PASALȚHA LIANMAWIA BUNG - 47

Kar a hla tham lem lo bawk a, hmanhmawh taka kal loin tlai khaw thim fel dawnah Kawtchhuah an thleng ta der mai a, an tlangvalte chuan zin chhuah nuam an tih thute chu an sawi ve chamchi a, Liansanga leh Zamana erawh an ngawi ngal thung. Rei mawi tawk an chawlh khawmuan hnu chuan Liansanga chuan "Naute u kal kan siam dawn em niang? Hei Mana nen hian Lal in lamah kan lo va kal anga nangni zawng in lamah in lo va haw dawn nia, fimkhur takin awm u la, kan inralring reng tur a ni" tiin a naute ho chu a kal pui ta a. Lal tual an thlen chhoh chuan Zamana nen chauh an ni tawh a, Liansanga chuan "Mana, Lianate thang na hi a hla hle mai a, Pasalțha Haudinga tlawm la lutuk hmel ka hmuh khan ka hlauhthawn a zual hle mai, min zui ru ngatin a nia ka rin ni. Inral ring reng ang che. Zawlbuk lamah zanin chu kai la, ralveng tur ruat bawk ang che" tiin a hrilh a, ti chuan Lal inah chuan an lut ta a, an țhi hawnte chu Lal kutah hlanin Liansanga chuan a hlauhthawn rukna te chu Lal leh upate hnenah chuan a hrilh a, ti chuan an in lam ve ve an pan ta a.

A tuk zing khua a lo var meuh chuan Zehtet khua chu a kal dan ngaiin a kal leh mawp mawp tawh a, Liansanga pawhin a hlauhthawn angin thil a kal dawn lo anih a ring ta a, a rilru pawh a hahdam deuh huai nghe nghe. Mahse, fimkhur tluk a awm lo tih hre chiang tu a pasalțha huaisen leh lungfing tak ni țhin a ni a, an tlangvalte chu fimkhur tur leh inring reng turin a chah mawlh mawlh a. Zan a lo thlenga tlangvalte chu nula rim turin an chhuak a, Zamana erawh tlangval pahnih nen ralven bukah an țhu kar thung. Khaw chhung lamah erawh fiamthu thiam deuhte țawngkam ko tlangah tlangvalte chu an dak fara, an nula rim nui ri her her rite chu an bengah chuan a thangkhawk riai riai ngei ang le. Chutih lai mêk chuan Pasalțha Haudinga leh a hote pawh Zehtet khaw ram chhungah chuan mutmu tuahin zing khawvar hmaa khua beih chu an tum dan a ni a, an inkhuarna a hlat tham deuh a vangin thawh hma an ngai dawna, chu vangin mut lam pawh an hma ta zawk a ni. Leng hawn ar a khuan hnu lawkah chuan tlangvalte pawh Zawlbuk lam panin an kal sap sap a, an lawmnute lak ațanga thil danglam deuh dawn tumte erawh an la țhu far thung. Sentei rimtu tlangvalte pawh an chhuak zo deuh vek tawh a, a rilru hneh tuma zantin an run rawn lawi ziah tu, an khaw mi awm thei Chhunthanga fapa Ringaia erawh a la țhu kar thung. Lianzuali chuan a hmuite hung fel sawk sawkin mutna lam a pan san ta a, Ringaia pawh tuibur hmuam da vel a țhut leh hnu chuan haw turin a ding ta a, Sentei chuan sum hmun thleng thlahin chutah a rin loh lutukin Ringaia chu a che ta mai, Sentei puan hmawr deuh ngei tum chuan a bei ta a, Sentei lo țang ve laklawh nen, thawm chhuah ngam ni si lo nen an pahnih chuan an tha tawp an chhuah a, a mipa zawk nge nge chu a ding chang dawn ta tlat mai, mahse, pasalțha huaisen fanu chuan chuti maia a mipa hmangaih loh laka han tlawm chu a tum bîk hauh lo a, a la inveng ve hram hram a ni, Ringaia mipatna khawng țha takin a puan chhana a rawn do fuh leh zeuh changte chuan hlau hle mah se, tlawm erawh a tum hauh lo a, a vanneih a siamin a pa Lal in kal haw thawm an hre ta hlauh mai, chu veleh Ringaia chuan thlah vatin Sentei