HNUNG TAWLH NGAI LO MI HUAISENTE - BUNG TAWP BER

Zawlpui leh Serte bâkah khaw hran hran aṭanga lo kal mikhualte'n Rotlâng an chhuah san tâkah chuan khua chu a reh ruih hian a hriat a, khual vâl laka thinlung lo hlân tawk nulate chu an lung a lêngin an lungdite'n an rinawm loh san mai ang tih hlau rêng rêngin hun leh ni an chhiar ve a ni. Thangbawihi pawh tunah chuan nula ti a chhiar tak tak theih a lo ni ve ta bawk a in lêng a ngahin rual kawm a thiam a, hmâna hmeithai in ni ve mai ṭhinah khan tunah chuan pasalṭha pahnih leh nula hmelṭha tak an awm dêr ta. Khûma pawh a thinlung lalnu Zamliani chu a len chilh tluk tluk reng a, nupui nei rual a nih bâkah a ṭhian pa ber Saia'n nupui a neih san ta bawk si a, Tinthanga leh Thangvungate bâk kawm tur a nei meuh ta lo. Zînga erawh an inchhungkhurah chuan patling ber ang ziazanga awmin Khûma leh Thangbawihi te chu a châng leh a vîn phar leh nawk nawk ṭhin a nula a rîm khâtin zawlbûka pa ho kianga tap kual mai mai chu a nuam tih ber a ni. Khûma pawhin tihngaihna vak a hre lo a, "Zînga zawng a nula mi lo lutuk hi kan la mangan pui thuai ang." tiin Saia hnênah a sawi hial a, Saia pawhin, "A mak khawp mai. Kan naupan deuh laia Bualthleng Lal fanu zûna a uai hnuah nula reng reng a ngaihsak ta hauh lo a, tunah Serte Lal fanu nen hmangaih biahthu an thlung dûn leh a, chu pawh kâr a hlat vâng nge a thengthawngah a thawh loh hmel khawp mai." a ti ve hial a ni.

Tûk khat chu Rotlâng khaw chhûngah chuan mikhual hmel pawr tak pathum hi an rawn lût hlawl mai a, Zînga thing ek chuan lo hmu vatin," Kha khawi lam khualte nge in nih le? "tiin a va zawt a, an zînga pakhat chuan," Lal Roṭhuama khua Bualte tlangvâlte kan ni e. Rûn kan tawk a, kan khua chu mei vâpah a chang ta. Kan nula tam tak salah pawih hoin an man a, kan Lal chhungkua leh tlangvâl tlêm kan dam chhuak hrâm a ni. Naupang leh tar, hmun hla kal thei lote chu pawih ho chuan an that vek a ni. "tih pahin a mittui tla chu a hru sawk sawk a, an thu sawi lo hre pha Khûma chuan," Khawi lam mi nge an nih inhre mial em? " tiin a lo zawt a, chu pa bawk chuan," Falam khaw tlangvalte an ni. An pasalṭha Hlawncheuva nunrâwnna chuan kan fate leh kan nu leh pa, kan pi leh pute pialrâlah a thawn liam a ni. Kan Lal chuan Zehtet lamah leh Bualthlêng lamah ṭanpuina dîl turin tlangvâl dang a tîr tawh a, min ṭanpui thei anih hlauh chuan Thingfal khaw lamah min lo nghâk dawn a ni" tiin a thaw halh halha. Khûma chuan Zînga mitmeng rum âl mai chu a hmuhin thil dik lo a awm tih a hrethiam vat a, "Anih eng vang nge in Lal chuan Thingfal khuaa kal tura min duh chhan?" a han ti leh a chu pa chuan "Kan Lal Roṭhuama unaupa Rothanglûra khua anih vâng a ni" ti sapin Rotlâng khua chu a thlir kual vêl a. Khuma chuan Lal in lamah chhoh puiin Zînga erawh in lamah a haw thung a, Lal Zabiaka'n Bualte khaw chunga thil thleng a hriat chuan a thinur hle. Falam pasalṭha Hlawncheuva chu a haw hle mai a, "A nun hi a sei mah mah tawh a ni. 'tiang reng renga nunrâwn hi hringfate zînga chêng ve reng tlâk a ni lo e. Zan lamah ka upate nen kan lo sawi ho dawn nia. Tlangaupa hian in thlen in tur kawhhmuh che u se la, zanin chu hetah riak u la, ka tlangvalte'n puih che u an inhuam anih chuan a rang lamin in chhuak dawn nia." tih pahin a vaibel chu a pak khu hlarh hlarh a. Saichhûnga chuan," Hlawncheuva maw? A nun a tawp ngei tawh dawn anih chu. Ka pa, Zînga nen hian sawi fel tur hmabak an nei a sin. Serte Lalpa khan a sawi nêp deuh anih kha. Zînga hian inmalbeihah a cho ngei ang." a lo ti sap a, Khûma chuan a ngaihna hriat loh hmel zetin Saia chu a en hû a, Saia chuan hrethiamin thil awmzia chu a hrilh fiah melh melh a.

