HNEHTU AW RÂWL - 42

Lianuka zâwnna tûr an buaipui sang sang rual chuan ṭhenkhatin sakei vun chu an lo lip a, a sa erawh a tlûkna hmun ngeiah chuan lei lâi khuarin an phûm a, khaw lam panin an haw ta a. Lianuka chu an inah dahin bawlpuin a buai pui nghal vat a. Mi dang zawng erawh Lal tualah kalin Lal Thanliana hnênah chanchin chu an han hrilh a, Lal Thanliana chuan, "Ekhai, naktukah sakei lu chu keimah ngeiin ka âi ang. Ruai ropui takin kan ṭheh bawk ang. Kan Lianuka pui chu zu kan ve te pawh a ṭha e." a lo ti a. A hmelah chuan a lawm nge lawm lo tih hriatthiam a har hle. Zanlai âr a khuan lai chuan Lianuka chu a rawn harh ve a, a khawsikte pawhin zia awm lam a rawn pan tâkah chuan tui takin a muhil ta siai siai a. Amah men puitu nula leh tlangvâlte pawhin hâw zâi an rêl ve ta a. Ruala leh Thangneuva te pawh Zawlbûk lama lawi tawh loin Lal in lamah an chho va, an han mu ve ta a. An kawng kal chau nen, sapui huaisar leh huhâng ngah tak beiin an chhuak leh bawk si a, an chau hle a, tûk ṭhuan ei dawn a, Lal fanu Thanpari'n a rawn kaih thawh chuan, "Ekhai, thawh kan hai a ni maw. Min kaihthawh vat tur che u alawm maw le." an lo ti a, Thanpari chuan, "Ka pa'n a phal lo alawm. An chau emai mu rih rawh se a tia." a lo ti a, Ruala chuan, "Chau teh suh ei. A va zahthlâk êm aw." tih pahin a puanthuahte chu têl fel sawk sawkin a tho vat a, Thangneuva pawh chu rawn tho chhuak vein, "Ekhai, mikhualnaa thawh han hai chu a." a lo ti ve nuah nuah a.

Tûkṭhuan ei khamah chuan Lal tualah khaw mipuite chu an thuam ṭha ber berte nen an rawn chhuak khawm a, Lianuka pawh Lal in leihkapuiah a rawn ṭhu chho ve peih a, a palianin a chak bawk a, a chhel pawh a chhel hle. Sakei kha a lo bum hman deuh avângin a hliam na lutuk lo zawk a, a vannei hle. Bum hman lo se chu a nghawngah a awrh chat ngeiin a rinawm. Sakei vun chu favaia hnawh puarin an tung a, a lu chu an hawlhin an sât sawk sawk reng mai a ni. Chutia ni lênga an lâm mup mup lai chuan ruai ṭheh a lo hun ta der mai a. Khaw mipuite chu hlui hrang hrangah insem darhin ruai an kîl sap sap a. Chutih lai tak chuan khaw mawng lam aṭangin tlangvâl sawm rual vêl zet hi an rawn chho ve mêk bawk a. Lal Thanliana chuan, "Khai a, kan lâwm luatah khûng mi hnawksak ho khu ka li hre tawh reng reng hlei nêm. Lo kal se la, ruaite hi han kîl ve phawt teh se." a lo ti a. Tlangnuam Lal fapate an lo thlen chuan Lal Thanliana chuan ṭha taka lo chhawnin ruaite chu a han kîl tir ve te te a chumi hnuah Lal inah inbiakna nei tûrin an lût khâwm ta a. Lal Thanliana chuan Thangneuva mi duhte an awm kim avângin Tlangnuam ho a biak dawn reng reng chuan an hmingin a ko ta chat chat mai a, Thangneuva pawhin Lal fapa Sairêngliana, Pasalṭha Thangrema leh Pasalṭha Liandaiate chu a hriat theih phah ta a. Liandaia chuan a upa ber chan rawn changin an kal chhan, Thanpari chu Sairêngliana nupui turin a han dîl leh ta a. Mahse, chhânna ngai bawk an dawng leh ta. Lal Thanliana'n, "Ka fanu hianin pasal neih a la inpeih miau si lo va. Kan tir lui thei lo a ni. Min hrethiam rih mai teh u." a tih rual chuan Thangrema chuan, "Lalpa, i fanu hi nula a ni tawh a, a rual puite zîngah pasal nei tam tak an awm tawh bawk a sin. Hmeichhiate hi chuan an nu leh pate thlazar hnuaia nuam sa taka awm reng hi an châk vek a, mahse, an ni aia thu zawk chu an nu leh pate in nia lawm." a rawn ti a, Lal Thanliana thin sa nghal phat chuan Thangrema chu rum zeta melh pahin," Thangrem, ka fanu hi a ma duhthlanna hmun ngeiah lo chuan khawiah mah ka kal tir lo ang. Ka fanuin in Lal fapa hi a duh anih phawt chuan in ruala kal tir nghal pawh hi ka hnial hauh lo ang. Mahse, tun dinhmunah chuan kan thlazar hnuaiah hian a la hlim tawk a, mipa lam reng a la hawi rih lo anih hi maw. "a lo ti hmuk a. Liandaia chuan boruak thlakthleng nan Thangrema ṭawng chhuah leh hmain," Lalpa, hei rawn luh tâkah chuan kan hmelhriat ngai loh mi kan hmu tlat mai a. Khual ṭha in thleng a ni ngei ang maw? " a lo ti a, Lal Thanliana chuan," Ni e maw le. Hei, Tlungvêl pasalṭha huaisen Rualthanzauva leh Thangneuvate'n ranngo an rawn zawng ve anih hi. " tiin a lo chhâng a, a thil tum chu a thawk ṭha bawk a, Thangrema chuan," Pasalṭha Rualthanzauva hian ka ṭawng lo ngai haw lo se. A chanchin ka lo hriat danin Bawkpui Lal tupa ni âwm tak a ni a. I fanu hi a rawn hêl deuh a ni lo maw? "tiin meinei takin a rawn zawt a. Lal Thanliana chuan," Ekhai. Chu zawng keia sawi phak pawh va ni suh. "a lo ti duh lek a. Chutah zet zawng boruak chu a rit ta hle mai. Lal inah chuan ṭawng ri hriat tur a awm tawh lo va, pasalṭha mahni tawka thei intite leh Lal huaisen leh a khawnbawlte chu an inep ta ṭhap hlawm mai a. Thangrema chuan a mawng chu a han tawlh deuh hrut hrut a, chutah che chhuak thutin Lal fanu Thanpari chu man tumin a samah a han kêk pawp mai a, mahse, a che zia lo chik reng tu Thangneuva chuan rang zetin a bân chu lo phih thlâk sakin hnung lamah a han herh sak ngheng mai a. Mi dang ho lo che chhuak tur chu Ruala leh Lianuka naute, Lal ina rawn lût ve te chuan silaiin an lo tin nghal khup mai a,Thangrema lah a ban vei lam che thei si lo chu a kun tlawk tlawk mai a, Thangneuva lah chuan a herh na zual sawt sawt mai bawk si. Pasalṭha in la ve tawk tak tan chuan chu thil zet chu a tlâwm thlâk hle mai a, Thangrema chuan thei leh thei loin, "In malbeihah ka cho a che. Mipa fa i nih ngai chuan Lal tualah i ching fel teh ang." tih pahin a lo si hluam hluam a, Thangneuva chuan, "Teh rêng mai.", tih pahin leihka lam panin a pawt kal ta zawt zawt mai a, Thangrema na ti lah chuan ṭhen tlawk tlawk chungin a zui chhuak a. Luhka aṭang chuan Thangneuva chuan Lal tualah a bawk khup zawngin a han tlawh thla zat mai a le, Thangrema hnar thi zawih zawih chunga rawn ding chhuak leh chu a thin a ur teh e. Thangneuva chuan pan thla vatin,Thangrema insiam fel zawh rual chiah chuan a han bawh nghal zawt zawt mai a, Thangrema chu a tâl buai nghal hle. Thaah a khan si lo, insual lah Thangneuva chuan a thîam em em bawk si. Thangneuva chuan a nghawng zawna vai pahin a ke ding lam chu Thangrema âwm zawnah a han thlawh phei pawp mai a. Thangrema chu a zangthal zawngin a tlu khu ta luih mai. Thangrema rawn ding chhuak mêk chu Neuva chuan, bawh leh nghal thutin Thangrema chem chu a vai perh sak lâwp mai a, chu veleh a chem chu la lêt vatin a han vai nawn leh siah mai a, chutah zet zawng Thangrema chu a hrâwk hup chungin a thal ta riai riai a, a kê a leng at at hnu chuan a taksa chu a thlah ta a.

