HNUNG TAWLH NGAI LO MI HUAISENTE - 29

Lal fanu Liankimi khiangawih ni meuh chu a ropui hle mai. A fapa Ngurliana lah Pasalṭha Laithanga chuan a fa ang chiah a enkawl a intiam thlap bawk a, Liankimi pawh a hlim hle, Laithanga farnute pahnih chuan an unaunu ang chiaha en nghalin Ngurliana pawh an ti tlangnêl thuai a, an inpawm chhawk reng mai a ni. Tlai lamah ruai ropui tak ṭhehin an hlim hle, mahse, chutih lai tak chuan khaw mawng lam aṭangin Lusei tlangval sawmhnih ruak vêl hi an rawn lut a, an hma hruaitu pasalṭha pathumte chu Bungtlâng khuate chuan an mikhual lo hle. An rawn hnai zêl a, an hruaitupa chuan Bungtlâng Lal Sailiana hnenah chuan "Uai, Lalpa eng thil tak lawm che u maw? In hlimin nuam in tih hmel hle mai" a han ti charh charh a, Lal Sailiana chuan "Chherlian, ka pasalṭha Laithanga'n nupui a kan lo lawm anih hi" tiin a chhâng let ve a, Pasalṭha Chherliana chuan "Uai, chutia keini lam pawh min râwn lo va mo i lo lawm mai le? Khawi maw Laithanga pawh chu a awm reng reng le, a ṭhiante pawh mi rawn hrilh nachang a hriat hauh loh a, a nupui pawh chu a hmel hmuh ve a va châkawm ve?" tih pahin Lal Saithanga bula Lal Zabiaka lo ṭhu chu melhin" Khawi lam khaw Lal fanu nge Laithanga chuan a han chhaithluk ve a? A lo vau bet te hi a ni hial lo maw? "tiin a han nui zui uar uar a, Lal Zabiaka kut hum ruh lai chu Lal Sailiana chuan dawm sakin" Khawngaihin ka thu ngaichang hmasa rawh"ti a a ngen avangin a inthlahdul leh hram hram a. A piah deuh aṭangin Laithanga chuan "Chhera heta hi ka awm e" a rawn ti a, Chherliana chuan "Kha i bula mi kha i nupui chu a niang maw? A hmel a ṭha kher mai. Mahse, kan thu la hmasa lo va mo in lo lawm avangin kan Lalpa a lawm dawn hauh lo tih hria ang che. Lal fanu anih hmel lehnghal a, khaw dang Lalte nen inzawmna insiam tih kan Lalin a hriat hunah a lawm hauh lo ang" a han ti let ve a, Laithanga chuan zam hauh loin "Chherlian, ka duh chu ka nei ṭhin tih hre chiang bertu i nih ngei ka ring" a han ti vawt raih mai a, Chherliana chuan nuih sak pahin "Laia, zawldawh taka ṭawng tur zawk i ni e, in thlavang hauh ngam tu Lal huaisen pawh inneih loh hi" a han ti let sak a, Laithanga thin chu a ur hle mai, mahse, a nupui neih nî a buaina chawh chhuah a duh loh avangin a ngawih san hram zawk a ni. Mipui ruai kil laite chu kil tui tawh hek lo, an haw ta sap sap a, Laithanga pawhin a farnu Laimani hnenah chuan "Mani i u Lianite hi lo zu hruai haw tawh. Ka lo haw ve thuai ang" a ti sap a, Liankimi chuan "Ni lo, i bula ka awm ve zawk ange" tiin a banah a rawn chelh a,Chherliana chu a melh pah zuk zuk a, Laithanga chuan Liankimi kut chu zawi muanga lak thlak sak pahin "Liani, zu haw rawh, a sawi ang khan ṭhian kan ni ngei e. Engmah a thleng dawn hleinem" a ti a, Laimani chuan "Ni e, U Liante, lo kal rawh. U Chhera saw'n ka u hi a khawih hauh lo ang. Thil awmzia inah ka hrilh vek ang che. Bawihte lo kal rawh le" tiin Ngurliana chu a pawm kang a, Liankimi pawh chuan hrilhhai takin a zui ve nghal a. Lal mualah chuan tlangval leh pa valai deuh ho chu an kim hle a. Khawlailung