PASALṬHA LIANMAWIA BUNG - 51

Zehtet khaw lama Chhungteite unauza an châm chhûng chuan Lianmawiate nen an innêlin an inkawm nasa hman bawk a, an haw dawn nî a lo thlen meuh chuan an inngaih tûr thute leh zin leh ngei tûra inchah chungin an inṭhen fel ta a. Lianmawiate pawh an lung a lêngin inhmuh khawm leh chu an châk tlâng hle. Tûkṭhuan kîl zawh lamah Mankungate lo lamah kalin Mangkunga farnute lâwm ho kiangah chuan an bung ve malh malh a, tlangvâl heiha dup dup kâra nula nui ri her herte leh ral leh lama lâwm rualte nena an inau thâwm vêl chuan chu lai ram vêl chu a luah khat a ni ber.

Tlâi lam ni tlâk dâwn velah chuan Chhungteite unau zâ pawh an kal lama an bûk sualna hmun ngai, hmun biru tak leh him takah chuan an awm leh tawh a, an unau zinga upa ber Tawnliana hi Zehtet khuaa ṭum hnih lai a lo zin ve tawh avângin riahbûk sualna tûr hmun ṭha chu a hre hle. A pa silai ken tir chu an milai Banglova chuan hawl chhuakin zanriah hmeh tûr a zawng a, an bûk an kalbo san hlana lo chhe lai chu Tawnliana leh Vawrthangate chuan an lo thawm ṭha mawlh mawlh a, Chhungtei leh Siamtei chuan ei an lo rêl thung. Banglova vahrit pali kah thlâk leh an chaw chhumte puar el euha an ei hnu chuan bûkah chuan an mu zâl a, an tîtî a, bûk tuala an meipui chheh chu a êng hluah bawk nen, a hmeichhiate pawh an thla a muang hle. Vawrthanga chuan "Banglo, mi zu inthiar pui lawk teh" a rawn tih chuan Banglova chuan "Mahni pawha kal ngam hlei lo, i dawihzep si" a lo ti vat a, a unau dangte chu an lo nui dar dar a, Vawrthanga chuan "Kal vat teh ang" tiin a chhuah pui ta a.

Chutih mêk lai chuan zan nga lai ram pa lailênga lo thang tawh Bunghmun pasalṭhate chuan an bûk sûalna rûam chu an lo lût chho ve mêk a, chu tia an chhak lawka hmeichhe nui thâwm an hriat rual chuan ding ṭhapin rammi emaw an ti rilru vek hlawm a, mahse, mipa ṭawng lâng lâng ri an hriat hnu chuan mi zin vei vâk anih an ring ta a. Lianpuia chuan "Hei, zan thim a ni tawh a, Zehtet khua pawh kan hnaih tawh turah ngai i la, a kawngte min hrilh theih mial tâkin i han pawh rawih mai teh ang u" a han ti a, chu veleh Dokâpa chuan nuih vur vur pahin "Hmeichhe nui ri i hriat vâng mai mai anih kha" a lo ti vata, an nui ham ham hlawm a. Ti chuan an thawm hriatna lam chu an pan ta a, an han hnaih chhoh dawnah an meichher chu timitin thawm dîm takin an kal ta a, bûk an va hmuh chian theih meuh chuan bûk tualah tlangval pakhat hi lo ṭhuin a ṭawng lâng lânga bûk chhungah chuan hmeichhe thâwm a rawn awm bawk. Va hnaihchilh an tum lai tak chuan bûk chhung aṭang chuan nula hmelṭha tak a lo chhuak ta maia, buk