PASALȚHA LIANMAWIA BUNG - 46

"Hei, Sangi dam veleh hian palai rawn tir mai i la a sual em lo ang chu. Liana chhungte hian tu hmel hmuh an nghakhlel tawh tak zet a ni" ti a Hratzuala thu sawi chu Rolianpuiate unau chuan an han ngaihtuah vang vang a, an farnu neih chhun, an duat em em, nula chhuak hlim hlawt chu khual khaw hla taka han tirh liam chu an hreh hle. Mahse, an farnu leh Lianmawiate inhmangaihna chu a nasa zual deuh deuh dawn tih an hriat chian bakah Lianmawia tluka makpa ṭha an tan a awm dawn chuang lo tih an hriat tlat avangin leh an farnu hlimna ber tur ni a an hriat avangin an pawm ve ta a. Hratzuala pawh ti fuh inti takin pawn lamah a chhuak a, a thil tih engmah hre hauh lo tu Lianmawia'n rei tih hmel zeta ner nung chunga a lo en chu nuih pahin "Kan kal thei e" a rawn ti a, Lalpa Rolianpuia chu rawn chhuak vein an pathumin kawtchhuah lam an pan ta a. Rolianpuia chuan "Liana, kan dam tlân beisei phawt i la, kan la inhmu leh ang chu, khua hmuna leng lo na na na chu rilruah kan inhre reng a ni ang chu. In ngaihawm leh dawn hle mai" a rawn ti a, Lianmawia chuan "Nang ni deuh a nia ngaihawm dawn. Kan la inhmu leh thuai turah ngai ang u" tiin a rawn chhanga Hratzuala chuan "Ni e, in makpa a la ni thuai dâwn alawm, in inhmu leh thuai ang" a tih chuan Lianmawia chuan a lo nghawk ru zauh a. Hratzuala lah chu hria ang pawhin a awm duh hauh lo. Hlim taka ti ti hoin kawt chhuah an thlen thlak chuan Zehtet tlangval lo inpeih sa vek tawh te chu an zu hmu thuai a, pan thla vatin Lalpa Rolianpuia chuan "Nangni tlangval huaisen takte vang chauha inzinga la ding hi ka ni e, engtik lai pawhin he khuaah hian intan hmun a awm reng a ni tih in lo hre dawn nia. Khuanu zarah kanla inhmuh leh ngei beisei ang." tiin thlahna thu a rawn sawi a, ti chuan Lianmawiate chu Zehtet khaw lam panin an kal ta a.

Zehtet khaw lam ho pawhin an tlangvalte lo haw hun tur chu nghakin ni an chhiar liam ve mêk bawk a, Zamana phei chuan a ṭhiante chu an rei a tiin a ngaihtuah tawh em em a, an chanchin ngaihvena han kal maite paeh a duh tawh hle a ni. Mahse, Lianmawia leh Hratzualate hona hnuaia thawk chhuak an nih avangin a rilru chu a la hahdam thei hram hram a, chuti maia an chet sual an ring lo a ni. An khua leh Bungtlang khaw inkarah Hliappui Lal Chunglûra pawhin khua rawn din tawhin a hmingah Chawnpui an sa a, khaw inhlat lo tê an nih avangin an inpawh tlâng hle a ni. Mahse, rin loh takin tlai khat chu feh haw hmasate kawtchhuah lama an chawlh khawmuan lai mêk chuan an khaw rawlthar pathumte hi hmanhmawh takin an rawn kal hlawk hlawk a, kawtchhuaha țhu chawl tam zawk chuan chawl ve turin an lo sawm sap sap a, mahse, mawi taka hnialin kal mai an han tuma, an hmelhmaia thinrimna lang chhuak lo hmu ru rengtu Liansanga chuan vatin "Naute u, lungawi lohna innei a ang riau mai. Min han hrilh teh u" a han ti a, rawlthar