PASALṬHA LIANMAWIA BUNG - 15

Thansanga chuan Dengrema ke chheh chu uluk taka zir chiangin, a deh khirh dawn hle tih chu a hre reng mai a, a chet sual hlauh phei chuan nûnna chân zâwkah a ṭang thei reng a ni tih pawh a in hre chiang kher mai. Chak taka tlan phutin Dengrema sah phâk lohna tûr vêl aṭang chuan zuanv kang leh thutin a chem chu a vai thla nghal puat a, mahse, a vai tlang mai bâkah Dengrema chuan vir zawk pahin a chem phêk zawng chuan a hnungzângah a rawn hlap ri thlawrh hman tlat, na pawh a ti ve hle Tinchhawnthanga lah chuan a lo nuih nghek nghek leh nghal a, a vawi hnihnaah pawh chu tiang bawka bei lehin Dengrema kutthlak fuh ve ngei chu a tum ruh hle, mahse Dengrema ṭuan ṭha zet vir zawk chu sah fuh a hnêkin a châwn puar kak hlawih chu a thi duh cher cher hle, Lalpa Rengliana te ho phei chu an hlauthawng tawh hle a, Thansanga pawhin a rilruin "Ka tâwpna nî ka thleng ve ta" a han ti sap a, mahse a rilruah a naupan lâia a pa'n "Tungchhoa kal hringfate hian vânneihna kan pumbilh vek bîk ngai hauh lo a, kan chêt sûal tawhnaa chêt sûal nawn châng pawh kan nei ngai e, mahse, beidawng lo a kan beih zêl chuan kan chêt sûalna khan vânneihna min thlen ṭhin" a tih chu a rilruah rawn lang zawkin Dengrema'n a chem a bum apianga a vei lam zawnga a inher ṭhin leh, a chem duh ang thâna na a rawn vaina hun a neih tâk ṭhinte chu hre chhuakin Dengrema lam pan chuan a tlân leh ta. Lalpa Rengliana'n "A thinrimna a thunun zo lo anih khu, a va pawi tak em!" a tih vawng vawng mêk lai tak chuan a hma ang bawka zuang kângin a chem erawh vai thla tawh loin a ding lam, Dengrema inherna tûr lam nia a rin lamah chuan a vai tleu thla ta a, thir leh ruh inkhak ri chawk a reh fel meuh chuan Dengrema bekah chuan Thansanga chem chu a bur va mai a, Dengrema chu zawi muanga ṭhingṭhiin a bawkkhup nghal thlawrh a, chu veleh Tinchhawnthanga chuan ânchhia a lo lawh nghal bawrh bawrh a, Thansanga chuan engah vak ngai loin a u a lam pana lo kal mêk chu harsa ti tak chungin a pan phei ve bek bek a, a u mitmeng ah chuan thisen chhuah châkna a lang chiangin amah ngei pawhin a hmuh hmaih lo hle.

Tinchhawnthanga lam pana a u kal tum mêk chu dangin "Ka u, ṭhiante pawh an zahawm e, nang zawng lo châwl tawh" a tih zawh rûal chuan Lianmawia chu rawn pen chhuak nghal tharhin phur hmel takin Tinchhawnthanga an phuarna chu zai chatin a chem chu a han pe a, amah ngei chuan a hmachhawn ta a, Dammawia chuan lo âuin "Ka keite a rawn chhuak e" a lo ti luah luah bawk a.

Tinchhawnthanga chuan Dammawia chu kawk vahin "Naupang mai mai maw i rawn tirh a? I nau lu hi ka la anga i lu ka la bawk ang" tih pahin thinrim eng phiar chungin Lianmawia lam pan chuan a tlan ta a, Lianmawia nghawng zawna a chem a vai tlang puat lai chuan Lianmawia kun zawk chuan rawn dah chhuah pahin a chem chu a rawn vai chho puat mai a, thinrimna avânga khaw êng hmu lo Tinchhawnthanga chuan a dul kak chho hlawih chu mak ti taka thlîrin Lianmawia chu a melh vung vunga, a kâ aṭanga thisen phuan rawn chhuak chu hrûk tumin a kut a han lek dawna, mahse Lianmawia chem rawn phe fua chuan a lu chu a rawn sâr uai ta hnâwp mai a chu veleh tlangval ho chu lo au nghal dûr dûrin Lianmawia chu an rawn zâwn nghal a, nuam an tiin Lianmawia chu an chhuang kher mai.

