HNEHTU AW RÂWL - 41

Zîng khua a lo vâr a, Zawlbûk riak vâl rualte pawh mahni in lam panin an kal vang vang hlawm a, Thangneuva pawh an inah hawin a inphih fâi sawk sawk a, a pa, a vânglaia pasalṭha hming pu ve ngat ṭhin, vânduai thlâk taka sapui an beihnaa a chêt sual vânga ramtui lei lo ni ta lam pana kal vatin, "Ka pa, nizan i mu ṭha em?" a va ti a, a pa Thangsira chuan, "Mu ṭha e. I nau hi a la tho ve lo nge a va la rawn lang lo ve?" tiin a lo chhâng a Thangneuva chuan, "A lo haw ve mai turah ka ngai. Ka pa, thil zawh duh che ka nei a. Tlangnuam khua hi khawi lama awm nge anih i hre mial em?" a han ti a, a pa chuan, "Chhûnkhŭm khua aṭanga kalin a hnâi berin ka ring a, mahse, Chhawrtui lam aṭang pawhin a kal theih tho bawk. Hmâr thlang lama awm a nih kha maw. Engti zia a min zawt nge maw i nih le?" a han ti a, Thangneuva chuan a pa hnênah chuan a thil tum zawng zawngte chu a hrilh vek a, a sawi zawh chuan Pu Thangsira chuan," Ekhai a, chutiang khawp chuan a ni maw Tlangnuam Lal chu a lo nunrâwng a? Va kal mawlh teh. Mahse, fimkhur la, i pa hi mahni pawha che sawn ṭha hlei thei lo ka ni tawh si a, i nu leh i nau hi i kutah an awm tih hi hre reng ang che. He i thil tum hi i nau hnênah zêp la a ṭha ang. " a lo ti a, Thangneuva chu a lawm hle mai. Ṭanpui ngaite ṭanpuina kawnga hnial ngai lo tu leh fuih zawk ṭhin tu Pu Thangsira chuan a fapate, pasalṭha khual kai an han ni thei hi a lawm em em a, mipa a zawnga pa rum rût chi a lo ni bawk nen a fapate pahnih hi pasalṭha thih dan dik taka an thih a duhsak hle nghe nghe. Thangneuva chu amahin a inbuatsaih chho ta a, a nu leh a naute pawh a bum thei mai a, mahse, Ruala ber hi a bum theia a rin loh avângin a rŭkin a hrilh ta ringawt a, Ruala lah chuan kal ve a lo tum êm êm nghal a. Hnial hneh ta si lo chu Lal in lam panin an kal dun ta a. Lal Rothanga chuan, "Ekhai, ka pasalṭhate meuh in rawn lawi luh chhan hi a ṭha thawkhat viau ngeiin ka ring. Min tlawh serh deuh emaw ni ka lo ti hman hial a sin." a lo ti bawrh bawrh a, Ruala chuan, "Ekhai Lalpa, Liantei hian vâl dang min hawi san a duh ve tawhte kan ring a, kan inthlahrung ta deuh alawm maw le." tih pahin Zalianmawii chu a han nuih suk a. Zalianmawii chuan, "Awi Lalrual, nangni anih kha lêng dang rûn lawi lâwr dun dun chu." tih pahin a lo nuih hawk hawk a. Lal Rothanga zu an han lem sak leh te te hnuah chuan Ruala chuan an thil tum chu a han sawi ta a, Lal Rothanga chuan, "Ekhai, ka khua leh tuite zîngah chutiang mi an lo awm a ni maw? In han sawi takah chuan khumite nufa chu an hmel en reng rengin mi pangai chung lama leng an nih ngei ka lo ring ṭhin a sin. Ṭawng mawi lo ni lo se, kawng hla tak kal hnua khuaa inbenbel min rawn dil laite khân ṭawp hnawk viau mah se, an awka kha a zahawm riau tlat pek a, mak ka tihna a rei tawh a sin. Tlangvâl sawmnga in hruai thei ang. "a lo ti a, Ruala chuan," Ekhai Lalpa