PASALṬHA LIANMAWIA BUNG - 9

Sum hmûna a pu nupui Lalnu Rawnliani phuar hlawm a lo let reng chu Lianmawia chuan a phelh nghal sawk sawk a, thawm dim a ngai bawk si nen a che pawh a rang lo kher mai, Hratzuala pawhin Lianmawia pi chu a lo phelh ve mêk bawk a, an han phelh zo chu a pi te pahnih chauh zia leh han che châng peih pawha an awm lo chu a hmuhin Lianmawia thin chu a rim zual kher mai. Lal in kawngka chu dîm taka hawngin Zaremthanga zu rui lo ṭawng lung lung kianga anmahni ang rual vel tlangval pakhat lo ṭhu ve chu hmuin Lianmawia chuan kawngkhar chu a han phih pawp maia, chu mi rual chuan rang taka lum lut nghal in a din chhuah leh meuh chuan a silai kaw hmawr chu Zaremthanga chuan a hmachhawn rân tawh mai a.

Hratzuala leh Hmuakliana lo in tin rân chu Lianmawia chuan nuih sakin "I silai kha i dah thla dawn nge, nunna pakhat leh in pahnih nunna hi kan inthleng dawn"tih pahin a iptepuia Dengluaia lu a ah chu a theh chhuak nawlh a,Zaremthanga lo meng bual kawk kawk chu nuih sakin Hmuakliana chu rum takin a han melh a. Hmuakliana chuan "Lusei, nang ni nen hian buaina ka nei hauh lo, nunna chân awm loin i inṭha ṭhen ang u" a han ti a, Lianmawia chuan "Ka farnu chunga zahngai lo a, ka pu awm loh hlâna a khua lo awp bet tu mi dawihzep te kian san mi ka ni lo e" a han ti chang fak a. Zaremthanga chal dara a silai nawr pah chuan "I naua silai hi i dah thlak tir dawn che pialrâlah ka thawn liam dawn che" a han ti a, chu tih lai mêk chuan Zamana leh Hlira pawh rawn lutin Zamana chuan "Ekhai, kan pasalṭha te chu kan lo tel ve a rem em ang chu maw?" tih pahin Hmuakliana chu a rawn tin ve nghal zat bawk a. Zaremthanga silai tun chu Hlira chuan lain amah Zaremthanga tin nan ngei a hman sak bawk nen, an chan a chauh zia hriaiin Hmuakliana chuan a silai chu a dah thla ta a. Hratzuala'n an pahnih a lo hnungkhirh hlân chuan Lalnu te pahnih nikhaw hre mumal lo a awm reng chu Zamana leh Lianmawia te chuan an va pawm lut nawlh a, Lianmawia'n a pi hmel a han hmu chu nghilh dupin, Hratzuala lam chu thinrim takin a han hawi a, Hratzuala chuan "Liana ka hrilh thei lo che a ni" a lo ti sap a, Hratzuala'n a pi an phuarna a phelh laia a pi a thi tawh tih a hre daih tawh tih a hriat chuan thinrim viau mah se Hratzuala rilru put hmang chu dik a ti hle bawk si. Pawi ti takin a pi ruang chu a en vawng vawng a pi hmel aṭang chuan hai theih rual a lo ni, a nu Ṭhasangi nen an in ang em tak bawk a.
"Ka pi, i tupa i hmuh châk em em chu ka lo thleng tawh a sin" ti sapin a mittui a khap per sak sak a. Lalnu Rawnliani erawh a mar a la phu ṭha viau thung, Hlira chu chhuak vatin rei lotêah bawlpu nen an rawn lut thuai a, Hratzuala nen inzui chhuak leh nghalin Zawlbuk lama tlangval chau tawh takte chu an zu chhuah leh hlawm a, a che châng peih chu tlemte bâk an ni hauh lo. A la chak ṭha deuh a piang chu Lal tualah hruai chhoin Lal inah Hratzuala chu a han lut zuaia, rawn chhuak lehin a silai chu a rawn hmet puak dur mai a, chu veleh Hriangtlang tlangval Dapchhuah khaw in hran hran a Lal hrawt mêkte chu an awmna in aṭanga rawn chhuak khawmin an hotupa Lianmawia'n silaia a lo tin reng an hmuh chuan an tawp chat hlawm a, Zamana chuan Hmuakliana chu a rawn nawr chhuak nawk nawk bawk a, mipui lo hlauthawng taka dap kâra ṭanga Lal tual lam lo bih ve ṭawk ṭawkte'n thil thlen dân an hmuh chuan chhuak khawmin patling ho pawh mi lu lâk chem nen Hriangtlang tlangval sawmnga vel chu an rawn hual ta khup mai. Intiam rual ang hrima a ruala an bawh tak phutah chuan Hriangtlang tlangval nunrawng ho chu an tlu zawih zawih mai a, Dapchhuah khaw tlangval leh pa ho thinrimna chu a nasa bawk a, Hriangtlang ho chuan dim an hlawh lo kher mai. Lal tual khu rum rum a han reh fel rual chuan Hriangtlang tlangval ho chu nung dam reng an awm ta lo.

