HNUNG TAWLH NGAI LO MI HUAISENTE - 25

"Hei le naute u, kan sa hliam chu kan chhui zui thei ta lo dêr mai chu a ni a, a hnu a rûk chuk tak tlat siah chuan chhui zui mi a ni lo tih chu kan chiang ṭheuhin a rinawm. Kan kîr leh mai a ngai a ni" titu Pasalṭha Laithanga chu a naute chuan ngui takin an en ṭhap a, ni nga zet kah tuma an veh hnua an kah tâk tumpang chal hliam chu ni hnih zet an chhui hnuah an bo ta daih mai si, a pawi an ti vawng vawng a, an khua Bungtlâng lama haw leh chu an huphurh tlâng kher mai. Chutia lêt leh tuma an insiam fel nak nak lai chuan an lam pana lo ṭawng ri bawrh bawrh thawm chu hriain an ngawi ṭhap a, rei lo têah pawih pasalṭha tih hriat zet zet pathum hi rawn langin an hnungah tlangval sawmhnih bawr velin an lo zui bawk. Laithanga chuan "Naute u, buaina chawk chhuak hmasa zawkah ṭan loh tur, mahse, a ṭul anih phawt chuan a tawp thlen kan inhuam tur a ni" tih pah chuan a bul hnaia lo ding vat, rawlthar, a lo en ruk fo tawh Lianphunga chu a nuih sak a. Pawih pasalṭha ho nen an han indin chilh chiah tihah chuan an huhang chu a na ngei ang. Laithanga chuan "Pu te u, kha khawi lam pan tur nge in nih a?" a han ti a, pawih pasalṭha pakhat chuan meinei deuh tâk hian "Hei, kan han vak thawveng ve anih hi. Lusei nula hmelṭha ho han hruai hawte pawh kan tum deuh a ni awm e" a han ti a, Laithanga chuan "Akhai, chu nangni hnam nen insuihzawmna kan nei thei dawn a ni maw?" a han ti a chu pasalṭha bawk chuan "A, ni mai ang chu. Awlsam tak erawh a ni lo mai thei." a han ti let ve leh a, Laithanga chuan "Chutia duh lo chung han hruaite chu a va ṭha awm lo ve" a han ti lêt sak a, chu pasalṭha pawh chuan zam eih lo hian "I buaina tur a ni lo ve chu lam chu, kan duh chu kan la mai ṭhin. Kan la leh bawk ang" a lo ti let sak a, Lianphunga chu lo ṭawng vein "Kan farnute thlavang hauh chu kan tih makmawh a ni a sin" a lo ti ve sap a, pawih pasalṭha zinga hruaitu deuh ber chu rawn inrawlh vein "Naupang, i nu'n he lai thleng thleng kal a phal ve a ni maw? Puitlingin thil an sawi lai chuan naupang chu lo ngawih kar tur aw" a lo ti a, Lianphunga chuan zam hauh lo hian "Akhai, chu ti naupang awmphung hre lo, puitling titi kara lo inrawlh ve ka ni mai aniang chu" tih pahin amah lo deuhsawhtu chu a han nuih sak a, chutah zet zawng boruak chu a ṭang ru tawh kher mai. Lusei ho chu tlem zawk mah se, an ram chhung anih avangin tawlh mai bîk an tum lo, pawih ho lahin anmahni hlaua thlang tla Luseite chu hneh saah an dah a, an ngam sarh sarh kher mai. Laithanga chuan "Lusei ho hian kan rawn rûn hmasa ngai hauh lo che u a sin." a han ti sap a, pawih pasalṭha pakhat chuan "Dawihzep tihawm tawk lek anih chu, kiang u la, kan kut in tuar lo ang. In kiang duh lo anih erawh chuan in thi vek ang" a rawn ti vawt ta raih mai a, Laithanga chuan an tlem zawk avangin a huphurh hle a, kian mai chu ṭha atih rualin tlawmah a la tlat bawk si, a naute hmel a han en kual a, tumah zam hmel pu an awm lo tih a hmuh chuan a phur thar ta kher mai, "mi huaisen tak tak ka chher chhuak ta, thi pawh ni i la, zahawm takin ka thi ang" ti rilru nauh nauh pahin "Lusei khaw run tumtute hian kan pawi insawi tlat. Kan kiang lo ang" tih pahin a han insiam rem nghal zat a, "Silai in hmet puak anih vaih chuan Lal huaisen Zabiaka khaw ram chinah in awm tih hria u la, a chan chhe zawk in ni nghal ang. Chutiang in duh lo anih chuan chem sen nen mipa fa kan innuai a niang chu" tih pahin a mi lu lak chem chu a han lek kual nghal a, Thantlâng pasalṭhate chuan lusei ho chet dan huaisen tak chu mak an ti hle. Rotlâng khaw ho hriat tir kher lo a, an buaina chu chin fel an duh a ni tih an hriat leh lek phei chuan lusei ho inhmangaihna chu a thukin a ril hlein an hria a ni. Thantlâng pasalṭhate zinga hruaitu ber Bunglala chuan "Lusei lu kan hawn hnem deuh dawn a ni mai alawm" tih pahin Laithangate lam pan chuan hma a hruai ta a.

