PASALṬHA LIANMAWIA BUNG - 52

Zehtet khaw mipuite chuan an tlangvâlte thihna chu tuar hle mah se, hlawhtling zawk an nihna avângin an inhnêm hrâm hrâm hlawm a ni. Hun a kal leh zêl a, fur pui inṭan lai anih avang ringawtin an hna ṭul an chawlh san thei si lo a, lusun chhungkuate pawh lungleng tak chungin an lo lam an pan nitin ta a, a tirah chuan hrehawm ti hle mah se, hunin a rawn hnêm ve zêl a ni.

Zankhua deuh thaw a ruah sûr chuan bân mai tum loin khawfing chah fel hnu pawh chuah a la sûr zêl a, khaw rawn vâr ṭan tîrh rual chuan Lalnu Zikpuii chu harhin a tho chhuak vata, a nau pai hrâm tawh tak chuan a ti ritsak tawh hle. Harsa takin mei a han nun a, ei rêl a han tum chu a pum rawn nat tak riai riai avâng chuan ṭhulh lehin khumpui lam a pan vat a, khuma a pasal mu mêk chu sawi harhin a pum nat thu a sawi rual chuan rang takin Lal Kâpthanga chu a rawn zuang tho nghal a, a nupui ai pawh chuan a chiai zawk emaw tih mai tûrin a phi cheng a, ruah lah a sur nasa bawk si a, nau chhar tûr han koh pawh Lal mah ni se a inthlahrun awm hle. Hlauthawng leh hmanhmawh tak chungin a chhuak a, khaw mawng lama nau chhar thiam awmna inlam pan chuan a tlân ta vawk vawk a, kawng laka a tawlhthlûk nual avângin a zu thlen meuh chuan berh lo lai pawh a awm lo a ni. In chhung a zu lût chu chu mite chhungkua chu an lo tho ṭhap tawh a, chutia berh hnuanga an Lalpa lo lût an hmuh chuan mak tih hmel takin an lo en ka hau hlawm ringawta, mahse, an nu ber chuan hrethiam vatin "Lalpa, kan Lalnu chuan min mamawh a ni ngei ang maw?" a lo ti vat a, Lal Kâpthanga chuan "Aw, khi, Chîni nu, a vei ṭan dêr tawhin ka ring. Ka han chho leh phawt ange" tiin a inthlahrung deuh bawk su chu a ṭawng bahnuaia, Chîni nu chuan nuih deuh hak hak pahin "Lalpa, kan Lalnu tan chuan khaw hmunah pawh kal kan inhuam ang chu" tiin an chhuak dûn ta a.

Chumi ni zîngkar ruah sur nasa lutuk vâng chuan khawlaia chhuak pawh an awm meuh lo a ni. Lal inah pawh Lalnu Zikpuii nau vei buaipuiin nau chhar thiam chu a che zung zung a, Lalpa erawh tap bulah a indawm kûn ngul thung. Han kawm tûrin a upate tân lah rawn kal ngaihna awm hek suh hlauthawng takin a ṭhu kun ngul reng ringawt a. Tukṭhuan ei a hun dawn hnai ta tihah chuan Lalnu Zikpuii chuan fanu duhawm tak a hring ta, fapa awt viau mah se, khuanu'n an tana a duan chu lawm taka pawmin an nupa chuan an innuih ver ver a. Naute pian hnu lawkah chuan ruah chu rawn hânin ni chu a rawn chhuak êng ta ut maia, a hma zawng zawnga chhum zîng khat mupte kha bo vekin khua chu a thiang ṭha kher mai. Lal in a Upa Thangkunga tukṭhuan ei zo tawh han chhoin Lalpa Kâpthanga lo tei kual chhen a hmuh chuan pan vatin Lal Kâpthanga'n a hmuh rual chuan "U Thang fanu ka nei dêr mai" a lo ti vata, Upa Thangkunga chuan "Ekhai, Kâpa a va han lawmawm tak em. Lal fanu duhawm leh hmelṭha tak anih beisei ang, khawmaw kan en anga" tiin Lalnu Zikpuii kianga naute muhil chu a en vang vang a, "Ekhai, Kâpa a hmingte in sa tawh em?" a han ti a, chutih lai chuan upa dangte pawh lo thleng khawmin an Lal fanu thar an han hmuh chuan an Lalte nupa chu an lawmpui zia an hrilh sap sap hlawm a. Lal Kapthanga chuan a fanu hmingah chuan "Mawizuali" tih a sa ta a.
Zehtet khaw mipuite chuan an Lal fanu thar chu an lâwmin a hmel hmuh an châk êm êm ṭheuha, an Lalte nupa chu an lawm pui êm êm vek a ni.