zinga pakhat chuan "Pa Lian, kan rin aiin kan hna kan zo fel hma a, haw maina'n a la hma kan tih deuh avangin vau lamah lutin sava perh tur kan zawng ve e kan tia, kan vanneih a siamin sakhi tuai kan hmu fuh hlauh mai a, țhianpa Rumliana hian a khelah tak a khawh fuh a, mahse, thi nghal mai loin a tlan ta a, a khela a khawh fuh avangin tlan erawh a tlan chak lo hle a, a thawm pawh kan hre phak char char nghe nghe. Chu tia kan um zel lai chuan kan chhak lawkah silai a puak ta dur mai a, chu veleh kan khaw mi leh sate'n an lo kap ta emaw tiin kan tlan chho a, mahse, kan han thlen chhoh chuan Chawnpui tlangvalte'n kan sa hliam chu lak sawn an lo tum mek a, kan han thlen chhoh chuan thil awmziate han sawiin kan sahliam a nih thute kan han sawi a, mahse, kan rin loh takin min lo nuih sawh hle a, haw tura min hrilh hnua kan haw mai duh loh avangin kut pawh min thlak nual a ni. Mahse, keini aia tam zawk leh upa zawk an nih avangin kan sa hliam chu kan rawn chhuh thei ta lo a ni. "tiin a rawn sawi charh charh a Liansanga chuan an hmela lungngaihna leh rilru natna lang chu a hmuh hmaih hauh lo." A va pawi ve aw, Chawnpui tlangvalte chuan chutiang sa tenau mai mai pawh an chhuh duh che u chu mak ka va han ti em. Silai keng zawk an nih phei chuan sa lian tham beisei law law tur an ni zawk a sin maw le. Kan Lalte inbiak tira khaw dang rama tlangvalte sa pela ram vah tawh loh rel a țha viau mai. Khaw inthenawm hnai mai kan ni a, kan indo chuan a țha lo ang. Mahse, in sa an lo chhuh man che u chu an rulh let ngei a ngai ang" a rawn ti a, rawlthar zinga pakhat chuan "Pa Lian kan rawn haw dawnah an zinga pakhatin 'Hnamchawm Lal phuahchawp awp khawm ve mai in nih kha hria u la, rawn pawngpawrh tawh hauh suh u, kan pasalțha Hauchhûmate unau thin inti rim palh ange 'tiin min hrilh a" a tih rual chuan Liansanga chu a sa nghal zak mai a, an Lal Kapthanga an hmuhsitna thu chu pai dam har a ti hle mai. Insum hram hramin "Ekhai, chuti fakaua min han hmuhsit mai chu! Lal hnenah he thu hi a thlen ngei a ngai a ni. Hauchhuma erawh an sawi anga thinrim mai mai chi niin ka hre lo, an chhuang viau anih leh in u Lianmawia a awm ve hi Hauchhuma te tan chuan Lianmawia khi khin phak rual a ni lo e. Min lo zui u la, Lal in lam i pan vat teh ang" tiin chung rawlthar pathumte chu Lal in lam a pan pui nghal a, Lalpa Kapthanga bulah chuan thil thlen dan chu fiah fel takin an han sawi vek a. Lal Kapthanga pawhin an hmuhsitna chu na a ti kher mai, mahse, a thin erawh a ti rim duh hauh lo thung a, chung rawltharte hmel chu en vang vangin, "in hming min han hrilh teh u" a ti ta daih a, an zinga pakhat chuan "Lalpa kei hi, Vungthanga ka ni a, ka țhiante hi Mangtawna leh Rumlianate an ni a, khaw hmawr lama khawsate kan ni e" a rawn ti a, Lal Kapthanga chuan "Vunga, in huaisen hle mai. In thlavang hauh ngam lo khawpa Lal dawihzep ka ni