kawtah chuan tei kualin Lianpuiate ho mipa hlang ramhnuaia zan nga ngawt thang tawh chuan hmuhnawm ti takin an thlîr a, an inbiak dân velah chuan unau an ni tih a hriat theih mai a, chu nula pawh chu a pên dîm lem lo hle a, bûk mei engin a chhun a chawn var no suahte chu hmuhnawm ti takin Lianpuiate chuan an lo thlîr reng a, Buangliana chuan "I va hnaih vat teh ang" a lo tih lai mêk chuan bûk chhunga nula chuan "Ka u, U Chhungi hian Zâmkunga kha a ngai bîk riauin ka hria" a lo ti ri an hre ta phut mai a, chu veleh thawm chu a aia uluk leh zualin an ngaithla a, bûk kawta nula chuan "A ni te zawngin hmeichhe hmangaih êm êm a neih thu min hrilh vek, chutiang khawpa inṭhianṭha chu asin kan nih" a lo ti ve hlak a, tlangval leh b<k chhunga nula chu an lo nui dun har har a. Lianpuia chuan "Kan mi tlaktlai lo pa chuan nula dang a lo beisei leh em ni le?" a han ti sap a, Buangliana chuan "Ka ring lo, saw nula thusawi saw a dik ngei ang. Zama kha mi danga pakai zung zung mi a ni lo" a lo ti vat a, Dokâpa chuan "Kan la hria ang chu" tiin bûk lam chu an hnaih phei ta a. An va hnaih viau ta maw tihah bûk pawna tlangval chu silaia tinin Dokâpa chuan "Che suh, i chet rual rualin i thi ang" a ti a, rei lo teah bûk chhung aṭang chuan nula pakhat a lo chhuak ve leha Lianpuiate chuan vau bet nghalin "Zamkunga that tûra lo kal kan ni a, khawnge a awm?" tiin Chhungi chu a han en a, Chhungi hlau lutuk chu a aw pawh a chhuak ṭha thei lo a, "Ka hre lo" a ti thei ṭawk a ni. Chu veleh Vawmmana chuan "I hre lo a maw? Hmangaih a neih thu a hrilh che kha i hre leh bawk si" tih pahin a samah a kêk dâk awrh a, chu veleh Tawnliana chuan "Ka farnu kha thlah rawh" tiin rawn chhan a tum a, mahse, silai puak ṭhuaiin a malpui ruh a den tliah rawp rual chuan râk nghal tuarin a tlu nghal thlawrh a, thlanglam mei êng in a chhun phâk china, a naute pahnih Vawrthanga leh Banglova te mangan hmel taka an lo ding chu zu hmuin kal bo tûrin a han mitmei a, an hrethiam si lo, chutah "Ka unaute rawn lêt rual rualin in thi vek ang. Pasalṭha Lianmawiate'n ka phuba hi an rawn la ang" a han ti a, chu veleh an thlang lawka lo biru Vawrthanga chuan a nau Banglova hnenah chuan "Banglo kan tlai hret a ni. Ka u thusawi kha kan hriatthiam a ṭul Zehtet khaw lamah kan lêt leh mai a ngai a ni. Anih loh chuan kan thi vek ang. Zankhuain kal i la, hmanhmah taka kan kal chuan khawvar rualin kan thleng hman ang" a ti a, Banglova chuan "Silai tal kha kan lo keng lo a ni." tih pahin a mittui chu a nuai sawk sawk a "Ka that vek ang" tiin hmanhmawh takin Zehtet khaw lam chu an pan leh ta a.

