PASALṬHA LIANMAWIA BUNG - 14

Khawfing chah hun lâi taka an lam pana rawn ṭawng bawrh bawrh thawm Chawiliana'n a hriat rual chuan,"Inphenna tûr zawng vat rawh u" tih pahin a bul hnâia thingkung pakhat bulah chuan a kal phei nghal a, midang pawh chu kal darh ve nghalin tuibur hmuam da hnû lekah chuan thawm chu a rawn thleng chawp chilh ve nghal mai a. Tlangval sawm vel rawn kalin Pasalṭha Tinchhâwnthanga leh Dengrema te chu an rawn inhrosa phei nasa kher mai, Dengrema zawk chuan "Hranghleia a awm ve kha maw, kan tlangvalte lah an tam thawkhat bawk a, kan Lusei dawihzepho chuan chu ti maia awlsamin an hneh bîk hauh lo ang. An chhuanvawr ber lah an Lalpa a ni a, a thachhang dâwl tu tûrte lah kum lama uaithla lam tawh an ni dawn lehnghal, khang Thansanga an tih ve te ho kha chu an u te zârzoa khualkâi bâk va ni suh, an lu ka la phiar ang" a rawn tih lai tak chuan, Châwiliana chuan "Che tawh suh u, hual beh vek in ni tawh e" a han ti a, Tinchhâwnthanga te chu an hamhaih kher mai. Mahse, pasalṭha anihna rawn lang chhuak thuaiin a inngaihtuah fîm vat a, inbeihna a thlenna a la rei loh bâkah tlangval tam tak silai nei an ni ve a, a rin dânah phei chuan chem sen nen an la inbawh hauhin a ring lo a, an inrâl sâi mêk chauhin a ring a ni, anmahni rawn ko tute lah Thansanga leh Dammawiate an hmuh thu an hriat rual ruala, Pasalṭha Hranghleia'n a rawn tirh nghal te an ni ve reng reng bawk a. "Mipa i nih ngai chuan hmuh theihin rawn inlân ta che, nge ni a,lang lo lam aṭangin min kap dawn" a han ti a, mahse thlang lam aṭanga Kapthanga'n "Luhlul in chhuah anih vaih chuan lang lo lam aṭang hian a ni kan kah thluk phiar dawn che u" a rawn tih leh tâkah chuan a zam ru tawh kher mai, Dengrema zawk chuan "Anih a hnu, pasalṭha i inti ve ngai anih a i zah dawn loh phawt te chuan mi kap la zu nia" tih pahin a bula tlangval ding meichher chu lâk sakin a hmel lang chiang thei ber tûr chuan a han lek lui ngat a, Thansanga chuan a rilruin "Ka hmuh tawha huaisen ber i ni hial lo maw? ka hmelma i ni erawh i tan a pawi dawn ta anih hi" tiin Dengrema huaisenna chu a ngaisang ru hle.


Dammawia chuan chhak lam aṭanga a silai rawn kap puak ṭhuaiin, a themthiam zia chu an hmu chiang kher mai, Dengrema meichher ken per chhuai a reh fela a beng thi sar sar chu Dengrema chuan khawih zauhvin a nui vur vur a, a silai chu dah thlain "Ka inpe e" a ti ta a, midang ho pawh chu rawn ṭhingṭhi ve sap sapin Hmingthanga an hnung lam aṭanga rawn lang hlawh an hmuh chuan hual beh an nih chian zia chu an hre chiang kher mai. Hmingthanga'n an silai a lâk khawm mawlh mawlh lai chuan Dammawia leh Ginlianate chuan an lo hnung khirh mawlh mawlh bawk a, an phuar kim hnu chuan mei pui chhep hluahin Kapthanga, Chawiliana leh Thansanga pawh chu an rawn chhuak ve leh bawk a, an ni paruk chauhin sawm rûal awl ai taka an man thei mai chu Tinchhâwnthanga chuan tlâwmah a la hle a "Lusei tenawm ho mal leh mala inbeihah min cho in awm ve em? In lu ka la phiar ang tih hre rawh u" a han ti a, Thansangate erawh chuan hre âwm pawha awm loin an awm ngaiin an awm chhunzawm mawlh mawlh a. Dengrema erawh chuan Thansanga chu chîk zetin a melh leh vung vung ṭhin a, a bianga savawm hamna serte leh a taksa hmun hrang hranga ramsa hnuhma leh chem hnuhma aṭang chuan pasalṭha tak a ni tih a hre chiang kher mai, an zingah pawh a deh khirh ber a nih hial a ring a, a hneh ring lem lo mah se hmachhawn erawh a châk ru viau lawi thung.