Zân a lo thleng a, Lal inah upa ho leh pasalṭha bâkah val upate chu ro rêlin an ṭhu khawm a, an duh dan a thuhmun ṭhûm bawk nen an rorêl an zo rang hle. Mahse, tlangval zawng zawng intirh chi anih loh avangin tlangval sawmsarih rual vêl Zînga leh Khûma hoin an kal chhuak dawn a ni. An rorêl an zawh hnu chuan zu khawnin an vanglai chanchinte an han sêp chho a, an lu a kai deuh hnu phei chuan rammutnaa kal ve an châk ziate, pawih lu khâi haw an châk zia mawlh mai chu an sawi tawh hlawm a. Lêng hawn ar a khuan laite chuan Lal inah an la ri le lu mai a, val upate erawh zawlbuk lam panin an kal pai thla ṭiang ṭiang thung a,Lalpa berin a chelh tlat avang leh a hnawn luih tlat avangin an ṭawng a zângin nuam pawh an ti ve hle. Zamliani te kawtkai thim laiah erawh Khûma bân chu Zamliani chuan vuan tlatin kal lo turin a thlêm ṭâng ṭâng a, "Khûma, ka inringhlel tak zet a ni. I kal hunah rawn lang chhuak ta se, i fa hi lo pai ta reng i la. Nang rawn lêt leh ta si lo la engtin nge ka awm ang?" tiin a ṭahawh tak meuh meuh a, Khûma chuan "Zâmte, hlauthawng mah ta che. Ka lo haw anga, ka nei nghal ang che. Ka kianga i awm hun tur suangtuah rân chungin hlawhtlin ngei tumin ka bei dawn a ni. Kal lo ta i la, khual khuaa ka ṭhiante'n 'Pasalṭha Khûma chu a lâwmnu pawnfen hnuaiah a biru e' tiin min sawi ngei dawn a sin. Tin, tun hun hi keini luseite leh pawih ho inkâra inhmelmâknain a tawp a thlen hun pawh a ni hial mahna, ka kal ngei a ngai a ni. Ka tiam a che ka lo haw leh ngei ang"tiin a biang chu a han chûl sak a, Zamliani chuan a thlem thlu zo dawn chuang lo tih inhriaiin Khûma biang tawn tawnah chuan a dawm a, "Anih leh ka ring che a, ka ring leh ang che. I lo haw leh ngei ka ring. Ka hmangaih che. Huaisen takin va che la, hlawhchhamin rawn haw suh ang che" tiin a thlah ve ta zawk a. A tûkah chuan tlangval kal turte inthlangin nilêngin an inbuatsaih a, zan lamah erawh chawl hahdamin a ṭhenin nula an rîm a, an lawmnute an hmuh tawp berna tur a ni tih lam reng ngaihtuah loin zan hun chu an hmanga, Khûma leh Zamlianite pawh chu zân hun chu an hun tawp ber a ni rih dawn tih hriain an khaw lungdawh chhak lawka sawntlung pawng awmna lamah chuan hun an hmanga an âm dûn hle. A tûkah chuan tlangvâl sawmsarih rual chuan Thingfal khaw lam an pan ta mup mup mai a, kawng laka zan khat an riah hnuah behliang mûn hun velah khua an va lût a, Lal Roṭhuama leh a unaupa Lal Rothanglûrate chuan an lo lâwmin Khuma leh Zingate chu Lal in lamah an innghah tîr a. Khaw dang tlangvalte pawh a tuk lawka an rawn thlen ve mai an rin thute hrilhin zanriah tui ti takin an kîl tlâng a. Lal Rothanglûra fanu mal Rosiami chuan Zînga chu a melh leh zauh ṭhin a, a châng leh a han zai leh ralh ralh ṭhin a, Khuma chuan Zînga nghawk zeuh pah chuan, "Lalpa i khua a nuamin in nulate pawh an hmelṭha kher mai. Kan rawn thlen hlima khaw chhunga lo awm hote pawh khati an nih chuan a dang tam tak ṭha tak tak an la kat nukin ka ring" a han ti a, Lal Rothanglûra chuan "Chuti em ni? Ka khaw nulate hi an felin an mawng a zâng tlâng viau a sin. Mahse, chutia han chapo puo tur khawp a khaw dang nula el pha erawh an ni bîkin ka ring lo." a lo ti a, Khuma vêk chuan, "Khaw dang nulate pawhin i khaw nulate an tluk bîk lo e. Hei ka unaupa pawh tutak ngaihtuah leh tawh ang maw, a ni leh ni lo angin a ngawih ve ngul hi" a han ti zauh va, Lal Rothanglûrate unau chu an lo nui kur kur a.