Lianpuia chuan "I unaute chu khawnge an awm?" tih pahin Tawnluia chu a han chhir zawt a, mahse, lungtum biak ang hlauh a ni tlat tawh. Dokâpa chuan "A farnu te hian an sawi êm êm ang."tih pahin Tawnluia na tuar let reng chalah chuan a kap ta siah mai. Chhungi leh Siamteite chuan an u ruang chu rawn pan an tuma mahse an lo dang tlat bawk si. Lianpuia chuan Tawnliana ruang chu pu lawpin thlang lam kawr kamah chuan a zu dah a, rawn chho lehin "Le, nula, Zamkunga chu khawnge a awm?" tiin Chhungi chu a han en rân a, Chhungi chuan hlau chung chungin "Zehtet khuaah" a rawn ti chhuak ṭawk a, Lianpuia chuan nuih deuh suk pahin "A nula i ni em?" a han ti a, Chhungi chuan "Aih, ka pu, a ṭhian ka ni" a lo ti khur hlawk hlawk a, Lianpuia chuan "Chuti ka nula i nih chu" tih pahin a han pawt sawk a, Chhungi hlau lutuk chu a khur hlawk hlawk a. Dokâpa chuan Siamtei pan pah chuan "Vawma, Buanga min lo nghak hmasa a niang chu" tiin Siamteu chu a pawt nghal dâwr dâwr a. Chhungi leh Siamteite unau, Siallam khaw nula hmelṭha leh felte chuan an pasal tûrte tâna an lo vawn ṭhat tlat an thianghlimna chu pasalṭha nunrawng tak pahnih lakah an chân dawn ta si. Sentei chuan luhlul chhuahin ṭang lui ve nasa hle mah se, Dokâpa tha chu a hneh si lo, a tâwp a tâwpah chuan a tlawm ta nge nge a, Dokâpa mipâtna a taksaa a rawn luh rual chuan a taksa chu a thlêr vek ni mai hian a hria a, a nati lutuk chu a mittui a rawn sûr nghal zung zunga, Dokâpa lah chuan diriam pahin "Kan ṭhiante pawh an la awm kha aw" tih pahin a chungah chuan a su tlauh tlauh a, Chhungi erawh a beidawng lutuk chu ṭan buai pawh tum loin mittui tla zawih zawih chungin Lianpuia khawih ang ang chuan a awm a, Lianpuia'n a thianghlimna a khawih chhiat rual erawh chuan na a tiin a râk deuh ṭhawt nghe nghe. Lianpuia leh Dokâpate an duh tâwka an chêt hnu chuan Chhungi chu Siamtei chu Vawmmana chuan a va pan ve leh chat a, Buangliana kal ve duh hauh lo chu Lianpuia leh Dokâpate chuan nuihsawhin nep an ti kher mai. Buangliana erawh chuan "Nangni in che tawh a, a tawk e, kei zawng ka nupui tan chauh ka rinawm dawn a ni" a lo ti maia Dokâpate chuan nuihsawh pahin "Nupui nei vek alawm kan nih, hmeichhia leh pal chhiate chu thlâk mai tur" an lo ti sam êt a. Vawmmana duh tawka Siamtei chunga a va chêt ve hnu chuan bûkah chuan lutin Chhungi te unau chu nghet takin an phuar hlawm a, Siamtei zawk chu an dawp rawn leh ta a, a tawp a tawpah Siamtei chuan Zehtet khaw kalna lamte leh, a hlat zawngte a hriat ang ang a hrilh hnu chuan zing khawvar ruala an chhuah pawhin an rawn umpha dawn lo a ni tih hriain thlamuang takin an mu ta a. Mahse, fimkhurna nei lo a awm erawh an tum lo hle a, Buangliana chuan zanlai thleng a vên hnuah Vawmmana nen chuan an inchhawk ve leha, khawfing chah hnu lawkah thoin a tâwpna'n ti niawm hrimin Lianpuia leh Dokâpate bakah Vawmmana chuan Chhungite unau chungah chuan an châkna te an hrithla leh phawt a, ti chuan phuar hlawm chunga dahin an kal san ta a. Chhungite unau chu an ṭap tlawk tlawk a, mahni lusei puite laka khatiang khawpa mi nunrawng an han awm mai kha mak an tiin an rilru a na hle a, han inhnên thei tûr chuang pawh an awm lo a ni. An puan bih tla nuaite chu bih ṭhat duh hle mah se, an phuarna hruai a ngheh êm a vâng chuan an chhar thei si lo.