Tuk khat Lianmawia zing tho in a zu haw chu a pa a lo tho tawha, tap kianga ṭhuin thil a lo ngaihtuah mûk hmêl hle. A hmate phih faiin a pa kiangah chuan a ṭhu ve ta a, a pa chuan muangchângin "Hei, Taite, tlangvâl naupang tak pawh i ni tawh bîk lo a, nupui hi nei tawh la kan duh a ni. Chhuantei nu leh pate, a u Chhûngpuii leh i pa Buangate nupa pawhin min hrilh fo tawh a, Chhuantei i theihnghilh theih loh vânga nupui nei duh lo i ni anga an ngaih tlat avângin an rilru a hahdam thei lo a ni. I ṭhianpa Hrâta'n Zawlbuan Lal fanu nen in inhmelduh thu leh, a nuṭa pa hnena a dîl sak thu che min hrilh a, kan han dîl mai dawn em ni ang. I nu nen hian tu hmel hmuh kan châk tawh viau a nia. Zamana pawh saw Ṭhuamtei sawn rei lo te hnuah fa a hrin sak tawh mai dawn a sin, i fate'n Zamana fate leh Zamkunga fate an ngam lo lutuk ang"a han ti a, Lianmawia chuan "Ka pa, chutia nang berin i tihte chuan ka nei anga ni mai alawm. Chhuantei tih loha ka mit la tu leh ka hmangaih awm chhun chu Lal fanu Rosanglianu chauh khi a ni" a ti ve ta a. Chumi zanah chuan Upa Chawnga chuan palai tûrte sawm kual in a ṭhianpa, Upa Thangkunga leh Lianmawia ṭhianpa Pasalṭha Zamana hoin an kal anga, kâr a hlat tham avang leh inbiak lawkna an neih tawh avângin mante pawh an keng lawk vek anga, an ken zatin a daih lo anih leh remchang hmasa bera inpe turin inrem pui an tum dawn a ni.

A tukah chuan palai tûrte chu Zawlbuan khaw lam panin an kal ta a, Lal fanu man atana an kên sialte bâkah ro ṭha tak an keng nual bawk a, tlangval sawmhnih rualin fimkhur thu hlaah an zui bawk. An kal aṭanga zan hnih a liam hnuah chuan Upa Chawnga leh Hratzuala lam hnai deuh ho chu Ṭhakimi te inah an lêng ve ta bawk a, inneihna ropui tak hman ngei an duh a, a rualin nupui an nei dawn a ni. Vawi thum zet an lên hnuah chuan Ṭhakimi chhungte nen chuan an inrem ta, rei lo te hnuah an inneih tur thu chu khuaah chuan a thang chhuak nghal vek a, nula tam tak thinlung a na vawng vawng hial ngei ang le.

