PASALȚHA LIANMAWIA BUNG - 48

An khua him piala an han hmu chu an lawm hle maia, Lal in lam panin Lianmawia leh Hratzuala chu an kal nghal vat vat a, Lalpa Kapthanga'n an hmel a lo hmuh veleh "Ekhai, in va han thang rei ve, rilru a lo hah ru hman lutuk alawm. Hawh teh u, in chhawl a hal ange, in han kalna chanchin erawh zan lamah kan sawi a niang chu" a lo ti a, Lianmawiate chuan zu chu tlem ve ve tem sakin "Ekhai kan hah a dam ta, kan Lalpa zu nge nge, khawi dang khaw Lal zu mahin a tluk lo anih hi maw. Lalpa, zanriah te kan zu kil ve phawt ange, chuan, kan lo kal leh ang. Ian tlangvalte zinga rawn haw ve thei ta lo te pawh an chhungte tlawh kual sak an ngai ngei ang"tiin an chhuak ta a. Lianmawia'n an in lan theihna a thlen chuan kawtkaia a nu leh nau lo ding chu a hmu a, rang taka pan thlain amah nghakhlel taka lo thlir vang vangtu a nu leh a naute chu inchhung lamah a luh pui a, tap bula lo țhu a pa chuan "Taite, in rei lutuk a, kan mang a lo ang ru hman pek alawm" a lo ti a, Lianmawia chuan "E ka pa, hei dam takin ka lo haw alawm" tiin tui hmun lam panin a va insil sawk sawk a, ti chuan zanriah an kil ho ta a. Zan lamah chuan Lal in lamah lengin an han chet dante leh Thleihnaii leh Rolianpuia inneih an han hman leh phawt thute chu an sawi a, Lal leh upate chuan ngaihnawm ti takin an lo ngaithla ve bawk a, Lal Kapthanga chuan "Ka pasalțha chhuanvawr te nge nge, in thlen chin a hriat ṭhin hle mai. Ka chhuang hle mai che u." tiin a han fak luama, Lianmawiate chuan lawmthute sawiin Lal in chu an chhuah san ve ta a, ti chuan tlangval thita chhungte ho chu tlawh kualin an fapa, unaupate thihnaa pawi an tih ziate leh eng hunah pawh țan pui an ngaih hun apianga koh theiha an awm reng thute an hrilh a, ti chuan Zamana te inlam panin an chho ve ta a. Zamana pawh a nupui bulah a lo țhu kuk a, Lianmawiate hmel a hmuh rual chuan "Kan pasalțhate chuan min theihnghilh ta a nih hi ka lo ti mek a sin. Min va han tlawh har ve" a lo ti a, Hratzuala chuan "Nang alawm mawle, kan haw tih i hriat ruala lo lang nghal tura kan rin i ni" a han ti ve a, Zamana chuan "Ekhai, min tlawh tur zawk alawm in nih, kei zawng nupui nei tawh ka ni a, nangni anga he heu kual mai mai hman ka ni hleinem" a lo ti ve a, Lianmawia chuan nuih vur vur pahin "Thaibawih hi chu an hriat ṭhin mange" a lo ti ve bawka, ti chuan hlim taka inkawm tlangin leng hnawt ar khuan hnu lawkah chuan Zawlbuk lam panin an inzui phei ta a. Kawng laka an titi lai chuan Sentei te in ațangin Ringaia lo chhuak chu an hmu a, mahse, engah vak ngai lem loin an zui ve mai a, Ringaia leh Sentei inkarah engemaw tak a awm anih an ring maia, chutia leng hnawt ar khuan hnu daiha zawlbuk lam pan ta chuan hmuh țha a hmu anih ngei an ring hlawm a, mahse, Lianmawia rilru tak erawh a dam zan lo. Ringaia chapo zia khawtlang hriat oa ni chiah lo mah se, ram vah ho nikhuate leh khawtlang hna han thawh ho nikhuaa a țawngkam meinei tak takte, tlangval tam tak mit ti mim ru tu a ni tih hre chiang tu ni miau hek. Remchangah Sentei la zawh fiah ngei chu a tum ta a, a lehlamah mi awm thei chhungkua an nih avangin Sentei hian lo be țha pawh ni se a awm a ti viau tho, mahse, Ringaia hi chu a farnu ang chiaha a en Sentei tan chuan țha a ti chiah lo a ni.

