PASALṬHA LIANMAWIA BUNG - 54 (A TAWPNA)

"U Vân, hei an lo thlen chu a hun viau tawh a sin, zan tam he laiah hian riakin kan chhung leh khatte hrehawm kan tuar tîr reng dawn tihna em ni?" ti a, Lal fapa Pasalṭha Zamthanga'n a biak lai chuan Pasalṭha Vânthanga chuan "Khuaah khian ralvêng an indah ṭhat zia kan hmu a, an tlangvâlte khian kan chhung leh khatte inah awm hmun an khuar tlat bawk si, han bei ta thut ni i la kan chhung leh khatte kan chân nasa dawn lutuk. Fimkhur taka thil kan ti anih loh chuan chaurau ek kan thai ngei ang, khuaah ka han lût anga chanchin enge maw tal hriat ka han tum ange, nangin tlangval ho lo awm pui ang che. Khawvâr thlenga ka lo la lêt lo anih chuan hmun hla zawkah insawnin Liana te in lo nghak mai dawn nia. " tiin a rawn chhânga Zamthanga chuan" Ka lo zui ve ang che, nangmah chauhin i kal bîk lo ang"a lo ti vat a, Vânthanga chuan "Ni lo e, eng pawh tawk thei kan nih avangin keimahin ka kal ang. Nang chu he lamah i lo awm a ngai a ni. I chungah enge maw a thleng palh anih vaih chuan i pa hmel ka hmu ngam tawh lo ang" a tih tlat avangin Zamthanga chu a lung a awi lo hle. Zan riah an han bar zawh hnu chuan Vânthanga chu khaw lam panin a kal ta a. A kal pah chuan a inngaihtuah nasa hle a, an khaw dai a thlen phei chuan an rawlthar laia an ṭhian thuma nunchan an zir ṭhinna hmun leh sava an veh ṭhinna hmunte a han paltlang a, a lung a lêngin hmelma an ni ta mai chu pawi a ti êm êm a, kha nula a khawngaih luat avânga a ṭhiante thu la lo a a che chhuak ta mai chu pawi a tiin he thil thleng hi amah vâng a ni tih a pawm thlap a, chu vânga thil tum nei ru rân chunga khaw lam pana amah chauh a kal a ni.

Ralvên bûkah chuan tlangvâl an la awm lo tih hriat takin a reh ṭhiap a, Vânthanga chuan rang taka pal tlang vatin hmanhmawh takin a tlan sawk sawk a, in lo awm hmasa ber hnuaia a bihrûk hnu lawkah chuan ralvêng tûrte pawh râl vên bûk lam panin an rawn kal ve nghal a, Vânthanga chu mi in hnuaiah lût kualin thâwm engemaw tal hriat a tum a, mahse, in tinah chuan hmar tlangval ho chu an lo insemdarh hlawm a an tîtî rî bâk hriat tûr a awm hauh lo a ni. Khaw chhung aṭanga chhuah an khap bur avângin khaw mipuite chu rei lo têah an ṭâm thuai ngei bawk ang.

Lêng lên ar a khuang âl âl ta maw tihah pawh chuan khaw chhungah chuan hmar tlangval ralthuam keng chunga vei vâk bâk an awm hauh lo a, Vânthanga pawh chuan muangchangin Lal in lam chu a hnaih chho ve hret hret a, Lal in chhunga a ṭhiante aw ngei a hriat rual chuan an tel lo a, a khawhar zia leh an aw a hriat rual ringawt pawha amaha danglam awm nghal chu a theihnghilh lo chiang hle a, an pathuma an ṭan rual thlap ṭhin laia thlamuanna a neih ṭhin ang ngei kha a nei leh tlat a ni, mahse, hmelma an ni tawh tih chu a inhrilh nawn leh mawlh mawlh a.