Lianpuiate erawh Zehtet khaw lam panin an kal a, kawng ṭum pangai zawh loin ramhnuaiah an kal thung a, Chhungite ngaihven turin Zehtet pasalṭha te an lo thawhchhuah ngei an rin avangin an awm loh hlana Zehtet Lal in lo han thunun chu an tum dân a ni. Lianmawiate leh Zehtet tlangval rualte chu thinrim eng phiarin Chhungite awmna lam panin an rawn kal ve mek a, Chhungite chu an dam ang nge an thi ang tih chu Lianmawiate ṭhianho rilrua lian ber a ni. Kawng chanve vêl an kal hnu chuan Lianmawia chuan ro dang relin anmahni ho rualin Vawrthangate unau chu an kal hmasa anga, tlangval dang zawngin an hnungah an rawn zui ang. Hmelmate'n Chhungite an lo la kawl reng anih vaih chuan an thawm an lo hre hmasa ang tih a hlauh vâng a ni. Ti chuan hmanhmawh taka kalin tlangval chak ṭha tak vek an ni bawk nen lo sul haw hun lai vel chuan buk awmna thlang lawk chu an thleng ta a.Zamkunga chuan "Hma ka hruai anga min lo zui dawn nia, keimah vânga tuar an ni a, thiha ṭul chuan ka thi hmasa ber ang" a lo ti vata, mahse, Lianmawia chuan "Ni lo e, an phuba la tura i dam ngei ngei a ngai zawk a ni. Hrata nen hma kan hruai anga, Vawrte unau kha a hnung in lo dawl pui dawn nia" a rawn ti a ti chuan Lianmawia leh Hratzualate chuan hma hruaiin Zâmkungate chuan an zui ve bawk a, buk awmna an han thlen chhoh dawna an thil hmuh chu hmuh hrehawm an ti kher mai. Vawrthangate unau tan phei chuan hmuh chi a ni lo tih hriain Lianmawia chuan Zâmkunga chu hui zauhin bûk kawta an thil hmuh chu a kawhhmuha zawi sapin an vaia hriat phâk tawk lekin "Min lo veng rawh u, silai ri inhriatna zawnah in silai kha kap puak ve zel u la. Hrata nen bûk chhung saw kan va en a nge"tiin an kal ta a. Chhungteite unauin Lianmawiate hmel an lo hmuh chuan lawm viau mah se an zak kher mai. Lianmawiate chuan ṭawng lo tûra zai zir hmanga hrilhin an phuarnate chu phelh sawk sawkin an puan chu an pe a, bûk chhungah lutin an va inbih ṭha sawk sawk a, an lo chhuah leh meuh chuan Lianmawia leh Hratzualate rawn kuah thlawp pahin an rawn ṭap ta hawm hawm a, Lianmawiate chuan an chunga thil thleng chu zawh nawn an ngai lo tih an hre chiang hle. Zâmkungate pawh ngui nghiain an rawn thleng chho ve bawk a. An lungchhe zualpui a reh fel hnu chuan an u ruang an kalpuina lamte sawiin Zâmkunga leh Neuvate chu an zu kal vata Tawnliana ruang chu an rawn zawn chho ta a, rei lo teah tlangvâl dangte rawn thlengin ro an rêl ta a. Lianmawia leh Zâmkunga hoin hmelma an umzui anga a bak zawngin Hratzuala hoin Chhungite unau leh Tawnliana ruang an haw pui dawn a ni. Hlang an han siam sawk sawk a, an zawh fel hnu chuan khaw lam panin an kal ta a. Lianmawia leh Zâmkunga kiangah chuan an ṭhian dang pathumte bakah tlangval sawmhnih rual an awm a, silai fung riat lai an kawl bawk, hmelmate hnu chu an han chhui nghal zung zung a, rei lo teah an hmu fuh ta, mahse, an khaw lam panin a ni tlat. Chu veleh rang takin Hratzualate chu an um leh nghala, chanchin inhrilh sawk sawkin ruang zawn tute kiangah chuan tlangval sawm leh Chhungite unau za hnutchhiahin a bâk zawng chu khuaah tlangval tlemte bâk an awm lo tih hre rân chungin hmanhmawh takin an kal ta a. Kawng chanve pawh an kal hma chuan khua a thim dêr tawh a, mahse an kawng hriat bel a ni bawka bahlah hauh loin an kal zêl a, chauh pawh an sawi thei lo a ni. Khawfing chah dawn hnaihah chuan kawtchhuah an thleng ta a, thawm dim taka khaw chhung lam pana kal leh nghalin khaw mawng lama inte chu a lo kâng nual hman tih an hmuh chuan an thinrim kher mai. An chhuah dawna ralveng indah tûra an Lal an chah kha an tihsual loh zia an hre ta a. Khuaah chuan lût thuk zêlin Lal tuala tlangval pali an lo phuar hlâwmte chu an va hmu ta a, han sah nghal sawk sawk an châk hle maia, mahse, an Lalin a la nun chhan a awm ngei ringin an kian san ta zawk a, a tlawmngai zualte chu Lianmawiate zuiin ruang zawntute chhawk tûrin an kal leh nghal a. Khaw mipuite an la thawh lem loh avângin tumah pawh an ti harh lem lo a ni. Lianmawia chuan Siallam khaw lama zualko a ngai tih hriain tlangval ho kiangah chuan a han sawi a, tlangval panga rawn inpein chauh pawh sawi loin Siallam khua chu an pan leh ta nghal bawk a.

