BUALTHLENG MAWITU BUNG - 52

Hun leh nîte'n hma lam an pan zêl a, Châwiliana pawh an in thar tur sâin khawtlang mi tlâwmngaite puihna zârah hun rei lo te chhungin an pum ve ta mai rênga, an han insawn chhuak tur chu an huphurh tlâng ngei mai. Châwiliana ngat phei chuan a huphurh zual hle a, a pa ho a an lo hlim ve em emna ṭhin, a kal bo san tûrah pawh a ruat chhin ngai eih loh, a chhuah san tûr chu hrehawm a ti hle mai a. Mahse upa ber anihna angin in hrang a chan ve ngei a ngai tlat bawk si. A nupui leh a fate pahnih chu chhawmin an in tharah chuan an insuan lut ve ta rawih a. An awm loh a chin chu Pi Ṭialthangi chu a lung a leng thei hle mai, Châwiliana te in lama zu awm chângte pawh a ngah hle a, a tupa lahin a ngai bawk si nen Hrangvunga chu a pi bulah chuan a rawn riak chho fo a, a lehlamah an insawn chhuah hnua an in reh ta huai te pawh chu a rawn ti zia awm thar hle. Lalpa Rengliana pawhin a nupui rai mêk chu a duat hle a, engmah a tih phal ve loin Biakmawii te unau chuan an âwl hneh ngang bawka, in chhungkhur khawsakah erawh an buai lem lo thung.


Thansanga chuan hmun hrang hranga an ṭhiante chu an inneihna hman pui ve tûra sawm ngei a duh avângin amah ngei chu chhuah a tum a, a tum thu a ṭhiante bula a han sawi chuan Liansanga chuan "Ekhai Sanga hei Dama nen kan awm hi, Hminga nen chuan khuaah hian lo awm zawk rawh u, tun tut tutah in innei dawn pawh a ni lo a, zin khaw thawnna hun kan neih ve chhun a nih hi, keini kan kal a nge" a han ti a, Dammawia chuan "Ni e, ka pa pawh tlawh ka duh riau maia, chu vangin min ngaihtuah suh, tlangval inla nih kha, patling kan kal hian kawng a kaw deuh nge nge ang" a han ti a, Thansanga chuan "Ekhai ni lul love kan kal ho vek zawk ang chu le, Hminga nen kan tlangvâl ve laia kan zin ho hnuhnun ber a ni tawh hial dawn a sin" a rawn toh ve tâkah chuan an vaia kal chu an rêl ta a. A hmasa berah Dammawia pa te khua Ṭhangzing lamah an kal dawn a ni. A tukah chuan kal chhuak nghalin ṭum danga an zin ṭhin dân nen chuan a in ang lo hle mai, a hma chuan mi lu khai ngei tûrin emaw, ṭanpui ngaite ṭanpui turin emaw an zin ṭhin a ni ngai a, mahse tun ṭumah erawh an zin chhan a dang daih thung. Kar laka zan tam fe an riah hnu chuan Ṭhangzing khaw kawtchhuah chu lo sul haw hun laiin an thleng ta. Kawtchhuahah chuan Neihthanga pawh lo awmin a unaupa a han hmu chu lawm takin a pan vata, Dammawia pawh in pan ve nghalin an han in chibai a, an zin chhante chu sawi sawk sawkin khaw chhung lam an pan ta a.

Ṭhangzing mipuite'n Thansanga te an han hmu leh chu a ṭhen chuan an en duh hle, a ṭhen erawh chuan ṭha taka lo biaiin an lo nêl hle thunga. "Lusei pasalṭha te chu tih tur pawimawh neia rawn kal in va ang ve" rawn ti tu lam an hawi chuan Chhâwnsanga nui sang chunga lo ding chu an hmu a, pan phei vatin Thansanga chuan "Chhâwna i lo dam a maw?" a han ti a Chhâwnsanga pawh chuan "E ka dam ṭawk ṭawk e, kha engti tûra rawn kal nge maw in nih chiah le?" a han ti a, Thansanga'n a chhân hma chuan Dammawia chuan "Hei kan tlangvala te pahnih hian an lungdi te kianga riah rûn rem ve tawh an thlahlel a ni. Sâwmna thu kengin hei chen kan rawn kal ta anih hi. Nang pawh ti khan i hnen kan thlen nghal ni teh se, i lo kal ngei a ngai ang" a han ti a, Chhâwnsanga chuan "Ekhai, chu te zawng kal loh phal chi nang. Neiha ngaihdanah erawh ka innghat thunga" a han ti a Neihthanga chuan "Pasalṭha ropui pahnih nupui neihna chu kan chhim ve ngei a ngai ang chu" a rawn ti ve bawk a. Liansanga erawh Ṭhangzing khua chu en kualin an kal hnuhnun ber aia a lo ṭhan nasat tawh zia te chu a rilruin a ngaihtuah vang vang a.

