BUALTHLENG MAWITU BUNG - 53

Dammawia te awmna an han thlen chhoh rual chuan Thansanga chuan val upa pakhat zawk hnenah chuan "Kan Lal tupa hi a chau tawh takzet a ni khua a rang thei ang bera kan thlen pui theih chuan kan chhan hmanin ka ring, Gina nen hian chhawm haw mai ta che u" a han ti a, Ginthanga chuan "Sanga ni lo e, phuba ka lak hma chu ka let dawn lo, tin, in kianga ral beih ka châkna hi a nasa takzet tumahin min dang lo ang" tiin Liansanga kiangah chuan a ṭhu thaka. Dammawia chuan "An silai kan khawm sak a ngai ngei ang, Gina silai engzât a tam nge an kawla i rin" a han ti a, Ginthanga chuan "Fung sawm vêl an kawl ka ring a tlangval ho khuan, an Pasalṭha pahnih te khuan an nei ve ve bawk"a han ti a, Dammawia bawk chuan" Hminga kha pahnihin zui ula tlangval ho bukah khuan lut rawh u, kei leh Liana hian an Pasalṭha te kan zu kai tho ve ange, Sanga leh Gina leh midang khan min lo veng u la, Lal tupa kha kan Val upa te khan lo va chhawm haw ta zawk mai se. Kan hmanhmawh a ngai e"tiin hmalam panin a tawlh kiang ta nghal a.

Hmingthanga kiangah chuan Vâna leh Liansanga rawlthar hruai Lingrêma an kal a, tlangval bo bûkah chuan Hmingthanga chu a va lut ta a, tuibur hmuamda hnu velah silai fung ruk rawn pawm chhuakin Vâna chuan Thansangate bulah a keng chho nghal a. Buk pakhatah chuan Hmingthanga chu lut lehin silai fung nga a rawn pawm chhuak leh a, Thansangate lam an pan chho ve leh ta a. Dammawia te pawh bukah chuan lut nghalin Fungṭiala mu hnar thlawrh thlawrh chu Liansanga chuan a naknemah an chhir nghal zawt a. Fungṭiala harh zawkin Dammawia silai kaw hmawr a hmuh chuan an che sual chiang hle tih a hre ta. A bula mu ve Pianruala pawh chu Liansanga chuan a chhip samah ṭhamin a han tung tho lawp mai a, a meng phar nasa teh e. Luhlul an chhuah vaih chuan chênrâng râwl a au dawn tih hre miau hek, chung lama bân pharin an inpe ta a. Thansanga te awmna lamah chuan hruai chhoin Hmingthanga chuan an silai chu a zu lak sak ve leh ta bawk a.Vâna leh Hnêma te'n Pianruala leh Fungṭiala te an phuar zawh hnuah silai chu an han insem kuala, an vaia an hum kim hnu chuan a khat mawi tawkin an han insem darh leh a, chutah tlangval ho kai tho ngei turin Thansanga chuan Buk chung lamah chuan silai chu a hmet puak ta ṭhuai mai a. Lungpho tlangvalte chu an rawn ri ta luai luai mai. Buk pawnah chuan rawn tlan chhuakin anmahni sahimna zawn tumin an han tlan darh dawna, anmahni silaia lo tin rengtu te leh tlangval pakhatin an hotute pahnih mei pui an chhehna lama hnungkhirh chunga a rawn chhawm an hmuh chuan an tan inpek mai loh chu tih tur a awm lo tih hriain an inpe ta sap sap a.

 Lungpho tlangval ho an phuar fel meuh chuan khawfing a chat dêr mai a. Khaw lam panin an kal chhuak ta a, Thansanga lh Dammawia chuan hma hruaiin an kiangah Vânthanga chu a awm ve bawk a, hnung lamah Liansanga hoin Ginliana leh Lingrêma bakah Hnêma te nen an silai mante keng chungin an rawn kala an mimante chu laitâtin khaw kawtchhuaha tlangval ho anmahni chin ngaichanga lo awm reng tawhte lam pan chuan an kal ta a. Khaw chhung an han lut chu khua la var chiang lo mah se, mi pui tam zawk chu an lo tho tawh a, Lal tupa Singzâma chin ngaichangin Lal tualah chuan an lo phu nuai nuai a, an hmelma te hnungkhirh chunga khua an rawn lawi lut an hmuh meuh chuan mipui ho thinrim chuan chil rawn an tum ta mai. Mahse an Lalfapa Ginthanga chu an inkarah tla zepin mipui ho chu a ṭhelh hram hram a.