Tawnliana ruangin khua a rawn luh chuan Pu Challianate chhungkua chuan an ṭah hawm hawm a, tlangvalte chuan a thlan thuk taka laih sakin an phûm ta a, tlai lamah tlangaupa a rawn au lauh lauh a, mipui zawng zawngte Lal tuala an kal khawm hnu chuan Lal in aṭangin Lal Kapthanga chu a rawn chhuak ta a, a hnungah a upate leh Lianmawia, Hratzuala leh Zâmkunga te bakah Tawnliana unaute chuan an rawn zui bawk a, mipuite chuan Lianmawia mi lu lak chem hlai hlep hlawp an hmuh chuan thil thlen dân tur an hre chiang hle. Lalpa chu rawn ṭawngin "Hei, Pu Challiana unaupa fate rawn zinin heng Bunghmun pasalṭha, kan pasalṭha Zâmkunga thah tumtute kut an tuar palh hlauh maia, a pawi kan tiin kan tuar hle maia, phuba pawh kan la ngei ngei dawn a ni." a han tih chuan mipui ho chuan kut an lo beng dur dur a, Lal Kapthanga chu rawn ṭawng lehin "Heng kan mimante zinga pathumte hi kan farnute laka tenawm taka che te an nih avangin an nuṭate hian an farnute phuba an lâk ka phal sak anga, an zinga pakhat erawh kan zuah thung ang." a tih hnu chuan Lianmawia chuan Vawrthanga leh Banglova hnenah chuan chem pein an farnute phuba la tur chuan Pasalṭha Lianpuiate lam chu an pan thla ta a, mi nunrawngte tâwpna ni chu an thlen tir a, an u leh an farnute phuba chu an la ta a ni. Buangliana erawh Ripah an la khung thung.

Zan lamah chuan Lal inah ro rêlin phuba lak dan tur an han sawi ho nak nak a, an duh rûm tlâng bawka, Bunghmun khua chu hal vek tûr a ni a, mipuite pawh salah man tur tih a ni ta tawp mai. Ni hnih chhung inbuatsaihna'n hun an hmang dawn bawk a, a tuk zingah chuan tlangvalte chu ko khawmin rammutnaa kal tur an han thlang leh a, thlan chhuah bîk zinga telte chuan phur takin rammu turin an inbuatsaih ta sauh sauh a. An inbuatsaihna ni hnihna chawhnu lamah chuan Siallam lam aṭangin an Pasalṭha Lianzama hoin tlangval sawm sarih rual zet an rawn thleng ta, Zehtet lama an khaw nula khawngaih thlâk takte an han hmuh leh phei chuan an thinrim hle a, Zehtet hoin an phuba lâk sak an tumna chu lawmthu te hrilhin a tuk zing khawvar rualin an kal ta nghal a. Kawng lakah chuan khaw hnih tlangvâlte chu inpawh taka kalin Siallam pasalṭha Lianzama chu khawthlang lama lo zin chhuak fo anih avangin kawng a hre hle a, zan li lekah Siallam khua chu an thleng dawn ta mai. Ro an han rêl nak nak a, khua chu hmun li aṭanga beiin pasalṭha pakhat ṭheuhin ho an nei dawn a ni, chawhnu her chauh anih avangin khua an nghak thim anga, lo lama kalte haw kim hunah an bei dawn a ni. Siallam tlangvalte thinrimna chu Lianmawiate chuan hmuh hmaih loin a rûkin Zehtet tlangvalte hnenah chuan Siallam ho thu ngaichâng tûr leh, khua an beih huna hmeichhe laka an che mawi lo anih pawha che mawi lo ve hauh lo tûrin an hrilh ru vek hlawm a. An ro rel an zawh fel hnu chuan an ṭan hmun lam ṭheuh an pan ta a.

