HNUNG TAWLH NGAI LO MI HUAISENTE - 23

Luaithanga leh a nau Dengmukate chu Rotlâng khaw mipuite thinrim kut tuarin pialrâl an pan rang hle. Rotlâng khua an thlen hnu lawka an thil tih tenawm tak anmahni kâ aṭang ngeia mipuite'n an hriat hnu lawkah chîl rawn an ni ta anih kha. Duailova erawh a him pial thung a, Zînga'n hliam na tak a siam sak avangin rei tak a kal thei lo bawk ang. Muallianpui Lal Vandawla'n a tlangvalte hlawhchham hmel a hmuh chuan a thin a urin a hmel chu a dur khup mai a, a pasalṭha tlanna tur an phûtte chu pek a tum lo hle. Luaithanga te unau phei chu tlanna tur lam reng an rawn sawi loh danah thah ngei an tum tih a hre chiang hle mai a, chu chuan a ti thinur nasa zual hle. A khawnbawl upate ko khawmin râl an rêl ta mup mup mai le, a upate pawh amah ang bawkin Rotlâng khaw ho chungah an thin a rim a, chu vangin Rotlâng khaw chimih dan tur chauh lo chuan an rilruah hmun a chang lo. An rorel an han zawh fel hnu chuan tlangval pahnih koin Lal Vandawla u, Cherhlun Lal Vanchhûnga Pasalṭha huaisen Robula leh Ṭawkliana te ko turin an intir nghal a, an phur surh surh hle. Lal Vandawla chu a tlangvalte hnenah kalin "Ruahmanna ṭha tak kan siam tawh a, a puitlin hna chu in kut a ni ta. Ka u pasalṭhate'n an ho che u anga, hnehna hlado inchham ngei ang. Ni hnih a liam hunah Duailova tlanna'n a an phut ang pe turin mi pahnih ka upa min hoin in kal anga, Duailova chu in va tlan chhuak phawt dawn a ni. A tlannate erawh ka u pasalṭha huaisen Robula leh Ṭawklianate nen in va la let leh vek dawn a ni" a han tih chuan tlangvalte chu an phur kher mai. An ni khaw awmna tlang dung vêlah chuan Robula leh Ṭawklianate hming hi an hriat lar ve berte an ni a, Leite Pasalṭha Taichhûngate, Thingsai Pasalṭha Sanglianate, Lungleng pasalṭha Lengawiate leh Rotlâng pasalṭha Ngûrzikate nen an khaikhin hial ṭhin. Tunah erawh Ngurzika a awm tawh lo a, khaw dang pasalṭhate nen buaina an nei lo bawk nen an tan huphurhawm an awm tawh lo a ni. Mahse, Duailova zuitute rilruah erawh Zîngchhuana mawlh kha a awm reng a, an pasalṭha Duailova mitkhap kar leka hneh tu anih avangin an thla a muang zân lo. Mahse, Robula leh Ṭawklianate khing pha em tura an ngaih loh avângin thawk khat chu a veng deuh. Rotlâng lama hun hmang mêk Duailova chuan an Lal in phuba a la ang tih mawlh a hlau tawh a, a chhan chu thil thlen dan dik tak, Pu Phira tenawm taka a chet dan zawng zawngte a hriat vek tawh bakah a chungah Rotlâng Lal Zabiaka a fel em em a, tihduhdahna tuar hauh loin a hliamte pawh bawlpuin a enkawl sak vek mai si. An Lal Vandawla bumtu Pu Phira nupui a huatna chu a thinlungah a so but but mai a, a tlangval kal chhuahpui nunna chantate hmel a ngaihtuah chhuah chang phei chuan haw vat a, Pu Phira nupui leh an fapa la dam awm chhun Chhunga chu thah hmiah a duh a ni.

