HNUNG TAWLH NGAI LO MI HUAISENTE - 21

"Khûma, zanin zet zawng chung chhawrthlapui khian ka lung a lên riau pek a, tu zûn ngaiin nge maw ka kûr tak lah ka hre mang hauh si lo" tih pahin Saichhûnga chu a han nui hak hak a, Khûma chuan "Akhai khai, Saia, nutling tlan tau awm hun i nghahhlelh zia ka hrethiam e" a rawn ti vat a, Saia chuan nuih tlawrh tlawrh pahin "A teuh lo lutuk. Nang Darzo lamin i lung a lên viau lo maw?" a han ti a, Khûma chuan "Akhai, Darzo lamah hmuh ṭha ka hmuh pawh ka hre hleinem" a lo ti maia, Saia chuan "A ve che a" tih pahin Khûma chu a han nek sawk sawk a. Chutia an pahniha an rik hlut lai chuan Zînga chuan lo khapin "Aw haw le, ka nu thil min hrilh rûk hi a dik loh ka ring ta hauh lo" a han ti sap a, Khûma chuan "Eng maw? Ka nu chuan enge a sawi ?" a lo ti vat a, Zînga chuan kawtchhuah lam chu kâwkin "Vengchhak pa Pu Phira an tih mai khian kan zin hlân khan thawm a lo nei nasa ru viau a ni. Pu Sângchhuana nupui nen sawn chiang takin la phawk lo mah se, an tawm dûn ṭhin niin an ringhlel ṭhûm a nu awm e. Nichin lawk khan Pu Phira kawtchhuah lam pan hi ka hmu a, tunah khan Pu Sângchhuana nupui kha a rawn chhuak tlat mai, hawh teh u, i zui teh ang u" tiin kawtchhuah lam chu an pan a, Khuma chuan kal pahin "Ka nu chuan tinge nangmah chauh a hrilh bîk che?" a ti sek a, Zînga ning deuh chuan "Inah awm peih hlei lo che, i leng reng ringawt a" a han ti deuh hrawk a, Khûma pawh a ngawi ve nghal mai a. Kawtchhuah an va thlen chuan mi pakhat lo ding reng hi an va hmu a, thawm dim taka pan hnaiin amah chauha ding a ni tih an va hmuh chuan mak an ti ru hle. Chu pa hawi kual a hmel thla êngin a chhun an hmuh ruai lai chuan Pu Sângchhuana ngei a ni tih hriaiin pawh mai chî niin an ngai lo a, a chhan chu amah ngeiin a nupui chu a ringhlel a, a châng ru a, a zui ru tih an hriat avângin. Tuibur hmuam da hnu veleh Pu Sângchhuana chu chhaklamah pêng chhoin a kal ta a, Zîngate pawh chuan zui ve nghalin Pu Sângchhuana chu an hmu pha deuh reng a, a din rualin an ding ve zêl bawk. Chutia an kal zêl lai chuan sawntlung pawng awmna an va thleng a, chu sawntlung phênah chuan Pu Phira chu Pu Sângchhuana nupui kâkpuiah a lo su hliau hliau mai a, Pu Sângchhuana chuan ding chungin a thlir tlawk tlawk reng a Zîngate chuan an khawngaih hle. Pu Sângchhuana chu a insum zo lo tih hriat takin Pu Phira buhdeng lai chu a va ṭum zawt zawt ta mai. Pu Phira lah chuan Pu Sângchhuana chu a lo ngam lo nasa ngaihdam dîlin a rak chûl mai a, Zinga te chu va inrawlh vatin Pu Sângchhuana chu an va chelh bet a, Pu Phira pawh chu man betin Pu Sângchhuana chuan "Lal fapa nen meuh a min zui ni lo u la chuan he lai hmunah hian kan thi vek ang. Nang mihurnu vawi khat mah ka inah rawn let tawh suh ang che" tiin a nupui saruak vek a awm chu a kawk sawk sawk a. Amah chelh bettu Zinga inthlahdul lai tak chuan tal pit thutin a nupui hmaiah chuan a beng hawi sawk mai a, a pai nasa hle a tlu tur chu Saia chuan ten hmel takin a lo dawm dê dê a. Pu Sângchhuana chu haw puiin Pu Phira leh Pu Sângchhuana nupuite erawh anmahni nih nih a lo ni turin an kal san ta a. Pu Sângchhuana thinrim chu inchhung a luh rualin a fate bulah a ang piap piap mai a, a âng thawm chu ṭhenawmte'n lo hre phain a tuk zing a lo thlen meuh phei chuan khawtlângin an hre tawh a tih theih hial âwm e. Lal Zabiaka pawhin a hriat rual rualin pawi a ti rilru hle a, mahse, a hnêna buaina an rawn put luh loh thil anih avângin a inrawlh duh lo a, mahse, Pu Sangchhuana nupui erawh a demin tenawm a ti hle a, oasal nei lai reng mahni pasal khamkhawp lo a ni ta mai chu a mak a ti zawk hial a ni.

