HNEHTU AW RÂWL - 43

Chhawrtui khuate chuan an buaina kiang ta hawk chu an lâwm kher mai. A chhan chu an Lal fanu rîma rawn kal ṭhin Tlângnuam lal fape leh a ṭhiante, nunrâwn hmêl hliah hliahte kha an ning tawh em a ni. Chutih rualin, Tlângnuam pasalṭha pahnihte an khaw chhûngah ngei an thih avângin Tlângnuam khua chu an ṭawngkamah an zuam tawh hle tih a hriat mai a, mahse, Lal Thanliana chuan, "An rawn che hmasa anih loh chuan va beih hmasak a ṭulna ka hre lo ve. Pasalṭha pahnih an chânna hian an thin a ti ur viauin a rinawm. Mahse, chuti maia rawn che chhuak ngam tur khawpin Lal Liansailova saw a â hauh lo." tiin a khaw tlangvâlte chu a khap ve thung a. Vân dum pâwl ruih ên tûra thla a lo lan tâkah chuan tlai lama an hun tawn zawng zawngte theihnghilhin nula leh tlangvâlte chu Lal mualah rawn chhuak khawmin, an rawn lâm ta mup mup mai a. Chutah zet zawng Lal Thanliana leh a fapa Thanchhûngate in anna rawn lang ṭanin lêng hâwn âr khuan a hun meuh chuan an lem hnem tawh bawk a, an thlê lûk lûk tawh mai a, Sairêngi leh Thanpârite chuan buai puiin Lal Thanliana lah chuan a nupui fam chang tawh hming chu lamin a ṭap deuh ṭuau reng bawk. Mahse, rei daih chi ni hek lo tuibur hmuam da hnu lekah chuan an hnâr ta tlawrh tlawrh a. Upa ho chu Ruala chuan lo kâwmin Thanpari erawh rei lo te hnuah a mu ve thung a. Zan lai âr a khuan tâkah chuan nula leh tlangvâlte chu an ṭîn darh ta a. Thangneuva erawh lâm an chhai tirh aṭang khân Lal in lamah a lêt tawh lo hrim hrim a, a ṭhian chhar tharte nên Zawlbûk lamah an lawi lut nghal a, Ruala erawh Thanpari nên titiin Lal inah chuan an la meng kar a, Thanpari'n, "Kum hnih dawn chu a ni ve ta. Fa rêng rêng ka la pai thei lo hi ka rilru a hah ṭhin. Haw leh maite hi ka rilruah a awm ṭhin a sin. Ka dik loh nge kan pa dik loh pawh hi ka hre lo." tiin a mangannate chu Ruala hnênah chuan a hrilh ve malh malh a. Ruala chuan thil dang sawi puiin an khua a an luhkhung laite kha a rawn sawi chhuak ta a, chu veleh Sairengi chuan zah hmel deuh hian," Khami ṭuma min man khân mi sual i nih ka rin loh hrim hrim avângin ka thla kha a phâng hauh lo a sin. Ka u nen khân i hmêlṭha kan ti lutuk a, kan haw leh hnu pawh khân kan sawi dûn nghe nghe." a rawn ti a, Ruala chuan nuih pahin, "Akhai, khati zawng kha chuan mi fiam lo teh. Tak tak emaw ka ti palh ange." a lo ti a, Sairengi chuan, "Nupui neih te hi i la tum ve lo êm ni?" a han ti a, Ruala chuan, "Ekhai, nupui pawh kan hmu zo ve lo anih hi." tih pahin a vaibel thi tawh chu a han la kâi ṭha leh a. Sairengi chuan, "Nupui i neih hunah pa ṭha tak i nih ngei ka ring. I nupui chu a vannei viau ang le. Kei zawng ka vanduai nge, ka pasal tan fa ka hrin sak thei si lo. Chutah ka pasal hi ka lakah a lawm vak tawh lo anih ka ring, tun hma a kût nî leh thil dang dang lawmna kan neih reng reng a lem hnem ngai hauh lo kha a khât tawkin ruih a chîng tawh leh nghal a, min la mâk chhuah hial ka ring a ni. "a rawn ti sap a, Ruala chuan Sairengi kut chu vawn sak pahin," Ekhai, beidawng reng reng suh. Nangma lama dik lohna awm lo a i hriat phawt chuan i hre sualin ka ring lo. Khuanu'n in tân fel takin rem a ruat ngei ang. "a han ti dap dap a, Sairengi chuan a kut Ruala'n a vawn sak chu tih chet zauh pah hian," Ni e, engtin tak rem min ruat sak ang maw. "tiin Ruala chu a va en a, Ruala'n a lo melh ve lai tak a ni bawk nen an inmelh chiang sak sak hle. Sairengi chuan hawi sawn vat pahin a han ṭhu ṭha a, Ruala lah chuan a ṭhut hmun a siam rem paha a malte lo lang zauh chu a lo hmu hman ve leh chiah bawk. Ruala chuan a awm dân chu a dik hauh lo tih a hria, mahse, hmeichhe bulah heti khawp hian a la zauthau ngai lo va, Chhawrtui monu hmêlṭha nên a fan ngai loh ram han fan chu a châk