PASALṬHA LIANMAWIA BUNG - 8

Chhun chaw fak a hun meuh chuan Lianmawia te pawh Zehtet khaw ram chin an pelhna a rei tawh hle a, a pu chuan Lianmawia te ṭhian ho chu kawng tlûan a titi puiin a châng leh an han nui ho dar dar ṭhin a, a nêl pawh an innêl tlâng tawh hlawm hle. Chak vut vut si lo muang lutuk si lo a kalin rit phur lem lo leh chak ṭha pangai vek an la nih avangin lo sûl haw hun anih meuh chuan ni rei lo te kal ta a Bualthleng khaw ropui din ṭhinna hmun chu an thleng ta hlawl mai a, Lianmawia chuan "Ka pu, he khuaah hian ka tana mi pawimawh tak takte an awm nuk ṭhin a sin, tunah erawh hmuh tur an awm ta lo. Phuba lâk hun a la awm ngei ang" tiin rûn an tawh zân te leh Lalpa Rengliana, a pa ang maia a en ṭhinin mittui tla zawih zawiha inthlahna thu a sawi lai te kha a mitthla rauh rauhva, Lalpa Sangchhunga chuan "Taite, i dam anga i thil nghah chu a lo la thleng em em ang, mahse, fimkhurna hi ṭhian hnai berah nei tlat la" tiin a tupa hmel leh taksa te chu chik takin a melh kuala,naupang te ni si a hmela zâmna lang hauh lo te chu a chhuangin "I pu khan hetiang tupa hi a la nei dawn tih hria se i pa hnênah hian i nu hi lawm takin a hlân âwm si a aw" a ti rilru vawng vawng a.

Dapchhuah Lal inah erawh thisen a luang nasain a thang hlur a, sum hmuna an phuar beh Lalpa Sangchhunga nupui Rawnliani leh Lalpa Sangchhunga nu Pi Ṭhathangi te chu Hriangtlang pasalṭha Zaremthanga leh a aihnahphahpuite chuan engah mah ngai loin zu an khawn san a, Lalfanu tleirawl nawm chênna'n a an lo hman tawh Ṭhazuali ṭap khur hlawk hlawk pawh chu mênah an thlak hmak bawk a. Tlangval pali rawn lutin Lal in chhunga Dapchhuah pasalṭha chhuanvawr Hrangkira lu nei lo let reng chu dim lo takin an rawn hnuk chhuaka chhuat laia thisen kaite chu rawn ti faiin an chhuak leh a. Zaremthanga chuan "Denga, zanin chu nula dang i zawng teh ang, kan Lalfanu hian chawlh hahdam a mamawh ve alawm" tih pahin a nui zui nghal huau huau a,Pasalṭha Dengluaia pawh chuan "Ni e, kei zawng upa min fanu mawlh khu a nia khum pui kâi pui ka châk ni" tiin a nui vur vur bawka, an kianga ṭhu ngawi reng Pasalṭha tuai tir Hmuakliana chuan "U Deng kan duh tawk thei mai lo em ni? Hnam khat, unau kâra he ti em em a chet zawng, khaw dang dem kan hlawh lutuk palh ange. Kan duh ber Lal fanu laka phuba lâk in puitlin tawh a" a han ti a, Pasalṭha Dengluaia chuan "Mai mai a, Hmuaka mipa takin awm ta che, nakin lawkah chuan nang hian kan tlangvalte hi khua i la rûn puiin kan Lalpa tan ropuina i la hâwn sak ve dawn mawle, kai hruai tu che kan nih hi theihnghilh lo la, i kianga kan awm chhung hi chuan kan chet dân hi lo thlir la, i duh leh i rawn tel ve thei alawm"tih san pahin a pai chhuak nghal ṭuang ṭuang a. Zaremthanga chuan "Hmuaka, he khua hian kan pawi an sawi tih kha theihnghilh lo la, an pasalṭha Hrangkira'n kan khaw nula, kan Lal fapa nupui tûr a ruk chhuah man an tel anih hi" ti a Hmuakliana chu hrilhin Lal fanu Ṭhazuali chu duat hmek takin a han khawih vêl a, Lal fanu lah chuan a hlauin a mittui a tla nghal zawih zawih a.

Pasalṭha Hrangkira vanga buaina rawn irh chhuak hi Lalpa Sangchhunga zin chhuah hnu lawkah a ni a, Pasalṭha Hrangkira khual pang zinin Hriangtlang khaw nula hmelṭha Damthangi hi han hmu fuhin a lo han rîm a, Damthangi hmel duh zawng tak a lo ni bawk nen, Pasalṭha Hrangkira hi a rawn zui haw ru ta a, Hriangtlang Lal fapa Damthangi rîm zantin tuin chu thu a hriat rual rual chuan a ṭhiante pahnih Pasalṭha Dengluaia leh Zaremthangate hi tlangval ho nen tir chhuakin a um tir nghal a, kawng lakah um pha lo mah se khuaah hian an hmu ta a, an vanneih a siamin Dapchhuah khua hi leido nei lo ta chu an Lalpa berin a lo zin chhuah san lai tak a ni bawk nen, awp bet hmakin nawm chênna'n an hmang ta a, Damthangi an thah hmaa Hrangkira hmuh lai ngeia an pawngsual hnuah hrehawm tuar reng rengin Hrangkira hi zan khat an han dah leh a, a tûkah an that ve ta a ni.