Zing khawvar hnu lawkah chuan Lalpa Rengliana hoin tlangval dangte chu an rawn thleng ta hum hum mai a Chawiliana chuan an intawn dânte chu lo hrilhin, an zinga tlangval pakhat an dawp dânte leh khuaah tlangval sawmnga vêl an awm ve thute chu a rawn hrilh zung zung a, Lalpa Rengliana chuan "Chu zawng buaina tham a ni tawh lo e, an ni hi hruaiin khuaah kan luh pui ang, min bei tu an rawn awm thut huna an khua hâl nghal tûrin Lianmawia leh a ṭhiante ho hi inring ru reng se la, Sangteate hian lo va hruai se, khaw chhunga lut loin khaw dâiah Dammawia leh Hmingthanga hoin lo in sem dar thung se la, Sangtea leh Gina erawh Lal in a luh dân lo va ngaihtuah rawh se, nang leh Kapa erawh ka kiangah kal ve thung tawh u la, Sangtea te kha tûnah hian chhuak nghal mai tûrin i hrilh dawn nia "a ti a, Chawiliana pawh chuan an chêt dân tur hrilh tûrin Thansangate kiangah chuan Lianmawiate ho chu a ko khawm sap sap a,an chêt dân turte chu hrilhin" Fimkhur takin in che ang, ro hran nei lo a inthurual inngai bawk ang. Dama leh Hmingate'n in naute inngaihthah thiang lo, in veng reng tûr a ni. Sangtea leh Gina pawh in inveng tawh reng tûr a ni ang. Lianmawia leh Lingrêmate in inkawp tlat anga, Hranga leh Hratzuala pawh, chu tiang bawkin Zamana leh Hnêma, Vâna erawh puih ngai an awm apianga pui tûrib i in ralring rwng tûr a ni, i ban ruh tliahna kha a la rei loin la indim tluk a ṭha i tan a awm lo, tunah kal rawh u le"a tih rual chuan chung rawlthar rûal huaisen em emte chu an hruaitu Pasalṭha Thansangate, Dammawiate, Hmingthangate leh Ginlianate hnung zuiin an chhuak ta nghal a.

Lalpa Rengliana chuan "Kei ni zawng chawl khawmuang lawk i la, kan zui nghal dawn nia, kan mi mante hi Pasalṭha Chhawnsanga leh Neihthangate khan tlangval sawm vel nen lo chhawm ve bek bek bawk se la" a rawn tih rual chuan Chhuahchawnga bulah chuan ṭhuin "Kan Liansanga pui roh chu ka ngaihtuah mange aw" a han ti vawng vawng a, Chhuahchawnga chuan "Renga, a ni zawng Pasalṭha a ni a lawm kan tluk hauh loh Liansanga mi chak tak kha a la ni reng a chhel takin a la awm ngei ang, a kawng kalna ber ni loin a taksa hmun dangah a ke pen ti bahlah lo tawk vêl lekin a hliam ang tihte pawh a hlauhawm zawk a sin, chu tiang chu ni se a rawn kal lui leh ngat awm si a"tih pahin a vaihlo chu muk zetin a han beng nghal tlawrh a.

