HNUNG TAWLH NGAI LO MI HUAISENTE - 18

Zingkâr hma taka tuikhur lama nula inhau thawm chuan tui thal tum nula dangte chu a ngawih tir ṭhiap a, "Thangi, i unaute vânga kan chunga lêng anga i inngai anih chuan zak hle ang che. Hmeithai fa ve mai inih kha, ka tui mi thal sak kha i tan thil harsa a ni hauh lo" ti a hmusit em emtu Chhuanmawii chu Thangbawihi chuan a haw hle a, hmeithai fa anih avanga a nulat hnu thleng pawha chhaih nawmnah a han hlawh ta mai chu nâ a ti hle. A mittui erawh luan tir ai chuan thih a duh hial zawk avangin a mittui chu far khat pawh a far hauh lo a, Chhuanmawii chu a haw hle a, mahse, a thinrim em avangin ṭawng chhuak tur pawh a awm lo a, a khur hlawk hlawk ringawt mai a ni. Chutih mêk lai chuan thawm dang lo awmin "Kha in thawm a va ṭha ve" rawn ti tu lam chu an hawi rual ṭhap a, Chhuanmawii chu Lal fanu Liankimi hmel a hmuh rualin a awm dan rang taka siam rem nghalin "Aw haw, U Liani chu kha, i dul pawh a lian ve ṭan tawh anih kha, hawh teh i tui ka lo thal sak ang che. Hei, Thangtei thal zawh hun nghah pahin fiamthu nen kan lo ri hlut mai alawm maw le" a han ti nghal zat zat a, mahse, a rin loh tak maiin Lal fanu Liankimi hmelah chuan hlimna a hmu hauh lo, chang fek fawkin "Engkim ka hre vek, Thangtei hi ka laizawn a ni a, Khuma leh Zingate hi ka nuṭate an ni bawk tih hria ang che u." tih pahin a tui um ken chu a thal ve sawk sawk a, "Thangte, i haw rual teh ang" tiin thinrim hmai sen vek khawp a lo ding Thangbawihi chu a kal pui ta daih a, an liam fel ta maw tihah Chhuanmawii chuan "Lal fanu ni lo se chu a chak lo khawp ang. Khatiang Pasalṭha satliah pakhat laka inphal rai mai mai leh nghal" a han ti hlak hlak a. "Lal fanu ka lawm lutuk e" ti sap tu Thangtei chu Liankimi chuan a han en vang vang a, a bianga mittui luang zawih zawih chu hruk sak pahin "Thangte, Lal fanu tiin min ko tur a ni lo, i duh duh danin min ko thei e. I nuṭate hi ka hmangaih berin a ngaih hlut em emte an ni a, chu vangin ka thlahthlam ngai lo ang che u. Mahse, tukin a thil thleng kha chu zêp tlat rawh aw, Chhuanmawiite zawng a pa khawnbawl upa anihna avanga chapo mai mai anih hi hre tlat la, heng mite hi mi khawngaihthlak tak an ni tih hre tlat bawk ang che. An lainatawm a sin, pa ṭha tak, khawnbawl upa ni phak hial pa an nei a, an chapo pui em em a, an pa zahawmna leh an unau zahawmna an ti bawrhbang mai mai a ni. Mahni nu leh pate mi lenna hmachhuan a chapo ve ringawtte hi chu a rukin miin an nuih fo a nia" a han ti sap a, Thangtei chuan "Ni e, ka sawi chhuak hauh lo ang, keini tan chuan khin phak rual an ni si lo a" tih pahin a han insut ri faih faih a, Chhuanmawii hmuha mittui tih tlak duh hauh lo tu khan amah ṭan tlat tu leh a thlavang hauh saktu a neih takah chuan a mittui chu a dang zo ta thlawt lo a ni. In an han thlen chuan Thangtei chuan a nu ei rel chu pui nghalin engmah thleng lo angin a awm nghal vat a, Lal fanu Liankimi erawh in a thlen rualin tuikhur a pan lama thawm a hriatte leh a ngaihthlak ruk thute, a thinrim em avanga a inrawlh thute