Lalin kailawnah chuan muang chângin a din pawh ding ngam loin a bawkvâk chho a, Zawlbûk tuala hmar tlangvâl awm ho chu an ri hulh rulh reng a, Lal in lam an rawn ngaihsak lutuk lo chu a vânneihna a ni. Lal in kawngkhar chu dîm tê a hawngin a va lût a, sumhmun a pel dawn chiah tihah chuan a ṭhian hlui Lîngrema ngei chuan "Tunge maw i nih a, i thawm hre lo tûra mi rin le? Ka kâp dawn che nge i rawn inlan dawn?" a rawn ti ram hmak a, Vânthanga chuan Sumhmun chu kal pelin a hmel chu a va hmuh tîr ta a, Lîngrema chuan nuih suk pahin "Hei, Hnêma tunge lo thleng hi?" a han ti a, Lalpa Ginliana thla thum zu lo khiat mêk tu Hnêmluaia chuan "Ralvengte paltlanga silai ri hriat tur awm hauh lo chunga Lal in lo thleng thei tur awm chhun chu a lo thleng ta dêr e. Enge i duh tâk a?" tiin a lo nuih san a, a bula hmar pasalṭha palian tak lo ṭhu luah bulah chuan "Funga hei hi anih hi Pasalṭha ṭhiante phatsantu Vânthanga chu" tiin Vânthanga chu a han kâwk a. Vânthanga chuan "Ṭhiante u, he khaw mipuite in tawrh tîrna hi a nasa mah mah tawh a ni. Tunah hian ka lu hi la u la khua hi chhuah san mai rawh u" a han ti a, chu veleh Lîngrema chuan "Thû ka pê e te mi tia law? I chêt dân tenawm tak kha i theihnghilh ta em ni? Mahni ṭhiante thihna duh tu, nge ni a pasalṭha kan nihna hi min thîk zawk? Kan ṭhian dangte khân hre ve phei se chu i lu la tûrin an lo kal hial ang maw le, mahse kan buaina a ni a, Lusei ho va pûrtu zawk kan nih chuan i lakah kan tlawm dawn ta si a chu vânga hrilh hre lo mai a sin kan nih"a rawn ti phiar phiar a, Vânthanga chuan Lîngrema thlir dân aṭang chuan dik a ti hle a, chutih rualin Lianmawiate ko tûra mi a tirh tawh thu erawh a sawi ri duh hauh lo thung. Zawi muanga a mi lu lâk chem chu phawrhin "Kan kârah chem sen meuh a lên ka ring ngai lo a sin, Lal in meuh zawng zah a phu e Lal tualah i ching fel ang u." tiin a han chhuah san thak a, Hnêmluaia lu kai tawh chuan a chem chu phawrhin "Ve mai mai chuan le, keimah ngei hian a lu kan la ange" tiin a zui chhuak a, a hnungah chuan Lîngrema chuan zui ve nghalin Lal tual an zu thlen chuan Hmar tlângval ho chuan enge thleng tih hriat chian tumin meichher nen an lo kal hnai a, Vânthanga leh Hnêmluaia lo in hmachhawn reng an hmuh chuan mak ti takin an en ha hlawm a. Hnêmluaia chuan "Ṭhiante phatsana an thihna tur thangkam duhtu, Pasalṭha ti a chhiar tlak pawh i ni lo e" tiin a bawh nghal buan buan a, Vânthanga chuan chhaih chauh phawta chu mi hunah a inpêk hunah an thil hriat dik loh chu hrilh fiah leh phawt a, chuta an harh chhuak lo cheu anih chuan thah chauh a tum a, chu vâng chuan a hun hmain a ti palh mai ang tih hlauin a lo invêng hrâm hrâm a, mahse, Pasalṭha khual kai Hnêmluaia chu a duai lo hle maia, Vânthanga pawh a invêng seng meuh lo. Nunchan zir ho ṭhin, unau ang maia inhmangaih em em ṭhinte kara indona a thleng ta mai hi pawi a ti hle. Hnêmluaia chem rawn thlawkin a awm vun pui chat ṭhawt khawpa a rawn tai rual chuan a bawp ding lam chu thlawh ve nghalin Hnêmluaia chu a va tlawh thal tawp a, pan hnai nghalin a samah chuan a kêk a, Hnêmluaia pawh thawh a, a tum dan anga chêt a tum lai tak chuan a kaihza tha chu rawn chat hmawkin a ṭhingṭhi nghal rawp a, hnung lama Lîngrema lo ding reng a hmuh chuan nuih sakin a na ti hmel chu tih lan loh tumin a ṭhen chak chak a. Hnêmluaia'n hnuai lam aṭanga chem fawnga a hnar ruh a rawn chhut rîk rawp rual chuan thal nghal tawpin lei chârah chuan a han mu vang vang a, thei leh thei lo a inbeng kângin a han ding sai hlak hlak a, a ṭhiante lam pana pên a han tum lai tak chuan silai rawn puak ṭhuaiin a dar vei lam chu a rawn verh nghal zawk a, Pasalṭha Fungṭiala chuan rawn auin "Zo fel vat teh u" a rawn ti a, Vânthanga chuan zawi muanga a chem chu thlauhin a ṭhingṭhi rawp a, a hmaa ding reng a ṭhiante chu enin "Thil hriat dik loh in nei a ni. Mahse min ngaidam rawh u. Pialrâlah ka lo nghâk reng ang che u aw" tiin a tlu ta riai riai a harsa ti takin a rawn thaw hrawk hrawk a, Hnêmluaia chuan "A hnuk hi chhat u la, phum ang che u, khawiah mah in paih tûr a ni lo" tiin an tlangvâlte chu hrilhin Lal in lamah an chho ta a.