Lal tual an han thlen chhoh chuan Lalpa Ginliana chuan Fungṭiala leh Pianruala chu en vang vangin "Enge ka lak aṭang hian duh in neih, in thih hma hian mi han dil teh u" a han ti hrawk a. Pianruala chuan "Inmalbeih a hnehna kan chang anih chuan kan zalên thei angem" a han ti a, Lalpa Ginliana a ngawih reng tâkah chuan Fungṭiala chu rawn nui chhuak hawk hawkin "Piana kan Lal ropui hian a Pasalṭha a fapa ni bawk hi a ring zo lo anih hi maw, nangni lusei ho pawh kha invânneih vang mai mai a ni tih hre rawh u" a han ti a, Fungṭiala bawk chuan "Mahni hnam pûite laka hnehna chan theihna'n a Lusei ho thu rûal puitu Lal i ni tih hi kan hnam pui dangte'n an la hre thuai ang. He lai hmun aṭanga ka dam chhuak anih chuan he khua hi ka la chimih ngei anga" tiin Ginthanga bula a nupui Chawngpuii lo ding chu kawk vahin "Khumpui ka kai pui anga ka salah ka siam bawk ang" a han ti leh chiah chu vaivut bar huang khawpin hma lamah chuan a bawk nghal thlawrh a, harsa ti taka thawh pahin amah tlawh tlu tu Thansanga chu "Mi dawihzep mi che thei lo chiah kutthlak ngam i nih kha" a han ti hrawka, chu veleh Thansanga chuan "A che thei pawh khawih ka ngam chuan a che thei lo phei chu ngam tak ka ni" tih pahin a kutphah hlai hlep hlawp chuan a beng hawi nghal sawk mai a. Dammawia chu rawn kalin Fungṭiala chu a rawn phelh sawk sawk a, a chem ngei chu pein "Kiang r'u he Pasalṭha hi a hrawk chauh a chak nge chak lo ka fiah duh e" tih pahin a chem a phawrh ve nghal a, Thansanga chuan "Ni lo e, ka chan pual a ni" tih pahin Fungṭiala lam chu a pan nghal a. Fungṭiala chu thinrim eng phiar chunga dingin Thansanga laka phuba lak ngei tumin a lo dinga Thansanga chem rawn phe thla fua chu dan tumin a chem a han lek kanga, chem leh chem inkhak ṭek chhuai ri a reh fel rual chuan a sattu tha a ṭha bawka Fungṭiala chemah chuan Thansanga chem chu a tlum lut pawk hial a ni. Thansanga chuan phawi lem lo a thlawh leng lawpin Fungṭiala nen chuan kut lawng ngatin an innuai ta. Pasalṭha ve ve an ni bawka an han innuai tak tak chu tisa ri no chawk chawk ri leh na tuar rak leh ṭhawt ṭhin ri chu a ri zing malh malh teh e. "Lungpho Pasalṭha Fungṭiala hi Lusei hmaa tlawm tur ka ni lo e" ti a ding khur hlak hlak lam chu panin Thansanga chuan "Bualthleng Pasalṭha Thansanga rawng bâwl sak tu tur ka ni e, tiin ka pa kha pialralah i lo hrilh dawn nia" tiin Fungṭiala nâkah chuan a chhir zawt a, Fungṭiala na tuar kun lai tak chuan a khupin a hmaiah an do leh siah siah mai zawng nikhaw hre loin Fungṭiala chu a tlu ta a. Thansanga chuan Lalpa Ginliana chu a han en a, Lalpa Ginliana pawh chuan hrethiamin a lo bu nghut bawk a. Thansanga chuan Liansanga chem chu lak sakin Fungṭiala lu chu a la ta a.

