HNUNG TAWLH NGAI LO MI HUAISENTE - 30

Hun leh nî a liam zêl a, Rotlâng khaw mipuite thinlungah pawh Lal fanu Liankimi chuan hmun a chang tlem tial tial a, a kal dawn a an ui em em, an lawm pui em em bawk si Lal fanu Liankimi hmel hmuh tur a awm reng tak lohah chuan ngaiah an neih chho ve zel a, Lal Zabiakate chhungkua pawhin an lunglênnate dah ṭhain hma lam hun thlîrin hun an chhiar chho ve zêl a ni. Rotlâng khua chu tunah chuan in zathum nufa an lo tling ta reng mai a, an pasalṭhate huaisenna zârah leido pawh nei loin muangleiah nunaute'n hun an hmang a, an hlimin a nuam pawh an ti hle. Saichhunga pawh tlangval tak tak an nih hnu chuan a pa aiawh tu tur a la nih dawn avangin a ṭhiante bulah hun a hmang tlem tawh hle a, zan hnih khat an han inkawm ho leh zauh ṭhin tih loh chu Zawlbuka an inhmuh bâk inhmuh loh vang vang chângte pawh an ngah hle. Zînga leh Khuma nise Lal Zabiaka rinrâwl ber an nih avangin an khaw himna tur ngaihtuahin an hmanhlel a ni ber a, an khaw ram chinge fangin felhlel lai a awm leh awm loh enin an kal chhuak fo ṭhin. Mahse, chutia thlamuang taka an awm lai chuan chhim lam Lusei khuate tana Pawih ho hnawksak leh tawh zia chu khual kâ aṭangin an hre fo va, pawih ho mai niloin Paite ho nen pawh buaina an nei fo mai a ni. Chutih hun lai chuan Halkha pasalṭha Hlawncheuva chu a hmingthang em em mai, a kalna apiangah hlawhtlinna a chang zêl a, Lasi zawl ang hialin an sawi fo a, a chhan chu pasalṭha huaisen tak takte pawh awlsam takin a tukdawl mai zêl a ni. A kum a la naupangin a hmel enin thlasik a la hmachhawn tlem tih a hriat hle a, mahse, hmelma hmaa a chet dan leh a hmel chu a inpersan chiang hle. A nun a râwngin rammu a, a kal reng rengin nunau pawisawi lote pawh dîmna îk a nei ngai lo a ni. Chu vângin chhim lam Lusei khuate chuan a bitum tur nih an hlauin mipuite lah an pem chhuak sup sup mai a, a tam ber chuan Lusei Lal Rengliana leh Kapthangate bêlin Zehtet leh Bualthleng lamah an kal hlawm a ni. Zan khat chu Lal leh upate chu leihkapuiah ṭhuin an titi a, Upa Min Vuana thu sawi chuan a barakhaih kher mai, "Halkha ho chuan chêt an rawn thawh leh ta a ni âwm e. Damdep khuate pawh an rûn a, lusei nula tam tak sala an man bâkah an Lalnu phei chu an pasalṭhain a naute hmaah Lal tualah a pawngsual a, a that zui hial ni âwm tak a ni" a han ti charh charh a, Lal Zabiaka chuan "Damdep ho chan chu a va châu em. Chutiang khawpa nunrawng, Lalnu meuh pawh zahna châng hre lo an awm a ni maw? A va han rapthlak ngai ve le. Ka khua an rawn bitum anih vaih zawngin an chak lo teh ang chu" a lo ti hlak hlak a, a vaibel dawn chu a sehkeh rap bawk a. Upa Luaia chuan "Lalpa, kan tlangvalte hi tirh ve mai a ṭha i ti em? Nge ni a, kan puihna an rawn dîl hma chu a ṭul lemloin i hre zawk?" a lo ti a, Lal Zabiaka chuan "Mahni Lusei puite chhanna'n a pen chhuah chu thil tih âwm tak a ni. Mahse, kan dinhmunin a zir si lo a, hmanni lawkah pawih ho nen kan buai tawh si a, tuna kan tlangvalte kan tirh leh nghal mai chuan mipuite an lungawi lo dah ange. Kan tan hnawksaka an la awm hma hi chuan an chin hi lo ngaihven zêl rih i la, a tawk rihin ka hria. Kan pawi an sawi anih leh a siruk lain kan chhuak anga, ṭiau râl pawih mawngbâl ho chenna tawh phawt chu kan chingphîl vek ang a, a ni mai alawm" tiin a lo chhâng a. Halkha ho chet duhdan chu Lusei ho chenna khuaah te chuan a thang zêl a, Lusei tlangval zam ngailote lai a nain halkha pawih ho huatna chu an thinlungah a nasa em em mai a, Lusei Lalte pawh an thin a urin Damdep Lalnu chunga thil thleng chuan a nghawng na hlawm hle.

