HNUNG TAWLH NGAI LO MI HUAISENTE - 27

"Lalpa, Lusei ho chu an huaisenin an tawh a khirh em em a, an hruaitu Zingchhuana inti leh Thangkhuma inti te hmaa ding zo kan awm lo a ni. An hnung dawltu rawlthar huaisen ṭuan rang em em mai a awm bawk. U Phungluia leh U Puilianate ruang pawh hlawm hman loin kan rawn tlan haw a ni" ti a a Lal in chhuat laia inthlahrung taka awm tlangval chu Lal Nawnliana chuan hui pap pap chungin a han melh a, chhan mai dan tur pawh a hre lo a ni. A pasalṭha rinrawl ber Bunglala a chan hnuah Phungluia leh Puilianate a tir leh a, an thih thu bak a hre leh tawh si lo. Thangtina hliam tuar ral rama nawr liam chi a la nih loh bakah Chawnṭiala lahin khatia thinur taka a hauh hrep aṭang khan tlawh chu sawi loh melh pawh a melh chhin duh lo va, a vui rilru hle tih a hre bawk si. "Aw le, ka fapa hlimna ka ngaihtuah luatah ka pasalṭha pathum lai ka chân ta, Darzo Lal fanu chu ṭha takin ka fapa hian rîm se la, a lo duh ve anih tak leh man leh mualte inhlânin kan insuihrem a niang chu. Mahse, tunah tu tu chuan Lusei rama ke hniak hnutchhiah kan tan a hlauhawm a, kan nghah rih a ngai dawn a ni" a rawn ti chhuak sap a. Lal thutlukna khaw mipuite'n an hriat chuan a ṭhen an lawm em em a, a ṭhen erawh an thinur ṭun thung, "hetiang leh tur si te chu a hma khan a fapa tirh chhuah daih tawh tur alawm" tiin a vui ru pawl pawh an ṭhahnem hle a ni. Lal fapa Hungliana rilru erawh a dam mawlh lo, Lal fanu Parchhingi a nei leh rih thei lo tur chu pawi a tiin amah a han chet chhuahte chu a duh zek zek a, mahse, a pa thu ang lo a a chet vaih chuan a tuartu tur chu amah ngei a ni tih a inhre chiang ropui si a, awm hmunah thinrim ṭunin a insawh a insawh mai a ni.

Khûmate haw thu a hriat ruala a thinlung hlim veng veng chu Zamliani chuan thup harsa a ti hle a, a feh haw naupang thusawi a hriat a ni a, a thinlungah a riak nghetin zan lamah Khuma chu lo lêng hram se aw a ti rilru leh vawng vawng ṭhin. A nuin a nîte in lama a tirh pawh chuan a nui chhuak vur vur a, a chhan chu a nite in aṭang hian Khumate in a lan theih vang a ni. Khuma leh Zingate pawh khaw en laia khua an luh avangin hah pawh sawi loin thing eh tur awmte chu an ek nghal mawlh mawlh a, Thangbawihi an lawmte nen an lo lama an feh avangin a nu chu in lamah a lo awm ve thung a, tuisikte pein a fapate pahnih chu chawl hahdam mai mai rih turin a rawn ti ve chhen bawk a, an ni lah chuan a thusawi chu hre awm pawh a awm loin an thiltih lai chu an tihsan mawlh mawlh