Fungṭiala lu khai far zawih zawih chunga a han hawi chhuak chu mittui tla pur chunga lo en rengtu Chawngpuii chu a han hmu vata, a bula ding Ginthanga chuan kut bengin a lo lâwm bawk a. Thansanga chu Lungpho ho lam pana kalin "In inpe anih chuan keini chuan kan zuah ang che u, amaherawh chu Lalpa thu thu a ni thung. In inpe lo anih chuan in chan tur inhriat ka ring" a han tih takah chuan tlangval ho zawng zawng chu hlauh avangin an inpe ta diak a. Pianruala erawh thinrim tih hriat taka la dingin Thansanga chu "Ka kawia pialral kalkawng ṭawm pui tu tur kan sawi fel a ngai a ni" a han ti chang rât a. Thansanga chuan "Vâna han phelh la a chem ngei mai kha han pe bawk la" a han ti a, rang takin Vânthanga chuan a rawn phelh nghal hmawk hmawk a. Thansanga nen an han inhmachhawn tur chu Dammawia leh Hmingthanga chu rawn tla zep vatin beih an rawn inchuh nghal a. Vâna te pathum chu rawn kal vein "U Sangte min hrethiam teh u, kan khaw buaina a ni a, a khaw neitute kan lo din ngawih reng zawng a dik lo e, kan Lalfapa hi kian mai teh u, he lam a rawn pan thla mêk e" an rawn ti a. Mahse Thansanga te chuan Ginliana chaw kaw puar ei loa rei tak awm tawh chu inmalbeiha chhuah tir chi niin an hre si lo. Pianruala lah chu lo au tuar tuarin "Lusei tenawm ho in vai pawh khan min beihrawn rawh u, ka hlau chhete lo che u" a lo ti piap piap bawk si. Beih pawh tum ve lem lo tu Liansanga chuan a ning ta deuh a ni ngei ang kut lawngin Pianruala lam panin a tlan phei ta mai, Pianruala pawh chu lo insiamrem vatin Liansanga sahtumin a chem chu a han vaia, mahse a ban rêka tha chak takin a rawn man beh rual chuan a tawp chiang kher mai. Liansanga chuan hnau set sawta melhin a han nuih vur vur a, "Ngawi rengin lo nghak rawh, pialralah i kal thuai dawn" a han ti sapa, mak ti taka en rengtu Pianruala chu tlawh thal ṭhuaiin a let san leh hmak a. Lingrêma chuan "U Lian i zo fel law law dawn nange?" a rawn tih chuan Liansanga chuan "Ka hneh tur chiang sa laka intihhah ka peih lo e, ka thlan tui far khat pawh hi amah vanga luang chhuak tur chuan ka ui a ni" tiin a nui suk suk a.

Thansanga chuan Dammawia chu enin, "Nupui nei lai i ni tawh tih hre ta che, mawl hun a ni lo, Hminga nau zawk i nihna angin mi kian law law mai teh,kal kiang rawh u" a han ti a, mahse a hnunga lo ding reng Ginthanga chuan "Sanga ka inpeih e, ka vanduai anih hlauh chuan ka nupui leh ka fa hi min lo enkawl sak dawn nia" tih pahin dan rual lohin Pianruala lam pan chuan a tlan ta a. Chu zing ni chhuak chuan boruak thiang nuam tak rawn keng tel mah se, Sengzau mipuite erawh hlauthawng dep dep a awmin an ip chawih chawih a, Lal tuala an Lal fapa leh Pasalṭha Pianruala te inbei chu an thlir ṭhapa an Lal fapa Ginthanga chan a chhe mek zel tih pawh an hai lo tlâng hle. Chawngpuii phei chu a ṭap pûr tawh maia beisei nei takin Thansanga chu a han en a, Thansanga pawh chuan lainat hmel takin a lo en ve tlawk tlawk bawk a. Pianruala chemin Ginthanga malpui a riah run a rem rual chuan patling râwl an hre nghal a. Pianruala chuan Ginthanga ṭhingṭhi chu deuhsawh takin "Lal fapa lu meuh ka han la tur chu ka nihlawh teh e ka ṭhiana kha mi lo biak dawn nia" tiin a chem a han lek kanga. Mahse a rin loh takin Ginthanga chu rawn che chhuak phutin Pianruala fimkhur tawk loin, Ginthanga a din hnaih lutuk chu a tuar phah ta.