Khawvâr ruala tual a naupang infiam ri nak nak awm zui nghalte, vawk rilṭam ngek rite leh ar khuang âl âl thawmte chuan Rotlâng khua chu a luah khat a, Zîngete unau in lam pan pawh kal paha titiin betu an tawng pah zeuh zeuh a, nula buhdeng chawn var lang haihte chu an mit sir thla pah relh relh zel bawk. In an zu thlen chuan a ngai te bawkin a nu chuan ei a lo rêl a, Thangbawihi pawhin a ṭul ṭul tiin inchhungkhurah chuan a lo buai ve bawk a, Khumate pahnih erawh ngawi renga tuihmun lam panin an va inphih fai sawk sawk a, an silaite lain luhka lamah an ṭhu chhuak leh a, an silaite chu hruk fai pahin savawm hriak an hnawih a, an ram vahna tûr lamte chu an sawi dûn leh zauh zauh ṭhin bawk. Chutia an lo buai dun lai tak chuan Saichhunga pawh rawn lang vein silai a rawn pu thla nelh nelh bawk a, a sângin a palian si a, a silai chu a tham loh hmelin a lang tê rawt mai a ni. Khumate kiangah chuan ṭhu vein an silaite an endik zawhah chuan innghahkhawmna hmun turte sawiin Saichhunga chu a haw leh ta a. Tûk ṭhuan kil lai chuan Khuma chu a nu chuan "Kha ram vah intum deuh a ni maw?" tiin a zawt a Khuma chuan "Ni e, Phulraw tlâng lamah sawn sa lian tham an hmu fo a ni âwm a, zan hnih khat lek riakin kan va vâk ve mai mai ange" tiin a chhang a, a nu chuan "Ni e, fimkhur takin va kal u la, Saia kha a kal ve phei chuan veng tlat ang che u. In vak chhuak khat ta lutuk a, sarep ei reng ai chuan sakhi chek hangte pawh kâin a thlahlel ve deuh alawm maw le" a lo ti a, Thangbawihi chuan "U Khuma chu i lung a va lêng dawn ve" a lo ti zauh va Zinga chuan nuih pahin "Thangte engvang chuan maw?" a lo ti a, Thangbawihi chuan "A zantin maia a vaibel lak kai saktu a han hmu lo thut tur hi a nia ka tih. Nupuite hi nei vat teh u, ka nu nen chauh chuan kan hah ṭhin emai. Nangni lah hi tih tur in hre bawk si, inah in awm hman meuh bawk si lo" a ti nghal duah a, Khuma chuan "Thangte, i U Zinga hian nupui neih a tum mêk alawm." a lo ti ve vat a, Thangtei ṭawng leh hma chuan a nu chu lo ṭawngin "Thangte, nula i nih ve tawh kha, naupang rilru put reng loh tur. I ute chuan an la nei ve em em ang. Keini pahnih lek tan hna hahthlak engmah a awm loh hi" a lo ti a, Thangtei hawi tau hmuk chu Zinga leh Khuma chuan an nuih ru zauh zauh va. An han inpeih fel a kawtchhuah an va thlen phei meuh chuan Saichhunga bâkah bûk nghak tura an sawm ve rawlthar zawlbuk kai tir pahnihte chu an lo awm rân tawh a,muang châng loin an kal tumna lam pan chuan an chhuak ta a. An rawlthar hruai Tinthanga leh Thangvunga chu an ṭawng tlem dûn hle a, mahse, chutia an la kal ngai lohnaa han vah vêl chu nuam an ti tih an hmelah a lang a, an hawi kual sek reng mai a ni. Nau rilṭam hun anih meuh chuan bûk sakna tur hmun ṭha leh rem tak an hmuh avangin bûk sak chu hna hmasaah an neih nghal a, an rin lawk ang ngeiin Tinthanga leh Thangvunga chu tirh chawp ngai loin an che zung zung a, an hna an hnehsawh dun hle. An ni pahnih hi zawlbuk an rawn kai zân aṭanga an lo chhinchhiah rûkte zînga mi an ni a, an khuaah hian rawlthar huaisen tak tak an awm tih an hriat tirh khan an lawm hle, Tinthanga leh Thangvunga phei chu an beisei sân ber ve ve an ni a, chu vangin tuna