Hrangliana leh Zakulha zin erawh Zehtet khua chu pumpelh aṭanga an kal hnuah zan khat khawkar kawngah riakin a tuk feh reh san hun awm velah chuan Zehtet khaw kawtchhuahah an awm tawh a. Zakulha chuan "Hrânga kei chu heng Zehtet khuate, Bualthleng khuate mai bakah Darchhep khuate'n an vânglai an tawn lai khân han chên ve theih ka chak a sin. Khaw thum inlungrual takin an han ṭang ho chu a ni si a, Pasalṭha Thanhranga kha ka pa khan a ngaisang lutuk tiin ka nu hian min hrilh ṭhin a, hmuh ve ka chak khawp mai, mahse, a tupa ngei pawhin i hmu lo chu a ni si a. Pasalṭha Thanhranga chher chhuah Pasalṭha Chhuahchawngate ho vânglaite kha han hmu hman i la ka ti ngawt mai " a rawn ti a Hrangliana chuan" Ni ngawt mai. Ka pa pawh hian khang hun lai kha a ngaih ṭhin zia a sawi fo a sin. Rûn an tawh vangin ti hian khaw hranah an awm darh ta nuai mai si a, lungleng reng rengin ka pa hi chuan a dam chhung ni hi a hmang ral tawh dawn a ni. Chu vangin kawng engkima remna zawn zel hi a lo ṭha ber mai. Kei zawng ka pa anga lungleng reng renga nitin hun hman ve hi ka duh hauh lo. " tiin a chhâng a, ti chuan khuaah lutin khuaa lo awmte chuan chutia an khuaa rawlthar pahnih Zawlbûk kai rual ni ve awrh an pianphung inkhaithli nalh em em bawk si chu an en duh hlawm hle. Anni erawh chuan ngaihsak lem lo takin Lal in lam an pan vang vang a, an han thlen chhoh chuan luh an han dil a, tlangaupa rawn chhuakin an kal chhante a han zawt a, an ni chuan Zehtet khuaa an unaute tlawh tura kal an nih thu hrilhin tlangaupa chu an nghak a, rei loteah an rawn ko a, an va lut ta a. Lal Kapthanga chuan lo be vatin "Lal Saingurliana tlangvalte maw in nih a? Kha lo ṭhu thlan dai teh u, hahzu te ka lo zuk ang che u" tiin a ṭhut tira hahzu te a zuk zawh hnuah an kal chhante a han zawt a, Hrangliana chuan "Lalpa, kei hi Pu Thansanga fapa ka ni a, ka pa unaute ho tlawh kual turin ka ṭhiana nen hian kan rawn zin chhuak a ni e" a han ti a, chu veleh Lal Kapthanga chuan "Tlangval, ka naua chuan fapa a va nei lian ta ve. Ekhai, i khuaah i lo haw a ni tih hria ang che. In ṭhian dun khan ka inah ngei hian thleng ang che u, nakinah midang ho an rawn kal anga, an hmuh hunah che u chuan mak an tiin an lawm viau ang che u" tih pahin a mittui hnâm sawk chu a hru ru zauh a, Thansanga chauh a ni lo, Lal Kapthanga meuh pawhin vanglai a chhui kir fo a, a ngai ru ve fo a ni. Hrangliana chuan "Lalpa, i ina thlen tluka thlanawm a awm hauh lo, mahse, ka Pa Liansanga a la awm ve si a, a in lama innghah kan lo rilruk deuh a" a han ti a, Lal Kapthanga chuan a han ngaihtuah vang vang a, Hrangliana'n Liansanga in a innghah a duh chhan chu a pa thurawn a nih vang a ni tih chu man thiam vatin "E, ni dawn tak maw? I pa Liansanga chu ka zu koh tir ange, in zu thleng dawn nia u. Chuanin, ka pa ti a min ko hreh deuh anih chuan ka pa Kap tiin min ko thei ang tin in hre dawn nia. He Lal in hi in thian dûn tan a inhawng reng ang" tiin tlangaupa chu a tìr zui nghal a, Liansanga rawn thlengin Thansanga fapa a han hmuh leh chuan "Ehe, Taite, i lo va han lian tawh em em ve. Khual khuaah te i rawn zin ve ta a ni maw?" tiin a chibai a, Hranga chuan "Ni e, ka pa