 Pasalṭha Zaremthanga chu thinrim taka rawn ṭawngin "Lusei naupang, a fawng vuantu inih lai chuan i huai hle mai maw? A tawp i han thleng law law teh ang, min kap ta che" a han ti a, chu veleh mipui ho chu rawn ri hukin Lianmawia te chu an rawn pan leh ta, mahse, "Tawp rawh u" aw fiak ṭhaka rawn titu an Lalpa Sangchhunga aw an hriat rual chuan an tawp chat hlawm a, Lalpa Sangchhunga chu a fanu kai chunga rawn kal zêlin Lal in luhka bula lo ding Hratzuala chem chu a phawi sak a, Zaremthanga lo ṭhingṭhi mêk chu eng khaw sawi set set loin a lu a sah uai sak hnawp mai a, Hmuaka lam chu pan lehin "Naua, i dam chhung kum a tawi hle mai maw" tih pahin chem chu a han vai phe leh zuaia, Hmuaka nghawng a ṭanga thisen rawn chik ṭhawt ṭhawt chu Lalfanu Ṭhazuali chuan a rap kher mai.
Lianmawia chu in chhung lama lut vatin a pi ruang chu dimdawi takin a han mut rem tir a, chu tah a naupan rilrute'n an la kian san lo tih hriat takin a pi ruang kuah chung chuan a ṭap ta hawm hawm mai a, "ka pi ka lo thleng tawh a sin, i tupa hi min rawn en ta che" tiin a pi chu a ko a, mahse, a pi chuan lung loh tui dâwnin mitthi khaw lam a pan san tawh si.
Lalpa Sangchhunga'n a nu ruang a hmuh chuan na a tiin hrehawm a ti kher mai, a lehlamah a thinrimna berhbu chu tawn darhin a awm chiang hle bawk a, "ka nu i phuba chu ka la em em ang" tiin a nu ruang bulah chuan chhia a chham hial a ni.
Zalênna nei tu mah ni se, an Lalpa nuin mual a liam san tak siah chuan Dapchhuah khuate chuan hlimna tak tak an chang lo a, an lungngaiin an Lalpa nu Pi Ṭhathangi chu an ngai hlawm hle a ni. A tukah chuan a ruang chu zah taka vui liamin, a piin a hmuh châk em avanga hei leh chen zinkawng zawhtu Lianmawia chuan a pi chu hmu hman mah se, a piin a hmu ve thei tlat tawh si lo.

Dapchhuah khuate tan chuan hlimna aiin lungngaihna hmuh tur a tam hle, hun rei lote hnuah an nula te zingah hmel hriat loh fa pai an awm nuk dawn tih chu an hre chiang kher mai. Lalpa Sangchhunga pawhin a tlangvalte inpeih veleh a phuba lak chu a tum nghet hmak bawka, Lianmawia te pathum pawhin phuba lâkna a tel ve ngei chu an tum ruh hle.