Pu Mungliana te'n Thansanga te hmel an han hmu leh chu, an lo be nghal chung chunga, Dammawia pawh pa te in thleng a ni bawka nuam a ti kher mai. A pa nen a hun han hman dun ve tak tak chu châk hle ṭhin mah se, a theih tlat si loh. Ṭhangzing khaw mipuite chuan an mikhualte chu an inhrilh pung zêl a ni chêk ang chu, Pu Mungliana te in chhungah chuan Lal leh upate meuh an rawn kal ta mai. Ṭhangzing Lalpa chuan "Ka mâkpa chu ka kiangah thleng rawh se" a rawn ti lut nghal tawl a. Thansangate chuan hawihawm leh zah taka lo biain an inchibai kual a, a hnuah Dammawia chu Lal in a thleng turin a kal ta nge nge a.

Zanriah kil lai chuan Lalpa chuan "Dama, ka tu lo piang tur chu hmuh ve ngei ka duh teh mang e a, in tan phurrit mai anih kan hlauh rûk em em ka fanu meuhin a fa a han hrin sak tur che chu ka lawm hle mai" a han ti a, Dammawia chuan "E khai, Lalpa hmeichhe ṭha ber nei tu i ni hi inchhuang tur i ni e, hawihkawm lenrualte hmaa hawihhawm a thiamin, amah vanga nihlawh min ti tu lah chhiar tham fe an ni ve ngei ang, i fanu hi kei chuan ka thawk ve ṭek ṭek chhung chu hmangaihna tawp chin nei lo ka pe zêl dawn a ni"a han ti charh charh a, Lalpa chuan "Anih leh Sangtea leh Hminga chuan khawi lam nula hmelṭha nge an neih dawn a?" a han ti a, Dammawia chuan "Khawi dang nula mah ni lo e, kan Lalpa Dohranga fanu te pahnih an ni e, an ni hi Lalpa Dohranga khan a fa ang chiaha a en te an ni a, anih na takah chuan khaw dang Lal fanu sal ni tura kan hruai haw te an ni a, mahse kan Lalpa leh Zehtet Lalpa te khan sal neih duh loin an ruala kan hruai haw zawng zawngte awh khaw mi leh saah an chhiar a, an ni unau pawh Lalfanu an nih chhunzawm ta zêl a ni, an viak a ṭhain an fel teh a sin, an laizawn pakhat pawh Lalpa Dohranga ngei khan khaw dang Lalfapa hnenah khiang a awih tir nghe nghe a, khaw danga a lawi hnu lawka Lalpa Dohranga thih thu a fanuin a han hria kha chu a lainat awm viau a sin"a han ti a, Ṭhangzing Lalpa chuan "Nu hrawn sualna kan sawi kan sawi laia, hmeichhe pathum ngawt fa atana la a chu tiang khawpa hmangaih thei Lal in han nei chu in vannei teh mang e, hei ka kum a tam ve ta, pialrâl kai tûra lung loh tui ka dâwn ve hun chuan, Lalpa Dohranga chu chibai ka bûk ve ngei ang"a han ti a, Dammawia chuan "Ekhai chutiang lam an sawi ngai lo e, min dam pui reng tûr a ni zawk. Khua hmuna leng lo na na na chu i chanchin ṭha lam chauh a ni kan hriat duh" a han ti ve charh charh a, Lalpa chuan "Kan thu dang a lai chuan, Dama in khua hi ka lo râl hriat viau a, enge Zehtet leh Darchhep khuate nena in inlaichînna dik tak hi ni a?" a han ti a, Dammawia chuan sa tui hang hawp zauh pahin a han khuh kharh kharh a "E kan naupan lai thil daih tawh kha a ni a, ka pa ti a ka koh ṭhin, fapa ang taka min en tu ni bawk Pasaṭha Thanhranga, ka aihnahphahpui Thansanga pa leh Darchhep Pasalṭha ropui tuna Zehtet Khawnbawl