HNEHTU AW RÂWL - 38

Pâwltlâk thla a rawn thleng a, thlasik thliin favâng thilfîm a rawn pawlh vawt ṭan ta maw tihah chuan Tlungvêl khuate chuan mikhual tlangvâl pathum an nei a, an hmêl en rêng rêngin an châuh hmêl êm êm a, an zînga pakhat phei chuan a ke a bai deuh suih suih a, tiang a hawl nghe nghe. Tlungvêl khaw mipuite'n chu mîte an lo hmuh chuan thil ṭha lo an hmachhawn mai ang tih hlauin an mangang ru nghal hle a. Lal tuala Zâmliana thing ehna bula awm Zalianmawii chuan a hmuh ve leh, "U Zâm khual kan nei dâwn a va ang ve." a rawn ti a, a âw aṭang chuan a hlauhthawn hmêl hle tih Zâmliana chuan hrethiamin chung mikhualte lam chu a han hawi vang vang a, chutah va pan hnaiin, "Khawi, khua leh tuite nge in nih le? Keini khua meuh rawn tei lût ta chu." a va ti a, an zînga pakhat chuan, "Rûn kan tâwk a ni." a rawn ti chuai raih a, Zâmliana chuan, "A ni maw." tih pahin Lal inah a hruai lut nghal a, Lal in an va luh chuan Lal Rothanga chuan ṭha taka lo chhâwnin hahzute a lo zûk a, kawng an kal chauh hmêl bâkah an ril a ṭam hmel êm avângin an rawn kal chhan pawh zawt hmasa loin zu fâng a han hâwp tîr phawt a, chutia an chaute a han dam deuh hnu chuan a zawt ta a, an zînga pakhat, a ke a hliam tûar chuan,"Lalpa,ka hming chu Vâncheuva a ni e, ka bula mi hi kan Lal fapa Saizînga a nih hi. Chhim lam Dârpui khua aṭanga rawn kal kan ni. Kan khuain sapui kawlh leh huaisâr tak mai kan khawi a, kan that mai thei si lo, kar kan kam lahin a fuh hlei thei bawk si lo nên kan beidawng lutukin a châng tûrin mi panga kan chhuak ta tawp mai a, khaw dai hnaia a hnu thar tak kan hmuh kan chhui zui a, mahse rin ai takin kan pawh har ta zêk mai a, zân hial kan riah chhuah phah ta a, chutia zan hnih zet kan han chhui hnu chuan kan bei a dawng ta hle a, khaw lama haw phawt kan rawt ta a ni, mahse, khua kan thlen meuh chuan kan khuaah Zawlbuk leh Lal in tih loh in ding rêng rêng a lo awm tawh lo va, khuaah chuan kum upa lam ho leh naupang ṭhenkhat chauh an lo awm a, Zawlbûkah an lo tawm ṭhap ringawt mai a ni. Kan thinur chuan pahnih in hnutchhiahin kan um zui ta a, zan khat hnuah kan va umpha a, pahnih ṭheuh chu pialrâlah kan va thawn liam ve nghe nghe, mahse, mi sawm laiin min rawn chhui lêt ve ta a, kei phei chu ka vân a duai deuh va hei hliam ka neih phah ta hial a ni. Kan beidawngin he lam kan rawn pan ta ringawt a ni. " a han ti charh charh a, Lal Rothanga chuan," Anih leh tute nge an nih rêng rêng? "a han ti leh a, chutah Lal fapa Saizînga hmêl chu rawn inthlâk vekin a lungngaih hmêl ta hle mai a, zawi muanga rawn ṭawng chhuakin," Darzo khuate an ni e, an Lal fanu Zawlpuan ka phah pui a, nupui dang ka neih leh si avângin a pa thinrimna ka tawk baw ta a ni." a rawn ti hnual ruih a, Lal Rothanga chuan, "Ekhai, chutia mahni fanute chhan han tihnat êm êm te chu a, hei kei pawh fanu ka nei a, a mipa duh zawng lakah lo inphalrai ta se, chu a mipa chuan nupui dang nei leh ta pawh ni se, ka fanu thiam lohna a awm tel ve miau avângin râwng takin ka che hauh lo ang. Chutah in unaute salah an man in tia mi? Lusei leh Lusei sala han in man mai chuh a va rapthlak ngai ve. "a rawn ti hmarh hmarh a, Lal fapa Saizînga chuan," A fanu kha nula fel tak angah ngaiin a hmêl ṭhatna zûnah khân ka lo uai a, mahse, hmeichhe buan chak lo tak mai a lo ni leh si a. Kan vânduaina a kal tluang nge, kan awm dûn lai a nuṭa pain min li phâwk ve bawk si a, chutah anni ngaiha an farnu, nula thianghlim kha, a mutpuitu keiin nupui dang ka han neih san leh si kha an la na ta viau a ni. Ka pa nunna in a tawrh phah a, ka nu ka chân bawk. Ka nupui erawh an mimante zîngah a tel a, ka fapa Saithanga erawh khuaah an lo hnutchhiah a, him pialin a la awm e. "a rawn ti a, Lal Rothanga chuan a lainatin a khawngaih ta hle mai a," A va mak ngai em. Mahni Lusei pui, an Lalte han thah sak duh mai chuh. Ngawi tak rawh ka fapa, kei Lal Rothanga hian ka dam ve ṭêk ṭêk chhûng chuan mahni Lusei puite laka ṭêk khamphei lên duh mite chu hmelma enin ka en zêl ang. Zaninah hetah ka inah riak u la, ka upate nen kan inkâwm ho dawn nia. "a rawn ti a, a hmêlah chuan mak tihna leh thinrimna a hmuh theih hial a ni. Lal Rothanga hi Lal ṭha leh fing a ni a, a puihna mamawh avânga a Lal in chuangkaite hian puihna an dîl hmain an ṭawng ka chhuak aṭanga lo hrethiamin an inthlahrun lohna'n a theihna zâwnah a puih tur thu a lo sawi zung zung ṭhin, hei vang hian Darzo mikhualte pawh an hlimin an lâwm hle.
