PASALṬHA LIANMAWIA BUNG - 5

Lianmawia haw chuan an luhka a han rap a, inchhung lama a nu uak deuh ṭhat ṭhat ri a hriat chuan lawmna leh hlauhthawnna a nei nghala, a nu hian a hmaa nau a chhiat hnuah khan vawi khat lai a chhiat nawn leh tawh a ni si a, nau awh ve em em laia a nu berin a chhiat zel si avangin a hlauthawng rilruin tun ṭum talhi chu khuanu hian vanneihna min thlen ve tawh se aw, a ti rilru vawng vawng a.

Inchhung a va lut chu a nu chuan lo be nghal sawk sawkin Lianmawia chu zawlbuk chungchangte chu a lo zawt nghal a, Lianmawia pawhin ṭha taka chhangin a pa rawn tho chhuak mêk chu biain "Ka pa, kum hmasa lama kan lo bawh ram piah lawkah khan Mana te'n sih an lo zu hmu pek a ni âwm a, chul kama kal pahin zan nga vel riakin kan zu châng ve ange kan ti deuh a, i rem ti em ang chu maw?" a han ti a Chhuahchawnga chuab "Rem tih loh thu awm lo e, a naupang ber i ni a, an thu hnial hauh loin zu awm ang che" tih pahin tuihmun lam a pn phei nghal a.

Lianmawia chu lawm tih hriat takin a pa silai chu a la chhuak nghal a, savawm hriak te chu hnawihin a han tuaihnûm ṭha a, tukṭhuan an kil lai chuan a pa chuan ram lama awn dan tur te leh fimkhur a ṭul zia te chu a hrilh mawlh mawlh a, an han kil zo chu tlai bîk nih hlau takin Lianmawia chu a chhuak nghal a, kawng laka a mi tawhte chuan duhsakna te lo hlânin an lo be hlawm a, kawtchhuah a va thlen chuan Hratzuala leh Rualkunga lo awmin a va zawm ve nghal a, rei lotêah Zamana pawh rawn thleng ve nghalin ram lam panin an liam ta vawk vawk a. Sih awmna hi a hla lem lo bawk a chawhma chhungin an thleng fel der maia, buk sain Zamana leh Hratzuala te chu an che nghal sawk sawk a, Lianmawia pawh ei rawng lo bawlin tuite a lo châwi ve bawk a, ral hla taka silai puak dur ri an hriat rual chuan Zamana chuan "Kan Rualkunga chuan eng tak kap ang maw sakhi tuai te hi rawn kap tak se nia ka tih ni" a han ti a, a duhthusâm ang ngeiin rei lotêah Rualkunga chu sakhi tuai paw bahlat chungin a rawn thleng reng bawk a, Zamana chuan "E khai ṭhiante zârah sakhi sa kan han hmeh dawn chu a ni a, a va han tih zia tak em, khawmaw ka lo puah ange" tiin a lak thlak sak nghal a, Hratzuala chuan lo pui sawk sawkin sakhi pumpui te chua chek ei theih tûrin an han sawngbawl a, Lianmawia leh Rualkunga chuan lo chan dûn char charin an lo rep mghal zung zung bawk a, chu mi ni chu vak chhuak loin buk lamah hun an hmang ta zawk a. A tuk zingah chuan sih lam panin an chhuak a, sahnu chiar dup an han hmuh chuan an hlim tlâng hle mai, chutah an han bih kuala Lianmawia chuan Tumpang hnu chu hmu fuh chatin Zamana chu a han ko a, Zamana chuan en vang vangin "A tlawhna a la rei hauh lo ang, kan thawmin kan hnawt tlan a ni ngei ang, hei hi i beisei tlâng rih teh ang u, sa dang chu kan hlawhchham aiah kan la zawk dawn nia, mahse, hlawhtlin tumin kan bei anga, kan hlawhtlin ngei inring tlâng ang u" a han ti a, ti chuan sih lamah Rualkunga leh Hratzuala chu an lo awm a, Zamana leh Lianmawia chuan Tumpang hnu chu an chhui zui ta a. An rin aiin an hmu har ta zek si a buk lama lêt leh chu an rawt leh ta rih a.

