HNUNG TAWLH NGAI LO MI HUAISENTE - 3

Haw kawngah chuan hmanhmawh lêm lo taka kalin nau rilṭam hunah pawh Leite khaw ram chu an la chhuahsan lo a, tîtî paha kal an nih avângin an thusawiah chauh an rilru dahin hmanhmawh nachâng reng reng an hre lo. Chu tih lai tak mai chuan an chhak lam aṭangin "Ding rawh u, hual beh vek in ni tawh e!!" tih thâwm a rawn chhuak ta phut mai a, Thangkhûmate chu hawi kual ruai ruai pahin an ding reng ringawt a, aw lo chhuahna aṭang bawk chuan in silai kha dah thlà rawh u"a rawn ti leh a, Thangkhûmate chuan dah thlak pahin an ban chu chung lamah an phar nghal a, chu veleh tlangval sawmhnih rual zet hi an rawn chhuak ta mai. An pasalṭha ni awm tak chuan "Lal fanu kha khawiah nge in dah?" a rawn ti nghal tawl mai a, Thangkhûma chuan "Ka pu, kan hre hauh lo mai. Rotlâng khaw mi leh sa kan ni a, kan Lal in min tirh avânga Leite khaw lam pan kan ni. Nizan Leite khaw lama kan riah hnuah kan khaw lam panin kan kal leh mêk anih hi" a lo ti sap a, chu Pasalṭha chuan Thangkhûma mitmeng fiah kâk mai chu en vang vangin dawt a sawi lo tih a hre ta a ni chêk ang chu "Ekhai, nauteu min ngaidam teh u. Darzo khaw tlangvâlte kan ni a, hei kan Lal fanu tui châwi tûr an ru bo daih mai a, lo hmutu nula pahnih an awm avângin an hnu pawh thup eih loin he lam hi an rawn pan pui nghal a, mahse, hei mak tak maiin kan umpha hauh lo mai a, in thâwm kan hriat rual khan in ni ta mai emaw kan ti pek alawm maw le" a ti a, Thangkhûma chuan "Mi êngzâtin nge ru bo in hre thei em?" a lo ti a, chu pa chuan "Mi pahnih chu an hmu ngei mai a, Lal fanu chu a hmui hup sakin an pu nawlh a, an tlân pui a ni âwm e" a ti a, Thangkhûma chuan "An hnu in rawn chhuiah mi pahnih hniak chauh a lang em?" a han ti leh a, chu Pasalṭha chuan "Mi pahnih hnu ni ngei chuan a lang" a lo ti leh a, Thangkhûma chuan "Ka pu, ka sawi tur chu ni hauh lo mah se nula pangai ru bo tûra mi pahnih chauh an thawhchhuah hi ka ring hauh lo, a ru tu tûr bera khan puitu tur a hruai nual ngeiin ka ring. Lal fanu ngat phei chu ru turin tlangval pahnih chauh an kal ka ring hauh lo. Nangmahni bumna'n che u mi pahnihin an hnu an hnutchhiah anih ngei ka ring" a han tih chuan Darzo Pasalṭha chuan thâwk hawk pahin "I tih dik ngei ka ring. Ka thinrim luatah ka rilru a buai vek alawm maw le. Kan Lal fanu chu kan la chhan hman êm ang chu maw.Darzo Pasalṭha Hlâwnthanga ka ni e, kan kal san leh phawt ang che u " a han ti chuau raih a, an silai chu an rawn pe lêt leh bawk a. Thangkhûma chuan "Duhsakna ka hlân a che u" tiin an inṭhen hrang ta a. An pathum chuan ngawi reng a kalin tuibur hmuamda vêl an kal hnu chuan Zîngchhuana chuan "Hawh teh u, i pui teh ang u. Keini pawh rûn kan tawh dawn meuh chuan puitu kan mamawh êm kha maw le" a han ti sap a, Lal fapa Saichhûnga chuan "Ni e, puih kan mamawh ang bawkin kan puih mamawhte an awm ve thei a nia" a han ti a, Thangkhûma chuan "Chu ti chu Darzo khaw lamah khan i kal teh ang u. An hnu kha chhui i la an inṭhen na lai kan hmù mial mahna" a lo ti ve bawk a, ti chuan Darzo ho lo kalna lamah chuan an kal ta vang vang a, Darzo ho hnu chu chhui a harsa lem lo hle. Chawhnu herah luite an zu pawh hlawl mai a, tah chuan insil thlan daiin chaw te an han fâk mawlh mawlh a, an ṭam hnêm tâwk an bâr hnuah Darzo khaw lam pana kal an tum lai tak chuan lui kam leh lama mihring kalna hnu ni âwm tak an hmu ta a, va pan pheiin an va en chiangin chiang takin lang lo mah se mi panga vêl kalna ni ngei chuan a lang. Chu hnu chu an chhui zui ta a, a châng leh an hlauh leh daih ṭhin a, mahse, lo fing hnih âwm vêl an chhui zui hnu chuan an hnu chhui lai chu a lang chiang ta khawp mai a, ni tlâk thleng a, an chhui zui hnu chuan riah bûk sualin an buai map map a, Thangkhûma chuan silai chu hawl chhuakin Vahrit zan riak a han tawng fuh hlauh mai a, musepin pali ngawt a han phuh tla nghe nghe. A tak silai a hman vawi khatna anih avângin nuam a ti hle. Leite khua chauh kal tûra inngai an nih vânga chaw pawh fûn tam lo, buh fai phei chu pai hauh lo an nih avângin chhun lama an ei bâng chaw ṭhing tlemte leh vahrit sa chauh chu an ei ta ringawt a. Zanah bûkah chuan ṭhu khâwmin an ti ti a, chutia ram palailênga an han riak chu hlauh a hnêkin nuam an ti hle. Vân a thiangin arsi a lang de tuarh mai bawk nen, zin chhuah man hla an ti tlâng hle. A tûk zîng a ṭangin hnu chhui bawk chu an ṭan leh ta a, nilênga an chhui leh hnu chuan riah bûk tur sualin kawr kamah an buai leh ta a, chu tih lai tak chuan thâwm rawn awmin Thangkhûmate chuan ngawi rengin an lo nghak a, thawm a lo hnaih zêl hnu chuan Pasalṭha Hlâwnthangate an lo lang hlawl mai a, Pasalṭha Hlâwnthanga chuan rinhlelh hmel takin "Naute u, Rotlâng khaw lamah in awm tawh tur a ni a sin. Enge in la tih khawtlai a?" a han ti a, Thangkhûma chuan "Ka pu, in rawn kalna lamah khan kan kal a, kawr kama chaw kan fâk hnuah kam leh lama mihring hnu lang fiah lo riai kan hmu a, chu chu kan chhui zui zêl a, he lai hmun hi min hruai thleng ta a ni. In Lal fanu ru bo tute an nih ngei ringin chhui zui zêl kan tum a ni" a han ti a, Pasalṭha Hlâwnthanga chuan awih loh hmel takin "Chutianga min puih in duh si chuan kan inhmuh hmasak zawkah khan sawi ta che u. Kan Lal fanu ru bo tute zînga mi in ni lo tih fiahna inneih loh chuan in thi nghal ang" tiin a silai cheng chu a kau nghal rap a. Thangkhûma chuan zâmna tel hauh loin Hlâwnthanga te chu a han pan hnai hret a, "Ka pu, in Lal fanu ru bo tute ni i la chuan min hmu tawh hauh lo ang. Tin, Rotlâng leh Leite khaw inkar hi chawhma kal bâk anih loh avângin chaw tlem a zawng kan fun bâk chu