hauh lo a nia. Zanin tlaiah la la hian Chawnpui khaw lamah palai kan tir nghal ang, nangni erawh in lamah lo zu awm u la, zan lamah in hmel hmuh ka lo beisei ang, in haw thei tawh e, ka makpa Zamana kha lo chho turin min lo koh sak nghal dawn nia. Liana nang erawh he lamah la awm rih la"a tih rual chuan Vungthangate chu an chhuak nghal a. "Liana, mi huaisen kan neih belh thuai dawn a ang hle mai" tiin Lal Kapthanga chuan a vaibel chu a pak khu tual tual a, Liansanga chuan "Ni e, Lalpa, an hmelah khan zâmna leh hlauhna a awm hauh lo. Kan khua hi kan lian em a, kan inhre kim lo em a ni. Mi huaisen dang pawh an awm nualin a nia ka rin ni, kan rawltharte hi belh chian an ngai anih hi" a rawn ti ve a, Zamana a lo thlen hma chu lo titi dunin Zamana hmel an hmuh rual chuan chanchin, thil thlen dan zawng zawng chu an hrilh a, an pathuma ro rel nghalin Liansanga nen chuan inzui chhuakin tlangval pathum an sawm belh a, mahni in lamah hawin an mamawh tur an lakhawm sawk sawk a hmanhmawh takin zanlai ar khuan hmaa Chawnpui thlen hman ngei tumin an kal ta a.

Zan thla eng tak hnuaiah chuan Lal Kapthanga chuan leihkapuiah a khawnbawote chu thut puiin Liansangate a tirh chhan leh a ngaihtuah thute chu a sawi mawlh mawlh a, a upate zinga ṭhenkhat chu an thin a rimin, Chawnpui tlangvalte chu duham an tih zia leh an chapona chu paih thlak sak an chak ziate an rawn sawi sap sap hlawm a. Lianmawia pa Upa Chawnga pawh a thinrim ve hle. Chutia an thinrim thu an lo sawi lai chuan Lal Kapthanga bawk chu rawn ṭawng lehin "Ekhai, tuna lo thinrim viau hi thil tih awm tak anih rualin che chhuak tur tlangval kan neih loh zia hi hre thar leh ang u. Pasalțha Lianmawia leh Pasalțha Hratzualate tello chuan chaurau ek kan thai mai mai ang tih pawh a hlauhawm a ni" a rawn ti a, Upa Thangkunga chuan "Ni e, Lianate chanchin ngaihven tur hi kan intir mai dawn em ni?" tiin Lalpa Kapthanga chu a han thlek a, Lalpa Kapthanga chuan "Ka lo tum lawk sa a ni e, tlangvalte pawh ka ko tawha an lo kal thuaiin ka ring" a tih hnu tuibur hmuam da awm velah chuan Vungthangate pathum chu an lo thleng ve ta a. Lalpa Kapthanga chuan a upate hnenah chuan Chawnpui khuate kut an tawrh dan te chu a hrilh hnuah inchhung lamah a luh pui a, ral kut ațanga an lo man khawm silai chu tlangaupa a va lak tir a, Vungthangate hmaah chuan chhawpin an duh thlang turin a ti ta mai. Vungthangate pathum mak ti lutuk chu an hawi ka ho ringawt a, Lalpa Kapthanga chuan hrethiam vatin "Pasalțha Liansangate chin ngaihven turin Zawlbuan khaw lam pan turin ka duh che u a, kawng lakah inmamawh ngei ang. Tin, nakin zelah he khaw venhimna'n hian in la mamawh dawn a ni" a han ti a, mahse, Vungthangate chuan thlan mai nachang an la hre lo a, Upa Thangkunga chuan "Ekhai, kan naute hi kan ti hrilhhai mai mai dawn, khawnge keiman kan thlan sak ange" tiin silau zinga a țha ber ber