an ramvahnaah pawh hian bûk nghak tur anga thlem chhuak an ni. Anihna takah chuan Halkha ho leh Paite hoin thawm an rawn neih fo avangin eng pawh tawk thut thei an la ni a, chu vangin an theih chhung hian pasalṭha chher hna nasa taka thawh an tum ruh hle a, Thangvunga leh Tinthanga pawh hi inkawp ngai miah lo ni mah se an chhinchhiah rukte an nih miau avangin an hruai a ni. Bûk an sak zawhah chuan Khûma chuan "Zanriah hmeh tur sa tenau deuh ka va zawng ange, hawh Thangvung min lo zui ve la, midang hi lo ṭhu chawl rawh se" tiin an kal chhuak a, an riahbuk sakna bul a lui chu zawh chhoin kawi li vêl an kal hnu chuan ram lamah lûtin ngaw hnuaiah an vâk ta a, Khuma chuan Thangvunga chu sa hnu chhui dânte leh sa chân dânte hrilhin a tana hruat tur pawimawh chu a hrilh chikim hle. Thangvunga pawhin ngaihnawm ti takin a lo ngaithla ve zêl bawk a. Bûk lamah erawh Saichhunga chuan eirawng a bawl a, Zinga leh Tinthangate erawh an buk bula tui chu mauin an buk aṭanga hnaite a lak theih turin an siam a, an siam zawhah lui chu zawhthlain chakai an khawrh a, mi tlawhpawh tam loh tih takah chakai man tur pawh a tamin an hlawhtling hle. Behliang mûn hun vêl anih chuan duhtawkin bûk lam panin an kal ve ta a, an han thlen chhoh chuan Saichhunga chu bûk chhungah a lo hnar ri hlarh hlarh a, Zinga chuan chakai chu chhum nghalin Tinthanga chuan zan lama thingtuah tur fawmin ngaw chhûngah chuan a lût a, rei lo te hnuah Saichhunga muhil chu rawn harhin "Min lo kaihthawh loh le aw?" a lo ti muang raih a, Zinga chuan "Tih tur engmah a awm tawh hleinem, hei, chakai kan khawrh a rin ai takin kan man hnem phian leh nghal. A tui khawp ang lo en mah teh" a ti a Saichhunga chu rawn tho chhuakin Chakai bawppui lian pui pui a rawn hmuh chuan a hlim hle. "Khaw nge Tinthanga a awm a?" a tih lai chuan Tinthanga chu thing pu lûk chungin a lo lêt a, Zinga chuan "Ekhai aw, kan neihsa nen zanin chu kan daih mah mah dawn anih kha. Rit hi ṭhan lai chuan lak nasat loh a ṭha a sin" tiin a va chhawk vat a, Tinthanga chuan "U Zing eng tham mah a ni hleinem" a lo ti a, Zinga chuan "Ti khan zu insil fai la, hei Saia nen kan lo tan ange, Khumate pawh an lo let ṭep ang" a tih chuan Tinthanga chu a kal ve nghal a, Saia nen an ni pawh chuan thing chu tanin bûk bulah chuan an chhep khawm a. Rei vak lo hnuah Khuma leh Thangvungate pawh sakhi tuai nen an rawn thleng ve bawk a, sakhi chu puah nghalin a chek an han siam a tui ti takin chaw an han bâr a, chakai sa leh hmarcha nen ṭhial pawlhin sakhi chek tuiin an han hnawn thla leh ṭhin a, an tlei tlângin chaw pawh an ei hnem hle. Zan riah eikhamah sakhi sa chu rêpin bûkah a ṭhen an lo tlu zâl bawk a, Khuma chuan Tinthanga leh Thangvungate chu an hma hun lo awm leh zel tur atana an tana ṭangkai tur thil tam tak a hrilh a, an ni pahnih pawh chuan ngun taka lo ngaithlain Khuma thusawi te chu zawm ngei pawh an tum ruh hle. A tîra an zah rûk leh an nel loh ber Lal fapa Saichhunga'n hmanlai chanchinte, pasalṭha chanchinte, nula hmelṭha chanchinte leh Lal ropui chanchinte a han hrilh meuh chuan an nêlin a bula awm nuam pawh an ti hle. A tuk lama sa lian tham an beisei dawn avangin hma takah an mu ta hlawm a.

