PASALȚHA LIANMAWIA BUNG - 43

Naupang pawnto ri nak nakte hlim nui ri chu ṭap bai bai thawmin a rawn pawlh leh zeuh zeuh a, thereng kiu vawng vawng thâwmte leh pathlawi zang hâng zahmawh sawite nui ri leh hak hak ṭhinte chu Zehtet khuaah chuan a khat a ni ber mai. Lianmawia leh Hratzuala pawh Zamana telloin an tei chhuak ve a, lênna tûr êm êm pawh nei chuang loin khua chu an fang kual a an pahnih chuan tu dang an ngai bîk lo. Lal in lamah erawh Upa Chawnga chuan "Lalpa, kan Lalnu hi a ruak lo a ang riau mai, i zawt chiang chhin tawh em?" tiin a lo zawt ve mêk bawk a, Lal Kapthanga chuan a lo rin rûk deuh anih avangin chhang mai ta'nge pawh ti loin a thla thum zu êng kûj tawh chu a han khiat leh tê tê a, "La zawt lem hauh lo, Taitea ber a awm tawh si lo a, fa neih leh pawh hi ka lo rilrûk mang tawh lo a, hun lo taka chân leh ka hlauh vâng hian. Mahse, ka beisei viau thung si" a rawn ti chhuak sap sap a. Thla a êng bawk a, leido nei lo Zehtet khuate chu an hlimin an lawmna chuan vân a tawng hial âwm e.

Lianmawiate pawh la hma viau mah se Lal tual an rawn chuang kai leh dêr tawh a, Zawlbûka patling tî tì ngaihthlâk tuma an kal lai tak chuan in pakhat aṭang hian nula pakhat hi a rawn chhuak hlawl a, chu nula chuan Lianmawiate chu lo biain "Kan pasalṭhate chu lênna tûr in hre meuh nange?" a rawn ti a Hratzuala chuan "E, Hrilliani lah ni rengin, hei, lenna tûr kan hre ve meuh lo chu anih hi" a rawn ti ve a, Hrilliani chuan "Ekhai, nangni pahnih tan hi chuan han lên huphurhawm deuhna tûr a awm âwm ka hre hauh lo, ti teh u, lo lut ve teh u,zan dangah in lo leng duh ngai mang si lo" a tih chuan Hratzuala chuan "Ni ang hmiang" tih pahin a zui ve nghal a, Lianmawia rilruah erawh a rawlthar laia he rûn an ṭhian hoa an kai ṭum kha a rawn lang thar leh a, Chhuansangite rûn kâi tum kha Hrilliani u Siamliani hian a pawt peng a mawng bet lo zetin a ṭhu ve anih kha. Inchhung an va luh chuan inleng an lo awm nak nak a, Hrilliani nau Ṭhakimi tleirawl chhuak hlim chuan rîmtu a lo nei ve nual a, Siamliani pawh a lo la ṭhu ve bawk a, Lianmawiate lo lût an hmuh chuan ṭhutna an lo kian sap sap a, mahse, Lianmawiate chu a kil thim lai chuhin an va ṭhu ve ta zawk a. Rei lo te hnuah Siamliani fapa pawnto pawh a rawn haw ve a, a nu bulah kal nghal chatin a nu chu inpawm tîrin pangchang takin mut a han ngên kual a, Siamliani pawhin a fapa chu duat taka lo pawmin khum lam a pan pui ta thuai a. An ni unau hi an hmel a ṭha tlânga, mi awm thei chhungkua an lo ni bawk nen mi zah an kai em em a, unau hmeichhe pathum ṭhawt niin an vai hian an hmelṭha em em vek a ni. A nuthlawi ber Siamliani phei chu a nulât lai aiin a nalh tawh zawk an ti hial ṭhin, mahse, fa a neih hnu hian rual a pawl tam loin a tawmim em em a, nupui atana iai lo tu pawh hmu ve nel nual mah se pasal neih zai rel tumna a nei hauh lo. Hrilliani leh Ṭhakimite unau rîmtu tlangvâlte kiangah chuan an ṭhu ve ta a. Lal in lamah erawh mikhual an nei mêk a, an khua a ṭanga zan li zet riah ngaihna khua Hliappui Lal rawn tirhte an ni a, an khawnbawl upa leh an pasalṭha chhuanvawr hona hnuaiah tlangval panga lai an rawn kal a lo ni. An rawn kal chhan tak chu Zehtet khua aṭanga hmar lam nikhat kal vela hlaah