bawk a. Zînga'n "Khi le, ka nu kan mo tur pawh" a tih rual chuan Khuma leh a nu chu an hawi chho nghal a, Zamliani a nî te ina a lut chu an hmu hman chiah chiah a, Khuma nu chuan "Taite, mo kan va nei hmelṭha dawn ve" tiin Khuma chu a han fiam a, Khuma lah chuan "Ni e maw le" a lo ti duh lek a, a thil tih lai chu dahin Zamliani luhna lam pan chuan a kal ta daih a, Zinga chuan rawn au zui lawm lawmin "Hna laklawh lai taka mi kal san daih le" a rawn ti a, Khuma chuan chhang tawh lem hlei loin a kal san nal nal thung, a awm loh chhung zawngin a rilruah Zamtei hi a awm a, a ngai ve a, biakte pawh a chak ve a ni mahna. Zamtei haw tur kawtkai a Khuma lo ding reng a hmuh chuan a lai lutuk chu hnuai lam melhin a nui sen sen a, Khuma chuan khuh kherh kherh pahin "Kha, i lo dam a maw?" a rawn ti a Zamtei chuan "Dam ve ṭawk ṭawk e, in va hlawhtling maw?" a rawn ti ve a Khuma chuan "Ni e, khuanu'n min veng a, kan chan a ṭha zawk hlauh e." a rawn ti ve bawk a, Zamliani chuan "A lawmawm khawp mai, khawi lamah nge kal i tum a?" a rawn ti a Khuma chuan "Nula hmelṭha hmuh tawh hi chuan kan pan vang vang mai zel anih hi maw" tih pahin Zamtei chu a mitah tak a han en a, Zamtei zak chu a hawi sawn rang hle. "Khatin mi fiam lo teh, tak tak emaw te kan ti palh ange, bakah nangte chu Darzo Lal makpa i nih dawn kha" a rawn ti a,Khuma awm loh hlana a ṭhiante'n Darzo Lal fanu leh Khuma chanchin an lo hriat an hrilh chhawn leh chu a han saw zauh va, Khuma chuan nuih pahin "Akhai, chutiang a han insawi leh ringawt ṭhin chu a, miin tak tak emaw te an lo ti palh ange" a tih lai chuan Zinga chuan "Thangkhûm, rawn haw rawh" tiin a rawn au leh lung lung a, Khuma chuan "Mawl lutuk" tih sup pahin "Anih Zamte, zanriah ei tui phawt aw, zan lamah lo len ka tum dawn nia" a ti a, Zamtei chuan "Aw, nang pawh le, i lo leng ngei ngei dawn nia" tiin a thlah ve ta a. Khuma zu thleng thla chuan Thangbawihi a zu hmu a, "Thangte, in va tlai bîk em em ve?" a ti a, Thangtei chuan "Nia ka u, ka lawmte'n hma min ngaih pui em a, haw ka rawt hnuah pawh haw mai an la duh lo va, chu vang alawm maw le" tiin a lo chhang a, Khuma chuan "I vannei hle mai, lawm fel tak tak i nei a, hei i u Zinga hian lawm tur chu sawi loh rimtur pawh a hriat nek loh hi. Hmuh leh ngai tawh loh tur Bualthleng Lal fanu Vanthangpuii tan a rinawm em em ringawt mai anih hi" tiin Zinga chu a han kap zauh va, Thangbawihi leh a nu chuan rawn chhaih chhunzawm nghalin Zinga pawh a nui ve suk suk a ni.