buhfai leh chiseh ilo fahrante pawh kan pai hauh lo. Nangmahni kan puih duh vang che u hian chaw pawh ei loin ni hnih zet chu kan awm ta. Kan tawn fuh apiang hmangin kan inhnawh puar ve hrâm hram a, kan Lal fapa meuh pawhin chaw a ei lo a sin. Heng zawng zawng hi kan tan ni loin. In tan,kan lusei pui, kan farnu chhanna'n a ti kan ni a sin"a han ti vawt raih a, thinrim vangin a hmaite chu a rawn sen leh tawn tawn ṭhin. Hlâwnthanga chuan an meichhem bula vahrit pahnih lo inrêp chu hmu vatin a bâk ei tur an nei lo tih chu a hrethiam ta vat a, "Ekhai, naute u a vawi hnihna'n min ngaihdam a ngai leh ta. In bûk hi kan ṭawm pui che u in phal lo anih pawhin kan buhfai tal chu min ṭawm pui a ni ang chu. Kan hnu chhui lai khan inkhua a hêl hnuah he lam a rawn pan leh ta daih si a, mak kan ti ang reng viau a ni. He lui hi kan zawh thlak zel chuan kan khaw ram chin kan thleng thei dawn a, tute thil tih nge maw ni ang le? Tiin kan lo inzawt ṭheuh anih hi" a han ti chuai raih a, Thangkhûma chuan a hmel hmaite thlak danglam vatin "Ekhai, ka pu, aia upa zahna chang ka hre lo mah mah a ni e. Tun aṭang chuan kan kal ho thei tawh anga, i thla zar hnuaiah tawn hriat turte kan neih phah dawn a, kan vannei teh e." a ti ve ta zawk a, Pasalṭha Hlâwnthanga chuan Thangkhûma mizia chu a ngaihtuah zui rauh rauh a, a hmel hmaia dawihzepna lang hauh lo, a mi dîp na êm êm mai, leh a ṭawngkam mi hneh theih riauna te chu a ngaisang ru hle a, rawlthar mai la ni mah se Pasalṭha huaisen tak a la nih ngei a ring a, a ṭhianpa ngawi ngul reng Zînchhuana pawh chu a ṭhianpa tana eng pawh tih huam khawpa huaisen anih a ring nghe nghe. Thangkhûmate chet ve tum chu Darzo tlangvâl te chuan dang zelin Saichhûnga phei chu Lal fapa anih avângin an zah hle a, zan riah an han kîl laite chuan Darzo tlangvâlte chuan an sanghal rêp chu a ṭha lai lai an pe hlawm a, Thangkhûmate lah ni hnih zenzawn vahrit leh tumbu tih vela lo inhnawh puar tawh an ni a, chaw pangai an han ei leh chu tui an ti tlâng hle.

Zan riah ei khamah bûkah ṭhuin Thangkhûma chuan Hlâwnthanga hnenah chuan "Ka pu, in khua hian hmelma in nei chu a ni êm lo maw?" a han ti a, Hlâwnthanga chuan "Khûma, ka pu ti loin Pa Hlâwn tiin min ko rawh u" a han ti hmasa te te phawt a, "Hmelma kan neih ka hre hauh lo mai. Mahse Thiltlâng khaw Lal fapa khian ṭum khat chu kan Lal fanu hi a rawn rîm a, khatuh lai khan kan Lal fanu hi tleirawl tê chauh a la ni a, naupang en a kan en a la ni nghe nghe. Kan Lalpa chuan Thiltlâng Lalfapa hnenah chuan a fanu nulat hun nghak turin a ti a, chu chu Thiltlâng Lal fapa hian lo huain a fanu rîm chu a phal lo angah a ngai ta tlat a, thinrim takin an haw ta a ni"a han ti sap a, Zîngchhuana chuan "In Lal fanu nulat hun chu a nghak chhuak ta ngei anih chu" a lo ti sap a, Thangkhûma