A tûk zîngah chuan Khumate chu hma takah thovin khua chu an fang kual a, mite chuan an be ṭhain lêng lut tura sawm tu pawh an kat ve nuk mai a ni. Tuikhur kawng zawn an thlen chuan tuikhur lam aṭanga nula rawn haw pathumte hmel chu a dik lo riauin an hria a, mahse, zawt buai lem loin tuikhur lam pan chuan an kal a, tuikhur lan theihna an hmuh chuan Lal fanu Rosiami lo âng tawn tawn chu hmuin, "Nang hnamchawm hmeithai fanu ve mai khan mi thâl sak ṭha duh lo vei a maw? Ti khan ṭha tak khan thâl hle hle ang che, zak thei lo lutuk" tih pahin nula pakhat hi a lo kawk sawk sawk a, Zînga chuan "Aw haw, hmaihnih nei" a lo ti chhuak sap a, Khûma chuan "I zu pawh dawn nge?" a han ti a Zînga chuan "Tehnang. I kal teh ang" tiin khaw lam pan chuan a kal ta vawk vawk a. Nau rilṭam hun a lo thlen meuh chuan Zehtet, Bualthleng leh Bungtlâng lam aṭangte'n tlangval an lo thleng khawm ta mup mup mai a, Thingfal khaw mipuite chu an buaiin mikhual an ngah hle. Ngurdâwlate, Hrângvungate, Rûnlianate, Zîngchhuanate leh Thangkhûmate han inhmu khawm leh chu an hlim tlâng hle, an naupan deuh laia an inhmuh bâk an inhmu leh ta si lo va, an hmelhmai inthlak danglamna te chu inhmuh sakin nunhluite an sawi sap sap a, an inngainatna chu a la dang chûang hauh lo. Bungtlâng Pasalṭha Zakulha chu an zîngah chuan a lawr vûn mai a, a palianin a hrawl hle, a ṭhian Pasalṭha Hrângliana nen an han din dun phei chuan an hlauhawm dûn khep khup hle. Chung pasalṭha rual awm khawmte chu Lal Roṭhuama leh Lal Rothanglûrate chuan lungawi tih hriat takin an thlir vawng vawng a. Zanriah ei khamah chuan Lal fanu Rosiami chuan thiam takin Zînga chu daikal pui turin a han sawm a, Zînga lahin hnawl vak dan thiam hek suh a zui ve ta ringawt a, Khûma chuan a ṭhiante hnenah chuan zawi sapin Lal fanu chanchin chu a hrilh a, midangte pawh chuan mak an tiin Lal fanu hmelṭha, nunmawi tak ni a an hriatin rilru tenawm tak a lo pu chu a zahthlak an tiin mak an tihthu an sawi sap sap a, Ngurdawla chuan "Zînga chuan engtin tak va ti ang maw?" a lo tih chuan a tu a te pawh chuan sawi hranpa ngai loin an tihtur chu an chiang tlâng hle; rang takin Zîngate liamna lam chu an pan ve ta a.

Zînga chuan Rosiami thlêmna chu hnawl tumna a nei lem lo a, nula buan chak lo tak a ni bîk lo tih a hriat bâkah a duhzawngte lakah erawh a inphal fo tawh ang tih chu a ring nghet hle. A rin ang chiahin nula thianghlim chu a lo ni hauh lo a, engkim mai chu a vawi khat tihna a ni lo tih hriat takin a zei thlarh mai a, Zînga pawhin rin ai takin nuam a ti a, a su tlauh tlauh mai a ni, a thlang lawkah a ṭhiante hoin an kap dawm rûn chung an thlir reng tih a hre hauh lo thung. An duhtawk an ngah hnu chuan Zînga chuan thawhsanin a puan a ven san mawlh mawlh a, Rosiami pawh rawn tho chhuak vein a puan tla chu bih nghal mai loin a han thing fai leh rih phawt a, a taksa ngo mam nalh tak mai, a nauchaw bawm lian ṭha nelh nawlhte leh a kumkar zawng zawng nen a thlang lawka mite'n an hmu vek tih rêng a hre pha lo.

Thingfal Zawlbûk thawm chu a la ṭhat ber ṭum ni hialin a lang a, an pasalṭha rualte inbuan chu hmuhnawm an ti hle, Lal Rothanglûrate unau pawhin an en ve hial a ni. Pasalṭha Zînga leh Rûnlianate inbuante, Pasalṭha Khûma leh Hrânglianate inbuante, chutiang bawkin Zakulha leh Hrângvungate, Ngurdâwla leh Zakulhate, an thiam bawk a, hmuhnawm pawh a hmuhnawm hle a, mahse inbuanah na na na chuan an zîngah pasalṭha Zakulha chu a chak ber a ni. Inbuan an duhtawk hnu chuan mutmu tuah turin an intin ta a. Khûmate ho chuan Zînga chu an han chhaih leh zauh ṭhin a Rûnliana lah chuan "Nula daikal hruai loh zânah kan ti leh ang" a lo ti ve chhên bawk a.

