HNUNG TAWLH NGAI LO MI HUAISENTE - 26

Mi huaisente chuan hmalam panin an kal zel a, an mitthlaah hnehna an chan hun a an lawmnute'n arkeziak an lo ban lai turte chu hmuin phur takin hnehna chan ngei tumin an kal sauh sauh a, ni hnih zet ramhnuaia an kal hnuah ṭiau lui pawh an hnaih tawh kher mai. Chhun chaw fâka an ṭhutkhawm zawhah vaibel pak khuin an titi sap sap hlawm a. Khuma chu rawn ding chhuakin "Aw le, hei Ṭiau lui kan hnaih tawh a, thawm kan dim a hun tawh a ni. Thantlâng khuaah pasalṭha engzat nge la awm ang tih kan hre lo a, tunah hian min lo pan ve mêk em tih lah kan hre hek lo. Fimkhur takin kan kal ang, ṭiau lui kan hnaih leh hlek ang. Khaw ên laiin ka hoin tlangval sawmin lui kan kân anga, zanriahna tur hmun remchâng kan lo va dap dawn a ni. Midang erawh thim hlimah Zînga hovin lui inrawn kân thung ang. "a ti charh charh a, ti chuan lui kân turte chu inthlang chhuakin Lianphunga pawh a tel ve bawk a, an ni chu lo va kal hmasain midangin hnung lamah an lo zui dawn a ni. Pawih tlangvalte erawh ṭiau lui kamah awmin Lusei khua han suasam an châk thute chu an sawi châmchî hlawm a, an hmelah chuan hlauhthawnna a awm lo va, lusei ho chuan an rawn pan hmasak an ring lo hrim hrim a ni. Mahse, lusei ho hi chanchin rei lote chhunga inhre pawh zung zung thei khawp a ṭawng tam leh uar tak tak a sawi belh hrât em em an ni tih an hriat avângin Bunglalate thil tih kha lusei khaw tam takin an hriat tawh an rin avangin Phungluia chuan "Naute u, in insil thlan dai tawh anih chuan hmun dang i pan ang u. Khaw ên lai em chuan lui hi i kân lo i la a ṭha ang, Darzo khua thleng rawka kal tur kan nih avangin bawh buan buan kha a rem bîk lo a, a tirah fimkhur takin che i la kan hlawhtling a ni mai"tiin chhak lamah lui chu an zawh chho ta a. Hun rei pawh a liam hmain an zînga tlangval pakhat inthiar tum chu hmanhmawh taka rawn tlan chhoin "Lusei tlangval sawm rual vêl an rawn kal e, lui kân tum an nih hmel" a rawn ti a, Phungluia leh Puilianate nuih chu a za ngang mai. "Lusei tlangval sawm rual an rawn kal a?" tiin nui kur kur chungin an han zawt nawn leh sak a, chu tlangval chuan "Aw" tih ringawta chhângin a lungawi loh hmel hle. Puiliana chuan nuih suk suk pahin "Kan han fiam deuh che anih kha, hawh teh i zu thlithlai teh ang" tiin Phungluia chu a sawm a, Phungluia chuan "Lusei tlangval sawm rual lek ka thlithlai peih lo, i duh leh zu kal rawh" a lo ti et a, Puiliana chuan tlangval sawm vêl tho silai keng ṭhah thlang chhuakin lui mawng lam chu an pan thla ve leh a, lungpui phên aṭangin Khumate lui kân lai chu an lo thlîr reng a, Puiliana chuan "Le, naute u, enthlatu an ni mai thei a, chu vangin ka zuk in lan dawn a ni. Ka awki sâng inhriat rual rualin silai rawn hmet puak nghal ang che u, pakhat khu chu ka bitum anga, a dang pakua erawh in ṭhelh tur a ni hauh lo" tiin kal a han tum a, mahse tlangval pakhat Bunglalate kianga kal ve tawh an zinga awm ve chuan "Ngawi teh, khu nau khu hmannia U Bunglalate nen a kan kal khan lusie ho kiangah khan a awm ve a ni. A huaisenin kan tlangvalte pawh a suat nual a ni." a rawn ti a, Puiliana chuan "Anih chuan inring ru le, ka silai a rik veleh in kap ve nghal ang" tih pahin lusei ho chu an tin ta rân hlawm a. Khûmate chu fimkhur takin ral leh lamah hlauhawm a awm em tih en pahin lui kanin an inzui diah diah a, inhnaih tak pawha inzui duh loin a khat tawkin an inzui hlawm a, chutia fimkhur taka an kal lai chuan an zînga pakhat chu lung nâl rapin a tawlhthlu ṭhuai mai a, tlangval ho chet buai lai tak chuan silai a rawn ri ta ṭhuai mai, Khuma hnung lam hawi tur a lu a chèt rual chuan a beng hnuaiah silai mu a rawn thlawk fua mai a, beng chu a thi nghal sar nghe nghe. Chu veleh Khuma chu tuiah chuan lut nghalin tlangval dang pawh chuan an tih tur an hai lo, lui mawng lam panin an theih ang tawkin an inhai thla ta a, mahse, silai