PASALṬHA LIANMAWIA BUNG - 21

Thlasik thli a rawn thâw ṭan a, naupang tual châite pawh ri ve nak nak ṭhin mah se rei lo têah khabe inkhawng dat dat chungin an ding khur leh hlak hlak ṭhin a, an chaw ṭhing kente chu an keng khur hlak hlak ṭhina, a khat tawkin an zu keih leh pawk vei ṭhin. Nula buhdengte pawh nipui lai ang ngawtin an tha a kal na mai thei lo a, thli rawn thawt ruala an hmulthi a han din sur sur phei chuan pasal neiha an kianga han mut lum veng vengte pawh an thlahlel hial ngei ang. Lianmawia pawh chu zing ni chhuak eng mawi tak hnuaiah chuan a pa silai, tûna ama ta ni ta chu hru fai hliau hliauin a rilru a kâwm pah melh melh bawk a, Chhuansangi hmelte han mitthla kualin amah chuan a nui leh suk suk vei ṭhin a, amah chîk taka lo en rengtu a nu chuan ner sak chungin "A eng chu hria che ni maw, kha tia i han nuih tâk suk suk mai le" a han ti a, Lianmawia lah chu hre âwm pawha awm loin a thil tih lai chu a tih zawm mawlh mawlh a. A pa rawn tho chhuakin "Kha vawin chu khawi lamah nge tei chhuah i tum a?" a rawn ti a, "Han tinzawn deuh bîk pawh ka nei lem lo, Mana te chul lama chawhmeh lâk pahin 'i vak harh mai mai teh ang u' kan ti deuh anih hi" tia chhângin a silai chu a en dik leh mawlh mawlh a, chu tih lai mêk chuan Liansanga rawn tei lutin "E khai, khawi lamah nge vah in tum deuh a" a rawn ti ve nghal a, Lianmawia chuan "Chul lama chawhmeh lâk paha han vah harh deuh mai mai kan tum anih hi. U Lian i vâk chhuak khât tawh si a, lo tel ve ta che, i hnung zawng kan zui zo hauh lo anga, mahse, min kaihruai a ni ang chu" a rawn ti a, Liansanga chuan "E, nangni zawng keia tluk rual in ni lo ve, mahse, ka vah chhuah châkna a rei tawh bawk a, rawn tel ve pawh ka pawi ti lem lo" tih pahin Chhuahchawnga lam chu a pan san ta a.

Lianmawia chuan Liansanga leh a pa muk tak leh zâwi taka an phun sep sep ri chu hriain enge an sawi hre châk hle mah se puitling tîtîna a va inrawlh a mawiin a hre lo a, tuibur hmuam da hnu vela Liansanga rawn chhuak hmel chu chîk zetin a lo en a, mahse, engmah danglamna a hmu si lo. "Ka va insiam ve ange, min lo nghah deuh pawh ka ngai mai thei a nia" a rawn tih chuan lo bu nghauhin inchhung lamah a luh san ve ta a.

Tukṭhuan kil lai chuan Chhuahchawnga chu muangchânga rawn ṭawng chhuakin "Niliani a dam ṭha lo riau mai a, saza sa a ei châk thu a sawi a ni âwm a, i u Liansanga khan ram chhuah puia mi rawn sawm a tum deuh a, mahse kha nangni chhuah in lo tum ve tâk siah chuan in kianga kal ve kha a thlang ta zawk anih kha. Rûna a awm tawh lo hi chu a pawi teh mange, a nupuiin dam ni hmel reng a hmu thei meuh lo tihte hi lo hre ve tak ang maw. A fanu Vânthangpuii saw Lalpa Rengliana'n rawn hruaia a hnêna a fanu anga awm tîr a duh a ni âwm a, a fapa erawh kan hnenah pawh a awm thei a, Liansanga hnenah pawh a awm thei bawk. Niliani taksa chîk taka ka en hian rei a daihin ka ring hauh tawh lo, a pasal sûn hi a la na mah mah a ni. A pawi teh e, kan Lalpa lah heti hi a ni si a"a rawn ti char charh a. Lianmawia chuan engmah sawi lem lo mah se a nu Niliani chu a khawngaih ve hle a, a nuin "Mipa ho hi zawng in buaithlak anih hi, rammutnaa silai leh chem nen hmelma inhmachhawn lai hian in lamah nangmahni ngaihtuah luat avanga mutmu pawh tuah hlei thei lo kan awm tih in hre ngai tawh der si lo" a rawn ti hlak hlak a.