Buk an va thlen chuan Rualkunga te pawh lo thleng ve deuh chiahin Tukṭhuan an han rel nghal sawk sawk a, an kil zawh rual chuan a tu a mah ṭhu mai mai bîk loin an eina te chu uluk takin an ti fel leh sang sang hlawm a, vaibel zua an ṭhut khawmuan zuai hnu chuan an vai chuan Tumpang hnu chhui tur chuan an kal leh ta a.

Chawhma chhung zet an chhui hnu pawh chuan an la hmu mai thei lo, a hnim rah tlûk rawn tho leh mêk te, a tui daina hnu la nu phât te chu kal pêl zêlin a Tumpang a ber chu hmuh an tum ruh hle a, an kalna chin pawh a thui tawhin khawi rama awm nge an nih pawh an hrethiam tawh lo a ni. Chu tia an kal mêk lai chuan Lianmawia chu ding datin a ṭhiante chu ding turin a han hrilh a, chutah hma hruai nghalin thawm dim takin hma lam a pan nghal bawka, tuibur hmuamda vel an kal leh hnu chuan an thlang kawr bula an Tumpang hnu chhui lai lo bawk mek chu an zu hmu ta. Zamana chuan"Tlemin hnaih leh deuh i la, a luah kan kah rawn dawn nia"a han ti sapa, ti chuan thawm dim takin an pan thla leh ta a, an ṭan hmun an han siam fel a inring takin an silai cheng chu an han kau ri rap rap hlawm a, chutah an thlang lawka Tumpang lu chu tin ṭheuhin a ruala silai ri khawk rawih rawih chuan chu Tumpang hnuk chu chhat chiah lo mah se che sawn turin a chakna in a tlin ta ngang lo. An zu kal hnai deuh a, Tumpang meng sen rûm la khap fuk fuk chu hmuin Lianmawia chuan "Mana Ruala nen khan U zawk nih manah a hnuk chhat tu inthlang mai teh u" a han ti a, Rualkunga chuan "Ni e, Mana i upa bera a hnuk han chhat ta ch" a rawn tih ve tak siah chuan Zamana chuan lawm takin chu Tumpang hnuk chu a chhat ta a. Khua a tlai lam tawh si a, bûk awmna sawn mai an rêl tâkah chuan Hratzuala leh Lianmawia chu an buk hmasa lamah kir vang vangin an bungrua te chu an va phur bawr lûk a, Zamana leh Rualkunga pawh bûk thar lo sa in buk kawtah chuan Tumpang chu thal huang reng a.

Lianmawia te rawn thlen hnu lawkah chuan a sa chu chan ṭanin an hlim tlâng dar dar hle mai a. An rin aia an hlawhtlin hma avang chuan nuam pawh an ti hle. An han inpeih fel meuh chuan Leng hawn ar khuan a hun der tawh a, zanriah kil turn an han che leh sang sanga, an buai tlâng hle. Zan riah an kil zawhah chuan Tumpang sa chu an er tui ta tluk tluk hlawm a, a tu nilenga hah pawh sawi lo a an er hnu chuan zan khat riak lehin a tuk lamah chuan an buk hlui lam panin an kal ta a.

An rit tlângin an bûk hlui an thlen meuh chuan an hah hlawm bawka tu amah pawh inbe peih an awm tawh lo a, Lianmawia erawh a zuan zang ber tih takah rei tak ṭhu khaw muang ve loin ei rawng bawl turin tui a chai vat a, midang ho pawh rei lo teah rawn tho chhuak vein zanriah kil zawh hnu lamah chuan Buk chhungah awmin an titi a, a châng leh an nui tlâng dar dar ṭhin bawk a an naupan lai chanchinte sawiin Lianmawia'n Hratzuala tuia a nam thlak a Hratzuala hnar thi phunga a ṭah laite, Hratzuala u Hratzaua'n velh a tuma Rualkunga'n a hlauh zia te chu sawi chhuakin an nui uar uar hlawm a. Mahse, rei tak meng loin a tuk zing varṭiana khaw lam pan tumin an muhil ta sang sang hlawm a.