Lianmawia te erawh hlim takin zinkawng an zawh zêl a, zan nga lai ramhnuaiah an riak tawha, kawng lakah erawh Lianmawia te ṭhian ho kut hmui zârah hruizik, tumbu tih vêl chu an ei lo kher mai. Khua an thleng ṭep tawh bawk nen an phurin an hlim surh surh hlawm khawp mai a, Dapchhuah khaw nulate tawrhna leh tlangvalte mangang rûm thawm an hre pha dêr si lo. A tuk lam nilenga an kal leh hnu chuan lo sûl haw hun laiin khaw lan theihna an thleng ta. Tuibur hmuam da kal bâk a ni tawh lo bawk nen ṭhu thlan daiin vaibel an han pak khu tual tual hlawm a. Zamana chuan "Lalpa feh haw leh, naupang kawtchhuah lama nu leh pate hmuak an awm hauh lo mai a, ka hlauthawng hle mai" a rawn tih rual chuan khua chu ngun takin an han en tlâng a, Lalpa Sangchhunga chuan "Ka awm loh hlân lo châng duh tur hriat ka nei hauh lo mai, mahse, i hmanhmawh teh ang u, ka khua hian buaina lian tak an lo tawk mêk thei tlat a ni" tiin an kal ta a, kawtchhuah an thlen chuan a lo reh ṭhiap a, naupang sava veh thawm tak ngial pawh hriat tur a awm hauh lo lehnghal. An ngaih a ṭha lo zual tlâng hle mai a. Lianmawia chuan "Khuaa kan luh vat a ngai a ni" a han ti sap a, Lalpa Sangchhunga chuan "Ni lo e, ka khua hian awp beh a tawk thut thei. Chu vangin, buaina kan tawh huna kan chauh chhiat mai lohna'n kan taksa kan duat tur a ni, zanriah kil phawt kan mamawh tlâng a ni, kawng ṭum pangai hi zawh zêl i la, luite kan pawh thuai mai ang, kan tlem si a, khaw thim hnua khua kan luh kha a him ber ang"tiin a kal nghal vawk vawk a. Zamana chuan "Liana i pu ang rênga Lal fing leh thluak fim hi an tam lo  khawp ang, a khuain buaina an tawk mêk ni ngeia a lan lai paw'n ngaihtuahna fîm tak zu hmang tlat thei a" tiin ngaihsân hmel takin Lianmawia beng bulah chuan a sawi sap a.

Lalfanu Ṭhazuali ṭap zawih zawih chu Dengluaia chuan kek tho lawpin a pawt chhuak nghal dawr dawr a, Lalnu Rawnliani chuan Pi Ṭhathangi muhil chu a han ko leh zauh zauh ṭhin a, mahse a chhang thei reng reng si lo, a ngaihtuah ru ang reng hle, mahse, han buai pui tûrin phuar hlawm a ni tlat bawk si, amah pawh chaw kaw puar a ei lohna a rei tawhin a chau tawh hle a, a fanu Pasalṭha Dengluaia'n a hnuh chhuah dawr dawr lai chu mitthlain "Chêmte i pa leh i nuṭapa hmel chu nang tal chuan i hmu hman em ang chu maw" a ti rilru vawng vawng a.

Pasalṭha Dengluaia chuan kawtchhuah an thlen rual chuan Lalfanu puan chu phih thlak sak ṭhuaiin a han bawh thlu nghal a, Lalfanu taksa chhunga liluh tuma a inbuatsaih mêk lai chuan a tukhum chu rawn hit mupin nikhaw hre loin Lal fanu chu a bawh nghal rawp a. Zamana chuan a silai kawm tuai vung vung pah chuan "Phuar hlawm i la, thu zawh fiah atan a ṭha ang" a han ti a, Lalpa Sangchhunga chuan hmeichhe pakhat chu puih tumin a han kûn hniama, chu veleh chu hmeichhia chuan "Ka pa" a rawn ti ta mai, Lalpa Sangchhunga chuan "Chemte" tih pahin a puan chu a han pe nghal a, meichher chhit ngamna chi ni hek lo, Lalfanu taksa pawh a hringtupa leh Lianmawiate'n an hmuh loh phah ta zawk a ni.

