PASALṬHA LIANMAWIA BUNG - 2

Hun a liam zêl a, Lianmawia pawh thing nawi fawm rual a rawn ni chho ve a, a ṭhian hluite nen erawh an inzui ngai ta meuh lo a,amah a awm nuam a tiin ṭhian a mamawh lem lo hle mai a, a pa bulah erawh a ṭawng ve nasa ṭhin hle. A châng phei chuan a pa hian Lianmawia thil hre tam lutuk hi chhân ngaihna a hre lo hial ṭhin. A pa nena lui kalte leh sava veh te hi a thil nuam tih ber a ni ṭhin.

Zan khat chu Bualthleng khaw Pasalṭha tuaitir Thansangate rawn kal thu an khuain an hriat tawh avangin naupang pawnto ho chu inbuan fiamin "Kei Pasalṭha Thansanga, Kei Pasalṭha Liansanga, kei Pasalṭha Dammawia" tiin an au nak nak a, chu tia an au nak nak lai tak chuan an kianga ngawi renga lo ding ve Lianmawia chuan "U Sangtea te an lo kal" tiin Pasalṭha Thansanga te pathum rawn kal mek lam pan chuan a tlan pheia an ni pawhin Lianmawia chu lo pawmin an in lam an pan pui ta a. Naupang dang ho chuan Lianmawia chu ngaihsân hmel tak hian an thlek ha hlawm a, an ngaihsân em em Pasalṭha Thansangate nau a ni miau a ni.

Zan khat chu zanriah an kil zo hlim chauh tihah tlangval pakhat rawn lutin Zawlbuk lama ṭangin Lianmawia chu an rawn ko a lo ni a, Ṭhasangi chu a hlauthawng nghal hle maia, a fapa nghal zia a hre miau a tin ni. Zawlbuk tualah chuan naupang an lo awm tlim hmur tawh a, Lianmawia han thleng chu an lo en hrek hrek hlawm a. Val upa Buanga chu rawn pen chhuakin "Vawinah Lianmawia hian thing a keuh lo tih thu kan dawnga, Lianmawi thu dik a ni em?" a han ti vîn ṭhak a. Lianmawia chuan zam hauh loin "U Buang ka keuh ngei a ni" a han ti a. Val upa Buanga chuan "Anih a hnu, in zavai khan in thing têl kha han la ṭheuh teh u" a han ti a, mipa naupang ho chuan hmanhmawh takin an rawn la sap sap a, Lianmawia chuan a chang ve ta der lo mai. A sir lama Hratzaua te unau lo nui ru kur kur chu a hmuhin thil awmzia a man thiam ta nghal vek a Val upa mitmei pawh veng zo tawh loin Lianmawia chu a tlan thut a Hratzaua lo nui deuh sun sun hmaiah chuan a va beng ri ta sawk mai. Ben leh a han tum chu tha chak tak hian lo chawi kâng lawpin "Naupang zahna hre lo, zilh loh fa zuk ni che a" tih pahin a han theh tlu hnawk a. "Chawnga ko turin pakhat kha kal vat teh u" tih tuar pahin Val upa Buanga chuan "Lianmawi i pa unaupa kha ka unaupa ang chiaha ka en, ka ṭhian sabeng a ni a sin. Min ti zak hle mai" tih pahin rum zetin a melh a. Lianmawia erawh Hratzaua hmai tuai deuh chhen chunga amah lo melh kar tu chu ngeiawm taka melh letin a han nuih lui leh deuh sak ṭhin a. Mahse, "U Buang eng thil nge ni ta? Eng pawipang nge thleng ta?" rawn ti tu a pa aw a hriat rual erawh chuan a hlauhthawn hmel hle. A chet dân zawng zawng Val upa Buanga'n a pa hnena a sawi zawh hnu chuan a pa chuan "He lai hmunah hi chuan tlangvalte'n thu in nei zawk e. U Buang ka fapa ṭhatna tur atana i hriat apiang chu i ti thei ang" tih pahin Lianmawia chu rum zetin a melh a, a haw san ta nghal a. Val upa Buanga chuan "Aw le, a vawi khat thlenna anih angin Lianmawia hi ngaihdam a ni ang. A thleng nawn leh anih erawh chuan zilh a tawk ngei tawh ang, pawnto tawh r'u le" a tih chuan naupang ho chu an kal darh sap sap a, tuibur hmuamda hnu lekah phei chuan Zehtet khaw chhung chu naupang pawnto rak thawmin a khat leh tawh a. Lianmawia erawh Valupa Buanga chuan an in lamah hruaiin a zilh ta char char thung a,pasalṭha fapa ni mah se, pasalṭha anih ve loh thute, a huaisenna te chapona'n a hmang thei anih loh thute leh, mi thinchhe lutuk nun a tluang ngai lo tihte hrilhin a zilh malh malh a. Rei tawk fang hnuah Lianmawia chu pawnto tura kalin a ni erawh Chhuahchawnga te in lam a pan thung a.

