PASALṬHA LIANMAWIA BUNG - 10

Dapchhuah khaw kawt chhuaha mi huaisen rammu te silai inlawn ri chuan khaw mipuite beng chu a fahin an phur hlawm hle a, leng hawn ar khuan hnu lawk a ni bawk a, nula te pawhin arkeziakte buaipuiin an lawmpa te an tulh tûr atan zu fang te ken ngei tumin ṭhian awmna inhnaih deuhte phei chu inkalchilhin tlaivarin an phe kual ngei dawn a ni. Zawlbuk lama khaw hmun nghaka lo awmte pawhin silai kap puak dur durin silai kah zirna'n hun an lo hmang ve bawk a. Zing khua a rawn var meuh chuan Dapchhuah khaw mipuite chu an ri hulh hulh mai a, hnehna chan lawmna ni pah fawmin a ṭhen a phur zualte phei chuan hla an lo chham dêr mai a ni. Lal tualah chuan sal ho chu din tlar tirin Lalpa Sangchhunga chu Lal in aṭangin a rawn chhuaka, a kiangah chuan a khawnbawl upate rawn dingin luhka aṭang chuan Lalpa Sangchhunga chuan "Kan tlangval huaisente leh kan unaute zâra hnehna chang thei kan ni hi ka lawmin ka va hlim tak em. Naktukah hnehna chân lawmna'n ruai ropui tak kan ṭheh ngei bawk ang" a han tih zawh rual chuan mipui ho chu an lo au dur dur a. Lalpa Sangchhunga chuan a ban pharin mipui chu chawp leh chilhin an lo reh leh nghal ṭhap a, "Tunah kan Val upa lo chhuak se, ral rama an chet dânte han sawi teh se" a han ti a, Dapchhuah khaw Val upa chu inring tawk tih hriat taka kal vah vahin Lal in leihkaah chuan a pen kai thauh a, "A hmasain kan Lalpa chungah lawmthu ka sawi duh a, hnehna chan duhna thinlung min put tirtu Lal fel leh ṭha kan nei hi kan vanneiin khawi khaw dang Lal mah kan ngai bîk lo. Hnehna chang tu kan nih chhan hi kan Lalpa tupa Lianmawia te ṭhian ho vang ka ti lo thei lo a, an zinga upa ber Zamana hian ro fel taka rêlin a ral rêl a sual lo tih chu kan hriain kan hmu tlâng ṭheuh anih hi. An ni hi nakin lawka pasalṭha ralhrat tak la ni ngei tur leh, khua leh tui, hmeithai leh pachhiate la mûantu an nih theihna'n khuanu'n hualhimin an dam khua hrui ang ti sei rawh se" tiin tawi fel atin thu a rawn sawi a, mipui ho chuan kut lo beng dar darin Lianmawia te pathum erawhin nuam lo an ti ru kher mai. Nula ho lahin no theihpatawpin an lo melh bawk nen, hawi pawh an hawi chhuak ngam meuh lo a ni.

Lalpa Sangchhunga chuan "Ka tupa leh a ṭhiante pahnih kha lo chhuak rawh se" a han ti a, mipui ho chuan kut lo beng dar darin Lianmawia te kal chhuak mêk chu an thlir ṭhap a, Lal in leihka an lawn fel ta maw tihah chuan Lalpa Sangchhunga chuan chawimawina zu no hlân a tum ta a. Mahse, Zamana chuan "Lalpa, chawimawina min hlan hmain thu tlem ka sawi ve thei angem?" ti a inthlahrung taka a dilna chu Lalpa Sangchhunga chuan lo pawm sakin Zamana chuan "Aw le, kan val upa khan min fak der thiamin in tana awih awm tak ni turin ṭawngkam a nei a, kan lawm rualin kan nihna bâk bâk in min sawi a ni. A nihna takah chuan kan val upate hi awm lo se, engmah kan ni dawn hauh lo a, an ni hian huaisen taka min uap khawmin hnehna min chan tir a ni. Tin, kan ṭhianpa Hlira hian huaisen takin in khaw tan hian a bei a, a tir aṭang khan a ni hian ro min rêl puiin kan thu lâkna ber a ni nghe nghe, Lalpa chawimawi phu an awm anih chuan i tlangval Hlira hian a phu ber e"a rawn tih ruala an tlawmngaihna mawi zia hmutu Dapchhuah khaw mipuite chu an lo au dur dur a. Lalpa Sangchhunga pawhin a tupate tlawmngaihna chu a hmuh kân lo chiang hle, "Aw le, Hlira lo chhuak se la, a naute'n an nghak reng a nia" a rawn ti chhuak ta a. Hlira, Lianmawiate zâra che ve leh, ral bei ve maiin chu ti taka an rawn ngai pawimawh chu nuam lo a ti ru hle, mahse, Zamana kianga kal ve a ni a Zamana hian Hlira thu tlangvalte'n an awih ziate nakin lawkah pasalṭha pangai tak anih piah lama Zawlbuk tlangvalte uap khawm thei tak tûr khawpa finna leh rem hriatna a neih te chu a lo hmu lawk vek tawh a ni. Lalpa Sangchhunga chawmawina chu an pali chuan lawm takin an dawng tlâng ta a.