Lal ina luh rawn diltu tlangval pahnihte chu ngun takin Lal Vanhmuaka chuan a lo en reng a, "Ekhai, eng thuah nge min rawn hmun induh tâk a?" a lo ti a, tlangcal pakhat zawk chuan "Lalpa, kan unau hian ka nu nuṭapa te khaw lamah kan zin a, kan rawn haw lamah Muallianpui khuaah kan riak a ni. Muallianpui khuate leh i pa khuate an inhmu thiam lo hle tih kan rawn hria a, tunah hian i pa chuan Muallianpui pasalṭha Duailova a kawl mêk a ni awm e. A tlanna'n silai fung hnih a phût a ni awm e, Muallianpui Lal Vandawla chu a thin a urin tunah hian a unaupa pasalṭha Robula leh Ṭawklianate ho a Rotlâng khua hal darh vek a tum mêk a ni" a lo ti a, Lal Vanhmuaka chuan a thu lo hriat thawi tawh chu a dik ngei a ni tih a chiang ta a tlangvalte hnenah chuan "In ti ṭha hle mai, in chungah kei leh ka pa aiawhin lawmthu sawi sen loh ka ba a ni. Lawmman atan enge ka pek ang che u, in duh duh mi dil thei ang?" a ti a tlangvalte chuan "E, Lalpa i Lalna hnuaia hlim taka awm reng tluka duh kan nei lo ve, kan ṭin san ang che" an tih tlat avangin a hnial zui ta lo a. An chhuah fel veleh rang takin a pasalṭha Sangliana a koh tir nghal a, thil thleng mêk chu hrilhin Pasalṭha Sangliana pawhin ngun takin a lo ngaithla ve a, "He thilah hian ka nawr lui hauh lo che. I ṭhian Ngûrzika vang pawhin Rotlâng tana ke pen chu harsa i tih ngei pawh ka ring. Mahse, ka pa khua a ni a, ṭanpui ngaiin an awm mêk a ni." a ti charh charh a, Sangliana chuan buk nghut nghut pahin "Lalpa, Ngura khan Lal Zabiaka a huat loh thu min hrilh fo a sin. Tunah hian pui turin chhuak lo ta i la, Ngura hmel pialralah ka hmu ngam hauh lo ang. Ka kal ange Ngharchhip rama ka ngaihdamna ngêntu Robula hmelte pawh hmuh leh a châkawm khawp alawm" tiin a chhang a, Lal Vanhmuaka hmelah chuan lawmna a hmuh theih hial a ni. "Aw le, ka pasalṭha nge nge huaisen takin han bei ang che. Tlangval hruai tur zat kha chu i kutah ka dah e" a ti a, Sangliana chuan "Lalpa, ka naute pahnih nen kan kal ange. I pa khian tlangval a ngah tawk viau bakah a tlangvalte zingah khian Paite ho kan beih ho ṭum khan Ngura naute pahnih hmel leh che zia kha ka hmu a, tunah chuan an puitling tawh ngei ang tih chiang takin ka hria a ni. An hming than ṭanna a nih ngei pawh ka beisei" tiin rawlthar Zinga leh Khuma te hmel kha a mitthla rauh rauh va.

Lal Vanchhûnga'n a nau thuchah a hriat chuan a thin a urin amah ngei pawhin farnu ang chiaha a lo en ve ṭhin Thanghlirite chhungkaw chunga Lal Zabiaka chet dan chuan a ti thinur hle. A pasalṭha pahnih Robula leh Ṭawklianate mai bakah a tlangval sawmhnih chu a tir chhuak nghal a, hlawhtling ngei turin a chah a ni. Ṭawkliana hmel ngui lap reng chu Robula chuan chhaihin "Nupuite ngai rêng rênga nun hman zawng a hrehawm dawn tih i hmelah a lang reng mai, kei zawng ka nei ve mai mai hauh lo ang" a han ti a Ṭawkliana chuan thutak deuh tak hian "Bula, phur hlut ṭhin suh. Ngurzika kha awm tawh lo mah se Lal Zabiaka khi Lal huaisen a ni a, a tlangvalte pawh huaisen tak an ni ang, hei a fapa Vanhmuaka pasalṭha Sangliana hi a inrawlh anih vaih phei chuan chaurau ek kan thai ve thei tlat a nia" a han tih chuan Robula chuan Ngharchhip ram kha a mitthlain a chhui kir nghal a, a sa kah ni miah lo a chuh buai avangin Sangliana nen an inbei a, a hneh leh si lo khan a nun zuah sak hram turin a ngen lawm lawm anih kha. " A inrawlh anih vaih chuan Robula hi a puitling va tak zet tawh a ni tih ka hriat tir ang" a han ti hlak hlak a. Muallianpui an va thlen chuan Lal Vandawla chuan a lo lawm thiam hle. A inah thlen tirin Robula pawhin a tih dan ṭhin tih chhunzawm ngei tumin Lal fanu Chhîngpuii chu a melh tai nghal hle. Chhîngpuii erawh chuan vawi khat pawh a melh duh lo thung. Ṭawkliana chuan Robula chu nghawk zauh pahin "Khual khuaa zin apianga nula lama i hlei ziah hi sim teh. Rammu tur kan nih hi hre reng rawh" a han ti sap a Robula chuan "Rallu leh ral lak sumte nen a pa hi ka han dêng anga, duh lo teh mah se ka zen tho tho ang" tih pahin a nui vur vur a. Zan lama Lal leh upate leh Pasalṭha Robulate zu inho chu an lu kai deuh hnuah phei chuan an titi an hrawin hmeichhe tana hriat ve chi loh lah an sawi tam narawh. Robula invau pung kual vêl chuan an thla a tih muan em avangin Duailova tlan chhuak tura intirh an tum te pawj chu ṭhulh lehin ni khat hnuah Rotlâng khaw run tura chhuah chu an rêl tlang ta hmiah a, chu chuan thil pawi tak a thlen tir dawn tih reng an hre si lo.