Chhuahchawnga te inah chuan Chhuahchawnga leh a nupui chu ngui takin an lo ṭhu a, Val upa Buanga lut an hmuh chuan Ṭhasangi chuan "Ekhai kan val upa meuh enge i duh tak? Eng pawipang nge awm ta le?" tiim a lo be lumlam vat a, Val upa Buanga chuan "A eng dang ni lo e, zanin thil thleng kha sawi pui lawk che u ka duh a ni" a han tih rual chuan Chhuahchawnga chuan "U Buang kei zawng a zahthlak ka ti hle mai. Pem chhuah hial a ni ka rilrûk ni. Kei ral rama han tal hunte, ram riah hunte ka nei leh chawk anga, ka fapa hian a nu leh a pi thusawi ringawt hi chu engahmah a ngai si lo a, chu vangin kan mualpho tam hmaa pem chhuah mai a ni ka duh ni"a han ti a, Val upa Buanga chuan "Chawnga pem chhuah kha chu sawi tawh reng reng suh. Nang ber i awm lohte'n khawi khua paw'n min zuam vek anga sin. Lungngai reng reng suh Lianmawia hi ka lo ngaihtuah har deuh a ni. I u thlarau pawhin mi dem viau tawh ngeiin ka ring. Lungngai suh ka theihtawp ka chhuah ve ngei ang"tiin a han hnem a, ti chuan titi khawchangte sawi zâin Lianmawia pawnto rawn haw chu thu ṭha tin rengte an han fah dun hnuah Zawlbuk lam panin an chhuak dûn ta a. Chu tia buaina a chawh chhuah a chin chu Lianmawia mizia chu a rawn dang chho ta telh telh a, naupang dangte pawh kawm vein nuam a ti thei hle a, a pa hi rammu turte leh sa pêl turte hian a chhuak fo a, mahse him taka a rawn haw leh theih zêl avangin inrûn tih vel chuan a rilru a la luah lem lo hle. A chhan chu rûn an tawk khatin a pa te ho vanglai hmang mek an ni bawk a khaw dang reng rengin an hmelma nih an chak lem lo.

Ni khat chu mak tak maiin khuaah chuan pem thar an rawn lut sup sup a, an han hriat chian hnu chuan Darchhep khaw mite niin an khua chu inrûnnaah an chân a, an Lal pawh. Chu vangin, Zehtet leh Bualthleng lama insem darh turin an rawn kal a lo ni. Chu ta chin chu Lianmawia pawh a pa Thangkunga te in lamah a chuangkai nasain a pa Hrilkunga lahin a duat em em bawk nen nuam a tiin a chang phei chuan an kalna apiangah a zui ve chawt zela, mi te chuan "Kan pasalṭha fapa Lianmawia zawng pa a ngah teh e" an ti fiamthu ṭhin a, a ni reng lah taka Chhuahchawnga aihnahphahpui te tana Lianmawia hlut zia hi anmahni chauh lo chuan an hrethiam phak ngai dawn lo a ni. A lo hleikân leh deuh hnu chuan thil awmzia rawn man chhoin an khua leh Bualthleng khaw ṭang dun chu hman ata tawh leido nei reng an nih thute, hmar hnam mite nena an inhmelmâkna te chu a rawn hrethiam chho uaih uaih zela, a pu Chhuanthanga kiangah ṭhuin vanglai chanchin a hrilh te leh pasalṭha hmingthang tak takte chanchin a han sawi chu ngaihnawm a ti thei em em a. A pian tirh ata a pu tia a hriat chhun Pu Thanhranga a thi tawha a ni bak kha pu nei lo a ni bawk nen, a pu Chhuanthanga chu a ngaiin a lam deuh chhen reng mai ṭhin.

