HNUNG TAWLH NGAI LO MI HUAISENTE - 24

An tlangvâlte ruang bawihsawma an chet sung sung lai chuan Zînga chuan "Nang hi, ka nu'n kal a phal ngawt a mi?" tiin Khuma chu a han en ha a, Khûma chuan "Dam leh tlang khatah, thih leh ruam khatah tiin hei leh chen hi kan thleng tawh a, hetiang pem satliah vanga in a lo awm ka duh teuh lo mai" tiin Rotlâng tlangval ruang pakhat chu a pawm sawn nghal a, Zînga chuan a piah deuh a Tlanruma ruang an lo mut chu va pan hnaiin "Ṭhiana, kan intawng har mah mah a ni tiraw? Pialralah khan ka nu leh pate i hmu anih chuan ka hmangaih zia hi min lo hrilh sak dawn nia aw" a ti sap a. Khûma chuan Pasalṭha Ṭawkliana lu chu a lak chu a ngaihtuah zui vawng vawng a, a thih dawn a "Khuanu'n malsawm che rawh se" a tihte kha a bengah a ri nawn awn awn a, pasalṭha huaisen tak lu la thei tu a ni chu mak pawh a inti zawk hial a, a pasalṭha thah tur ngeiin khuanu malsawmna a dil sak te hlei hlei chu a lawm rilru hle. An inpeih fel meuh chuan khawfing chah a hnai thuak tawh a, Pasalṭha Sangliana pawh thisen a hloh hnem deuh avangin a chau tawh hle, a naute'n han kuah an tumte chu duh loin pasalṭha takin hma hruaituah a ṭang lui hram hram a, mahse kawtchhuah an thlen meuh chuan a tlin ta lo, a ban bul kak aṭanga thisen chhuakin tawp zai a rel theih mang si loh avangin a lu hai chu tlu ta a, Ruala leh Zarunate chuan rawn buai pui nghalin khuaah chuan an zawn lut ta a. Rotlâng khaw mipuite zingah chuan hlim tak tak an awm laiin lungngaia rûm kawk kawkte pawh an awm a, an unaupa, an fapa, an pate thihna chuan chhungkaw tam tak a rûn a, ṭahna mittui a luang nasain, chung mite tán chuan inrûnna hian rah ṭha a chhuah lo hle. Mahse, an khaw tana nun hlantute an nih miau avangin khawtlangin an hnêm a, an lunglen khawhar zai rite chu hlimna nui ri a thlakthleng tumin Lal leh upate chenin an che chhuak a ni. Pasalṭha Sangliana'n ziaawm lam a rawn pan hnu chuan Muallianpui tlangval la dam an hrênte chungthu chu na han ngaihtuah tlâng ta a, tlangval pahnih haw tir a, silai fung nga a an vaia rawn tlan chu an rem ti tlang ta a. Muallianpui tlangvalte'n chung thu an hriat chuan an lawm hle, an zinga haw tur an rawn thlan chhuahte chu hmanhmawh takin an khaw lam pan turin an kal a, Khuma chuan Pasalṭha Ṭawkliana thuchah kha hre rengin a lu chu a pe a, "Kawng laka a ritsak deuh emaw a nam hman anih chuan a lu vun leh a beng in keng mai dawn nia. Mahse, ama min ngenna ang ngeiin a lu hian a nupui hnen thleng ngei se tih erawh ka duhthusam a ni e" tiin a chah thlap bawk.

Muallianpui Lal Vandawla'n a tlangval pahnihte hmel a hmuh chuan chek tlak tlak chungin "Ngam loh chalah chil kan hnawm zu nia le, Ṭawkliana lu la tu tlangval chu hmuh ve a chakawm hle mai, a lu vun leh a beng kha a nupui hnen thleng ngei rawh se, tunah la la hian tlangval tirh tur tlangaupa nang zu zawng ta che" tiin a tir nghal a. Lal in a a khawnbawl awm ve te hnenah chuan "Lal Zabiaka thu chu engtia han bawh zui chi nge ni dawn? Silai fung nga kan pek chuan kan khuaah hian silai a tlem tawh khawp ang. Chutih rualin a thil phut hi ti hlawhtling lo ta i la, kan tlangvalte an thi emaw sal atan an chhawr ringawt mai dawn si" a han ti vang vang a, chutih lai tak chuan Pu Phira nupui kha rawn ṭawng chhuakin inthlahrun hmel tak hian thil a rawn sawi ve a, "Rotlâng Lal fanu saw tunah a rai puar mêk anih loh pawhin fa a hring hlim hlawt a ni ngei ang. A ni saw kan ruk chhuah theih chuan a thil phut let atam hi kan phut theih ka ring" a rawn tih chuan Lal Vandawla chu a nui leh ta vur vur lai a, a luhka rawn chuangkai a, a kawngkhar rawn hawngtu Pasalṭha Duailova hmel a hmuh chuan mak ti zetin "Ehe, Duailo i la dam a ni maw? Ka hmu leh che chu ka va han lawm em." tih pahin a han ding nghal a, Pasalṭha Duailova chuan "Lalpa, kei pawh ka lawm. Lal Zabiaka ṭhatna avang liau liau a la dam ka ni e. Lalpa, i inchhungah hian mi tenawm leh dawheh tak a awm hi pawi ka ti. A bumna thangah kan awk a, kan tlangval tam takte'n an thih phah lehnghal" tih pahin bang laia chem inthiat chu a han pawt phawi sawk a, chutah Pu Phira nupui chet dan zawng zawng chu a sawi ta a, Lal Vandawla chuan thinrim takin "Hmeichhe bumin maw ka awm a?" tih pahin Pu Phira nupui chu a beng thal ṭhuai mai a, Duailova chuan "Lalpa, ka kutah dah rawh." a lo tih chuan a bûk khum nghut a, Duailova chuan thinrim takin Pu Phira nupui hlau khur der der chu pan hnaiin "Tlangval, zahngai zahngai" ti mah se, awm zia a awm tlat lo, nunna tam tak amah avangin an chân si. Duailova thinrim lutuk chuan Lal in chhung pawh zah zo lovin chu nu lu chu a han chhawk hmawk mai a, Lalnu leh a fanute chuan an rapin an lo inhup chawih chawih mai a ni. Lal Vandawla thinur lutuk chuan "Keimah ngei hian ka tlangvalte chu ka hruai dawn a ni. Naktukah Rotlâng lam panin ka kal ang" a rawn ti charh charh a, a upate chuan "Lalpa, i kalna apiangah kan zui ang che" an lo ti ve bawk a.

