HNEHTU AW RÂWL - 39

Darzo khaw chhûngah chuan nunau mangangte chu an tlân chhe nasa hle mai a, belh tûr ber pawh hre lo vin tualah an tlân kual a, an fate an hmuh loh avânga lo ṭap ruai ruai lah bo lo, Thangneuvate lah chuan nunrâwnna chu nunrâwnna bawka thung rulh an tum tih hriat takin an silai an hmet puak dur dur reng mai a, Darzo in zathum nufa zet tân pawh Pasalṭha Zabuanga kaihhruai ṭhin Rualthanzauva bula nitin a tap kawi ṭhinte chu an khauh mah mah a ni. A upa ber Zâmliana sir tawn tawnah Thangneuvate unau an han ding chat a, an mahni beih lêt tum apiang an li thal zung zung bawk si. Darzo ho lah an hlawhtlinna lâwmin zantin zu nen an sal man nulate nen na lo che nasa ṭhin bawk nên râl rorum tak tak han hmachhawn tur chuan an pasalṭha te thlengin an tlâk thlâwt loh a ni. Chutih lai tak chuan khaw lu lama in chu a rawn kâng ve leh ta tlat mai, Zâmliana chuan, "Uai, khi lamah tumah kan kal si lo. Eng vâng nge ni ang." a rawn ti a, Thangneuva chuan, "Darzo khua hian hmelma dang an nei a va ang ve. Kan inthiarfihlim mai dawn nge?" a han ti a, Zâmliana chuan, "Darpui salte kan chhanchhuah phawt loh ten le. An Lal famo pawh a la dam ngei ang. Lal in lam pan ang." tih pahin a silai chu a han hmet puak leh ṭhuai a, an lam pana chem nen a rawn tlân tlangvâl pakhat chu a thal nghal thlawrh bawk. Lal tual chu harsa vak loin an thleng thei mai a, chutah leihkaah lawn kaiin sum hmun a rah rual chiah chuan Lal in chhûng aṭang chuan silai a rawn puak ṭhuai mai a, Zâmliana hnunga ding Thangzînga chuan Zâmliana nghing lawih leh rawn âwn riai riai chu hmuin a dawm vat a, chu veleh Thangneuva chu rang zeta Lal in chhunga luh pahin silai mu lo sawh mêk Darzo Lalpa chu eng khaw sawi set set lo vin a nghawngah a chhawk hmawk mai a, Lal in chhûnga awm ve Lalnu leh Lal fanute chu an lo râk nasa ngei mai. Zâmliana âwm kaw deuh phât aṭang chuan thisen a chhuak tâwp thei lo, Thangzînga chuan mittui tla zawih zawih chungin a ṭhianpa, kâ pawh chhâwn lo va boral chu a pawm a, Lal in chhûngah a ruang chu va nghatin, "Ka ṭhian i thihna hi a thlâwn mawlh lo vang." a ti sap a, chutih lai tak chuan Lal inah chuan pasalṭha tih hriat zet zet pathum hi an rawn lût a, an zînga pakhat chuan, "Uai, Lal tenawm leh dawihzep chuan kan hmel a hmu thei tawh dawn lo a va ang ta ve." a rawn ti a, Thangzînga te unau erawh inring takin an dung dun nghal a. Chu pa bawk chuan, "Darzo pasalṭhate u, in Lal fanu in ui beh man chu in hmu ta, mahse, khual dang innei a va ang ve." a han ti leh a, Thangneuva chuan, "Khual dangte chu kan ni e. He Lal dawihzep takin an ṭhianpa a thah sak avânga thinurna in a tuam mêk Tlungvêl Pasalṭha Thangzîngate unau kan ni e." a rawn ti vawt raih a, chûng pasalṭhate'n Tlungvêl khaw hming an han hriat chuan an hâwi phâwk deuh hra nghal a. An zînga pakhat chuan," He khua hi kan kutah in hlân tûr a ni. Anih loh chuan Tlungvêl pasalṭha huaisen tak tak ti a an sawi ṭhinte mual liam nî a inṭan nghal ang, in ṭhianpa ruang hi la u la, a bâk chu kan kutah dah rawh u." a rawn ti a, Thangneuva chuan, "Darpui khaw mi tam tak he khuaah hian sal nun hrehawm tak hmangin an awm a, mahni Lusei puite chunga rawng taka che duhte hi