PASALȚHA LIANMAWIA BUNG - 44

Zing khua a lo vara hram thiam vatinte'n an awrawl chhuahin leilung an âwi mêk a, Zawlbuan khaw chhunga Lusei tlangval phuba lâk châka tui hâlte chuan an hriam hrete chu tât hriamin hmelma lu an han chhawk hmawk lai tûrte mitthla chungin an phur kher mai, an rilruah chuan damin an lo lêt leh lo ang tih hlau em em chunga an mahnu rilru hlauthawng tak chunga thlir rengtute an awm ve tih rêng an hre chang lo. Tukțhuan an han kîla, țhenkhat tân chuan anmahni in lum ngeia an chhungte kianga an chaw bar hnuhnung ber tûr a ni a, mahse, an thihna chu a thlâwn lo anga Zawlbuan khaw mipuite chuan an hming an hre reng tawh thung ang. Feh reh san velah chuan khua chu an chhuahsan ta a, Rotawka kal ve tum erawh an dang thei hrâm a, a farnu kal thei lo amah maia kal san tih chi anih loh zia an hrilh fe hnuah a rilru an hneh thei hram a ni. Chawhnu her anih meuh chuan Țiau lui an kân fel diam tawh a, Zawlbuan tlangval kal vete chuan pawih ho hmel hmuh thuai thuai chu an châk ber a ni. Tlai lam a lo nih chuan riahna tur hmun an han zawnga, zan khat lek riahna tûr anih avângin bûk pawh zâr lem loh an ti tak na na, an hruaitu Lianmawia leh Hratzualate mutna tur chu tlangval ho chuanan zar luih sak ta thova, an inthlahrun phah hle. Zanriah an kîl zawhah Lianmawia chuan thu a rawn sawi ta a, "Aw le, hei phuba la tur leh kan Lal fapa Rolianpuia chhan tûra kal kan ni tih kha kan hriat țheuh a țhain ka ring. Zawlbuan tlangvalte'n in lo tih țhin anga pawih mi leh sa tawh phawt thah kha kan tih a rem ve dawn lo a, Lusei fate ang lo taka inpumkhat tlat annih avang hian pakhatin a tawrh chuan an vai hriat thuai anga, Diltlang khaw thlen tak tak hmaa Lal fapa Rolianpuia an lo thah hman a hlauhawm hle a ni. Chu vangin Diltlâng mi leh sa te chauh kan bei tûr a ni. Diltlâng khua hi ka lo paltlang tawh khua a ni a, an khua ațanga ni khat kala hla Dapchhuah khaw Lal hi ka nu nuța neih chhun a ni nghe nghe, chu vângin an hnam mi leh sa tawh phawt kan beih chuan ka pu rilru ka tihnat ka hlau em em a ni tih min hriat sak u la, chu vangin Diltlâng mi leh sate chauh kan beih ka remti dawn a ni. Ka hriat dânah chuan khaw luh khân pahnih an nei a, a khawi lam ațang ve ve pawhin bei i la kan che sualin ka ring lo, chu vangin Pasalțha Hratzuala zuiin țhenkhat in kal anga, țhenkhatin min zui bawk ang. Dapchhuah khaw lam kawngah hian kei ka kal anga, tumah Dapchhuah khaw lamah kan tlan tir tur a ni lo. Tin, kan Lalpa lu la tu, Lal nei loa Zawlbuan khuate hnutchhiahtu an ni tih kha kan hre reng anga, an Lalpa sala man ngei kan tum ang. Lal fapa Rolianpuia chhan tûrin khawfing chah laiin kei leh tlangval țhenkhat khuaah kan lut anga, kan lam ațanga silai puak ri in hriat veleh khua in rawn bei ve nghal ang. "a rawn ti a, ti chuan an zân hnuhnung ber ni hial tûr chu âm taka hman tumin an mu ta siai siai hlawm a. A tûk vârțianah thoin khua a var fel meuh chuan hla tak an thleng leh hman tawh a, chu mi ni nilenga an kal tlauh tlauh hnu chuan Diltlâng khua pawh an hnaih ve ta kher mai, leng lên hun anih meuh chuan Diltlang khaw daiah an awm tawh a, an kalna lam tûr țheuh panin an ințhen hrang nghal zung zung a, ti chuan an kal darh ta a. An awm hmun tûr an thleng ta maw tihah chuan Lianmawia chuan tlangvalte