upa ni ta, Pasalṭha Chhuanthanga te inṭhianṭhatna hi a ni. Darchhep leh keini khaw inkârah hian Zehtet khua hi a awm bawk a. Ṭum khat chu kan khuaah Pasalṭha Zangaia, tuna kan khawnbawl upa ni tate chhung hi Zehtet aṭangin kan Lalpa bêl turin an rawn pem lut rawih mai a, a chhan chu kan u Runthanga nupui ni ta Niliani hi khang lai khan tleirawl chhuak hlim hlawt a ni a, Zehtet Lalfapa khan nupuia neih tumin a lo ngaizawng a, mahse U Niliani hian a duh bau si lo a, Lal fapa thinrim chuan Zehtet khua aṭangin a pa hmangin a rawn hnawt chhuak a ni. A hnu lawkah he lama kan hnam pui te Pasalṭha Lianuka hoin Zehtet Lalfapa te nen kan khua rûn turin an rawn kal a, mahse an hlawhtling lo hlauh a ni. Pasalṭha Thansanga hoin phuba an va la a an va hlawhtling hle nghe nghe. A hnu lawkah Darchhep khaw Pasalṭha Chhuanthanga leh a naute pahnih, kan u Pasalṭha Thangkunga leh Pasalṭha Hrilkunga te bakah tlangval dang tlem a zawng kan khuaah puihna zawngin an rawn kal leh a, an khua chu ṭiau ral lam Pasalṭha leh tlangvalte'n an lo awp bet a lo ni, Darchhep lam hian Zehtet an rawn paltlang avangin Zehtet lam pawh chuan ṭanpui an lo tum ve bawka, ti chuan kan khaw tlangvalte nen chuan ral bei hoin chuta chin chu keini khaw thumte hian inunauna nghet tak kan neih phah ta a ni, mahse, Darchhep khua erawh tunah chuan a awm ve ta lo, khaw mipuite pawh Zehtet leh kan khaw lamah an rawn inbengbel ta hlawm a ni. Tin, keini khaw thum bakah Darkawn khua kha inhlat viau mah i la inlaichinna thûk tak an ni nen khan kan nei bawka, hei erawh ral rama kan chet ve hnu thil a ni thung, Darkawn khua a tluk chhiat tâkah chuan Zehtet leh kan khaw lamah an rawn inbengbel hlawm ve bawka, kan aihnahphahpui Hminga hi Darkawn khaw chhuak a ni nghe nghe"a han tih chuan Ṭhangzing Lalpa chuan chaw bar ṭhulh theihnghilh ṭhak khawpin ngaihnawm ti takin a lo ngaithla a.

Zan lamah chuan an vaiin Dammawia pa te inah chuan awmin Dammawia chhungte nen chuan an titi ho a, a tuk lawka chhuah lehnghal mai an tum avangin mut lam hma ṭha an ti tlânga Zawlbukah pawh riak lem loin chu zan chu an tling tla ve ta a. A tuk varṭianah chuan inmangṭha na te neiin, Neihthanga leh Chhawnsanga chuan kawtchhuah thleng an rawn thlah ve bawk a. Hmanhmawh vut vuta kal ngai an ni lo bawka, titi pahin an kal zel a, kawng lakah an hmeh khawp sate kap zêlin an kut a hmui tlâng bawka sa hmeh tur chu an vâi lo chiang hle. Ṭiau lui kânin Bualthleng khua chu Hmar lam a ṭanga lût tûrin an kal a, Paite ho khua Sengzau lamte tlawh pah a, Bungtlang lama sâwmna thu thlen te chu an tum dân a ni. Kawng lakah te chuan an hlim tlângin an zin chhuah ho lohna a rei tawh bâkah an zin chhuah ve ṭuma buaina neuh neuh an tawh ṭhin avangin tun ṭum an zin chu nuam an tiin in thlen vat vat thlahlel teh mah se, zinkawng hlimawm tak zûn chuan hrui anga phuar vêlin a chênfâkawm an ti tlâng hle.