An thâwm a reh fel hnû chuan Lalpa Rengliana chuan thu rawn sawiin "Aw le, Hnahzawl leh Lawitlang khaw mipuite u, kan buaina rawn irh chhuah dân hi hre lo in awm tâkin" tiin a han sawi hmasa tê tê a, khaw mipui ho chu mak tih hmel tak tak an awm laiin hre sâ ang mai a an awm ngaia awm reng an awm nuk dânah Hnahzawl lam hi chuan an hre ve lem lo angah an ngai a, Lawitlang lam erawh an pasalṭha Sangthanga Thansanga'n a thah vâng khan an lo hre ṭhêm ṭhûm tawh zâwk a ni. Lalpa Rengliana chuan "Ka khua ka châna, kan Lalpa Dohranga'n a din, Pasalṭha ropui Chawnghranga leh Zangaiate lu nghahna hmun, ka unaupa leh ka u ang chiaha ka en mi kai hrûai ṭhîntu Pasalṭha Thanhranga ruang kan zalhna hmun ngei chu nangni vâng hian kan kal san a ngai a ni, ka nupui mâkpa bêlin tunah hian khua pawh nei loin ka awm mêk a, ka pasalṭhate nen kan inṭhen darh seng sung a, ka ṭhiante nen kan inṭhen darh a, inhmangaih tak takte, kut ni khuaa hlim leh nuam ti taka zai a lam ho ṭhinte kan in kal san a ni. Zahngaihna hi ka lusei puite chungah chuan lan tir hram hram ka duh ṭhin, mahse Bualthleng khaw tân leh ka khaw mipui hluite, ka tana rinawm reng ṭhinte tawrhna avang zawkin in khuaah hian in awm zui thei tawh lo ang, in khua hi kan hal darh vek anga, Lawitlang khua pawh a kâng mêkin ka ring"ti a mittui tla zawih zawih chunga thu a sawi hnu chuan Dammawia chuan "Min zui rawh u le" ti a hma hruaiin an la hâl loh lam khaw mawng lam aṭang chuan an rawn hal chho ta a. An khaw kâng rak mêk an hmuhin mipuite chuan a rapthlâk an tiin an ṭap hawm hawm a, lusûn chhungkua awm lohna tlêmte chauh an nih hnuah an khua an chân zui leh a, hnehna changtute tâna hlawhtlinna hi a tuartute tan erawh chhiatna tâwpkhâwk a ni thung si. Inrûn hian rah ṭha reng a chhuah lo a, inrûnna hian phuba lâkna hi unauah a neih a, an inzui chawt reng ṭhin.

Khua a alh hluah hluah lai tak chuan Lalpa Rengliana chuan hma hruaiin an chhuak ta hum hum a, an tlangval nunna chân sawmhnih dawn lai an lo awm ve a, an lawm erawh a kim zân lo hle. Mahse, Bualthleng khaw phuba erawh an la fel ta. Hnahzawl Lalpa leh Lawitlang Lalpa te chuan in kang alh hluah hluah chu thlîrin inbiak pawh inbe loin an kûn tluk tluk a, Hnahzawl Lalpa chu tho lawkin a chem chu a va la a, Lawitlang Lalpa indawmkûn ngawih ngawih lai tak mai chu "Nang phiangsen hian ka puihna rawn ngên lo la chu ka khua leh tuite hi hlim takin kan la awm tûr" tih pahin sah a han tum a, mahse Lawitlang Lalnu chuan a pasal chu rawn kuahin khawngaih dîla a rawn ṭah hawm hawm tâkah chuan a chem hûm lai chu paihin a ṭhingṭhi hnawk a, a khaw kâng alh hluah hluah leh, mipui mangang ṭap chuah chuahte, khaw dai lam pana nunau ho tlan chhe lawp lawpte chu thlîrin a mittui chu a luang zawih zawih reng a.

Leng hâwn ar a khuang thliah thliah tawh a, Zehtet khaw chhung chu tlangval tam zawk râl bêi tûra an chhuah miau avângin zan dang ang bawkin thâwm riva hriat tûr a tlêm leh hle. Chu tih lai tak chuan kawtchhuah lama Lalpa Rengliana aw ngei maiin bawhhla a rawn chham vang vang ri chu an hre ta mai, a hnu lawkah silai a rawn inlawn ri nghal dur dur a, khaw chhung lamah pawh chuan pa ho chuan an silai chu an kap puak ve dur dur mêk bawk a, rammu a chhuakte an hlawhtlinna chuan lâwmna nasa tak thlen mah se," Bualthleng tâna huaisen taka nûn hlântute zingah ka fapa a tel ve angem? tih chu khaw mipuite'n an inzawh ber a ni.