chu a pa bulah a sawi nghal vek a, a thusawi hre pha tawk chiaha rawn lut a nau Saichhûnga chu a thin a ur nghal hle,"Ka pa, an ni unau khu ka ṭhiante mai niloin ka unaute anga ka en an ni a sin. An ni unau hmusittu chuan min hmusit a ni. Tih tak emah chuan Upa Luaiate ai thlawt chuan buh pawh an thar tam zawk ngei ang, an thawkrim zawk a sin, khawnbawl upa fa an nih ve loh vanga hmuhhniam tur an ni kher em ni? Hmeithai fa an nihna khu phawrh chhuah sak fo a ṭul em ni? "a rawn ti hlak hlak a, Lal Zabiaka chuan a tuibur al hmuam lai chu pik puat pahin" Liante, mi buaina a lo inrawlg hi a ṭhat loh rualin i thil tihah ka dem hauh lo che. Mahse, a langa ṭan zawk nei loin remna i siam zawk tur a ni. Saia i la nau deuh a, i rilru put hmang pawh ka hrethiam e, mahse, in unau inrawlhna tur a ni lem lo e. Ka khua leh tuia Lal ber ka nih angin keima'n ro ka rel ang. Ka khuaah hian pachhiate leh hmeithaite an tê bîk ngai lo ang. " tih pahin tlangaupa lo lut hlim nen chuan an inzui chhuak leh nghal a. Zawlbûk lamah kalin zam lama upa hoin ro an lo rêl tawh ang te chu amah ngeiin a zu thlen ta a.

Rotlâng tlangvalte chuan lo zawh vat vat an nghakhlel hle, a chhan chu an Lal leh upate'n Sai ram chhuah an rawt miau vàng a ni. Pasalṭha Ngûrzîka awm tawh lo mah se, anmahni ho khawm tûrin Val upate leh Pu Muandawka an la awm ve a ni tih an hre ṭheuh bawk. Khuma leh Zinga pawh kal ve ngei tumin an inbuatsaih sauh sauh a, lo lamah pawh a hma aia rim zawkin an thawk a, lo zo har bik nih hlauin an ṭang nitin ṭhin a ni. Chutianga an beih tlauh tlauh takah chuan mi nawl pui zawh rualin an zo fel thei ta a, an chak dun bawk si, an thawkrimin an taima dun bawk nen an khuaa buh ngah berte zîngah an tel ta dêr mai a, an lawm chhungkua hle. Lo an zawh hnuah pawh awm mai mai ngawt loin a hnu fual bîkte chu an pui leh char char a, an vaia an zawh fel hnu chuan ram riak tûrin an inpuahchah ta a, chhûn lamah silai mute dêngin a kahte an han zir leh rih ṭhin, zan lamah erawm Sai ramchhuahna a awm dan tur an hriat belh theihna'n Pu Muandawkate in lamah an tei lut deuh reng thung. Saichhûnga pawhin kal ve ngei a tum ruh hle a, a ṭhiante pahnih nen a han chet tlat vêl a chak tawh hle. An han inbuatsaih tlauh tlauh takah chuan an hun tiam ni pawh a hnai zêl a, an phur kher mai. Mahse, tlai khat chu vanduai thlak tak maiin an lui kal haw lamin duhlian ṭawng thiam lo, ramhnuai pasalṭha an tawng ta tlat mai. An chhak deuh lawkah kalin a thing ṭang rah tliak rite chu an hre zêl a, mahse, hlau hmel an pu hauh lo a, an inring tawk hle. Mahse, mak tak maiin chu ramhnuai pasalṭha chuan khaw dai thleng zuiin a kian san leh mai bawk a, mak an ti letling zawk phian. Chuta chin chu ram lama an chhuah apiangin sakei thawm an hre ziah a, mahse a rawn ti na ngai hauh lo chu mak an tihna ti zualtu ber a ni.Mahse, inventhawnna'n hrim hrim tiin Lal hnenah an thlen vat a, Laloa chuan ṭha a tih anga lo thlak danglamin mipuite hnenah Khûma te thil tawn sawi lang loin  fimkhur taka awm reng turin a chah hlawm a.