kan lawm dawn hle mai. "a lo ti vata mahse Thangneuva chuan," Ni e, Lalpa, chu tluka hlu kan tan a awm lo ve. Mahse, kan pahnih hian kan kal zawk ang e. Keimah chauha kal tum ka ni nghe nghe a mahse, a rûk a râl a chêt chhuah tum ka an dawn em vang chauha hetia in sawi chhuak hi ka ni nghe nghe a sin. Chhumi nu sawi danah Tlangnuam khua hi in zahnih nufa vêl an ni ve a, chu vângin khual pâng zin angin kan va lût rawih mai anga, phuba kan lâkna tura te awlsam taka kan zawn chhuah theih mai ka ring a ni. " tiin a lo chhâng a, Lal Rothanga chuan a han ngaihtuah vang vang a, chutah thawk halh pahin," E, nang berin i tihte chuan le. Kal mawlh ang che u. Neuva, i thinurna kha inhneh tir lo la, i ṭhianpa nen hian va inveng tawn zel ang che u. Khaw dangte'n min chung enna chhan chu nangni hi in ni tih inhre rân u la, in nunna kha va hlut hle ang che u. In chhungte chu lo ngaihtuah reng reng suh u. "a rawn ti ta a, anni chuan lawmthute sawiin an chhuahsan ta a. Sum hmuna lo ding Partei rai puar lung tawh chuan a u hnenah chuan," Ka u, fimkhur takin aw. U Neu, ka u hi veng tlat la aw. "a lo ti sap a, Ruala chuan," Tehreng mai. Kan lo haw hma naute lo la nei suh. "tih pahin a farnu biangah chuan a chûl sak zauh va, an chhuak ta a.

Ni nga zet an thang hnu chuan Chhawrtui khua an thleng ta, khaw mawng lama in lo awm hmasa berah chuan thlen an han dîl a, mahse, in nghâk tu pitar chuan," Vala te u, thlen che u hi kan hnial hauh lo va. Mahse, mi khual rêng rêng Lal thu hmu loin kan thleng thei lo a ni. Kan Lal han hmu phawt u la, rem a lo tih chuan min rawn pan leh mai zawk dawn nia." a lo ti a, an ni pawh chuan Lal in lam chu an pan ve ta mai a. Khaw mi leh sate chuan an lo en duj hle maia, nuam lo pawh an ti ru hle. Thangneuva chuan," Ekhai, he khua hian buaina lian tak an tawk a va ang ve. "a ti sap a, Ruala chuan," Lal hmaa ṭawng dân mawi kan thiam a ṭûl khawp ang. "a lo ti ve bawk a. Lal in an han luh chuan an Lal Thanliana chuan," Khawi lam khaw mi leh sa nge in nih a? "tih pahin a lo thlek khum ngût a, Ruala chuan," Tlungvêl khuate kan ni e. "tiin dam diaiin a lo chhâng a, Lal Thanliana chuan," In hming? "a lo ti leh ha a, a lan dan leh ṭawng dan chu a nêlawm loh hle. Ruala insûmtheihna in tlin ta hek lo, " Pasalṭha Rualthanzauva leh Thangneuva te kan ni e. " a han ti hul hak mai a, chu veleh Lal Thanliana chuan," Uai, in ni tak tak a maw? " a han ti a, chutih lai chuan tap lama ei rêl Lal fanu ni âwm taka lang chu rawn hawi chhuakin Ruala chu a han en vang vang a, chutah," Ka pa, Pasalṭha Rualthanzauva ngei anih hi. Kan khuaah an lo kal ve tawh alawm." a lo ti sap a, Lal Thanliana chuan," Ekhai, ka famoin a hre hlauh che u chu in vanneih pui e. Khawi dangah mah thlen a ngai lo ang. Hetah hian thleng rawh u. Mahse, hria u la ka duh chu sapui huaisâr tak kan khawi lai a ni a, Tlangnuam pasalṭhate lah sawn an