Chawngpuii en ngam lo hmai hupin thaw dep dep a, a kut a han lak thlak ruala a thil hmuh chu rap hle mahse a lawm kher mai. A pasal Thansanga'n a lo kuah din mêk kianga ril tla pûra, Pianruala lo mu chu a hmu a. Khaw mipuite lawm lutuk chu an lo au nghal dur dur a. Mahse an che sual ta tlat. Hmar tlangval inpe tawhte chu tu tih hriat lohin an lo chhuah ru tlat, Thansanga te lam pana rawn tlan hukin thingfâk an rawn hum fur hlawm a, Dammawia leh Liansanga te bakah Sengzau khaw ho chuan silai rawn hmet puak nghalin Lungpho tlangval ṭhenkhat chu an tlu nghal zawih zawih a, an silai dahin hmar tlangval ho lam chu an pan ta, Thansanga chuan Ginthanga chu pu lawpin Lal in leihkaah chuanhlang chhoin inbeihna lam chu a hming chhâl chungin a pan leh ta.

Lungpho tlangval ho chu an hek heuh heuh kher mai. Vânthanga a ban veilam uai hnuang chunga hmelma lu a la lai chu Ginthanga chuan enin a nuih suka, a kianga Lingrêma leh Hnêmluaia te che vel chu uluk takin a en a, "Ka pa Lalna ram chhungah ngei hetiang mi hi kan lo kawl a ni maw? Ka dam anga kan inzui mawlh ang, naute u Pasalṭha tak la ni tûrin intan ka theihtawp ka chhuah mawlh ang" a ti rilru mawlh mawlh a. Inbeihna a zawh fel meuh chuan tlangval a khawi lam veve pawh an tlu nual hman a, Thansanga te pali erawh hliam na em em an nei lo a, Vânthanga ban veilam ruh tliak chu ṭhem dawh sak a ngai ngei dawn tih hriain Thansanga chuan Lal in lam a pan chhoh pui vat a. Lal inchhungah chuan Ginthanga hliam buaipuiin Bawlpu chu a lo phe kual mêk a, Thansanga chuan Vânthanga chu Ginthanga bula ṭhut puiin Ginthanga hliam chu a nat leh nat lohte an han zawt a. Lalpa Ginliana chu rawn kalin Vânthanga hnenah chuan "Tlangval nang leh i ṭhiante kha zaninah rawn chuang kai ta che u. In huaisen lawmmanah zu ka lo zûk ang che u" a han ti a Vânthanga chuan "Lalpa, kan vaia kan ṭan rual zâr a ni e, i in rawn chuang kai tur meuh khawpa thil chhuanawm tih kan nei lo e" a han ti a, mahse Thansanga chuan "Vâna Lal thu an hnial ngai lo e" a rawn tih tâkah chuan Lal sawmna chu a pawm sak a, bawlpuin a ban ruh te a rawn endika ṭhem a dawhsak hnu chuan an va chhuak a, ruang seng fel mêk tlangvalte zinga ṭang chuan Lingrêma chuan "Hnêma hliam tawrh nuam ti deuh te hi an awm ve chawk a nia" a han ti a, Vânthanga chuan "Hliam tawrh i chak viau te chuan ruang paihna khamah khan va zuang thla la ti nia" tih pahin a nuih zui nghal tlawrh tlawrh a.

