THAI KÂWI

Chhûn ni sen sat vânglai a la ni chiah lo va, Ruala leh Thangneuvate chu tlâng thengthaw nuam takah chawlin Chhawrtui khua chu an chhuk thlîr a. Nuam an tih thute sawi dunin an vaibel an pak khu hlarh hlarh a. An thlan a daih hnu chuan kal zai rêl in Chhawrtui khua chu an hnungchhawn ta a. Ni lênga an kal hnuah Chhawrtui perh târna hmun an thleng ta a, Neuva chuan, "En mah teh. Kal lamah khân ka rilru a nu deuh but bawk nen ngaihtuah nachang ka lo hre miah lo va. Lal Thanliana hi a lan ang ngawt hi a niin ka ring lo. Fing hle lo se chu heti khawpa ram zau hi a nei hauh lo ang." a rawn ti charh charh a, Ruala chuan, "Ni e, a thlah kal zêlte'n an la chhuang viau ngei ang." tiin a lo chhâng a. Sairêngi chu a mitthlaah a rawn lang a, a fa a lo pai hlauh anih chuan Lal Thanliana te pafa in an enkawl sei lian anga, Lal huaisen leh fing tâk a la nih ngei pawh a ring. Zan riah an han bâr zawh hnu chuan meipui chhepin a piah mei ên tâwk vela hlaah bûk pawh sa buai lem...

Chhawrtui khuate chuan an buaina kiang ta hawk chu an lâwm kher mai. A chhan chu an Lal fanu rîma rawn kal ṭhin Tlângnuam lal fape leh a ṭhiante, nunrâwn hmêl hliah hliahte kha an ning tawh em a ni. Chutih rualin, Tlângnuam pasalṭha pahnihte an khaw chhûngah ngei an thih avângin Tlângnuam khua chu an ṭawngkamah an zuam tawh hle tih a hriat mai a, mahse, Lal Thanliana chuan, "An rawn che hmasa anih loh chuan va beih hmasak a ṭulna ka hre lo ve. Pasalṭha pahnih an chânna hian an thin a ti ur viauin a rinawm. Mahse, chuti maia rawn che chhuak ngam tur khawpin Lal Liansailova saw a â hauh lo." tiin a khaw tlangvâlte chu a khap ve thung a. Vân dum pâwl ruih ên tûra thla a lo lan tâkah chuan tlai lama an hun tawn zawng zawngte theihnghilhin nula leh tlangvâlte chu Lal mualah rawn chhuak khawmin, an rawn lâm ta mup mup mai a. Chutah zet zawng Lal Thanliana leh a fapa Thanchhûngate in anna rawn lang ṭanin lêng hâwn âr khuan a hun meuh chuan an lem hnem tawh bawk a, an thlê lûk lû...

Lianuka zâwnna tûr an buaipui sang sang rual chuan ṭhenkhatin sakei vun chu an lo lip a, a sa erawh a tlûkna hmun ngeiah chuan lei lâi khuarin an phûm a, khaw lam panin an haw ta a. Lianuka chu an inah dahin bawlpuin a buai pui nghal vat a. Mi dang zawng erawh Lal tualah kalin Lal Thanliana hnênah chanchin chu an han hrilh a, Lal Thanliana chuan, "Ekhai, naktukah sakei lu chu keimah ngeiin ka âi ang. Ruai ropui takin kan ṭheh bawk ang. Kan Lianuka pui chu zu kan ve te pawh a ṭha e." a lo ti a. A hmelah chuan a lawm nge lawm lo tih hriatthiam a har hle. Zanlai âr a khuan lai chuan Lianuka chu a rawn harh ve a, a khawsikte pawhin zia awm lam a rawn pan tâkah chuan tui takin a muhil ta siai siai a. Amah men puitu nula leh tlangvâlte pawhin hâw zâi an rêl ve ta a. Ruala leh Thangneuva te pawh Zawlbûk lama lawi tawh loin Lal in lamah an chho va, an han mu ve ta a. An kawng kal chau nen, sapui huaisar leh huhâng ngah tak beiin an chhuak leh bawk si a, an chau hle a, tûk ṭhuan ei...