hle mai. Sairêngi lah chuan a beidawnnate rawn sawi chhunzawmin, "Kan pa hian a châng chuan amah hi dik lo zawk anih inrin châng a nei ve ṭhin a, pasal dang nei turin min phal chuang si lo va, chu vang chuan kawng dang dap mai a rawt chângte a awm ṭhin. Mahse chu chu thil dik niin ka hre si lo." a rawn ti leh sap a, Ruala chuan chhân vak ngaihna a hre tawh lo hle. Sairêngi malno mawlh kha a mitthlaah châm miau hek. Chutah, 'a beidawnna zawng zawng min hrilh ngamna chhan hi ka laka beiseina a neih vâng a ni thei ngei ang. Ni lo se, kei an mikhual mai mai lakah hian a inpuang lo tawp ang. "tih rilru pu chhoin Sairêngi chu a han hnaih deuh hlek a, chutah a bawp chîp lâi chu zawi muanga kuai kâuin zen a han tum a, Sairêngi chuan lo dan pahin," Ruala i sawi chhuak hauh tur a ni lo. Ka beidawn êm vâng chauh a ni tih min hriat sak ang che. "a rawn ti a, Ruala chuan a lo bu ve nghauh nghauh a. Sairêngi a inthlah dul rual chuan Ruala chuan zen lût nghalin Sairêngi chu a han kuai âwn nghal riai riai a. Chutah Lal Thanliana te pafa, chatthla hnar bur bur karah chuan fan ngai loh ram fangin an thaw halh halh a. An zawh fel chuan Sairêngi chuan, "Thil ṭha ber a ni hauh lo" tih sap pahin a thawh san ta a.

A tûkah chuan tih tûr nei tawh lo mah se Lal Thanliana chuan a la chelh tlat mai a, an ni'n hnial mah se hnial hneh hek lo an châm leh ta a. Thanpari leh Sairêngi te thing phur tûr chu Rualate ṭhian dûn leh Lal fapa Thanchhûngate chuan zuiin an chhuak ve a, an thing phurhna hmun tur an hmuh chuan mipa pahnih chu an han che vat vat a, rei lo têah an zo fel dêr mai a. Chutih lai tak chuan an khaw pa ho, Lal fapa Thanchhûnga ṭhiante chu rawn lang vein lui kal an tum thute an rawn sawi a, Thanchhûnga phûr ve chuan a zui san ve leh nghal daih a. Chu veleh Ruala chuan fin chhuahin Thangneuva leh Thanparite hun thâwl pêk tum ang taka chêt a tum ta a. Mahse, chumi hmain Thangneuva te rinhlelh an kâi lohna turin Sairêngite nên an inhmuh hmasak berna chanchinge sawiin Thangneuva nen chuan an titi a, hmeichhe pahnih chuan ngun takin an lo ngaithla ve bawk a, an titi chu thlâk kualin nupui pasal chungchângte thlengin an han sawi a, chutah Ruala chuan "Parte, kan Thangneuva pui hi i duh mai lo em ni?" tiin Thanpari chu a han zawt a, Thanpari chuan "Akhai, U Neuvate zawng keini cho phâk rual a ni hlei nêm." a lo ti vat a, Ruala chuan, "Akhai, han bêl chiang mah la, i cho phâk anih zia i hre khawp ang." a lo tih chuan an nui dar dar a. Thanpari chuan, "Ka tui a hâl hle mai, ka u tui kha i la nei em?" a han ti a, Sairengi chuan, "Nei tawh hauh lo. Zuk chawi a ngai anih chu." tiin a rawn chhâng Ruala chuan chu lai remchâng chu la vatin "Khaw nge, Rêngi zu chawi teh ang. Ram chin hriat na'n te pawh kal ve a ṭha e." tih pahin Thangneuva chu a han nuih ru put put a, Thangneuva lah chuan Thanpari bula awm tira tih zah a tum angah ngaiin Ruala fin chu a chelh lo ṭiah ṭiah hle. Luite tui luan dam damna an zu thlen chuan châwi nghal mai loin Sairêngi chuan tuikhur tui a han nghâk leh rih a, Ruala'n a han beih tlauh tlauh hnu chuan tui rawn luang chhuakin Sairêngi tui khurah chuan a luang lût leh ta ruih a. Thangneuva leh Thanpari erawh an inkarah engmah a awm lo va, an inkawm ngeihin an mizia inpersan hle mah se, an inmil dûn hle. Rualate an rawn thlen chhoh leh chuan Ruala chuan a han dem fiam dûn vêl a, mahse, engah vak mah ngai loin an lo chhâng liam puat puat a khaw lam pana an haw laite chuan Ruala an ti beidawng ni ngeia ringin an hlim dun hle. Hriat lohna hian mihring hi a thunun hneh hle mai si a, Thangneuva leh Thanpari rilru hlim chhan ringawt pawh chu Ruala tana hlim pui tham a nih vei nen hlimna nasa zawk Sairêngi nen an la nei cheu leh nghal.

