HNUNG TAWLH NGAI LO MI HUAISENTE - 28

Khuangchawi thla a ni a, favang khua a thiangin a thengthaw nuam em em bawk. Zantin lêng rûn a lawi vâl rualte chuan an nula rîmte nen thla êng lâwmin leihkapuiahte zai an hril ṭhin a, chu hun tak chu upa lamte mittui ko chhuaktu, an nunhlui ngaih zual tir ṭhintu a ni. Zamliani pawhin a inlengte kawm hlim chungin thla êng chu lunglêng takin a thlir ve a, Khuma lo chu a rilruah a awm thei mawlh lo. Lal fanu Partei a thîkna chu a thinlungah a intuh nghet hle a, Khuma nen an inhmu lo ngei awm si a, tiin a ngaihtuah veng veng a, a rilru chu a hnualin hrehawm pawh a ti hle. Mahse, Khûma'n an kal dawn zana a thusawi kha a hriat reng avangin a ngaih erawh tlem chuan a ngam deuh. Darzo khaw lamah erawh Lal fanu Partei chuan hlimna a tawng mawlh lo a, a hmangaih hmasak ber Khuma nei lo a, khual vâl laka khiang a awi mai tur chu a huphurhin hrehawm a ti hle. An insuihzawm ni tur lah chu hunin a rawn pawt hnai tial tial zêl bawk si. Khumate pawh ni li zet an châm hnu chuan an khaw lam panin an haw ve ta a, Pasalṭha Hlawna khuangchawi meuh chu a ropui hle, an khuaah a neinung ber pawl an ni a, amah pasalṭha thangchhuah ngat a ni bawk nen mi zah an kai nasa zual hle. Khuma leh Zingate erawh hmeithai fa ve mai an ni a, tlangval to tak ni mah se an khaw chhungah an hmeithai fa nihna hriat saktute bulah chuan inthlahrunna chin an nei ṭhin a, an tan chuan hmeithai fa an nihna hre hauh lo tu, an pasalṭha nihna avanga ngaisangtute kiang, khual khua a nawm zawk châng a awm fo rêng a ni. Mahse, mahni khúa nge nge chu ngaih a lo na a, khawi khua mahin an thinlungah a tluk thei bîk si lo, fahrahte tan chuan dam man hi a vâng em em a, naupan tet aṭanga an rualpuite hmuhsit an ni a, an lo puitlin hnu thleng pawhin hmusittu an vâi ngai mang lo, dinhmun sanga an inhlangkai anih ngawt loh chuan. An khaw ram chin an thleng ta maw tihah chuan vak hrangin sa kah tur an zawng nghal a, khaw thim hmaa in thlen hman ngei ngei turin an inchah thlap bawk. Lo sûl haw hun anih meuh chuan kawtchhuah an thleng ve ve tawh a, Zînga'n sakhi tuai a rawn ak haw nelh nelh a, Khûma'n zawng pa chal a rawn paw haw bawk a, hlawhtling taka an han inhmu leh chu an hlim dûn kher mai. In an va lut a, an nu leh an farnu chuan hlim takin an lo lawm a, ṭhenawm hnaivaite inko khawmin an sa rawn hawn chu puahin an chan nghal a, sa lian tham an kah loh avangin tlai khat hmeh vêl lek lekin an insem dan dan a, Khuma pawhin zawng sa leh sakhi sa chu a ṭha lai lai thlangin a fûn ru zauh a, a nau hnenah "Thangbawih hei, Zamteite han pe ve ta mai che." Ka u Khûma'n lo hmeh ve rawh u"a ti e i han ti dawn nia" tiin a pe a, Thangbawihi chuan "Ka u ṭhin hi a, zan lamah i len pahin han pe zawk la a lawm dawn zia" a lo ti a, Zinga chu lo inrawlh vatin "Kha duhsak zawng ka nei e te i lo ti elaw? Nang pawh Lal sa tur hi han pe rawh, Thangbawihi ringawt tir bîk