keimahni ngeiin kan thungrûl ang" a rawn ti charh charh a chutah zet zawng pasalṭha huaisen inti ṭheuh ṭheuh pangate chu an inep ta rân mai. An zînga pakhat chuan, "In hma in sial mah mah lo maw, he Lal dawihzep hian a fanu rîma kal kan Lal fapa leh a ṭhiante a lo that a sin. Kal kiang mai rawh u, nge ni a, Zehtet pasalṭhate thinurna hi intawng baw dâwn." a rawn ti leh a, Thangzînga chuan, "Kan kawng dâltu apiang thian fai turin kan inpeih e, Zehtet pasalṭha pawh ni u la, in kuang lo innawr anih chuan Darzo tlangvâl pialrâl kai tate chan ang khu in chang ve ang." a rawn ti leh a, chutah zet zawng ṭawngkaa sawi fiah chi ni ta hek lo, Zehtet pasalṭha Thlahlova chuan," Lal tualah i sawi fel ang u. "tih pahin a chhuak zui nghal hmak a. Lal tualah chuan khaw hnih tlangvâl Darzo rûntute chu an lo inep ṭhap mai a, an pasalṭha te rawn inzui chhuak an hmuh chuan an inbiak dân hriat an châk hlawm hle. Darzo mipui la dam chhunte lah hlauthawng tak chungin ramhnuai lam panin an inthiarfihlim ṭawk ṭawk a, an khaw tual ngei rûntute inep ṭhap chu en pawh an en ngam tawh lo a ni. Lal tual an thlen chuan Thangneuva chuan an khaw tlangvâl panga koin, "Lal inah khian Pasalṭha huaisen Zâmliana ruang a awm e. Tin, Lalnu leh Lal fanu an awm bawk, han vêng u la, kan mi leh sa ni lo rawn luh tum apiang chu lo kâp ang che u." a ti a, anni pawh rang taka kal nghalin Lal in an luh dawn chuan Zehtet tlangvâlte chuan rawn dan ve an tum na a, an pasalṭha Thlahlova chuan intivei zetin," Kal tir rawh u, nakin lawkah an rawn chhuak leh dawn alawm. "a lo ti a, Thangneuva chuan," Chhuak ngei ang. Mahse, kan khaw lam pana kan haw dawn hunah chauh a ni ang. " a rawn ti khauh mai a, chutah Thlahlova chuan," Eh eh e, nang hi ka thlasik hmachhawn zât pawh la hmachhawn lo lehnghal, i ṭawng chal tlai hle mai maw. Nang nen ngei hian kan sawi fel ang, a chak zawk zawk kutah khua hi a awm ang. " a rawn ti vîn hlar a, Thangneuva chuan, "Ni rawh se." tih pahin a ipte leh a silai chu a nau hnênah a pe a, an inveh tha theuh theuh mai le. Thangneuva chuan a beihpa ke chheh chu ngun taka enin a chem hûmna lam avâng chuan ding hmang thiam a ni tih hriain a ke dinglam a khai rual chiah chuan bawh zui thutin a chem chu a han vai ngheng a, a rin lawk sa ang thlapin Thlahlova chuan a lo dang bawk a, mahse, a lo tum lawk sa angin an chem leh chem a intawk fuh rual chiah a, Thlahlova âwma a tlawh ngheng avângin Thlahlova chu a thal nghal thlawrh a, chutah a rawn tho chhuak tûr chu Thangneuva chuan hnaihchilh thutin a nghâwngah a tin ta rân mai. Thlahlova chuan za lo zeta nuih hak hak pahin, "Nauva, ka chem hi hmang zawk teh. Nang ang rênga che rang leh huaisen hi ka la tawng ngai lo ve." tih pahin a chem chu a thlâk thla a, Thangneuva chuan Thlahlova chem chu chhar pahin, "Ka pu, nupui fanau i nei tawh ngeiin ka ring. Chu vângin tlâwmah la lo la, i nupui fanau te tana ka thil pêk theih sâng ber angah min ngaih sak zawk ang che." tih pahin a pawt tho ta zawk a, Thlahlova mak ti chu a meng bial kâwk kâwk mai a, Thangneuva chuan," Nang nên hian kan inhre ngai lo va, hmelma kan ni hek lo. Chu vângin ka thah nachhan tûr che ka hre lo a ni. Min hrethiam la, he