Falam Lal Neihkhawla chuan a upate hnenah chuan, "Lusei hoin min rûn an han tum vei a maw? Lo kal teh se an châk lo ang. Tlangaupa rang takin tlangval ko la, ka puzawn te khaw lamah leh ka nau Bawlthanga khaw lamah kan chanchin hi va thlen teh se. Lusei ho chu lo nuai chimit vek i la a ni mai alawm." a han ti a, a thusawi tawp lam chu a vîn tawhin a chher tawh hle. Tlangaupa pawh chu rang takin a chhuak nghal a, a hnu rei loteah tlangval pali nen an rawn lut a, Lalpa chuan an kalna turte hrilhin Lusei ho nuai chimih a tumnaa pui turin a puzawnte khaw lam leh a unaupate khaw lamah chuan a tir liam nghal a. An chhuah fel hnu deuh chuan Lal in chu chhuahsanin veng mawng lam a pan vang vang a, in tâwp bera awm, hmeithai in tih hriat takah chuan lûtin nu pakhat, a nulat lai chuan a hmelṭha hle ang tih tûr lo ṭhu chu koin, "Hniangi khawnge Hlawncheuva?" a han ti vîn tûar a, chu nu chuan hlauh hmel takin, "Lalpa, lo lamah a kal anih kha. A lo lêt ṭep tawh ang" a lo ti khur zawih zawih a, Lal Neihkhawla chuan ,"Hniangi i fapa hian min ti hmingchhe hle a ni tih hria ang che. Nang, ka hmei laka ka fa hrin a nih avangin ka duh sak em em a, ka nupui nêna kan rîla rahte ai pawhin ka hmangaih zâwk tih chiang takin nang pawhin i hria. Mahse, hetia a farnu ngei mai laka sâwn a thlâk hi ka hrethiam lo hle. A nun ka zuah chhan tur hi thil pakhat chauh a awm. Lusei hoin min rawn beih a tum a, chumi hunah chuan a hlawhtling ngei tur a ni. Anih loh chuan keimah ngeiin a lu ka la ang. " tiin a âng tâwn tâwn a, chutih lai tak chuan Hlawncheuva chu sakhi tuai akin a rawn lût a, a nu hlauthawng hmel a hmuh chuan a thinur hle mahse, a pa hmel dur khup a hmuh chuan thil enge maw tak a awm tih hriain," Ka pa, i lo kal a ni maw? "a han ti zâwi sap a, Lal Neihkhawla chuan vîn zetin," Lusei hoin min rawn rûn an tum a, nang lah i lo ram vâk vêl mai mai a maw? He indonaa i hlawhchham anih chuan keimah ngei hian pialrâlah ka thawn dawn che a ni. "tiin a chhuahsan nghal a. Hlawncheuva hi Pi Hniangi leh Lal Neihkhawla te fapa a ni a, Pi Hniangi hi Lal hmei ni ṭhin a ni. Hlawncheuva a rawn pian rual deuh thaw hian Lal Neihkhawla nupui Thangruali hian fanu Thangdâwni a nei ve a, Lal Neihkhawla hian a fanu ngaihsak loh va Hlawncheuva mawlh a ngaihsak avangin Lalnu Thangruali hian a thik em em a, a hnawhchhuah tîr a ni. Mahse, chu chuan Lal Neihkhawla'n a fapa a hmangaihna chu a tih tlem phah chuang lo va, Thangdâwni leh Hlawncheuva inngainatna pawh a ti dal pha chuang lo. Mahse, Thangruali chuan a fanu chu thiam taka a rilru kawih her sakin Thangdâwni leh Hlawncheuva te an nulat tlangval hun a lo thlen meuh chuan Thangdâwni chuan a pain a mah aia a pian hlim leh a naupan têt laia a ngaihsak zawk Hlawncheuva chu a haw tawh hle a, a nau chiah mahni tawka pasalṭha inti ve tak, a nuin a pian hlîma Hlawncheuva tihêl nan taka Hlawnkhûma tia a hming a phuah ngat phei chuan Hlawncheuva chu a haw zual hle a, kawng engkima a tluk loh anih vâng a ni. Mahse, an pa berin Hlawncheuva chu in aṭanga a hnawhchhuah chu tawk a tih thu leh a chunga thil ṭha lo dang thlen tîr leh a phal lo bur mai bawk si. Hlawnkhûma chu a nu rilru chhia zawng zawng chhûn fuhtu a ni a, a nu ai mahin a ngaihtuahna chu a rapthlâk zawk bawk a ni. An khaw nula hmelṭha leh fel, nupui atana a ît em em Dawlthangi te ina a lên ṭuma Hlawncheuva leng ve chu a thîk em em ringawt mai a,Hlawncheuva leh Dawlthangite inkarah engmah a awm lo tih chu hre mah se a rilru chhe lutuk chuan a thîk tir tlat si. Chutih lai chuan a u pawhin Dawlthangi u Zungbilha chu mitmei a hmuh ṭha thei hle tih a hria a, chu vângin a unaunu a hmangaihna dah ṭhain ruahmanna verther tak a siam ta a, a u leh Zungbilha te chu hmun fâl deuha an inhmuhrûk theih dan dapin an tana ṭhahnemngai tak anga langin a inhmuhruk tir fo mai a, ṭum khat chu naupang tîrin 'Hlawncheuva hnenah va kal la, U Dawlthangi' n tuikhur kawngah min lo nghak rawh a ti va ti ang che. Ka tir che tih hi sawi lo la Sairawkherh ka pe ang che" tiin a thlêm a, naupang â tih takah lawm takin a kal ve mai a, chuan a u hnenah 'U Zunga' n tuikhur kawngah lo kal rawh a ti' tiin a hrilh ve thung a, thim