chu mu tur leh a kaihthawh tur thu a hrilh a, an mu fel ta maw tihah chuan vâkchhuakin ral ven bûk an siamna lai vel hriat tumin khua chu a hel ta a, a tlangval hruaite kianga a let leh meuh chuan khawfing chah a hnai kuar tawh a, ralven bûk hmun hnihah a awm avangin fimkhur a ngai hle tih pawh a hre chiang kher mai. Tlangvalte chu kai tho sang sangin tu pawh chu thinthia mu an ni lo bawk a, rei lo têah an harh nghal vawk a, vaibelte țan kaiin an han hip vang vanga, ti chuan khaw lam chu an pan ta a, an hnaih deuh ta maw tihah Lianmawia chuan tlangval panga thlang chhuakin ralven bûk hnai zawk lam chu an pan țhem țhem a, an va hnaih deuh deuh takah chuan tlangval muhil hnar ri bawrh bawrh thawmte pawh an hre chiang ta kher mai. Lianmawia chuan tlangvalte chu chem hmang tur leh silai hmet puak hauh lo tura hrilhin amah chuan hma a hruai leh ta a, ralven bûk chhûng an va luh chuan tlangval pahnih hi an lo muhil bawrh bawrh a, pahnih dang pawh țhu chungin an lo muthlu lawp lawp a, Lianmawia chuan tlangval lo muthlu bu lawp lawp pakhat chu a nghawngah an han sat chawrh maia, chu tih rual deuh thaw chuan a kianga tlangvalte pawh chuan an tih tûr rawn tiin tlangval dang pathumte chu an rawn that nghal vek a. An silai kawlte chu lak sakin ralven bûk dang chu an pan leh ta a, Diltlâng tlangval ralvengte chu an thla a muang bawka an lo mu leh nasa hle mai, chu zawng an tan a pawi ta, Lianmawia te chuan that lehin an silai kawlte an lak sak leh ta a. An zinga tlangval pakhat chu Lianmawia chuan tîr let lehin silai an mante chu tlangval dangte hnena sem tûrin a ken tir a, midang pali nen chuan khaw chhungah an lut ta thung a.

Lal tuala tlangval pahnih lo tei thauh thauh an hmuh chuan Lianmawiate chuan chet lak dân tûr a vâng an ti kher mai. Lianmawia chuan tlangval pakhat chu hruaiin "Silai saw an kâp puak anih vaih chuan kan chan a chhe thei tih hria la, hnung lam ațangin kan bei dawn a ni. An nghawnga i sat thei lo dawna i inhriat chuan silai an thlauh ngeina tûrin an bânah sâtang che" a ti sap a, ti chuan an pahnih chuan an kal ta a, midang pathumte chuan thaw dêp dêpin an lo thlîr thung a. Rolianpuia vengtute pahnih mutthluk hlau tak chunga tei kualte chu an mut a chhuak dûn hle a, tei kual reng mah se an rilru chu a fîm hauh tawh lo a, an din hlek chuan an muthlu leh mai țhin. Hnung lam ațanga veh mêktu nei an ni tih inhria se zawng an mut a chhuak hauh lo ang, mahse, an hre miau si lo. Lianmawia chuan a hmaa pawih tlangval ding chu zuan thut pahin a nghawngah chuan a chem lut pawk khawpin a han sât sawk maia, a tlu tûr chu dawm bet nghalin zawi muangin a nghat thla a, a tlangval hruaiin a mi thah pa a tih dan ang chiaha a lo ti ve mek chu enin a nui sak a, ti chuan Lal in hnuaia rip chu thawm dim taka hawngin chau hle tawh tura a ngaih Rolianpuia chu a rin loh takin rang takin a rawn chhuak nghal a, bengchhenna chi ni hek suh, silai pakhat chu pein zawlbuk lam an pan nghal a. An țhiante pathum pawh rawn tel ve nghalin pakhat chuan khaw dai lama an țhiante a va ko leh te te bawk a, an rawn luh a an inpeih fel meuh chuan khawvar a hnai ta kher mai. Lianmawia silai puak țhuai chu silai ri dangin chhunzawm nghalin Diltlang Zawlbûk a riak tlangvalte na tuar rak thawm chu a ring kher mai.