khua hian Darpui khua an rûna, an Lal nupa an that a, an Lal famo lah salah an man bawk. An Lal fapa leh an pasalṭhate erawh an ram chhuah lai tak anih avângin an him hrâm a, kan puihna dil turin kawng hla tak an lo kal a, an duh kan puitlin sak ngei a ngai a ni. An Lal fanu leh he khuaa Darpui mi leh sa, sala awm zawng zawngte hi kan hruai anga, a bâk zawng chu nangni'n chang rawh u, ro thil leh sal duh vânga he lai hmun rawn pan hi kan ni lo. An Lal fanu kan hruai duh chhan erawh, thûk tak a ni a, sawi chhuah chiah pawh ka ngai lo a, min hrethiam dawn nia. "a ti dam thlap mai a, Thlahlova chuan Thangneuva hmel en vung vung pahin," An sawi anga nunrawng chu in va ni si lo ve. "a ti hau mai a, Thangneuva chuan Tlungvêl pasalṭha te nunrâwng thana an than dân a hriat fo tawh avângin a nuih san mai a," Ni e, nunna hlut zia hi kan hria a sin. "tih pahin a chem chu a pe lêt a a chibai ta a. Thlahlova chuan," Tlangval ka lawm e. I duh ang chuan thleng vek rawh se. " a rawn ti a, Thangneuva chuan lawmthu hrilhin Lal ina awmte chu a han ko va, Zâmliana ruang zawn turin mi panga an han luh belh bawk. Zâmliana ruang chu Lal tualah an han nghat a, Thangneuva te unau chuan ṭhut chilhin an mittui a tla zawih zawih mai a, chûng an hmuh chuan Zehtet tlangvâlte chuan an lainat hle, nichin lawka pasalṭha insualthiam leh huaisen zet Thangneuva mittui tla an hmuh phei chuan an tawrh nat zia chu an hre thiam phak ngaiin an ring meuh lo. Kâr a hla thamin ruang hawn chî ni ta si lo chu Thangneuva chuan, "He Lal tualah ngei hian châwl rawh se. Huaisen taka hma a hruaina hmunah hian zâl rawh se." a rawn ti a, chu veleh tlangval ho chuan a thlân tûr chu an rawn lai nghal zung zung a, Zehtet tlangvâl ho pawh chuan tlawmngaih chhuahin an pasalṭha te hrilh ngai hauh lovin an rawn laih pui ve nghal bawk a, an tam tham bawk a, vawi khat ṭheuh thlan khura an luh meuh chuan a thûk ṭha hle tawh mai a, 'tiang rêng rênga thlan khur thûk hi ka la hmu ngai lo' an ti hlawm hial a ni. Zâmliana ruang zah taka an phûm takah chuan Tlungvêl ho chuan khua an chhuahsan ta a. Zehtet ho chuan an kal liam chu thlirin, Thlahlova chuan, "An va huaisenin an nun a va mawi tak êm." a rawn ti vawng vawng a, a ṭhianpa, Pasalṭha Zakunga chuan, "An lakah bat lian tak kan nei a ni, kan puihna an mamawh hun a la awm anih phawt chuan tlanchhe thei kan ni lo ve." tiin a rawn tuihnih ve leh a, Râlmana chuan, "Kan chêt a hun ve ta e. Tlungvêl mi huaisente entawn chung zelin aw." a rawn ti a, Lal ina Lalnu tawm sen reng chu hruai chhuakin khaw mi leh sa dai hnaia awmte chu zawng khâwmin an khaw lam panin an haw pui ve ta thung a, Darzo khua chu ding leh ngai tawh lo turin an hâl dar vek a, Zâmliana ruang zâlna lai erawh zah takin an kal san thung. Darzo khaw khu luih luih chu râl aṭangin Thangneuva te chuan an thlîr a, Thangzînga chuan khabe khawng hlak hlak chungin, "Zâma ai kha lo awhin hma kha lo hruai i la ṭha tur, an fapa neih chhun a ni si a, kei ka thih paw'n nang i la awm tala sin le." tiin a u chu a rawn bia a, Thangneuva chuan, "kei tak hian a sin a ai kha awh duh ni. Zalianmawii'n engtin tak tuar ang maw." a rawn ti sap a, ti chuan an kal leh ṭan ta a.