Ṭum khat chu thu dengkhawng tak mai chuan Zehtet mipuite chu vêlin khaw laia lo ṭap hlawp hlawp tawk lah bo lo. An Lal ang chiaha an lo en, an ngainat em em,Lusei Lal ropui Dohranga, Bualthleng khaw Lal thihna chuan a deng na hlawm hle. Lianmawia chuan Lalpa Dohranga chu hmu ve tawh mah se a nel hman hauh lo a, tin, han tawrh ve vak dân pawh a thiam lem lo hle. Mahse a pa te Bualthleng lama va kal lo haw leh inkawm khawmin "Tunah chuan hmelma ho tan kan zuamawm lai tak a ni" an tihte chu a hre ru ve khiau a, hmelma han beih vêl chu a chak tharin puitlin vat vat chu a chak rilru hle mai. Hlim takin hun leh nite chhiar ve ṭhin mah se an chhungkaw chungah lungngaihna chhumpuiin thla a zar ta tlat mai si, a nuin a nau tur a chhiat ta tlat mai. Pawi a ti hle a mahse a thiam ang tawkin a nu chu a hnêm a "Ka nu, inthiam lo duh reng reng suh, ka awm hi" tiin a nu chu a thiam ang tawkin a duat ve a. Mahse, a rilru chhungrilah erawh nau awhna a lian ve tawh hle, a pa Thangkunga fanu Sentei erawh a nau ang tak taka enin a duat ve thei hle thung a, Sentei a rawn lan tawh chuan lên san loin a awm ve chawt ṭhin.

A han lian chho zêl a, a naupan tet aṭanga amaha inphum tlat, huaisenna leh pasalṭha thisen, tun hmaa a chhe zawng leh midang rikrap zawnga a hman ṭhin chu a ṭha zawnga hmang ṭanin thangkam a thiamin a kut a hmui bawka, a pa sairawkherh siam sak lah a chulnel nasain sa tenau deuh hi chu a awk ve renga, a sava perh thlak lah a tapah an rep tlar dul reng mai zel bawk nen a pa pawhin a chhuang ru ve thei hle.

Ni khat chu Zehtet khaw lamah chuan mikhual tlangval tam tham zet rawn lutin an hma hruaitu pasalṭha tih hriat zet la naupan hmel tak chu an en duh tlâng hle. Lal inah lutin Upa Chhuanthanga'n Pasalṭha Kapthanga hmel ngui tak a hmuh rual chuan "Ekhai, Kapa eng pawipang nge thleng ta" a han ti nghal thawr a, Lalpa Puithanga chuan "Ekhai, Chhuana, kan pasalṭha te hi han hahdam phawt se la, an thu rawn ken chu an sawi mawlh ang" a han ti a Upa Chhuanthanga chuan "Ni tak maw. Lalpa mi ngaithiam teh u" a han ti a Lalpa Puithanga chuan "E, eng pawi mah i sawi lo e, i naua hi i ngaihtuah hle tih ka hria alawm" tia chhangin tlangaupa chu Kapthanga te tan tiin zu bel a chawi thlak tir ta a. Kapthanga te thu rawn ken an hriat rual chuan Lalpa Puithanga chuan Bualthleng khaw lamah palai tir vatin an ni pawh an inbuatsaih nghal chuk chuk a. Hmar hnam hoin phuba lak tumin an khua an rawn pana Darkawn khua pawh an bei tawh tih thu mipuiin an hriat chuan an ralṭi hlawm hle mai. A hnu zan khat a ral leh meuh phei chuan mipuite chu Pasalṭha Thangkunga leh Pasalṭha Chhuahchawnga te chuan mipuite chu Bualthleng khaw kal khân lama in awmah te chuan an riah khawm tir an rawt ta a. Lianmawia erawh ral bei rual a la nih ve loh avangin a nu leh a pi bulah awmin a pa'n "I nu leh i pi hi i kutah ka dah a nia" a tih chu a bengah a ri nawn tlut tlut a, eng pawh lo thleng thut se inring taka hmachhawn turin a pa sairawkherh siam sak chu a chelh ve rân a. Hmar hnam ho an khaw ram china an awm tawh miau avangin tlangval ho chu an inring ru hlawm hle a, mahse mipuite tih ralṭit erawh duh loin pangai thei ang berin an awm thunga.