Tlai ni tla turin kawl a ên sen phût mai a, feh hawte chu kawtchhuahah ṭhu chawlin kawl êng chu an thlîr a, an ri nak nak hlawm a. Chutih lai tak chuan an lam pana tlangval pahnih rawn kal chauh hmel tak takte chu tlangval ṭhenkhatte chuan hmuin an lo nghak ṭhap a, an bul hnai an rawn thlen chuan pem an nei nasain an taksaah thisen a kai nei nuai bawk si a, nula ho chuan hlauthawng dep dep chungin an lo thlir reng a, tlangvalte chuan buai pui vatin tuite an han tulh a, khaw chhung lama hruai luh an tum chuan an duh ta tlat lo mai, Khûmate unau thum feh haw lo thleng ve chuan rawn hmuin Khuma leh Zingate chuan an rawn pan vat a, chung tlangval pahnih chuan "In khaw ram chhungah ngei hian pawih pasalṭhate nen kan intawng fuh palh a, a chan chhe zawkah kan ṭang ta si a, kan pasalṭha thu angin kan rawn tlanchhe ta a ni. Tunah hian an thi vek tawh ngei ang kan ṭhiante chu" tih pahin chau tih hriat takin an thaw hlawi hlawi a, pakhat zawk chuan "Phuba kan la mawlh ang" a rawn tih chhuak hak a, a mitmeng sen ramah te chuan a thinur zia a lang chiang hle. Khuma chuan "Tlangval, in buaina tawhna hmun chu khawi lamah nge?" a han ti a, chu tlangval chuan a thiam dan danin a hrilh a, Khuma chuan "Khurthar lui lam anih chu. Thangbawih lo va haw la, Zinga nen kan zu kal leh ange" tih pahin liam leh mai chu an tum a, mahse tlangval lo awm ve sawm vel lai chuan "Kan lo kal ve ange" tiin an rawn zui ve nghal a. Inbeihna hmun an thlen meuh chuan ruang a tamin lusei tlangval sawm ai tam mah an tlu a, pawih ho chu chutiang zat vêl bawk chu an tlu leh bawk. Ruang chu an han bawihsawm nghal char char a, rei lo teah tlangval tam zawk rawn thlen belhin an Inbeihna bul hnai velah chuan vak kualin hmuh kim loh palh an nei em tihte an han en kual a, lui mawng lam zawhte chuan an thlang lawk lengkir bula tlangval pahnih lo mu reng chu hmuin an zu pan vat a, pawih pa lian pui an zu hmuh chu a lo thi chiang hle a tumpui ni ngei a lang lusei rawlthar tuaitir te chu a pang a han dap kual leh a, a mar lo la phu det det an hmuh chuan zawn chho nghal vatin "Hei, kan lusei pui pakhat a la dam e, khulaiah khuan a tumpui ni ngeia lang pawih pakhat ruang a awm bawk e" an han ti a, Zinga chuan "Rang takin ṭhenkhatin khaw chhung lo va pan pui nghal rawh u" a rawn ti a, pawih ho ruang chu a hlawm a dahkhawmin an hâl ta hmiah a, lusei ho erawh hmun rem laiah thlan thuk taka laiin an phûm vek thung. Zinga leh Khumate chuan a tawpna'n tiin an han vak kual leh a, khua a thim deuh ruai tawh avangin meichher eng takin an chhi bawk a, nichina rawlthar pakhat an rawn hruai chhohna lam chu an pan thla a, pawih pa ruang pawh an seng chhoh tawh avangin a awm tawh lo a, lengkir chu a sang lem lo hle a, a thlang lam pawh a hmuh theih uar uar a ni. Khuma chuan lengkir hnuai a li bul vêl chu a