Bualdîm khaw lamah erawh Pasalṭha Rualthanzauva chuan a u Fapa Zachâma chu dâi hnaiah sava veh puiin an kal kual a, an duh khawp an perh tlâk hnu chuan haw an han tum a, mahse, Zachâma chuan," Ka pate, khu laiah khuan ka pa Zâmliana a kal liam." a rawn ti khauh mai a, Ruala chuan, "Khawiah maw?" a rawn ti a, Zachâma chuan kawr lam chu kawh pahin, "A nui vur vur a, a kal leh nghal." a rawn ti leh a, Ruala chuan, "Zâmliana a ni chiang maw?" a han ti leh ngat a Zachâma chuan nin hmêl zet hian, "Aw, ka pa Zâma nente chuan kan khaw hluiah pawh in inkawm reng zêl kha, ka hre chiang alawm. "a rawn ti leh a, chu veleh Ruala chu hmanhmawh takin kawr lam pan chuan a tlân thla hlawk hlawk a, kawr a zu thlen chuan a kal liamna lam ni a Zachâma'n a sawi lamah chuan a zu kal a, engmah a zu hmu si lo, mak ti takin a han hawi kual a, Zâmliana a han ngaihtuah leh a, an rammutnaah a che sual emaw ni aw tiin a ngaihtuah hle, engmah hmuh tur awm ta si lo chu lêt chho lehin Zachâma hnênah chuan, "Taite, kha thil kha tuma bulah sawi loh tur aw." tih pahin khaw lam panin ngaih ṭha lo tak chungin a kal pui ta a. In an va thlen chuan a nu chuan a u fapa thar Chawnghranga chu a lo pawm mêk a, an titi lai sawi chhunzawm tih hriat takin, "Ani te zawngin nupui neih rêng a âwn thei hlei nêm. A ṭhiante ho nên hian lên tar an tum emaw ni tih tur khawpin a nia nula rîmna châng pawh an hriat loh. Zâma hian Zaliani hi a rîm ve zauh zauh va, midang ho ve hi zawng hmeichhia hian an hip lo ni berin ka hria. "a lo ti lar lar a, Zabuanga chuan nuih zuk pahin," Ruala, ka nu hian mo neih leh a châk tawh a ni. "a rawn ti a, Ruala erawh a nui mai a, a hmela ngaihṭhatlohna chu Zabuanga chuan a man chiang hle. Zan riah an kîl zawhah Zabuanga chuan Ruala chu leihkapuiah ṭhutpuiin ngaih ṭhatlohna a neih leh neih lohte a han zawt a, Ruala pawh chuan zêp lem loin a hrilh vek bawk a, Zabuanga chuan, "Akhai, Taitea hian a hmuh sual palhte pawh a ni thei a, ngaih tih ṭhat loh lutuk tur a ni lo. Naktuk hi han châm u la, a bâk chu kan chelh tawh lo ang che u, ka pa leh Lâwmteite pawh an ngaihtuahawm tawh alawm, eng pawh thleng se, chanchin min rawn hriat tir vat dawn nia. "a ti charh charh a. A tûk an han châm leh a, a tûk lehah chuan Hnehzovite nufa chu an khaw lam panin an haw ta a. Khua an thlen aṭanga ni hnih a liam leh chuan Thangneuva te unau chuan hma rawn hruaiin khaw chhûngah chuan tlangvâl ho chu ngui zetin an rawn inzui lût ta. Ruala'n Zâmliana tel ve lo a hmuh rual chuan, "Ka rin ang ngei maw. A va pawi tak em." a ti sap a. Zâmliana bâkah midang pali laiin nunna an chân ve avângin Thangneuva ho va chhuakte chu an ngui em em vek a, bawhhla pawh an chham ngam lo a, khuaah chuan hrehawm ti takin an rawn lût a ni. Zâmliana thih thu an han hriat meuh chuan khaw mipuite chu lungngai lo rêng rêng an awm lo, an pasalṭhate zînga mi, nun ngil leh ngainat awm takin mual a liam san ta si. Darpui mi leh sa Thangneuva te thang hlâna khuaa an lo hruai luh tawhte phei chuan hrehawm an ti zual hle nghe nghe. Chu zân thla êng hnuaiah chuan Zalianmawii chu amahtein a ṭap kerh kerh a, a ṭap hnêm tûra Partei rawn chhuak âwmah chuan a hmai phûmin a insut hlawp hlawp a, ṭap ring ngam si lo, ṭah chhuak bawk si chu Partei chuan a lainat in a ṭah pui ve hial a ni. A pasal Roliana hnênah Zalianmawii a ngaihtuah ziate hrilhin chu zân phei chu Zalianmawii kiangah a mu hial a, hnêm dân thiam a har a tih bâkah tawrh hun lai a lo ni bawk nen zankhua a Zalianmawii ṭap ru chu a ngaithla tluan ve zak a ni. A tûk aṭang chuan Zalianmawii chuan chaw lem harsa a tiin a taksa a chêr chho ṭan a, nula hmelṭha anihnate chuan an kiansan chho ta, Lal Rothangate nupa mangang chuan an fuih nasa ṭhin hle, mahse, a sâwt si lo. An mangang chuan Pi Hnehzovi an pun ta tawp a, Pi Hnehzovi chuan an inah hruai thlain a vanduaina tawn zawng zawngte chu a han hrilh a, "Kei fahrah, mite hmuhsit tuar chunga hringnun hmang chho ṭan pawhin ka tawrh chhuah theih chu nang Lal fanu fing leh fel hian i tuar chhuak thei em em ang." tiin a han zilh a, Zalianmawii pawhin, "Nu Zote, i tawrh lakah chuan ka tawrh hi a nêp a ni. Ni e, Zâma pawhin chak taka awm tura min duh hi ka ring. Mahse, a harsa em a ni. Mahse, ka tum tlat dawn." a rawn ti ta a.