PASALṬHA LIANMAWIA BUNG - 17

Siamliani ṭap deuh pûr chu Lianmawia chuan hnêm mawlh mawlhin "U Siam engkim a ṭha vek e, engmah hlauh tûr a awm tawh lo e" a han ti a, Siamliani chuan thei leh thei loin "Ka lawm e" a rawn ti chhuak sap a. Zamana chu Thingsûl Lal fapa hmaah tak chuan va dingin "Aw le, in thusawi kha kan hre vek a, khua rawn din intumna lai hi Bualthleng Lal Rengliana khaw thar kâina tûr a ni a, ti lo u la a ṭhat zawk ka ring. Pasalṭha Thansanga te inhmachhawn ngei awm si a" a han ti a Lal fapa chu rawn hawi chhuakin a ke chu na a ti tih hriat takin a chek tlak tlak bawk a "Pasalṭha Thansanga leh Pasalṭha Dammawia chu Bualthleng khua an ni tawh lo tih kan hre ve e, naua, tin kan khaw thar kâina tûr a ni a, min lo dâl lo zawk rawh u, ka n pasalṭhate in ngam dawn chuang lo" tiin a han nui lui sak a, Zamana chuan engmah sawi chhunzawm tawh loin an silai leh a zênte chu a lak sawn sak vek a. Hratzuala chu rawn ṭawng chhuak ve in "Anih a hnu, in pasalṭhate chu an huaisen hle a ni mahna, mahse, kan khua mai bâkah Damdep khaw leido in ni tel dawn tih inhre dawn nia" tiin Lianmawia chu a han kawk a "Pasalṭha Chhuahchawnga fapa ngenmu khan i chungah zah a ngai a, Pasalṭha Chhuahchawnga ngên mu erawhin zah a ngai tawh hauh lo ang" ti sakin tlangval dang ho an phuar chu phelhin Zamana leh Lianmawia chuan silai nen an lo veng reng bawk a. Lianmawia chuan "Kal u la, in Lalpa hnenah chuan a fapa kan kawl thu hi han hrilh rawh u, dama a hmu leh duh anih chuan silai fung ngain rawn tlan rawh se, ni ruk chhung hun in nei" a tih rual chuan chung tlangval ho chu hlau takin an kal nghal a, chem tak ngial pawh an pe let si lo, sapui rilṭàmte tawk ta se engtin tak awm ang maw.