Tlai ni tla tur thlira Siallam Lal leh upate titikhawchang sawia an nuih huau huau lai chuan an hma lawka thil lo thleng tur engmah an hre si lo. Feh haw te chu an lo inzui duah duah a, khua a rawn thim fel ta maw tihah chuan khua chu hmun tin aṭangin an rawn bei emaw tih mai tur khawpin khawi hmun aṭang pawhin silai a rawn puak a ni ber. Siallam tlangvâlte thinrim lutuk chuan an hma zawn chu an bawh buan buan a ni ber. Khua chu rei lo têah a kâng ta hluah a, nulate leh nu valai deuhte chu Siallam tlangvalte chuan nawmchenna'n hmangin Siallam mipuite chu an ṭap tlawk tlawk a ni ber. Lo bei let ve mah se an pasalṭhate an awm loh bâkah an hmelmate'n an rawn tam hneh em avang chuan an tlawm ta a. Mipuite chu hnungkhirh nghal mawlh mawlhin naupang ṭhenkhat ṭap rite chu engah mah an ngai hlawm lo a ni. Zâmkunga chuan Siallam Lalpa Doruma chu phuar pahin "Lalpa, he khaw tana ka beihna zawng zawng hmuh kân tu ni mah la ka la haw lo che. Mahse, U Lianpuiate ho ka ṭhiante laka an chet dan vâng khan hetianga tih hi invaiin inphu a ni. I fanu hi ka nei ngei bawk ang" a tih lai mek chuan Siallam pasalṭha Lianzama chuan Chhingpuii samah kêkin Lal in aṭangin a rawn hnuk chhuak ta mai. Zamkunga insum hman lo chuan a silai cheng chu kau rap pahin "Ka nupui tûr anih kha, U Lianzam, thlah rawh anih loh chuan ka kâp ang che" a rawn ti a, chu veleh Siallam tlangvalte chu an rawn hnai nghal huka, Zehtet tlangvalte pawh rawn hnai ve nghalin, a hma lawka ral bei hote chu Chhingpuii vangin inbeih tumin an inep leh ta rân mai. Lianmawia chuan "Lianzam, Zâmkunga nula anih kha. He khaw Lalpa hian hmeithai fa mâkpa atana a duh loh avangin Zâmkunga hi a rawn hnawt chhuak a, keini'n kan lo pawm a, Zamkunga rawn umzuitute hian a sin kan ṭhian Tawnliana kha that" a han ti a, Lianzama chuan "Ka man a ni a, ka sal a ni dawn. Ka sal anih loh chuan tuma'n an nei bîk dawn lo" tih pahin Chhingpuii nghawngah chuan a chem chu a chuktuah nghal rûn a, Zâmkunga lahin silaiin a tin reng bawk. Hratzuala chuan " Lianzam thlah mai rawh. Anih loh leh Lal fanu kha that la, i tlangvalte hi an thi vek ang. Kan tam zawk tuh hi theihnghilh suh, kan silai vawi khat ṭheuh kan hmeh puah rualin a chanve vel chu in tlu nghal ang. A nung chungin kan hruai haw che anga, khuaa kan tlangvâl dahte nen khan inkhua kan rûn anga, i hmuh lai ngeiin i chhungte kan tlangvalte'n nawmchenna'n an hmang ve anga, kan that chauh ang che. "a han ti leh a, Lianzama chuan a ngaingam ta ngang lo ni ngei tûr a ni, Chhingpuii chu a thlah ta a. Zamkunga chuan pan