A tuk zingah chuan tho sang sangin an phur chu an han siam leh tete a, tukṭhuan atan a an rin tur chaw fûnin Tumpang sarep an thuk phum sa nen chuan khaw lam panin an haw ta a. An rilru hmanhmawh tlâng hle mah se, mi palin Tumpang chal ve ṭan ik ek tawh sa an in phurh sem a ni a, kal chak vak a harin an chawl chhen bawk a, kawtchhuah an thlen meuh chuan ni pawh a her bawih tawh mai a, Zamana chuan Tumpang hlado chu a han chham vang vanga, a silai a kah puah dur rual chuan midang ho chuan an lo lawn ve sap sap hlawm bawk a. Naupang rual rawn kalte leh rawlthar rualte chu Tumpang lu chu zâwn tirin hnung lamah an ni'n an zui ve bawk a. Zamana te inah chuan lut khawmin naupang ho chu sa hrang hnih khat vek an vaia sem vekin thirdeng sa tur leh Lal sa turte dah hrangin anmahni chu a inzat ṭheuha insem lehin an haw ta a. Chu mi ni aṭang chuan an inzui nasain sa pawh an la thei tlâng hlawm bawka, Lalpa Puithanga pawhin an hming a lam zingin ka khaw dai ngul turte tiin a sawi chhen mai zel a ni.

Nipui khaw lum boruak rawn inṭam nung chho chuan Zehtet khua pawh a tuam up hneh kher mai, naupang ho phei chuan lui kal nuam an tiin an liam nitin mai zêl a, Ṭhasangi nau vei erawh a harin, a chauh chhiat pui mai hlauin Lalnu Sanghluani chuan a fuih char char a, luhkaa ding ngawi reng Chhuahchawnga pawh chuan a nupui nau har lutuk chu a ngaihtuah kher mai. Mahse, khuanu hian kan lawm a phal ang bawkin kan lungngaih a phal si a, tuibur hmuamda hnu velah chuan naute ṭap ngek ngek thawm a rawn hnai zêl a, Lalnu Sanghluani chuan Chhuahchawnga bula din pahin a kuta naute chu a han en a "Chawnga fanu i nei ta, Sangi pawh a ṭha e" a rawn ti a Chhuahchawnga chuan nuih ver ver pahin "Ka fanu hming ch Lal nu nangmah ngeiin hanbsa ta che" a ti a Lalnu chua naute chu inchhung lamah luh puiin Chhuahchawnga chuan a zui ve bawk a, Lal fapa Kapthanga leh Thangkunga pawh phelh phunga rawn lut vein Kapthanga chuan "Fanu thar kan nei ta" a rawn ti lut nghal bawrh bawrh a. Lalnu Sanghluani chuan "A nu hming leh a nu ṭhatna chhawm turin Sangthanpuii tih ka sa e" a tih rual chuan kut an lo beng dar dar a.

Lianmawia ram kal hawin nau thar a nei tih a hriat chuan lawm takin an inlam a pan nghal chuk chuk a, a nu bula a nau mu chu lungchim taka enin a han pawm kanga, a hmelah chuan a hlim a ni tih hriat takin a kianga a ṭhiante pathum chuan an lo nuih var var bawk a.

Hun a liam zêl a, Lianmawia pawh ram lam aia a nau kiang a hun hman chu nuam a tiin a nau bulah chuan a tap kual fo a, Lal inah lah Lal tupa Hrangkapa chuan Lianmawia hming chu a lam zingin Lianmawia te ṭhian ho bula han awm chu nuam a tiin a zui det det reng fo bawk a.