Rotlâng lam pawh Muallianpui lam mi leh sate an reh em avangin an rilruah hlauhthawnna a awm a, a rukin tlangvalte an inbuatsaih mawp mawp hlawm a, Pasalṭha Sanglianate hmel an hmuh tak phutah phei chuan ralveng an indah ulukinan fîmkhur tawh hle. Pasalṭha Sangliana chuan a rin ang ngeiin Zinga leh Khumate chu an puitling tawh tak zet tih tlangvalte ho khawmtu ber an nih danah chuan a hre mai a, ral ho hmaa an chet dan tur mawlh chu a hmu châk tawhin a phûr hle. Lal fanu Liankimi nau neih hun tawh tak chu an vaia ti mangang tu a ni a, an chet fuh loh palha ral ho khaw chhunga an rawn luh thut lai vêl taka nau a vei an hlau em em a ni. Mahse, Robulate an rawn chhuah ni tukah chuan Liankimi chuan fapa a hring ta hlauh mai a, Lal Zabiakate chhungkua chu an lawmin an tupa thar chuan a ti hlim hle, a pian hlima a pa chawi loh leh a dam chhunga a pa kaihhruai ni ngai lo tur a pa hming chawia a hming an phuahsak Ngurliana chuan hun rei tak hnuah hlimna chhiar sen loh a nu thinlungah a tuh a, chutih rualin Liankimi'n Ngurzika a ngaihna chu a zualin a fapa chu nui ri leh mittui nen a pawm a ni. Zan khat a liam hnu chuan Robulate pawh Rotlâng khaw ram chinah an awm tawh a, zan laia khua beih tumin zan tir lamah an mu suk suk hlawm a, Rotlâng khaw ralven bukah erawh Zînga leh Thingsai tlangval pathum Zaruna, Tlanruma leh Chînrualate chu râl vengin an awm ṭhap a, an khaw chanchinte inhrilh tawnin an hlim dar dar hle. Zanlai ar a khuang dawn hnai ta tihah chuan Tlanruma leh Chinrualate muhil chu Zinga leh Zarunate chuan an rawn sawi harh a, an hma lama meichher an hmuh chu kawhhmuhin Zinga chuan "Ruala, khaw lamah kal vat la, Lal inah chanchin han thlen rawh. U Sangliana i hrilh bawk dawn nia. Kan silai ri in hriat rualin he lamah rawn tlan khawm nghal ang che u" a ti a, Ruala pawh hmanhmawh takin a kal nghal a. Midang pathumte chuan an silai chu hûmin an inring pênpawn hle,meichher pawh lo hnai zèlin thawm pawh an rawn dîm thiam viau mai. Zînga chuan "An hmahruaitu ber khu ka kâp anga a hnunga kalte khu nangni'n. Kan silai kan kah ruah veleh, Ruma'n buk hi a chhuahsan anga kan chhak ralven buka awmte i han pawh chho ang, Ruala silai hi keng tel la, i awmna tur i thlen rualin i lo kap leh dawn nia, silai fung hnih chauh an kawl avangin i han ṭan pui angai a ni. Hmun hnih aṭanga vawi hnih, thum ṭheuh kan kah theih chuan khaw lama tlangvalte pawh an rawn thleng thei mai ang" tih pahin an buk awmna aṭanga lang chiang tak an khaw panna kawng ṭum inphan riak silaia kah nuam tawk vêl a hla chu a melh vang vang a, an buk awmna hi an khaw luhkhan thlang lam daihah a ni a, an awmna aṭang hian an khaw lam pana lo kalte chu an lang chiangin ral lo kah buaina'n chuan a ṭha hle a, mahse, ral hoin an awmna an hmuh fuh a an kah let vaih chuan a hlauhawm em em thung. An hmelmate lo hnai zelin anmahni pawh an lang chiang ta maw tihah a kal hmasa pathum te chu an han thal ṭhawt mai a le, Muallianpui tlangvalte chu an tal buai nasain a ṭhen an tlân let a, a ṭhen hma lamah an tlan thung, hma lama tlan ṭhenkhat chu ralven buk chhak lama miten lo hmuin an lo kap ve bawk a, Muallianpui ho dinhmun a chhe hle, leiah bawk hniamin an thaw dêp dêp ringawt mai a ni. Zarûna chuan Muallianpui tlangvalte tlan tawpna ni a, a hriat, buk lam pana