phei vatin Lianzama hnena" Ka lawm e" tih sap pahin Chhingpuii chu a kuah nghal vawng vawng a, Zâmkunga chuan "Chhingi hei, ka ṭhiante pasalṭha Lianmawia leh Hratzualate annih hi. An ni hian min hruai anga him takin ka kiangah i awm tawh ang" a ti a, Chhingpuii chuan "Zama i fa ka pai a sin" tiin ṭap pur chungin a hrilh a, Zamkunga lawm lutuk chuan awih har a ti hle. Mahse, a hmangaih ber thusawi chu dawt anih a ring hauh lo. Lianmawia leh Hratzualate'n an lawm pui thu an rawn sawi hnu chuan Lianzama chu lo kal vein "Dawt insawi ta emaw ka tia lawm maw le, Zamkung, min ngaidam a ni ang chu. Hlim takin in awm dun thei tawh dâwn a, in fa tur pawh him taka a lo pian theihna'n duhsakna ka hlan a che u" a lo ti ve a, Zamkunga chuan " ka lawm lutuk e, U Lianzam" tiin a lo chhang ve a. Khaw in kang ve lo tlemteah chuan Zehtet leh Siallam tlangvalte chu an inhnawh a, Pasalṭha ho erawh Lal in lamah an riak khawm thung. Zamkunga pawh a hmangaih ber kiangah hahdam takin a muhil siai siai a ni. A tuk zingah chuan sala an man mipuite chu khaw lama hruai an tum ta a, mahse, Lianmawia chuan Lianzama hnenah chuan "Lal meuh han man chu kan unau khaw dang mite dem kan hlawh lutuk dah ange" tiin man loh mai a rawt a, Lianzama chuan "Ni e, hei chen hi kan kal tawh a, phuba chu kan la tawh viau e" a lo ti ve bawk a, Lalpa leh Lalnu an phuarna chu phelh sakin Lianmawia chuan "Lalpa, pasalṭha Lianmawia ka ni a, phuba rawn lâk emaw i fanu rawn hruai let tum buai tawh lo tûrin ka ngen a che. I fanu hian hlim ve a phu a ni" a han ti sap a, Lalpa Doruma chu rei tawk fang a inngaihtuah hnu chuan a fanu lam chu hawiin "Chemte, min ngaidam thei angem? Hlim taka awm turin ka duh sak a che. Min ngaidam thei lo anih pawhin min lo hre ve reng aniang chu tiraw?" tiin a mittui chu a luang nghal zawih zawih a, Lak fanu Chhingpuii chuan a pa chu va kuah thlawp pahin "Ka pa, ngaihdam ngaiin i awm lo e" tiin an ṭap dun hawm hawm a. An inthlah fel hnu chuan Lalpa Doruma chuan Zâmkunga hnenah chuan ngaihdamte dilin a khuaa let leh turin a han sawm a, mahse, Zâmkunga chuan "Lalpa, kei zawng Zehtet pasalṭha ka ni tawh e, U Buangliana a la dam a, kan Lalin a phal chuan khaw ropui tak in din dun thei em em ang. "tiin a hnial a, an inpeih fel tawh bawk nen khua chu an chhuah san ta a.

Siallam khaw panna pêng an thlen chuan an sal mante chu insemin an inṭhen hrang ta a. An khaw kawtchhuah an thlen chuan ni a la tla lo a, an mi leh sa thi sawmpahnih lai an awm avang leh hmeichhia nen an nih avangin ngawi rengin khuaah chuan an lut ta a.