khaw thar sah zai rêl an lo tum a lo ni a, an lo hriat danah tu khaw ram mah a ni lo na a, a bul hnaia khuate tlawh kual hmasak phawt an Lalin a duh a lo ni a, Bungtlâng khaw lamah an lo kal tawh nghe nghe. Lal Kapthanga chuan a ram lo awh rûk êm êm ṭhin, Bungtlâng Lal Saingurliana nen pawh an lo sawi dun fo tawh midang kuta han awm tir chu hreh ru viau mah se a ram neitu anih loh mai bakah khaw thar sah ngai tur khawpa ram leilung chhiaah an khawsa lo bawk nen Hliappui palaite hnênah chuan, "E, keini sawi phâk a ni lo e, in Lalpa'n a duh dânin ro rel rawh se. Puih in mamawh hun a awm anih phawt chuan he lamah rawn kal hreh reng reng suh u" a lo ti a, Hliappui khawnbawl upa chuan "E, Lal Kâpthanga nge nge an sawi ang ngeia Lal ropui leh rilru ṭha chu i lo nih hi. Kan Lalpa Chunglûra pawh i chungah a lawm viauin ka ring. He laia kan lo inbenbel hunah phei chuan u zawk nih chan changa engemaw chen min chhawm dawl pawh a la ngai mahna, nang leh i upate chungah kan lawm tak zet a ni. Tunah chuan lungmuang takin khaw thar sah zai kan rel ve thei tawh ang" a rawn ti ve bawk a. Lêng hâwn ar a khuan hma Lal inah chuan inkawmin, ar khuang ri an hriat veleh tlangval ho chu an pasalṭha hovin Zawlbûk lam panin an kal ta a, an zu thlen chuan an rin ang ngeiin khual buan an lo neih pui ta tehreng a, Zehtet tlangval râl hrat leh huaisen, chak bawk si te chu khualvalte chuan an tham lo hle maia, Lianmawia leh Hratzuala pawhin pahnih ve ve an hneh a, chutih rualin khual val lam chhuanvawr Pasalṭha Hauchhûma pawhin a khingpuite chu a hneh ve zêl a, mi pahnih a hneh hnuah Hrâtzuala nen an inbuan ve ta a, a thawh khatnaah chuan Hrâtzuala che sual zeuh lai chu nang fuhin Hauchhûma chuan a chawi vawk a, thawm a ṭha dur dur kher mai. A thawh hnihna an han ṭan leh a, an ṭang dûn bawka tlangvalte pawhin hmuhnawm anti kher mai, Hauchhûma chu a kâng teuh ṭhin ngei mai, mahse, pasalṭha phanchang zawk leh tawnhriat ngah zawk anihna chu chhawr ṭangkaiin Hratzuala awp hniam tûr tha thlah lai tak chu a chawi leh ta vawk a, tlangval ho chu an lo au dur dur a, Hauchhûma chu chak an ti tlâng kher mai. Hratzuala chibai pah chuan Hauchhûma chuan "Naua i hming mi hrilh thei angem? Nang ang rênga khirh hi ka la buan hauh lo mai" a han ti sap a, Hrâtzuala chuan "Hrâtzuala ka ni e" tiin a rawn chhanga Hauchhûma chuan nuih vur vur pahin "Pasalṭha Hrâtzuala, ka buan thei che hi ka lawm hle mai." tiin an kal kianga, bawhbel bul lamah va ṭhu dûnin a hma lawka inbuan hah hrep ni mah se pasalṭha ve ve an nihna chuan an thinlungah inzawmna siamin an va titi leh nghal mawlh mawlh a. Lianmawia rawn pen chhuak ve chuan Hliappui tlangval la tlawm lo awm chhun chu awlsam tein a rawn hneh ve leh bawk a, an inbuan lai chuan Hrâtzuala chuan chhuang takin Lianmawia anih thute chu Hauchhûma bulah chuan a lo sawi ve a, Hauchhûma pawh chuan Lianmawia chu a inbuan dan zei thlarh leh a tha pek dân dik em emte, a ke chheh buai hauh lo chunga a duh tawka a intheh kual theih dânah te chuan a khin phak anih a ring hauh lo. "Heng pasalṭhate hi an sawi ang ngawta rammu reng an lo ni bîk lo anih hi, an nun hian belhchian a dawl hmelin nunze mawi tak nei mi an ni ngat ang" a ti rilru hial a ni.