Lalfanu Ṭhazualin thil thlen dân zawng zawng a pa bula a han sawi meuh chuan an thina rim tlâng kher mai. Lianmawia chuan "Ka pu, khuaah ka lut dawn e, ka farnu chunga chu ti taka zahngaihna lan tir lo tute chu an vaiin an lu ka la ngei ang, nula, i nuṭapa Lianmawia ka ni e keima'n phuba chu ka la ang" tiin khaw lam pana kal chu a tum ta mai. Hratzuala chuan lo chelh bet vatin "Liana ro rêl a ngai e, phuba chu kan la em em ang" tih pahin a han pawt lêt a, "Lalpa i fanu hi nang leh i tlangval pakhat hian lo awm pui u la, keini ho erawh khawchhungah kan lut ange, mahse i tlangval pakhat hian min zui thung se, khualkhua a ni si a kan bo mai lohna'n" a han ti a Lalpa Sangchhunga chuan "Ni lo e, ka kal ve ngei a ngai a ni" a han ti a, mahse, a fanuin "Ka pa min kalsan tawh suh " ti a, a rawn ṭah khum leh tâk siah chuan a fanu chu duat taka kuahin "Ka tupa, ka ring tawk che a ni tih hria la, i pite'n i chhanchhuah hun an nghak reng a ni. Hlira hian hruai che u se la, zing khawvar hmaa in lo lêt leh anih loh chuan keimah ngei hian ka vawngkhaw chhanna'n kal ka siam ang" a ti charh charh a. Lianmawia chuan chhang tawh lem loin a in her sana, Zamana chuan Dengluaia ni khaw hre lo chu pu lawpin khaw lam chu an pan ta ṭham ṭham hlawm a.

Hriangtlang tlangval ho chuan an pasalṭhate an rin zawh hle bâkah Lal in an awp bet hmak bawk nen ralveng pawh indah loin Dapchhuah khaw chhungah chuan nuam an chên a, an khaw lam aimahin nuam an ti nghe nghe, nula a tam thei ang ber theih hman tumin an ohur tlang hle a, Dapchhuah tlangval Zawlbûka an phuar hlawm ho chu an kutthak hnawihna'n an hmang nasa hle bawk. Dapchhuah khaw mipuite chu an mangangin an beidawng hlawm tawh hle.

Dengluaia rawn harh rawn tal vel chu Zamana chuan keuh dawtin Dengluaia meng phawk hru chu thla eng hnuaiah chuan a lang chiang kher mai. Zamana chuan "Phung i ang reuh mange" tiin a han nuih suk a, Dengluaia chuan "Naupang, tute nge in nih, min han chhuah teh u, mipa innih leh nih loh en ang u hmiang. Pasalṭha Dengluaia ka nih hi" a han ti a, Lianmawia chuan "Mana phelh teh, ka farnu pawngsual tumtu hi a dam rei ta mah mah" a han ti a,Lianmawia thu sawi chu Zamana chuan a ti mai mai lo tih a hre chiang bawka a phelh ta vat vat a. Dengluaia chuan han zikmar kual vel pahin "Lusei nau rimchhe pa i inchhir dawn hle mai, Dengluaia hi tuma'n an la hneh ngai lo a sin" tiin Lianmawia chu vau/vo zâm a han tum a. Lianmawia chuan nuih sak pahin "Ka chhin teh reng ang che" tih pahin rang takin Dengluaia lam pan chuan a tlan ta phut a, Dengluaia pawh pasalṭha ve tak a ni bawk nen inring taka lo dingin Lianmawia ke chheh chu a lo zir chiang mêk bawk a, Lianmawia chem rawn vai chu bum pahin a chem chu a vai chhuak ve nghal a,Lianmawia pawhin a rin ang ngeia Dengluaia'n a lo bum tâkah chuan hnuai lamah vai chhuk leh nghal puatin Dengluaia'n a ke lam sah tuma a ban a rawn lek mek lai tak chu a zu fuh ta chaih mai Dengluaia'n a ban na zawk a hriat rual chuan a eh nghal tuar a, a ban rek bung hmawk a hmuh rual chuan Lianmawia ṭuan ṭha zet leh a chem hman thiam zia a hre chiang kher mai, mak ti taka Lianmawia chu enin a khur dar dar a, Lianmawia chuan engmah sawi set set tawh loin a chem chu a vai chhuak nghal zawk a, Dengluaia lu chu a chhawk chiang kher mai.

Dengluaia lu chu akin khaw chhung lam an pan ta a, in lo awm hmasa ber hnuaiah chuan lut nghal vatin Lal in awmna lam pan chuan Hlira chuan hma a hruai nghal zar zar a. Lal in chhunga Zaremthanga ṭawng lawng lawng ri an hriat chuan an thin a rim tlang kher mai. Lianmawia chuan "An vaiin an lu ka duh a ni" ti sapin Zamana hnênah chuan "Mana U Hlira nen hian min lo veng u la, Zuala nen kan han lut ange, kan pasalṭha chu ka pu thla thum zuin a lu a ti hai viau ngei ang" tiin Lal in hnuai aṭang chuan Hratzuala nen fimkhur takin an inzui chhuak nghal a.