Ni khat a liam leh hnu chuan Lalpa Sangchhunga chuan tlâgaupa tirin a khaw mipui zawng zawngte chu Lal tualah a ko khawm a, a awm loh hlâna buaina an tawh vânga pawi a tih thute, phuba lâk ngei a tum thu leh, palai pawh tirh ngaia a hriat loh thute chu sawiin a thusawi tawp lamah Lianmawia te chu inhmel hriat tirna te neiin Dapchhuah khaw mipuite chuan Lianmawia te pathum, Lusei hnam la naupang tak tak huaisen tak ni bawk tih chauha an hriatte an han hre fiah ta chu an ngaisang zual hle a, Lianmawia phei chu Lalnu Ṭhathangin a chanchin a lo sawi zin tawh em avangin a hming an lo hre fur a, Pasalṭha Chhuahchawnga fapa a ni tih hre ho phei chuan a naupan ang ngawta zuam chi anih loh zia an hmu fiah nghal hle.

Zan riah kil lai chuan Lianmawia chuan a pu hnenah chuan phuba laknaa kal ve ngei a duh thute hrilhin, a pu pawh chuan rem ti lo viau mah se, dan mi a ni dawn lo tih a hriat avangin a phal sak ve ta zawk a, Zamana an hotu en deuh ber avangin Zamana chu rammutnaah pawh tlangvalte a kawi khawm a ngaih tur thu te hrilhin zan riah chu an kil tlâng ta hlawm a. Zanah chuan lên chhuah an chak lo tlâng hlawm bawk nen Lalfanu Ṭhazuali kiangah chuan vaibel an pak khu tual tual hlawm a, Lianmawia pawh a farnu nen an innelin an inkawm ngeih dûn phian bawk a, chutiang chuan hlim takin zan hun an hmang ve ta a. Zawlbuk an zu kâi chuan tlangval ho chuan ngaihsân hmel takin an lo en hlawm a, Lianmawia te chuan nuam lo an ti ang reng hle a, i thlahrung takin an puan thehkhawm sakah chuan an inthawlh ve ta a.
Ni hnih a ral leh meuh chuan tlangval ho chuan chak tawk an intiin ral rêl ṭan mai an duh thu Lalpa hnenah an thlen ta rup mai a, Lalpa Sangchhunga pawhin a rang thei ang bera phuba lâk a lo duh bawk nen, val upate ho nen chuan ralrêl an ṭan ta mup mup mai a, ni khat inbuatsaihna'n a an hman hnuah Hriangtlâng khaw lam an pan dawn a ni. A tukah chuan silai mu dengin an inbuatsaih ta tluk tluk mai a, nilenga an inbuatsaih hnu chuan a tuk lama chhuah hun tur an nghakhlel tlâng tawh kher mai. Khaw inhnaih tak ni khat chhunga thlenna hman mai a lo ni bawk nen, khaw hmun nghak atan rawlthar zual ho daha, midang zawng a si ruk la meuha thawh chhuah chu an tum dân a ni.

A tûkah chuan Dapchhuah tlangval rual za vel zette nen chuan Lianmawia te chu Hriangtlâng khaw lam panin an chhuak ta hum hum mai a, nilenga kalin lo sul haw hun laiin khua chu a lan theihna aṭangin an thlir rân tawh a, Zamana chu rawn ding chhuakin "Aw le, kan val upate hian an ngaihdân rawn sawi se la, an zâi ngaiin kan che ang" tiin thiam takin Dapchhuah val upate chu a rawn dah pawimawh hmasa ber a, val upate zinga pakhat chuan "Kan pasalṭha te in awm a lawm, in ro rêlna kan pawm vek e" a rawn tih tâkah chuan Zamana chuan "Aw le, pawl thumah kan inṭhen hrang anga, zan riah kil laiin khua kan lut ang. Pawl khat a mite'n thawm dîm takin Lal in in pan anga, Lal in chhunga in luh veleh silai in rawn hmet puak ang. Chu veleh pawl hnih dangte'n khaw mawng lam leh lu lam aṭangin khua kan hâl nghal tur a ni. Min bei let tu apiangte kan dah ṭha hmasa zêl anga, an inpêk hunah an vaiin salah kan man ang, an Lal fapa erawh inkutah ka dah ang" a rawn tih rual chuan an pawm zia lan tirna'n an lu an lo bu tliar tliar hlawm a.