lo khan" a lo ti hmawk hmawk a, Khuma chuan "Zinga hmawk hmawk ṭhin hi chu" tih pahin Lal sa tur chu a la a, Lal in lam panin a kal ta nal nal a. Lal in a han thlen chuan sa chu a han pe a, Lal Zabiaka chuan "Ekhai aw, Khuma nangni unau sa kah hi kan ei zing ta malh malh hle mai a, kan rapah hian in sa kah hi kan rêp reng mai zawng anih hi maw.... A lawmawmin in chhuanawm ṭhin hle mai" a lo ti a, Khuma chuan "Lalpa, eng tham anih loh hi, sa lian tham pawh kan kap lo a, keini tan hian a inthlahrun awm khawp a sin" tih pahin Lal ina patling pathum lo ṭhu ve te chu chîk zetin a han en kual a, "Lalpa, hei mikhualte i nei a ni maw?" a han ti a Lal Zabiaka chuan "Ni e hei, Khuma in unau hriat ve chi tak pawh a ni ang" tiin a pasalṭha a dah pawimawh zia chu a mikhualte hriatah a han sawi lang zauh va, sawi chhunzawm nghalin "Hei, Pasalṭha Laithanga palaite an nih hi" a tih mêk lai chuan mikhualte chuan thu pawimawh an sawi duh tih hrethiamin zanriah ei turin an thlen in lam an pan san a, Lal Zabiaka chuan thlah te te phawtin Khuma bulah chuan a sawi zawm leh nghal a, "I u Ngura thlarau kan zah em mai a, aw kan lo la pawh lo a ni. I pa Muandawka chuan Laithanga kha mi rinawm tak niin a hria a, mahse, in thu lâk ve reng reng a ṭha a ti a ni" a ti charh charh a, Khuma chuan "Lalpa, keini tehlul hian i fanu lakah thuneihna kan nei lo ve, i ngaihdan chu eng pawh ni se ka ṭawm pui che" tiin a chhang a, Lal Zabiaka chuan la duh khawp lo tih hriat takin "Khuma, innunau tana Ngura pawimawh zia kha ka la hria a, ka thiltih sual kha ka rilruah a la riak reng ṭhin a ni. Chu vangin Ngura vang tal pawhin i ngaihdan han sawi ve reng reng teh" a ti leh tlat a, Khuma chuan "Chutia ka ngaihdan i ngaihthlak duh chuan ka sawi ve reng reng ange, mahse, thu taka lak tura sawi ka ni kher lo a nia, kei chuan i thutlukna chu eng pawh ni se ka pawm sak ngei ang che, Zinga pawhin a pawm ngei ang. A chhan chu kan Lalpa i ni a, hmeithai fa ve mai min en san lo a, min dawm kangtu i ni tih hi kan hre reng a ni. U Ngura awm ta lo mai hi chu awih har tih chang ka la ngah khawp mai. Ngurliana hmel ka hmuh phei hi chuan ka lung a lêng ṭhin em em a, chu vanga Ngurliana han chhaih vêl pawh ngam ngai lo ka ni a sin. U Liankimi lunglêng hnem tur hian U Laithanga kha kei chuan ka pawm thlap a, a ni ang pasalṭha huaisen, kan khua min tih râlṭit duh lo va thih huama pawih ho lo beitu kha ka ngaihsan zawng tak a ni. Lalpa, ka duh tawk ange, a bâk chu ka sawi tawh ang khan i thutlukna chu eng pawh ni se, ka pawm vek e"a ti a, Lal Zabiaka chuan "Chutia Ngurzika nau meuhin i tihte chuan rilru pawh a hahdam hle mai. Zanriah he lamah lo kîl ve ta che" tiin a sawm a, mahse Khuma chuan "Ngawi teh Lalpa, in chhungkuaa thu pawimawh sawi hun tak anih bakah, kan zin haw kan lo thlenna a la rei lo a, in lamah ka zu ei zawk mai ange. Tui takin in ei dawn nia" tiin a chhuah san ta zawk a.