thama chutia Hlawncheuva leh Thangdâwni awm dûn chu Thangdâwni chuan Zungbilha tak tak emaw tiin a be siam siam a, a aw lah chu a noin a nêm si, Hlawncheuva ngei pawh chuan a unaunu a ni tih a hre lo hial a, a chhan chu awka vîn tak baka a biak ngai loh vâng a ni. Chutia a hmeichhia zawk a sam viau takah chuan Hlawncheuva, hmuhsitna tinreng a tawrh vânga mi nunrâwng taka chhuak ta, nula tam tak pawngsual tawh leh amah mitmei hmuhtute apiang zawlpuan phah pui hmiah hmiah zêl mi chuan hnawl phal hek lo a unaunu ngei chungah chuan a su ta tlauh tlauh a, an zo fel an haw dun chu an inhrechhuak ta, an zak ngei mai. Dawlthangi chuan "Hlawncheu, ka pa sâwn mai maiin min pawngsual man hi i hre khawp ang" tiin a vau khar khar a, mahse, Hlawncheuva chu a fing tlat, a lawmnu pawh niloin a rawn sawm hlawl danah thil dik lo a awm ringin engkim lo hre ve turin a nau ang maia a en, amah ang bawka hmeithai fa Zathanga chu an inhmuhna chhak lawk, an ṭawng hre pha vekin a lo bihruk tir khiau si, Thangdâwni'n chung a hriat chhuah phei chuan a thinur lutuk chu a puakkeh lo chauh a, engmah sawi ngam loin a insawh a insawh ta mai a ni. A vanduaina belhchhah turin Zungbilha chuan a lo hre ru a, 'I rai anih pawhin mi puh hauh sih' tiin a lo vau ve bawk si. Chutah a hlauh ang ngeiin a rai leh nghal, a mangang lutuk chuan Hlawncheuva chu a puh ta tawp mai a ni. Heng zawng zawng hi a ma nau ngei Hlawnkhûma'n Dawlthangi a ngaihzawn vâng leh Hlawncheuva chhiat vekna a duh vâng a ni reng si. Hlawncheuva te nufa chuan vauna an tawk nasa hle mahse, chutih lai tak chuan Lusei hoin rûn an tum thuin an unau kara hmingchhiatna chu a rawn hliah khuh ta a, Lusei ho lo dang turin Hlawncheuva chu an mamawh tih Lal Neihkhawla'n a hre khiau bawk si a, chu vangin a chungah an thinurna an la leihbaw em lo a ni. Pi Hniangi chuan a fapa muhil lai chu enin "Taite, kan chan a chhe hle mai tiraw? Lungngai suh khuanu'n a vêng che nga, phuba i la la vek ang tih ka hria alawm." tiin a mittui luang chu a hru hul a, mut zai a rêl ve ta a. Thîkna aṭangin hmuhsitna a lo pianga chung zawng zawng tuartu hmeithai fapa Hlawncheuva chuan a nu chauh chu hmangaih a nei a, tumah rin zah a nei ngai lo. A unaute ngeiin an enhrangib an hmusit em em a, chutiang reng renga nunhmang ta chu thinrim inhrikthlâkna tur a hmuh apiangin rawng tak takin a che ta mai ṭhin a, a huaisenna rawng taka a lantir vâng chauhin an khaw tlangvalte'n an en sâng a, an hlau tih a hriay avangin an en sânna leh an hlauhna a tawp mai ang tih hlauin rawng tak takin a chêt chhunzawm zêl a ni. Amah ṭhian ang taka kawm tu leh zah em em tu a neih awm chhun chu an ṭhenawm hmeithai fapa Zathanga chauh a ni.

Ni hnih a liam meuh chuan Falam khua pawh an inring tawh hle, Hlawnkhûma pawh a nu nuṭa pa fapa Pasalṭha Thanghlira kiangah chuan intivei takin a tei thauh thauh reng a, Lal Neihkhawla nau Lal Fungliana fapapasalṭha Duhmanga erawh Hlawncheuva kiangah a tap chawt thung. Pasalṭha huaisen palite inkarah chu chuan in erna a chawk chhuak nasa hle a, unau vek ni si chu an chhungrilah indona a awm a, Lusei ho laka thangṭhat lak loh hlau vek an ni. An khua chu kulh rinawm tak siamin an hung chhuak vek a, hmelma tan pawh a luh mai mai theihloh tura rinawmin an siam a, chutah tuibur hmuamda kal vêl a hla ah ralven bûk rinawm tak an sa thliah thluah bawk. Lal Neihkhawla chu a bathlarah ṭhuin vân lam a hawi a, a fate ho zînga boruak sosang tak inmung mêk avang chuan a rilru a hah hle. Tu ber hi nge hotu bera dah tur pawh hrethiam loin a tu a te pawh chu a lala vuivai ngam tur veka a laina hnai leh a thisen zawm puite ngei an ni bawk si. A thinlungah chuan a mumanga putar pakhatin 'I fapa chu ṭiau râl pasalṭhate zînga ropui ber a la ni anga. Lusei pasalṭha huaisen em em lu la tu a la ni ang' tih a hrilh hnu lawka lo piang Hlawncheuva chu a lian ber a, mahse, hruaitu nihna a pe anih vaih chuan Hlawnkhuma leh Thanghlira lung a awi dawn si lo. A tûk zînga a upate nen ngun taka an ngaihtuah tlân hnu chuan an zînga upa ber Duhmanga chu hotu berah an ruat ta a, chumi ni nileng chuan inbuatsaihin zan lamah râl vêng an indah bawk a, an inring penpawn tawh hle.