Chuta ṭang chuan Lianmawiate ṭhian ho pawh an inbuatsaih chho ve ta a, khawtlâng hrai ngei an duh avângin sa pelh te an la ngai dawn a, chu vângin silai mu dengin an ri tluk tluk hlawm a. Ni hnih vel an inbuatsaih hnuah chuan ram lamah an kal ta zeuh zeuh a, mahse, inneih hun tur a la hnai lem lo bawk nen tlangval dang an hruai ngai lo a, sa lian em em pawh an la ngai lo bawk. Ni sarih hnuah chuan hlim sarhin Upa Thangkungate pawh an lo haw ta a, an inbiak rem danah chuan ni thum chhung an inbuatsaih ve hnuah he lam an rawn pan dawn a lo ni a, an phur kher mai. Lalpa Kapthanga chuan a se chal a thawh tûr chu a rawn sawi piap bawk a, Zehtet khaw mipuite chu inneihna ropui tak hmang tûrin an inbuatsaih ta hlawm a. Lianmawiate chuan Bungtlâng lamah palai tîrin an ni ṭhian li erawh a huhoin Bualthleng leh Damdep lamah an kal thung a, kawng laka zan khat an riah hnuah leng lên ar khuan hun lai vêlin khua an lût ta a. Lal tual an thlen chhoh chuan an lam pana rawlthar lo kal chuan "Ekhai, U Lianmawiate lah ni rengin, kha eng ti tura lo kal nge in nih?" a lo ti vat a, Lianmawia chuan "Ekhai, Lal fapa Doliana maw? Hawh teh i pa han hmu phawt i la kan sawi dawn nia."tiin Lal inah chuan an inzui lut leh ta a. Lianmawiate hmel lo lan rual chuan thu pawimawh tak an rawn ken ringin Lalpa Rengliana chuan zanriahte a han bar tir te te phawt a ti chuan an sawi ho ta a, Lianmawia leh Hratzuala nupui nei tûr chu Bualthleng khaw Lal chhungkua leh upate chuan lawmpuina thu hlânin an chibai sap sapa, chutih mêk lai chuan Lal inkawngka chu rawn inhawng rawkin mipa naupang pahnih hi an rawn inbuan lût rawk rawk a, Lal nu Sangzuali chuan "Hei hei hei, engati nge khatia in awm leh?" tiin a han haua, chu veleh a fate pahnih eng tik hunah pawh inbuan an inpeih at emaw tih tur khawpa naupang harh em em, engemaw hleka inbuan nui nghal uar uar zel ṭhin Rûnliana leh Ngûrdawlate chu an lo haw chhuak vat a, Rûnliana chuan" Ngûra hi lawm, ka rawn thleng hmasa reng a, luh hmasak a duh vângin mi pawt let kher anih kha"a lo ti vata, Ngûrdawla chuan "Tu in thleng hmasa sa ti ang'a tih rualin min nam hnung dawrh a, a tlan nghal anih kha" a lo ti ve bawk a, chu veleh Rûnliana chuan lo hnial ve lehin inbuan leh mai inringin an han inman leh thuak thuak ṭhin a, Lalnu tihngaihna hre lo lutuk chuan "I pate ho hi inchhun fuh khawp anih hi nangni pahnih hi chuan, harh leh lutuk mai, in ute ang hi ni ve ta che u. Miin an sawi ru fo cheuin ka ring a ni, Doliana pa lah hian zilh tum si lo, hmanniah Ngûrdawla phei chuan mi ar note a lo vawm hlum leh ngawt kha. Thu pha ka zu chawi laia ka zah ziate kha min hriatthiam pui lah hi in tum si lo" a ti hlak hlak a, a in âng thinrim dawn tuh hriain Lal Rengliana chu palian viau e ti loin a ṭhu zum dâk thung. Lal fapa Doliana chuan "Ngûra, chutiangin mi pawi sawi ngawt tawh suh u" a lo ti ve a, chu veleh a naute pahnih chuan an u chu en karin an han inen dun leha, chutah nui deuh put put chungin an han inhrilh ru a, an che zia enghelh nei lo, â phuang mai bawk si chu khawnbawl upate leh Lianmawiate chuan lawmawm an tiin hmuhnawm an ti hle. "Hmeichhia ang maia in inhrilh rûk vei chu le" ti a an pa aw an hriat rual chuan tâwp chatin Rûnliana chuan "Ka pa, sava kan vehnaah ka u leh nula ṭhu dun kan hmu, tiraw Ngûra?" a ti ta mai, inchhunga awn ho chuan nuih dar dar pahin "Rûnte, han sawi zel teh u" an lo ti a, Ngûrdawla chuan "Hmu chiang e, ka u hian a thing phurh tûrte kha a eh sak vek leh nghal. U Vânite ho lah hian an chhak lawk aṭangib an lo bihthla renga, thingkunga ṭangin kan hmu ve vek sia" a lo ti leha, Lal ina awm ho chu an nui dar dar a, Vânthangpuii insum zo lo pawh chu a lo nui ve char char a. Doliana chuan "Ka pa, Vânite thing phur ka zui a, tui chawi tura an kal hlanin kan thir deng fanu nen khuan an phurh tur thing kan lo ek mai mai alawm" tih pahin a naute pahnih chu rum takin a han melh a, an ni lah chuan lo insiam chhiat khum pahin mu turin khum awmna lam an pan san ta daih a. Lianmawiate chu Lal inah riakin zan rei tak thleng an titi a, Bunghmun khuate nen an buainate leh an khaw chungchang thilte inhrilh tawnin an lunglen thute pawh an sawi ve chamchi hlawm a, a tuk zing khawvar rual chuan Damdep khaw lam panin an inzui phei leh ta hnak hnak a.