Thingsûl Lalfapa erawh chuan "Heng rawlthar rûal pathum lek hian sawm rûal min han hneh mai chu a ni a, Zehtet khua pawh hi do mai mai chi an ni bîk hauh lo mai. Aizâmate an rawn lan vat loh chuan ka thi ngei âwm si a" tiin a indawmkun tlawk tlawk a. Khua an luh leh meuh chuan ni pawh a her bawih tawh a, Lianmawiate pathum chu an chhungte'n an lo ngaihtuah tawh hle a khaw mipuite'n Siamliani leh Lal fapa pakhat bai hlak hlak a kal an rawn chhawm an hmuh chuan mak an ti tlâng hle. Lianmawiate erawh chu kal zêlin Siamliani an in lama Hratzuala'n a luhpui hnuah Lal fapa chu hruaiin Zamana leh Lianmawiate nen chuan Lal inah lutin rei lo têah Lianmawia leh Zamana chu an rawn chhuak leh a, Lal leh upate bâkah Chhuahchawnga leh Thangkungate'n rei tak an dawp hnûah pawh Lalfapa chuan inpuan a tum dêr si lo "Thingsûl Lal fapa Airuma hi Lusei hmaah ka tlawm lo ang" tih chiah chu an hriat theih a ni. Lalpa Puithanga chuan Lianmawiate chu ko lut lehin an va hmuh dân zawng zawng chu a han sawi nawn tir leh vek hnuah chuan Siamliani chu a koh tír ta a. Siamliani rawn lut ṭi deuh dui chu Lalpa Puithanga chuan "Ka fanu i pa ram chhûngah i awm tawh e, zâm hauh loin engkim min hrilh rawh le" a han ti a, Siamliani chu aw khur der der chunga rawn ṭawng chhuakin "Lalpa zahawm ka pute khua tlawha ka tleirawl laia kan zîn khàn an ni pawh hi rawn zin vein an pasalṭha pakhat tan ranngo an rawn zawnga, kha mi ṭuma kan inhmuh kha chuan khawnbawl fapa anga insawiinka rilru a hneh a ka thianghlimna chena ka hlan hnuah Lal fapa chapo tak anih thu ka hre leh a, rilru na takin ka rawn haw ta a ni. Khual kà aṭangin rei lo têah nupui a neih thu leh rei lotêah a mâk nghal thûte ka hre leh a, zan khat chu leng hâwn ar khuan hnûah rawn lût hlawlin ka nu leh pa hnenah nupui atan min dîl chiama, ka nu leh pate chuan an hlauh avangin nei mai tûrin min ti a, mahse, ka hnial fithla ta a, ka rai khan ka raina pa kha ka hre lo a ni hauh lo, mahse, amah hian a hria anih chuan pawi nasa zawk a thlen hlauin puh tûr hre lo angin ka awm ta mai a ni. Mahse, min rawn buma min rawn hruai chhuak a, hetiang hi kan ni ta a ni "tiin a mittui chu a hru mawlh mawlh a, Chhuahchawnga chuan "Engtin nge a ni hian Thingsûl khua aṭang daiha a rawn hriat theih nachhan tûr?" a han ti leh a, Siamliani hmelhmai rawn danglam ta thut chu a hmuh hmaih lo chiang kher mai,"Siami hlauh hun a ni love tumahin an ti na lovang che" a han ti dam thluam a, Siamliani chu rawn dâk chhuakin "Kan khaw mi leh sa ngei hian a pui tlat a ni"a rawn ti a, chu veleh Lalpa Puithanga chu thinrim taka rawn ding chhuakin a tlu mai ang tih hlauin Thangkunga chu a bulah chuan a va ding ve nghal zat bawk a," Ka fanu han sawi ta che, lang lo lam aṭanga min lo phiar ru a, kan tana hnawk sak ṭhinte lam lo ṭang ru tlat reng mi tenawm chu dam reng tlâk a ni love" a han ti a, Siamliani chu hawi kualin bang kil lama hlauhthawn hmel taka Upa Hratthanga lo ṭhuah chuan a tâwp chat a, "Lalpa i rorêlna ṭawm puitu che, Upa Hratthanga ngei hi a ni e, a ni hi Thingsûl Lal fapa hian lawmman ṭha tâwk tak a pe ṭhin a ni, ka sawi chhuak anih vaih chuan ka thi nghal dawn si a, ka sawi ngam lo a ni" tih pahin a inhnît hlawp hlawp a. Upa Hratthanga chu rawn ding chhuakin "Nang hmeichhia......dawt..dawtin mi puh a maw... Lalpa" a rawn sehchilh deuh nawk nawk a, Lalpa Puithanga chu rawn ṭawng chhuakin Lalfapa Airuma lam hawi chuan "Ka thu hriat hi a dik em? Dawt i sawi anih chuan i lu kha tan nghal a ni ang" a han ti a, Lalfapa Airuma lah huaisenna tak tak nei hek lo le a lu a lo bûk nghut takah chuan engkim a chiang ta.

Upa Hratthanga chu rawn pén chhuakin Lal fapa Airuma chu kawkin "Nang mi tenawm mi phat san a maw?" a rawn ti ta phiar phiar mai le, Lalpa Puithanga'n "Eng vânga pui nge i nih?" a rawn tih fiak ṭhak rual chuan tawp chawihin Lal fapa Airuma chu a han en a, a ni lahin huat hmel takin a lo en tawh bawk si. Lal fapa Airuma chuan "He putar hian Pasalṭha Chhuahchawnga fapa hi thah a duh vang maw le, a fapa phuba lak nan" a rawn tih rual chuan Lal in chu a reh ṭhuap a. Chhuahchawnga chu rilru na taka rawn ding chhuakin "Ka pu ka u khan i fapa kha a tum reng vânga kâp a ni lo a sin, a râl palh liau liau a ni a sin" a han ti a, a mittui khap per sak sak chuan a rilru nat zia a lan tir chiang kher mai, Lianmawia chuan engmah hre ve lem lo mah se a pa hmel chutianga a han hmu chu a rilru a na hle. Lalpa Puithanga chuan "Phiar rutu, dam reng tlâk i ni lo e" a han ti a, Hratzuala chu mittui tla zawih zawih chunga rawn ding chhuakin "Ka pu, i va han tenawm ngai ve. Ka ṭhian ṭha ber pakhat thah i lo tum reng a maw? Ka pu, Liana nen hian ka u phuba la tûrin ka u ruang chungah khan kan intiam a sin, ka pu, i tupa ka ni hi ka zak tak zet a ni" tiin a tei chhuak nghal vawk vawk a.