pathum chu a pe ta a, Vungthangate chuan an thil tawn mek chu an awih lo a ni tih an hmelah chuan a lang chiang hle. Lalpa Kapthanga'n "Naktuk zing khawvar rualin Zawlbuan khaw lamah chuan in kal anga, Zawlbuan khua inthlen thlenga Lianmawiate hmel inhmu lo anih chuan in lo haw leh mai dawn nia. Țiau lui kai tur em chuan inla nau deuh e" a tih hnu lawkah Vungthanga chuan "Lalpa, i thil min pek hi kan tan chuan a hlu em em a, keini hmeithai fa ve mai heti khawpa min hmangaihtu Lal kan nei che hi kan lawm tak zet a ni. I tan leh he khaw tan hian ṭangkai taka hman ngei kan tum ang. Pasalțha Lianmawiate hmel kan hmu emaw an thi a ni tih kan hriat hma chu kan rawn haw lo ang. I tan leh he khaw tan anih phawt chuan kawlkil thleng rawk khawpin kan vak ngei ang"tiin hnuk ulh țeuh chungin a rawn sawi a, a sawi zawh rual chuan a mittui chu a luang nghal zawih zawih a,lawm takin Lal in ațang chuan an inzui chhuak ta a. Leng hawn ar a khuan hnu feah chuan upa ho chu mahni inlam ṭheuh pan turin an kal ta a, Upa Thangkunga pawh an in a zu thlen chuan a fanute pahnih Sentei leh Lianzualite chuan an hmui an lo hung fel mek a, a pa lo haw an hmuh chuan an lo be nghal hlut a, Sentei chuan "Ka pa, Chawnpui khuate kut kan lo tuar reng a ni maw?" a han ti a Upa Thangkunga chuan "Akhai, tuar em em lo e, nunna pawh kan inchan loh hi" a ti maia, Sentei chuan "Țhuamtei'n Mana a ngaihtuah zia min rawn hrilh a" a han ti leh a, Upa Thangkunga chuan "Ekhai, rammu tura kal pawh an ni hleinem" a ti leh mai a, a fanu naupang zawk Lianzuali, tleirawlte chuan "Ka pa, kei zawng U Lianmawia leh U Hratzuala awm loh hlana leido lo neih chu ka peih hauh lo, kan tlangval tam zawk te lah khuaah an awm si lo. U Lianmawiate an han inchan nual anih phei chuan kan chan a chhe dawn emai, salah min man ngei awm si a, ka hlau emai"a rawn ti a, Sentei chuan "Ni e, Lianmawiate lah hi an rei tawh si, khaw kar kawng ringawt pawh a hlat tehlul nen, eng chen chiah nge maw an thang dawn ni" a rawn ti ve a, Upa Thangkunga chuan "Ekhai chungte zawng hmeichhe sawi chi pawh va ni suh. Tui takin mu tawh rawh u, Lianmawiate pawh an lo thleng ṭep tawh alawm" tiin khumpui lam a pan san ta a. Mut hmunah a inngaihtuah nasa hle a, a fanute thil sawi pawh dik a ti hle. Zamana bak pasalțha rin tur an neih loh laia leido lo neih chu a zuam bîk hauh lo. An chan a chau hle dawn tih a chiang renga, thisen a luang anga, chhungkua an inṭhen darh leh anga, a chhuan ruk ṭhin em em, an khaw nula hmelțha berte zinga mi a fanute pahnih ngei pawh a chan thei tlat a ni. Sentei pawh mut hmunah a inngaihtuah nasa hle maia, a unaupa, a țhian ni bawk, Lianmawia hnena thil sawi duh a neih chu sawi vat vat a duh hle mai a, mahse, Lianmawia lah khuaa a awmin lenna chang a hre lo emaw tih mai turin a tawmim ta si a, hrilhna hun remchang a nei thei lo chu pawi a ti em em a ni.