pawh chuan "Ni e, Thiltlâng khaw lam chu i pan nghal zawk mai ang u. Hei min hruai kawi nasa tawh si a, ram palailengah kan chau chhe mai dawn. He lai ram bial zîmtêah min kal kual pui hrep lai hian in Lal fanu chu Thiltlâng khuaah a awm vang vang tawh ngeiin ka ring a ni"a lo ti sap a, Pasalṭha Hlâwnthanga chuan "In ngaihdan chu ka pawm viau na a, thil pakhat sawi duh ka la nei tlat. Thiltlâng Lalpa hi kan Lalpa tlangvâl lai ṭhian hnai tak mai a ni a, kan inpawh viau vanga a fapa pawhin kan Lal fanu kha rawn rîm a ni nghe nghe. Thiltlâng Lalpa chuan a ṭhianpa fanu rûk a duh hauhin ka ring lo"a lo ti leh a, Thangkhûma chuan "Ni e, i thu thu ni rawh se" a lo ti a, Pasalṭha Hlâwnthanga chu ngun taka a inngaihtuah hnuah chuan "Aw le, Thiltlâng khaw lam chu i han pan chhin phawt teh ang. Kan beisei neih chhun a ni si a" a ti ve ta nge nge a.

Zing khawvar hma daiha chhuakin nilêng deuh thaw a, kawng chho an zawh ngar ngar hnu chuan behliang mûn hun velah Thiltlâng kawtchhuah chu an thleng ta a. Pasalṭha Hlawnthanga chuan "Aw le, khua kan luh hunah kan va rîk buan buan a chi dawn loh a, chu vângin min lo biak dân mil zelin kan chhang ang. Lal fanu bo thu hi kan sawi tûr a ni lo. Khuaa zan hnih châm tûr angin kan insawi anga, an tlangvâlte kan enthla ru reng tûr a ni" a ti sap a, ti chuan khaw chhungah chuan an lût ta a.

Lal in an va luh chuan Thiltlâng Lal Thanṭhuama chuan "Hlâwna te lah ni rengin. Kha khawi lamah nge in kal dawn a?" a lo ti vat a, Hlâwnthanga chuan "A, kan Lalin khuang a chawi dawn a, hei, a unaute khaw lamah kan kal darh hlawm a, he lai hmunah hian innghah khawm zai rêl i la kan ti anih hi. Kan Lalpa chuan lo tel ngei ngei turin a duh che a nia" tiin a chhanga Lalpa chuan "Ṭhianpa Chhûnga zawng a ropuina a zual zel anih ber hi maw.." tiin a lawm pui thute chu a hrilh a, Thangkhûma te leh tlangval dangte chu an thlenin tûr ṭheuhah an hruai ta a. Thangkhûmate ṭhian thum chu Lal mual a in pakhat Pasalṭha in ni ngei tura lang sa lu in tar khep khupnaah an thlen tir a, in chhungah chuan pa upa lam tawh, a vanglaia Pasalṭha ni ngei tura lang hi a nupui nen an lo awm a, chu mite nupa chuan an lo be ṭhain an inthlahrun hlauin an lo kawm nghal mawlh mawlh a, tuibur hmuam da hnu velah tlangval pahnih an fate ni ngei tura lang hi an rawn inzui lut ve bawk a, zanriah an kîl lai chuan Darzo khua anga insawiin an titi ho a, Darzo khua an sawi rik laia an thlen in tlangvalte hmelhmai danglam Thangkhûmate'n an hmuh chuan thleng fuh an inti nghal hle. Zan riah ei khamah chuan Lal in lamah kalin Pasalṭha Hlâwnthanga hriatthiam ngei turin an thlen in nawm zia leh a fuh zia chu an han sawi ri zauh a, ti chuan Zawlbûk lam an pan ta a, Zawlbûk an zu thlen hma deuh chuan an thlen in tlangvâl pahnihte chuan an rawn kal