han en kual a, a piah deuh hnim pik zinga mihring ruangam ni awm tak chu hmuin Zinga a kawhhmuh nghal vat a, chian turin an pahnih chuan chu lengkir chu helin an kal ta a. An zu thlen chuan an hmu sual lo hle a, pa pakhat hi a lo bawk rûn mai a, a lan danah chuan inbeihna a thlen laiin a tla anih ngei hmel. Chu pa chu vanneih thlak takin a lo la thi lo hlauh mai a, mahse, a ban ruh dinglam erawh a tliak chiang hle a, a luah hliam na tak a tuar bawk. Rang takin an zawn chho a, khaw chhung lam panin an kal ta a. Hliam tuar pahnih chu Lal inah bawlpuin a vil reng a, tlangval dang pahnihte erawh an ṭha chak hle a, Lal Zabiaka hnenah pawh Bungtlang khua an nih thu leh an tumpang sial kah hliam uma rawn kal an nih thute, a hnu an bo tak avanga an beidawng haw an tum laia pawih ho nen a intawng an nih thute leh an inbakkaih dante chu an hrilh vek a, Lal Zabiaka thin chu a ur ru angreng hle. Pawih hoin a khaw ram chhung ngei a buaina an rawn siam leh lusei tlangval an rawn thah nuak avangin a lung a awi lo hle. "Anih chuan chung ho chu khawi khuate nge an nih in hria em?" a han ti a, tlangval pakhat chuan "Lalpa, chiang takin ka hre lo a, mahse, an pasalṭha khan 'Thantlâng pasalṭha Bunglal-a' tiin a hming a chhâl a ni" a ti a, Lal Zabiaka chuan "Thantlâng khua chu he lai hnai aṭanga Pawih ho khaw hnai ber pawl a ni a, zan nga vêl a hla a ni. An ni khi an ni ngei ang" tiin a tuibur hmuam chu a pik puat a.

Thantlâng Lal Nâwnliana chuan a pasalṭha Châwnṭiala thusawi chu a ngaithla lui hram hram a, a pasalṭhate zinga a rin ber Bunglala a chân ta mai chu pawi a tih rualin a thin erawh a ur hle. "Châwnṭial, ka fapa tân Darzo Lal fanu hruai tûrin ka tir che u a, Darzo chu sawi loh khawi khaw pasalṭha nge pawh inhriat lohte nen inbakkaihin hlawhchhamin in rawn haw a maw?" a han ti zawi sap a, a ṭawngkam chhuak chang tak avangin Châwnṭiala chu a kimki deuh chawih a," Lalpa, phuba ka la ngei ang" a han ti a Lal Nâwnliana chuan vin ṭhatin "Phuba a? Nangni aia tlem zawk lusei ho inbei a, chutah paruk chiah in rawn dam khaw chhuak a, an ni lam pawh relhru bo in awm tir thei lehnghal. Bunglala ruang chu sawi loh Thangtina hliam in rawn zawn haw bawk a, phuba la turin nangma kaihhruaina hnuaiah ka tlangvalte ka tir ang maw? A teuh lo. Zanin la la hian Phungluia leh Puilianate an chhuak ang. Nang chu i nupui bulah lo zu awm rawh" a rawn ti a, Châwnṭiala chu thinrim takin in lam panin a haw ta a. Lal Nâwnliana chuan a pasalṭhate zinga a rin ber Bunglala a chan chu pawi a tih rualin a kal dawn a, Phungluia leh Puilianate hruai duh lova amah zuitu Châwnṭiala leh Thangtinate a hruai zawk vângah a puh vek a, Bunglala chu mawl a ti hle. Phungluia leh Puilianate rawn lut chu lo ko vatin "Kha, Bunglala chu kan chân chu a ni ta mai a, nangni aia a thlan zawk Thangtina