hei ka rawn zin chilh rawih che u anih hi." a ti a, Liansanga chuan an in lamah hruai thlain a fapa naupang ber Zawlbûk thing nawi fawm rual vêl chu tirin Upa Thangkungate, Upa Chhuahchawngate bakah Lianmawiate a koh tir a, rei lo teah lo thleng khawmin Thansanga fapa an han hmuh chuan an lâwm hle mai a, Hrangliana'n a zin chhan dik tak, Bungtlang khuaa bul taka an awm avanga an chhung leh khatte zawn chhuah a duh vang a ni tih a han sawi laite chuan mak an tiin an ngaisang hle a, Upa Chhuahchawnga leh Upa Thangkungate chuan "Taite, hei keini hi i chhungte ngei chu kan ni e. Kan fapa i ni a, khawi hmunah pawh awm la, kan ngaihtuahnain a zui tawh ang che nga, i mal ngai lo ang" an ti a, ti chuan chhungkaw chungchangte sawi hoin an titi vei luam a, Hrangliana leh Zakulha ṭawngkam fel fai fak mai leh puitling em em chu ngaihthlak nuam an ti tlâng hle a, mahse Zakulha erawh inkiltawih chang a nei leh zauh zauh ṭhin a, a ri ve huau huau lo deuh. Zan a lo thleng a, Pu Liansanga chuan a mikhualte chu hruaiin Lal mual lam a pan pui bek bek a, Lal in hnaih bera awm in lian ṭha tak pakhatah chuan luh puiin nu pakhat hian a lo chhawn vat a, Liansanga pawh chuan ṭha taka chhan pahin tap bula putar zâng kûl taka lo ṭhu kawm ngul chu koin "Ka pa Chhuan, hei i tupa a lo zin e" a han ti sap a, chu putar chuan Hrangliana mitmeng chu a han en vang vang a, muang deuh chhalh hian "A khai aw, ka ṭhian Thanhrânga tupa i ni reng mai a!! In mitmeng rêng a danglam lo mai ka ti." tiin thei leh thei loin a rawn ding kâng a, Hrangliana chu chibaiin "Hei, ṭhian i rawn hruai a ni maw?" tih pahin Zakulha chu a chibai ve leh a, Hrangliana leh Zakulha te chu Pu Chhuanthanga bulah chuan ṭhuin Pu Chhuanthanga titi chu an ngaithla a, tun hma chanchinte sawiin a vânglai a,a sa kahte, a pasalṭha chher chhuah Thangkunga leh Hrilkungate nen an ram vah ṭum a Hrangliana pu Thanhranga ram vak nen an intawn ṭumte chu sawiin chuta ṭanga an inṭhian chhoh tak dante chu a hrilh a, vawi engemaw zat rammu a an kal dun thute chu sawiin a lung a lên hmel hle a, a chang leh a han nui leh hak hak vei ṭhin. Leng hawn ar khuan hnu thleng raka awmin a tuk zan lama leng leh tura inchahin an haw ta a, zawlbuk pawh lawi lemloin Liansangate inah an riak a, a tukah chuan Lal in lamah lengin Lal Kapthanga leh a upate kiangah chuan Lal Kapthanga duh ang ngeiin an ṭhu ve a, an titi khawchang sawite chu an lo ngaithla ve a ni. Zan lamah a ngaite bawkin Pu Chhuanthangate in lamah bawk an leng leh a, Pu Chhuanthanga titi bawk chu an ngaithla leh a, chumi zanah erawh zawlbukah an lawi ve ta a. Val upa Neuva chuan khual buan neih lo rawt vatin Zakulha leh Hrangliana chu tlangval pathum ve ve a buan tir a, an tumpuite an hneh vek hnuah chuan mut zai an rel ve ta a. A tuk zingah chuan Zehtet khuate chuan an mikhual rawltharte inbuan thiam zia chu hahipin an sawi hlawm a, ṭhenkhatin Liansanga chu a mikhualte chanchin lo zawt tawk lah bo lo, Liansanga lah chuan nuam ti takin "Pasalṭha Thansanga fate an nih kha" a lo ti mai zel a, Zehtet khaw mipuite chuan an ngaisang hlawm hle. Zehtet khuaa zan khat an riah leh hnuah Bualthleng khúa chu an pan leh ta a.