Ni a liam zêla Hliappui tlangvalte chu bawk khawhin an rawn bur ta chat a, Lal Kapthanga pawhin a tlangvalte chu Hliappui khaw ho thil tih dân en thli thlai ru turin a tir chhuak zeuh zeuh a, an khaw ram chinah perh an rawn tar em tihte en tirin a kal chhuah tir fo a ni. Mahse, Hliappui khuate'n an hlauhthawn anga engmah an rawn tih si loh avangin ṭhenawm ṭha tak an neih belh dawn anga inngaiin an thla a muang ta siai siai thu ng a.

Favang awllen a rawn thlenga, mipuite chuan nuam an tiin an hlim tlâng hle a, ṭhenkhat chu khaw hrana an chhungte tlawh tûrin an zin chhuak ve nual bawk a, favang awllen bâk hi zin chhuahna hun an nei lem lo a tin ni, pasalṭhate erawh Lal kutke ber an nih avangin an zin chhuak tam deuh bîk thunga, mipui tam zawkte tan erawh favang awllen chauh hi zinna hun an neih a ni a, ranngo zawng tûr hrim hrima tei chhuak pawh an awm nuk hial a ni. Tlai khat chu Zehtet khuaah chuan mikhual tlangval pawr tak, an hmel ena chau tih hriat ngawih ngawih pahnih hi an rawn lut hlawl a, Lal inah tlu lûtin Lalpa Kapthangate chuan mak an ti hle a, an biak lahin chhan pawh chhang mumal thei loin an chau si a, an taksa tih chakna'n zu fângte in tîrin chaw te an han ei puar tîr te te a, an rawn pangai leh deuh hnu chuan an thil tawn chu an sawi ta a. Mikhual tlangvalte thil tawn an han hria chu Lal in chhung chu a reh ṭhiap a, Lal Kapthanga chuan a hachang ṭhial rik bap bap pahin a meng dur khuih bawk a, "Chu ti taka Ka pa ruang an diriam hnu pawha ka unaupa an man leh zel chu an va inchhir dawn em. Tlangaupa Lianmawia leh Hrâtzuala ko la, ka Makpa Zamana pawh ko vat rawh" a ti nghal tuar a. Lianmawiate an han luh erawh chuan Lal Kapthanga chu a lo inngaihtuah fim hman tawh a, "Nang ni hi ka pasalṭha chhuanvawrte in ni a, tunah hian Zawlbuan khuate chuan kan puihna an mamawh mêk a ni. In hriat angin kan hmelma, kan khua hial min chhuhsak tum tawhtute mah ni se, ṭha takin inremna kan siam a, ka pa unau pa khua anihna angin kan unauah kan pawma, an ni pawhin an unauah min pawm anih kha. An tlangvalte hnen aṭang hian chanchin kim chang in hre thei ang"a han ti a, Zawlbuan tlangval pakhat zawk chu lo ṭawng chhuakin, "Favâng awllen lai chuhin sai ram chhuah kan rawt a, kan Lal fapa Rotawka hoin kan kal a,hlawhtling taka kan haw leh meuh chuan kan khuaah chuan ruang a lo tam kher mai. Tlangval awm ang angte chuan ruang senghawi hna thawkin an lo buai mup mup a, Lal fanu Rosangliani a pa ruang bawha a lo ṭap chu a nuṭapa Lal fapa Rotawka'n a han kai tho a, kan Lalpa ruang kan hmu chiah chu kan thin a rim tlâng ngang mai. A dul chu a thler hneh hle a, a hmai lah hmuh tlâk a lawi awm lo khawpin an sât chik hrup bawk. Lal fanu Rosangliani malah pawh an kâp a kal thei zia zang a ni lo, a u Rolianpuia chu an man a Lal fanu hnenah chuan sial sawm leh silai fung nga a tlan theih anih thu an hrilh a ni. Kan han thlen chuan kan Lal fanu hmelțha Rosangliani chuan a pa ruang chu tenna nei hauh loin a kuah ngawih ngawih a, kan lainat em avangin kan mittui pawh kan dang zo meuh hlawm lo a ni. Lalfapa Rotawka chuan phuba lak nghal duh mah se, kan tlem tham bawk si a, he lamah kan Lal fapa chuan min lo tir ringawt mai a ni" a rawn tih chuan an khawngaih tlâng hle mai a, Lal inah chuan ro rel nghalin Zamana chu an dal chuang leh ta a, Lianmawia leh Hratzuala hoin a rang thei ang bera chhuah chu an thu vai tluk dân a ni ta a.