pawhin a puan tla lek lek tawh chu a bih țha nghal sawk sawk a, "I nula ka ni ngai lo ang, ka nuțapa Lianmawia thinrimna i hmachhawn ngei ang" tiin mittui tla zawih zawihin Ringaia chu a hrilh a, a pa thawm a lo hnaih tak avangin Ringaia chu a chhuak ta vata, Sentei rilru chu a nain a zak kher mai. A tuartu zawk ni mah se, a tawrhna chu mite'n an hriat hunah a mualpho zawk a ni dawn tih a inhre chiang bawk nen, rilru na taka ngawih liam pui chu a tum ta a, mahse, Lianmawia hnena hrilh ngei erawh a tum ruh hle. A thlavang hauha Lianmawia a chet ngat chuan khaw mipuite lakah pawh a mualphona a nep deuhin a ring a ni. A pa rawn luh rual chuan a ni pawh a mu fel ve chiah a, zan tam a rilru lo ti hah tawh tu Ringaia chu a huatin a haw khat tlat tawh a, tlangval dangte kiangaha rawn leng ve zel bawk si a, a tan tih ngaihna vak a awm si lo nen a rukin a tuar tlawk tlawk a, a nau Lianzuali hnenah erawh engkim zep nei hauh loin a hrilh vek thung.

Khaw fing chah rual chuan Zehtet khaw ralvengte silai chu a puak ta dur mai, a hnu lawkah silai dang chu a puah chhunzawm mawlh mawlh bawka, khaw chhunga tlangval awm ang angte chu silai awm ang angte nen khaw mawng lamah chuan tlan khawmin hmelma lam nen chuan an inkap ta a. Chawnpui Lal thu lo a, Zehtet khua lo bei tu tlangval sawm thum rualte chuan an hruaitu Haudinga huaisenna chu an thlamuan pui hle tih an Lal thu loa an chet ngam danah a lang chiang ngei mai. Zehtet lam pawh Lianmawia leh Hratzualate awm lo mah se, Zamana a la awm ve tlata an zam bik lo, silai fung nei tlem zawk ni mah se, hmelmate lo bei hmasa tu an nihna leh a lu nunga an tam zawkna chuan a ti phur hle. Chu tia a khat tawka silai a puah reng hnuah chuan khua a lo var țan ta a, silai chu a la puah chhunzawm renga,a khat tawkin na tuar riin a zui leh țhin, khaw chhung lamah erawh khaw mipuite chu Lal tualah an awm vek tawh thung. Tuibur hmuamda vel an inkah leh hnu chuan a khawi lam ve ve pawhin silai mu an tlachham ta, chem sen nen an buaina chu chin fel a ngai ta tih hriain Zamana chuan "Zehtet khaw tan i bei ang aw. Pasalțha Zamana ka lo kal e" tih pahin a mi lu lak chem nen chuan hmelma lam chu a pan ta a, chu veleh hmelma lam ațang chuan Pasalțha Haudinga pawhin a hming a rawn chhal ve lauh lauh bawk a, chutia an han inbawh rawn takah chuan a tlem zawk Chawnpui khuate chan chu a chhe ta hle a, inchan belh zel ai chuan tiin an inpe ta a, a dam chhuakate chu tlangval pariat chauh an ni tawh a ni. Haudinga chuan an kal hmaa an val upa, a țhianpa ni bawkin "Zehtet te ang khaw lian leh ropui rûn tur chuan in tlem mah mah a ni, an pasalțha pahnih leh tlangval tam zawkte zin chhuak mah se, khaw lian tak an ni a, khaw hmun nghak tlangval pawh khaw te rûn tham zet chu an la indah ngei ang. I thil tum hi țhulh la a țha ang. I u lo haw hunah ro kan la rel țha dawn nia. Kan Lal pawh kan be leh anga"a tihte kha a hre chhuak vang vang a. Zehtet khaw tlangvalte erawh hliam na deuh hlek tuar paruk vel an awm a, an zinga pathum phei chu an beisei awm loh hle. A bak chu hliam nei ve neuh neuh awm nual mah se, na lutuk an ni lo thung. Chawnpui tlangvalte chu an vaia hnungkhirh vekin khaw chhung lam an pan pui ta a. An țhian hliam na zual deuhte