Lal Chhuanliana pasalṭha chhuanvawr Chherliana chuan an chhiah khua Bungtlâng lakah chuan an thil phûtte chu a han sawi zat zat a, Lal Sailiana pawhin hnial lem lovin a tlangvalte a lakkhawm tir zung zung bawk a, an zawh fel meuh chuan khua a thim der tawh a Khawlailung ho chuan khaw dai lama riah an thlan zawk avangin pasalṭha Chherliana tih loh chu khua aṭangin an chhuak vek a, Chherliana pawh rang takin Laithanga te inlam a pan nghal a, a zu thlen chuan Laimani chuan Ngurliana chu a lo fiam nui ker ker a, "Kha, Mani tu nau nge?" a zu ti lut nghal a, Laimani chuan "Aw, ka u fa anih lohte'n tu fa nge ni chuang ang?" a lo ti a, Chherliana chuan "Uai, Laia nang hi i zia a inthlak hlawk mai a" tiin Laithanga chu a be zawm nghal a, Laithanga chuan chhang lem loin a lo nuih suk suk a. Chutih lai tak chuan Laithanga pa Pu Zalawma chu rawn ṭawng vein "Chhera, in Lal hian kan chungah Lal a va hrawt rei ta em. A nunna chhanhimtu ngei pawh ka la dam ve ṭek ṭek tih chiang takin a hre reng si a, ti chung chuan chu a nun chhantu chenna khua ngeiah chhiah a khawn duh a nia. Kan vanglai kha la ni ngat se zawng, a lu ka la ngei ang"a han ti ram hmak a, Chherliana chuan "Ka pa Lawm, kan Lalpa zia hi a danglam chak khawp mai. Ro thil hlu hian a thluak a tinu zo tawh anih ber hi. Kei ngei pawhin nin châng ka ngah a sin. Mahse, i hriat angin he khua ka chhuahsan laia min lo tuamhlawm duhtu a ni a, ka phatsan thei si lo a ni. Chu lovah he khua ka chhuahsan dân kha ka theihnghilh thei bîk lo, ka diknate hailan ni tawh mah se Lalpa min ṭawngkhum dân zozai khân ka tha a la ti na tlat a ni. "a ti ve a, Pu Zalawma chuan" Ni e, a pawi teh zawng anih hi. Nangni Lal kher puihna rawn dil lo khan hei ka famo Liankimi pa Lal Zabiaka te hi lo va be zawk i la chuan tiang hi kan ni bîk lo ang"a tih lai chuan Chherliana chu a lo meng phawk hru a, "Kha pa kha Lal Zabiaka maw anih a? Tin, i monu hi a fanu ngei maw?" a han ti a, Pu Zalawma chuan "Ni tehreng e maw le" tiin a lo chhang a, Chherliana chuan "Ka rei maw, chuti he khua hi chhuahsan u la, va bêl ve hmak zawk teh u. In hriat angin he khuaah hian nangni chauh hi chhungkhat anga ka tlawh ngam in ni a, kha ka chunga thil duhawm loh tak a thlen lai pawh a ka lam ṭang awm chhun in nih avang khan ka rilruah in thi ngai dawn lo. Nangni vang hian he khua a chhiah khawn tura rawn kal hi ka tan chuan a nuam hauh lo tih min hriat sak ka ring" a rawn ti a, Pu Zalawma chuan nuih kur kur pahin "Chhera i rilru a awm awm hi sawi chhuak phawng phawng suh ka tih ṭhin che kha i theihnghilh leh tawh niin a lang" a lo ti a, Laithanga chuan "Hawh teh, i tei chhuak teh ang" tiin a hruai chhuak ta daih a. Hmun fianrial remchang laiah ṭhu dunin Laithanga chuan Liankimi a tawn dan zawng zawngte chu Chherliana hnenah chuan a hrilh vek a, Chherliana pawh chuan ngun takin a lo ngaithla a, Laithanga'n a sawi zawh chuan "Chutiang anih chuan Pasalṭha Ngurzika fapa hi i intiam ang ngeiin inenkawl seilen a ngai anih chu. Puih i mamawh hunah chuan i tan ka awm reng ang" a ti charh charh a.