Chawhnu her zet a ni ta, Pasalṭha Vanthanga a lo let theih tâk loh avangin Lal fapa Zamthanga leh tlangval dangte chu an ngui em em vek a, mahse chu tih lai tak chuan an mahni lam pana Pasalṭha Singzamate mai bakah Lusei tlangvâlte an hmuh chuan phûrna nasa tak an nei nghal a, Lal fapa Zamthanga chuan "ka u, in lo thleng thei maw? In va rei ve" a lo ti vat a Singzama chuan "Kar a hla tham deuh alawm maw le, khawnge u Vânthanga?" a han tih chuan Zamthanga hmel chu a hnual nghal rawih a, chutia chhanna a dawn mai tâk lohah chuan a aia ringin "Khawnge U Vânthanga?" a han ti leh a, tlangvâl zinga pakhat chuan "Nizan zanriah kan kil zawh rual khan khaw lamah a kal a, thil enge maw hriat belh tumin a kal a ni. Khawvar hmaa lo let a tum thu a sawi na a, a lo lêt ta lo a nih hi" a han tih chuan Singzama chuan "Mi tenawm ho chuan an lo that anih vaih chuan, ka pawtsawm vek ang" tiin a inhrosa kûk kûk a. Lianmawia chuan "Le, rorelna fel tak kan neih a ngai. Kan chet vat a ngai tawh a ni. Tunge, khua aṭanga lo tlan chhuak rawlthar huaisen kha lo kal teh se" a han ti a, tlangval ho zing aṭang chuan rawlthar ria zin zên mitmeng fiah kâk mai hi lo chhuakin "Ka pu, keimah hi ka ni e" a rawn ti a, Lianmawia chuan "Tlangval nang hian i khua i chhanhim dawn a ni. Khuaa tlangval awm ho chu in tinah an riak ṭhin niin kan hria a, zan lamah hian zanriah an kil hnu lamah an awm zui nghal nge an chhuak darh leh ṭhin?" a han ti a, Zaruma chuan "Zanriah kil zawh rualin an chhuak a, Leng len ar khuan hnu lawkah an lo lêt leh ṭhin. A châng chuan Zawlbûk a kan khaw tlangvâl ṭhenkhat chu hruai chhuakin Zawlbûk tualh an buan ṭhin a, an rawn let leh har deuh ṭhin, mahse, ral veng erawh zanriah eikham rualin an ralvenna hmunah an kal lehnghal ṭhin" a rawn ti a, Lianmawia chuan "Hei behliang mûn hun zet a ni tawh. Tunah kan kal nghal ang. Ralvenga awmte zanriah kil tûra khua an luh hnu lawkah kan lut vek hman ang. Mahse, khaw en laiin khaw chhungah kan lut lo anga, hmun dangah kan biru dawn a ni. Khaw chhung lama in tinah hmelma ho an let hmain kan insem darh hman a ṭul, khawfing chah rualin an vaiin kan that vek anga,khawvar rualin Lal in kan hual ang" a ti a, ti chuan khaw lam panin an kal ta nghal a.