 Sengzau khaw chhung an luh chuan unau hmelhai hun a ni dêr tawh a, Lal in lam pana an kal lai chuan Liansanga chuan "Khaw dai lamah kan lo inbawl mai lo a aw, zanriah kil hun a hnai tawh si a, thlen inte buaina thlen tu kan ni hlauh ange?" a han ti a, Dammawia chuan "Ekhai he khaw Lalfapa nupui hian kan Sangluliana vang hian eng hunah pawh keini hi chu min mikhual hrehin ka ring lo, Sanga paw'n a tlangval laia a tawpna'n a hmuh a chak vang bak va ni suh, he lama kal a rawt chhan hi" tih pahin a han nui kur kur a, Thansanga chuan "Ekhai Bungtlang khaw nuthlawi fapa Sairawkheh i siam sak chungchang kha haw hun chu sawi chhuah tur a ni" a han ti a, an nui tlâng dar dar a. Lal inah chuan luh dîlin tlangaupa a rawn chhuak vata, Thansanga te hmel a hmuh chuan phur zeta lut leh nghalin a hnu lawkah a rawn chhuak leha an inzui lut ta a. Lal inchhungah chuan an hriat ngai loh Pasalṭha tih hriat zet zet pahnih lo ṭhuin Thansangate hmel an han hmuh chuan an lawm vak hmel loh hle.

