PASALṬHA LIANMAWIA BUNG - 13

Hnahzawl Lal in leihkapuiah chuan Tinchâwnthanga leh Dengremate chu ṭhu dûnin zan hmasa lama an chêt dânte chu sêpin nuam an ti kher mai. Dengrema chuan "Tina, kei zawng Hnahzawl Lal fanu Saimawii kâkpui lâwn lova haw leh ka tum hauh lo mai. Bualthleng khaw pasalṭha inti ve te chu han chimih phiar phawt i la, lawmman a tan ka ngên ngei ang" a han ti zâwi sap a, Tinchhâwnthanga chuan "Chu tianga nangin i duh te chuan kan dîl anga an phal loh vaih leh an khua hi kan chimih sak dawn zu nia, kei zawng chûai lo pâr ianga vul reng Lâwitlâng Lalnu hi ka beisei tlat dawn a ni. Mahse, kan hlawhtlin hmasak ve phawt a ngai ang, khaw chhungah tlangvâl han awm ngat phei se chuan, min chîl rawn duh hial tawh mah na"tiin a nui zui huau huau a. Dengrema'n "Leng hâwn ar a khuang ta, kei zawng veng mawng lamah hmuh ṭha ka hmu deuh a, ka zuk kal mai loh zawngin nuam ka chên lo palh hlauh ange, Lusei ho chuan duh leh kan fa lo pâi mai mai ang hmiang" tiin a ṭhut hmun chu a thawh san nghal a. Veng mawng lam chu pan thla zêlin, Hnahzawl khaw pasalṭha nupui hun rei lo te kal ta a, nupa intihthiam lohna avânga tlan lailâwk lai chu a kakpui lâwn ngei tumin a pan thla a.

Thansangate pawh Lâwitlâng khaw ram chhungah awm tawhin an fimkhur tawh hle a, Châwiliana chuan "Chhûn khaw ênga chêt ai chuan zân thima chêt hian kan tân kawng ro a su zâwk ngei ang,kan tlem si a, kan inṭhen hrang anga, pawl khat ka ho ang, Kâpa'n pawl khat a ho bawk ang. Kâpa pawlte'n chhîm lam aṭanga khaw chhung en thli thlai in tum anga keini'n hmar lam aṭangin kan lo tum ve thung dâwn a ni. Fimkhur takin kan che ang, zing khawvâr rûalin he lâi hmunah hian kan intâwk khawm leh a ni ang chu"a han ti a, "Min zui tu tûrte kha lo kal r'u le" a tih rual chuan, Lianmawia leh Zamana leh Hratzuala te chu an kal nghal a, Liansanga leh Hmingthanga bâkah Ginlianate pawh rawn kal ve nghalin,ti chuan Lâwitlâng khua hmar lam aṭanga en thla tûr chuan an chhuak ta nghal a.

Kapthanga chuan "Aw le, Châwia sawi ang khan fimkhur takin kan che tûr a ni, en thlatu an dah ngei anga, ral vêng pawh an khauh viau tûrah ngai i la, kan che sual thiang lo, i kal ang u le" tih pahin hma a hruai zui nghal a. Thansanga chuan an naute chu fuih malh malhin "Vâna leh Lingate inkawp tlat u la, chu tiang bawkin Hrânga leh Hnêmate pawh invêng tawnin in che zêl ang, in tukhum pawh khan mit a nei tûr a ni. Kan ṭhiante an lo thlen meuh chuan khua hi kan bei mai tawh dawn a, chu vângin huaisen takin, pasalṭha nih theihna hun ṭha inneih hi inbawhpelh a thiang lo ang. "a ti charh charh a.

A tûk zing khawvâr ruala an han intâwk khawm leh chu zan lama an thil hmuhte sawi khawmin, ral vêngte chu indah ve mah se an thla a la muang hle tihte chu sawi khâwmin Hnêmluaia chuan" Chu, an thla a mûan viau chuan midang lo thlen rûalin bei phut i la, hnehna kan chang mai dawn alawm"a han ti a, mahse, Châwilianate ngawi ta reng chu a hmuhin sawi sûal a inti leh hle, a chhan erawh a hre chuang hlei lo. Thansanga chuan "Hnêma, an thlamûan viau chhan chu anmahni hruaitu pasalṭha huaisen tak, an rin em em an nei tihna a ni, kan hmuh ang khan Halkha tlangvalte nen anih kha an awm ho ni. An pasalṭhate hi an rothap thei ṭhin teh a sin. Fimkhur leh zuala kan chêt a ngai tawh dawn a ni"tiin a rawn chhang ta a.