Lal fapa nupui atan ka fanu min rawn dil ve chhen bawk nen kan buaina a thuah hnih lai tak a ni. In lakah nêlawm lo chhuah pawh harsa ka tih phah a, min hrethiam rawh u. " a lo ti a, Ruala chuan," Ekhai, kan hrethiam lutuk che. Zan khat chauh i khuaah hian kan riak anga. Naktukah kan chhuak leh nghal ang. " a lo ti a. Lal Thanliana chu an rin ang a lo ni ta hauh lo mai, a nêlawmin a ṭawng duh hle maia, amah a palian êm êm mai bawk nen a awrâwl a ring ṭhain a nui huau huau reng mai a ni. Lal Thanliana'n an kal zêlna tur a han zawh chuan Thangneuva chuan Tlangnuam lam pan an tum thute leh an tum chhante chu a han sawi ta a. Chutah Lal Thanliana chuan, "Ekhai, phuba in lâk theih ngei ka beisei. Naktukah hian ka fanu rîmin an rawn kal leh ngei a rinawm a, nangni tan hun ṭha tak a ni ang." tiin a lo chhang a, Thangneuva chuan, "An Lal fapa Sairênga bâkah an pasalṭha Thangrema leh Liandaiate lu saw ka duh a ni." a lo ti hmuk hmuk bawk a. Lal Thanliana chuan, "Ekhai, naktukah he Lal inah hian i mi duhte chu i hmù em em ang." tih pahin Thangneuva dar chu a ben sak tharh tharh a. Chutih lai tak chuan Chhawrtui pasalṭha, Lianuka an tih chu a lo lût a, a vun hâng ngûk mai leh a pumraw lian thelh thawlh aṭang chuan Lianuka tih âwm rêng pawh a ni. An Lalpa bula a han ṭhu chu an palian dûn si, an titi a nuihzatthlakin an nui dun huau huau mai a, lungkham vak nei ang pawhin an lang lo. Thangneuva chuan, "Ekhai, kan hmelma an ni lo hlauh chu kan vannei hle mai." a han ti sap a, Ruala chuan, "Ni e, an tawh a khirh dawn lulai emai." tih pahin a lo nui ve vur vur a. Lal fanu Thanpari lêng haw chu a pa chuan lo ko vatin, "Hei Chêmte, Tlungvêl pasalṭha Thangneuva leh Rualthanzauvate'n zanin chu chaw hlui min kil pui dawn anih hi. I u Rêngi nên khân chaw hmeh tui deuh lo buatsaih sak ang che u." a lo ti a, Lal fanu Thanpari pawh chuan a u Rêngi lam chu panin a va pui ve nghal a. Lal fapa Thanchhûnga'n Rualate a hmuh chuan a lo lâwm hle a, a pa Lal Thanliana ang lo takin a farnu vanga a mangan ziate chu a lo fah mawlh mawlh bawk a. Zan riah kil hma deuh chuan Thanpari chu a u Rêngi nên thingseng turin an chhuak a, Rualate pawhin puih ve tumin an zui chhuak vat a, Lal tual a, an thing pho an lâk khawm lai chuan Ruala chuan Rêngi hnenah chuan, "Ka hmuh tawh hnu chu ni ngeiin ka hria che a. Mahse tunge i nih ka hre thei ta hauh lo mai." a han ti a, Sairengi chuan, "Ekhai, min va theihnghilh hma ve. Chhûnkhûm Lal in i rawn luhkhung ṭuma kan unaua min hruai chhuah laite kha nimin ang maiin ka la hre chiang a sin. Khatih lai khan kan la naupang tlâng êm a, min hre tawh lo pawh hi a âwm lo lem lo ve." tih pahin a lo nui hak hak a. Chutah Ruala chuan a han ngaihtuah vang vang a, Rochami leh Mankûnga nupui Chhawnite mantu Hrangseia umzui a, an kal khân Sairengi te unau hi an man tawh tak tih hre chhuak lehin a nui ve ta vur vur a.