Ni khat chu Chhuahchawnga leh Thangkunga bakah Kapthanga chuan pa an nih hnuah chhuah ho hun an nei khat tawhin ram han riah ho an châk deuh nge ni an inrawt phur a,Lianmawia te Tumpang kahna lam pana kal ve chu an rel thlu ta rup mai a. Lianmawia pawh hruai ve rawtin an pali chuan an kal tlâng ta a. Zamana te, Rualkunga te leh Hratzuala te erawh kum lamah Lianmawia aia an upat zawk avangin kal ve chak hle mah se Lalpa Puithanga'n khaw hmun nghaka awm tura a tih miau avangin khuaah an lo awm thung a. A hmaa Lianmawia te buk sak saah bawk khan innghatin buk chu an han chei ṭha a, a tuk lama sa chân dan turte rêlin Chhuahchawnga leh Thangkungate'n sih an châng anga Kapthanga leh Lianmawia te an vak kual thung dawn a ni. An rem ruat ang ngei chuan a tûkah chuan tukṭhuan eikhamah an chhuak ta a, Kapthanga leh Lianmawia pawh thui fe an kal dun hnuah chuan in ṭhen hrangin Lianmawia chu an kalna lam aṭangin khaw thlang lam panin a kal a Kapthanga erawh Chhim lam hawi zawngin a kal thunga. Lianmawia chuan sanghal hnu a hmuh chu chhui nghal vatin thui pawh a chhui hmain a lui tui dawt lai chu a va hmu ta a. A silai chu en dik sawk sawkin chu sanghal sum sarih lai tûra lian chu a han tin vang vanga, a kap puak ta ṭhuai mai, mahse a kah puah hmaa sanghal rawn che sawn hrut chuan a pawi laiah ngen mu luh tir loin a tlan tir ta daih mai. Lianmawia chuan hmanhmawh taka chhui zui nghalin thisen far a tam dânah chuan a hmuh thuai a ring a, mahse rin ai takin sanghal puitling tawh chu an tuar a lo feiin a hmu mai thei si lo, chawhnu her zet a ni tawh tihah chuan Lianmawia chuan a awmna ram chin a thlirin buk lama let leh rual a ni tawh lo a, hun ngaihtuah lo lekin a sanghal kah hliam hnu a lo chhui tih a hre chhuak a, zia lo a ti hle mai, a awmna hmun hi khawi khaw ram nge tih pawh a hre tawh si lo, a sanghal chhui mek hnu lan dan aṭangin a tuk lamah chuan a tawn tawh ngei a inbeisei bawk a, buk lama let lo a chhui tlang law law a duh ta zawk a.

Buk lama ei rel mek Chhuahchawnga leh Thangkunga te erawh an rilru a nuam zan lo hle,an chhak lama thawm rawn ri thla rawk rawk chu an han en a, sakhi tuai paw bahlat chunga Kapthanga lo lang an hmuh chuan an thaw huai nghe nghe, mahse Kapthanga'n "Khawnge Lianmawia" a rawn tih rual chuan an hmelah chuan hlauhthawnna nasa tak a lang leh nghal a, a hranga an vah tir ve kher kha an inchhir rum rum hial a ni. Mahse rawlthar a ni ve tawh a,zawn buai chu duh bik loin a tuk lama a lo la lan loh cheu chuan a tukleh lama va zawn an rel ta zawka.

Lianmawia pawh a riah tumna thing zar ngheng chungin a pate chu a ngaihtuah vang vanga, mawl a intiin a chet dan chu Pasalṭha zia lo hlein a hria a, mahse a sanghal chhui hnu thar tawh danah han let san mai chu a ui bawk si, eng pawh nise a tuk lama a la kah loh chuan let san mai chu a duhdan a ni ta zawk a. Zing ni chhuah aṭanga chhui ṭanin chaw chhum tur nei hek lo, hruizik leh tumbu a hmuhte chu eiin a ṭamchhawl mai lohna'n a inhnawh puar ve hram hram a, nau rilṭam hun a nih meuh chuan a hnu chhui lai pawh a hnaih tawh kher mai, a hnim rah tluk rawn tho leh ṭan mekte a hmuh chuan a fimkhur zual sauha, thawm dim taka chhuiin, a che zia chu Zehtet pasalṭha ralhrat ho hnuaia seilian tih takah a zei thlarh mai a, tuibur hmuamda vel a chhui leh hnu chuan thing hlima a sanghal kah hliam lo bawk run mai chu a hmu ta, a kah hliamna khan thui a kal tir thei tawh lo tih a hriat hle.