Lal fanu Liankimi palaite pawh lal in a an han len leh chuan thu lawmawm tak an hawn ta a, haw vat vat a, an pasalṭha hrilh an chak tawh hle. Man leh mualte pawh sawi fel nghalin, a hun turte pawh an ruat fel thlap a, ngaihngam takin an inthlah haw ta a. Khuma leh Zingate pawh chuta chin chu an u Ngurzika tana an tihtheih hnuhnung ber tiin nausen Ngurliana chu an in lamah an pawm thla zingin an chhungkua chuan an awm ṭhin a, an hlim ve dar dar ṭhin hle. Lal fanu Liankimi pawh a hmelah hlimnate rawn lang chhuak ve mah se, hlauhthawnna nei ang mai hian a awm leh ṭhin a, ṭum khat chu Khuma chuan a zawt ta tawp mai a, Liankimi chuan "A, Khuma, in u Ngura thlarau pawi ka sawi hi ka hlau em a ni" tiin a chhâng a, Khuma chuan "E, U Lian, chutin ngai suh, U Ngura chuan a fapa pa nei lo a i ṭhan len tir a phal dawn hauh lo. Pa nei loin ṭhanglian ta se, U Ngura hmel pialralah i hmu ngan dawn em ni? I fapa hi nakin lawkah pasalṭha tak a la rawn ni ngei ang. Chu vangin amah kaihruai thei tur pa a mamawh a ni"tiin a chhang a, Liankimi pawh a hahdan huai nghe nghe. "Anih Khuma, nang nupui neih lamte i rilruk ta a ni em lo maw? Zamlianite rûn i lawi lut zing riau an tih kha?" tiin Khuma chu a han fiam a, Khuma chuan "Akhai, U Lian, thu leng vak vêl satliah mai mai anih chu" tiin nui vur vur chungin a chhâng a, Liankimi chuan thutak deuh tak hian "Khuma, fimkhur takin aw. Zamtei hi nula hmelṭha tak a ni a, beiseitu an kat ve nuk tih i hriat kha. I fimkhur loh a i chunga thil ṭha lo a thlen chuan a na ber tur chu Zamtei a ni tih hria ang che. Thihna hi a râwng em em a, ka tawrh ang kha ka hmeichhiat puite tawrh atan ka it ngai hauh lo ang, ka hmelma takngial tan pawh ka duh lo. Chu vangin fimkhur takin che ang che" a ti a, Khuma pawh chuan thu tak deuh zawka chhângin "Ni e, U Lian, i sawi ang ngei chuan ka lo che ang e." tiin a kal liam san ta a.

Hmangaihna a par vulna hmunah chuan hlimna a awm ṭhin a, inbakkaih changte awn ve ṭhin mah se, rei a daih ngai lo. Thinurna leh inhauhna hi hmangaihna in a ken tel tlat a ni a, thinurna leh inhauhna thlen ngai lohnaah chuan dik lo a awk ṭhin, thîkna mitmeng a bo tawh chuan hmangaih dang kan mitin a tawng tawh tihna a ni a, chu vangin heng inhauh buainate, inthîknate, inṭawiawm tawnnate, in chawimawi thiamnate hi hmangaihna in a ken tel tlatte zînga mi a ni. Khuma leh Zamteite inhmangaihna pawh a ni têlin a zual zêl a, chutih lai chuan an khaw khawnbawl upa fapa Lianthanga lung erawh a awi loin hun rei tak a lo beisei tawh Zamliani thinlung hunnreilote chhûnga Thangkhûma'n a rawn hneh ta mai chu hriatthiam har a ti hle a, hma lak dan tur ngaihtuahin amah zui chawt reng tu a ṭhiante nen chuan Khuma thenfai dan tur chu an ngaihtuah nasa ṭhin hle. Ni khat chu Khumate unau leh Lal fapa Saichhûnga ram lam pan a silai nen an kal chu an lui kal haw nen an intawk hlauh mai a, ṭha taka inbiain zan hnih thum vel riah an tum thu leh an kalna turte chu Khumate chuan an hrilh bawk a, an inṭhen fel hnu chuan Lianthangate chuan ro an rel nghal mawp mawp a, a ṭhenin Khumate unau chu va thah nghal mai an duh a, mahse, chutia an tih ringawt chuan an tan a hlauhawm bakah Saichhunga a awm ve avangin tih chiah an ngai si lo, a ṭhenin "Saichhunga chu thahah kan vau anga, a ka kan hup bet thei mai ang. An inzui khât tawh em hi, tun hma a an in ṭhian ṭhatna kha tunah chuan an inkarah a awm tawh hauh lo ang" an lo ti ve bawk