Lianmawia chu tlai bîk nih hlau taka kawtchhuah lam panin a va thlen phei chuan Zamana chauh a lo la awm a, tuibut hmuam da vêl an nghah hnuah Hratzuala leh Liansanga te pawh chu an rawn inzui phei ve hnak hnak a, Lianmawia chuan" Ka nu Niliani chu enge a an tawh a? "a han ti a Liansanga chuan phûr hmel takin" A zia viau e, ka rawn chhuah dawn pawhin hlawhtling ngei tûrin mi rawh chah kha"a rawn tih chuan Lianmawia chu a thaw huaia, ti chuan an pali chuan ram lam panin an kal chhuak ta a. Zamanate chul an zuk thlen chuan chawhmeh awm ang angte la khawmin an inpeih fel meuh chuan ni a hnîam ruih tawh a, chawhma kal vel zet anih ve avângin an duh angin an che sawk sawk thei lo a ni.

Liansanga chuan "Aw le, kei leh Zualate kan vak dûn anga, Liana leh Mana te kha kal dûn bawk u la, leng hâwn ar khuan hun âwm velah chuan he lai hmunah hian intawhkhawm kan tum dawn nia, zanin chu Mana te thlam hluiah hian i riak phawt i la, naktuk zing khawvar rualin khua kan pan mai a ni ang chu" a rawn tih chuan an lu lo bu nghut nghutin an duhna lam panin an kal hrang ta a.

Unau hmel hai hun a ni dêr tawh a, Lianmawiate chuan an piah lawka Saza chal kal ngût ngût chu kah tumin an pan hnai ve zêl a, Lianmawia phei chuan a nu Niliani ei atan kah a châk em em a, an kah loh mai a hlau hle a ni. An duh anga an hnaih theih tâkah chuan chu saza chal chu an rin aiin a lian daih mai a, kah tuma an han tin vang vang lai tak chuan thawm lo awmin an sa pelh lai pawh chu a che sawn leh ta daih a, thâwm dîm taka an han nghah vang vang hnu chuan chu saza chal bulah chuan Saza tuai pakhat hi a rawn lang nawlh mai a, Lianmawia chuan a chal zâwk chu kah châk hle mah se, a sa zawng zawng an pahnih maia hawn a theih dawn bawk si loh nen Zamana chu mitmei zeuhin a tuai zawk chu kap tûrin a han ti a, Zamana chuan Lianmawia zawk chu kâp tûra lo ti ve thungin a silai chu a tun san ta daih bawk a, Lianmawia chuan lawm takin a silai chu a han lek kâng a, saza tuai zawk chu tin vang vangin a silak puah dur rual chuan a chal zawk chu chak takin a thlenchhe nghal a, a tuai zawk erawh Lianmawia ngênmu a zakdawh taka lut avang chuan a dinna hmunah chuan a tlu reng mai a. Lianmawia chu a lawm hle mai a, a sa kah chu hawn thuai thuaia, a nu Niliani dam lo han ei tîr mawlh chu a châk tawh hle. Innghahna tûr a an sawi lam pan chuan an kal vat vata, an va thlen chuan Liansangate pawh lo thleng ve tawhin Sakhi pakhat an lo kâp ve bawk a. Lianmawiate saza kah an han hmuh chuan Liansanga pawh chu a lawm ve hle mai "E khai, kan vah chhuah hun a tlai tawh si a, kan hlawhchham angah ka lo ngai hial hman tawha, in ṭhian dûn zarah ka u pawh a hlim ve ngei ang" a rawn ti chhuak sap a.