A tûk zing khua a rawn var meuh chuan khawlai chu naupang infiam riin a khat leh tawh a, Lalpa Kapthanga pawh a upate nen mitthi chhungte tlawh kual paha khawchhung fan kual an duh avangin a tho hma kher mai. Lianmawia pawh chutih mêk lai chuan tuikhur lamah tuium phurin a kal ve hnak hnak a, a nu a chhawk mai bakah thil dang tih tum a neih vanga kal a ni. Tuikhur a zu thlen chuan nula tuichawi tumah an lo awm lo a, a tlai deuh anih ringin a tui um ken te chu hmanhmawh takin a han thal sawk sawk a, chutia a thal mek lai chuan nula țawng thawm a hre ta a, rang taka hawi phei nghalin Hrilliani leh Țhakimite unau lo kal chu a hmu ta a, an lo thlen fel chuan a tuium chu a lo thal zo der tawh a ni. Din chhuah pahin "Nangni unau chu, ka khalh ve teh tlat che u chu le" a han ti a, Hrilliani chuan "Nizan lamah kan naute a khua a sik nasa deuha, kan mu har deuh a, thawh kan hai pek alawm mawle, a zahthlak tak tak a ni" a rawn ti nang nang a. Lianmawia chuan "A va han zia lo ve le aw, nizan lamah lo lenna hun a awm si lo a, kan lo hre ve miah hleinem, zaninah kan lo leng ange" a lo ti a, Hrilliani bawk chuan "Chutianga han na em em pawh a ni lo, tukin phei chu a pang pawh a dai tawh riau lehnghal. Mahse, lo leng tho rawh u, in hmel hmuh pawh a khat alawm" a lo ti a, Țhakimi chuan "Ni e U Lian lo leng ngei ngei rawh u" a lo ti ve bawk a, Lianmawia chuan "Ekhai, kan lo leng em em ang, Țhate vawin lam enge han tih i tum deuh a? a han ti a Țhakimi chuan "Ka țhiante nen thing phurh kan tum deuh a, dai hnai lawkah sawn phurh mai tur, dah țhat sa kan nei a" a lo ti vat a, Lianmawia chuan "Chuti, awm awl aiah ka lo zui ve ang che u, sava veh pahin, hei ka kal san phawt ang che u, chaw ei tui u aw" tiin a kal san ta a.

Lal Kapthanga leh a upate khaw fang kual chuan khaw mawng lama inchhe zual deuhte chu a chhiat tak tak hmaa thawm țhat a ngaih thute sawi hoin a hma thei ang bera khawtlangin a thawh a ngaiin an hre tlang a ni. Khaw mipuite chuan zah takin an lo be hlawm a, khua chu fang kual zelin, an khaw chhung pharh zau țha em em leh in tam tak awmna chu fan chhung a rei duh kher mai, Lal in lama an let leh meuh chuan tukțhuan ei hun a ni der tawh a, khaw mipui chaw kil hma deuhte phei chu lo lama kal turin an insiam țan mek tawh nghe nghe a ni.