Bûk bul thing ṭang tliak ri zeuh chuan Khuma chu a ti harh zawk a, a han hawi kual a, Zinga pawhin a lu a lo kân ve ûr ûr bawk a, an piah kil lama mu Tinthanga leh Thangvungate an va en chuan an lo ṭhu chhuak ve ve tawh a, Zinga leh Khuma lte chu innuih sakin an mu ṭha leh then a, thawm chu a khat tawkin a rawn awm reng a, Tinthanga te chuan an ning ta deuh nge ni rawn tho chhuakin pawn lamah an va chhuak ta a, Zinga leh Khuma te chuan an lo thlir ru reng bawk a. Rei lo te hnuah "Tina sarep kha rawn pe ve mai teh, hei a kalsawn duh tlat lo a ril a ṭam ngang ni tur a ni. Hei, mi melh rum tawh teh a nia" ti a Thangvunga ṭawng lawng lawng ri chu an hria a, sapui huhang hmaa rawlthar tuai tirte zam hauh lo a an han che chu Khuma leh Zingate chuan a huaisen thlak an tiin an ngaisang hle. Saichhunga muhil char char a maw an tih pawh chu rawn ṭawng chhuakin zawi sap hian "An va huaisen kher em. Kan ti fuh dawn khawp e" a lo ti ve bawk a. Tinthanga chuan sarep chu lain an piah lawka Thangvunga hmaa sapui ṭhu tung rûn bulah chuan a va theh phei a "Kha le pasalṭha, a dang beisei a min rawn tihharh tawh loh hram kan beisei a nia, ti khan tui ti takin ei rawh le" a va ti a, ti chuan rawn let sanin bûkah chuan an rawn mut san leh ta a. A tuk zîngah chuan Khuma chu tho vatin sapui hnu chu a han melh kual a, a hmuh fuh meuh chuan chek tlak tlakin "Naute u, in va huaisen kher em" a ti sap a, ei rel chhunzawm nghalin Tinthanga leh Thangvungate chu inthlahrung takin an lo tho chhuak ve nghal bawk a, Khuma chuan inthlahrunna chhan tur a awm lo a nia tiin a lo hnêm ve bawk a, Zinga pawh rawn tho chhuak vatin zunram thiar pahin sapui hnu chu a en kual ve nghal a, a hmuh fuh meuh chuan mak ti takin Khuma chu a rawn melh nghal a, Khuma pawh chuan lo hrethiamin a lo nuih suk bawk a. Saichhunga pawh a tlai berah rawn thoin sapui hnu a va hmuh ve meuh chuan a meng ka hau mai a, Zinga leh Khuma chuan an lo nuih kur kur bawk a. A bawhna leh a hnu aṭang pawha sapui ṭhankin ni tawh tih hriat ngawih ngawih hlau miah lo va hmachhawn ngamtu an naute chu an chhuang ru hle a ni.