lah hliam pui a rawn tuar haw a, Châwnṭiala lah hliam na vak lo a nei nual bawk. Nangni pahnih hi zanin la la hian chhuak u la, Darzo Lal fanu khu ka fapa nupui ni turin ka duh a, zu hruai ang che u. Mahse, Bunglala te khan lusei ho kha an relhruk tir hman tlat a, chu vangin infimkhur erawh a ngai ang, tlangval pawh a tam thei ang ber hruai u la, a ṭul anih phawt chuan lusei khuate chu zu hal darh hmiah hmiah u la, sal rawn hawn ṭeub ang che u"a ti a, Phungluia leh Puilianate chuan phur takin "Lalpa, i thu ang ngeiin le." tih pahin an chhuak nghal a, Châwnṭiala lo ṭhu ngui bar chu meinei takin "Kan pasalṭha hlawhchham chuan hlawhtling taka kan lo haw hun i lo nghah mai a ngai dawn anih hmel" an han ti vel a, Châwnṭiala chuan za vak loa nuih suk pah hian "Lusei pasalṭhate tawhkhirh zia leh an tlangvalte pawh tlangval naran an nih loh zia zu hre ve mawlh teh u" a lo ti duh lek a, Phungluiate chuan chhân chhunzawm tlakah pawh ngai loin an nuih liam san vêl mai mai a. Zawlbuk lamah kalin tlangvalte hnenah lusei ram an dai luh tur thute chu hriattirin mahni in lam panin tlangvalte chu an hmanruate la turin an haw nghal hlawm a. Chutih lai mêk chuan Rotlâng khaw lamah pawh Bungtlang tlangval tam tham takte chu an khaw rawlthar huaisen Lianphunga ho chuan an awm tawh a, Lal Zabiaka'n puih ngei a duh avangin a tlangval sawmthum rual leh Zingate unau chu kal tir ve a tum bawk a, a tuk zinga Thantlâng khaw lam pana chhuak turin Rotlâng khuaah chuan an awm khawm hlawm a, tlangvalte chu an phurin pawih ho han sam vêl chu an chak tawh hle. Pasalṭha Laithanga pawh a kal ve chak hle a, mahse, lengkîr a a tlâkna lama a sawh a ban ruh tliak mai bakah a nâk a sawhna chhung lama hliam na takte, a khel bawr vel na em em maite chuan an khuaah takngial pawh haw tir thei loin Rotlâng Lalinah a tawm chawt reng a ni mai si a, Zînga leh Khumate chu fimkhur tur leh hlawhtling ngei turin a chah mawlh mawlh a. A tuk zingah chuan Lal Zabiaka chuan tlangvalte chu fuihna thu ṭha tak tak nen a thlah liam ta a, thei leh thei loin Laithanga pawhin a thlir liam ve ṭawk ṭawk a, a mitthlaah Bunglala'n lengkir a a tlawh thlak laite, thei leh thei lo a, a inhai chhuah hnua Lianphunga'n Bunglala a lo bei lai a hmuhte chu a hre ruai ruai a, Lianphunga ngaibtuah hle mah se a che thei si lo a, a lu rawn haiin a mit a chhin tir tak hnuah phei kha chuan engmah a hre chhunzawm tawh lo. Lianphunga hliam na em em tuar lo a a hmu leh chu a lawm hle a, Bunglala a thih thu a hriat phei chuan Lianphunga chu a chhuangin a tluk lo ṭan dêr tawh tih chu chiang takin a hria a, chu vangin Thantlâng lam pan tlangvalte pawh a ngaihtuah lo hle a, Lianphunga che tla turte chu a han mitthla a, Khuma leh Zîngate kaihhruaina hnuaiah Lianphunga chu pasalṭha huaisen tak a rawn nih theih ngei a beisei a ni.