Lianmawia pawh in lama awmhahdam ve mai mai turin a nuin hrilh nasa teh mah se, ina awm mai mai ai chuan tiin a naupan laia a pain a siam sak a sairawkherh chu akin saihlum hrual sa a neih tlem te chu ipteah khung bawkin kawtchhuah lam chu a pan hnak hnak a. A va thlen phei hnu rei loteah Țhakimi pawh a țhiante pali nen an lo inzui thla ve hnak hnak a, ti chuan an thing phurhna hmun tur lam pan chuan an kal ta nghal a, Țhakimi țhiante chuan an lo ngaihsan em em leh an ngaihzawn ruk em em an pasalțha kianga an han kal chu nuam an ti hlawm hle mai. Lianmawia lah chuan an awm dan chu hrethiam ve miau hek an lawm tawk tur leka han fiam zauh zauh chu a chinga, an nui ho leh dar dar zel a ni. An thing phurhna hmun tur an thlen chuan Lianmawia chuan Țhakimi hrepui chu hman sakin a han ek phel zung zunga chutih lai chuan Țhakimi țhiante chu a sir deuhah lo țhuin an lo titi ve nak nak hlawm a Țhakimi erawh Lianmawia puih pah chuan a bul hnai maiah a lo awm ve thung a, Lianmawia chuan chu aia hun țha chu awm dawna a hriat loh avangin, Țhate, zanin lamah țhianpa Hrata ka lo len pui ang" a han ti a, Țhakimi chuan nuih deuh seih pahin "Keini in angahte chuan in lo len duh pawh ka ring lo e" a rawn ti a, Lianmawia chuan "Țhate, Hrata hian a duh che a ni. Enge i ngaihdan erawh ka hre hauh lo, mahse, ka țhiana tan tiin ka hrilh ta tawp che a ni. Ngaih loh lama i ngaihloh hram ka beisei" a han ti sap a, Țhakimi chu a han ngawi vang vanga chutah thawk halh pahin "U Lian, U Hrata te ang tlangval to chu keini tan han beisei ngam chi niin ka hre lo. Mahse, i thusawi kha a dik tak tak anih chuan zaninah a dikzia nemnghet turin lo leng rawh se" a ti ve ta a. An inpeih fel hnu chuan an inzui haw leh dam dam a, Lianmawia chuan sava veh pah a duh deuh avangin a pen san ta a. Chawhnu her anih meuh chuan Lianmawia pawh a ipteah chuan sava sawm panga zet a awm der tawh a, a saihlum neih a tlem tawh bakah a hlawhtlin thawkhat viau tho avangin a haw ve ta a, kawtchhuahah chael khawmuangin a tuithawla tuite chu a han dut kulh kulh a, thlifim dawn pahin hla taka tlangte chu thlir kualin khaw chhak lam tlâng dung chuan a lung a lenin a mitthlaah Lal fanu hmelțha Rosangliani chu a lang reng bawk a, hmuh leh a chak tawh hle maia, a hliamte pawh a hma aia a dam ngei tawh a rin avangin, favang a lo thlen veleh a, palai tirh mai a duh a ni. Rei mawi tawk a chawlh hnu chuan khaw chhung lam panin a kal ta a, khua a luh dawn țepah chuan mawlhtu a awm tlat avangin vei lamah peng kawiin Chhuansangi an phumna hmun lam chu a pan leh ta te te a, a va thlen phei chuan a thlan chu a chhungten an enkawl uluk tih hriat takin a lo fai han a, Lianmawia chuan țhut pahin "Chhuante, i va ngaihawm țhin em" a han ti sap a, ti chuan a hmangaih hmasak ber Chhuansangi thlana țhu chungin Chhuansangi chu a awm ve ang chiaha ngaiin a kawm bawrh bawrh a, chhangtu awm lo mah se a rilru a awm awm chu sawi chhuakin a hmangaih hmasak ber kiangah chuan a inbunruak a tih theih hial awm e. A chawlh kual rei tak em avangin khua a va luh chuan ni pawh a lo her deuh bawih tawh a, hmanhmawh taka an inlam pan vat vatin inchhung a zu luh chuan a nu chauh a lo awm a, "Ka nu khawnge midang hi an awm a?" a ti a, Pi Țhasangi chuan "I nau chu a țhiante bulah a kal anih kha, i pa pawh Lal in lamah a han lang ve anih kha" a ti a, chutih lai chuan Lianmawia chuan a sava perh thlak te chu a lo theh thla zung zung a. Rei lo te a awm hahdam deuh hnuin sava pahnih chu lain Hratzuala te in lam panin a kal ta a. Hratzuala pawh an luhkaah lo țhuin vaibel a lo pak khu tual tual a, Lianmawia lo kal a hmuh chuan "Kha, khawi lamah nge i vah leh du du mai" a lo ti vata Lianmawia chuan "A khawiah mah vak lo e,dai hnai ka hrut vel mai mai e ka tia, ka rin ai takin ka hlawhtling ta sia, kha hei hi lo ei ve rawh u" tih pahin sava chu Hratzuala nu hnenah chuan a pe a. Hratzuala kiangah chuan țhuin a beng bulah "Zaninah Țhakimi'n lo leng rawh se a ti. Kal hma i la a bul hnai deuhah țhut kan tum dawn nia" tiin Hratzuala chu a mit ko a han sa khum ak ak a, Hratzuala chuan lo ner khum sawk pahin "Eng thil tak lo va hrilh ang che maw aw" a ti vawng vawnga.

Zan lamah chuan Hratzuala nen chuan Țhakimi te inah chuan an lawi lut ta nge nge a, tlangval dang an lo la tlem avangin Țhakimi bul hnai lawkah chuan țhuin an titi ho ta a, Țhakimi leh Hratzualate mit pawh a intawng fuh thei hle. Rei lo te hnuah Lianmawia chuan "ekhai, kei zawng ka chau a ni der mai. Ka lo va haw phawt ange, tih pahin a chhuak nghak ta nul nul a. Sentei te inah chuan lutin Ringaia pawh tap bulah vawk chaw bel vilin a lo țhu suah tawh a ni. Lianmawia chu tlangval dang ho kiangah chuan țhu vein an nui ho leh dar dar țhin bawk. Chu tia an titi tui lai tak chuan leng hnawt ar a rawn khuang ta a, tlangval ho chu chhuak sap sapin Lianmawia erawh a la kar thung Ringaia erawh Lianmawia hmel a hmuh vang nge] a chhuak hma lamah a țang ve tlat. Tlangval dangte an chhuah vek hnu chuan Lianmawia chuan ' Sente, i ngaihawm hle mai"a han ti sap a, Ssntei hmela rilru hahna lang chhuak chu a hmuh kan lo chiang hle. Sentei' n a chunga Rungaia chet țhin dante chu a hrilh ta vek a, Lianmawia thin chu a rim chiang kher mai, hmanhmawh taka chhuak nghalin Ringaia zawlbuk lam pan mek chu au let lehin thim tham lamah hruaiin azilh ta hrep a, Ringaia zak lutuk chu a kun reng ringawt a,tharum thawh zawngin che dawn ta se Lianmawia a khin phak loh tur zia chu a hre cjiang su, tin, Lal hnenah zualko dawn se Upa fa an ni a, thiam chang zawk an la ni zui bawk nen "Liana mi ngaidam teh" tiin ngaihdam a dil ta a. Lianmawia chuan "Aw le, tun țum chu ka ngaidam ang che,mahse,a hmu leh a awm anih chuan i thi ngei ang. Tin ka farnu anga ka en anih avangin . Athlavang hi ka hauh zel bawk ang." tiin a hrilh a ti chuan zawlbuk lam chu an pan ta a.