chu zawnin Lal in lam an pan pui vat vat a. Lal tualah chuan hmelmate chu an țhingțhit tir țhap a, Lal in chhungah pawh tlangval hliamte buaipuiin Lal nu Zikpuii leh bawlpute chu an che zung zung a, Lal leh upate chuan ro relin Chawnpui tlangval an mante chungthu chu an ngaihtuah tlâng a, pawn lamah erawh pasalțha Haudinga chuan an thi vek dawn thoah ngaiin a kawhmawh bawl zawngin a che ta a, Zehtet khaw mipuite chu anchhe tinreng lawhin a au ruai ruai a, Lal leh upate pawhin a thawm chu hre pha mah se, an nuih liam san mai a,mahse,Haudinga'n "Hnamchawm Lal phuahchawp hnuaia kun in nih hi zak rawh u" a tih erawh paidam har an ti viau niin a lang, engmah sawi loin an inzui chhuak dam dam a, chutih lai chuan Zamana chuan Haudinga chu kawkin "Kha pasalțha inti kha a bengchheng rei ta, han phelh teh u" a han ti a, tumahin khap hek suh, tlangvalte chuan Haudinga chu phelhin a ma chem ngei chu pein Lal tualah chuan an inveh ta a, an thawm hriain mipui haw darh tawhte pawh an lo pung khawm leh mek a. Zamana chuan Haudinga chu a chhaih vel mai mai ni hian a lang ber a, Haudinga hah tawh lutuk chu a nak a puar nasa thei hle. Zamana erawh a la zuang zak zak thung. Haudinga'n tha tawpa a chem a rawn vai dawn chiah tihah chuan dawk phei zawkin Haudinga dulah tak chuan a han tlawh siah maia, Haudinga rak țhawt chu a thal zui nghal huang huang a, a pum chu dawmin a vial ngawih ngawih a, Zamana a lo thawh leh hun nghakin hlam hnih vela hlaah a lo nghak. Haudinga na ti lutuk chuan thawh mai har a ti hle, a tho tur chu rawn dak chhuakin Zamana chu țhen sak sak pahin huatna tinrenga khat mitmeng nen a lo en tlawk tlawk a, mahse, rin loh takin thawk leh khatah Haudinga chuan a ruka a vaivut lo țham khawl sa chu Zamana hmai zawnah chuan a rawn vawm ta mai, Zamana mit mim lai tak chu bawh zui nghal a han tuma, mahse Zamana pawh alo awm mai mai bik lo, Haudinga'n khaw hmu thei loa a siam rual khan hnung lamah tawlh hlek pahin a zangthal zawngin a tlu nghala, chu chuan thihna a pumpelh tir chiang hle mah se, a awm vun pui chat țhawt khawpa Haudinga sahna avang chuan a mit deuh sulh thei hial a ni. Haudinga chuan Zamana lu chu lak ngei tumin a chem chu a han vai kânga chutih lai tak chuan silai lo puakin a chem chu a thlauh chiang hle. Silai lo puahna lam chu khaw mipuite chuan en nghal vatin Chawnpui khaw pasalțha Hauchhuma leh tlangval pali silai keng vek chu an hmu ta a, chu veleh Zehtet tlangvalte chuan hual bet nghalin beih an inring hle. Hauchhuma chuan a nau chu en tlawk tlawkin Haudinga erawh chuan en pawh a en țha ngam lo thung. Zamana mit mim reh fel rawn tho chhuakin Hauchhuma a hmuh chuan mak a ti rilru hle a, Hauchhuma chuan hma lam pan pahin Zehtet tlangval anmahni hual bet tlat tute chu en pahin "Kiang rawh u, ka chhawnin a hem ang che u" tih pahin a kal mawp mawp maia, hmana he khua ngei a an lo hmuh tawh Pasalțha Hauchhuma chu a huaisen an ti hlawm hle, mahse, chu ti maia kal tir tur khawp chuan an dawihzep bik hauh lo an la hual bet ve tlat, Hauchhuma chuan a vawi hnihna'n "In Lal ka be dawn e, kiang rawh u" a han ti leh a, mahse, Zehtet tlangvalte chuan kian san an tum hauh lo. Mahse, Lal Kapthanga'n kal tir tura a tih takah chuan an kal san ta a.