Zan lamah Lalpa Zabiaka'n Lal mualah mipuite a ko khawm vek a, Khuma leh Zinga chu Lal Zabiaka khawnbawlte kiangah an ding ve ran bawk. Lal Zabiaka chuan an rammutna chanchin Lianphunga'n a hrilhte chu sawi chhawng lehin Zinga leh Khumate huaisen zia chu a sawi mawlh mawlh a, khaw mipuite chuan kut an lo beng dur dur bawk a, Lal Zabiaka chuan Khuma Zinga leh Lianphungate chu chawimawina nopui a hlan hial a ni. Mipuite ṭin darh rual chuan Zinga leh Khumate chu Lal inah lutin Pasalṭha Laithanga chu an kan nghal a, an kal hma ai chuan a lo ṭha chak tawh hle mai a, lal in chhungah pawh a tei ve peih tawh a, mahse, an khaw lama haw tur chuan a taksa a la inpeih loh em avangin a la cham rih a ngai dawn a ni. Laithanga leh Lal fanu Liankimite inmelh dan chu Khûma leh Zîngate chuan an man thian kher mai, Laithanga chu Liankimi hriat phak lohin an han fiam ru leh zauh ṭhin a, Laithanga lahin chhan vak ngaihna a hriat loh avangin a nui leh suk suk ringawt mai zel a ni. A dam loh tirh a ta enkawl tu, Lal fanu fel leh hmelṭha Liankimi ṭhatna te chuan Laithanga chu a hneh hle a, fa nei tawh mah se, iaina reng a nei lo. Liankimi pawhin Laithanga chu a mipa duh zawng a ni tih a pawm thlap a, mahse, a ṭawngkam nem dam thlap leh fiahtak te, amah Laithanga chhungril a awm midangte thlamuanna thlen thei anihna te chuan Ngurzika a hriat chhuah tir lo thei lo a, an ṭawng hmangte, an ziate a inang em em mai a, chu vangin Laithanga hmuh lohah Liankimi chu a ṭap ru fo a ni. Laithanga'n a hmangaih thu a hrilh ṭum khan a ṭah khum ringawt a, hrilhhai zetin a siam anih kha, a hnuah a inthiam lo hnuhnawh em em bawk. Laithanga tana a thinlung hlan chu harsa a ti hle a, a chhan chu Ngurzika thlarau a zah vang a ni. Chutih rualin a fapa, nausen Ngurliana a han ngaihtuah a, pa tel lova a seilian mai tur chu a ngaingam leh bawk si lo, Lal tupa niin miin an nel a, amah ber ber pawhin a pawm chang lo ṭhin, mahse, a rawn puitling anga, pa a rawn awt ve dawn tihte chu a hre chiang hle. Zan khat chu a fapa mu ṭha duh lo chu awiin a buai hle a, a nu leh pate mu tawh chu tihharh loh hram a duh avangin thawm pawh a dîm hle. A fapa a muhil ṭan ta maw tihah Laithanga mutna lam chu a va hawi a, amah a lo en reng a hmuh chuan a nuih seih ringawt a, a fapa chu khumah a han mut rem a, Laithanga hnenah chuan va kalin "I mu thei nange, na i nei a mi?" a va ti a, Laithanga chuan "Nei lem lo e, i buai si a, puih che ka duh viau na a, ka pui thei si lo che a" a lo ti a, Liankimi chuan "A ngai reng reng hleinem, i dam anga, min la pui zawk dâwn nia" a lo ti a Laithanga chuan "Liani, i hnena ka thusawi kha i la hre reng ang tiraw? Kei chuan i chhanna ka nghak a sin, a ṭha lam emaw a chhe lam tal pawh ni se" a rawn ti sap a, Liankimi chu a inngaihtuah nasa hle, Laithanga hi mi ṭha tak a ni tih pawh a hria a, a nu leh pa pawhin makpa atan an duh ngei a ring bawk. A han inngaihtuah vang vanga, a tawp a tawpah chuan "Ka hria alawm. Ka chanchin zawng zawng i hre vek chung pawh a min la duh hi ka lawm lutuk a sin. I thutak takzet a, min bum dawn lo anih chuan ka inhawng e" a rawn ti ve ta a, Laithanga chuan lawm takin "Liani, ka bum hauh lo ang che. Ka dam veleh ka haw anga, i pa ka rawn be ngei ang tih ka tiam a che" tiin Liankimi chu a han kuah a, Liankimi pawh hun rei tak hnuah thlamuang takin Laithanga awmah chuan a bei ve leh ta a. Chutih lai tak chuan a fapa chu a rawn ṭap leh ta, an in en a, an nui suk a Liankimi chu a kal hrang ta a.