Lianmawia chuan a silai chu lek kangin a han tin vang vanga, a kap puak ta dur mai, mahse a kah zawh rual chiaha silai dang rawn ri ve nghal a awm tlat. Lianmawia chuan a silai chu sawh sawk sawkin, a chempui chu ban nghal mai theih turin a ak bawka inring takin a pan phei ta a, a ngenmu chuan a tumna hmun a zakdawhah tak a deng fuh tih chu a va hmu chiang hle, a hma ni a, a lo kah hliam tawhna pawh a va hmu nghal chat bawk a, a han en chiang leha, a chal dara ngen mu a hmuh chuan nichin lawka silai ri dang a hriat kha a bengchhe ri a ni lo tih a chiang ta kher mai. Rawn khuh kherh kherh ri a hriat chuan a hawi chhuak vata, a lam pana pasalṭha tih hriat zet pahnih rawn kal chu a hmu ta a, nui sanga lo chhawnin "Pu te u hei kan chan ho dawn em ni? In ngenmu pawh a dawng ve thoin ka hria a ni" a han ti a, pakhat zawk chuan "Naua he sa hi kan ta a nih hi, kan chan ho lo anga, a vai hian kan nei bawk ang, kan kut zala tlu anih hi" a rawn ti a, Lianmawia chuan nui sang chungin "Ka pu min hrethiam la hei nimin lama ka hliam tawhna hnuhma pawh a awm a, ka rawn chhui zui ngar ngara he lai hmunah hian ka rawn hmu a ni" a han ti a, mahse chu pa chuan "Kha kha ka ngen mu luhna ngei a ni, a chal dara mi hi ka aihnahphahpuipa ngenmu luhna a ni bawk e" a rawn tih leh takah chuan Lianmawia mitmeng chu danglam nghal vekin "Ka pu, ka sa hliam a ni a, kut thlak hmasa tu ka ni, tin, he lai hmuna a bawh lai ngei pawh hian silai hmet puak hmasa tu chu nang ni niloin keimah ka ni" a han ti ve sak a, chu pasalṭha pahnih chuan an sa tur a ni lo tih hre chiang hle mah se, an ni aia naupang, zawlbuk pawh la kai lo tur rawlthar chhuak ve awrh hmaah chuan a dingchang zawk nih an tum tlat mai a, pakhat zawk chu lo ṭawng ve lehin "Naua kan sa a ni a, kan ta a ni bawk. Kal kiang la sa dang lo va zawng zawk ta che, mi kah sa mahni sa anga chhal hi pasalṭha zia a ni ngai lo e" a han ti a, Lianmawia chuan "Chu pasalṭha zu ni hauh lo che u a" a han ti saka, chu lai hmunah chuan boruak a sosang kher mai, "Damdep Pasalṭha Roliana thu hnial chu thihna a ni, naua kal kiang mai rawh, he sa hi kan ta a ni" a han ti a, pakhat zawk chu rawn ṭawng ve lehin "Naua i luhlul i chhuah vaih zawngin kei Pasalṭha Lianneka hian i lu ka la ang" a han ti leh a, Lianmawia chu a thin a rim kher mai, pahnih mah ni se hlauhna pakhat mah a nei lo a, a chak lo zawk ni dawn pawh ni se a sa kah chu an ni hnena hlan ai chuan a nunna chan ngei pawh a thlang hial a ni. "In sawi ang chuan han awm tum chhin ta che u, Zehtet Pasalṭha Chhuahchawnga fapa Lianmawia hi ka nu'n hnungtawlh turin mi hring lo ve" tih pahin inring takin a ding kak hah mai a. Damdep Pasalṭha te chuan Pasalṭha Chhuahchawnga leh Zehtet khua chu an hre chiang khawp mai, mahse a uaithla lam a ni tawh a, tuna Zehtet khaw innghahna ber chu Lalfapa Kapthanga a ni tawh tih pawh an hria, Zehtet leh Bualthleng khua inunauna pawh an hre lo hauh lo, mahse Pasalṭha an nih vena chu hmachhuanin, Bualthleng khua chuan he buainaah hian kut an thawh dawn lo tih an hre chiang bawka, a chhan chu Damdep Lalnu Sangliani hi Lalpa Dohranga fanu kha a ni miau a ni. Pasalṭha Lianneka chuan "Naua i pa chu i chhuang hle mai maw, i pa chu a kum lamin a delh rit ve ngei tawh ang, a hun tawh reng bawk a. I pa te hun lai anga khaw ropui in ni tawh hauh lo tih hi lo hria la, in khua hi Bualthleng khua vanga lang ropui ve mai mai chauh in la ni e, kal kiang mai rawh, kan Lalnu hi Bualthleng khaw Lal fam ta fanu ni lo se chu i lu ka la nghal ngei ang" a han ti a, Lianmawia chuan tawlh sawn a hnekin "Bualthleng Lalpa Dohranga chu ka naupan lai bakin ka hmu lo a, a fanu phei chu ka la hmu hauh lo nghe nghe. I duh chu tih han tum chhin ta che" a han ti a, Pasalṭha Roliana chuan "Naua i ṭawngtam tawh riau mai, khawnge i chingfel law law teh ang" tih pahin a iptepui leh silai chu a han dah ṭha a, Lianneka pawh chempui phawrhin Lianmawia hmachhawn zawng chuan a rawn ding ve bawk a. Lianmawia chuan beih rawn an tum a ni tih a hre chiang bawka "Pasalṭha inti te'n naupang ti a zuam taka an biak an beih rawn dawn e" tih pahin a han nuih saka, a chempui chu phawrh chhuak vein inring takin an chet hun chu a lo nghak ta a. An kiangah chuan Lianmawia sanghal ruang sum sarih zet tur chu a let dum run bawk a, chu lai hmunah chuan thisen a luang ngei dawn a ni.