Zehtet khaw lamah pawh Hrangseipuia a lo thleng tawh bawka, Lianmawiate leh Hratzuala chhungte pui tawnin Nêuvate ho nen an buai ve nak nak a, a ni pawh tlangval naupang a ni tawh bîk lo a, amah ngam deuh tute phei chuan nupui i rawn zawng ve a mi? Tite'n an lo fiam hlawm a, zan hnih a châm hnuah chuan an fiam dan chu a thleng dik dawn a ang ta riau mai. Nêuva leh Mankunga ṭawngtheih zârah Sentei chu a si thlu ve thei ta hlauh mai le. Nula lam reng reng ngaihsak ngai lo khana vawi khatna atan nula tan a thinlung a hawng ve ta a ni.

Damdep khaw lamah erawh Lalfanu Saingûrite chhungkaw lo zin lai a ni a, fapa fel tawh tak an lo nei diam tawh a, Lianmawiate nen an han inhmu khawm leh zet chu an hlim rualin rawlthar lai hun hre chhuak leh vang vangte pawh an awm ngei ang. Lianmawia chuan Lal Chhuanthanga chu a han sawm hmingṭha ve bawk a, an kal chhan tak erawh Pasalṭha Vâncheuva a ni. Lal in lama zanriah an kil hnu chuan Vâncheuva te in lam chu an pan ta a an zu thlen chuan Vâncheuva pawh chhuah a lo tum ve dawn mêk a, Lianmawiate lo lang a hmuh chuan a lawm hle maia, Lianmawiate'n an kal chhante an han hrilh chuan a phûr surh surh hle. An vai chuan Lal in lamah chho lehin Lal leh upate nen chuan an inkâwm a, leng hawn ar a khuan hnu chuan Zawlbuk lam an pan ta a. Damdep tlangvalte chuan khualbuan lo neih puiin Lianmawiate ho chuan tlangval pahnih ṭheuh an hneh hnu chuan an mu ta a. A tûk zîng hma takah thoin Lal in lam an pan ta a, Lal inah chuan Lalnu Sangliani leh a fanu Saingûrite chauh an lo la tho a, Lalnu Sangliani chuan "In va tho hma ngai ve?" a lo ti a, Lianmawia chuan "A hei, Vâna ber kan zinga a lo tel theih dâwn chuan kan khaw lam kan pan mai aniang chu kan ti deuh a ni. Bualthleng lamah sawm turte kan la nei ve bawk si a" a lo ti vat a Lalnu Sangliani chuan "Aw khai, vawin talte chu inchâm leh rih ang chu maw le" a lo ti a, Lianmawia bawk chuan "Cham tluka chakawm chu a awm lo alawm. Mahse, buai pui tur neuh neuh a tam ve si a, lo zin leh thuai kan tum dawn alawm" a lo ti a, Lalnu Sangliani chuan "A ni viau mai, kan pa ka'n kai tho ange" tiin khum pui lam a pan ta a. Lal fanu Saingûri chuan Lianmawia chu melh