Falam khua inhung chhuak vek leh ralven buk an sak rinawm tak takte chu Lusei tlangvalte chuan an hmu vek a, beih dân turah an inhnial buai nasain a ṭhenin ralven bûka mite beih a kulh kawngka hnai ber aṭanga bawh nghal huk an duh laiin a ṭhenin khua chu hêl a, chhak lam a khâm sâng tak lawn tûr awmna lam pan an rawt thung. An lu a hai tlâng hle. Khûma chu rawn ding chhuakin an vai chuan an lo en ṭhap a, "Kan thu khel hi a holam deuh hlek a ni. Ka ngaihdan kan sawi ange. He khua hi hneh mai mai har tak a ni dawn tih chu kan chiang vekin a rinawm a, remchâng kan hmuh fuh lai tak kan chuh lo anih phei chuan chaurau ek kan thai ngei ang. Ralven bûk panga a awm a, zanriah kîl hunah an inthlâk ngei dawn. An inthlâk veleh khaw lam pana kalte kan that ang, silai kan hmang tur a ni lo thung. Khaw lam pana kalte kan dahṭhat laiin bûk lama awmte kan lo dahṭha leh bawk ang. Ralven buk kan hneh veleh bûk bul hnaiah kan vaiin kan biru vek ang a, bukah tlangval tlem a zawng kan lo awm ang. Zanlaiah an inthlâk leh ngei anga, chumi hunah chuan bûka awmte chu khaw chhungan kan lut ang. Buka awmte chu a hma mi ang bawkin silai telloin thah leh vek tur. Khaw chhûnga silai a puah veleh kan bawh huk tawh mai dawn a ni. "a rawn tih chuan ṭha an ti tlâng hle. Zînga chuan," Khaw chhunga silai a puah khan Lal in aṭanga rawn puak ni rawh se. In awm hmasa apiang hâl nghal zêl loin a chhungah kan lŭt anga, kan lusei farnu sala an mante chênna anih chuan kan chhan chhuak vek ang. Lusei awm lohna erawh hâl nghal zêl tur. Silai kengte erawh in chhunga lut ve loin khaw laia hmelma tlangvalte pialrâla thawn liam zung zung turin inawm thung ang. "a rawn ti leh a, kut an beng ta dar dar a, Hrângliana chuan hmâna a pa thusawi," Nangni kai hruai thei tur mi pahnih an awm"ti a Zînga leh Khûmaye chanchin a hrilh kha hre chhuakin a dik zia a hre chiang ta hle. Be hliang mun hun velah chuan chhuakin khaw daiah tlangval tam zawk an lo awm a, pasalṭha ho chuan tlangval panga ṭheuh hruaiin ralven buk lam chinfel hna chu an thawk ta a. Zînga leh Khûma hote chu an hah bîk hle a, a chhan chu ralveng khaw lama lûtte va umzui tu an neih ve loh vângin anmahni bawkin an ûm a ngai a ni. Midangte erawh ho khatin bûk a mite an beih laiin ho dangin khaw lama kalte an bei leh hman zel thung. Lêng lên ar a khuan thliai thliai lai chuan Lusei tlangvalte chuan Falam ralven bûk an luah tawh a, bûk chhungah chuan tlangval panga ṭheuh awmin midang zawng chu bûk bul hnaiah chuan an lo biru thung a. Zanlai ar khuan rualin halkha pawih tlangvalte chuan bûk vengte chu an rawn thlâk ta a, chu veleh tlangval ho chu Tinthanga leh Thangvunga kaihhruaina hnuaiah khaw chhungah chuan an lût a, Lal in lam an pan ta vang vang a. Lal tual an thlen chuan Zawlbuk lam chu hawiin kah an chak zek zek hlawm hle. Mahse, an tihtur tih vat an mamawh tih hriaiin Lal inah chuan thawm dîm taka lutin Lal Neihkhawla leh a nupui Thangruali bakah an fanu Thangdâwnite chu an ṭham tho ta a, Tinthanga chuan halkha ṭawngin, "Lal nunrawng, i pasalṭha leh i khua i chân dawn ta" tiin a silai chu vân lam hawiin a kap puak ta dur mai le!! Rei lo teah thawm rawn awm nghalin, "Ka chhungte kha chhuah rawh u" ti ṭeng chhuai ri an hre nghal a, an ni erawh an nui vur vur thung. Chutah "ral ral ral" tih thawm a lo awm ta, khua chu rawn kâng ṭanin silai a rawn puak ta ṭhuai ṭhuai bawk si, Lal tual lama tlangval awm khawm ho chu an tlu phawk phawk a, Hlawncheuva chuan, "Ka u, ka rin ang ngeiin a thleng e. Ka thi ngei dawn tih ka hria. Kha pasalṭha khan min rawn zawng chhuak ta ngei anih hi. Eng pawh ni se khi Lal fanu lepchiah zet khian ka fa a pai niin a sawi si a, a lo pai ta tak tak anih chuan lo enkawl ang