Rotlang lamah erawh an khaw pa ram vak haw thei lo chu khawtlangin an zawng mup mup mai a, khawmu chawi anihte ringin a ṭhen phei chuan an hlau a, a ṭhenin sapui kut a tuar a niang tiin an sawi bawk a, a tumah chu a bo chhan dik tak hre hek lo an phek buai mup mup mai a ni. Mizo dan anga ni ruk an zawn hnuah pawh an beidawng zel si, a ni sarihnaah chuan theihtawpin an zawng kual leh a, chutah pawh beidawng takin an haw leh ta a, a ruang atan changel an sat a, puanin an khuh ta ringawt a, mitthi chhungte chu an lung a awi thei mawlh lo. Tlangval ho tlawm la lutuk chu khaw mipuite chuan an lainat hlawm hle a, an theihtawp chhuah mah se an hmu miau si lo, a khuangcher bo tawp bawk si. A tlawm la fal deuhte chu inhawrkhawmin an han zawng ru leh deuh ṭhin tak naa an beidawng hle. Khuma leh Zinga pawh a zawng rei ber pawl an ni nghe nghe. Mahse, a reh hian a reh vang vang ringawt tawh mai a ni. Zan khat chu Khuma nula rîm haw hma chuan Pu Phira mahni chauha khawlaia a tei kual lai chu hmuin "Zahna nei ṭhak lo, mi chhungkaw ṭhen darhtu, mipa mah nise a zahpuiawm hle mai" a ti rilru sap a. A kal pelh dawn lai chuan Pu Phira chuan enge mawni tak hi a thukru zul zul tlata a hriat avangin thui tak a kal te te hnuah let lehin a zui ru leh ta a. Pu Phira kawtchhuah lam pana a kal a hmuh lai chuan zui vatin mahse kawtchhuah a va thlen erawh chuan Pu Phira hmel reng reng hmuh tur a awm tawh lo a, a hmaa an lo hmuh tawhna sawntlung awmnaah khan a han kal leh a, mahse, a hmu chuang lo. Beidawng takin a let leh ta ringawt a. A tukah zingah chuan hmanni lawka an khaw pa ram vak bo ta daih nupui zan lama a daikal zankhuaa a haw theih loh thu an hre leh ta. Pu Sangchhuana chu Lal hnenah zualkoin a makpa bo hnu lawka a farnu neih chhun a bo leh ta mai chu na a tih zia mittui nen a han sawi a, a ṭawngkamah chuan rinhlelh a nei ngei niin a lang. Lal Zabiaka chuan Pu Phira chu a rûka koin a dawp a, mahse, engmah dawp chhuah tur a awm si lo. Mi bo zawn hna chu tlangvalte chuan an thawk leh ta, Khuma erawh a fimkhurin Pu Phira'n a melh dan vêl a ṭang chuan a bitum tur a nih ngei a inrin avangin a fimkhur hle. Ni sarih hnuah pawh an beidawng leh ta, an hmu miau si lo, unaua nula leh tlangval ti a chhiar theih ni ve tawh Pu Sangchhuana farnu fate tan chuan a va na dawn tak em. Khuma rilru chu a hma zawng aiin a hlauthawng tawh a, chu vangin Zinga hnenah Pu Phira a rinhlelh thute chu a sawi ta vek a. Zinga pawh chuan Pu Phira chu a lo enthla fo tawh chu lo niin an unau chuan hma lak dan tur an rel ta a. Zan khat chu Pu Sangchhuana te inah leng lutin Pu Sangchhuana chu muk takin an titi pui a, Pu Sangchhuana chu biak thiam hle a ngai tih an hriat avangin a thin a thawh phuta, a chet buan buan lohna'n fing takin an bia a, an hmin thei hial a ni. A tûk zanah chuan zanriah eikham rualin Zinga chu kawtchhuah lamah a lo va kal vang vang a, Khuma erawh nula rim tura chhuakin Pu Sangchhuana pawh a tei chhuak ve bawk a. Pu Phira pawhin a hmelma pa, amah sawisa hrep tu chutia mahni chauha khawlaia a tei lai chu lo hmuin a zui ru vat a, chu chu Khuma'n lo hmu ru khiauin Pu Sangchhuana tana inralrinna'n vawi thum han kûk deuh raih raih a. Pu Sangchhuan pawhin hrethiam vatin engmah hre lo ang maiin a kal ngaiin a kal mawp mawp a, kawnga a mi tawh lo be remchang tute hnenah chuan a dai kal tum thute chu hrilhin khaw pawn lam a pan vang vang a, khaw dai a va thlen chuan a han ṭhu a, thawm a han ngaithla vang vang a, rei li te hnuah thawm dim taka a lam pana lo kal thawm chu a hre ta a. Thawm chuan a rawn hnaih chilh viau ta maw tihah a mah zawk chu ding chhuak thutin amah vuak hlum tum tu Pu Phira thingfak lek uaih mêk chu a va bawhthlu pawp mai a, rei lo teah Zinga pawh lo lang vatin Pu Phira chu an man bet ta a. Khuma lo thlen ve hnu chuan khaw lam pan puiin Lal hnena thlen turin dim lo takin an kal pui ta hlawk hlawk a.