Zan riah kil lai chuan Lalpa thu chhuak chu tlangaupa'n rawn puangin khaw mipuite chu puar pawh puar mang loin khaw dai lama bihruk hman loh hlauin an kal ta hlawk hlawk hlawma. Nu ho lah an fate koin an râk chêl chûl a, pa ho lahin an nupuite ṭuan muang chu an vin leh ṭhawt ṭhawt ṭhin. Mipui an chhuah fel hnu lawkah chuan tlangval ho pawh lem chan hna ṭanin nula rim ang maiin nula awmna inah lut khawmin thawm an chhuah nasa hle a. Chu an lemchan chu a hlawhtling hle, hmar hnam hoin enthla tu ni tûra an rawn tirhte pawh thlamuang takin an inkulhna lam panin an haw ve ta a. Leng hawn ar khuan hma deuhin Bualthleng tlangvalte chu an pasalṭha chhuanvawr Chawiliana leh Thansanga te ṭhian thum an lo thleng a. Khaw chhungah lutin Hmar tlangval ho lo lambunna remchang zawngin Zehtet tlangvalte nen chuan khaw dai lamah an chhuak ta sap sap a.

Zanlai ar khuan hma deuh chuan Pasalṭha Runthanga hoin Bualthleng tlangval tam tham tak an rawn thleng leh bawk nen, Zehtet khuate chuan chak loh an inring tawh lo reng reng a. Ar a khuan hnu lawka silai puak ri ṭhuai ṭhuai chuan Zehtet khaw mipuite thinphu chu a ti rang hneh kher mai. Lianmawia pawhin a nu beidawng taka ṭhu kun lap chu enin a khawngaih ve hle a "ka nu, ka pa chu dam takin a lo haw ziah kha. A lo haw leh em em ang" a han ti a Ṭhasangi chuan a fapa chu duat taka chulin "Ni e, Taite, i pa chu a lo haw leh dawn alawm" tia chhangin a fapa chu a kuah a. A rilru chhungril erawh hlauhthâwnna in a khat thung. Silai ri chu a nasa telh telh a, a rei telh telha a tawpah phei chuan a reh ta duak a, chu veleh putar pakhat rawn ṭawng chhuakin "Pasalṭha Runthanga te khan va pawh hman tak ang maw" a rawn ti a, mipuite chuan chu zawhna chu an inzawt nawn tluk tluk hlawm a,an thinlungah chuan hlauhthâwnna a intuh nasain tumah han muhil thei pawh awm hek suh.

 Zing khawvar hnu lawkah chuan Pasalṭha Thansanga te rawn kalin an rawn ko ta a, mipuite chu hrilh nawn ngai loin hnehna changtu an ni tih chu an inhre ṭheuh a, Ṭhasangi pawh Lianmawia kai chungin Dammawia kiangah chuan a kal ve hnak hnak a. "Dama enge chanchin?" a han ti a Dammawia chuan lo hrethiam vatin "U Sang, U Chawnga a ṭha e, U Thanga erawh hliam chhe te a nei ve a" ti a chhangin a ngawih san a, Lianmawia chuan "Anih leh Ka pa Hrila ve?" a rawn tih chuan Dammawia chu ral hla tak thlirin Ṭhasangi chuan Dammawia mittui khap per sak chu hmuh hmaih loin a fapa chu "Taite khua kan lut ṭep alawm" tiin a han ṭawng thlamuana mahse Thansanga chuan "I pa Hrila chu i hmu dawn nia lo kal rawh" tiin a kai sawn a. Khua an va luh chuan hnehna changtu an nih avanga lawmna au aw leh, an fapa, an unaupa, an pa te an chân avanga ṭahna aw rawlte chuan khua chu a luah khat a. Lianmawia pawh a pa Hrilkunga ruang chu en vang vangin a rilruah erawh hmar ho huatna chu a intuh nghet hle. Hmar tlangval la dam ho chu han sah ve sawk sawk mai te pawh a chak hle maia, han ṭhan len thuai thuai a châkna chu a nasa zual kher mai.