Chhûn chawfak hun laia Sengzau khua rawn lawi lût mêk Pasalṭha Ruailiana chuan ngaihṭhat lohna riau nei tlain Sengzau khaw chhungah chuan enge maw tak a thleng tih chu a rilruin a pawm hmaka, khaw laili lai an thlen phei rawlthar pakhat a ban veilam awrh chunga zam hauh lo a an hnunga rawn zui rengtu a awm tâkah phei chuan a ngaih a ṭha lo zual hle, Lal tuala thi khar dum ngek nguk ro char uaih tawh a hmuh chuan inbeihna nasa tak a thleng tih a hrethiam mai a, 'naute u intukhum pawh khan mit nei sela fimkhur takin hma lam pan rawh u, kan tlangvalte kha nung dama hmuh leh inbeisei chi a ni tawh lo e' tiin Lal in leihka chu a rap nghal a. A tha chhang dâwltu Pasalṭha ni tûra a chher mêk a nau Hrangkama chuan zui vein Lal inchhunga Lusei Pasalṭha pali an hmuh chuan an sa nghal phat bawk a. Lalpa Ginliana chuan nelawm hauh lohin "Eng ti tûra rawn kal nge in nih?" a han ti chang rât a. Ruailiana chuan "Kan tlangvalte ko kîra in laka kan chungnunna dahṭha tawh tûra kan Lalpa rawn tirhte kan ni e, mahse, kan unaute hmuh leh inbeiseina kan nei tawh hauh lo thung, thil thlen dân engkim hriat vek ka duh, dawihzep taka thil inti anih chuan Pasalṭha Ruailiana kutah he khua hi a tlu chhe ngei ang "a han ti a. Lalpa Ginliana thinrim kut khur hlak hlak chu Thansanga chuan hmuin Dammawia chu a han mit mei zauhva Dammawia pawh chuan lo hrethiamin" Pasalṭha chuan ka hnen aṭanga thu dik a hriat duh phawt chuan hrilh tûrin ka inpeih reng e"tiin a han ṭawng nem dûaia. Ruailiana chuan Dammawia taksa chu zir chiangin a malpui leh a chawn fip ṭang te a taksa phiar fat mai te chu enin inthazo leh ṭuan rang tawk tak, Pasalṭha na mai lo tak, inngaihtlawmna leh huaisenna nei a ni tih a hre nghal a, a mitmeng fim kâkah chuan huaisenna a awm tih pawh a hmu tlang chiang hle. Ruailiana chuan "A ṭha e, leihkapui lamah i va sawi teh ang, amaherawh chu dawt a tel tûr a ni lo ang" a han ti chang rât a, Thansanga chu rawn ṭawng ve lehin "Pasalṭha a ni kha ka aihnahphahpui Bualthleng Pasalṭha Dammawia a ni e, dawt a sawi hauh lo ang" a han ti a, Ruailiana che zia chu a danglam eih lo a, a rilru chhungril takah erawh chuan Bualthleng Pasalṭha te a hmu ta mai chu mak a ti ang reng hle. Thansanga chuan Ruailiana che zia te chu a man thiam kher mai, Lal in chhunga a rawn luh aṭanga Bualthleng khua an ni tih a hrilh hriat thlenga a che zia danglamna awm eih lo chu a hmu tlang vek a, Fungṭiala te ṭhian dun ang ngawt a ni dawn lo tih a hre chiang hle. A ni rêng bawk a, Ruailiana hian he buaina rawn irh chhuah tirh khan thinrim viau mah se Sengzau Lalpa'n bumin a awm tih a inhriat hnua ngaihdam dilna nen an tlangvak tam zawk a rawn haw tir khan an buaina a tawp nghalah ngaiin Sengzau lam huatna a neih chhunzawm hauh lo, mahse Fungṭiala leh Pianruala te kha dan rual lohin an kal leh ta si a, an Lalpa lahin a dang duh bik si lo ngaihṭha lo takin a awm reng ṭhin. An Lalpa'n ko haw tûra a tih rual ruala chhuak nghalin Sengzau lam an rawn pan ta a ni. Ruailiana hi Lungpho Pasalṭha pali te zingah hian a danglam bîka, a Pasalṭhat puite chapona leh duhâmna ang hi a nei ve hauh lo, chu vangin Fungṭiala te pahnih leh a tîra Sengzau khaw mipuite thah an Pasalṭha pakhat te khan an mil loin an thurual pui ngai hauh lo. Ruailiana lah thil dik taka tih duh mi, inngaitlawm leh zaidam tak a ni a, rallu pawh a khai tlem ber rêng a ni. Mahse, tharum thawh ngaihna ni khuaah chuan a Pasalṭhat puite hian an khan lo hle ṭhin, hei vang hian an er phah nasa hle bawk.