Lalpa Sangchhunga chuan "Aw le, kan sal mante hi engtia tih tur nge, Lal leh upate kuta dah mai loin kan tawrhna te hre reng chungin kan zavaiin i rel tlâng teh ang" a rawn tih rual chuan Hriangtlâng khaw mipui ho chu an ngui nghal rawih rawih hlawm a, mahse an zinga pa pakhat chu rawn pen chhuakin "Lal zahawm, kan Lal chhungkua hian min buma chu vânga tuar in ni. Kan Lalfapa hurherh vânga hetiang dinhmuna ding hi kan ni. Tunah chuan dam chhuak pawh ni i la, kan Lalpa thuhnuaia awm leh ai chuan khaw hran hrana pem darh pawh kan thlang vek tawh zawk ngei ang. Amaherawh chu sal ni tura min duh anih pawhin kan pawm thlap e"a rawn ti a, chu veleh Hriangtlâng Lalpa chu rawn ṭawng chhuakin "Nang khan ka fapa hi i sawi chhe ngam a maw?" a rawn ti tuar a, Lalpa Sangchhunga chuan "Nang Lal tenawm mahni fate dik lohna pawh hmuh kân duh mi, kan hnam pui Lalte beng hriata i chanchin a thlen lohna'n leh phuba lâkna'n nang leh i fapa hian nunna in chan ngei ang. I khaw mipuite erawh chhuah zalen an ni ang" a rawn ti chang rata, chu veleh Val upa chuan tlangval ho chu tirin Hriangtlâng Lalpa leh a fapa chu khaw dai lamah an hnuk chhuak nghal dawr dawr a. Nichin lawka lo ṭawng pa bawk kha lo ṭawng lehin "Lalpa zahawm min chhuah zalên dawn anih chuan, i khuaa awm hi kei leh ka nupui fanau te chuan kan thlang e, nang ang renga Lal ṭha hi ka la hre hauh lo ka dilna hi min pawm sak hram rawh" a rawn ti a chu veleh Hriangtlâng mipui ho chu Lalpa Sangchhunga khawngaihna ngênin an rawn ri ta mur mur mai. Lalpa Sangchhunga chuan Lianmawia lam chu hawiin Lianmawia'n nui sânga a lu a lo bûk khum rual chuan "Aw le, a duh apiang tan ka khuaah hmun a awm e, mahse in tlangvalte avanga kan tawrhna te theihnghilh loin khaw mi hlunte inzah thiam a ngai hle ang" a rawn ti a, mipui ho chuan kut an lo beng dar dar a, chutah upa min chu rawn kalin Lalpa Sangchhunga chu a rawn bekbawr sar sar a, Lalpa Sangchhunga chuan a lu bûk nghut nghut pahin a nui vur vur a, mipui ho pawh a ngaihna hre lo takin an lo nui ve ṭha hlawm ringawt a. Lalpa Sangchhunga bawk chu rawn ṭawng chhuak lehin "Kan rorêlna kan ti danglam ang. Naktuk aṭangin khawtlang in pem thar te tan inthar sak hnatlang kan nei anga .kan zawh fel veleh pem tharte lawm luhna'n leh hnehna kan chan lawmna'n ruai ropui tak kan kil ang" a rawn ti ta a. Hriangtlâng khaw mipuite pawh an hmelah lawmna a hmuh theih hial a ni.

A tuk aṭang chuan khaw mipui ho chu in thar sain an hnatlang mup mup a, nula ho tui lo sem kual chu tlangval ho chuan lo fiamin an nui leh dar dar ṭhin a, Zamana pawh nula te zinga pakhat chuan tui a tulh zing bîk hle a, Dapchhuah tlangval ho chuan an fiam nasa ṭhin hle. Ni nga chhung zet khawtlângin in thar sak hnatlang an neih hnuah chuan an zo fel ta a, a tuka Lal tuala zai leh lâmna hun hmang turin an inbuatsaih ta hlawm a.

Zing ni chhuah rûala Lal tuala vawk ngek rawng rawng thawmte, a hnu lawkah Lalpa Se pachal ruai ṭhehna'na hman tur Lianmawi'an a kah thlukte leh a phing inchuha naupang lo tei sekte leh a ṭhen ṭap bai bai thawmte chuan Dapchhuah khua chu a luah hneh kher mai. Pathlawu fatu ho zinga a fiamthu thiam deuhte chuan fiamthu thawhin an nui tlâng dar dar a, an kianga an Lalpa Sangchhunga awm ve chu dawt chiang kuang lutuka puhin fiamthu thawhna'n an hmang a,Lalpa Sangchhunga hnial ngaihna hre lo chuan tih theih dang nei hek lo, a nuih a za ve tho bawk nen a nui a nui ve bawk a. Lianmawia leh a farnu Ṭhazuali pawh leihkapui lamah ṭhu dûnin nula leh tlangvalte che vel kara naupang infiam lo tlan kawi zur zurte chu thlir dûnin an titi pah a, an innelin an inkawm ngeih dun hle. Zamana erawh zan lama a bo chhan a lang chiang hle a, a pheikhai zâng lo tak chu Hratzuala chuan a hmuh hmaih lo chiang in a fiam deuh reng bawk a.