Lal in lamah chuan khaw hnih Lal pahnihte chu an ṭhu dûn a Lal Zabiaka chuan Lal Sailiana hnenah chuan eng vanga Lal Chhuanliana chhiah khua ni nge an nih tih a zawt a, Lal Sailiana chuan hui deuh pap pap pahin "Hun rei tak pawh a la liam lo ve, ka ṭhian sabeng ni ṭhin ka tlangval lai zawng zawnga ka kawm ṭhin kan khaw pasalṭha Hlunchhîngate chhungkua vangin he kan buaina hi a inṭan a tih theih âwm e. Hluna fanu Daizîngi kha Khawlailung pasalṭha pakhat lakah a lo inphalrai deuh a ni âwm a, fa hial a lo pai ta si a, a fa paina pa lah khan a lo nei leh duh si lo a, kan thinurin an khua khi kan han rûn ta a, harsa takin hnehna kan chang a, mi leh sa kan inchân hnem hle nghe nghe. Kei ngei pawh chu rammutnaah chuan kalin ka fapa Saithanga hi rawlthar a la ni a, Hluna fapa Chherliana nen Laithanga telin an pathumin ka hruai ve a ni. Mahse, kan rûn dawn tih kha Daizîngi pek khan engtin tin emaw ni a lo han hrilh hre hman pek a, kan khaw lam panin tlangval an lo intir ve hman tlat a, kawng ṭum pangai an zawh loh avangin kan intawng lo a ni, kan khua kan thlen leh meuh chuan khaw hmun nghâk kan tlangvalte chu an lo mang barh mai a, kan nulate lah salah an man hnem hle. Chherliana nu leh pate mai bakah a farnu Daizîngi pawh an that a ni. Kan thinur lutuk chuan rang takin Khawlailung lam kan pan leh ta a, mahse, Khawlailung kan han thlen meuh chuan kan khaw rawn beitute chuan Chherliana ber hi kan run dawn tih thu hrilh hre tuah an puh ta vek a, an pasalṭha, Daizîngi fa paina pa ngei phei chuan a finfiahna'n Chherliana vaibel a rawn keng lang bawk. Ka thin a urin Chherliana chu khúa aṭangin ka hnawtchhuak ta a, a ni thinur chuan amah chauhin Khawlailung khua hi a han pan ta a, a farnu fa paina pa chu inmalbeihah chovin a han that a, chutah ka hnawhchhuah tawh thu Lal Chhuanliana'n a hriat avangin a khuaa chêng turin thlem chitin rengin a thlem a, Chherliana hian ka laka phuba lak theihna anih ringin a chên phah ta a ni. Kan nulate tlan chhuahna'n sial sawm an phût bakah an chhiah khua kan nih an phût a, ka khaw mipuite lah Daizîngi thlavang ka hauh luat avanga kan chhiatna tawh avangin ka chungah an thinur nasa mai si a, Lal Chhuanliana thusawi chu ka pawm ta mai a ni. A hnu rei lo teah Chhera dawta an puhna chu kan hre leh a, ka inchhir hle nghe nghe. Mahse, a ni erawh, a duh ang takin ka lakah a sual chhuah theiin a awm ta anih hi"a ti charh charh a, Lal Zabiaka leh a fapa Saichhûngate chuan an lo ngaithla uluk hle. Lal Zabiaka chuan "In buaina chu a va kual nasain a thenfai pawh a awlsam dawn hauh lo anih chu. Chherliana leh Laithanga hi ṭhian ṭha tak an nih hmel a, hetia a pan chat danah hian?" a han ti leh a Lal Sailiana chuan "Ni e, khatih lai khan Laia pa hian Chhera chu dawta an puh anih a rin thu vawi tam min hrilh a, mahse, ka thinurna khan min hneh em avangin ka awih duh lo a ni. An ni chhungkua ka khuaa an la awm avang chauh hian alawm Chherliana hi a duh ang taka a chet theih loh. Ka khuaah hian an ni chhungkua hi awm lo ta se chuan pawih ho chhiah khua nih nen danglamna a awm lo vang a, Chherliana hian a duh duh hunah Lal a rawn hrawt ngei ang" a ti sap a, a rilru chu a hah hmel hle.

