farnu pek hi kan zak lo ang maw?" a han ti leh a, chhangtu an awm dawn lo emaw ni aw tih tur khawpa a reh vung vung hnu chuan chhak lam ațangin tlangval pakhat hian, "Zatling, i let leh mai zawk ang u, Lal thisen kai, kan Lalpa tupa leh nghal kut kan thlak thei lo ang."a rawn ti ta mai, Zatlinga thinrim lutuk chuan" Phatsantu rawn chhuak la i hmel hmai ka li hmu ange, mi lu khai chunga haw tum ka nih hi, Lusei ho lu leh i lu ka khai ang"a ti ta mai, chu veleh chhak lamah chuan thawm lo awmin "Zatling, i pasalțhatna i hre leh lutuk hi kan ningin kan hne vek. Kan Lal tupa, kan khuaa i lo awm ve hmaa min lo chhan chhuaktu Pasalțha Lianmawiate hi kan zah em em a sin, anni vang chauha kan khuaa cheng ve thei kan la ni tih hi ka hrilh fiah ngei ang che"a rawn ti thla bawrh bawrh a, Lianmawia chuan mi pakhat thawm chauh a ni lo tih an thawm rin danah a hre maia, a rin ang ngeiin tlangval pali silai keng vek an rawn lang ta hlawl mai a. Zatlinga chuan "Mi dawihzep ho in thi vek ang" tih pahin an zinga pakhat chu a kap ta thawr maia, chu veleh midang pathum chuan rawn bawh rawn nghalin, Zatlinga chu an bei ta a, tlangval dang ho chu rawn chhuak khawmin Zatlinga na tuar rum ri chu an rawn ngaithla ve bawk a, Lianmawiate chuan hual beh an nih chian zia an hre chiang kher mai. Zatlinga a thih meuh chuan a ruang chu hmuh hrehawm khawpin chem hnuhma a tam a ni. Zatlinga tlangval kah erawh kha chu a tluk ruala ka pawh chhawn lo a thi nghal anih avangin pialral kalkawngah Zatlinga nen an inhmu hman mahna, tlangvalte chuan pawi an tiin Zatlinga chu an huat hmel kher mai. Lianmawia chu rawn che chhuak vatin Zatlinga ruang chu a rawn bawihsawm nghala, midang pawh chuan lo pui vatin, chapona a khat mihring ni mah se pasalțha anihna chu zah sakin uluk takin a thlan khur an laih sak a, an phum ta a. Nichina Zatlinga hnial tu tlangval kha rawn kalin "Pasalțha Lianmawi, ka hmu leh che hi ka lawm hle mai. Kan khuaa in lo zin khan rawlthar chhuak hlim hlawt kha i la ni a, tunah chuan i danglam ta takzet. I pu pawhin i chanchin hi sawi nuam a ti ṭhin teh a sin" a rawn ti a, Lianmawia chuan "Ekhai, nangni pawh ka hmu leh thei che u hi ka lawm hle mai. Ka pu chu a dam em?" a han ti a, chu tlangval chuan "I pu zawng, mi harhvang ṭha tak anihna kha la chhawm nung zelin a hrisel țha turh turh khawp mai. Ro rel a thiamin kan khua pawh kan pun belh ve zel e. I lo la zin leh thuai a ni ang chu." a rawn ti a, Lianmawia chuan "Ka hman remchan veleh ka lo zin thuai ang. Zanin chu kan buk hi min ṭawm pui ve u la" tiin a sawm a, mahse, chu tlangval chuan lo hnialin "Kan kal leh zawk ange, kan Lalpa hmel kan hmuh hunah kan hmuh thu che kan sawi thuai thei zawk ang" a lo ti ve tlat a, Lianmawia chuan "Ka pu hnenah chuan a chipuite ka beih avangin ngaihdam min lo dil sak a ni ang chu. Zawlbuan Lalpa kha kan Lal fam ta Puithanga unaupa neih chhun a ni miau si a, kan tlan san thei lo a ni. Diltlang Lal fanu hi hruai luih in tum em lo ang chu?" tiin rinhlelh rukna a neih chu a phawrh ta nghal a, chu tlangval chuan nuih deuh suk pahin" Zatlinga remruatna a ni e, Lal fanu in hruai tih hi i puin a hre hauh lo. Diltlang khaw mipui kan rawn hmuhte sawi a ni kan hriat. I inrawlhna thil a ni tih lo hre lawk i la chu rawn kal hah pawh a ngai lo tur"tiin a chibai a, Hratzuala pawh chu chibai ve in "Pasalțha Zamana kha min lo biak ve dawn nia" tiin a kal san ta a, tlangvalte chu hruaiin an khaw lam an pan ta a. Lianmawia chuan an kal liam chu thlirin a bula ding reng Hratzuala bulah chuan "Ka pu kha hmuh leh ka va chak em." a ti sap a.