Zîng khua a lo vâr a, Zawlbûk riak vâl rualte pawh mahni in lam panin an kal vang vang hlawm a, Thangneuva pawh an inah hawin a inphih fâi sawk sawk a, a pa, a vânglaia pasalṭha hming pu ve ngat ṭhin, vânduai thlâk taka sapui an beihnaa a chêt sual vânga ramtui lei lo ni ta lam pana kal vatin, "Ka pa, nizan i mu ṭha em?" a va ti a, a pa Thangsira chuan, "Mu ṭha e. I nau hi a la tho ve lo nge a va la rawn lang lo ve?" tiin a lo chhâng a Thangneuva chuan, "A lo haw ve mai turah ka ngai. Ka pa, thil zawh duh che ka nei a. Tlangnuam khua hi khawi lama awm nge anih i hre mial em?" a han ti a, a pa chuan, "Chhûnkhŭm khua aṭanga kalin a hnâi berin ka ring a, mahse, Chhawrtui lam aṭang pawhin a kal theih tho bawk. Hmâr thlang lama awm a nih kha maw. Engti zia a min zawt nge maw i nih le?" a han ti a, Thangneuva chuan a pa hnênah chuan a thil tum zawng zawngte chu a hrilh vek a, a sawi zawh chuan Pu Thangsira chuan," Ekhai a, chutiang khawp chuan ...

Hun leh nîte'n mual an liam zêl a, Tlungvêl khua pawh an pasalṭhate huaisenna leh an Lal Rothanga rorêl thîamnâ zârah an pung chho ve zêl a, in zaruk nufa lai an tling ta. An tui tlan a ṭha bawka nula tlangvalte tlawntlai a ṭhain khaw dang laka insawi ûanna tham zet an ni hlawm a, nula hmelṭha khual kâi pawh sawm chuang lâi an nei ve ngat a ni. Chutih rualin pasalṭha lah an ngahin Mankûnga leh Rolianate chhiar tel phei chuan sawm an chuang daih bawk a, mahse, a langsar ber pathum khual khua thleng thlenga hming chher thei Rualthanzauva, Thangneuva leh Thangzîngate chu pasalṭha dang, an hliah hneh êm avânga thang ve lêmlote pawhin a an chung en leh mi zawng zawng zah rawn an ni thung. Lal Rothanga'n a fanu atâna a lâk Zalianmawii lah a lusûn khawharnate'n ziaawm lam a rawn pan ve leh ta bawk nen a hmelṭhatnate chu a rawn lang thar deuh deuh va, pathlawi tam takte phei chuan a châwn vâr lang zauh ringawt pawh khum pui lamah suangtuah zuiin an suangtuahna khawvelah an thâi ...

Darzo khaw chhûngah chuan nunau mangangte chu an tlân chhe nasa hle mai a, belh tûr ber pawh hre lo vin tualah an tlân kual a, an fate an hmuh loh avânga lo ṭap ruai ruai lah bo lo, Thangneuvate lah chuan nunrâwnna chu nunrâwnna bawka thung rulh an tum tih hriat takin an silai an hmet puak dur dur reng mai a, Darzo in zathum nufa zet tân pawh Pasalṭha Zabuanga kaihhruai ṭhin Rualthanzauva bula nitin a tap kawi ṭhinte chu an khauh mah mah a ni. A upa ber Zâmliana sir tawn tawnah Thangneuvate unau an han ding chat a, an mahni beih lêt tum apiang an li thal zung zung bawk si. Darzo ho lah an hlawhtlinna lâwmin zantin zu nen an sal man nulate nen na lo che nasa ṭhin bawk nên râl rorum tak tak han hmachhawn tur chuan an pasalṭha te thlengin an tlâk thlâwt loh a ni. Chutih lai tak chuan khaw lu lama in chu a rawn kâng ve leh ta tlat mai, Zâmliana chuan, "Uai, khi lamah tumah kan kal si lo. Eng vâng nge ni ang." a rawn ti a, Thangneuva chuan, "Darzo khua hian hmelma dang an ...