A tûk ațang chuan Zehtet tlangvalte chu rammu turin an inpuahchah leh ta mup mup mai a, vawi tam tak ral lo do tawh ni mah se, Zawlbuan khua meuh hneh theitu pawih tlangvalte râl hrât dân tûr zia chu an hriatthiam phâk ruai ruai avângin tûn hmâ zawng aiin an inpuahchah nasa leh zuala ngênmu pawh an deng nasa kher mai. Rammutnaa kal tûr tlangval an thlante zînga silai nei ve lote chuan hawh tûr an zawng khawm ve bawk a, silai inhawhsak hi rammu turte tán phei chuan a châkawm loh hle a, a chanchhe zawk an han changa hmelma hoin an neih sak daih phei chuan a hawhna pa tãn chânna nasa tak a tling a ni.

Ni thum țha zenzawn an inbuatsaih hnu chuan Zawlbuan khaw pan tur chuan an inring ta. An kal tûr chu Siamliani nau Țhakimi khan Hratzuala chu rawn thlahin "Dam takin lo haw leh ngei ngei rawh aw" tih pahin vaihlo tui a han paipawn zeuh va, Hratzuala pawh a khi vur vur hial a ni. Lal Kâpthanga chuan "Aw le, ka tlangval chhuan em emte'n ka pa unaupa neih chhun phuba in la dawn a ni a, fimkhur takin in che anga, nunna chân inawm lohna'n awmze nei takin ral inbei tûr a ni. Vawi tam ral ka bei tawh a, inbawhchilh hun a thlen apiangin ka kianga dingte hnunglam vengin ral ka bei a, an hriat hauh loin ka kianga mite'n ka hnung lam an lo veng ve leh mai țhin. Chutiang ni lo se tun thleng hian ka la dam kher angem ka hre hauh lo. Nangni pawh in inveng tawn tlat tur a ni. Pasalțha Lianmawia leh Hratzualate thu in ngaichâng anga, val upate thu pek zawm zel ang che u. Kal u la, hlawhtlinna nen invangkhua in rawn lawi lût leh dawn nia" a rawn ti a, tlangval ho chuan kut an lo beng dur dur a, ti chuan kawtchhuah lam panin an kal ta dam dam a.


"Sangi țap tawh suh, ka pa chu pialrâlah faisa ringin ka nu nen hlim takin an awm tawh alawm. Ka u kan chhanchhuak anga, hlim takin nun bul kan țan leh dawn alawm" ti a a nau hnêmtu Lal fapa Rotawka chuan a nau chu duat takin a samah a chul sak hliau hliau a,inleng awm loh lai a ni bawk nen a nau malpui hliam chu uluk takin a en sak leh a, bawlpuin silai mu tang a phawrh hnuah chuan ziaawm lam a rawn pan ve hret hret toh a hre thei mai a,uluk taka sil fai sakin a tuam sak leh thlap bawk a. Rolianpuia a awm si lo a, an pahnihin Lal in chhungah chuan an awm rek rek a, Rosangliani kal thei lo chu a u chuan a paw kual a paw kual mai a ni. Rosangliani nula ve țan tawh chu a hleitlingin a lian si a, mipa tan pawh puak reng a râlah chuan a rit ve hle, mahse, lainatna leh hmangaihna nena enkawltu a u chuan puak theiha a la awm hi a lawm em em zawk a, a malpui ni loin hmun dangah te lo kap ta zawk se chu a thi ngei awm si a. Tlangvalte thinrim chuan a thu an ngaichang reng tih Rotawka chuan hre mah se anmahnia che chhuak mai tur chuan an tlem mah mah a ni. Chu bakah a pa ber a awm tawh si lo a, a pa anga huaisenna nei ve lo ta chuan hlauhna a nei tlat a, mi leh sa an inchân belh anga an khuaah thihna a thlen belh leh a hlau tlat a ni. A pa kha chu la dam se a awm awm hi kal chhuakin pawih mi leh sa an hmu hmasak apiang an that leh hmiah hmiah tur a ni a, mahse, a pa a awm si lo, a pa ai awh zo tur ber a u lah an man daih bawk si.