Hmun khata Hratzuala'n a u Hratzaua ruang a lo ṭah lai chu hmuin a pan vata, rawlthar zawlbuk kai hlim hlawt, chutia nunna chân zinga a tel chu chhung leh khatte tan chuan a na dawn hle. Hratzuala darah chuan chelhin "Zuala, phuba chu kan la la ve em em ang" tiin a hnêm ve a. Ral khat aṭanga lo thlir rengtu a nu leh a pa chu va hmuin a han nuih saka. Chhuahchawnga pawhin a nupui bulah chuan "Ka fapa sawn mi la rawn khum ngei ang, a hmela thinrimna sawn hmar ho tan a la hnawksak tir dawn khawp" tih pahin a nui vur vur a, a nupui lungawi loh hmel zet chu a piai zeuh bawk a. An boruak chhe zual puite'n kian san zai relin Darkawn ho pawh an khaw lama indin thar leh duhin an haw a, Zehtet khuate pawh nun pangaiin an nung chho leh mawp mawp tawh a, hmar tlangval ṭhenkhat erawh an pasalṭha Rumzaliana hoin an la kawl thung.

Tlai khat chu Lianmawia pawh a pa kiangah sava veha kalin khua aṭanga hla lem lo takah kal dunin ral tlân an han chânga, ni a hniam ṭan ta maw tihah chuan sava pawh rawn kai ṭanin Lianmawia chuan a sairawkherh hman thiam zet mai chuan a perh thla zung zung a, kar loah an chhungkaw eikhawp ai tam fe chu a perh tla ta mai reng a. A pa chuan "Taite, khi lai thingkung bulah khian lo han awm la, ka zu chhar khawm ange" tiin a kal sana, chu tia a kal tâkah chuan Lianmawia chuan a sairawkherh chu chelhin a han pawt fan vela, hmun hran hran tin kualin, sava lo chhuak thut se, tih mai maite ngaihtuahin a tin kual chhên a, an thlang lawka luiluang chunga thil che zauh chu hmuin a han en vata. Chu tah, an hmar tlangval mante tlan chhuak lai chu zu hmu chatin a pu Chhuanthanga'n "Pasalṭha dik tak chuan midangte puihna a dil tur a ni lo, tlawmngai tak chungin a hmaa awm chu mipa takin a zo fel tur a ni" a tih ṭhin kha hre rengin a pa pawh ko duh loin a um zui ru ta a. An zingah hliam tuar an awm bawk nen Lianmawia chuan thui lo teah umpha thuaiin an hnung lawkah a kal ve zêl a, an riahna hmun thleng zui chu a tum ruh ve hle. Mahse, a kal thui zêla khua a thim hnai ta tlat mai. A ni em em tawh lo e, tiin a let ve ta a. A hmaa a awmna a va thlen chuan a pa a lo awm hauh lo mai, vawi hnih vawi thum vel a han au a, chhangtu an awm si lo ngaihṭha lo tak chungin a lo nghak ta ringawt a. Zanriah kil hun lai vel chuan a thlang lama patling rawn hei ha chho ri chu hriain inring takin a lo awm a, tuibur hmuamda hnu velah rawn thlengin a pa a ni tih a hriat chuan a lawm rilru hle. "Ka pa" ti a koin ban a han vaia, mahse a rin loh takin a pa chuan "Khawiah nge i kala? Ka zawn nasat zia che hi i hre lo em ni?" tiin a rawn vin ta tuar tuar mai, chhan let duh hle mah se, "Ih Ih" a ti hman ṭawk tihah a pa chuan "Engmah sawi loin haw nghal ang" a rawn ti leh bawk si, hlau khur ru der der chungin a pa chu a zui ta a.

Kawtchhuah an han thlen chuan leng len ar a khuang der tawh maia. Chhuahchawnga chu inngaihtuah fimin "Taite, naupang i la ni a i bo emaw tiin ka mangang hman lutuk alawm, khatiangin min hrilh loin kal bo tawh miah suh ang che" a han ti a Lianmawia chuan "Ka pa,kan thlang kawrkamah khan tlangval inman ho kha ka hmu a, dam lo pawh kha an kuaha a tel ve nghe nghe a, ka enthla chak lutuk a" a ti ta phawng mai. Chu veleh Chhuahchawnga chuan Lianmawia chu pawm lawpin "Taite hmanhmawh a ngai anih chu a va pawi tak em" a han ti a, in an thlen hma deuh chuan Țhasangi khawlaia lo ding reng chu hmuin Chhuahchawnga chuan chanchin a han hrilh sawk sawka "Sangi Thangkunga rang takin va hrilh la, Lal in lamah lo han kal bawk ang che. Hmanhmawh a ngai a ni, Lal in ațanga i let leh velah rang takin insiam la, ral lo thlen thut huna tlanchhuak vat turin inring reng ang che" tih pahin khaw daia rip an siam, an mimante an dahna hmun chu panin a tlan nghal sawk sawk a.