Chhûn lamah chuan an bûk sakna hnun biru takah chuan tawm khawmin Thansanga leh Dammawiate erawh vâk chhuakin chawhmeh tûr eng ilo vêl vai tumin an kal a, Lalpa Renglianate lo thlen a hun dawn tawh a vângin bûk pawh zau tak takin an lo sa lawk vek bawk a ni. Chutia Dammawia leh Thansangate kawr kama an vak dûn lai chu an chhak lawk aṭangin Hnahzawl tlangval pangate chuan an hmu khiau a, an fimkhur dânah an hmelma te an ni tih an hre chiang kher mai, pakhat chuan "Hawh teh u,thawm dîm takin zui i la, i bei teh ang u, râl lu kan khai hma ting a ni mai" a han ti sap a, midang pawh chuan lo pawm tlângin Thansanga te chawhmeh zawng chu an zui ta a, thui lo têah va um phain pakhat chuan "Khai aw, he lai laiah khual vâl pahnih ka han hmuh chu le, eng ti tûra he lai hmuna lo kal nge in nih?" a han ti a, Thansangate chuan an che sual tih hre mah se, an awm dân danglam eih loin chung tlangvalte hmachhawn zawng chuan an han insiam rem a, Dammawia chuan" Kawng kan bo a ni, min pui thei angem? Hei kan vâk thui tawh ang reng si a, khawngaihin Bunghmun khaw panna lam min hrilh thei angem? "tih pahin a han kal hnaih a, Thansanga pawh chuan kun ngal chungin a zui ve nghal bawk a, tlangvâl pakhatin" Dawt i sawi êm lo maw? In chet dân velah khualzin kawng bo in ang hauh lo mai "a han ti a, Thansanga chu rawn nui chhuak phutin" Enge kan an reng reng a? "a han tih ruala bianga savawm hamna ser an han hmuh chuan" Pasalṭha Thansanga maw? "ti rual ṭhawtin Dammawia'n" Pasalṭha Dammawia nen mawle" tih paha silai keng tu tlangval pakhat chu an sat nghal siah mai zawng Dammawia hmai leh awm velah chuan thisen a kai nghal ṭhawt a, Thansanga pawhin silai keng pakhat zawk chu bei ve nghal phutin, a dang pathum la damte chu baklengin an tlanchhe ta a, Thansangate chuan umzui nghalin a tlan hnu hnung ber thing zunga inpal thlu chu Dammawia chuan hnung lam aṭangin a nghawngah chuan a sah sak nghal sawk a, a dang pahnih chu um zui leh nghalin, pakhat zawk lo tlu bawk thlawrh chu Thansanga chuan ṭham tho lawpin hmun leh hmunah "Bualthleng khaw tan" tih pahin a nghawng uai hnâwp khawpin an sah sak mai zawng, pialrâl kawng zawh ṭan mêk a ṭhiante pathum chu a zawh pui ve nghal ngei ang. A dang pakhat erawh an hmu ta hauh lo, Thansanga chuan "Bûk lamah lêt vat a ngai a ni, kha tlangvâl khan keini aiin ram chin a hre chiang zâwk ngei ang, hei khua a thim dawn hnai a,kan Lalpate pawh an lo thlen ngei tawh beisei i la, kan chet chhuah vat loh chuan chaurau ek kan thai ngei ang" tih pahin an mi thahte silai la tur chuan an kir leh nghal a.