che. Nangmah anga nun ngil tak neih tir la, a pa anga nunrawngah chhuah tir suh ang che"tiin pasalṭha Duhmanga hnenah chuan a hrilh a, Duhmanga chuan, "Ka nau, i dam anga, i nu nen kan khaw lamah min zui haw ang chu le. Huaisen takin lusei lu nen kan haw ang chu le" tiin a chhâng a, thu tam sawina hun a awn tawh lo, an silai chuhin lusei ho chu an bei let ve ta a. Mahse, an ralven buk fing taka rawn paltlang tu Lusei ho chuan khua chu an la zel a, lusei sal nulate phei chu khaw chhungah chuan hmuh tur an awm tawh lo. Lal tualah chuan halkha ho chu mipa zawng zawng an awm khawm a, lusei ho chu an kâp lêt ve reng bawk. Hlawnkhûma chuan a unaupa Hlawncheuva chu va auin, "Pasalṭha nunrawng, i tawte kha a sâi ta em ni? Kal la chem sen nen va bawh ta che" tiin a rawn tih el a, Thanghlira chuan, "Hlawnkhûm, khatin ti mah che, i pa fa ve deuh reuh anih saw" tiin a rawn deuhsawh zui a, Hlawncheuva thinrim lutuk chuan a chem chu a han dap nghal a, mahse, Duhmanga chuan lo dang vatin, "Hlawna, i rilru kha fim takin dah tlat rawh." tiin a kal san a, a naute ho chu a au khawm mawlh mawlh a. Zan khua a rem leh rem lo a an inkah hnu chuan khaw rawn vâr rualin chem sen nen an inbawh ta a, chu veleh Lal ina tawm ho chuan silai rawn hmet puakin pawih tlangval hnung lama awm ho chu an thal leh ta phawk phawk mai a, an rilru phawk lek chu a ṭhen an hawi tang hru mai a.
A khat mawi tawka silai a rawn puah reng hnu chuan Lusei tlangval sawm rual zet chu an rawn chhuak a, hnung lam aṭangin an rawn bawh buai leh ta. Halkha ho dinhmun chu a chhe ṭan ta hle. Lusei ho lah an rin ai daihin an lo tam bawk si, rei lo teah an rawn hual ta mai. Mahse, tlawm ai chuan thih an duh tlat. Chu chuan huaisenna pe tharin an zawna mi te ṭheuh chu an bawh leh ta riap riap mai, hnam kawlh sen tih takah Lusei ho tan pawh an sak ve ṭalh. Pasalṭha Duhmanga leh Zakulhate inthlurbing pawh thisen an hloh hnem tawh hle a, an chau dun tawh hle. Hrangliana chuan hmu vatin a pan phei zêl a, mahse, a rin loh tak thil a thleng ta, Zakulha hnung lamah chuan pawih tlangval pakhat hi rawn tlânin Zakulha chu a rawn tlawh bawkkhup ṭhuai mai a, Duhmanga chuan thawk hlawi hlawi paha panin a nak chu a hup deuh ṭat bawk. Hrangliana chuan pawh vat duhin a hma chu a vai kiang sawk sawk, mahse, a duh angin a pawh mai thei lo. Zakulha chhip sama Duhmanga'n a ṭham lai tak chuan Lal in lam aṭanga silai rawn puak ṭhuaiin Duhmanga chuan a malpui chu hup chawn chawn chungin a thal pui nghal a, Hrangliana'n chu chu a hmuhin a thaw huai nghe nghe. Khûma lu Hlawncheuva'n a sat hrang nawlh lai Zînga'n a hmuh meuh chuan a hmelhmai chu rawn inthlâk hlawkin ramsa kawlh tak hi a ang zo tawh a. Hlawncheuva lama tlan nghalin a au ruai ruai bawk a. Hlawncheuva pawh chuan lo hmuin, a u Duhmanga nikhaw hre lo a let reng chu enin "Ka u, anih mai aw. Zathanga leh ka nu hi lo enkawl rawh aw" ti sapin Zînga hmachhawn tur chuan a insiam rem nghal a. Mahse, Zînga'n a mah a rawn pelh fel rual chuan a pum thîp zawk chu a hre ruai hman a, a bâk chu a ngaihtuahna chu a mumal tawh hauh lo. Zînga lam chu hawiin mak ti takin a en hu a, thil rawn phe vuai chuan a khaw hmuh chu a ti tawp nghal a. Lusei pasalṭha ho thinrim au aw chuan khaw chhung chu a luah hneh hle. Hlawncheuva leh Thanghlirate'n Hrangvunga an lo beihrawn lai chu Hrangliana chuan hmu vatin "Pasalṭha Thanhranga tupa lu lak in tum a maw? Kei pawh hi a tupa chu ka ni a sin. Inzat leh inzat in ti ang aw" a va ti a, Thanghlira lam pan chuan tlan nghalin Hrangvunga leh Hlawnkhûma pawh an inbawh nghal rawp bawk. Tinthanga hawi vêl chuan Halkha tlangval ho hnung tawlh hret hret chu hmuin Thangvunga leh a bul hnai tlangvalte chu hruaiin Halkha ho hnung