Ralven bûk ațanga tlangval lo tlan chhuakte chu Hratzuala te chuan an lo kah rawn nghek mai a, an thi chiang hlawm ngei mai. Khaw lam pana kal dawr dawr pahin "Ti khan, buk chhunga nun thâpa va luh ngai loin anmahni zawk an rawn inpe anih kha" Hratzuala'n a han chuan tlangval ho nuih chu a za tlâng hle, mahse, nuih dar darna chi lah ni hek suh an țhiante pui tûrin khaw chhung lam an pan ve ta a. Silai puak ri dum dum karah chuan naupang leh nunau mangang thawm chu a rawn kat ve nuk bawk a, Diltlâng tlangvalte chu an tawlh zêl bawk a, Lianmawiate lam chu ruahmanna fel fai tak nei an ni bawka an la inchân meuh lo, Diltlâng lam erawh an tlu zawih zawih thung. Lianmawia chuan meichher let reng pakhat chu la lawkin Zawlbuk tuala mei la nung ve chang changah chuan a han dep kai sawk sawk a, meichher chu biain 'i lo lan hun hi a va fuhin i va hlu tak em' tih sup pahin a nui vur vura, Zawlbuk chungah chuan a vawm ta a, chu veleh tlangval țhenkhat chu kal kualin khua chu an hâl ta a, a alh țha duh kher mai. Lal tualah chuan silaite dahin Lusei leh pawih tlangvalte chu an innuai ta a, mahse, an tam hneh tawh em avangin an tawlh zel lo thei loa, "Diltlang tlangvalte u zam suh u" ti lauh lauh tu an pasalțha pakhat chu pan vatin Lianmawia chuan chu pa chu hnung lam ațangin a han tlawh teh reng a, vut bar huang khawpin a bawkkhup thlawp a ni. A rawn tho leh hmel erawh hmuh a nuam lo hle a, a hmel chu thinrimnain a khat a ni. Lianmawia chu rawn pan nghalin a vei chem chu zei takin a rawn vai kuala, Lianmawia tan pawh beih a har kher mai. Vei chem a hman tlatna chuan chan țha a chan tîr dawnin a lang chho ta tlat, mahse, "Ka tlangvalte u, in Lal ka lo kal e, Lusei dawihzepho chu that vek ang aw" rawn ti tu lam chu hawiin an Lalpa Thangchhunga rawn tel ve chu hmu nghal chatin, "Lalpa" a han ti tuara, mahse, a au lai tawp tir chat tu Lianmawia'n a awm vun chat țhawt khawpa a rawn sahna chu na a ti kher mai. Lianmawia lah chuan rawn bawh zui nghalin a ban bul vei lam pang chu a rawn sat fuh leh ta siah bawk nen a chem chu a thlauh ta hlauh mai a, chu veleh Lianmawia chuan a chem pahin kuttum nen a rawn bei ve ta, leiah tlu dunin a chung zawka țan tumin an han bei a, mahse, hliam tuar lo zawk Lianmawia chuan a hneh sawh kher mai, rei lo teah bawh betin a kuttum chu a thlawh chhuak ta dawp dawp mai le, re lo teah Diltlâng pasalțha chu chet pawh che peih tawh loin a mu zawi ta renga, Lianmawia chuan thawh sanin chu pa vei chem ngei chu chharin, 'Nang ang renga khirh hi ka la tawng ngai lo. I chem ngei hman sak hi i phu e"tiin a ma chem ngei chuan a nunna chu a lak sak ta a. Diltlâng tlangvalte chu an pasalțha tello pawhin an luhlulin tlawm an tum lo hle a, an Lalpa lu nei lo a let reng leh an pasalțha nunna nei tawh lo tih hriat taka let reng pawh chu hmu mah se hnual phahna'n a hmang loin luhlulna'n an hmang zawk hlauh a. Mahse, an inchan belh pheuh pheuh miau avangin a tawp a tawpah chuan an inpe ta nge nge a. Lal fapa Rolianpuia chu duh la hmu lo tih hriat takin a tei kual chhena, a tawp a tawpah chuan a tan laia be nawmnah nasa thei em emtu pawih tlangval lo la dam ve chu hmu fuh chatin rang takin a pan nghal a, hnai set sawtah din chilhin a chem fawng lam chuan chupa chalah tak chuan a chhu nghal chawrh