Zamanate pawh zanlai ar khuan zawh hnu lawkah chuan Chawnpui khaw daia an buk zar hnuaiah chuan an mu siai siai tawh a, zan khat riahna'n leka an chauh hnap hnua an zar anih avangin a țha lem lo hle, mahse, tah phunnawi loin an mu hnar bawrh bawrh hlawm a. Zing khawvar hnu lawkah tho chhuakin Chawnpui khaw chhungah chuan Liansanga leh Zamana chu an lut ta a,tlangval dangte erawh engemaw palh thut a awm takah tiin khaw pawn lamah an lo biru thung a, hmun khatah biru loin an ințhen darh nghe nghe, Chawnpui khaw chhunha inte chu a la thar hlawm hle a, khaw lu lam pan chho zelin Chawnpui Lalin lo ding lurh chu an pan chho zela, khaw mipui lo hmutute chuan an lo en hrek hrek hlawm a, mahse, engah mah ngai duh loin an kal mawp mawp a, Lal in an han thlen chuan luh an han dîl a, Chawnpui Lalpa'n a koh luh rual chuan Liansanga leh Zamana chu lutin Chawnpui Lalpa hnenah chuan an kal chhante chu khuh mawi lem loin an sawi nghal phawng phawng a, Chawnpui Lal Chunglûra chuan "In thu rawn thlen leh ka tlangvalte thu rawn thlen dan a inang hauh lo mai. In rawltharte ngei khan anih kha kutthawh hmasa, naupang bumin in Lalpa hoin in awm a ni reng anih chu" a han tih rual chuan Zamana chu a sa nghal zak maia, mahse, Liansanga chuan a ruka khap bet vatin Lal Chunglûra hnenah chuan "Lalpa, kan naute khan dawt an sawi hauhin ka ring lo, hmeithai fa vek an ni a, an ni khan harsa takin kha sakhi tuai kha feiin thah tumin an ûm a sin, a silai nei zawkin sa tenau, chutah hliam tawh sa in han lak sak duh kha mak kan ti hle a, chu vangin in thil tih sual man hi inpek ngei a ngai ang, tiin kan Lalpa'n min rawn tir a ni" a tihlai mek chuan Lalfanu Sanglûri tui chawi chu a lo haw ve chiah a, mikhualte hmel leh a pa lungawi lo hmel a hmuh rual chuan a tuiumte chu hung fel sawk sawkin a nu lam a pan nghal vat a. Lalpa Chunglûra chuan "Ka tlangvalte hian dawt an sawi hauh lo ang. Chu vangin in duh ang engmah in hmu lo ang. Pasalțha Liansanga Hmar hoin an hlauh em em țhin kha ni mah la, i kumin a uai rit hle tawh che tih kan hria, nang pawh Pasalțha Zaman, pasalțha hi ka khuaah hian an awm ve tih hria ang che, dam in la duh anih chuan chhuak vat rawh u"a han ti a, Liansanga chu din nghal uaih pahin "Tunah chuan hmelma kan ni ta, a chan chhe zawk kan awm ngei ang. Kan chhuak nghal ange, Mana lo kal rawh" tih pahin chhuah mai a han tum a, Lalpa Chunglûra'n "Ka pasalțha Hauchhûmate unau kut intawrh hma hian chhuak vat teh u" a rawn ti leh chiah maw tihah Liansanga chu inher vatin tap lam a Lal fanu a nu bula lo țhu chu a samah kekin a nghawngah a chempuiin a chuktuah nghal rap mai le, Lal fanu Sanglûri hlau lutuk chuan a nu leh pate chu a en țawk țawk a, Lalpa Chunglûra thinrim ang thawm avang chuan tlangval ho chu an rawn thleng khawm ta sap sap mai. Lal in chu rawn luh chhuah an tum ngei dawn tih an hriat avangin Zamana chuan hma hruaiin Lalpa Chunglûra te nupa chu silaia tin ran chungin luhkaah chuan an va ding chhuak a, an hnungah Liansanga leh Lal fanu Sanglûri te chuan an zui ve bawk a. Chawnpui tlangvalte