lam aṭang chuan an rawn nawr ve leh ta. Halkha ho chan chu a chhe tawh hle. Hlawncheuva a tlu tawh a, Hlawnkhûma leh Thanghlirate an tlu tawh bawk. Duhmanga lah nikhawhreloin a ket reng bawk si. Loh theih lohin an inpe ta a. An inbeih zawh meuh chuan nau rilṭam a hun dêr tawh a ni. Zînga chuan Lal Neihkhawla chu "Ka unaupa'n pialrâl a lawi laia i tlangvalte la dam hi enge a ṭulna?" tih pahin pawih ho inpe tawh chu a sâm leh ta mai, an hlauin pawih ho lah chu an lo ip chawih chawih a. Tinthanga leh Thangvungate chuan va man betin midangin an rawn pui bawk a, an ṭhelh thei hrâm a ni. Lal Neihkhawla erawh sawi tur hre loin a khaw kâng chhe vek chu a en kual a, a fapa Hlawncheuva ruang chu melhin a mittui a sur a, lusei pasalṭha huaisen tak Thangkhum lu la tu ni mah se Thangkhuma unaupa Zingchhuana'n a lu a lak sak ve leh ta si. Zînga ber a fim miau si lo a, Hrangliana chuan ro rawn rêlin, "Hnathawk thei apiangte kha salah kan man ang. Ka pa hian sal neih duh ngai lo mah se, a ṭulna in min ur thlu tlat. Lal chhungkua erawh kan nun hram tur a ni. In mi thahte luvun kha lip u la, kan hawn dawn nia." a rawn ti zuai raih a. Tlangval ho chu an che ta sang sang a, an tlangval thite chu Falam Lal tualah chuan an phum a, khur khatah panga te phumin Khuma erawh amalin an phum thung. Falam Lal leh upate hausakna chu an laksak vek hnuah khua a inkang bang la awm tlemte chu an hâl leh a, ti chuan Sal nen an chhuah san ta a.

Kawng lakah chuan pasalṭha ho chu an ngui em em hlawm a,an ṭhian, an u, an hruaitu ni bawk Khuma chu an mitthlaah an hmu a, an ngaiin an mittui chu a tla leh ṭhin a, an naute hmaah zah pawh an dawn thei lo a ni.. Zakulha hliam chu a nain a dam chhuah pui loh mai an hlau hlawm hle. Zan a lo thlenga an rin ang ngeiin Zakulha chuan Khuma a zui ve ta. Hrangliana chuan zah pawh dawn lovin a ṭah rawih rawih a ni. Zînga chuan Khûma thuruk a hriat chu sawi chhuakin, "Khuma hian hmangaih a nei a, tunah hian a fa a pai mêk tawh mai thei." a han ti sap a, chu thu tawite chuan pasalṭha ho rilru chu a vêl nasa zual hle. Loh theih lohin khaw lam an pan zêl a, Thingfal khuaah pawh ngui takin an lut a, an hnehna chan chuan an lawmna a thlen pha si lo. Zîngate'n an khua an luh dawn phei chuan an huphurh hle. Luh ngei an ngai si, thawm engmah nei loin an lut a, a lo hmu hmasa apiang chuan chanchin rawn zawtin an lo lawm pui em em a. Lal tualah innghatin khaw mipuite pawh an ṭhahnem hle. Zinga chu Lal inah a han lût a, rei lo teah Lal Zabiaka chu a rawn ṭap chhuak ta rawih rawih mai le, "Ka pasalṭha, ka fapa ang hiala ka en Thangkhum, i pa kha min li biak rawh aw" a rawn ti vawng vawng mai. Chu thu chuan Rotlâng khua chu a vêl nasain ṭap rawih rawih thawm chu a rawn ri nghal a, nutling, patling, tarte thlengin an mittui a tla a ni. Zamliani pawhin a hmangaih ber, a thianghlimna a lo hlan tawj, a hringnun chhiar liam pui atana a thlan Khûma thi chua tuarin khawtlang hriat an nih tawh bakah tunah hian Khuma fa a pum chhungah a insiam mêk si. A na lutuk chu inkhung chawtin a ṭap renga, chaw a ei lo va, tui a in lo va, biak pawhin a chhang lo, Khûma nen a an hun hman dun lo chu a ngaihtuah thei lo a, a rilruah eng dang mah a lut thei lo. A fiamthute, a ṭawngka te, a aw te, engkim a ngai vek. . Khuma nu leh unaute chuan hnemin an kan chhên a, mahse, awm zia a awm chuang lo. A taksa chuan chhiat lam a pan zêl a, ni sarih lai chutianga a awm hnu chuan, Zamtei, nula hmelṭha leh fel chuan Khuma a zui ve ta. Zînga chu Zamtei te bathlarah chuan chhuakin silai a keng a, "Thangkhûm,Zamtei a lo kal ve kha aw, hlim takin leng dun tawh rawh u." tiin silai chu a kâp puak ṭhuai a, ṭap zawih zawih chungin in chhung lamah chuan a lût leh ta a.