"Kha le, Lal fapa, i zanriah tûr" tih paha a hmaa chaw tlang lian lem lo tak rawn theh thla tu tlangval chu Rolianpuia chuan en vang vangin, hmusit taka a rawn nuih deuh țhaw lai phei chuan a thinrim lutuk chu a puakkeh lo chauh a ni. "Kan mi man kha chaw ka lo pe ange" rawn titu nula aw sin rât a hriat rual chuan chu tlangval chu rang takin a kal sawn nghal a. Chaw rawn pe tu Diltlâng Lal fanu hmelțha em em mai chu Rolianpuia chuan en dauh dauh pahin "Ka lawm e" a ti sap a, an man hnuah tlaitin chaw a rawn pe ziah a, zing lamah erawh a rawn pe ngam ngai lo thung. Mahse, tlai lama a duh tawka ei tur a rawn pek ziah avangin Rolianpuia taksa chu a chhe em em lo a, zing lama an pek erawh lei a an thehtlaksak avanga vut a kai luai țhin avanga ei loh mai changte pawh a ngah hle. "Puar deuhin aw" tih paha kal san peh nghal tu Lal fanu chu Rolianpuia chuan a en zui vang vang a, fel a ti kher mai. A hnu lawka nichina tlangval bawk kha lo lang lehin Rolianpuia chaw ei lai chu hmusit takin "Kan Lal fanu Thleihnaii duhsak i han ni mai chu i vannei teh e. Mahse, lo beisei hauh suh, kan upa min fapa nupui tur anih khi" a rawn ti a, Rolianpuia chuan a biakna chu hria awm pawha a lan loh avangin thinrim takin "Lusei hmelchhepa kan Lal hian phal se chuan ka pawt darh vek ang che maw le" a han ti hrawk a  Mahse Rolianpuia chuan engahteh vak mah a ngai lo a, a chaw ei lai chu a eisan mial mial a, pawih tlangvalin "Ka sawi chu i hre nange?" a rawn tih leh chuan a ning ta deuh bawk a, chu pawih tlangval mit taka en kalh pah chuan "Hria e, a dang pawh ka la hria a sin. He ka tanna hmun ațanga ka chhuah veleh ka that ang che tih hi a ni" tiin a chaw ei lai chu a ei san leh malh malh a, chu tlangval chuan chhan tum leh mah se an Lalpa lo kal a hmuh avangin a kal sawn ta zawk a. Diltlâng Lalpa Thangchhunga chuan "I unaute hi ka rin aiin an rei ta. An theihnghilh tawh che anih ka ring. Lal fapa mah ni la i thi ngei ang. Tunah rih chuan ka fanu neih chhunin a la duhsak em che a, i la thi lo ang. Mahse, a duhsak vang che a a rilru hneh kha i lo tum ange, Lusei i nih kha hre reng la ka hmelma i ni bawk. Ka fanu hian mi nunnem leh zahngaihna ngah tah anih vang chauha i thih phal lo a ni. "tiin a kal san leh nghal a. Rolianpuia chuan a kal liam ta maw tihah chuan" Ka farnu pawh i fanu anga fel hi a ni ve a sin"a ti sap a, a pa ruang bawha a farnu țap va hruai sawn a tum laia a farnu an kahte, amah an rawn man nghalte leh a farnuin bawk vak chunga a rawn um laite kha a mitthlaah a lang nawn uai uai a, 'Sangi nula inih kha, i puan siam țha la I U Tawka lo haw hunah phuba rawn la rawh se' tia a hrilh laia a nau hrilh hai hmelte kha a mitthlaah a rawn lang nawn leh a, "Ka nau chu aw hmuh ka va chak em vawi khat tal han hmu leh thei i la" ti vawng vawngin a mittui rawn luang chu a hru sawk sawk a, a hma ang bawka ngengin a țhut dan ngaiin che sawn hauh loin a țhu leh ta a. Khaw naupang rawn kalte'n an rawn chhaihnawmnaha an rawn vawma an rawn hawlhte pawhin a lo che țha duh eih lo a, puitling ho phei chuan chhel an ti hlawm hle.
An Lal fapa Thanghlianga chuan Rolianpuia chu a tiduhdah êm êm thung a, engemaw hlekah "Lal fapa ve ve, pasalțha inti ve ve chu a chak zawk kan awm a ni" tiin a țawng khum fo a, Rolianpuia chuan a chhâng ngai lo.