Tukṭhuan kil zawh hnu chuan Lal tualah mipuite chu an thuam ṭha ber berte nen rawn kal chhuakin Lalpa Sangchhunga chuan Hriangtlâng khaw mipuite lawm luhna thu chu a hranpain tawitein a han sawi hmasa te te a, chu mi hnûah chuan zai leh lâmna hun hmang tûrin an inbuatsaih ta a, Lal in luhka aṭanga rawn chhuak Lianmawia leh Ṭhazuali te unau chu an thuam inbelte chuan a chawi dûnin, Lalpa Sangchhunga ding lama an han ding dûn ralh chu mipui te chuan hmuhnawm an tiin an en duh hle.

Nilênga zai leh lâmna hun an hman hnu chuan ruai ropui tak chu an kil ta a. Zan lamah pawh zai leh lamna hun chu hmang chhunzawm zelin khaw mipuite chuan nuam an ti tlâng hle a, Lianmawia leh a farnu Ṭhazuali lam dûn hah hah chuan mipui mit a la nasa hle. Zamana erawh a bo leh vang vang tawha, Hratzuala erawh mi ngawi chawi, a ṭhian hnai takte bulah chauh ṭawng tam, anihna chu Dapchhuah khuaah pawh a ngai reng a, nula han zai ralh ralh tu tawng ve nual mah se, Lal tual kil khatah chuan ṭhuin ama tawkah a tui ve hle.

A hnu ni khat an cham leh hnu chuan Lianmawia te chuan Dapchhuah khua chu an chhuahsan ta a, tlangvalte'n thlah tum viau mah se Ṭhangzing khaw lam a kal leh phawt hnuah Hmar lam aṭanga an khua luh tum an ni bawk nen, an pathum te chuan an kal ta zawk a, zan hnih hnuah Ṭhangzing khua chu zanriah kil hun laiin an thleng ta a. Lal in lam chu muangchanga panin, Lusei khuaa awm an nih loh avangin an inring ru kar bawk a, mahse, buaina engmah tawk loin Lal in chu an thleng ta a. Lal in chhung an han lut chu Ṭhangzing khaw Lalpa chuan Lianmawia chu a en vang vanga, "Tlangval eng ti tura lo kal nge in nih le?" a han ti a, Lianmawia chuan aw dam takin "Lalpa,Lal Puithanga khua Zehtet khaw mi leh sate kan ni a, kan u Pasalṭha Dammawia hmu tura rawn kal kan ni e" tiin a chhang a, Ṭhangzing Lalpa chuan "Ekhai, ka makpa hmu tura hei chen chen lo kal ta chu a va pawimawh awm ve aw"a han ti a Lianmawia chuan" Lalpa ni lo e, ka nu nuṭa la Dapchhuah khaw Lal Sangchhunga tlawhin kan lo kal a, kan U Dammawia hmuh leh kan chak em avanga rawn kal kan ni, kan hmuh min phal sak ngei ka beisei"a han ti a, Lalpa chuan "Phal tehreng e, mahse, zanriah te inla ei awm si lo a, han ei phawt mai teh u, in u Dammawia te chhungkua pawh a pa te in lamah zanriah an ei thla anih kha an rawn haw harin ka ring lo" tia chhangin Lalnu chu zanriah buatsaih turin a hrilh nghal a.

Dammawia'n an in a Lianmawia te zanriah lo kil mêk a hmuh chuan mak a tiin an kal chhante a zawt nghal zung zung a, Lalpa'n nghak rih phawt tura a tih hnu chuan a nghak ve ta zawk a. Zan riah eikhamah chuan leihkapui lamah inkawm khawmin an zinna a an thil tawn chungchangte chu Lianmawia te chuan an sawi a, Dammawia chuan "Liana pasalṭha tam tak tih theih loh tur in ti der mai ka ni. Ka naute inni hi ka chhuang tak zet che u a ni. Nakin zêlah pawh ṭanpui ngaite ṭanpuitu ni zêl turin in rilru kha in siam tlat tûr a ni. Kan khua min ti ngai zûal hle mai, kan Lalpa'n phuba lâk a rawn rawt hun hunah na takin kan che ang chu"tiin ral hla tak a thlir vawng vawng a, a mittui luang mai tur chu a dang ṭawk ṭawk bawk a.