Tlai ni tla turin kawl a en sen phût mai a, khuanu thil siam sava chi hrang hrang hram thawmte leh thereng kiu vawng vawng rite chu bengah a châm vawng vawng a, leilung ri mawi chuan lunglai a luah hneh hle. Khûma vâk vêl pawhin a ngaihtuahna a kawm nasat luatah a hmaa nula lo kal mêk chu hmuh pawh a hmu lo a, an inpelh fel dawn a "Khuma vawng vawng chu aw" tih ri a hriat rual chuan inngaihtuah harh zawkin amah pel fel chiah tu nula chu a han melh lêt a, an khaw nula hmelṭhate zînga mi Zamliani lo niin Khuma chuan "A, Zamtei chu i lo kal lai awm reng reng pawh ka hmu hleinem" a han ti a, Zamliani chuan "Hmu rêng nang aw, khawi lam nula hmelṭha emaw chu i ngaihtuah chiang a ni" a lo ti ve a, Khuma chuan "Teh suh ei, chutiang han ngaihtuah tur pawh kan hmuh zawh ve loh hi" a lo ti ve a, Zamtei chuan "Akhai a, i lo la len miah loh danah hian a hriat vek alawm. Khawi lam veng nula hmelṭha tak ni ang maw" a lo ti ve bawk a, Khuma chuan "Akhai khai, chutiang zawnga i ngaih dawnte chuan ka lo leng anga, khawi lam nula hmelṭha mah ka hmuh zawh loh zia chu i hre mai ang" tiin an inkal san ta a. Khuma hian Zamtei chu a hre chiangin an naupan lai aṭang tawhin a hre tawh a, Thangbawihi nen pawh an inkawm ve zauh zauh a ni. Naupang fel tak a ni a, naupang dangin hmusit taka a nau an chhaih laia kawm ṭhintu a ni a, an in awmna a inhlat deuh avangin tun hnu chhungkaw tana an ṭangkai ve tak chinah hi chuan an inzui ta lo hle a ni. Thangbawihite aiin u hret mah se Khumate erawh a rual pha lo chiah chiah thung a, a mizia a puitlingin amah a hmelṭha bawk nen an khuaah chuan inleng ngah berte zing a mi a ni a, a pasal nih châk reng rengin tlangval tam tak an hmanhlel a ni. Khuma chuan chung thil ngaihtuah a, a kal mawp mawp lai chuan a tukhum ri fawk avang chuan a harh zawk a, hnung lam a va hawi nak chuan Saichhunga lo ding reng chu hmuin "I hliam khan a ti buai deuh che a ni lo maw? Min hmelhriat loh kal pelh vuk vuk mai chu le?" a lo ti hu a, Khuma chuan tih vak ngaihna hre hek suh "A, ka ngaihtuahna ka kawm nasa deuh alawm maw le" a lo ti a, Saichhunga chuan nuih pahin "A tu chu maw i ngaihtuah a? Khawi lam nula nge?" tih pahin a rawn pan a, Khuma chuan "Nula lam pawh a ni lo" a lo ti ve bawk a, mahse, Saichhunga'n a dawp leh char char hnuah chuan a inpuang leh ta nge nge a, Saichhunga chuan phur tak mai hian "Saw nu saw a fel asin, zaninah va lêng ngei ngei ang che" a lo ti a, Khuma chuan nuih pahin "Ni e, la len ve chu a ngai a ni" tih ringawta chhangin a kal tumna lam panin a kal leh ta a. Thir dengpate in a han thlen chuan thirdeng Pu Hrângnawla chuan "E Khuma enge i duh tak mial lo ṭhu rawh" tiin a lo be lumlam vat a, Khuma chuan rei lo te titi puiin chem a duhthute chu sawiin thirdengpa pawh chuan "Chutia kan pasalṭhain i duhte chuan kan chher mai ang chu. Ṭha thei ang berin ka lo chher ange" tiin a chhang a, Khuma pawh ngaihngam takin an inlam panin a haw ve ta a.