Zing ni chhuak chuan Zehtet khua chu rawn chhun engin Lal in leihkapui lama upa ho nilum puak chunga titi chu a mûk hle a, Kâpthanga'n a rawn zawm ve hnu phei chuan an thawm an dîm zualin an ṭawng zâwi tawh hlawm hle. Chhuahchawnga pawh a nupui ei rêlna dâl tawk vel leka tap meilum aia ṭhuin a khat tawka Ṭhasangi ang leh hlak hlak ṭhin chu a nuih suk suk duh chauh a. An kawngkhar rawn inhawn rawk rual a Ramtei rawn lut nghal rawk rawk a hmuh chuan mak ti takin a lo en nghal haw a. "Ramte eng pawipang nge thleng ta?" a han ti a Ramtei chuan thaw hlawp hlawp chungin "U Chawng, ka u a chau lutuk" tih chauh sawiin a mittui chu a luang nghal zawih zawih a, Chhuahchawnga te nupa chu hmanhmawh taka tlan chhuak nghalin Liansanga te in an va thlen chuan midang pawh an lo lut ve nual tawh a, khum a Niliani hmel nung lo tak, dâng em em bawk si kianga Thangkunga te nupa lo ṭhu chu pan vatin Chhuahchawnga chuan "Kunga enge thil awm zia?" a han ti a, chu tih lai tak chuan Niliani chu rawn meng diar diarin, a chau hle tih a mitmengah chuan a lang reng maia "Chawnga, Kunga, in ṭhianpa bulah ka kal ve a hun tawh a ni" a rawn ti sap a, Chhuahchawnga chuan "Ekhai ṭang hram hram rawh. I nau pawhin i tan saza sa a rawn hawn ngei ang. Inti pachang ta che" a han ti a, Niliani chu zawi muanga rawn ṭawng lehin "Ka fate hi lo thlahthlam suh u aw" a rawn ti chhuak sap a, a kâ ânga ṭawng leh tum mah se a chakna chuan a tlin ta lo. Ramtei'n "Ka u, i tello te chuan engtin nge kan awm ang? ti a a rawn ṭah rawih rawih rual chuan Ṭhasangi leh Biakliani ṭap chuan zui nghalin Biakliani'n" Ka nau, ka nu leh pate kha min lo biak rawh aw"a rawn tih rual chuan Vânthangpuii te unau chu lo ṭap ve nghalin mipui zi nuai nuai kâra Kapthanga rawn lut ve chuan Niliani kut chu rawn hmer vang vangin "A va pawi tak em, U Rûn i nupui a lo kal hi lo hmuak rawh aw, i fate chu lo ngaihtuah suh an nu leh pate kan la dam hi" a rawn ti chhuak sap a. Pawnah chhuak lehnghalin tlangval ho chu Bualthleng lama kal tûr leh Liansanga te ko tûr tîr nghalin Runthanga tana a tih theih tâwk chu ṭha takin a ti nghal zung zung a.

Liansanga te pawh rawn kal ve zêlin nidanga an ram chhuah ang em em a hlawhtling ni lo mah se, ni dang anga an hlawhtlin loh chhanin a zir bawk a, an hlimna a nep bîk chuang lo. Tûkṭhuan te kawng laka sakhi sarep leh a chek nen an han kil leh meuh phei chuan an puar tlângin an pum an chul heuh heuh hlawm a, khua an hlat tawh lem lo bawk a, muangchângin an kal bek bek a, chu tia hlim taka an kal ho lai chuan an hma lawka an khaw tlangvalte hmel phelh phang chunga rawn lang an hmuh chuan ding datin Liansanga chuan "Ka u" a ti chhuak sap a, hmanhmawh taka tlangval ho chu panin "Ka u chu a kal ta a mi?" a han ti a, tlangval ho chuan sawi hreh hle mah se an sawi lo thei si lo, chu veleh Liansanga chu a thil ah lai zawng zawng dah thlain khaw lam panin chak takin a tlan nghal a, Lianmawiate chuan umzui ve nghalin, Liansanga chuan a vânglai tha a la thlah loh zia chu a mawngphe pawh an hmuh hman loh dânah an hre chhuak thar chiang hle.