pêl fua a, biak pawh an rawn be hauh lo. Thangkhûma chuan "Kan zui rûk ngei a ngai a ni" ti sapin thim tham lam an pan vat a, ti chuan an kalna lam ni ngei tura lang lamah chuan an kal ve ta a. Khaw dai an va thlen chuan an mi zui ruk laite chu an bo ta tlat mai, beidawng taka an hawi kual ruk ruk hnu chuan khaw lam pana let leh mai an han tum a, mahse ṭawng thawm an hriat rual chuan biru vatin thawm chu a lo hnai zel a, an ṭawng ri pawh an hre chiang viau 'an Lal fanu bo thu an la hre hauh lo ang, khua an thlen hunah an mang a ang dawn teh e' tiin an lo nui phei tlawrh tlawrh a an meichher êng an hmuh phak hnu chuan an thlen in tlangvâl pahnihte bakah Lal in lama an hmuh tawh Lal fapa leh tlangval dang pahnih an lo ni a, an kal liam fel hnu chuan an lo kalna lam pan chuan hmanhmawh takin an kal ta a, tuibur hmuamda vel an kal leh hnu chuan kawr an va pawh hlawl a, kawr kamah chuan mihring hniak a lanh chiang hle. Chhui zui nghalin thui lo têah pûk zau ang reng tak hi an chhak lawkah an hmu a, zawi muanga inzui chhoin hmanrua an ken loh avângin an thing bung hmuh remchân chu an hûm far tawh a, an han hnaih chho zêl a, pûk chhungah chuan ṭap thâwm an hre ta bawk a, hmanhmawh ang reng takin an kal chho zêl a, pûk bul hnai an han thlen chuan vêng tu an lo awm hauh lo tih an han hre ta a, pûk chhungah chuan lût nghalin pûk bang kîla Lal fanu an lo phuar hlâwm chu an va hmu ta a, Thangkhûma chuan "Lal fanu nangmah zawng tûra lo kalte kan ni e, hlau tawh suh, kan chhan chhuak ang che" tiin an han phelh sawk sawk a, Lal fanu lawm lutuk chuan Thangkhûma chu kuahin a ṭap hawm hawm a, muanchanna chi anih loh avângin khaw lam panin an kal leh ta a. Khaw dai an zu thlen chuan Lal fanu pawh ṭap tawh bîk loin Thangkhûmate hnenah chuan "In fimkhur viau a ngai ang. Thiltlâng Lalpa hian he thil thleng hi a hre hauh lo a nia, a fapa sual lutuk thil tih vek anih hi" a lo ti a, Thangkhûma chuan "Zînga U Hlâwna kan koh a ngai a ni" a tih rual chuan Saichhûnga chuan "Ka han kal ange" tiin a tlan liam nghal a. Rei vak loah Hlâwnthanga chu a rawn thleng thla ve nghal a, Lal fanu Parchhîngi'n an khaw pasalṭha hmel a hmuh chuan a ṭah a chhuak thar leh a, a rawn ṭap leh nghal bawrh bawrh a, Pasalṭha Hlâwnthanga chuan hnem mawlh mawlh pahin a chanchin a han zawt a, Lal fanu pawhin ṭha taka a chhan hnu chuan "Aw le, Zawlbûk lama in hmel an hmuh loh chuan in thlen in tlangvâlte an hawihai lutuk palh ange, Zinga leh Saia kha Zawlbûkah han lawi lut u la, in thlen in tlangvâlte kiangah khan Thangkhûma pum nawm loh thu leh in hlauhthawn pui thute han sawi ang che u. Khûma Partei hi i lo awm pui anga, zanlai ar khuan hunah Lal in lam lo pan pui ang che, hmanhmawh takin kal nghal ang u"tiin Zînga leh Saiate chu khaw chhung lam a pan pui leh ta a.