sawm lai a puah avangin tlangval paruk chu an tlu hman tlat. Rei lo te hnuah silai chu a rawn puak leh ta, mahse, a hlat deuh tawh avangin nunna chân em chu an awm tawh lo thung. Vaukam hnai ber lam pan chuan an hleuh phei a, lui an kân ṭep tawh avangin hmelma ram lam an pan lo thei si lo, vaukam thleng hmasa ber tlangval chu a thal leh nghal tawp a, a hnung chiaha ding Khûmate tan luia zuan thlak leh chi a ni tawh si lo, lui mawng lam panin an tlan kawi zar zar hlawm a, silai chu a khat tawkin a rawn puak zauh zauh a, anmahni umtute chu pahnih bâk an ni lo tih an hriat avangin lambunna tur remchâng an melh pah reng bawk. Zîngate chu hmanhmawh takin lui lam panin an tlan a, silai ri ṭhuai ṭhuai avang khan Khûmate chu hmuh an inbeisei tawh lo hlawm hle. Lui an zu thlen dawn hnaihah chuan Zînga chuan hma hruaiin thawm dîm takin an kal phei a, lui kam a pawih tlangval pariat lo ṭhu an va hmuh chuan Zînga chuan "Le, a tu amah saw an dam chhuak tur a ni lo. Mahse, thu zawh fiah atan pakhat saw a keah keiman ka kâp ang" tiin Puiliana ke veilam chu a tin vang vang a, Puiliana a ṭhingṭhit hnawk rual chuan a bula a naute chuan pialrâl lam pan turin an nunna chu an thlah ve nghal bawk a.

Phungluia chuan "Puilianate pui roh chu, silai mu renna châng pawh hre lo, kap dur dur reng mai, lusei tlangval sawm vêl lek pawh vawi khatah an kap hlum vek thei lo a nia" tiin a nui suk suk duh chauh a. Zîngate'n lui an kân lai chuan Puiliana chuan a ke dinglam chu dawmin a lo mu kawm ngul a, a hmelah chuan a na tih zia pawh a lang chiang hle. Zînga chuan dim baksak lo a kai thoin "Khawiah nge lusei tlangval lui kânte kha an awm?" a han ti hrâwk a, chutih lai tak chuan silai vawi hnih rawn puakin Zînga'n a hmuh ve meuh chuan pawih tlangval pahnih lui mawng lam aṭanga rawn chhote chu an thal chiang tawh hle. Puiliana chu thin sawk pahin Zînga chuan zawhna ngai a han zawt nawn leh a, Puiliana chuan "An thi vek tawh" tih pahin a lo nuih lui sak a. Zînga thinrim lutuk chuan Puiliana chu dîm bak sak loin a han ṭhuai let a, a luah a silaia tinin hmun leh hmunah a han kahchilh sawk mai zawng a thisen leh a thluak rawn per chhuaite chu Zînga taksaah te chuan a kai lei luai a ni. Zînga chuan tun maia a naute'n pawih tlangval pahnih an kahthlukte lo kalna lam chu a en vang vang a, dam chhuak an awm anih ngei ringin chu lam pan chuan an kal ta a. Lui kawi thum vêl an zu zawh hnu chuan an beidawng ṭan tawh hle, let leh mai tuma an kal lai tak chuan Khuma leh Lianphungate chu an rawn chhuak hlawl mai a, Zînga lawm lutuk chuan "Kha in ṭha maw? Kan ngaihtuah lutuk che u a sin" a ti nghal a, Khuma chuan "Kan ṭha e, kan vannei hlauha hliam pawh kan tuar lo e, pawih ho kha engtin nge ni ta?" a han ti a, Zinga chuan "Pialrâl lam panin an kal liam tawh e" tiin a chhang a, Khuma chuan "A pawi mang e, kan naute kan chân vek a ni" a rawn ti chuai deuh raih a, Zinga chuan "An phuba kan la mawlh ang. Pawih hnam kan hmuh tawh phawt chu kan suat zel ang" tiin lui an kânna hmun lam pan chuan an kal leh ta a. Puiliana lu darh nuai mai Phungluia'n a hmuh chuan a thinrim lutuk chu a puak keh lo chauh ni hian a lang a, lusei ho hnu ni ngei a lang chu a han en a, tlangval za rual zet an ni dawn tih a hriat phei chuan a thinrim zual hle, a tira lusei tlangval sawm vêl an lo kal thu rawn hrilhtu chu koin "Hei hi, sawm vêl kalna hnu a ni em?" a han ti a, chu tlangval hlau lutuk chu a khur dar dar a, Phungluia chuan chu pa chu ṭhingṭhit tirin a mi lu lak chem chu a phawi zal zal a, chu pa chuan khawngaihna chitin renga a dil pawn awm zia a awm lo. Phungluia mi lu lak chem hriam ṭha ver ver rawn phei fua chuan a lu chu a tlak hran tir nghal nawlh a. Phungluia chuan "Ka unaupa ruang hi phum i la, lusei ho hi kan chhui zui nghal ang" a rawn ti chhuak sap a, tlangvalte chuan thlan laih tumin an han