Zan a ral a, hun a kiam zel a, an ram chhuah ni tur pawh an thleng ta der mai. Pu Muandawka chuan hma hruaiin an liam zut zut hlawma, nileng deuhthaw an kal hnuah an tumna hmun ngei chu an thleng ta. Tlangval ho chu tlawmngai takin an che nghal zung zung a, a zelthel pawlte a tihmawh pawlte awm loin kar loah an ni tlangval sawmhnih rual leng tawk buk chu an sa zo ta der a, zanriah hmeh tur zaenga chhuakte an rin aia an rawl hlawhtlin avangin sakhi tuai chek dul hmul puarin an lim ta nghek mai a.

Pu Muandawka chuan a tlangval hruaite chu thu ṭha tak takte hrilhin Hei, nakin lawka kan khaw innghahna la ni mai tur in nih avangin huaisen takin in awm tlat tur a ni. Naktukah kan che chhuak ṭan dawn nia. Kan kal thui si a, kan chau tlâng awm si a, mut lam i âm teh ang u" a tih zawh rual chuan thuawih takin tlangvalte chu anmahni mutna tur ṭheuh lam panin an kal nghal sang sang hlawm a. A tukah chuan pawl hnihah insem darhin Pu Muandawka pawlah Zînga a  awm a, pawl dangah Khûma leh Saichhûnga an awm ve bawk. Ti chuan an kal dan turte sawi felin an vak darh ta a. Chawhma chhung zet Khumate an vah hnu chuan an duh ang ngei chu an hmu ta, a hnu a ṭang rêng pawhin a lian hle ang tih chu hriat sa a ni. An han chhui zui leh ngar ngar a mahse, khúa a tlai ṭan tak avangin buk lam an pan leh ta a.
.buk an va thlen chuan Pu Muandawkate pawh lo thleng tawhin an hlawhchham thu leh Sai hnu an hmuh chhunte pawh a hlui zia an lo hrilh a  Khuma chuan an thil hmuhte chu hrilh vein a tûk an awm dan tûr an ha. Rêl leh a, chutah a ngai ang bawka vah darh leh chu an ti tlu ta a. A tuk zing a lo thlen a Pu Muandawka a harh meuh chuan tlangvalte ei rêl ri nak nak thawm a hre nghala, a hnarah chuan sakhi chek rim a rawn nam ram ram ṭhin a, a naute chu a chhuangin fel a ti hle. Tukthuan an han kil zo a, an awm dan turte sawi chiangin an vak darh leh ta a Khuma te pawhin an hnu chhui lai an chhui chhun zawm leh nghal a, vawin lamah chuan hlawhchhama haw an tum tawh lo hle. Chawhma chhung zet an chhui leh hnu chuan an hnu chhui lai mêk chu an tawng ta hlawl mai le an piah lawk Sai lian tha tak mai chu silai nei palite chuan an han ti vang vanga, chutah an han kap rual ṭhawt maia, chu Sai thinrim tâl vêl chu a nasain a rapawm lamah a kal hial zawk a ni. Chutia mu leh mal pawh nei loa a tal chiam chiam lai chuan silai vawi hnih a rawn puak leh ṭhawt a, chutah zawng chu sai chu awn ruai ruai chungin a thinur chuan thawm a rawn chhuah leh hrawih hrawih ṭhin bawk. Khûma chuan "Saia, kal rawh le. A hnuk va chhat rawh le." a han ti a, mahse, Saichhunga chuan "Ni lo e, nangmah zawk hianin a hnuk i chhat ngei tur a ni." a lo ti tlat bawk si. An han inhnial leh rap rap ṭhin bawk a, a tawpah ṭawngkam thiam lo zawk Khuma chuan chu Sai meng rual rulh rulh thinrim tih hriat taka mit sen rûm chu hmun leh hmunah a han kap dur mai a, chuah a ke ding lama Sai tlawhchhan pah chuan hlado a han chham nghal vang vanga, chutah silai zen hlang chu kap puak durin midangte chuan an lo zawm ve bawk a, an hlim tlâng hle. Lal fapa Saichhûnga chu rawn chhua vatin Pu Muandawkate lama kal turte tirin an ni'n Sai sa chu an lo chan thung dawn a ni.