Bungtlâng tlangvalte chu a tukah chuan an khaw lamah Lianphunga hovin an haw leh ta a, Laithanga pawh zawn haw duh mah se, an zawn sil vek ang tih an hlauh rih avangin ni rei lote nghah rih an tum a, an khua a inhlat lutuk lo bawk nen inkal pawh a harsa lo va, chu vangin a taksa a chak leh zual deuh hun nghah an ti tlu ta a ni. Hun a liam a, Khuma pawh hmangaihna in a zêm â zo ta tih theih tur khawpin Zamtei te inah chuan a leng zing a, thing phurhnaah lah an inzui tam hle, khawtlang hriat hial an lo ni chho a, inhmeh titu an tam rualin Zamtei thiktu an awm ve nuk a ni. Khumate ang tlangval to chu tu nula pawhin an duh ruk vek an ni a, chu vangin Zamtei chu an thîk lo thei lo a ni. Laithanga pawh a taksa te a rawn chak deuh takah chuan an khaw lamah an haw pui ta a, Liankimi chu ruak deuh huaiin a inhria a, Ngurzika pawh Laithanga bula a awm chuan a theihnghilh châng a tan hle, mahse, a thinlunga Ngurzika'n hmun a chan tawh hi midang chan a tan a phal lo a, Ngurzika dinhmun a thinlunga awm hi tumahin an luahlan a phal ngai dawn lo thung. Lo lam hnate chhunzawmin Khuma leh Zingate pawh an buai ve nak nak a, Thangbawihi lawmte zingah a changin an han tel ve leh zauh ṭhin bawk, an taimain an thawk chak bawk a, lo pawh an khuaah a zo hma pawl an ni leh a, ei sen loh an thar nghe nghe. Chu veleh awm awl mai mai loin a thawkmawh chhungkuate chu khawtlangin an puih hmain an thawh pui leh char char a, midang lo zo tawh apiangin an lo zawm ve zel bawk a, tumah zo har bîk pawh awm loin an tawp an khar thei a an lawm hle. Favang awllente a rawn thlen takah chuan ram lamah mipa ho chu sa chang turin an liam leh sap sap tawh a, Khuma leh Zingate erawh Pasalṭha Hlawna'n a khuangchawinaa tel ngei tura a rawn chah avangin kal ve ngei an tum a, an kal hma zana Zamtei te ina Khuma han leng chu Zamtei hmelah thil dik lo a awm tih hriain leng hawn ar a khuan hnuah pawh a la ṭhu tlat a, tlangval dang an chhuak zo ta maw tihah Zamtei chu a ngawi ta tlat a, a bul chêt a va ṭhut pahin Khuma chuan "Zamte, i hmelah dik lo a awm tlat. Han sawi teh" a ti a Zamtei chuan "Dik lo a awm pawh ka lo hre hleinem i ngaihdan mai mai aniang" a lo ti a, Khuma chuan "Zamte, kan zin chhuak tur hi i lungni lo deuh a ni lo maw?" a han ti a Zamtei chuan "Eng vang ngawt chuan maw?" a lo ti a Khuma chuan "Akhai, a hma a mi thusawi mi fiamna'n a i hman kha i la hre reng ang che" tih pahin a han nek deuh salh a, Zamtei chuan "I hriat reng chu, enga mi zawh chhen?" tih pahin a rawn melh rawm rawm a, Khuma chuan nuih suk suk pahin "Zamte, Partei nen khuan tleirawl, rawlthar at laia intawng mai kan ni a, tun hnuah engmah keimahah a awm tawh lo. Nang chauh hi ka thinlung neitu i ni tuh chu chiang takin i hriat kha. Kan dam anga, run hmunah kan la leng dun ngei ang tih hi ka ring tlat a sin"tiin Zamtei kut chu a vawn sak a, Zamtei chuan "Khuma, ka ring che tih i hriat kha, mi ti thlawn lo hram ang che" a rawn ti sap bawk a, Khuma chuan Zamtei chu duat taka kuahin a samah a chul sak hliau hliau a. Khûma'n thawm dim taka bawhbel a rawn bawh liam lai chu Zînga chuan a lo hmù ru kar a, Khuma a bula a rawn mut rual chuan a beng bulah "Kawng laka i zawi viau chuan ka nghak hlek dawn lo che a nia" a va ti sap a, Khuma chuan "Mu mai mai teh Zînga" tiin lehlam a hawi san hmak a.