Liandaia thinur chuan Thangneuva chu inmalbeihah a rawn cho ve leh ta mai. Mahse Lal tual a thlen thlâk ruala khaw mipui hoin an rawn chîl rawn takah chuan a ruang hnuh tlâk a awm tawh mawlh lo. Lal Thanliana chuan Saiireng lianni pate an nia, "Nang chu ngaihdam i ni ang. Mahse, zaninah ka khaw chhûngah in tan hmun a awm lo tih erawh in hre dawn nia." ti hmukin a vaibel chu a pak phu luih luih a. Lal fapa Sairêngliana chuan zak tak chungin a ṭhiante chu a chhuah pui ta a. Leng lên ar khuan hnu lawkah chuan Sairêngliana te chuan an kal lama an riahna bûk an va thleng ta a. An thil tawn avanga an thinrim ziate chu an sawi nak nak hlawm a. Chutih lai tak chuan Ruala leh Thangneuva te pawhin an lo hnaih chilh ve zêl bawk. An vanneih a siamin Lal fapa Sairêngliana inthiar tur chu hmuin an zui ru ta vat a. Sairêngliana a ṭhut fel chiah rual chuan a hmui chu kut phah lian zetin a rawn hup phui thut mai a, a ohu chiang hle. Ruala chuan a silai käwmin anhan chhu chawrh mai a, Sairêngliana chu a thi dang chiang hle. Chutah zâwn sawnin hmum remchang laiah an mut a. A lo harh meuh chuan Thangneuva chuan a beng bulah, "Chhumtei i kha i la hria ang ti raw? A unaute phuba la tura rawn kal kan ni. 'a han ti hul hak mai a, Sairêngliana hmel chu a danglam nasa hman teuh hle. Chutah Thangneuva chuan tun thawh lawp pahin Sairêngliana chu a din chilh rûn mai a, Sairêngliana hlau lutuk chuan ngaihdam a dil ta chul mai. Thah duh viau mah se Thangneuva chuan thah harsa a tih tâk êm avângin Sairêngliana hnenah chuan, "Lal fapa mah ni la ka haw reng tawh ang che tih hria la, ka lam hawi zawnga ke i rawn pên leh anih chuan ka ngaidam tawh lo vang che." tiin a hrilh a, an inkal san ta a.