Lêng lên âr a khuan thliai thliai lai chuan Lal leh upate chu Lal inah an khaw buaina tawh mêk chungchâng sawiin an tîtî a, Ruala leh Thangneuva te pawh Lalpa berin len chhuah a phal miau loh avângin Thanchhungate nen an ṭhu ve kar a. Chutia an lo rik ham ham lai tak chuan "Sa a tla e." tih thawm a rawn awm ta thut mai a, chu veleh Ruala leh Thangneuva chu rang taka an silai leh iptepui lain an tlân chhuak nghal vat a, sapuiin a lo beih chhungkuate in an zu thlen chuan an nu ber chu hlauthawng zetin kawtkaiah a lo dinga, tlangvâl ho hnênah chuan an vawk pui neih chhun sapuiin a lâk thu a lo hrilh mêk a, kawmthlang lama a hnuhthlâkna lam pan chuan tlangvâl ho chu an kal ta zung zung a. Chu sapui huaisar chu a ṭam ngang ni ngei tûr a ni, a thlang kawrah chuan a sa lâk chu a lo ei mawlh mawlh mai a. Mihring thâwm a hriat rual chuan a rawn rûm ta hum hum mai a, tlangvâl ṭhenkhat te chuan hlauvin an kal muang hlawm ta hle mai. Chu veleh Lianuka chuan "Khawi teh. Hma ka lo hruai ange." tih pahin a hmaa kal te chu a leh pel ta zung zung mai a, Ruala chuan, "Akhai, fimkhur teh." a ti hman chiah tihah Lianuka chuan lung rap pial palh in kawr lam pan chuan a tawlh thla ta pur pur mai. Kawng pangai ni loa a tawlh avângin a awih bawk nen kawr chu a thleng thla rang hle. Mahse, mi intha zo tih taka ding chhuak nghal vatin, a mah lo zuan chiah tu sakei chu bum tumin a han kûn leh nghal zat a, mahse, a bân puam lai tak chu a rawn seh hman chiah chiah mai a, Lianuka chuan a han thing nawk a, a tlâk rual chuan a bân chu a rawn thi nghal zur zur bawk. Sakei lah chuan din chhuah pahin a rawn veh leh ta thauh thauh a, Lianuka pawhin a bân rêng rêng ngaihsak loin kut lâwngin a lo hmachhawn a, a tawlhna lamah a silai a theihngilh daih bawk si. Chutia sakeiin a veh lai tak chuan a hmaah tak Ruala chu a rawn ṭum thla chat mai a, Sakei rawn zuan chhuah rual chiah chuan a silai a puak nghal ṭhuai bawk a, sakei a tlâk tawm chawih rual chuan Thangneuva silai a rawn puak leh ṭhuai bawk. Chutah, "Chhawrtui val rual kan zâm dawn em ni?" tih pahin chem nen ngat an bawh ta. Chu veleh tlangvâl ho chuan an chem la chhuakin an rawn bawh ta huk mai a, tuibur hmuam da chen pawh tling lo vah chu sakei chu a zal ta dêr mai a, a mitmu chhuak pûrte chu a râpawm hle. A ke lah a la leng deuh ut ut bawk a. Ruala chuan a silai chu Lianuka hnênah pein, "Khai le, he sapui hi Chhawrtui pasalṭha kutah ngei a fam tur a ni." a han ti a, Lianuka chuan, "Ekhai, ka fimkhur loh zarah kan chan a chhe vek zawk teuh hle anih kha maw le. Khual pasalṭha huaisente khân a hnuk chu chhat rawh u." a lo ti ve thung a. Ruala chuan a silai chu hmeh bel pahin, "Na tuara dah reng a ṭha lo ve. Ramhnuai pasalṭha anih ve hi." tih pahin a inkuangkuah san ta thên a. Lianuka chuan Ruala chêt dân chu a ngaisangin a lâwm êm êm a, chutah silai dawt chu sakei chalah han nghatin, hmun leh hmunah a han kah chilh ṭhuai mai a, sapui huaisâr pawh chuan fam a chang chawp chilh ve nghal bawk. Lianuka thisen hloh hnem lutuk pawh, a âwn riai riai a, Thangneuva chuan lo dawm vatin, a sakei kah ruang bulah chuan an mut ta a.