Pasalṭha Hlawna'n Khumate hmel a hmuh chuan a lo lawm hle mai a, "Kha, Ngura thih thute ka lo hria a, pawi ka ti khawp mai. Lo kal ve thei phei se la ṭha tur. Mahse, nangni tal in lo kal a, ka lawm khawp a nia" tiin a lo be lumlam vat a. Zanriah eikhamah Lalin a rawn koh avangin Khumate chu Lal in lamah an kal a, an han thlen chuan Darzo Lal chuan a lo lâwmin a fanu chhanchhuaktu an nih kha a la hre reng a, chu vânga ko pawh a ni. Khuma chuan Parchhingi'n a rawn melh leh zauh zauh ṭhin tih chu hre mah se, a melh let ve lem lo a, mahse, an intawn hmasak ber laite, a hnua hmangaihna an inkara a lo pian chhuah dante chu a hre chhuak uai uai a, tunah chuan nula tlangval tak tak an lo ni ta.
Khuangchawi ni chu a ropuiin khawtlangin ruai an ṭheh a, pasalṭha Hlawna pawh chumi ni chuan khaw mipuite'n an chawimawi thiam hle. Zan lamah nula tlangvalte chu an chai mup mup a, Khuma leh Zinga pawhin nuam an tiin Zinga phei chu an khaw lama nula lama mit hlei lo tâk ni si kha khual khuaah chuan a danglamin nula pawh a kuah kual hnem kher mai. Ṭum khat phei chu nula pakhat a bo pui vang vang nghe nghe. Khuma lukai deuh pawhin rik hut hut reng chu ningin hmun fianrial deuhah a kal a, a hnung lama zuitu an awm tlata a hriat avangin a han hawi let a, Partei a lo ni reng mai, "Partei lah ni rengin khawi lamah nge kal i tum a?" a va ti a Partei chuan "Khuma, thil sawn dun lawk ang hmiang" tiin hmun fianrial lam an pan a, Khuma chuan a awm ngheng a Partei thusawite chu a ngaithla a, 'ka rilru chuan' Khuma a tlai ve ngai lo, a lo thleng hman em em ang'a ti ṭhin a, mahse, lo lan tikni reng i nei ta si lo. Ka nu leh pa lah chuan ka pasal atan ka inlengpa chu an duh tih ka hre chiang a, min nawr lo mah se an hmelah a lang vek a ni. A tawpah ka beidawng a, aw ka lo pawh ve ta mai a ni. Ni rei lote hnuah chuan mi nupui ka ni tawh ang. Vawi khat tal hmuh leh che a, i kianga awm hi ka duh ṭhin lutuk a sin. Mahse, i reh ta vang vang mai si a" a rawn ti chuai raih a, Khuma chuan hrehawm a ti rilru hle a, sawi mai tur pawh a hre lo a ni. Partei bawk chuan "Nang pawh nupui ṭha tak nei la, mahse, min lo hre ve reng ṭhin rawh aw. Ka theihnghilh ngai lo ang che. Ka tan a mipa hlu ber i ni reng ang ka pa tihlohah" tiin Khuma awmah a hmai chu phumin a insut hraih hraih a, Khuma chuan "Parte, ka thiam loh vek a ni. Ka tlai ta si a, mahse, hnual phahna'n a hmang loin mo ṭha tak ni turin i rilru kha i siam fel dawn nia" tiin Partei chu a kuah a, an han awm dun chiah chuan Partei a lo ngaih ṭhin ziate pawh a hre chhuak uar uar a ni. Hmun fianrial a awm an ni a, ti buaitu an awm lo bawk nen chutia pangtilum inngheng tawn reng chuan an thisen a rawn ti lum a, Partei na ti rak deuh ṭhawtte chu Khuma bengah a chiang hle. An zawh fel hnuah chuan a hranga kalin midang awmna lam an pan leh ta a.