a tlan paha a hmuh kha a han tin vang vang a, chutah a han kap ṭhuai maia na tuar rak riin rawn chhunzawm nghalin Muallianpui ho tal buai leh chiah chu midang silai sawh zo tawhte chuan rawn kap leh nghalin ralven buk chhak aṭangin silai paliin an rawn kap a, thlang lam aṭangin pahnihin an rawn kap bawk si. Han kah let ve dawn lahin an awmna an hre mai si lo, mahse, silai puah ruala rawn eng zuai chu Robula'n a hmu hman tlat. A silai chuan a han tin vang vanga Rotlâng tlangval pakhat chu a thal ve nghal tawp a, chu veleh Muallianpui tlangvalte chu rawn phur thar ve lehin Zarunate buk chu an kah rawn ta, mahse, Zaruna finna zarah an chhuak fel hman tlat. Silai ri a reh fel ta maw tihah chuan thawm chu mak tak maiin a rep ṭhuap a, Robula chuan a naute chu a tawlh let pui hret hret a, hmanhmawh chi ni hek suh tuibur hmuamda hnu velah pawh Rotlâng ralven buk pakhat zawk awmna zawn pawh an la thleng lo a ni. Chutih lai tak chuan silai a rawn puak leh ta ṭhuai ṭhuai mai a, Muallianpui ho chu an tlu leh ta zawt zawt mai, mahse, Ṭawkliana leh a hote'n an rawn kah let ve takah chuan Rotlâng ho pawh an tlu veleh ta pheuh pheuh a, Tlanruma hlawm tawl chu Zaruna chuan va bawihsawm vatin a kâ aṭanga thisen chhuak zawih zawih leh a kaw chhung ri bawrh bawrh ri chu hriat hrehawm a va han ti em. Tlanruma ṭawng tum ṭawng chhuak zo si lo, thi tur chalchang vel chu Zaruna chuan mittui tla zawih zawih chunga pawm betin Chînruala'n a rawn hmuh ve meuh chuan a lo chatthla fel ta. Naupan têt ata an lo kawp tawh, unau ang maia an en, an hmangaih leh an ngainat em em chu hmelma chênrâng muin a laksak ta si a maw. Zaruna thinrim rak ruai ruai chuan a chem sen phawrhin Muallianpui ho pan chuan a tlan kual ta zar zar mai, a hnungah ngil taka tlan duh hauh loin Zaruna tih dan ang chiahin Ruala chuan a zui ve bawk a, Rotlâng ho tán thlir liam ngawt chi ni suh silai dahin chem sen nen an hmelmate bawh turin an tlan ta. Muallianpui ho pawhin an hmaa thil lo thleng tur chu tlan chhiat san a theihloh tih hriain an silai dahin an mi lu lak chem nen an lo inring ve rân a, an han inpawm chilh chiah chu na tuar râk ri leh chem leh chem inkhak ri chu a rawn inpawlh nuai nuai a, mahni hming leh Lalte hming lo chhal tawk lah an tam narawh. Mahni khua leh tui tana din chan tum HNUNG TAWLH NGAI LO MI HUAISENTE chu chulai hmunah chuan thla êng ringin an insam ta nuai nuai mai a, Zaruna leh Rualate hma zawn chu a kaw duak duak a ni ber e, chu chu Ṭawkliana chuan lo hmuin an lam panin a inher bek bek a, mahse, a hmaah chuan tlangval pian inkhai thli nalh tak hi a rawn ding chat mai. Ṭawkliana chuan nuih sak pahin chu pa hma chhawn tur chuan a han insiam rem nghal a, Khûma pawhin Ṭawkliana hmachhawn tur chuan a insiam rem zui nghal bawk a. Muallianpui tlangval rîl uai pur khawp a sat zo chiahtu Zînga'n a unaupa Khuma leh Ṭawklianate inhmachhawn a hmuh chuan nuih sak pahin "Ka nu bula i nat vei nen, i rawn chhuak leh tho si" a ti rilru a, amah lo pan mêk tu tlangval pakhat lam pan chuan tlan phei nghalin a hmui kak avanga a ka chhung leh hmui vêl a thisen awm nei nuai chu nuai sawk sawk pahin chu tlangval chu a han chhip thlâk ngheng mai a, chu tlangval awp rawk rawk chu a hmuh leh hmasak ber a ni. "He lamah aw" ti a rawn vawm tu lam chu hawiin