Haudinga lo ding zum zût chu pan vatin Hauchhuma chuan "Ka nau, min ti zak hle mai." tih chauh sawiin a rilru a nat hmel hle. Zamana lam chu panin "Ka nau, nunna i la lo hi ka lawm hle mai. Inbeihna hi khawngaihin tawp tawh rawh se, khaw ințhenawm mai kan ni a, indo tur kan ni lo e" a ti a, Zamana chuan "Nau huaisen tak i nei a ni. Ni e, tawp tawh rawh se" a lo ti ve bawk a, Hauchhuma chuan Lalpa Kapthanga hnenah chuan "Lalpa, , kan Lal hremna hmu tur tho an ni a, khawngaihin ka naute hi ka hruai haw min phal sak thei angem? Chawi tura min tih pawh a rang thei ang berin ka rawn thlen nghal ang" a ti a, Lal Kapthanga chuan Hauchhuma nun ngil leh dik tak chu hmuh sakin a ngaisang ru hle a, chu vang chuan "Khaw ințhenawm mai kan ni a, kan buaina lo chhuah chhan pawh i hre tawh ngeiin ka ring. Ti khan him dam takin haw rawh u, inremna lo chu duh dang kan nei lo a" a ti a, Hauchhuma chuan lawmthu sawiin a naute ho chu an khaw lam a pan pui ta a. An kal liam hnu chuan Lal Kapthanga chuan "Pasalțha dik tak a ni, Lianmawia pa, tlangval lai a va ngaihawm ve" a han ti a, Upa Chawnga chuan nuih vur vur pahin "Hun hian min nghak si lo a le, vanglai ngaiin kan kiu vawng vawng mai zel dawn a nih hi" tiin inchhung lamah an inzui lut a, Lalnu Zikpuii rai puar luah tawh ei lo rel mêk chu Lal Kapthanga chuan enin a nui deuh suka, a hlim hmel surh surh hle. Fa an han nei leh dâwn chu a ni a, a lawmin a nghakhlel hle.

Lianmawiate pawh an rawn haw ve mêk zela, an khaw thlen hun an nghakhlel tlang tawh hle a, zan hnih chiah an hmabak tawh bawka ramhnuaia riah leh ai chuan tiin an la luh ngai lohna khuaah chuan riah tumin an lut ta tawp maia, lo sul haw hun lai anih avangin kawtchhuahah pawh chawl an lo tam hle a, chutia Lianmawiate rawn inzui dam dam an hmuh chuan an ți nghal hru maia, an ralthuam kente chu an en uluk hlawm hle. Mahse, Lianmawia chuan "Țhiante u, Zehtet khaw mi leh sate kan ni e, zan khat lek min lo mikhual theih ringin inkhuaah hian kan rawn lut rawih mai anih hi" a han ti a, an zinga pa pakhat, a vanglaia pasalțha ni ngei tura lang chu rawn pen chhuakin Lianmawia chu a han en vang vang a, "Khawi lam pan tur nge in nih?" a han ti a, Lianmawia chuan "Kan khaw lam pana haw tur kan ni e, kan unau Zawlbuan khuate'n rûn an tawk a, pui turin kan han kal a, țiau râl pawih ho kan han hmachhawn pek alawm maw le" a han ti a, chu pa chuan Lianmawia hmelah chuan dawt a sawi lo a ni tih a hre chiang ta a niang chu, "Zehtet pasalțha Lianmawiate in ni ngatin ka ring" a han ti a, Lianmawia chuan "Ekhai, ka pu Lianmawia chu ka ni ngei maia, mahse, pasalțha han tih tlak em chu ka ni hauh lo a nia" a han ti a, chu pa chuan "Pasalțha Lianmawia, ka hmu thei che hi ka lawm hle mai. Hawh teh u, kan Lalpa pawhin in hmel a hmu chak viauin ka ring a ni." tiin khaw chhung lam a pan pui ta a. Kalkawngah chuan Lianmawia chuan "Ka pu, in khua hi kan vawi khat rawn kalna a ni a, in khaw hming leh in Lak hming pawh hi kan hre hauh lo mai. Min han hrilh thei em?" a ti a, chu pa chuan "Ni tak maw, kan khua hi Sertlang