Khua an va thleng a, an thing phurhte chu hlang thlain mipa pahnih chuan an han ek leh nghal a, Thanpari chu an sira a lo pâwt kual ve char char bawk a, a rilru hahna ber a kiam tawh bawk nen a mi ze dik tak, nuih duh leh fiamthu thiam êm êm anihna chu rawn langin Rualate chuan an hlim pui hle. Miziaah chuan a pa chiah chiah a ni a, hmeichhe tih atan a mawi lo khawpin a ṭawng lung lung a, a nui leh huau huau bawk. Mahse, a mize hre chiangtu an khaw mi leh sate ngainat erawh a hlawh hle thung a, amah mi rilru ṭha tak a lo ni bawk nen ṭhian pawh a ngah hle. Zan riah kîl zawh veleh Sairêngi chu dai kal tûrin a chhuak a, tui bur hmuam da hnu velah Lianuka tlawh turin Ruala leh Thangneuva te pawh an chhuak ve leh a. Lianukate in an zu thlen chuan a lo tho harh peih deuh hlek tawh a, rei lo tê chauh an ṭhu tihah Ruala pum chu a rawn nuam lo ta riai riai mai, Thangneuva chuan, "Ka rin ang ngei. Chin lêm nei lo va ei nghek nghek hi a ṭha lo ka tih kha. Ṭam viau pawh ni la, a tâwk chauh a awm ve tih hre ta che." tih pahin a rawn nuih kur kur a, Ruala erawh dai lam panin a tlan ta vat a. Sairêngi'n a lo nghahna hmun a va thlen chuan hun an ngah tawh lo tih hriain an duhthusam ramah an han chêng dûn leh ta a. Lêng lên ar a khuan tâkah chuan Lianuka kan turin mi an rawn lût sap sap a, Thangneuva chuan inthiar fihlîm sanin Lal in lam panin a kal a, Ruala pawh Lal in a luh hnu lawkah rawn lut vein Lal Thanliana leh a upate bulah chuan an titi a, an hlim dar dar hle. Lêng hâwn ar a khuan al al lai chuan Thanchhûnga te lui kal pawh an rawn thleng ve ta a. Lal Thanliana chuan, "Mahni nupuite thing phurhnaa zui ve lêm lui i kal san leh daih a. Saitei hi Rualate ka lo hawn tir ṭep a ni." tiin a lo hau fiam hlak hlak a. Thanchhûnga chakai rawn hawn lian zet zet an hmuh chuan an hlim tlângin an ei châk tlâng hle. Lak Thanliana chuan," Lui lam sa ei a khât bawk a, naktûk lam chu tukṭhuan kîl hle i la a ni mai. Ruala nangni pawh tukṭhuan ei khamah in chhuak dâwn nia. Hei, Chhûnga lui kal rin ai takin a rawn hlawhtlin ve teh mial hi." tih pahin Rualate chu thu pe aw zetin a han bia a, mu turin a thawh san nghal nul nul a. Ruala chu Thangneuva nen Zawlbûk lam panin an kal a, an zu thlen chuan a rem lai laiah zu mu vein rei lo teah an muhil vat a. Lal in lamah erawh Thanchhûnga lui kal haw chu a nupui pangti lum dekin a han mu siai siai a, tisa leh tisa han innâwk ta reng chu Thanchhûnga mipatna rawn langin a nupui chungah chuan a han lâwn kâi ṭhem ṭhem a, chutah, "Hlawhtlin hun a la awm chêk ang Saite, ka hmangaih ber che." tih pahin a han bei ṭan ta a. An zawh fel meuh chuan Sairêngi chu a chau hle, chhun lamah a lo dawng tawh bawk nên tui takin a pasal kiangah chuan a muhil ta a.