Nau rilṭam hun lai vel chuan Dammawia te chu khaw daiah chuan an insem darh ṭhap a, in zathum nufa vêl an ni a, hmun tin aṭanga tuam chu an tan a har dawn avangin thawm inhriat phakna vêl lekah insemdarhin Lalpa Renglianate khaw chhung an luh hun a silai a puah veleh khua chu hmar lam leh a lu lam aṭangin an hâl nghal dawn a ni. Chhûn ên lai tak a ni a, khaw chhunga luh chu Thansangate tan chuan a har hle bakah a hlauhawm hle, mahse Ginliana rawtna angin mi inhnuaiah zêl lutin muangchângin Lal tual lam chu an pan phei ve zêl a. Khaw mipui ho inchhung luma titi khawchang vawrh chuan an beng a fahin an thin a ti rim rilru hle, an tlangvalte tamnaah an innghah zia leh an sêp tui ber pawh an hmelmate an chimih hnua ropui taka a lawmna an neih hun tûr a ni tlat. A âwm ve reng bawk a, Dammawia leh Thansanga te khan thah hman loh an neih bâkah khaw mipuite hriat dânah chuan anmahni zawkin an hmelmate chu an ram chhung an hriat chian em emah ngei thah chimih tumin a veh tûah an ṭang tih chauh kha a ni a, a veh tuah khan ṭang ve mah se Hranghleia mâwl luatah an chan a chhia tih reng an hre pha tawh lo. Lal inhnuai an thlen meuh chuan fimkhur ngai si, hmanhmawh ngai si, thawm dim ngai si a che reng an nih avangin hah vâng pawh ni miah loin an thaw leh hak hak ṭhin a. Ginliana chuan "Min lo vêng la, Lal chhungkua bâk an awm hauhin ka ring lo, ka luh rualin tu emaw ber man beh ka tum ang, nangin silaiin i rawn vau/vo bet nghal dawn nia" tih pah chuan hnial hman rual lohin a silai chu akin a kal nghala, Thansanga erawh atan zui mai bâk tih tûr awm ta si lo chu Ginliana lo hmu tu an awm em tih melh kualin Lal in leihkaah chuan a pakai ve thak a. Sum hmunah thâwm dîm taka lûtin Ginliana chuan Lal in kawngkhar chu phih hawng lawpin rang fahranin a lum lut nghal a, a thawh leh rual chuan a bula lo awm hnai ber Hnahzawl Lal fanu tleirawl Saimawii samah chuan ṭhamin a lamah chuan a pawt phei nghal lawpa, hun rei lo tê chhung chauh ni mah se a chem chu Saimawii hrawk zawnah a dah hman tlat. Hnahzawl leh Lâwitlâng Lal chhungkuate'n thaw dêp dêp a Ginliana an en reng lai chuan kawngkhar aṭang chuan mi pakhat sang ṭha thlerh thlawrh pian inkhaithli zaih a hmel ên a, pasalṭha vanglai hmang mêk tih hriat em em, a biang ding lama ser awm thla kalh leh a taksa hmun hran hrana sêr awm kelh kulh anmahni silai a rawn tin reng tu chu a rawn pen lut mêk a. Hnahzawl Lalpa chuan "Ka Lal in chhungah hian enge duh in neih? Chhuak rang rawh u, nge ni a ka tlangvalte ka thah tîr dawn che u" a han ti a, Thansanga chuan "Ka pu, i tlangvalte chu Bualthleng khaw tâna bei tlangval huaisente lakah an tlu zo dêr tawh, Lâwitlâng khua pawh a ram thuai dawn. Hnahzawl khua pawh hi a ram ve thuai bawk ang" tih pahin Hnahzawl Lalpa chu hnaih phei thutin a biangah chuan a kutphah hlai hlep hlawp chuan a beng ṭhuai mai a, a thal chiang teh e. Ginliana'n a chelh beh tlat Lal fanu Saimawii hlauthawng taka rawn meng ṭawk ṭawk chu pan pheiin "Nula, i pa sûalna rah chu nang hian i seng ang, kan tlangvalte hnênah a ni ka hlan dawn che, an ni tan chuan nawmchênna ṭha tak i ni ve ngei ang" tih pahin a biang chu a han chûl vêl a, Lalfanu Saimawii hlau lutuk chu a ṭap pûr mai a, Lâwitlâng Lal chhungkua leh Hnahzawl Lalnu leh Lalpa te chuan Thansanga, a hmel ena, nunnêm tak leh zaidam hmêl tak, chu tianga a che chu mak an tiin an râp zawk hial a, an hlau lutuk chu chêt nachâng pawh hre loin an ding khur tlawk tlawk a, Lâwitlâng Lalpa'n a lam pana Thansanga rawn kal mêk a hmuh rûal chuan thih daih a châk hmel hle, Thansanga chuan "I pawi enge kan sawi kan khua khan. Ka nupui leh a laizawnnu in lo man vânga in pasalṭha kan thah vâng kha em ni, kha ti khawpa kan Lal fanute i pasalṭhate'n an tih duhdah hnua i pasalṭha Sangchhûma ka aihnahphahpui Dammawia'n a nûn a zuah sak cheu hnûa min rulh lêt dân khan Pasalṭha Thansanga ngeng a chhun loin i ring em ni? "tiin a hrawkah chuan a rek nghal chawrh a, Ginliana lam chu hawiin" En teh, Hmar hnam chênna khaw hla tak Sengzau khaw Lal fapa, Pasalṭha Ginliana anih hi, ka aihnahphahpui a ni a, kan tawrhna avangin phuba la tûrin hei chen chen hi a rawn kal a sin, Bualthleng khua leh a pasalṭha te pawi sawi hi hlauhawm tak a sin"tih pahin Lâwitlâng Lalpa thaw ri bawrh bawrh chu Lal in chhuat laiah chuan a theh thla ṭhuai a.