 Lalpa Ginthanga chuan lâwm hmel takin "Ekhai, kan Lusei Pasalṭha rualte chu mi pawh inhre duh tawh lo ang tih laia, in rawn lan tak mial mai le, han ṭhu teh u, zu ka lo zûk teh ang che u, inhmuh loh kärah in hmel te pawh a lo danglam ve nel nuala ka hriat chu le" tiin a lo be sawk sawk a, tap lama nau pawm chunga lo ṭhu Singlawia nupui thih san an Lal fanu leh Chawngpuii chu Thansanga chuan mitmei hmangin a hriat ngai loh Pasalṭha te chu tute nge an nih a han zawt a, Chawngpuii hmela hlauhthawnna lo lang chu Thansanga chuan a hmuh hmaih lo chiang hle mai. Chung Pasalṭha pahnih zinga pakhat chu ding chhuakin "Lalpa khaw daiah kan tlangvalte kiangah kan va lêt phei ange, i famo Chawnghmelṭhai ei siama hrawk han hnâwn chu thlahlel hle mah i la, i sawi hmanga Lusei Pasalṭha te nen meuh a hlui khat kil ho zawng kan ei puar ngam lo palh ange" tiin thinrim hmel takin a chhuak a, pakhat zawk pawh chuan zui ve nghalin khaw dai lam an pan thla nghal vawk vawk a. Lalpa Ginthanga chuan eng ti tura kal nge an nih a han zawta mahse Thansanga chuan "Lalpa chu aia pawimawh chu sawi tur i nei tlat a ni, kan hriat ve chi anih chuan min hrilh ta che" a han ti a. Lalpa Ginthanga chuan rilru hah hmel takin boruak a han hip kawk a, kan tlangvalte ram chhuakin an ni khaw tlangval pakhat kha salu inchuhbuai vangin kut an lo thlâk a, a nunna hialin a tawrh phah nghe nghe, ka tlangvalte sawi danah a dik zawk an ni miau si a, an thil rawn phût ang pawh ka lo pe duh lo a ni. A lehlamah khaw inṭhenawm lawk kan ni a, inhmelmâk ka duh hauh lo, mahse ka tlangvalte thlavang hauh tur khawp chuan huaisenna ka la nei ve a ni. An duh ang kan pêk tak lohah chuan an Pasalṭha pakhat hoa rawn kalin kan mut reh lai takin kan ralvengte an rawn thata Lal in ah rawn lutin an thuhnuaiah min rawn dah ta a, kan tlangvalte chu an dâwp a, mahse ka rin loh dan takin ka tlangvalte khan dawtin min lo bum reng mai a. Ngaihdam dilin an phut aia tam ka pek tur thu ka tiam tak na a, an Pasalṭha kha a lungawi miau si lo, min awp beta an duh duh dânin khaw chhungah an che ta a ni, hnam in ang kan nih miau avangin kan hmeichhiate erawhin an tuar lo hlauh, mahse tlangvalte tawrhna erawh a na tak zet."a han ti charh charh a, a hmelah chuan a rilru a na hle tih a hriat bawk a. A vaibel chu a han pak khu hlarh hlarh a, hla tak thirin a hmai vun chuar tawh tak chu a tuai vut vut a, muang fan raiha rawn ṭawng chhuak lehin" Ka tlangvalte chu ka fapa hoa intiam rualin zan rehah min awp bettute chu an phuar bet ta hlawma, ka fapa pawhin an hotu ka ina riak chu a phuar bet ve bawk. A tukah chuan ngaihdam min dil a piang chu an tlangval kan thah vanga an phut zat nena ka haw tir tur thu ka tiama, tlangval panga leh an Pasalṭha tih loh chuan ngaihdam min dila an haw ta nghe nghe. A bâng zawng chu khaw mipuite thinrimin an chil hlum ta a ni. Leido kan nei tih chu kan inhre chiang hle a, kan fimkhur ta hle bawk. Mahse kan fimkhur tawk loh lai rawn nangchingin tlangval an rawn that nuala, ka fapa Ginliana leh ka makpa Singlawia fapa Singzâma an man ta a, ti chuan khaw daiah sawn inkulhin fimkhur takin an che a, khuaah hian an duh duh rawn lamin, kan ran vulhte nitin an rawn that a, khua hi chhuahsan an phal lo a, ti hian rilṭama min hren hlum an tum a ni ber mai. Khaw chhuahsan an awm vaih chuan a chhuahsan tu leh a chhungte'n an tawrh phah zel si a, ti hian kan indawm kûn tlawk tlawk mai a ni"a han ti charh charh a, Thansanga chuan "Lalpa kei leh Hminga hian nupui neih zai rêl ve kan tum a, kan ṭhian Ginliana rawn sawma rawn hrilh hriat tuma rawn kal kan ni a sin, mahse tih tur dang kan nei hmasa tihna anih chu i fapa leh i tupa chu rawn hruai let ngei kan tum dawn nia" tih pahin Chawngpuii'n lawm hmel taka a lo en kar chu a nuih sak a. Dammawia chuan "Lalpa hnam inang in ni a, inthiam loh chu ni mah se, an chet duh dan erawh unau kârah leh nghal. Ka ngeng a chhun riau mai. Kan ṭhiana te oafa chu eng em an ti lo tûrah ngai i la, zaninah tlangval ho bulah ro te han rêl i la, nak zan lamah chuan kan che chhuak thei ngei ang"a han ti a, Lalpa Ginthanga chu a fapa leh a tupa chhanchhuak thei tûra a lo rin em em ṭhinte ṭawngkam chuan ti lawm hle mah se, "E khai, kan dik loh vang a ni a, kan tuar mai tur a ni, in nunna ka fate vanga a derthawn ka duh lo e, ngaihdam dilin keimah ngei hi ka va kal anga ka kumte a tam ve ta, ka fate tan chuan ka nunna hi hlan a ngai anih pawhin ka hreh hauh ta lo. In ṭhiana erawh in biak phakah a awm lo anih hi, in hrethiam dawn nia"a han ti a Lianmawia chuan "Lalpa ni lo e, i hlauhthawn angin engmah a thleng dawn hleinem, zawlbuk lama ro rel vat a ngai a ni" a han tih takah chuan Lal fanu leh Chawngpuii chuan ei rawn rel nghalin, Thansanga chuan "Lalpa Lalnu hmel ka va hmu ta lo ve" inthlahrung takin a han ti a, Lalpa Ginthanga chuan "Ekhai Sanga a ni zawngin faisa ringin pialralah a leng tawh a ni" tiin a han khap sak sak a, Thansanga chu a inchhir hnuhnawh hle a. Dammawia lahin a lo sik zauh bawk nen ti fuh lo a inti hle.