hmelah chuan thinrimna a rawn lang nghal a, an ri nuai nuai maia chutih lai chuan "Kan Lal chhungkua lo man tu chu ka rin loh lam tak zu ni daiha" rawn ti tu, pasalțha tih hriat tak pakhat lam chu a hawi nghala, nuih suk pahin "In tlangvalte bumin in Lal a awm a, in tawrh a ngai dawn ta a nih hi" a han ti a, chu veleh chu pasalțha chuan "Mipa i nih ngai chuan min rawn hmachhawn ta che, Pasalțha Haudinga hmaah hian i ding ngam dawn em?" a han tih chuan Zamana chuan "Hauchhuma nau i ni ang maw?" tih pahin a han nui hak hak a, an ṭawng lai chuan Liansanga chuan lo pawt chatin "Chawnpui tlangvalte u, kan rawltharte sa hliam in lo chhuh man kan rawn țhing che u anih hi. Zehtet khaw mi leh sa te kan ni e, Liansanga ka ni a, a ni hi, Zamana a ni e" a tih rual chuan tlangval tam takte chuan Liansanga chu an en ngawih ngawih hlawma, Hmar hnam ho ralți reng renga siam ṭhin tute zinga mi Lusei pasalțha huaisen ni țhin Liansanga chu an ngaisang tih a hriat hle. Haudinga chuan "I hun a liam tawh e, tunah chuan putar nih chiah i hma bak tawh, Lal chhungkua kha kal tir u la, kan zuah angche u. Ka u zin bo lai ni lo se chuan in thi ve ve tawh ang" a han ti a, mahse, Liansanga chuan engah mah ngai lo tih hriat takin, "Silai vawi hnih emaw a aia tam a puah rual rualin in in khua hi a kang ral vek ang" tih pahin a silai chu ah chu la thlain van lam hawiin a kap puak dura, chumi hnu rei lo teah khaw hmar lam leh mawng kam ațang chuan silai vawi khat ve ve a rawn puak bawk nen, Chawnpui ho chuan hual behin an awm emaw an inti a, an hlauthawng kher mai. Liansanga chuan "Kan Lal chuan in tlangvalte'n kan tlangvalte kut an lo thlak bakah, an sa an chhuh sak manah, țhi hna chawi turin a ti che u a, min pe dawn nge, inkhua hi kan hal dawn? Inrem taka awm hi kan duh dan a ni. In tlangvalte dawt sawi in awih avangin thil pawi tak a thleng palh ange"a han ti a, Lal Chunglûra chuan thinrim takin "Nimin lama Zehtet khaw ho nena buaina tawkte kha rawn chho teh u" a han ti a, mahse tumah chho ngam an awm ta tlat lo. Lal Chunglûra thinrim lutuk chuan "In Lal min bum a maw? Thil pawi tak a thlen hman teuh zia hi in va han zak lo em. Ngawi tak r'u ka zawng chhuak leh ngei ang che u" tiin a ang ta piap piap mai a, "In Lal duh ang ngei chuan ni rawh se, kan thiam loh a ni e" tiin Liansanga hnenah chuan ngaihdam a dil a, in chhung lamah inzui lutin țhi hna mawi tak tak, Lal chauhin an kawlte chu an inhlân ta a. Hmanhmawh taka khaw dai lam pan nghalin, an ṭhiante hmuh vat chu an duh hle. An inhmuh kim hnu lawkah an khaw lam panin an kal ta char char a, chaw faka an chawlh laiin Zamana chuan "U Lian, engvanga ṭhi ber kher chawi tir nge kan nih?" a han ti a, Liansanga chuan "E, Vungthangate pathum kha hmeithai fa ṭhiau an ni a, nupui a chhia a țha an la duh ve ngei anga, heng țhi hmang hian nupui an la nei ve mahna, kan Lal rorelna hi fing deuh a sin" tiin chaw chu a bar mawlh mawlh a. Tlangval dangte chuan an Lal ro rel dan chu an lo fak ve mawlh mawlh bawk a, puar el euha an ei hnu chuan an khaw lam panin an kal leh ta a.