Leng hawn ar a khuan hnu chuan Zamliani chuan an kawngkhar lam chu a thlek leh zauh zauh ṭhin. Tlangval lo chuangkaite chu ṭha takin zan dang ang bawkin lo kawm mah se Khuma rawn lan hun mawlh chu a nghakhlel a, a chang leh Khuma chu a rawn len duh tak takte ring loin a rilru chu a hnual leh rawih ṭhin mahse, hlauthawng dep dep a a awm laia a rawn luh ve takah chuan a chhungril chu lawm avangin a nui ver ver a, Khuma'n a rawn nuih seih laite chuan a zak bawk si lai bawk si chu hnuai lam melhin a nui ver ver a. Tlangval dang an awm ve avangin Khuma va biak bîk kha thil tih chi ni hek suh a mawi tawk chauhin a bia a, mahse nuam a ti hle. Chutia an han ṭhutkhawm rei deuh hnu chuan titi a rawn tui ṭan a, Khuma pawh a titi tuiin a thupuo vawrh tu berah a ṭang a, tlangval dangte nen chuan an nui ho dar dar reng a, Zamliani pawh Khuma'n a rawn melh leh zeuh châng apiangin a lo nuih ve seih zêl a, Khuma pawhin nuam a ti ve hle. Leng hawn ar a khuan hnu chuan tlangvalte chu Zawlbuk lam pan turin an kal ta a, Khuma pawh a chhuak hnuhnung pawlah ṭangin Zamliani'n kawtkai thlenga a rawn thlah lai chuan "Zamte, lo len a nuam hle mai. Mang ṭha tak mang rawh aw. Ka mumangah ka lo hmu ang che" tih pahin a biangah chuan a han piai zauh va, Zamliani zak lutuk chu a hmulthi a ding sung sung a, "Khuma nang pawh le" tih pahin a vai liam ve ta a. Zawlbuk an thlen hma deuh chuan Khuma chuan ṭawng lawng lawng ri hriain a va pan vat a, tlangval lo ding ṭhup leh a laia Zinga thinrim taka lo âng chu va pan vatin Zinga bula rawlthar rual lo dingte hmel a en chuan buaina a chhuak tih chu a man thiam vat a, rawlthar pakhat chuan "U Zing, nizan Lal muala ka naute pawnto lai Thangmawia hian a lo vêl ringawt a, chu vang a ni e. Kan ti leh tawh lo ang" tiin ngaihdam a lo dîl a, Zînga chuan "A ṭha e, Thangmawi tun hnuah aia naupang velh mai mai sim tawh tur. Ti khan zawlbuk lam pan nghal u la, in thinlunga in inhuatna kha bo rawh se" tiin a tir haw a, tlangvalte pawh zawlbuk lam panin an kal leh ta a. Zinga chuan Khuma chu "Ka zawn nasat zia che hi i hria em? Kha Thangbawihi an rawn rîm ve a, an inmelh danah ka ngaih a ṭha zân lo deuh a, ka rawn zawng che a, mahse, Saia'n nula a rim ti a min hrilh bakah i lênna a sawi duh tlat loh avangin kawmchhakah ka leng ta vêl mai mai a, leng hawn ar khuan hnu lawkah Thangmawiate ṭhian ho kha an rawn chhuak a, a hnu lawkah Rosangate kha an rawn chhuak leh a, rei lo te hnuah thawm a rawn awm ta a, ka han thlen meuh chuan an lo inphek sual nasa hman tawh khawp mai" a ti a Khuma chuan "A va hmuhnawm dawn ve" a lo ti sap a, chutih lai tak chuan Saichhunga a rawn lang phut a, "Khumek, hmuhnawmte chu nangin anih kha thlir" a lo ti a Zinga chuan chu veleh a lenna a lo zawt ve nghal a, a tawp a tawpah chuan a inpuang leh ta nge nge a. Saichhûnga chuan "Zinga, nichina thil thleng kha inrawlh ka tum zet na a, i hmel ka hmuh avangin ka lo thlir ta zawk anih kha. Pu Thangenate leihkapuiah khan ka ṭhu ve reng alawm. A hmuhnawm kha ka han ti khawp a, nangmah chauha ṭhelh tuma i phar buai lai vêl phei kha chuan ka nui nasa lutuk kha zun ka cheh lek lek a ni"tih pahin a rawn nui hawk hawk a, Zinga chuan "Saithluakthawl, mi rawn puih vat tur che alawm. Tlangval lêng haw an la tlem si a, ka buai zia kha" tih pahin a nam bu lawp a. Zawlbuk an thlen hnu chuan mutmu tuah zui nghalin Khuma chuan amah ngaihtuah chunga mu nui ver ver reng Zamliani hmel tawnmang lama hmuh ngei tumin a mit a chhîng ve ta riai riai a.