 Zan riah an kil zo chu leihkapui lamah chuang chhuakin vaibel an han pak khu hlarh hlarh a. Chawngpuii thing seng tûra rawn chhuak chu Dammawia chuan kawk zauhvin "Sanga i hun a inṭan e, a pasal ngai leh ngaihtuah reng renga nun hmang Chawnghmelṭhai chu zu hnem ta pauh che" a han ti a, Thansanga chu ding zawt pahin Dammawia hnungzâng chu a beng ri thlawrh a, "Ka zu titi pui ange" tih pahin a nui nghal vur vur bawka. Thansanga amah pan a rawn kal mek chu enin Chawngpuii chuan a rilruin "Sanga i hmel hi zawng ka theihnghilh thei ngai dâwn lo a nih hi, leido nih kha ka tan chuan hrehawmna nasa tak a ni" a ti vang vanga Thansanga'n "I dam ṭhin maw?" a rawn tih chuan hawihhawm taka lo chhangin eng eng emaw an han sawi duna, Thansanga chuan "Chawngpui i pasal chu i ngaihtuah hle ang tih ka hria, lo hlauthawng suh, kan theihtawp kan chhuah ngei ang" a han ti a Chawngpuii pawh chuan "Ni e, nang ni tluka kan rin in awm love, ka pa pawh a hmel a danglam hle mai in rawn lan tâk hlawlah chuan, ka nu awm loh a chin chu lungleng reng rengin a hringnun zinkawng a zawha, tunah kan heti leh ta si a, a tan chuan dam hi a thlakhlelhawm fahran loh a ni e. Mahse, nangni chunga a rinna nghah hi a thlâwnin a ring phal hauh lo a ni ngei ang "a han ti a, Thansanga chuan" Chu tiang khawpa ropui kan ni bik lo e, che sual ve thei kan ni tih hre chiang bertu chu min chhuah zalên tawh tu inihna angin i hria ang chu, Chawngi fa te i lo nei tawha, nang zawng i nihlawh teh e, chhungkaw fel takah i mo a"a han ti a Chawngpuii chuan "I nupui tluka nihlawh an awm kher lo ang. Sanga ka pasal hi khawngaih takin min hruai let sak hram rawh, a tel lo chuan ka dam zoin ka ring lo" tiin a mittui chu a rawn hnâm chhuak nghal a, Thansanga chuan "Chawngi ka theihtawp ka chhuah dawn alawm. Lo va lut tawh, ka unaute nen hian intlangvalte ro kan zuk rêl pui ange" a han ti a. Chawngpuii luh hnu lawkah chuan Dammawia te pawh an rawn kal nghal a, Zawlbuk an thlen dawnah chuan tlangaupa nen intawk hlawlin tlangaupa ho chuan bawhbel an bawh liam ta a.

 Leng hâwn ar khuan takah chuan tlangvalte pawh am lo lawi lut sap sapa, nula rim haw mah ni se an boruak tawn mêkin a zir lo bawka an pheikhai chu a zang lo tlâng hlawm hle. Dammawia chu ṭawngkam lama an zinga chungnung ber anih vangin khabe septu atan an han theh chhuak a, Thansanga te pathum erawh chuan tlangvalte che zia leh mitmeng chu an lo chîk ru rân thunga. Dammawia'n an vaia chet thawhna chi anih loh bakah fimkhur taka chet a ngaih dawn avangin thlan chhuah bik an neih tur thute a sawi hnu chuan mut zai an rel ta a.

Lungpho Pasalṭha Fungṭiala chuan a aihnahphahpui Pasalṭha Pianruala hnenah chuan "Unaupa Lusei ho kha kan tan an hnawk sak tlata rinna ka neih chu le, naktuk lam pawh an la châm zel phei chuan kan tan buaina thlentu an nih ka hlau hlel lo e, pali an nih dânah BUALTHLENG MAWITU an tih fo Pasalṭha Thansanga leh a ṭhiante an nih hial a nia ka rin ni"a han ti a, Pianruala chuan "Unaupa Bualthleng Pasalṭha te'n he laiah tih tur an nei lo e, hman lawka he khaw hmelma kha Bualthleng khua hi an ni tih kha hre reng ta che" a han tih tâkah chuan Fungṭiala chuan "Ni tak maw, ka lo mangnghilh palh a ni, chu ti chu Lusei lu khai a hnai tihna zu nia" tiin a nui huau huau bawk a.