Chu Lal in boruak rit zet a kian meuh chuan Lal leh upate bâkah Lal in chhunga awm zawng zawngte chu an thaw deuh hûai a, Pu Hratthangate chhungkua chu khua aṭanga an hnawhchhuah tâkah chuan an rorêl an zo fel thei ta hram a, Hratzuala erawh khuaah a nu nen la awm phal sak an ni thung. Lal fapa Airuma hliam chu bawlpu enkawl tîrin an zawh fel hnu chuan rip chhungah an khung hmak bawk a.

Khaw thlang lam Zehtet khua aṭanga zan thum riah ngaihna a hla, thing kung lian tak tak ṭo khep khupna ram chhungah chuan Thingsûl Lalpa'n a keite rual a tirh chhuahte leh Lalpa Renglianate tirh chhuah Vâncheuva ho a kal tlangvàl sawm rûal vêl chu in ep atin an inring hlawm hle. Ṭialkawnga chuan "Lusei ho kal kiang mai teh u, in perh tàr tawhna mah ni se kan tàr hnan dawn tho tho che u" a han ti a, pathum chauh ni mah se an inrintawk zia an hmêlah a lang chiang hle. Vâncheuva chuan "Lusei ramah hian khua in rawn din thei lo ang. Kal kiang tûr chu nangmahni in ni e" tih pahin an lam hawi chuan Châwiliana silai a hawh chu la kângin a cheng chu a han kau ri nghal rap a. An intam hleih bawk nen Ṭialkawngate chu thinrim eng phîar chungin an insaseng ta zawk a.

Vâncheuva chuan "Khaw lama lêt leh vat a ngai a nih hi. Kan Lalte hnênah kan thil hmuh kha kan hrilh vek ngei a ngai angnga" a rawn tih chuan midang ho chuan an pawm tih lan tirnan an lo an lo bûk khum tliar tliar a, ti chuan haw tûrin an inbuatsaih ta a.

Zehtet Lal tuala mipui pung khawmte chuan eng thil nge thleng tih chu an inzawt tawn nasa. Lal tuala Lianmawia inring taka a ding kâk vah chu an en duh hle. Pasalṭha Awrhthanga'n amah a lo pan mêk lai chuan a ke chheh dân uluk taka zirin Pasalṭha Awrhthanga rawn tlan paha a zuan rual chuan vir zawkin a ban puam thik nghal zawk chu hre mah se buaipui hman a ni tlat lo. Mipui lo rak ṭhawt ri a reh fel rual chuan Awrhthanga a kut ding lam a kiua intan hmawk na ti lutuk au ṭial rei ruai chuan Lal tual chu a chiah hneh teh e.

Lianmawiate'n chawi tûra anmahni thua thutlûkna an lo siam ve ringawt avang khan Chhuahchawnga leh Thangkungate chuan an khak nasa hle, mahse Lalpa Puithanga ber chuan "Naupang tê ni chungin ka ai an awh thei der tawh mai" tiin a chhuang em em lawi thung. An Lalfapa tlan nana silai pawh rawn keng buai duh lo, Pasalṭha Awrhthanga leh a hote mi sawm rual vel silai chu laksak vekin fung ruk lai a ni nghe nghe a, Lal fapa Airuma chu an chhuah ta chauh a ni.

Chu ta chin chu Lianmawiate ṭhian ho pawh pasalṭha ti a sawi an ni ve ta, Hratzuala pawh a zahna te a ni têla kiam ve bek bekin tunah chuan a nu'n hmeithai pui mah se pasalṭha Hratzuala a lo nih ve tâkah chuan mi hmuhsit leh endawng hlawh lutuk loin pasalṭha nun kawng a zawh chho ve dawn ta.

Lalpa Aichhinga'n a fapa hmel pawr fap leh kut bûla a pasalṭha Awrhthanga rawn haw a hmuh chuan a thin a ur hle mai, a hma nî lawkah Ṭialkawngate hlawhchhamin an lo haw bawk nen a upate ko khawmin ral rêl an ṭan ta hmiah mai a. Pasalṭha Aizâma leh a nau Danglova te pawh Lal inah ral rêlnaah chuan telin Zehtet khua chu chung phîl vek an tum chiang hle.