Ramhnuaia zan nga lai riak tawh Thangkhûma chuan Zawlbûk lama riak ve tawh tura a inngaih laia ramhnuai a a han awm leh ta chu a ning ru tawh hle a, Lal fanu Pârtei mei chhawm ṭha mawlh mawlh lai chu en pahin "hmeichhia vâng hian a lo buai theih hle anih hi" a ti rilru a, Partei chuan "Kan khuaa in awmna a la rei lo nge ka hre ngai hauh lo che a" a lo ti a, Khûma chuan "Rotlâng khaw mi leh sa alawm ka nih. Ka ṭhiante pahnih pawh kha an ni ve ve a, pakhat kha kan Lal fapa Saichhûnga anih kha" tiin a chhang a Lal fanu Partei chuan "Chuti si, U Hlâwna te nen engtia lo kal ho nge in nih?" tiin a zawt leh a Khûma chuan "A, Leite khaw lamah kan zin a, kan haw lamah nangmah ru bo tu che emaw tiin Pa Hlâwna hian min kah a tum a, mahse, kan ni si lo a kan inṭha ṭhen ta ringawt a, mahse, kan hnam puite puih ngaia an awm laia lo tlan chhiat san chu tiin Pa Hlâwnate rawn kalna lamah kal ve thungin in hnu an chhui fuh lo niin kan hria a, kan hriat dan ang ngeiin in hnu ni lo zawk an lo chhui reng chu niin keini'n a dik tak kan rawn hmu ta a, ni khat nileng kan chhui hnuah kan intawng leh ta hlawl a, chutah zet zawng Pa Hlawna hian min ringhlel nasa tawhin min kah mai duh hmel a pu tawh a, mahse, eng tin tin emaw a rilru kan hneh leh ta hram a, he lai hi kan lo thleng ta anih hi." a ti a, a ṭawngkam a bûl tak em avâng chuan Pârtei chuan nuam lo a ti hle a" Pawi ka ti lutuk keimah vângin hrehawm tam tak in tuar a" ti sapin a mittui chu a hru sawk sawk a, Thangkhûma chuan Lal fanu mittui tla a hmuh chuan nuam lo a ti rilru leh ta hle a, zan nga vêl ramhnuaiah meipui êng bulah bûk chhûnga a riah lai khan Lal fanu chu zan tam tak kha pûk chhungah khan a lo riak tawh tihte a hriat chhuah phah a, "Lal fanu i rilru tih hrehawm tum ka ni miah lo a nia. Hei kan rawn chhan chhuak tawh che a, in khua thlengin in Pasalṭha leh tlangvâlte'n an vêng tawh dawn che alawm" a han ti a, Pârtei chuan "Haw leh mai in tum em ni? Ka pa pawhin a hmu duh ngei ang che u. Awm lo u la chuan U Hlâwna te hian min la hmu hauh lo ang" a lo ti a Khûma chuan "Ekhai, U Hlâwna zar vek zawk maw le. Keini chuan U Hlâwna puih kan tum mai a nia. Kan pui tawh a, in khaw lama rawn kal kawi kha kan tan hawna kawng a hla mai mai a ni. Remchangah kan lo zin leh zawk ang." a tih mêk lai chuan Tuitû a rawn hrâm ta thut mai a Lal fanu chuan a hlau hle tih a hriat mai a, Khûma chuan nuih deuh put put pahin" Hlauh tur a awm lo e, Sava mai mai anih chu"a han ti a, mahse Partei hlauhna chu a reh thei chuang lo tih hriat takin a hawi kual sek a, Khûma chuan Lal fanu Partei chu pan pheiin a bulah chuan a va ṭhu a, "Hlau suh, ka awm hi hre ta che" a va ti a, Partei chuan ṭap deuh pûr chungin "Khang ho hrâm thawm râpthlâk tak nen a zan tam i hman ral ve hunah i hrethiam chauh ang" a lo ti hlak a, Khûma chuan nuih deuh suk pahin "Ka zu man sak ang che aw" a han ti a, Partei chuan "Ka duh teuh lo" tiin lehlam a lo hawi san hmak a,Khûma chuan nuih vur vur pahin "Lal fanu thinchhia" a han ti zawi sap a, a rin ang ngeiin Partei chuan a lo hre pha chiang kher mai, ner khum sawk pahin thîp fein a rawn melh a, Khûma lah chuan a lo la nuih sâwng zui.