khua a ni a, kan Lal hi Dochhunga a ni e, in za sawmnga nufa vel kan ni a, mipuite kan inlungrualin nuam pawh kan ti hle a sin" a rawn ti a, Lianmawia chuan "Sertlang khua chu ka pa'n a sawi ka hre tawh ngat mai, pasalțha Chhunglianate khua a ni lawm ni?" a rawn ti a chu pa chuan "Ni tuk e, Chhungliana chu min chhangtu chiah hi a ni a, mahse kum hmasa lamah khan sapui kut tuarin mual a liam ta a ni." a rawn ti a, Lianmawia chuan "A va pawi ve aw, a hmel hmai han hmuh pawh a chakawm nen" tiin a lo chhanga, kawngah chuan titi chho zelin Lal in chu an thleng ta a. Lalpa Dochhunga'n an mikhualte chu Lianmawiate an ni tih a hriat chuan a lo lawm em em a, "Lusei pasalțha huaisen em emin ka khua a rawn lut duh hi ka tan chuan chawimawina nasa tak ang hial a ni. Ka inah ngei hian thleng se la, anmahni rawn zuitu tlangvalte pawh ka upate'n thleng rawh se, zan khat chhung na na na chu kan lo duat hle tur a ni" tiin Lianmawia chu a hauh nghal bur bawk a. Lianmawia leh a kianga thleng ve Hratzualate an innghah fel hnu chuan leihkapui Lalpa Dochhunga kiangah țhuin zu khawn pahin an titi tlanga, khaw chanchinte inhrilh tawnin buh leh bal chungchangte chu an sawi hlawm a, khaw chhungah chuan feh haw an rawn lut zut zut bawk a, an țhiante lawm rual zinga tel ve Lal fapa Thangvela leh a farnu Chhungpuiite pawh an rawn thleng ve ta a, Lalpa Dochhunga chuan inhmelhriat tirna te neiin Lal fapa Thangvela chuan ngaihsan hmel takin a rawn chibai a, Lak fanu Chhungpuii erawh a sen tan tan thung. Zanriahte kilin rei loteah Lal Dochhunga fate nen chuan an inpawh tlang ta hle a, zan lama upa ho an rawn chuan kai hnu chuan leihkapui lamah insawn chhuakin an inkawm a, an hlim dar dar hle. Lal fapa Thangvela chuan "Kei zawng, ka țhiante ka zu tlawh lawk ange, ti khan ka nau kha lo kawm rawh u" tiin a kal san a, Lal fanu Chhungpuii kiangah chuan țhuin titikhawchang sawiin an nui leh dar dar țhin a, Chhungpuii rilru chu țha an tiin kawm pawh nuam an ti hle. Chu tia tui taka an inkawm lai chuan leng hnawt ar a rawn khuang ta al al a, Lianmawia chuan "Khawnge, Zawlbuk lam kan zu pan ve tawha nge, Chhungte mang țha tak i mang dawn nia" tiin kal an han tum a, mahse, Lalpa Dochhunga chuan an thawm lo hriain a rawn au vat a, Lianmawiate an va luh chuan "In tlangvalte kha ka tlangvalte'n an lo buan duh ang nang ni chu he lamah riak mai rawh u, in hmelhmai inzu lan zawngin ka tlangvalte an kimki vek palh ange, Hrata nen khan he lamah mutmu tuah mai rawh u" a rawn tih avang chuan Lal inah chuan an țhu ve ta reng a. Lal fanu Chhungpuii leh a nu'b mutna an rawn phah sak hnu chuan mu ve nghalin, zinga chhuak leh nghal tur an nih avangin mutthilh hma an duh a, an tlangvalte erawh Sertlang tlangvalte nen an inchai ni ngeiin a lang ,Zawlbuk thawm pawh an hre pha hial a ni. Hratzuala chuan Lianmawia hnenah chuan " Liana hei, nupui neih lam hi ka nu hian min sawi pui fo tawh maia, i pa ka la rawn sawi pui ang ka ti tak naa hun ka neih theih loh avangin ka la țhulh zel chu a ni a, enge i ngaihdan ni ve reng reng? Ngaihtei kha