Pasalṭha Hnêmluaia chuan Lalnu Chawngpuii kuah hlûn chung chuan "Zanin chauh hi ka nupui i ni dawn ta si a, ka va han ngai dawn tak che em, kan Lalnu hlui ni lo la chuan salah ka man ngei ang che maw le" tiin a han nuih ver ver a, Lalnu Chawngpuii chu a lo îp chawih chawih a. A pasal chaw ei mumal lo a rei tak an phuar beh tawh chu a chau tawh hle maia a dam chhuak lo mai ang tih pawh a hlau tawh hle. Hnêmluaia te zanriah tûr a buatsaih zawh hnu chuan a pasal chu a va barh ve hram hram a, a pasal lakah chuan a inthiam lo nasain a mitah pawh a en ngam lo a ni. Zanriah an kîl zawh hnu lawkah chuan pasalṭha Fungṭiala chuan dân ngaitê bawkin nula hmel dang zan lama a riah pui tûr a rawn nawr lût leh nawk nawk bawk a. Chu zân chu Sengzau khaw mipuite tân chuan ṭahna a ni a, a tûk zing khawvar rualin an khua an hâl anga, an ro neih zawng zawngte an hawn sak bâkah sal atan a tam thei ang ber an man dawn tih an hre sa vek bawk si. Hmar tlangvâlte lah chuan a tâwpna'n ti niawm takin nuam an chên nasa a, Sengzau khaw nula leh nutling la mâm deuh ho chu khaw dai lamah an pawt chhuak dawr dawr hlawm a, sum hmun vela ar chhiar rimchhe tak bula lo biru reng Sengzau leh Lusei tlangvâlte thinrimna berhbu chu a kai tho chiang kher mai. Zanlai âr a khuan meuh chuan hmar tlangvâlte chu an muhil nghet hle tawh a, Sengzau tlangval thinrimte chuan chet chhuah duh tawh hle mah se, Lianmawia thu an hnial ngam si lo, khawfing chah hun tlumtea thlir taka an thlir a rawn thlen rual chuan che nghalin an bihrukna ina hmar tlangval riak muhilte chu an that ta hmiah hmiah mai le. An zawh fel meuh chuan khaw vâr a hnai uar tawha, an awmna in neitute hnenah chuan chhuak miah lo tûra hrilhin Lal in lam an pan khawm ta a. Lal in an hual fel hnu lawkah chuan khua a rawn var ta a, mahse, Lusei pasalṭhate hmel hmuh tur a awm hauh lo chu an mang a angin an chîai nghal hle, mahse, Lal inkawngkhar rawn intheh hawn lawp ruala Pasalṭha Lianmawia'n an hmelma pasalṭha Hnêmluaia a rawn hnûk chhuak dawr dawr an hmuh chuan an rilru chu a hahdam sawt a, eng tik laiin nge Lal in lam an lo beih hman tih chu an rilru a zawhna lian tak a ni. Lianmawia chuan "Khawnge Vâna chu a awm?" tiin Hnêmluaia chu kêk dâk awrhin a han hrawk a, Hnêmluaia chuan thei leh thei loin "A thi tawh" a han ti a, chu veleh Lianmawia chuan tlawh bawkkhup thlawpin "Mana, lo hruai chhuak vek rawh u" a han ti a, rei lo tê hnuah Pasalṭha Zamana leh Pasalṭha Hratzualate chuan Lingrema leh Fungṭialate chu an lo hnuk chhuak dawr dawr a, Lal inah chuan zalenna avânga ṭap ri chu a awm zui nghal zat bawk a. Tlangvâl ṭhenkhat chuan zawlbuk lama an ṭhiante lo va chhuahin an rawn kal khawm a, Hnêmluaia te chu chil rawn an tum ta mai. Mahse, Lianmawia te chu an hmaah dingin an lo dang tlata a Sengzau tlangvalte chuan "Lusei pasalṭha te u, kiang hram rawh u, an ni kha kan that duh a ni" an rawn ti a Lianmawia chuan a ṭhiante an nihna chu hre rengin an inlam let leh a la beisei fan avangin a phal tlat lo. Sengzau tlangvâlte chu an chungah an rawn thinrim dawn ta mai. Mahse, Lalfapa te rawn chhuakin an rawn dang thei ta a. Hnêmluaia chuan Zamthanga chu en vang vangin "Zama, i nu nuam ti ri zantin han hriat kha a va nuam em." tiin a han nuih sawh lehkher chu a tan a pawi ta. Hnêmluaia hmai chu a rawn ri nghal thlawp a, Zamthanga chem phek lam thla chu a lang kulh bawk a. Zamthanga chuan "a chem kha rawn pe rawh u" a han ti hrawk a, a aw chu dan chi a ni lo tih hrethiamin Lianmawiate chuan an kian san a, Singzama chu Lal in lamah chhoin rei lo te hnuah Hnêmluaia chem mai bakah Lîngrema chem chu rawn kengin Hnêmluaia chem chu a va theh tlak sak a, Lîngrema lam chu pan pheiin "Ka nu phuba ka la dawn a ni. Ka pawt sawm vek ngei ang che" tiin a chem chu pein an in hmachhawn ta rân a.