a, mahse, chu pawh a la hlauhawm lutuk tlat. A tawp a tawpah chuan Lianthanga chu rawn ṭawng chhuakin "Zaninah Thangbawihi hi Ngailiana hian a zen ang. Keiin Zamliani ka rîm bawk ang. Zamliani hnenah Khuma leh Darzo Lal fanu inkar dawt phuahchawpin ka sawi anga, Zamliani rilru hneh ngei ka tum ang. Chuan zing khawvar rualin Thangbawihi mualphona a rawn thleng anga, keini erawh kan hlawhtling thung ang. Thangbawihi a mualpho meuh chuan Khumate ang hmeithai fa, inkiltawihna ngah mi tak chuan nula rim a ngam dawn lo hrim hrim a, chu chu remchângah lain keiin Zamliani rilru a nitêlin ka kuai her tawh mai dawn a ni"a rawn tih chuan ṭha an ti hlawm hle a, an chhak lawkah Pu Muandawka thingpuin a ngaithla ru reng tih an hre hauh lo, chuta chhapah an rorel ve chu naupang chhe rorel ang lek a ni tih pawh an hrethiam lo a, Zamliani ringawt an rilruah a awm avangin an thu rêl a ho angreng hle. Pu Muandawka chu haw vatin Khumate inah a lut nghala Khuma nu leh a farnute hnenah a thu hriat zawng zawngte chu hrilh vekin "Zanin lêng hawn ar a khuan veleh kan inlam lo pan u la a ṭha ang. Zamliani pawh ka lo va hrilh vek ange. Tlangval fel tak tak an awm a, chung ho nen chuan Ngailiana in in a a luh veleh kan man mai dawn a ni. Lal hnenah kan thlen anga, a inpuang vek mai ang, hlauthawng hauh suh u"a ti a, Khuma nu leh farnu te chuan hrehawm an ti hle, "Ka fapa hian a cho phak hauh loh a cho a ni, buaina kan tawk ngei ang." tiin a indawmkun nghal tlawk tlawk a, Pu Muandawka chuan "Khuma nu chu khatianga i awm ten le? I fapa hi khualkhuaah phei chuan Lal fanu chenin melh tai tu a nei a sin! Lawm takin ka thusawi ang kha pawm thlap la a ṭha a ni mai." tiin a chhuah san ta a. Thangbawihi rilru la puitling chiah lo chu rawn chhuakin "Ngailianate angin min zen an han tum dawn chu a ni sia, tuikawhna hi ka mutpui anga ka hêm duk chur zawk dawn e maw ni le" a ti pang pang a, a nu nuih a za ru hle. Zan a lo thleng a, Lianthangate ṭhianho chu Zamliani te inah an ṭhu ṭhap a, Lianthanga ṭhiante chuan a khat tawkin "Khumate ram vah chungchang chu an rawn sawi lang leh zauh ṭhin a, Zamliani hmel awm dan inthlak ngai eih lo an hmuh chuan an lawm rilru hle a, Zamliani hian a rilru Khuma lakah a pe tak tak lo angah an ngai a, an ruahmanna chu kal fuh an ti hle. Lianthanga'n "Khuma zawng a vannei teh e, Darzo Lal fanu hmelṭha Parchhîngi thinlung neitu a ni miau si a, kan khaw nulate hian an beisei ve si a, Khuma lah nula lama hlei chi a lo ni bawk nen, nula theih hnu hi a ngah viau tawhin ka ring a ni" a han ti charh charh a, Zamliani chu a thin a ur ru hle, Pu Muandawka hnen aṭanga an ruahmanna a hriat vek tawh avangin a insum hram hram a ni zawk. Leng hawn ar a khuan hnuah chuan Lianthanga chu la ṭhu hnufualin a thinlung chu Zamliani hnenah a hlan ta hmiah mai, Zamliani lah lo â hek lo, inhawng tlang duh chiah si loin Lianthanga tana beisei zui zel theih turin lem a han chang a, mahse, a kut hmawr pawhin a indeh tir duh hauh lo thung. Lianthanga pawhin tihngaihna hre hek suh, lungawi si, lungawi famkim chiah si loin a chhuak ta hnu hnu a. Zawlbukah lawi lutin tlangval dangte an mu reh ta maw tihah Ngailiana chu a chhuak ta zâl zâl a, a ṭhiante chuan Zawlbukah an lo nghak kar thung. Mahse, let hun a nei thei ta tlat lo. Lianthangate chuan Thangbawihi chu nula sihhnip leh buan chak lo takah an ngai tawh a, Ngailiana pawhin a riahchilh nghal hmiah anih an ring vek nghe