a, a thal chiang kher mai. A rawn tho leh lam chu a din chhuah hma hmain a kaihza tha chat hmawk khawpin a lo sat leh siah maia, chu tah a lu chu kuai dâkin a hrawk chu a zai ngatin a zai sak ta a, chu em em zawng Lianmawiate pawhin hmuh hrehawm an ti hle maia, mahse, kam khat an tum lai taka Rolianpuia'n khatia a chet mai chhan a rawn sawi tâkah chuan an ngawi ta thung a. Lianmawia chu rawn ding chhuakin mipuite chu tlangval hoin an rawn khalh khawm kim ta maw tihah chuan "Diltlâng khaw mipuite u, kha kha kan phuba, kan Lalpa phuba leh Zawlbuan khua inrûn avanga intawrh tûr ințanna a ni e. Salah erawh kan man lo ang che u, mahse, inkhua hi tunah kan hâl ral vek dawna, chu vangin tunah hian chhuak nghal rawh u" a rawn tih chuan mi țhenkhatte chu an lo țap nghawl rawih rawih a, mahse, zahngaihna lan tîr chi-ah Lianmawia chuan a ruat lem lo a ni. Khaw mipuite an chhuah fel hma deuh chuan ruangte chu an han senghawi leha tlangval sawm panga lai an inchan tih an hriat chuan an ngui bar hlawma, an lawm a kim lo hle.

Lal fapa Rolianpuia chuan Lianmawia chu koin "Liana, ka tan chhung zawnga chaw kaw puar min hlui ziah tu he khaw Lal fanu hi Lal in lama a awm anih hlauh chuan hruai haw ka va duh ve, i han lut teh ang" a rawn ti a, Lal in chhungah chuan an inzui lut ta a. Tap bula nula pakhat chempui hûm ve țat chunga lo țhu khur hlawk hlawk an hmuh chuan pan hnai vatin Lal fanu Thleihnaii chuan a lo vau ve nasa mai a, mahse Lianmawiate chuan an hnaih zel tho a. Lal fapa Rolianpuia chuan "Lal fanu ka ti na hauh lo ang che, min zui rawh, khua hi kan hal tawh mai dawna, chu vangin ka kiangah i kal ve thei ang" tiin Lal fanu chu kaihthawh a han tuma mahse, a lo duh ikhaw lo mai a, "I sal ka ni anga maw?Min that zawk mai rawh" a lo ti a, mahse, Rolianpuia chuan "Tuman an ti na lo ang che. An that bawk hek lo ang che nga, sal i ni lo bawk ang. A tih takah chuan hreh tak chungin a ding ve ta a.

Khua chu halin in la kang lo zawng zawngte chu dep vekin an chhuak ta a, ral khat ațanga an thlîr lai chuan Lal fanu Thleihnaii mittui chu a sur zung zung bawk a. Kawng țum pangai zawh ngam chi anih tawh loh avangin ramhnuaiah an kal ta a. Kawng laka zan khat an riah hnu chuan khaw thim hlima țiau lui kan hman ngei tumin an kal leh ta sauh sauh va. Țiau lui an thlen chuan khua a thim deuh chhalh tawh a,an kan fel rualin Buk te zarin an buai mawp mawp hlawm a, chu tia an buai lai tak chuan "Che tawh suh u, hual beh vek inni tawh e" rawn tih ri hriain an phawk hru hlawm a, "In ralthuamte kha in dah thla lo anih chuan kan kap ang che u" tih ri an hriat leh meuh phei chuan an chan a chau ta hle. Phur lo takin an ralthuamte chu an dah thla ta sap sap a, Liankawia chuan "I hmel hmai i rawn lan ngam tawh rm?" tiin elhsen takin a han țawng a, rei lo teah Pasalțha tih hriat tak mai pakhat hi rawn kalin "Lal fanu kha min pe let rawh u" a rawn ti phei lang lang a, Lianmawia chuan "Pe let lo ta che u i la?" a han ti a chu pa chuan "Dapchhuah tlangvalte i hmachhawn ang" a han ti leh a Lianmawia chuab "In Lal Sangchhunga a dam em? A tu pa Lianmawia ka ni e" a rawn tih chuan mak ti hmel hlir a ni ringawt. Dapchhuah tlangvalte chuan awih loh turah an ruat ngam chiah si lo, an awih chiah si lo, Lianmawia chu an thlek an thlek mai a.