Liansanga'n an in leh a vela mipui lo zi mur mur a hmuh rual chuan hmanhmawh taka tlanin an luhka chu a han rap a, in chhung lama a u Biakliani ṭap rawih rawih thawm a hriat chuan ding datin an unau zâ a Bualthleng khuaa hlim taka an awm ho laite chu a mitthlaah a lo lang zut zuta, rûn an tawh hnua a u Niliani'n Zehtet lama awm a, an makpa Thangkungate va belh phawta inbenbel mai a duh thute a sawi vanga Zehtet khua an pan laite, rilru hah leh na taka a awm laia "Indawmkun reng mah ta che, i nupui fanaute tan inti pachang la, bul kan ṭan thar leh dawn alawm" ti a Niliani'n a fuihnate chu a bengah a rawn ri nawn awn awn a. An inchhung a va luta khuma a u ruang bawh chunga a nupui Ramtei lo ṭap hawm hawm a hmuh rual chuan muang chânga pan pheiin a u ruang bulah chuan a ṭhingṭhi rawp a, a u Biakliani'n a lo ṭah khum bawrh bawrh lai chuan a mittui chu a rawn sur ve nghal zung zunga chutah "Ka u, i ei châk zawng sawiin ka ram chhuak tûr pawh hlawhtling ngei tûrin min chah a ni lawm ni? Ka kal dawna i dam ṭhat tawh vei nen, ka nau Lianmawia'n i ei chak em em kha a kap a kan rawn hawn sak che a sin"tiin a mittui chu a dir nghal zawih zawih a.

Niliani ruang an han phum fel a, Zehtet khua chu a ngui ruai maia hmanni lawka lo pêm mah ni se he khuaa piang leh sei lian a tleirawl hnu lawka pem chhuak an nih avangin khaw mipuite chuan an khaw mi hlun pangaiah an pawm veka an lainat hlawm hle a, he khua ngeia a naupan laia a tual châi ve ṭhin lai hre phakte phei chuan an khawngaih zualin an mittui an hru mawlh mawlh hlawm a, a fate pahnih Vânthangpuii leh Rûnthanga thih hnua piang a fapa Rûnliana tual chai rual em pawh la ni lo chu mipuite chuan an khawngaih hlawm hle.

Lalpa Rengliana'n Niliani thih thu a hriat chuan pawi a ti hle mai a, a tho lawka insiam nghal mawlh mawlhin a nupui lo insut hraih hraih chu kuahin "Ka kal ange, a ruang chu phum fel tawh mah se Rûna a zahawm emai. A fate pawh ka kianga rawn awm an duh anih phei chuan ka rawn hruai haw anga, fanu leh fapa thar kan nei leh a ni ang chu" tiin a chhuak ta nghal a. Lal Rengliana'n Zehtet khua a han thlen chuan Liansanga te pawhin an khawhar hnêm tu in leng an nei tlêm tawh hle a tlangval in riakte erawh an la khat tlat thung. An khaw pasalṭha ni lo mah se an khaw tana nun hlan huama lo bei ṭhintu nupui anihna chu tlangvalte chuan an zah hle.

Zan lamah Lalpa Rengliana leh Liansanga chu leihkapuiah inkawmin Liansanga chuan "U Reng, i inpekna chu keini tan chuan a tluka lawmawm a awm hauh lo mai. Mahse, ka u fate hi enkawl ngei ka duh a ni" a han ti a, Lalpa Rengliana chuan "Ni e ka hrethiam lutuk che. Mahse, nakin lawkah an lo hleikang anga ṭhian kawmin tual an la chai ve ngei ang. Chu tih huna nu leh pa nei lo ti a an rual puite hmuhsit an tâwk mai tûr hi ka ngaingam lo a ni. Liana ngun takin inngaihtuah la, kei hian ka fate ka en ang chiahin a nia ka en dawn ni. "a han ti a Liansanga chuan dik a ti hle a, a u fate an nih angin an unaua enkawl chu koa tlaah ngai hmiah mah se, nakin lawkah mi hmuhsit an la tuar anga a rilru nat pui tu tur ber a ni tih pawh a inhre chiang hle. Ngun taka a ngaihtuah vang vang hnu chuan Bualthleng khaw lama kal tir chu a phal ta hram a. Amah ngei pawhin Bualthleng khaw lama inbenbel leh chu duh viau mah se in leh lo he lamah a nei ve tawh si a, bakah a u Biakliani'n a hauh ve bur tawh bawk si. Mahse Lalpa Rengliana hian a en hrang dawn bîk hauh lo a ni tih chu a ni aia hre chiang an awm kher lo ang.