pasalṭha tih hriat tak mai amah lo en kar tu chu melh let pahin a thaw hlawi hlawi a, a kâ chhunga thisen a khah vek avangin a thâng huam mai a ni. Mahse, an inkarah Pasalṭha Sangliana a rawn tla zep tlat. Pasalṭha Sangliana chuan "Robul, ka nun tawh dawn hauh lo che a nia. Zînga he pa hi chu ka chan pual a ni tlat. Sawi fel tur nei sa kan nih avangin min kian mai a niang chu" a rawn ti lauh lauh a, Zinga chuan "U te'n in tihte chuan le" tih pahin hmelma lam bitna chu a pan leh nghal a. Ṭawkliana chuan a beih mêk pa chu kawng engkimah a hneh lo tih a hre chiangin a beidawng hle. A kal dawn zâna a nupuiin a mumanga amah Ṭawkliana ruang a lo hmuh thu leh lu reng reng a neih loh thu a sawite kha a hre chhuak rauh rauh va, Khuma'n a malpui leh a nâk a hliam na tak, mi pangai tana dam chhuah pui theih loh tur khawp a na chu din kân pui lehin a tha zawng zawng sawngkhawmin Khuma lam pan chuan a tlân leh a, Khûma chuan a beih puipa chhel lutuk chu ngaisang hle mah se, a hmelma anih avangin a chungah zahngaih a tum lo hle. An inkarah hlam hnih vel a la awm ta maw tihah Ṭawkliana lam pan chuan tlan thutin Ṭawkliana chem rawn vai chu bum pahin a chem chu a han vai chhuak ve fua mai a, a han hawi let leh meuh chuan an khaw tlangval lo thleng hnuhnungte meichher eng hnuaiah Ṭawkliana'n a ril tla tur a hup beh ṭang ṭang chu a va hmu a, Ṭawkliana chuan harsa ti tak chungin "Tlangval, i huaisen hle mai. Khuanu'n malsawm che rawh se. Ka lu hi ka nupui hnenah thleng rawh se" a rawn ti ṭawk ṭawk a, Khuma chuan Ṭawkliana nupui chu a khawngaih hle, hmeithai fa anih avangin fahrah a siam belh ngei dawn tih a hriat avangin pawi a ti hle a, "Ka pu, kan intawng hi a pawi a ni. Min ngaidam ang che" tiin Ṭawkliana zal riai riai chu a thlîr a.

Robula beng la uai ve chang chang chu a lang chiangin a thih teuh zia pawh a hril chiang hle. Tlemin Pasalṭha Sangliana kha rang deuh ni se chuan a thi chiang tawh viau ngei ang. Robula chuan "Sanglian, ka dam chhunga ka mi huat ber ni reng ṭhin i ni" tih tuar pahin Sangliana lam pan chuan a tlan a, Sangliana pawhin lo pan phei vein Robula zuang kang rawn ṭum leh chiah chu Sangliana chuan a khupin a khabeah a lo nghawk siah mai a, chutih rualin a ban bul pawh a thip ve nghal zawk tho. Robula lu hai pai khut khut chu Sangliana chuan a tlawh thal ṭhuai a, thei leh thei lo a, a rawn inbengkang lai tak chu Sangliana chuan a nghawngah tak chuan a chem tlum pawk khawpin a han sat mai zawng, a tho zui lo chiang hle. Zinga hawi vêl chuan Muallianpui tlangvalte inpe ṭan mêk chu hmuin "Muallianpui tlangvalte u, in pasalṭhate pawh an awm tawh lo ve. Inpe mai rawh u" tiin a han au a, Muallianpui tlangvalte zam tawh sa chu rei lo teah an inpe ta vek a. Chu lai hmun thang huamah chuan an ṭhingṭhi far hlawm a. Pasalṭha Sangliana chuan tlangval ṭhenkhat chu khaw chhunga chanchin lawmawm thlen turin a tir liam zui nghal a. A han hawi kual a, a naute pahnih Zaruna leh Rualaten Tlanruma ruang an lo kuah chu va hmuin a va pan phei vat a, "Ruma, i vullai ni a va tawi em. Kan va ngai dawn che ve aw" tih pahin Tlanruma kut chu a han hum vang vang a, a mittui luang chu hru sawk sawkin "Naute u, pasalṭha taka awm hun tak anih hi. Ruma chu pasalṭha thih dan dik takin a thi a ni tih hre reng rawh u" tiin a thawh san a.