Bûk lamah pawh Lalpa Renglianate chu lo thleng ve mêkin ei rêlin tlangvâl ho chu an che sap sap a, Thansangate thawm rawn awm chu Hmingthanga chuan "Kan pasalṭhate chuan Hruizîk chal leh Tumbu ṭhankin sum riat zeta lianin min hrâi i han beisei teh ang" a han ti a, mahse an hmel a hmuh rual chuan thil dik lo a thleng tih hre nghalin "Sangte enge thleng ta?" a han ti a, Thansanga leh Dammawia'n an thil tawn zawng zawng an sawi hnu chuan Lalpa Rengliana chuan "Aw le, kan chet chhuah vat a ngai dawn anih chu tlangval sawmngain Thangkunga zui u la, Sangtea te kalna lamah hian kalin in hnû pawh thup chho char char ang che u, Sangtea te kawr kânna hmunah kân ve loin kal tlang chho zêl u la, khaw awmna zawn vel inthlen hunah kân chauh ang che u, keini'n kawr hi zawhthlain khaw mawng lam aṭangin kan bei ang. Tunah kal nghal a ngai, chaw hi rawn fun ṭheuh u la, leng hâwn ar khuan rûala silai ri inhriat velah khua lo bei ve nghal ang che u"a ti a, tlangvâl ho chu hmanhmawh taka che zung zungin Thangkunga kiangah chuan Hningthanga leh Lianmawiate ṭhian ho pawh chu an kal ve bawk a.

Hnahzawl pasalṭha Hranghleia chuan khuaa tlangval awm zawng zawng chu hruai chhuakin hmelma ho chu hup beh hmak a tum hle mai, a hminga pasalṭha ni ve ringawt, an Lalte pawhin a Bualthleng khaw phuba la tu tûrte lo bei lêta an tlangvâlte kai hruai tûra an rin zawh loh anihna chu lo langin, mawlmang takin a chet pui ta ringawt a, Thansangate tlangval thah ruang pawh chu ngaihsak lem hlei loin an hnu chu an chhui zêla, Thansangate kawr kânna hmunah chuan kân vein Thangkunga te hnû chu a hmu nghal vata, nuih vur vur pahin "Lalpa Rengliana hian min ngainêp hle a ni, tlangval sawmnga rual bâk a rawn tir hauh lo mai, a pasalṭha rûalte a ring tâwk hle a nih ngei hi, mahse, pasalṭha Hranghleia an hmachhawn dawn tih a hre lo hi a vanduai dawn anih hi" tiin a nui vur vur a. Leng hâwn ar khuan hma deuh chuan Lâwitlâng khaw chhungah chuan Bualthleng khaw phuba la tu tûrte chu an biru fel vek tawh a, pasalṭha Hranghleia mawl luatah, khuaah tlangvâl tumah an awm si lo, khaw mipuite lah Hnahzawl lamah an awm vek bawk si, an duh ang tawkin an biru thei tlat a ni. Chu tih lai mêk chuan Hranghleia leh a hote pawh an hnu chhui lai bo tâk thut dân te sawiin mak an ti tlâng hlawm hle, Hranghleia ngat phei chu inti pasalṭha ve tak a lo ni bawk nen, tlawm thlâk a tiin a hote chu a rawn vîn chho tuar tuar bawk a, Lal tual an lut ta maw tihah chuan silai a rawn puak ta ṭhuai ṭhuai mai le, Hnahzawl khaw kal khân lamah chuan tlan chhiat tumin an han pana, mahse Thangkunga te rawn thleng ve mêk chuan an rawn hmu hman tlat, an tlu leh ta zawih zawih mai a, pasalṭha Hranghleia pawh tlai khaw hnûah rawn harh chhuak thar ve leh in, a hote chu silai a kah puah tir ve ta a, khawi lam ve ve pawh an insuat ta mawlh mawlh a, Lalpa Rengliana chuan a tlangvalte nunna chân mêk chu hmuh hrehawm a ti hle, an hnelmate'n an silai an kap ruak ta maw tihah chuan a chem phawrhin "Bawh ang le!" ti a auin amah ngei chuan hma a hruai nghala, a hnungaj Chhuahchawnga leh Thansangate chu rawn tlanin, an hmelma silai sawh zo hlimte'n an rawn kah dawn lai chuan ngên mu an tawn fuh lohna'n an tlan kawi zawr zawr a, mahse bum vek theih bîk ni hek suh, Liansanga'n a mal pui ding lam na zawk leh a ruh ri deuh chawk ri a hriat rual chuan a tlu nghal thlawrh a, thawh leh tum viau mah se a ke ding lam chu a hman tlâk tawh tlat loh. A thinrim lutuk chuan a chem chu a vai nghek nghek ringawt a.