 A tuk zingah chuan hma takah Thansanga chu a harh a, tlangval ho thawh hun nghakin a mu meng kar bawk a. Tuibur hmuamda hnu velah chuan thawm rirek hriain bawhbel lam a han hawi phei nghala, zan lama a lo chhinchhiah ruk rawlthar pahnih mitmeng fim kak leh huaisenna anmahniah a awm tih hriat em em te'n bawhbel lam thawm dim taka an pan chu hmuin an chhuah fel rual chuan a chhuak nghal vata, thui lo têah va nang chingin a han ko dinga, Thansanga chuan "Naute u in hming min hrilh thei em?" a han ti a, rawlthar pahnih chu in en he hawin pakhat zawk chuan "Vânthanga ka ni e" a rawn ti a, pakhat zawk chuan "Hnêmluaia ka ni e" a rawn ti ve bawk a, Thansanga chuan "Awle Vâna, Hnêma kan tih tur hmachhawpah hian rawn tel ve in inhuam anih chuan zanin zanlai ar khuan rualin kawtchhuah lamah ka lo beisei dawn che u nia" tiin hnial rual lohin Lal inlam a pan san nghala, a mit sirin Vânthanga leh Hnêmluaia te phur hmel taka an han insangphek vel chu a hmuh hmaih lo chiang hle. Lal in a han thlen chuan an vaia lo tho vek tawhin, mutmu an tuah ṭha ngai meuh lo tih chu Thansanga chuan a hrethiam nghal chat a, a khawngaih ru ang reng hle. Lalpa chuan lo be lumlam vatin Thansanga pawh chuan ṭha taka chhang zelin, an ruahmanna te chu a hrilh pah nghal bawk a.

Chu mi ni nileng chuan zan lama an lo chhinchhiah rûkte ṭheuh chu hmu tur leh an ruahmanna te sawi pui turin an tei chhuaka, Lalpa'n Lal ina awm tura pakhat tal inhnutchhiah tûra a tihna chu, an hmelma lamte'n khuaah an cham tawh lo anga hre tura an duh thua chhangin an chhuahsan ta zâwk a. Hmelma lam pawh Pianruala ho a Lal in rawn chuangkaiin Lal tuala vawkpui no hruai chu an kap nghal thawr bawk a. Khaw tlangvalte chu ko khawmin an puah tir, an sawngbawl tir vek hnuah nula ho chu ko lehin Lal tualah chuan ei an han rêl tîr a. Fingṭiala chuan chutia khaw chhung a an chet hnu pawha Lusei ho hmel a hmuh tak lohah chuan an chhuak ta angah a ngai hmiah a, Lusei ho koh chhuah an duh vanga rip taka thawk an ni reng bawk a, an hlawhtling chiang hlein a inhria a ni. Thansanga te erawh mi inhnuaiah tawmin hmelma ho chet dan chu an enthla renga Dammawia pum ri leh rawk rawk ṭhin chuan an nuih a ti za hle. Hmingthanga chuan "A tê ber si hi ei i thlahlel ber zel mai a" a han tih chuan an nui tlâng dar dar hlawm a.

An rin ang ngawtin an hmelma te chu an awm si lo, an rin danah chuan zanriah kil zawh lamah khua an chhuahsan leh mai an ringa, mahse Fungṭiala leh Pianruala chu Lal inah lutin Lalpa Ginthanga zu bel chawi thlain an tlan ta tlut tlut mai a. Dammawia rilṭam lutuk tawh chu a thinrim kher mai, Thansanga te lahin an nuih suk suk duh lek chauh a ni bawk si. Leng hawn ar khuan hnuah pawh la chhuak mai loin an ṭhu renga tlangval ho erawh a khat tawkin khua chu an chhuahsan leh pheuh ṭhin. Zanlai ar khuan hma deuh chuan Pianruala leh Fungṭiala fe chu khawdai lam panin an chhuak ve ta. Chu veleh Thansanga te chu Lal in lama lut vatin an silai leh a mute chu an han en dik nghal sawk sawk a, rilṭam viau hlawm mah se hmelma Pasalṭha te ruih lai tak chu an tan chet awlsam hun a ni tih an hriat ve miau avangin zanlai arkhuan rual chuan an chhuak ta vata.