Zan lai ar a khuan meuh chuan Lal Thanṭhuama chuan "Hlâwna i naute chu an va rei ta ve. Nge ni a ka fapa hi puh chhiat i tum zawk?" a han ti a Lal fapa pawh chu rawn pâwr thar lehin "Hlâwna ka ṭhian emaw ka ti ṭhin che a, dawt a min puh hi a mak ka ti khawp mai" a lo ti ve hlak hlak bawk a, mahse, an kawngkhar rawn inhawng leh rawlthar pakhat hnunga Lal fanu Partei rawn lut an hmuh chuan Lalpa Thanṭhuama chuan a fapa chu kawkin "I thil tih hi a va han pawi tak em." a ti khur hlawk hlawk a, Lal nu chuan Partei chu rawn kuahin "Awi, Parte kan inhmuh leh dân hi ka va han duh lo em" a lo ti vawng vawng a.Hlawnthanga chuan Lalpa Thanṭhuama hnenah chuan "Lalpa, kan haw phawt anga, i fapa leh a ṭhiante pawh i kutah kan dah ang. An thil tih i hriat pui lo a ni tih kan hriat avângin i chungah engmah thleng lo se, kan khaw inunauna hi chhawm nung zel ang u" a ti a, a tuk zingah chuan an khaw lam pan an tum ta a, khaw mipuite'n Partei hmel an hmuh an duhloh avangin Khûma chuan kawtchhuah lamah a lo va hruai leh vang vang a, "Haw chu in tum ta tho a mi?" ti a Partei biakna chu Khûma chuan "Nizanah ka ti thinrim che sia, i pa hnenah min hek nasa awm emai kan haw mai ang" tih pahin a han nêk salh a, Partei chuan "Ngeiawm viau reng suh" tih pahin Khûma chu lei a rawn chhuah khum a, an ngawih dun leh vang vang hnu chuan Partei chuan Khûma mitah tak en chungin "Khûma ka lawm e aw. I ṭhiante nen khan awm lo u la chuan kha Lal fapa tenawm tak kha ka hmu leh tawh âwm si a, zing tin leh zantin lo kalin a nupui ka nih tûr thu leh ka nih hmaa hrehawm taka min dah tur thu min rawn hrilh ziah ṭhin a sin. Nangni vang liau liauin ka him ta a nih hi"a han ti sap a, Khûma chuan Partei mittui luang ngiai ngiai chu hruk sak pahin a biang chu a han piai zeuh va "Parte, chutiang sawi a ngai lo e. Hlim takin i nun i hmang tawh dawn a lawm" a ti a, midang thawm a awm takah chuan in hlat deuha dingin Partei chuan "Kan in hmuh leh hunah chuan min 'u' tawh dawn nia" tiin Khûma chu lei a rawn chhuah leh a, Khûma chuan "Aw le, U Parte thinchhenu" a lo ti a, Partei tum nghal bur chu a nuih vur vur bawk a.

Pasalṭha Hlâwnthanga te an lo thlen chuan zui ve mai turin sawm nasa viau mah se an khaw lama mite mangan tawh tur ziate an hriat ve vek avângin an hnial ta zawk a, ti chuan inṭhen hrangin an khaw lam ve ve panin an kal ta a. Khûma te kal liam tur chu an han hawi let a, Hlâwnthanga te pawh an liam ve dawn mêk a, hnung lama Hlâwnthanga'n Partei a chhawm lai chu enin Partei rawn hawi zeuh chuan a ban a rawn vai a, an ni pawh chuan vai let vein an liam ta a.