Chu zân khu nulate tân an lawmpa te lo ban tûr arkeziak lo ngaihtuahna hun a ni a, khaw hmun nghak tlangvâlte tân lah silai inkahsiakna hun a ni dawn a, mu bîk awm loin tlaivârin rammu a chhuakte an lo nghak dawn a ni. Zing khawvar rual chuan rammute chu an rawn haw ta a, silai lah an rawn hawn hnêm hle lehnghal, nuam pawh an tiin an hlim tlâng hle, nulate chuan an lawmpate chu arkeziak rawn banin zu fâng thlum tui takte chu an han tulh a, Lianmawia pawh Siamliani a lam pana rawn kal nui ver ver chu hmu lo der hmakin Chhuansangi rawn kal ve mêk lam chu a pan vat a, Chhuansangi chuan arkeziak ban pahin zu fang chu a han tulh a, "Ekhai, Chhuani a thlum tuiin hah a dam sawng sawng mai ka ti" a han ti a, Chhuansangi chuan nuih seih pahin "Tak tak ni se ka va han ti em" tiin Lianmawia chu mi hmuh lohin a han zâi relh relh a, mahse, rei inbe loin an kal hrang leh ta a, Siamliani'n nui her her chunga Dammawia zu fang a lo tulh lai chu Hratzuala chuan lo hmuin Zamana leh Lianmawiate nuih chu a za ru ang reng hle.

Lalpa Puithanga pawh rawn lang vein Lalpa Rengliana nen chuan an han inchibai a "Ka fapa, Lal ropui tak zawng i ni e, Lal tual lamah i chho ang u" a han ti a, ti chuan Lalpa Puithanga hma hruai chu muangchângin an zui chho ta a. Khaw mipui ho pawh an ri hulh hulh mai a, an lawmna in vân a tawng hial âwm e. Lalpa Puithanga chuan thu rawn sawiin "Kan unaute, kan fapate, kan pasalte, hlawhtling taka an rawn haw hi kan lawmin hei bâk bâk a hlîmna tûr chuang hi a awmin ka hre lo a ni. Lalpa Rengliana hian an rammut dân chanchinte han sawi se la, ngaihthlâk a châkawm e" a han tih chuan Lalpa Rengliana chu rawn pên hnaiin Lâwitlâng khua aṭanga Hnahzawl Lal inkawt thleng chu chipchiar takin a rawn sawi ta vek a, chu veleh mipui ho chuan kut an lo beng dur dur a, a ṭhente chu an lo kûk râwih râwih bawk a. Mi tinin Lianmawia chu an ngaisângin nula hoin an en dânte lah chu a no ṭhain Lianmawia lam hawia an mit meng zîm sân chunga an han khap dîar dîar te phei chuan a kakpui lawn awl zia leh a awmna hniam zia a hrilh fiah chiang hle.

Lalpa Puithanga chuan "Pasalṭha Thansanga leh Pasalṭha Lianmawia chu rawn chho rawh se, an rualin an ṭhiante, ral hma tawnga ṭang pasalṭha rûalte kha rawn chho bawk se, chawimawina ka hlân duh e" a han tih rual chuan mipui ho chu lawm avânga kut bengin an ri nghal dur dur mai a. Thansanga chuan hma hruaiin Lalpa zu chu tlem a han tem a "Lal ropui zu meuh zawng a tui dân a danglamin, hetiang ang rênga tui hi ka la in hauh lo" tiin a pe lêt leh a, Lianmawia pawh chuan tlêmte insak vein a hnûah an ṭhiante chu an vaiin châwimâwina no chu an indawm chhawk ta a.

Lalpa Rengliana beng bula Lalpa Puithanga a ṭawng sur sur hnu rei lotêah chuan Lalpa Puithanga chu rawn ṭawng chhuakin "Aw le, hnehna kan chan hi lawm duh viau mah i la, Bualthleng khaw tâna bei kan nihna angin Bualthleng khua a din leh huna lawm ṭha kan ti tlânga, Bualthleng khaw mipui Damdep lama awm tam takte tello a lo lawm hi a tih chiin Lalpa Rengliana hian a hre lo a ni"a rawn chuan mipui ho chuan an lo pawm thiam hle a kut an lo beng dar dar a, ti chuan an ṭin darh ta a.