ka la theihnghilh hauh lo a, mahse, ka nu hian tu hmel han hmuh thuai thuai a nghakhlel tawh si a chet han lak dan tur mai ka hre hauh lo a nia" a ti a, Lianmawia chuan ngaihtuah vang vangin "I nu chu a thiam lo hauh lo, kei ngei pawh ka nu leh pate'n vawi tam min sawi pui tawh asin, Chhuantei ka theihnghilh hunah ka nei ang ka ti rilru țhin a, mahse, ka theihnghilh thei ngai dawn lo tih ka inhriat hnu hian, theihnghilh ka tum ta lo law law a, ka mitthlaa a la cham reng leh a hming ka la hriate hi ka lawm zawk em em a ni. Nupui atan chuan nula țha tak tak i hmu ngei ang. Chung zinga i hmangaih theih tura i rin ber kha nei la a țha ang" a rawn ti sap a, Hratzuala chuan "Chapo thil thu ni lo se, nupui tur chu ka vai bîk hauh lo, mahse, ka tawrh ang kha ka tuar nawn leh palh ang tih hi ka hlau em a ni. Mahse, Țhakimi ka tawn hnu ațang hian ka rilru chu a dang ve hlek hlek a. Kan haw hunah i pa hnenah sawi pui i la, amah Țhakimi'n min lo hnial lem lo anih phawt chuan neih ngei ka duh ang. Ngaihtei kal bo hnua ka hmeichhe duh awm chhun a la ni a, chan nawn leh ka duh tawh lo a neih ngei ka duh tawh zawk a ni. Nang pawh, Lal fanu Rosangliani dam veleh palai tir ngei ang che. A unaute pawh ka biak sak vek tawh che kha"a tih chuan Lianmawia chu tho kang dawrhin Hratzuala chu rinhlelh hmel takin a han melh a, Hratzuala hmelah chuan dawt anih loh zia a lang chiang bawk nen a hlim kher mai. A țhianpa'n a tana a thil lo tih chu lawmawm tur tak a ni a, khaw hmuna leng an nih loh avanga a thil lo huphurh em em ṭhin kha a lo chin fel sak vek mai bawk nen,khua an thlen vela Țhakimi hmuh ngei chu a tih tur niin a hre ta a, ti chuan mutthilh tumin an titi chhunzawm ta lem lo a.

Zing khawvar ruala chhuak leh nghalin Sertlang Lal chhungkua bakah upate chuan an vai liam bawk a, an ni pawh chawl khawmuang loin an kal ta a. Feh reh san hun awm velah chuan an hma lawka mihring țawng ri nak nak thawm an hriat chuan an inring ru nghal țhap a, thawm chu lo hnai zelin an rawn lan meuh chuan an rin loh takin an khaw rawlthar pathumte an ni tih an hre ta a, Lianmawiate chuan an chanchinte chu zawtin Vungthangate pawh chuan anmahni ngaihven tura kal an nih thute chu hrilhin, Chawnpui khuate nena an buaina a reh fel tawh tih hre hek lo, Chawnpui khaw kut an tawrh dante leh an buai zui dante chu sawiin Zamana leh Pu Liansanga Chawnpui lam an pan thute an sawi lai chuan Lianmawiate hmel chu a dur khup khup maia, thinrim luat vangin hmanhmawh takin an khaw lam an pan ta hlawk hlawk a. Nilenga an kal leh hnu chuan Zehtet khaw ram chin chu an lut hman ta hram a, riah bukte sualin an buai sang sanga, an khúa chu an ngaihtuah tlan em avangin zan lamah pawh mutthilh mai har an ti hlawm hle a, an awm loh hlana an khuain buaina an lo tawk mai chu pawi an ti hle. A tuk zing khawvar hnu lawkah chuan kal leh nghalin, an khaw lam chu hmanhmawh takin an pan zung zung a, nilenga an kal leh hnu chuan Unau hmel hai hun laiin Zehtet kaetchhuah chu an thleng ta a. Rei tak pawh chawl khaw muang loin khaw chhung lam chu an pan ta a.