Pasalṭha Roliana chem rawn vai chu bum pahin Lianmawia chuan a lam pana rawn tlan mêk Lianneka dul chu a lo tlawh sak sawk maia Lianneka pawh chu eh ṭhawt pahin a tlu hlawm tawp a, Lianmawia hawi let leh chuan Roliana kuttum chu a hmachhawn chiangin a thla chiang kher mai. Chu veleh Roliana chuan bawhzui nghal mai a han tuma mahse Lianmawia chuan lo lum sawn pahin Roliana chawn chu a han tai kak duaia, Ding chhuak nghal vatin a han veh leh ta ṭhem ṭhem a. Lianneka rawn ding chhuak ve pawh chuan Lianmawia chu a naupan anga zuam ngawt chi a ni lo tih hriain a fimkhur tawh hle, a rualin an han bawh dûn a, Lianmawia chuan a chem chu vai ve mah se, a ni zawlbuk kai tirte leh Pasalṭha tawn hriat ngah tawh chu an inkhan lo vai vai hle mai. Rei lotêah Lianmawia chu an tuk zal der maia, a taksa hmun hrang hrangah chuan chem hnuhma a awm nuk a, a mal leh hnung zang kak duai ringawt pawh chu thih pui tham a nih vei nen, a nak a ṭanga thisen chhuak chuan a hliam chu a na thawkhat hle tih a ti lang chiang hle a, chu mai bâkah a hmel hmaia chhinchhiahna ni kumkhua tûr a biang ding lam inrin kalh te chuan hmelma tan hriat a ti awlsam hle ngei ang. Pasalṭha Roliana'n a rawn keh dh awrg ruala a lu lk a tum lai a, Pasalṭha Lianneka'n "A nunna em chu la lo zawk teh ang, kan chan tur hi chhut thiam a ngai a ni" a rawn tihte chu a hre pha ruai ruai bawk a. A harh leh meuh chuan khuaah a lo awm der tawh a, a bulah chuan Bualthleng Pasalṭha Thansangate, Dammawia te, Liansanga te leh Hmingthanga te bâkah a ṭhiante pathum chu an lo awm reng a, ṭawng tumin ka a han anga, mahse a chauh em avangin a muhil leh ta zawka, a harh leh meuh chuan zân a lo ni reng tawha a jlaim te chu a hma aiin a lo dam ta deuh bawk a, a nu chuan ṭap zawih zawih chungin tui a rawn tulh mêk a, Lianmawia chuan a nu chu a lainat hle mahse a thin erawh a rimin phuba lâk mawlh chu a châk hle. Mahse, a tuk lama a pa hnena a thil tawn a sawi hnua a pain a phuba a la dawn tih a hriat erawh chuan a hlim veng veng thung. A ṭhiante chuan awm pui ṭhapin Lianmawia'n a ngen ang ngeiin rammu tur pawha kal loin Lianmawia kiangah chuan hun an hmang ve ta zawk a.