Zan lamah chuan Lal inah Pasalṭha ho chu awm khawmin Pasalṭha tuai tîr Lianmawia leh a ṭhiante erawh Chhuansangi te rûnah an kai thung. Lalpa Puithanga chuan "Renga, i khaw mipuite tan khua i din leh ngei a ngai a ni, i makpa lak aṭanga Sangal khawng hranga i awm erawh ka lawm zawng a ni loin a ṭha ka ti ngai dawn lo a, chu vângin nangmah ngeiin sual chhuak la ka ti a ni" a rawn tih hnu chuan Lalpa Rengliana chuan "Ni e, Lalpa i han sawi tâkah chuan khaw thlang lam, he lai hmun aṭanga zan thum kala hlaah khuan ram chang ṭha tak mai, khua han dinna'na ram thleng rem em em mai hi a awm a, chu chu ka tinzawn ta deuh a ni. Damdep leh nangni lam kal pawhna'n zan thum riah ve ve a ngai anga, kan pachhiain chhawmdâwl kan ngai nasa dawn em em a, nangni leh Damdep lamin min kârcheh chuan ngaih pawh a ngam deuhin ka ring a ni"a rawn ti charh charh a,midangte pawh chuan ṭha an ti hle mah se Ginliana chuan "I sawi chu ka hre mai thei a, ka hre dik lo mai thei bawk. A ram awm dân i sawi dân aṭang chuan kan hriat hi a in ân dûn hmel hle mai a, an sawi dânah Fanai pawih hoin khaw dinna'n an it riau a ni âwma, buaina pawh in tawk ngeiin ka ring a ni. An sawi dân phei chuan tûn favâng âwllen hi han zo fel se bawk khawk nghal mai an tum a ni"a han ti a, Lalpa Puithanga chuan "Kan Fanai pawih ho chu an va huangtauin Lusei rama bawk rawn khawhte hial an tinzâwn tâk mai le, Gina chung mite chu khawi lama chêngte nge an nih a?" a han ti a, Ginliana chuan khawchhak lam chu a ni a, mahse Hmar lam hnaihah a ni thung. An khua hi in zaruk nufaa inchhal niin ka lo hria a,Lal Aichhinga awp khua niin a hming pawh Thingsûl a ni nghe nghe Pasalṭha pawh an ngah ve hle, keini leh hmar hnam ho chuan an keipui rûal an tih mai Pasalṭha Aizâma te unau bâkah Pasalṭha Nîthanga te, Awrhṭiala te leh an kaih hruai ṭhin an nau te ho hming hi kan hre lâr hle a sin. Thingsûl keipui rûal leh an no hruaite tiin kan sawi chhuak ve fo a ni. Lusei ram lam rawn nêk a, Lusei ho rawn rîkrâp che u hi an Lalpa tum ber niin an sawi bawk"a han ti a, Lalpa Rengliana chuan "Gina i thusawi chuan min ti bengvar hle mai, kei pawhin khual ka aṭangin Fanai khaw ropui tak Thingsûl khua a awm thu leh an pasalṭha te pawh huaisen tak tak an nih thu chu ka lo hre ve tawh a, chu tia keini min rawn nêk an duh anih chuan kan innêk mai ta lawng "a han ti a, Châwiliana chuan "Lusei ram chhunga an lu an rawn rawlh lawr anih phawt chuan kan lo kâp hlum phiar anga ti nia, kei zawng Bualthleng khaw din thar leh hun mawlh hi ka nghakhlel a ni, he chhiatna ngei hian ka farnu khiang awih nîah pawh hmun hla takah min awm tîr si a" tiin Bualthleng khua a ngaih zia chu a chhak chhuak zauh bawk a.


Ni thum a liam leh meuh chuan mikhualte pawh haw darhin tun hmaa khaw khata hlim leh nuam ti taka leng zâ ṭhînte khan a vawi hnihna'n inṭhen zâi an rêl leh ta. Lalpa Puithanga chuan Lalpa Rengliana kal liam tûr chu thlir vang vangin "Bualthleng khaw thar chu ka hmu hman dawn si lo a" a han ti sap a.