 Dammawia hnen aṭanga thil thlen dân zawng zawng a hriat rual chuan Ruailiana chuan Lalpa Ginliana chu hmuin "Lalpa, in dikloh hmasakna ni mah se, in chet dânah demna tûr che u ka nei hauh lo, kan kal a nge. Mahse Lalpa min hrethiam la, unau buaina a Lusei i inrawlh tîr hi kan unau tlâng hrana lêngte dem rawn i hlawh lo ang tih pawh ka hlau hlel lo e, kan Lal ka lo bia anga inrem na i nei vat teh ang u" a han ti a Lalpa pawh chuan "Ka hrethiam che, Pasalṭha i vangkhua i kutah a innghat e, ni hnih hnûah palai hmel in lo beisei a niang chu. In Lalpa'n châwi tûr min tuk anih pawhin châwi ka huam vek e, inremna neih tluka duh ka nei lo e" tiin a chibai a. Ruailiana chuan Thansanga chu en vang vangin "Pasalṭha Thansanga ngei i ni e, i biangah pawh savawm chhinchhiahna a awm e" tiin a han chibai a, Liansanga leh Hmingthanga pawh chibai ve lehin an chhuak ta a. An chhuah hnu rei lotêah Thansanga chu rawn ṭawng chhuakin "A ni ang vek kha ni hlawm se chu nunna chân an awm lo tûr, Lalpa tunah chuan tlangvalte lo chhuah ru tu kha kan man phawt a ngai e" a han ti a. Lalpa Ginliana pawh chuan a lu lo bu nghut nghutin "In nau Vâna te kutah khan awn rawh se, khaw mipuite zia lo zir chiang se la, khua a rûka chhuahsan an awm leh awm loh thlithlai rawh se, an man chhuah velah ka hnen rawn thlen rawh se, an ni pathum kha nakin lawka ka khaw daingul tûrte an nih ngei ka ring, Pasalṭha nun kawng an zawh ṭan tawh a ngai a ni, an chunga rinna ka nghah ngam hi ka tih tûr hmasa ber a ni"tiin a tupa taksa chau tak hmel rawn eng ṭan chu a en vang vang a.

Zanlai ar khuan âl âl lai taka kawtchhuah lam pan a kalte hlimthla chu Vânthanga mu thei lo chuan a hmu chiang kher mai. A hliam vanga zawlbuk pawh kai lo a in a riak a ni a, Hnêmluaia leh Lingrêma te'n an rawn riah pui ve bawka, anni erawh a mu tui kher mai. An pahnih chuan thawm dîm taka kai thoin a thil hmuhte a han hrilh a, ti chuan an pathum chuan fimkhur taka kalin Vânthanga thil hmuh chu finfiah tumin an kal ta a. Kawtchhuah an pelh hnu fêah chuan luite an va pawh a, luite an thlen hma deuh chuan a hmasa bera kal Hnêma chu a ding chat a, thawm a han ngaithla vang vanga chutah zaizirin Lingrêma chu thlang lama kal turin a han hrilh a, a ni pawh chhak lamah kalin Vânthanga chu a ban ruh tliah vangin kawng ṭum pangai zawh tirin muangchangin thawm chu an pan hnai hret hret a, thawm pawh an hrechiang tawh kher mai, an rin loh takin hmeichhe aw a ni tlat. Hnêmluaia chuan "Che tawh suh u, hual beh vek in ni tawh e" tiin a pan thla nghal a, chu hmeichhe pahnih chuan an hlau kher mai Lingrêma keh Vânthanga pawh rawn thleng nghalin Lingrêma chuan kawr sirah chuan mei a han nun sawk sawka an han en chian chuan Vânthanga te kawm chhak hmeithai Nuchêmi leh a fanu Dengkungi te an ni reng mai, Vânthanga chuan mak a ti hle a, hmeithai fa ve tho anih avangin an inpawh tlâng em em a, Dengkungi nen ngat phei chuan an inkawm nasain an innel hle. "Ka nu