inbuatsaih a, mahse, chutih lai tak chuan silai a rawn puak ta zawt zawt mai, Phungluia chuan "Insahimna zawng rawh u" tiin a naute chu a au tuarh tuarh a, lusei hoin an silai mu an sawh ṭan ta maw tihah a silai chu lusei ho lama kap puak durin a paih zui nghal a, "Ka naute nun chhanna'n leh Puiliana phuba anih hi" tih pahin a chem nen Lusei ho lam pan chuan a tlan ta mai, pawih tlangval tlanchhe mêk chuan anmahni himna'n a amah chauha lusei ho beih tumtu an pasalṭha Phungluia tlan lai an hmuh meuh chuan an tlan chhunzawm thei ta hauh lo. An chem phawiin lusei ho lam pan chuan an tlan ve ta a, lusei ho silai a rawn rik rual chuan Phungluia chu bawk nghal rawkin lungpui phenah a tawm nghal a, chutiang chuan biru chungin lusei ho chu a pan hnai zel a, a naute'n an rawn zui tih a hriat chuan a lawm rilru hle. Lusei hoin a vawihnihna'n an silai an sawh leh ta maw tihah chuan Phungluia chu a tlan leh ta phut mai a, an inhnaihchilh tawh bawk nen lo kahna hman awm tawh hek suh an zinga rawn zuang lut Phungluia chem rawn vai buan buan chu an bei let ve nghal a, chutih lai tak chuan pawih tlangval dangte pawh rawn thlengin ṭiau lui kamah chuan lusei leh pawih tlangvalte chu an insât ta siah siah mai le. Hnam kawlhsen pawih ho chuan lusei ho chu hneh ngei an tum ruh hle, lusei ho lahin an theihtawp chhuahin pawih chu nunna chu an la ve mêk bawk. Khuma leh Zînga che tla chu hmuhnawm thlira thlir tham khawp a ni, insual an thiamin an hmaah ding zo reng an awm lo, an hnung lam vengtu Lianphunga lah naupangte mah ni se, a hmaah hmelma an tlu nual tawh tlat. Pasalṭha nei tam zawk lusei ho chuan hma an sawn chho ta hret hret a, a tawpah chuan pawih tlangval ho chu an tlân darh ta, mahse, tlanchhe ve duh lo Phungluia chu an la hual laih laih thung. Khuma chuan rawn pan vatin Phungluia chu a rawn hmachhawn siah a, Phungluia chuan "In aiawh inthlang chhuak u la, ka bei ang. Ka chak anih chuan ka nunna inzuah anga, ka naute kha in umzui tawh lo bawk ang. Chuan, in haw leh nghal anga ka hnampuite tumah inkhawih tur a ni lo. Nangni lam inchak anih erawh chuan in duh duh danin in che thei ang" a rawn ti a, Khuma chuan nuih suk pahin "Ni ang hmiang" tiin a naute chu a tawlhsawn tir a, Phhungluia nen chuan an inhmachhawn ta ran mai le. Phungluia chu hliam a neih nual tawh avangin a thinrim hlur tawh a, kawlh pawh a kawlh tawh hle, chu vangin fimkhur theihtawpa beih anih loh chuan Khuma chuan a  vanduai zawkah a ṭang thei tih hriain Phungluia chet hmasak hun chu a nghak rân a, a nghah ang ngeiin Phungluia chu râk ruai chungin a rawn tlan ta a, an inkarah hlam hnih bak a awm tawh lo ang tihah Khuma chu hma lamah pen khat penin a kun hniam nghal a, chumi pah chuan a chem chu a han vai fua bawk a, a vai thlawn lo chiang hle, a ni pawh a hnungzang chu a thip nghal zawr bawk. A han ding chhuak chu Phungluia chuan ril tla pur chungin mak tih hmel takin a lo en tlawk tlawk a, a mitmeng a rawn â vek tawh bawk. Thei leh thei loin a han hawi kual hrek hrek a, ti chuan a kein a zawh loh hun a rawn thlenga a tlu ta riai riai a.

Tlai ni tla tur chu mawiin thlir nin har hle mah se, ṭiau lui kama awmte tan erawh a mawinate chu a hmuh theih ve loh a, ruang a tamin thisen rim thang hlur chu a nam vut vut mai a ni. Zîngate chuan hmanhmawh takin lusei tlangval ho ruang chu an la khawm sawk sawk a, lui chu kan pui lehnghal vatin Lusei ram chhungah ngei an phûm ta a. An awm dan tur sawi hona neiin zan lamah ro an han rêl a, ni hnih tal la awm khawtlai a, chumi chhunga pawih ho hmel an hmu lo anih chuan haw mai chu ṭha an ti ta zawk a, hliam nei an tam bakah thi an tam em em a, an va kal tumna ber Thantlang tlangvalte nen an intawn tawh bakah an pasalṭha pahnih lai an thahsak avangin hlawhtling thawkhatah an inngai a, an khua leh zêl va hâl sak a, nunaute va tih mangan chu ṭhaah an ngai lo a ni.