Lianmawia sal ni tura inngai tlat Lal fanu Thleihnaiin hlauthawng ru tak chunga Rolianpuia bula a hlauhthawnna a phawrh rual chuan Rolianpuia chu nui sukin "Lianmawia khan thu tak a sawi i ring em ni? Pasalțha lung fing a ni a, hmelmate rilru a han chawk buai ve deuh mai mai a nih kha" a tih chuan Thleihnaii rilru chu a hahdam ta huai a, Lianmawia a hel a hel pawh a ngai dawn ta lo. "Anih leh khua kan thlen hunah engtin nge ka awm ang?" a han ti leh dek dek a, Rolianpuia chuan rang fahranin "Ka nupui i ni ang" a lo ti nghal a, Thleihnaii chuan thawk deuh halh pahin "Sal nih ai chuan a thlanawm zawk e" a lo ti sap a, Rolianpuia chuan "Hnaii ka chunga i țhatna te kha ka hre reng a sin. Mahse, kha vanga nupuia neih tum che ka ni hauh lo, ka hmuh hmasak ber che ațang khan ka rilru hi i luah daih tawh a sin. Mahse, ka rilru ang i pu ve lo anih chuan i kal duhna hmun sawi la, ka hruai ang che, him takin ka thlen pui che anga, i mithmuhah vawi khat pawh ka rawn in lan tawh hauh lo ang. Tihluihnaa neih che hi ka tum reng reng hleinem"a ti a, Thleihnaii chuan mak tih hmel takin Rolianpuia chu a en vawng vawng a, Rolianpuia'n a thu sawu nem nghehna'na a lu a buk khum zeuh hnuah chuan "Neih reng ka nei tawh lo a, heti chunga min la pawm duh tu chu hnial thei ka ni lo" a ti ve ta a, Rolianpuia chuan a dara kuah pahin "Lalnu țha tak i la ni anga, fate kan la nei țeuh dawn alawm" a han ti sap a, khaw fing a rawn chah țan tawh avangin buk lam panin an țhutna, kawr a lung pui chu thawhsanin an kal ta a.

A tûkah chuan khaw lam panin an kal leh ta a, Rolianpuia chuan Thleihnaii nupui atana neih a tum thute chu Lianmawiate hnenah a sawi nghal vek a, khua an thlen vela inneih mai a duhthute Thleihnaii chu midang ina awm tir a phal loh avangin inneih thuai a duh thute chu a sawi ta vek a, Lianmawia leh Hratzuala pawh an phur kher mai. Lianmawia chuan "Nang zawng i vannei bik mange, awl sam takin i nei dawn chu a ni si a" a han ti sap a, Rolianpuia chuan Lianmawia leh Hratzualate hmangaihna kalkawng an zawh fuh loh ziate a hre chhuak thar uai uai a, nuam lo a ti angreng hle, mahse, Hratzuala'n "Lianpui, kan Lianmawia hian i nau a dil ngam chiah lo che a, chu vanga thik che anih hi" a rawn tih chuan boruak rawn thlak danglamin an nui ho ta dar dar a.

"Ka u, Lianate hi an thang rei ta hle mai. Va ngaihven a țha lo maw?" ti tu a farnu Rosangliani hmel chu enin Rotawka chuan a nauin Lianmawia a ngaihtuah zia chu a hrethiam vek a, "An lo thleng țep tawh ang. Hlauhthawn na tur a awm lo e, pasalțha alawm an nih" tiin hnem mah se, amah pawhin rei a ti ve tawh hle. A nau chu mu tuta hrilhin a khum lamah a pawm phei a, ti chuan amah pawh a mu ve ta a. A tuk fehrehsan hun a thlen meuh chuan Lianmawiate chu khua an rawn lut ta hlawl mai a, khaw mipuite lusunna kai harhtu ni dawna an inhriat vang leh hmeichhia nen an nih vanga hlado pawh chham lo a rawn lut an ni a, mahse, an hlawhtlinna chu mipuite chuan an lawm pui zia ti langin a hmu hmasa apiangin an lo zui nghal dul dul a. Lal tual an thlen meuh chuan khaw mipui zawng zawng deuh thaw chuan an lo zui tawh a lo ni. Lal fapa Rotawka chu lo chhuakin a u hmel a hmu leh chu a lawm hle maia, a nau zawk anihna chu lo langin a u chu a rawn kuah vawng vawnga, Rolianpuia'n "A tawk e, mipa i nih kha, Sangi hi khawnge?" a tih rual chuan thlah vatin in chhung lamah an inzui luta, Thleihnaii chu hruai lut vein "Ka naute u hei hi, Diltlang Lal fanu Thleihnaii i nih hi. Man ka nih chhung zawnga ka chunga țhat chhuah tlat tu, chaw kaw puar ka hmuhna awm chhun anih hi. Tunah chuan kan chhungkaw mi leh sa a ni tawh e" a han ti a, Rotawka chu rawn kal hnaiin "Lal fanu ka u chunga i țhatna hi kan hre reng ang, inthlahrunna tur a awm hauh lo a nia. Chhungkaw hlim tak kan ni ngei ang" a rawn ti a, Hratzuala chuan "I u nen fanau maltluan an