Lalpa Rengliana leh Chhuahchawnga hma chu a kaw duai duai a, uai thla tawh lam mah ni se, tlangval naran tana tluk rual lohin an la che thei tlat. An kianga an kaihza vengtu Thansanga leh Dammawiate erawh an vanglai a la pêl lo bawk a, an ṭuan a ṭha dùn bawk nen an che na hle mai. Hmelma lam tawlh zel dang bet tûr chuan hnung lam aṭangib Thangkunga chuan a ma hming chhal chungin a rawn bawh ve ta, Hmingthanga chuan a rawn thlawp nghal zaih bawk a.

Hratzuala'n tlangval pakhat a sah thluk tawp lai chu Lianmawia chuan nuih sakin a lam pana lo kal mêk tlangval pakhat chem chu bum pahin a kaihza tha a chhah sak nghal hmawk a, chutah chu tlangval chu hnung lam aṭanga tlawh thluin a lu ruh keh chawrh khawpin a han sat mai zawng Lianmawia hmaiah chuan thluak a rawn per kai ṭhawt a, Hratzuala mi pakhatin a lo tlawh thlu tawp lai chu hmuin Hratzuala lamah chuan a lîm phei nghal puat puat a, mi pakhatin Hratzuala lu lâk a tum lai tak chuan a hnung zângah a chem hnuhma an hnut chhiah kalh mai zawng chu pa chu thinrim taka rawn hawi chhuakin "Naua, pasalṭha Hranghleia kutthlak chu thihna a sin" a rawn ti a, Lianmawia chuan "Anih a hnu lo kal ta che" tiin Hranghleia chu a han hûi a, Hranghleia rawn tlanin a rawn hnaih thawkhat ta maw tihah chuan amah zawk chu hma lamah pên pawkin Hranghleia dul nêmah tak chuan a han tlawh sak chawrh maia, Hranghleia na ti lutuk chu a pum dawm chungin a tawlh let nghala, Hratzuala'n a kaihza in thlep hnawk khawpa, a lo tlawh rual chuan ṭhing ṭhi hnawkin, a han hawi chhuak leh chiah chuab Zamana chem rawn thlawk fua chu hmu hman mah se, bum turin a rang tâwk tlat lo.

Chu tia an hruai tu ber a thih takah chuan Lâwitlâng leh Hnahzawl tlangvalte chu an zâmin an hek hiau hiau kher mai, mahse, an zinga awm ve hnam kawlhsen halkhate erawh an deh a khirh viau thung. Mahse, an deh khirh na chuan hun rei tak tlumtea thlir taka phuba lak hun lo thlir ṭhintute thinrimna chu a khan lo vai vai hle.

Zanlai ar a khuan meuh chuan Lâwitlâng khaw tual chu ruangin a khat tih mai tûr a ni a, hmelma inpe te chu Zawlbukah dah khawmin tlangvâl ho chuan an vêng a, Lalpa Rengliana chuan "Aw le, tunah hian kan chhuak leh nghal ang, Hnahzawl khaw chhungah kan chet vat a ngai a ni. Mahse, hliam neite erawh hetah in lo awm thung ang. Naktuk lo sûl haw huna kan lo la lang lo anih chuan khua hi hâlin kan bûk lamah in lo awm dawn nia"a rawn tih rual chuan tlangval ho chu an inbuatsaih leh nghal zung zung a, Chawiliana chuan "Lalpa Kapa nen hian ka naute hruaiin kan lo va kal hmasa leh ange" tiin Lalpa Rengliana chu a han dîl a, Lalpa Rengliana'n a lo phal sak rual chuan Thansangate ṭhian ho nen chuan an kal ta a, Dammawia chuan an kal dawnag chuan Lianmawia chu koin "I pate saw lo veng tlat la, kan innghahna inih kha, huaisen takin aw ka nau" tiin a rawn thlah a.