Lianmawiate'n Zawlbuan khua an thlen chuan Lal fapa Rotawka chuan "Liana, in dam maw? In rawn thlenga ka thla a muang ta." tih pahin a thaw huai a, a rilru hah țhin zia chu a hmelah a hriat hle. Lianmawia chuan "Hlauthawng suh, i pa tan kan thisen a luan ral hma kan bei ang. Pawih mawngbal ho chuan tute nge an tih thinrim tih hi an hre ngei ang" a ti ve bawk a. Rosangliani țhutna lam chu Lianmawia chuan panin "Sangi, tu berin nge hliam che?" a han ti a, Rosangliani chuan "Ka pa ruang ka țah khum lai kha a ni a, tu ber nge ka hre thei hauh lo" a rawn ti a, Lianmawia chuan "A pawi loh chu,i phuba chu keiman ka la ang tih ka tiam a che"tiin a kal san leh ta a. Rosangliani lungleng rilru na leh hah em em pawh a lo duh ruk em em ṭhin Lianmawia hmel a hmuh meuh chuan a reh sawng sawnga a hahdama, a bula rei lote a awm chhung pawh khan a hriat ngai loh thlamuan em emna a tawng tlat a ni.

Zânah chuan Lal inah pasalțhate leh khawnbawl upa ho chuan ro an rel a, nihnih kala hla Diltlang khaw rûn dân tûr chu an sawi ho a, an sawi ho fel meuh chuan Leng hawn ar a khuang al al tawh a, beih an tawh khan pawih ho khan zawlbuk an hal sak hman avangin a thar an sa zo hlim hlawt a ni a, lusun chhungkua an tam em avangin riak lut pawh an la awm mang lo a ni. Zehtet tlangvalte chu an lut ruih hlawm a, Lianmawia leh Hratzualate erawh Lal fapa Rotawkate unau kiangah Lal inah an riak ve dawn a ni. A tuk nileng chuan khuaa mipa awm ang angte chu an inbuatsaih ve leh ta a, phuba lak chu an chak em em leh an nghah ruk reng anih bawk avangin an phur kher mai. Zanah chuan thla a eng bial pap a, a mawinate chu mi tam tak tana en nin theih loh ni mah se, Zawlbuan mipuite lung ti lengtu leh mittui ko chhuaktu a ni thung. Rosangliani pawh leihkapui lamah Lianmawia leh Hratzualate nen țhuin an titi ve a, Hratzuala chuan Lianmawia tana hun țha a ni tih hriain chhuanlam siamin a kal bo san thuai bawk a, an pahnih chauha an han awm hnu chuan an lai dun ang reng hle. Mahse, Lianmawia chuan mipa zawk a nihna angin bul a rawn țan a, "I lo nula ve ta hle mai. Hmanah kha chuan tleirawl â phuang chauh kha i la ni a" a han ti a, Rosangliani chuan a bana lo chum taih taih pahin "Ka â phuang kher lo aw" a rawn tia Lianmawia nuih chu a za kher mai. "Mite pawh i lo la hre ve renga" a han tih leh chuan Rosangliani chuan ner sak pahin "Nge ka hriat loh ngawt ang che? Nang zawk khan min theihnghilh a nia ka rin ni" tih pahin a hawi tum bar a. Lianmawia chuan "Nang ang Lal fanu hmelțha leh fel lutuk te chu tu'n an theihnghilh phal nang. Ka theihnghilh lo ang che ka tih nghe nghe kha" a han ti a, Rosangliani chuan "Ehe, i la hre reng a ni maw?" a rawn ti chhuak phawnga, a zak leh deuh si chuan lawi rût chungin "I ti lawmawm hle mai" a han ti leh a, Lianmawia chu a lo nui hak hak bawk a. Lianmawia chuan "I lawm tak tak meuh maw? Kei aia tilawmtu che an awm ka ring tlat a ni." a han ti a, Rosangliani chuan "Chutia'ng an awm âwm ka hre hauh lo mai. Nang zawk, in khaw lamah ngaih em em i neih ka ring tlat" a han ti a, Lianmawia chuan inzep buai tum tawh loin "Ka nu te chu ngai ve bawk e, mahse, ka ngaih țhin ber kiangah ka awm a ka lungleng pawh a zia khawp mai" tih pahin Rosangliani kut chu a vawn sak a. Rosangliani chu phut deuh zawk pahin Lianmawia lam chu a hawi phei a, Lianmawia'n a lo en lai tak anih avangin a mit chu rang takin a la sawn lehnghal a, Lianmawia'n "Sangi, hmangaihna hian vanduaina lam hlir hi min pe a, nang hi ka vanneihna tur i nih ngei ka ring" a tih ri a hriat chuan nuam a ti ru veng veng a, a mipa duh berin amah a duh thu a sawi chhuah avang chuan a lawm a ni. "I rin tlat chuan kei pawh i tan ka awm reng ang, i vanneihna ka nih ngei ka beisei" a ti let ve ta a.