Chutih mêk lai chuan hmâna Sialhawk khua nen a an buaina chhan chhungkaw fanu Hnêmi, ripa rei tak an khung hnua â ta chu a rawn lût hlawl mai a, Zalianmawii hnênah chuan chaw ei tûr a rawn dîl a, ani paw'n rang takin a lo pe vat vat a, nui vur vur chungin chaw ṭhing tlang kengin a chhuak leh ta a, a chhuah pah chuan Lalnu Ṭhiangdawni hnênah chuan a pum rawn puar ṭan chu hmuh zauhin a nui vur vur bawk a, mi pangai anih laia hmeichhe buan chak lo lo ni tawh sa chu a ât hnu phei chuan tlangvâlte'n inpaih thâwlna'n an hmang zing ta hle mai a, tu ber nge a pa tih pawh hriat theih loh fanu pahnih lai a nei tawh nghe nghe. Zalianmawii chuan en zui vang vang pahin, "Piansualna avânga hringnun hrehawm tak hmang mêkte hi chhawm dâwl a hnêkin heti mai hian kan en si a." ti rilru vawng vawng chungin tlangvâlte'n nula ngaih tam an duh luat avânga mi pangai pha zân lo thleng pawha an bawh duhte chu hriatthiam har ti takin a suangtuah pah a, chutah tlangvâlte chauh pawh ni lo nuthlawi za laklawh te lahin an khaw tlangvâl pangai zân lote, 'min sawi mualpho thei chuang lo' tih rilru puin an han inkeuh tir duh mai ṭhin a, chûngte thleng chuan a ngaihtuah kual a, ṭha lo a tiin nupa nih hmaa mut dun loh a him ber tih a hriat chian avangin a hmangaih Zamliana laka la inphalrai lo mai mai pawh a ni nghe nghe, mi pangai na na na chu han awm fâl chânga han kal thui mai duhna rilru put chângte pawh an rilruah a lo awm ve ṭhin, a bîk takin Zâmliana. Mahse, a pasal tûr tan chauh a thianghlimna leh a hmeichhiatna hi a hlan phal avângin a la invêng thei hrâm zêl a ni.

Zan a lo thlen chuan Lal inah upa ho bâkah pasalṭhate thlengin an kim hle a, an rorêl lah a rum ṭha hle, an unau, an Lusei puite ngeiin puih an mamawh êm êm laia pui duh lo tu nih chu an tum lo bur vek si a, chu vâng chuan a tuk ni lêng inbuatsaih a, a tûk leh a chhuah mai an rêl ta a. An rorêl an zawh hnu chuan an chhuak ta a, Zâmliana ṭhu tlang erawh Rualate chuan an han chhaih leh tê tê phawt a. Zawlbûk pana an kal lai chuan Ruala chuan Thangneuva te unau pên sanin an in lam a pan a, in a va thlen chuan Bualdîm lam aṭangin chanchin lâwmawm tak kenga rawn kal mikhual an nei tlat mai a, chu an mikhual chuan Rochâmi'n fapa thar a neih thu leh a hmingah Chawnghrânga an sak thu a rawn keng a ni. Pi Hnehzovi chuan a tupa thar chu hmuh a châk hle tih a hmêlah a lang reng mai. Ruala'n Lal ina an rorêlte a han sawi phei chuan a hnual êm êm mai a, "Taite, kal lo mai la ka va han duh em." a ti hial a ni, mahse, Ruala erawh chuan kal a tum ruh hle thung. Zawlbûk lam a va thlen chuan an lo mu ṭan mêk a, Ruala pawh va inthawlh ve vatin a muhil ta siai siai a, vârṭianah thoin Zâmliana leh Thangneuva te unau nên chhun lama an inbuatsaih dân tûrte an sawi ho hnuah an inṭhen darh ta a. Ruala'n in a va thlen chuan a pa'n a lo ko vat a, "Ruala, kan Lal khân khaw hmun nghâk tlangvâlte ho tûrin a duh che a, nang chu i kal ve thei lo ang." a lo ti a Ruala chuan lungawi lo zetin, "Engah kei kher? Kal tumin ka rilru ka lo siam vek tawh a." a lo ti a Upa Buangthanga chuan, "A, tum tawh tho mah la, Lal thu an hnial ngai lo ve. Ṭum dangah i che chhuak ziah a, i û kal ve châk ngawih ngawih pawh a kal theih loh phah ṭhin kha, hrethiam hram hram rawh. I ṭhiante tan pawh an rin tlak zia an pho chhuahna hun remchang anih hi." tiin a lo hnêm a, Ruala erawh a lung a la awi chiah lo thung. A tûk zîng khawvar ruala a ṭhiante kal liam chu an lan thleng a thlîr a, kal ve pawh a châk ve hle, mahse Lal thu hnial ngam hek lo amahin a tei ruk ruk reng ringawt mai a, a nuin Bualdîm lama zin a ngên reng bawk nen, zin turin a inbuatsaih ta tawp a.