nghe chu vangin nghak buai duh tawh loin an mut san ta a. Zing khua a lo var a, mahni in lamah tlangvalte chu an haw sap sap hlawm a, tukṭhuante kilin chhungkaw pa te'n an fate chu an zilh sap sap a, thu ṭha tinreng an fah bawk. Lianthanga chaw ei lai chuan Tlangaupa rawn lut hlawlin Lianthanga chu Lal in a hmu lawk duh tih a rawn hrilh a, an pafa chuan bar sawk sawkin Lal in lam an pan ta a. Lal in an han thlen chuan Ngailiana chu hrehawm tih hmel takin a lo ṭhu kar mai a, a ṭhiante pawh a bulah chuan an lo awm ve ṭhap mai. Lalpa Zabiaka chuan "Upa Rum, i fapa thil tihte a tenawmin a zahthlak hle mai." a han ti a, Upa Rumliana chuan Lianthanga chu melh zauh pahin "Lalpa, ka fapa tih sual chu eng thil nge ni ta le?" a han ti a, a hmel chu a dur hle. Lak Zabiaka chuan Ngailiana chu a han melh hrawk a, chu veleh Ngailiana chuan an ruahmanna tenawn tak, Lianthanga'n Khuma a thik avanga an thil tih tumte chu a sawi ta vek mai a, Lianthanga chu a ding kun tlawk tlawk mai a ni. Lal Zabiaka chuan "Upa Rum, i fapa hian thil ṭha lo a tih lohna'n zilh a tawk ngei ang. Val upate hnenah kan thlen ang. A hnu leh a awm anih chuan ka inrawlh tawh ngei ang" a rawn ti a, chutih lai tak chuan Ngailiana chu rawn che thutin Lal fanu Liankimi tap bula awm chu a samah kêk ding lawpin a nghawngah chuan a rek bet nghal chat bawk a, tawlh hnun pui hlekin lal in bang laia chem chu a phawi leh nghal zawk bawk a. "Lalpa, Zamliani ka nei dawn lo anih ro ro chuan dan chhan tur ka nei lo ve, mahse, keimah chauh chuan ka thi dâwn bîk hauh lo." a han ti hrawk a, Lal Zabiaka thinrim lutuk chuan "Ka fanu kha thlah rawh" a rawn ti tuarh a, an thawm hriain mipuite chu Lal mualah an lo kal khawm mêk bawk a, Lianthanga chuan Lal fanu Liankimi chu a tawlh hnun pui hlek hlek a, mahse, a hnunga lo ding reng pa a va nek rual chuan a chem hûma ban chu tha chak tak hian rawn manin hnung lamah a han herh kual pawp mai zawng, chem a thlauh chiang teh e. Pu Muandawka chuan "Thi tlâk zuk ni che a, i va han zak lo ve. Nang ni ang mai mai khing tur hi chuan ka thate hi a la chak ve tawk a nia" tih pahin a aia na in a han herh leh a, Lianthanga na ti lutuk chu a ṭhen chawk chawk mai a ni. Upa Ruma chuan "Muandawk ka fapa i khawih ngam a maw?" tih pahin Pu Muandawka chu a rawn hnek ta mai, chu veleh Lianthanga chu rawn tal pitin Pu Muandawka chu a rawn hnek ve bawk. Lal Zabiaka thinrim lutuk chuan chhuata chem tla chu chharin "Ka Lal in pawh in zah zo lo va maw?" tiin a rawn pan ve bawk, pawn lama tlangvalte chu lo tlan chhuakin Lianthangate pafa chu an rawn khawih ve bawk a, Lianthanga chu pawn lamah hnuk chhuakin Pu Muandawka puitu tlangvalte chuan zan lama a ruahmanna tenawm tak an man chhuahte an han sawi meuh chuan tlangval dangte thin a ur hle mai a, ṭhelh tumtu awm lo ta na na nâ chuan Lianthanga chu an chîl hlum chiang hle. Lal in lamah pawh Upa Ruma nghawng chu a chhum lek lek a, Lal Zabiaka chuan "Ka Lal in zahna châng hre lo, mi dik lo ṭantu chu thi tlak a ni" tiin a kal san a, amah hlauh hmel taka lo entu Ngailianate ho chu "Va thian fai vat rawh u, khuaa la awm ve induh anih chuan" a han ti tuar a, chu veleh Ngailianate chu an che nghal sawk sawk mai a ni. Khaw mipuite thinrim zual pui a reh hnu chuan in lam panin an haw ta a, tute pawhin Lianthangate chu an dem em em vek a,an ngainat rawn an Lal fanu hial pawh kutthlak duhtu thihna chuan an lung a ti hnur lem lo hle.