Hratzuala pawla awm tlangval sawm vêlte chuan Lal in luhka an rap fel ta maw tihah chuan Hratzuala chuan hma hruaiin Lal in kawngkhar chu a phih hawng ṭhuaia, zanriah kil mêk Hriangtlang Lal chhungkuate chuan an lo hlau kher mai. Hratzuala hnunga tlangval sawm silai keng vek chunga rawn lutte chu hlauthawng takin an lo en ṭhap a, Lalpa chuan "Enge in duh? Ka lalna ram chhunga Lusei leh ka hnam puite'n hmelma phiara min phiar ka hmuh tâk chu le" a han ti chang rat a, Hratzuala chuan "I fapa vanga Dapchhuah khaw mite tawrhna phuba la turin kan rawn kal anih hi" tiin a silai chu a van vawr zawngin a hmet puak nghal dur a, rei lotêah khaw mawng lam leh lu lam aṭang chuan beih an tawk tih hriat takin thawm a rawn awm ta nuai nuai mai a, Lianmawia leh a pawlte mi sawmthum velte chuan khaw mawng lam aṭanga beiin a ṭhenin in an lo hâla a ṭhenin silai an lo hmet puak dur dur mai a, khaw lu lama ṭan khawh Zamana te pawh an rawn che fuh hle. Mipui mangang chu Lal tual lamah tlan khawmin Dapchhuah tlangval ho chuan an hnaih zêl a, tlangval lo bei lettu apiangte chu an lo sai thlu zêl bawk a, khaw lian tak a nih loh bakah an pasalṭha chhuanvawr pahnih an awm lo bawk nen, an Lal chhungkua lah hmelma kutah an awm tawh bawk nen leng lên ar khuan hun lai vel chuan hreh tak chunga inpein an khaw kang alh hluah hluah chu mittui tla zawih zawih chungin an thlir reng ringawt a.

Dapchhuah val upa chu rawn ding chhuakin Pasalṭha Hrangkira leh Damthangi te thil tawn chu a rawn sawi ta vek mai a, chu veleh mipui tam zawk chu an Lal fapa chungah chuan an lungawi loin demna thu an chhak chhuak ta hlawm a, chu veleh an Lalpa chu rawn ding chhuakin "Ka fapa hnawl tu anih man hmutu kan nula hur thlavang inhauh ngam a maw?" tiin mipuite chu a rawn ânkhum ta phiar phiar mai a, Lianmawia ngaithei loin a silai cheng kau rik rap pah chuan "Lalpa i ngawi thei angem?" a han ti chang fak a, Lalpa Siangthanga chuan Lianmaia mitmeng chu en vang vangin "Naua, i mitmeng chu Pasalṭha Chhuahchawng mitmeng hlauh zuk ni a" tiin a en tlawk tlawk a, Lianmawia chuan "Ka pa chu engtin nge i hriat?" a han ti a, Lalpa Siangthanga chuan "I pa maw?I pa vang khan ka pasalṭha Chungkeuva ka chân tawh a sin"(BUALTHLENG MAWITU BUNG 6,7 velah a awm kha) tiin a han inseh ruh a, chu veleh Zamana chuan nuih vur vur pahin "Dengluaia pawh Chhuahchawnga fapa vangin i chân tawh e" a rawn tih rual chuan Lalpa Siangthanga chu a meng bial nghal kawk kawk a.
Zamana chuan tlangvalte chu thu pêin khaw mipui zawng zawngte chu hnung khirh tirin Lalfapa Siangchhâwna erawh Dapchhuah tlangvalte'n an khaw tual ngeia an chil rawn lai chuan Hriangtlâng mipuite chu an lo inhup chawih chawih hlawm a. An inpeih fel meuh chuan khua chu a kang ral hneh tawhin khaw chhung khu luih luih chuan men a ti har hle mai. Zamana chuan chhuah vat a ngai tih hriain sal atan Hriangtlâng khaw mipui ho leh an Lal te nupa chu an chhuah pui ta a.