vang vangin an ṭhiante hmuh loh lai chuan "Hlim reng ang che u. Duhsakna ka hlan a che" a ti zawi sap a, Lianmawia pawh chuan nuih sak pahin "Nangni pawh le" a lo ti ve vat a, tun bâk chu an inhmu tawh awm si lo a, tiin, rei tak an han inmelh vang vanga, nui seih chungin hmun dang an hawi sawn ve ta chauh a. Lalpa Ngurthana rawn tho chuan Lianmawia leh Hratzuala tan chuan thil pek ṭha tak tak, ṭhi leh darte a rawn pe ta mai. Lianmawiate'n hetiang an beisei vanga rawn kal an nih loh thu sawia an han hnial chuan "Liana, ka tana mi pawimawh tak te in ni. Ṭum dangah inhnial ṭhin a, tun ṭum erawh inhnial thei lo ang. In la lo anih chuan min en hrang hleah ka ngai ang" tiin Lal Ngurthana chu a ṭang tlat a, a makpa Lal Chhuanthanga lah chuan a lo tuihnih zung zung bawk a, Lianmawiate inthlahrung lutukin an han hnial leh chu Lalpa Ngurthana chu a thinrim ta lek lek maia, Zamana chu a upa ber tih takah a puitlinna chu rawn lang vatin Lalpa Ngurthana thil pek chu a rawn la ta a. An kal dawnah chuan Lalnu Sangliani chuan "Ka naute nupa mawlh kha min lo biak r'u aw, an fate pawh kha ka ngai khawp mai. In U Biakmawii te nupa pawh kha ka ngai lutuk a nia. In u Sangteate chhungkua pawh ka ngai tak zet. A bîk takin U Ṭiali leh ka nau Partei kha min lo biak dawn nia" a rawn ti deuh duah a, mipa ho chu an lo nui suk a. Mahse, Lianmawia'n ngui deuh taka "Lalnu, ka pi Ṭiali chu pialrâlah a lawi tawh a ni" a rawn tih sap rual chuan Lalnu Sangliani mitmeng leh hmel hmai chu a danglam nghal rawk rawk a, "A va pawi ve aw. Ka ngai ṭhin a sin" ti sapin a mittui luang hruk zauh pahib inchhungah a lut ta daih a, Lianmawia chuan nuam lo a ti ang reng hle. Mahse, Lal Ngurthana chuan "Engah vak ngai suh u, a hre ve chauha a ṭhawng deuh a nih kha. Kal tawh rawh u. Dam takin kal u la, in Lalpa hnenah khan a fanu thar neih ka lawm pui thu inlo hrilh ngei ngei dawn nia" a lo tih takah chuan in mangṭhain an kal ta a. Bualthleng khua an zu thlen leh hnu chuan an Pasalṭha Hlunzîka te inlamah kal hmasain an sawm leh te te a, ti chuan Lal inah innghatin a tuk zingah an khaw lam panin an kal a, Lal Rengliana berin a zui duh miau avângin a hoin an kal ta a.