Tlangvâl sawmhnih rualin an han chan rawn tâkah chuan khaw thim rualin bûk an inthlen fel thei hram a an hlim dar dar hle. Khûma pawh tunah chuan pasalṭha a chhiar theih tak a ni ve dawn ta. Tlangvâlte chung en a nih tawhna bakah tunah an hlawhtlinna thlentu a ni leh zêl nen Tlangvâlte ngaihsan a hlawh nasa zual hle. Zanah chuan tlangvaltd chu inmen chhawkin Sai sa chu an rep far tluk tluk a, a meng apiangte'n rêp pahin a sa chu a han hmawm leh zauh ṭhin a, men rei man a awm ṭhin hle. A tukah pawh an duh ang tawka an la rep loh deuh avangin chawhma chhûng an han rêp leh tluk tluk a, ti chuan chhun chawfak zawh rualin an han insiam sawk sawk a, an inpeih fel rualin khaw lam panin an kal ta a. An phur a rih em avangin an kal chak thei lo a, kawng laka zan khat an riah hnuah nileng deuh thaw a kal lehin ni suk chen vêl a nih laiin thlan tla phungin kawtchhuah an thleng thei ta hrâm a. Rei lo te ṭhu thlandaiin Khuma chuan hlado a han chham leh vang vang a, a silai chu a han kap puak dur mai a, chutah midangte chuan lo chhawn ve vatin silai a inlawn ut ut mai a, khaw mipuite chu rang taka lo pungkhawmin Khûma sa kah ngho chu an han en a, tu pawhin ropui an tiin Khûma chu an ngaisâng hle. Lal Zabiaka meuh pawh kawng lakah an tawk hial mai a, a ni pawhin Khûma Sai kah ngho sei ṭha tak takte chu a han entawn sek a, chek tlak tlak pahin, "ropui takin kan lawm ngei ang, tiang reng renga Sai ngho ṭha hi ka la hmu hauh lo" tih pahin Khûma chu a chibai nghal a. Lal tual an han thlen chuan Lal Zabiaka chu a luhkaah lawn vatin a kiangah a fapa Saichhunga chu a han ding ve nghal vat bawk a. Chutah Lalpa chu rawn ṭawngin "Aw le, kan pasalṭhate ram chhuak an hlawhtling hle a, Sai ngho ṭha leh ropui tak an rawn hawn a ni. A lawmna kan nei ngei ang. Naktukah hian awm ni khamin a lawmna hun kan hmang anga, zan lamah pawh kan lawm chhunzawm zêl ang" a rawn ti a, chu veleh mipuite chuan kut an lo beng dur dur a. Lal Zabiaka chuan rawn zap daiin "Le, he Sai hi engtia kah nge anih ka hre duh a ni. Tunge min chhang dawn?" a han ti a chu chu mipuite nghahhlelh leh hriat chak tak a ni. Lal fapa Saichhunga chu rawn kal vatin "Aw le, keimah ngei hian kan sawi ange. Pa Muandawka leh tlangval sawm an kal hrang a, keini Khûma hoin kan kal hrang thung. Engkimah Khûma hi kan hruaitu a ni a, ni khat vêl lai he Sai hnu hi kan chhui hnuah kan tawng ta a ni. Khûma hi awm lo se la chuan buaina kan tawk ngeiin ka ring. Mahse ruahmanna fel fai tak a neih hlauh avângin kan zinga silai keng palite'n he sai hi kan kah rawn ta a ni. Kan zinga hruaitu nih tling leh mi huaisen tak anih avangin Khuma hi a hnuk chhat tu a ni bawk e. He sa ropui tâk kaptu hi Thangkhûma ngei a ni e"a rawn tih chuan mipuite chuan kut an beng dar dar a.