Lianmawia chunga thil thleng chuan Zehtet khaw mipuite mai bakah Bualthleng khaw mipuite leh an pasalṭha te rilru a ti na hle maia. Lalpa Rengliana phei chuan a unaupa Lianmawia hming chawi tu anihna angin a hmangaihin a duat em em ṭhin kha a ni si a. Mahse Bualthleng Lalnu Sangzuali leh a pa Lalpa Dohranga thlarau an zahna avangin Damdep khaw rûn chu an tan tih chi a ni si lo a, thinrim takin an inhumruh tlawk tlawk ringawt mai a. Mahse Zehtet khaw ho chet dan erawh a nain an hlawhtling kher mai(Bualthleng Mawitu Bung 50-na lamah a awm vek kha). Damdep khaw ho chu an rawn khawma sal atan an rawn hawn ta ṭeuh mai a Lal chhungkua erawh Bualthleng lamah Lal Rengliana chuan a hruai haw dawn thung. An haw tur chu Lianmawia chuan lo hmuin Lal Rengliana chu koin "Ka pa, lo ding teh" tiin a bai chhuak auh auh a, a bai zawng chuan a taksa hmun tin mai chu a na vekin a hre hial a ni. Lal Rengliana chuan a lo nghaka "Ka fapa in dim i la mamawh hle anih kha" a han ti a Lianmawia chuan "Ka pa dam vat dan hi a awm lo e maw ni le" tiin a han nui suk suk a, "Ka dam velah ka lo zin dawn a nia" a rawn tih chuan Lalpa Rengliana chuan "Teh reng mai i nau Doliana leh Vanthangpuii te pawh i rawn hmu ve ang chu, i u Liansanga leh Dammawia te pawhin fa an nei har tawh hauh lo ang" a han ti a, an inmangṭha fel hnu chuan an kal ta a.

Lalpa Rengliana leh Lianmawia inbiak laia a nuṭapa buan vuana a phena lo ding reng Damdep Lal fanu Sainguri hawi chhuakin amah lo en ve chiah chu Lianmawia hmel a hmu chu, a hriat ngai loh leh tawn ngai hauh loh a taksaah a tawng ta tlat. A lungphu chu a ri dup dup a, a zak chem chem bawk a, inbeihna avanga a hmai pan khir nei nuai kara a hmel pa tak leh,a hringtu Pawih Lal fanu hmelṭha Ṭhasangi hnen aṭanga a chhawm hmelṭhatna chu Sainguri chuan theihnghilh harsa a ti hle. Lianmawia pawh a ni ve chiah tho mai, Sainguri mimeng fim kak leh a hnar ngul sang vah te, a heh sen no chek mai te, a bahsam sei mawi tak, a kawng vaw hnap te a mawng bawr lian si lo te si lo a ria lam chi duhte tana mawi tawk em em mai te leh, a mal aṭanga a ke rek thleng zuih zen thla zaih mai te chu a mitthlaah a cham nghal vek thei tlat. A lai lutuk chu kal kian tumin a han pen pawka, pen chhunzawm thei loin a tlu nghal thlawrh a, a nu Ṭhasangi hlauthawng taka rawn tlan chhuak chu nuih sakin a mal kak rawn thi ṭuam ṭuam chu inthlahrung takin a melh ru zauh zauhva.


Ni a ral zela Damdep khaw mipui ho chu Lalpa Puithanga chuan sal a tana kawl reng ṭha a ti loin Dapdep Lalpa Ngurthana pawhin bumin a awm tih a inhre tawh bawk nen, Lalpa Dohranga thlarau laka a inthlahrunna apung nasa telh telh bawk nen rorelin an intlanna'n Sial puitling panga an chawi tir ta a. Chu ta chin chu Damdep mipui tang ho pawh an lawmin an phur kher mai Lal chhungkua pawh Zehtet lamah rawn pheiin khaw mipuite ho nen chuan haw turin an inbuatsai ta mup mup a. Lianmawia mitthlaah erawh Sainguri bâk a awm thei lo a, tlai lama a pa leh a nuṭa pa Ramliana te nena amah kana an rawn kal laia a nui hmel mawi tak te leh an haw dawna an inchibai laite chu hre rengin, a nam dah lo'ng maw? Tiin a kut te chu a han hnim leh vang vang ṭhin a.
.