Chêm eng vanga a ruk a rala khua chhuahsan tum mai nge maw in nih le?" tiin Vânthanga chuan nêlawm takin a han bia a. Nûchêmi chuan "Vâna, kan Lalpa khan kan hmelma te kha a that vek thoa ka rin vangin a ni, an zingah khan ka nuṭa neih chhun fapa a awm a, thi tûrin ka ngaingam ngang lo a, Chêmtei hi tirin ka chhuah tir ta a ni, amah chauh kha chhuah tûra ka tih laiin ka vahpa khan Chêmtei chem ken chu laksakin 'kan thi vek tho dawn, i bei teh ang u' tiin a ṭhiante kha a rûkin a chhuah zalen ta a ni, kan Lalpa hremna tawrh kan ngam ngang lo a ni" a han ti a. Vânthanga bawk chuan "Kan Lal zaidam zia te, keini hmeithai chhungkua te a dâwmkân dân zawng zawng i hria a lawm, a ngaihdam theih ngei che ka beisei a ni. Min ngaidam u la kan Lalpa tirhte kan nih angin kan hruai lêt che u a ngai a ni" a han tih chuan Nûchêmi te nufa chu ṭapin Vânthanga te chu khawngaih an dil mawlh mawlh a. Dengkungi chuan "Vâna ka nu hi chhuah rawh u, thil ti sual tu ka nihna angin kei hi min hruai let rawh u" tiin a han dil a, Vânthanga chuan a naupan lai zawng zawnga a lo zui ṭhin Dengkungi chu a khawngaih kher mai. Khaw lama hruai let chu duh viau mah se harsa a ti hle si a, mahse "A tawk e, naute u kal tir rawh u, a mawh ka phur ang" titu lam chu an hawi rual ṭhup a. An hnunga Thansanga an lam pana rawn kal an hmuh chuan mak an ti kher mai. Thansanga chuan Vâna te pathum chu an dâra beng thak thakin "Naute u, hna ropui tak in thawk e" tiin Pi Nûchêmi chu a en a "Ka pi, in kal thei e. In kal tumna hmun thleng hruai che u erawh Lal lung kan tih awi loh phah a hlauhawm e, kawng ṭum pangai zawhin kal zêl u la, kawr in thlen velah chhak lamah zawh chho ula kawi hnih hnuah Puk nuam tak a lo awm ang a, chu pûkah chuan inriak dawn nia."tiin lawmthu pawh hrilh hman lohin" Naute u kal ang u le" tiin a let pui ta thuai a.

 Pi Nûchêmi te'n an thawm an hriat phâk lohna tûr vêl an thlen chuan Thansanga chuan "Linga, Hnêma nen hian zui u la, sapui lakah an him em? Buaina an tawk em?tih thlithlaiin puk an luh thleng va zui ang che u, buaina an tawh velah pui u la, an tawk lo anih erawh chuan in hmel hmai an hmu tûr a ni lo"a han ti a, Vânthanga te chuan an ngaihsân hmel kher mai. An inṭhen fel hnu chuan Hnêmthanga te chu hmanhmawh taka kalin rei lo têah Pi Nûchêmi te nufa chu an va hmu leha mahse hnung lam aṭanga zui rûin pûk thlengin an zui a, buaina an tawh tâk lohah chuan khaw lam panin an lêt veleh ta a. Lingrêma chuan "Hnêma kha pûk kha ka hre ngai hauh lo, U Sangtea hian engtin nge a hriat bîk le?" a han ti a, Hnêma chuan "Kei pawh ka vawi khat hmuhna a ni, U Sangtea'n a lo hria erawh ka dem hran lo hman lawkah kan khaw hmelma niin an rawn lawi lut hial tawh a, an rawn hmu a ni mahna" tiin a chhanga khua an luh chuan khawfing chah hun lai tak a ni a, Vânthanga te inah chuan lutin Vânthanga anmahni lo nghaka lo la meng reng bulah chuan chanchin te sawiin rei lo tê tal mut tumin an inthawlh leh ta hlawm a.