Ṭhasangi pawh Lal in lama a kal hnuin in lamah hawin Lianmawia chu an thil tawn chungchangte zawtin a han thlem kuala, Lianmawia erawh a pa thinrimna khan a ti hlau tak zet tih hriat takin a hmel a dang bei a, a phu leh zuk zuk ṭhin a. Paihte hnam hoin Hmar hnam ho phuba lak sak turin an pasalṭha Singlawia leh Chawngzaua hoin an rawn rûn dawn mêk a lo ni a, naupang Lianmawia'n a khua a chhanhim a tih theih awm e, Darkawn khaw lam erawh an rûn hlawhtling tawh ngeiin a rinawm.

Chu zân chuan inbeihna rapthlak tak hring chhuakin khawi lam veve tawh thi an tamin an inchân nasa hle a, Pasalṭha Thangkunga leh Pasalṭha Chhuahchawnga pawhin paihte pasalṭha Chawngzaua leh Singlawia te chu hneh mah se hliam an tuar ve ve a, pasalṭha tuarchhel tak ve ve ni mah se an tawrh chu an din pui thei tlat bik lo. Pasalṭha pahnih chân tawh ni mahse paihte ho chuan an tam hneh hrim hrim a kar loah Zehtet lamte chu an inpe ta a. Paihte ho chuan khua rawn luh duh teh mah se, an inchân nasain fing taka rorel thei an awm si lo, khaw hmun nghak tlangval tha thar hlak hmachhawn leh chu an zuam tawh ngang lo ni tur a ni, Zehtet tlangval ho chu phuar hlawmin an khaw lam panin an kal pui ta a. A tuk chhunah chuan Pasalṭha Runthanga te rawn thlengin khuaah rei pawh awm loin inbeihna lam chu fimkhur takin an pan nghal a. Zehtet khaw mipuite chu hlauthawng reng rengin khaw chhungah chuan an tawmim ṭhiap reng a. Rei loteah tlangval sawmnga vel rawn let lehin Zehtet Pasalṭha chhuanvawr Thangkunga leh Chhuahchawnga hliam na tak tuarte chu an rawn zawn haw bawk a.

A nu ṭap ri feih feih dara dawm chungin Lianmawia chuan "Ka nu, ka pa hi a dam leh dawn alawm. Kei hian ka pa te phuba hi ka la la vek ang" tiin a insehruh ṭeuh a. A bula ngawi renga lo ding Hratzuala chuan "Lianmawi i ṭhian atan min pawm leh anih phawt chuan phuba i lak duhna hmun apiangah i kaihza vengin ka kal ang" a rawn ti ve sak bawk a. Upa Chhuanthanga chuan Lianmawia te pahnih chu chhuang ru tak chungin "Tunah chuan inla nau deuh hlek a ni. Kum han vei leh se zawlbuk kai pawh in hnaih ve tawh ngei ang. Chu tih hunah chuan ka la dam ve anih chuan intan ka awm reng ang" tiin an dârah chuan a rawn beng thak thak a.

(LIANMAWIA ṬHAN LEN DÂNAH HIAN BUALTHLENG MAWITU A ZEHTET HO LANNA KHA A TEL LEH SI LOH CHUAN A DIK DAWN SI LO A. BUANGTHLENG MAWITU ANG EM EM A CHICHIARA TI LEH TUR CHUAN A HARSAT TAWH BAKAH HE THAWNTHU HI CHU LIANMAWIA PUAL BIK ANIH AVANGIN KA HRUT THUAK THUAK CHAUH DAWN A, CHU TIH RUALIN BUALTHLENG MAWITU THAWNTHU A ZEHTET KHAW LANNA A TAM EM AVANGIN LIANMAWIA HI A ṬHANGLIAN HAR HRET A NI.)