Kawtchhuah lama tlangval pali leh rawlthar pathum lo ding reng tawh an hmuh chuan pan vatin, an zinga pahnih chu val upate an ni a, tlangval pakhat chu Dammawia sawm chhuah niin pakhat dang leh chu Hmingthanga sawm chhuah a ni ve thung. Rawlthar pakhat chu Liansanga sawm chhuah a ni a, Vâna leh Hnêma nen an vaiin sawm pakhat an ni. Lungpho ho inkulhna an va thlen chuan a ṭhen chu an lo mu tawha a ṭhen erawh meilum bulah ṭhuin an lo la titi thunga. Thansangate hmel khuaa hmuh tur a awm tak loah chuan a hma ang bawkin an ralmuang leh tawh hle. Tlangval ho mut kim hun chu an han nghak te te a. Buk lian tak pahnihah chuan a khat tawkin an lut renga, a kianga buk lian lem lo tak mi pahnih leng awrh turah chuan tumah an lut ve lo thung. Hmingthanga chuan "Tah khuan an Pasalṭha pahnihte kha an riak a ni ngei ang, bei hmasa i la a ṭha angem? Tiin a han rawn kuala Thansanga chuan" Ginliana leh a tupa an dahna anih ka ring mah zawk, min lo veng u la ka zu fiah tehreng ange" tiin a pan thla ta nghal a.

Buk pakhat zawk a hnung lam aṭanga a kal pelh dawn lai tak chuan tlangval la meng ho chu tho thutin bukah chuan an rawn lut ta sap sapa. Thansanga chu thaw dep dep in a din ngaiin che sawn hauh loin a awm a, enge a rah tehreng ni a kehnuai chu a za em em mai lehnghala. Tlangval kal hnuhnung ber buka a luh dawn lai tak chuan Thansanga insum zo lo chu rang lutukin a ṭhu ta vata. Tlangval pakhat chuan Thansanga hlimthla phe vuai chu a hmu hman chiang hle "Ṭhiante u enge maw hmuh nei tlata ka inhriat chu le" a han ti a, Thansanga thinrim lutuk chuan a changpat rah chu ṭhuai chhum hmawkin a rilruin "Changpat vang mai mai a ka chetsual chu le" tiin inring takin a lo awm a, mahse buk chhung aṭang chuan "Rawn lut mai mai teh i mitvai bak va ni suh" an rawn tih takah chuan chu tlangval chu phun nung nung chungin a lut ve ta zawk a.

 Tlangval ho thawm a reh rual chuan Thansanga chu kal chhuak nghalin Ginliana te awmna ni a an rin a han thlen chuan buk chu an hmuh ang ngawtin a lo te hauh lo, an awmna lam aṭangin a chanve bak a lo lang thei lo a ni tih a hmu chhuaka, a chhungah chuan thawm dim takin a han lut a, Hmingthanga rin ang ngeiin an Pasalṭha te pahnih chu zu rim nam huang chungin tu hnar ring ring tiin an lo in el nasa hle. Thansanga chu beidawng taka chhuakin buk bulah chuan dingin a han hawi kuala, boruak hip kawkin kal kian a han tuma mahse thlanglama thi che zuk zuk a hmuh chu en vatin, thingkunga Ginliana leh a tupa an lo phuar beh mek chu a hmu ta, Ginliana chuan thei leh thei loin thla eng ringa a hlimthla chêt tir turin a ban chu a theih tawkin a lo vai a lo ni. Thansanga chuan pan thla vatin, an bul a zu thlen chuab Ginliana chu a han phelh dawna mahse, Ginliana'n a bula a tupa rilṭam luat vanga nikhaw hre lo a aw, taksa chau tawh tak chu phelh hmasa tûrin a ti a. Thansanga pawh chuan phelh vatin Ginliana chu a han phelh ve leh nghal a. Ginliana tupa Singzâma chu paw lawpin Dammawia te awmna lam chu thawm dim takin an pan chho leh ta a.