Vanthangpuii chuan Rengliana a ngaina sa bawka Lalpa Rengliana'n a han thlem a han thlem hnu chuan Bualthleng khaw lama awm chu a châk zâwk zamah ta a, Rûnliana erawh a naupan ang ngawta â a ni hauh lo, a u chu hauin "Ka u, Lal inah kan awm ve thei hleinem" a rawn ti reuh a, Lalpa Rengliana chuan hnuk ulh ṭun chungin "Taite, ka fapa ve tho alawm i nih. Bualthleng khaw Lal fapa huaisen i la ni dawn a lawm rawn kal ve mai rawh" a han ti a Vânthangpuii lahin a chak tawh bawk si nen Runliana chuan a aw ve ta a.

Lalpa Rengliana haw ruala an kal tûr chu Biakliani te chuan mangṭhain Vanthangpuii te unau mit hmuha an mittui tih tlak an hreh si chu ṭawng pawh an ṭawng ṭha thei meuh hlawm lo. Vanthamgpuii te unau lah Lal Rengliana'n a sawi phur pui thiam bawka an hrehna te a bo vek tawh a, mahse zan tin a nu kianga mu ṭhin an nihna angin zân lama mut an harsat hle a, Vânthangpuii phei chu a rawn ṭap chhuak leh ringawt ṭhin bawk nen an ngaihtuah hlawm hle.

Ni a liam zêl a, Zehtet khua pawh a hma ang bawka rawn pangai leh tawhin Niliani leh a fate chanchin pawhin sawi zui a hlawh lo tial tial a, Liansangate chhungkua erawh an lusun khawharna chuan kian san zai a la rêl lo hle. Bualthleng khaw lamah erawh Doliana leh Vânthangpuiite han inhmu leh chu rei lo têah an inkawm tlangnêl thuaia Lalfapa naupang zawk Ngurdawla leh Rûnliana te pawh an kum a inrual dûn bawka rei lo têah an innel thuaia, Lalpa Rengliana chuan unau an nih thute hrilhin nakin zêla a fate'n Vânthangpuiite unau an en hran mai lohna'n unau an ni tih an naupan at lai hian an rilruah tuh sak a tum tlata, a hlawhtlin pawh a hlawhtling hle. Lalnu Sangzuali pawh a hma aiin buai deuh mah se fanu leh fapa thar a neih tâkah chuan a hlimna a zualin a duat hlawm hle a, an fate lo ṭhan len hun tûr chu suangtuahin a pasal kiangah chuan sawi nuam a ti ṭhin hle. Rûnliana'n a hawi her leh mizia bâkah a ṭawngkauchheh dan thlenga Rûnthanga a chhûn lutuk chu Lalpa Rengliana mittui ti tla ru tu a ni fo a, Doliana erawh a ṭawng duhin fiamthu a duh em em a, an chhungkaw ti hlim tu ber pawh a ni. Ngurdawla erawh a mizia a hrang hlak bîk a, a unaute kianga a awm loh laia a awmna ber chu a pa leh khawnbawlte tîtîna kiangah niin a pate ho tîtî chu a ngaithla ve khiau ṭhin a, Rengliana pawhin "Ka lal ṭhutthleng la luah tu tûr. A pu Dohranga anga Lal ropui tak la ni tûr ti rilruin a chhuang thei hle."

Zehtet khaw lamah pawh an hun hman dân ngaiin hun an hmang chho ve zêl a, an rin ai taka Lalpa Puithanga a rawn ṭhat chhoh leh tâkah chuan mipuite chu an lawm hle, mahse, Kapthanga leh Liansangate rilru erawh hlauhthâwnna in a khat tawh thung. Niliani rei tak a dam loh hnuah a rawn ṭha chho leh ṭana, mahse, mak takin a thi ta thut anih kha. Lalpa Puithanga phei chu a kum a tamin a taksa a bawhsawpna a rei tawh si a, an hlauthawng lo thei lo a ni. Mahse, khuanu hian fel takin hringfate chungah ro a rel ṭhin miau a, hringfate tih theih zawng chu zaidawh taka lo nghah a ni.