Mipui thawm rawn awm nuai nuai ri an hriat rual chuan Thansanga chuan "a hun a thleng ta" a han ti sap a, Ginliana chuan "Ngaihdamna hrethiam duhlo tu Lal tenawm pahnih khan in tuhrah inseng ngei ang" a tih lai mêk chuan silai a rawn puak ta ṭhuai ṭhuai mai a, Thansanga erawh Ginliana dinna bulah chuan ṭhuin a silai chu kap vat theih tûrin a inring rh reng bawk a, Hnahzawl Lalpa'n "Pasalṭha khawngaihin, duh tawk tir la, in duh ang a piang ka neih zawng anih chuan ka pe ang che u, ka nunna pawh ni se, ka tlangvalte chân vek ka duh lo a ni" ti a ṭhingṭhi chunga a rawn ngen lai chu thawk lawkin a tlawh thal nghal thlawrh a, "Kan khuaah khan nunau pawisawi loin nunna an chân a sin, kan ṭhan lênna, kan hmangaihte lu phûmna leh kan tual châina ngei kha nang ni vanga chân kan ni a sin" tiin a mittui chu a khap per sak sak a, Lal meuh pawh zah lo a kut thlak mah ni se, Lal fapa Ginliana erawh chuan a hrethiam hle thung. Silai ri chu a rawn tam tial tial a, mahse rei lotêah a reh leh ta phiar a, mipui thawm rawn awm leh ṭanin a rawn ri ring tial tial a, Thansanga chuan Lâwitlâng Lalpa leh Hnahzawl Lalpa chu leihkapuiah hruai chhuakin Hnahzawl khaw kâng mêk chua thlir tîr a, khaw mawng lam aṭang chuan Neihthanga leh Chhawnsanga chuan Chawiliana leh Kapthangate hnung chu zuiin tlangval dang ho nen khuaa awm, rei tak ral bei tawh lo, tûna an khaw chhan nana rawn pen chhuak ve leh patling ho chu an rawn suat chho mawlh mawlh a, mah se patling tun hmaa ral lo beu ve fo tawh, an ral beihnaa a dam chhuak pawla tel thei ziah an nihna chu a lang chhuak nasain Chawiliana te lam pawh an tlu ve nual rêng a ni.

Mipui mangangin Lal tual an thlen khawm meuh chuan Lalpa Rengliana chuan hma rawn hruai leh tawhin bei let ngam tumah an awm tawh lo a, Thansanga leh Ginliana te leihkapui lama Hnahzawl Lal leh Lâwitlâng Lal kianga ding reng an hmuh meuh chuan an mang a angin a ṭhen te phei chu an ṭap rawih rawih hlawm a.

Lal tualah chuan Neihthangate chuan Pasalṭha Tinchhawnthanga leh Dengrema te leh an ṭhuihhruaite chu an rawn kai chhuak nawk nawk a, Lalpa Rengliana chu Chhuahchawnga leh Thangkungate nen Lal in lam chu panin Kapthanga chuan a rawn zui ve bawk a. Pasalṭha Dengrema'n "Ka hneh che chuan ka zalen min phal sak angem? Min phal sak dawn anih chuan inmalbeihah ka cho a che." a rawn tih rual chuan Thansanga chuan nuih sukin a silai leh iptepui chu Kapthanga hnenah chuan a han pe a, a mi lu lâk chem nen chuab Lal tualah chuan a rawn ṭum thla thak a," Neiha, han phelh teh u, a chem kha pe bawk u la"a han ti a, Neihthanga chuan rawn phelh sawk sawkin a chem pek pah chuan" Pasalṭha, i nun a tawp dawn e"ti sapin a kal san zui leh nghal a. Dengrema chu ding chhuak vatin Thansanga nen chuan an inveh ta dên dên a.......