Zamthanga leh Singzamate unau chuan Hnêmluaia leh Lîngrema te chu an hnehsawh kher mai, zan lama lo che nasa an ni bawk nen, an hah chu rei lo te hnuah an thaw hlawi hlawi tawh mai a ni. Lîngrema chem rawn thlawk fua chu Singzama chuan bum zeuh pahin Lîngrema kap zawnah tak chuan a chem chu a han vai pawp a, patling na tuar awin chhunzawm nghalin Lîngrema serh rawn tla hlawm tawp chu thisenin a rawn far nghal zawih zawih a, Singzama chuan "A hman lohna tûrah ṭum hnih i hmang a, i chân a ngai ta anih kha." tiin Lîngrema chu a tlawh thlu nghal ṭhuai a, a nghawngah chuan dimna tel hauh loin a han sât zui leh a, Lîngrema hmel chu hmuh tlak a awm lo lek lek hial a ni. Lianmawia'n rawn khap lo ngat phei se chu a chan darh vek duh hial ngei ang.

Hnêmluaia chuan a chem chu paihin Lal fapa hmaah chuan a ṭhingṭhi ta a, Zamthanga chuan "Tho rawh, mi tlawm tawh ka bei ngai lo e" a han ti a, Hnêmluaia ve thung chuan a Lusei ṭhian pathumte amah lainat hmel taka lo en tlawk tlawk tute lam chu hawi pheiin "Liana, kan tih dik loh kan hria a sin. Mahse, kan tlai tawh lutuk a, in lamlet thei kan ni lo a ni. Lînga chauh chuan Vâna ngaihdamna a hlawh chhuak zo lo palh ang, ka zui ve nghal zawk ange. Vâna'n pialralah min lo nghah reng tûr thu min hrilh a kan kal ve a ngai a ni. " a han ti a Lianmawia chuan amah lo en reng tu Zamthanga lam chu hawiin bûk zauh pahin hnung lam a hawi san ta daih a, a mittui tla chu nuai sawk sawkin "An ruang saw kan phûm ngei tûr a ni." a ti thâm ṭuak a.