Zehtet khua an thlen hnu chuan Zamanate in lamah Vâncheuva leh Hlunzîka te chu an innghat a, Hrangseipuia erawh Thansanga nen Liansangate in lamah an lo innghat sa diam tawh a. Khua an thlen aṭanga zan hnih a liam leh hnu chuan Zawlbuan lamte chu an lo thleng ve ta a. Zehtet khaw chhungah chuan khaw ropui pathum awptu Lalte an han awm khawm ta ṭhiau mai a, khawi khaw tan pawha rûn huphurh awm tak vek an nih laia an la ṭang rual zui phei chu hmelma tana an tawhkhirh em emna a ni. A tukah chuan tlangval te chu ram lamah kalin Pasalṭha Lianmawia pawl leh Hratzuala pawlah inṭhein an inel ta a, tlangval sawmnga ve ve awmin Lianmawia pawlah chuan Pasalṭha Zamkunga, Vâncheuva an awm bâkah tlangval zinga a thei pawl Nêuva leh Dâilovate an awm ve bawk. Hratzuala pawlah erawh Pasalṭha Zamana, Hrangseipuia, Hlunzîka leh an thangchhang dawl tu tûr Mankunga a awm ve bawk. Tu nge sa la lian zawk tihah leh, sa la tam zawk tihah an inel dawn a ni. Ni lenga hmun hrana an vah hnu chuan unau hmel hai hun velah chuan kawtchhuah ah an awm khawm leh ta ṭhap a, sa la tam zawk Hratzuala pawlte chuan an chak ngei an ring hle. Mahse, Lianmawiate Sazuk chal kah lian zet, a ki ni se ropui tak an hmuh rual chuan an chak lo tih an in pawm nghal thlap mai. Lianmawia chuan Sazuk hla do chu a han chham vang vanga a silai chu a kap puak dur bawka, chu veleh midangte chuan hlado lo chham ve nghalin silai chu a ri dur dur renga, sa lu zawn tur naupang an rawn thlen nak nak hnu chuan khaw chhung lam chu an pan ta a.

Ni hnih a liam leh meuh chuan inneihna ropui chu Zehtet khuate chuan awm ni khamin an hmang ta a, Lal mualah chuan fatu hoin eirawng a sir lamah an lo bawl khu vut vut a, nula tlangvâlte chu inkuah rial chungin an chai dup dup bawk a, ruai a kil theih takah chuan lâm lampangte duh tawkin ruai chu puar el euhin an ei ta a. Zan hun a lo thleng a, leng hawn ar khuan hma chu Lal mualah nula tlangvalte chu an lam leh dup dup a, nuam an tiin khaw lai emaw lo interek fâlte pawh an awm zeuh zeuh bawk a, an ni tan chuan zân duhthusâm a ni. Chu zân chu lawi chhiat zân anih avangin Lal fanu Rosangliani leh Ṭhakimite chu an pasalte inah an la riak lo a, mahse, lawi ṭhat zan a lo thlen meuh chuan an pasalte lo haw hun an nghak rûn tawh thung. Tlangvalte chuan Hratzuala leh Lianmawiate chu phuar hlawmin an in ni lo lam zawk ve ve an pan pui a, an ka an hnawh sak tlat avangin an ṭawng thei si lo, Hratzualate in chhunga Lianmawia an dah hnu chuan Hratzuala chu Lianmawiate inah an han dah ve leh a, Lal fanu Rosangliani leh Ṭhakimi'n an pasalte emaw ti a, zak tak chunga an han phelh fel meuh chuan an zah a zual ngei mai. Tlangvalte lah chuan thawm an nei reng mai bawk nen, zah luat avângin an sen tawn tawn reng mai a ni. Lianmawia leh Hratzuala lo chhuak chu man bet lehin an han phuar hlawm leha ti chuan an in ve veah an dah ta a, Ṭhakimi leh Rosangliani chuan an bum leh mai hlauin an phelh ngam ta lo a, tlangval hoin an ṭin san hnuah chuan an pasalte an ni tak tak tawh tih hriain an va phelh ta chauh a.

Rosangliani îp châwih rual chuan Lianmawia chuan a han dîm deuh a, Rosangliani inhnît feih a hriat rual chuan châwl detin zawi muangin a bei ta zawk a, Rosangliani tân chuan a vawi khatna anih avangin natna mai a ni. Lianmawia sazu kaw lai zo a bula a mut thlak thlawp lai pawh chuan na a la ti hle. Lianmawia chuan a ban chu lukham tirin a nupui chu duat takin a chûl heuh heuh a. Hratzuala erawh an rawlthar lai leh tlangval chhoh tirh a Zamana nen nuthlawi thar lam deuh an hriat theih êm vang kha ni hmiang Lianmawia ang em em chuan a che khawr ve lo a, rin ai takin a nupui chu a dîm thiam hle. Mahse, Ṭhakimi mittui pawh na tih luat avângin a tla ve tho mai. Mahse a na nawn tawh lo ang.