chawi dun bawk ang" a rawn tih chuan Lianmawia chu a lo nuih phuh nghal țhawt a, Rotawka leh Rosanglian pawh an lo nui ve nghal bawka Rolianpuia leh Thleihnaii erawh an lai chhe dun hle. Mipuite pawn lamah an awm reng avangin an inzui chhuak leh dam dam a, Rolianpuia chuan khua ațanga chhan chhuah anih dante leh Lianmawiate vang liau liau a nih zia chu sawiin a fak mawlh mawlh a, khaw mipuite chuan kut lo bengin Lianmawiate leh Zehtet tlangvalte chu ngaihsanna mitmengin an melh vek hlawm a. Lianmawia chuan inthlahrung taka thu sawi ve rawn dilin mipuite hmaah chuan a ding ve ta a. "Lal fapa Rolianpuia min fak ang em em a che kan ni bik hauh lo. Kan tih theih tawk tiin kan theih tawp kan chhuah ve mai chauh a ni. Diltlang Lal fanu kan rawn hruai haw hi in hmu țheuh anga, a ni hi sal atana hawn kan ni lo a, a chhungte'n pialral an lawi san avanga raen hruai haw kan ni a, Lal fapa Rolianpuia an man chhung zawnga lo lainata a lo khawngaihtu, chaw kaw puar khawp pe a lo hrai nitin ziah tu a ni tih inhriat țheuh ka duh a ni"a rawn ti a, mipui chuan kut an lo beng leh dar dar bawk a. Rotawka chuan thu rawn sawi vein " Aw le, ka pa chuan fam min chan san tawh a, Lal kan nei ta lo. Lal thar kan thlan mai a ngai dawn a ni. Ka ngen duh che u chu keini unau hian in pawi nasa taka kan sawi ngei ka ringa chuvangin tu pawh Lal thar lo ni se, khuaa kan la awm ve min phal sak hram kan beisei a ni" a rawn ti a, mipuite chu mak tih luat avangin an ngawi vek a, tuibur hmuamda hnu velah chuan patling pakhat hi rawn țawngin "Kan Lalpa Rothanga a thi tih kan hriat rual khan Lal atan in unauin kan pawm nghal che u tih hi min hriat sak rawh u" a rawn ti a, mipuite pawh chuan an pawm zia an rawn au chhuah pui ta sap sap a Lianmawia chuan "Aw le, Lal nihna dinhmun luah zui tur zawk chu an unau rel fel turah i dah ang u" a rawn tih chuan mipuite chuan an pawm tlang hle a, ti chuan mahni inlam țheuh panin an liam ta a. Phuba la a an tlangvalte thang hlana ram lama hna pawh thawk lo a hlauthawng dep depa lo indawm kun reng ṭhinte khan tunah chuan bul an țan thar anga, lusuna indawm kun reng tawh loin anmahni țulna lam panin an bung leh tlauh tlauh thei tawh ang, mahse, tlangval an inchan belh leh deuh hlek avangin an lawm erawh a kim lo. Zan lama upa ho leh Rolianpuia te unauin ro an rel hlanin leihkapui lamah Rosangliani leh Thleihnaiite chu Lianmawia leh Hratzualate nen an inkawm a, Rosangliani leh Thleihnaii pawh an inmil tawh hle. Lianmawia leh Rosanglianite in en dan vel chu Thleihnaii pawh chuan a man thiam thuai bawk a. Lal fapa naupang zawk Rotawka'n a u chu Lal ni tura a tih tak tlat si avangin Rolianpuia chuan Lal nihna a chelh zui hmasa anga, Rotawka'n nupui a neih leh hunah a tu emaw zawk zawk sangal khawng hrangin an awm dawn a ni.

Ni hnih a liam leh meuh chuan Thleihnaii chu Lalpa Rolianpuia nupui tur a ni tih khaw mipuite chuan an hre vek tawh a, lo lawm pui tawk an awm rualin a ruka sawisel tu pawh an awm ve tho mai,mahse,Lal atana an pawm em em anihna chu an thinlungah a len zawk tlat avangin an lungawi lohna chu an inhneh tir duh hauh lo thung. Lianmawiate tana cham reng a harsat avangin inneihna chu a rang lamin an buatsaih ta a, khawtlang huapa ruai ropui tak țhehin nuam an ti tlâng hle. Zehtet tlangvalte phei chu khaw tual nulate ngaihsan em em an ni bawk nen nula laka lo che thei fal pawh an awm nuk maia, nuam pawh an ti hle a, a țhen phei chu khua an thlen vela palai tirh nghal tumte pawh an awm nghe nghe. Lianmawia leh Rosanglianite inhmangaihna pawh chu a zual deuh deuh a, Rosangliani dam var hun chu an nghakhlel dun hle. An inen dan vel chu Lalpa Rolianpuiate unau paw'n an hrethiam ve vek a, an farnu chu an fiam nasa țhin hle, Lianmawia kianga an farnu han kal tir chu an hlauthawng hauh lo a, makpa țha tak an nei dawn tih an inhre miau a ni.