Chu tia tlangvâlte'n an pasalṭha ni ṭhinte ruang lak sawn an tum lai chuan Pasalṭha Fungṭiala chuan "Ka naute zawng zawng in that vek a, an phuba ka la ngei ang. Min hmachhawn ngam in awm anih chuan lo kal ta che u" tiin Lianmawia chu a rawn en bik chat a. Lianmawia pawh chuan "Ni ang hmiang, nang zawng ka hmelma dik tak leh pialrala ka sal tur i ni e" tiin pan phei a han tum a, mahse, Sengzau tlangvalte chu rawn che chhuak phut in Fungṭiala chu an rawn chil rawn ta a, an han in ṭhelh fel meuh chuan Fungṭiala ruang chu hmuh tlak pawh a awm meuh lo a ni. Khaw mipuite lawm lutuk chuan tlangvalte chu an lo chibai a, lawm luat avanga lo ṭap hawm hawm rite chu a tam hle.

Khaw chhung a ruangte chu an tam em avangin an hâl ta ngawt a, hmelmate ruang ni mah se khaw dai hnaia an paih ringawt anih chuan sapui kohna ṭha tak anih avângin an hal ta mai a ni. Pasalṭha Hnêmluaia leh Pasalṭha Lîngremate erawh an ṭhian Pasalṭha Vânthanga ruang an phumna bulah chuan zah takin an phum ve thung a. Lalpa Ginliana pawh nilenga bawlpuin a buaipui hnu chuan a rawn ṭawng peih ve ta a, bawlpu pawhin in lamah a haw san ve ta a. Lalnu Chawngpuii inthlahrung lutuk chuan a pasal chu a hêl a hêl ta mai a, Lalpa ngaih ṭha lo chuan a farnu hnenah chuan a koh tir ta a, a nupui amah pawh en ngam lo a rawn kal a hmuh chuan hrehawm a ti hle a, aw nêm takin "Chawngpui bul kan ṭan thar leh dawn alawm. Khatin awm teh suh, nang tluka hmangaih ka nei ngai dâwn hleinem. Ka lakah inthiam lohna tur a awm lo a nia" tiin a han hnêm a, Lalnu Chawngpuii chuan ṭap chungin "Zamtea bâk fa ka hrin sak theih loh hnuah che hetiang hi kan tawk leh ta si a, i tan chuan mi tenawm mai ka ni tawh a sin" a han ti a, Lalpa Ginliana chuan lo khapin "Ka nupui i ni a i ni reng bawk ang." tiin kal hnai turin a han hrilh a, a nupui a bula a rawn ṭhut hniam rual chuan a lo kuah nghal vawng vawng a.

Sengzau khuaa zan hnih an riah hnuah chuan Lianmawiate chuan an khaw lam an pan ta a, hmar lama zuk chet ve duh viau mah se, an zu rûn tûr Tuipang khaw mâkpa hi an u Châwiliana anih miau avângin an che ngam lo a ni. Lal Ginliana pawhin a ṭhianpa puzawnte khua rûn chu a hreh hle a, mahse, fapate pahnih a dang zo dawn lo tih a hriat avangin khua hal lo tur leh anmahni bei lettute chiah that turin a hrilh a, an khua an rawn awp beh laia an thil chân zawng zawng rulh lêtna'n Silai fung sawm leh Sial sawm rawn hâwn turin a hrilh bawk a, heng zawng zawng hi ngaihdam dilna thu nen Chawiliana hnena hrilh sak turin Lianmawiate chu an chhuah dawnah a chah thlap bawk a ni.