Zan khat chu Lianmawia daikal haw lam chuan Siamliani a tawk hlawl mai a, zan riah eikham hlim chauh a la ni a, Lianmawia chuan han kal pelh a hreh ru ang reng hle. Mahse, Siamliani tun hnai mizia a ma laka a dan tâk tlat dânah hian thil enge maw inthup a awm ngei rinna a nei ru tlat a, phur fahran lo taka kalin Siamliani'n an inkal pelh lai a biak pawh a be lo chu mak a ti ru ang reng hle. Mahse, thil dik lo hi chuan lan chhuah hun a lo nei leh nge nge ṭhin a, ni rei lo te hnuah Siamliani sawn pai thu chuan khawtlâng deng chhuakin Siamliani naute pai mêk pa pawh Siamliani chuan a sawi thei tlat lo, rammu hlawhtlingte Zehtet khuaa zan hnih lek an riah lai khan nuam a lo chên nasa tih a hriat kher mai, a ni nula hmelṭha leh rual kawm thiam em em bawk si chu tu tlangvâl tan mah han hnar phal chi ni miau hek lo le, Siamliani lah a chhungril tenawm leh zahna nei lem lo ta chuanin khual vâl zinga a hmel duh zawngte tana han inphal mai a lo awl sam hle a ni ngei tûr a ni.


Lianmawia'n chu thu a hriat rual chuan mak a tiin awih mai pawh har a ti hle, mahse, engmah sawi chhuak loin a hmangaih Chhuansangi tan a thinlung a hlân tawh chu rinawmna hmanga hung vêlin an inhmangaihna mawi taka a par chhuah hun nghakin a hlim ve em em zawk a ni.

Tuk khat chu Lianmawia chu hma takah thoin in lam panin a haw vata, zan lama a nu khawsik reh thei lo tui taka a lo muhil sek sek a hmuh chuan a lawm kher mai, khua lah a la vâr chiang si lo nen tuiûm chu lain nula ho kal tam hmaa tui thâl tumin a chhuak ta vat a. Tuikhur a nula pakhat tui lo thal mêk a hmuh chuan lawm takin a pan thla a, mahse a han kal hnaih leh deuh chuan Siamliani ngei a ni tih chu a hre ta a, nuam lo a tiin han pawh mai a hreh ru viau bawk, mahse, let leh ngawt thu awm hek suh phur fahran lo chuan a zu pawh ta a, Siamliani'n a lo nuih suk lai chu han nuih lêt vein engmah a sawi lem lo thung. Siamliani zawk chuan "Liana Chhuani te unau i rawn nang hman lo chiah chiah a nih kha, an ni unau zawng an rawm pem hnu hian ka tluk ngai ta hauh lo mai. An felin nakin lawka kan khaw nula chhuanvawr la ni mai tûr Chhuansangi lung di phei hi chu a vannei ka ti hle mai" tiin Lianmawia chu a han sawi chhan pah zeuhva, "khawmaw lo la teh ka lo thâl sak ve nghal ang che" tiin Lianmawia tuium ken lai chu lak sakin a han thal sak nghal zung zung a, a thal zawh rual chuan khaw lam pana inzui chhoin Lianmawia chuan "U Siam ka lawm e aw, min thâl sak ve duh a" a han ti a Siamliani chuan "Ekhai lawmthu sawi a ngai reng reng hleinem,Liana fimkhur takin i nun hi hmang la, Chhuansangi nun chhiat vekna tûr thil hi ti ve miah suh ang che" a han tih chuan Lianmawia chuan a fa paina pa a sawina angah ngaiin "Chu U Siamte i hre ru reng tihna em ni?" a han ti a, Siamliani chuan "He lam hi chu thawnthu dang daih a ni, tuna ka naute pai nen hian inzawmna a nei hauh lo a nia" tiin thu dang a sawi pui leh ta daih a, Siamliani nuna thil thleng chu Lianmawia chuan hriat châk viau mah se zawh chi ni a a hriat loh avângin Siamliani biakna a piang chu ṭha taka chhangin a mize dang ta daih chu nuam a ti letling phian. An in lam pan vevein Lianmawia'n in a thlen chuan a nu chu chauh hmel taka rawn tho chhuakin "Taite enge khangte i lo tih duh aw, ka ti ve thei reng a sin" a han ti a Lianmawia chuan "Ka nu, ka puitlin ve tawh hi, i dam lo a ni lawmni va mu hahdam rawh ka lo chhawk ang che" tiin a nu chet tumna apiang chu dâl zung zungin. Alo tih khalh zung zung a, chu zing ni chhuak chuan Ṭhasangi mittui luang chu chhun tle sar sarin a fapain a hmangaih zia a hriat chhuah vanga a lawmna chu a sangin, a nui pah sen sen bawk a.