Paite rama zan khat an riah hnuah Lusei ram chin an lut leh ta a, tlâng thengthaw nuam tak chhîpah châwlin a ṭhenin vaibel an pak khu tual tual a, a ṭhenin tuithâwla tuite an lo in khawlh khawlh bawk a. Tlâng hran hran chungah chuan a mawi tâwk lekin romei a zâm chiai hlawm a, khua chu a thiang ṭhain boruak nawm lai a ni bawk nen, hla tak thlirin a ṭhen chuan an nunhlui te ngaihtuah lêtin an lung a leng hle. Pasalṭha Zamkunga chuan "Pasalṭha huaisen tak an ni ngei mai an ni unau kha" a lo ti sap a,Pasalṭha Hratzuala chuan "Ni e, an ni anga huaisen kha kan hnam hian kan mamawh ve a ni" a rawn ti bawk a. Vaibel pak khuk tual tual pahin Pasalṭha Zamana chuan "Ni e, kan ṭhiante ni mah se, kan hnam hian min ṭhen hrang tlat bawk si a ni" a lo ti ve vat a, Pasalṭha Lianmawia chuan "Ni lo e, kan ṭhiante chu pialralah hlim takin an awm tawh a ni. Lalpa Ginliana chu U Liansangate ṭhian a ni a, a fate Pasalṭha Singzama leh Pasalṭha Zamthangate pawh kan ṭhian an ni hek lo. Kan ṭhiante chu hming dai tawh ngai lo tûr Pasalṭha Vânthanga Hnêmluaia leh Lîngremate an ni. Mana, tunah chuan Lusei ho chauh kan bâng ta, Vâncheuva leh Hrânga lah khaw hran ve ve a lêng an ni bawk si. "a rawn ti ve a, an vai chuan tuibur hmuamda vel an han ngawi leh a, Lianmawia bawk chuan" Tlangval hun hmang chho mêk an ni a, nakin lawkah chuan Lusei khua zawng zawng mai bakah Ṭiau râl lam thlengin Paite pasalṭha huaisen tiin an la hre thuai ang. Chutih hunah chuan kan tha a lo ṭhum ṭan tawh anga, kan silai kan tung hnai tawh ang. Kan aiawh tûr kan hnam tâna bei tûr kan neih loh chuan thu inbah sual palh a awm hunah kan hnam tân a chhiatna nasa tak la thlen thei tu an ni tlat a ni an ni unau kha,kan ṭhiante an nih ve tawh loh avângin an ni chuan kan thu zawm aiin zah tak chunga min beih an thlang ngei tawh bawk anga, ṭawngkama sawi fel pui pawh a harsa tawh ang. Chutih hunah chuan an ni unau chu kan khing pha tawh kher lo ang, Pasalṭha ve tak Hnema leh Lingate hneh loh an ni miau a" a rawn ti leh a, Hratzuala chuan "Mahse, Hnêmluaia leh Lingate hmelah khan ral bei thei hmel a lang hauh lo" a rawn ti ve a, Lianmawia chuan "Ni mah se, tlangval nazawng tana huphurh awm an ni reng tho khati chung khan. Harh vang tak chunga inbei ni se chuan Zamthangate unau chan pawh a chhe ve thei tho. Nakin lawkah an rawn puitling chho tak tak anga, an ute an la rawn khûm ngei dawn a ni" a rawn ti ve leh a, Zamana chuan din chhuah pahin "Kal i siam ang u le" a rawn tih takah chuan chu lai tlâng thengthaw nuam tak chu an kal san ta a.

Lusei pasalṭha leh hnam dang, paite, hmar leh pawih pasalṭhate inkarah inṭhianṭhatna thleng fo mah se, an hnam chuan a ṭhen hrang tlat si. Lusei pasalṭha huaisen Lianmawiate leh a ṭhiante ngei pawhin an paite ṭhian pasalṭha pathumte an chân ta si a, an aiawhtute nen chuan inpawhna tak tak an nei ve thei tawh si lo. An ṭhian thi ta te avânga an la inhriat rengna ringawt chuan thil pawi a thlen palh hunah a vêng zo dâwn lo tih an hre lawk vek a, chu vângin engemaw a thlen palh hlauh tâkah an hnam tana bei tûr Zamthangate unau khing pha tur Zamthangate kum rual pui zîngah an neih ve ngei a ngai tih chu an pai ru kar vek a ni.

THU BELH :

PASALṬHA LIANMAWIA CHUAN MIN LO TÂWP SAN VE LEH TA. KA THAWNTHU HMASA ZAWK BUALTHLENG MAWITU TIH THAWNTHU KA ZIAH LAI AṬANGA MIN LO HLUT SAK A, MIN LO CHHIAR SAK ṬHINTUTE ZAWNG ZAWNG CHUNGAH THINLUNG TAKIN LAWMTHU KA SAWI A NI.