A tukzing khua a lo var chuan Pasalṭha Chherliana pawh a naute lam panin a kal dawn a, a ṭhian Laithanga hnenah chuan "Laia, i nupui neih thu hi chu ka lo zêp rih phawt ange. Mahse, Rotlâng khuate hian in thlavang hauh ngei an la tum ang. An pasalṭhate huaisen zia kan hre tlâng vek. Chutih hunah chuan kan Lal thu ka awih ngei a ngai ang." a ti a, Laithanga chuan "Chhera, kan Lal i huat ang tluk zetin in Lal khi ka haw ve tih i hre chiang hlein ka hria. Ka nupui neih thu hi chu zep lo zawk la a ṭha ang. Chuan, kan la rawn che chhuak ngei ang engtikah emaw chuan. Ka kawng dal zawnga i chet loh hram ka beisei" a han ti sak a, Chherliana chuan Laithanga chu en vang vangin a hmelah chuan sawi tur a haihchham hmel hle. Thawk halh pahin "Dam lo hauh la. Rotlâng khaw lama pem kha lo ngaihtuah ṭha leh zawk rawh u. Saithanga kha ka la dam ve thu lo hrilh ang che. A pa vang chauh a tlawh lo ka ni tih pawh lo hrilh rawh" tiin a kal san ta a. A naute awmna a thlen hma chuan a inngaihtuah nasa hle, a ṭhiante pahnih Laithanga leh Lal fapa Saithangate chu a rilruah an thi thei tak tak si lo, a farnu hurherh avanga hetia an awm tak mai dante chu ngaihtuahin a ṭhianpa nupui nei ngei pawh a duh angin a lawm pui thei si lo. A kal liam dawn chuan haw letin Laithanga khaw lam pan mêk chu a thlir vang vang a, "Laia, ka tluk ngai lo che tih kan hria, kan intawng palh anih pawhin a tlu zawk ka ni ngei ang. Nupui fanau i nei tawh a, a dam zawk nih pawh i phu reng reng. Kan lo suangtuah ang ngei a Saithangate nen a han ramchhuah hote kha ka la châk reng ṭhin . Mahse, khuanu hian keini inkarah hian ramri a kham tlat si" ti supin a kal liam san ve ta a.

Zînga leh Khumate pawhin an thlenin pa hnen aṭanga thil thlen dan an hriat vek tawh avangin pasalṭha Laithanga leh Chherlianate ṭhian dun chu an khawngaih ve hle. Anmahni chanah an han dah a, Laithanga leh Chhera leh Saithanga te nen an dinhmun inan lohna chu khaw khatah an leng ho a, inngeih takin an inkawm tlâng tih chu a ni mai a, a bak chu Lal fapa pakhat leh a ṭhian hnamchawm pasalṭha pahnih ve tho an ni a, an dinhmun chu an hrethiam phak ruai ruaiin an inhre ve a ni. An ni erawh inlungrual taka inkawm an thei ve tawh si lo. Bungtlâng khuaa ni khat dang an châm leh hnu chuan an khaw lam panin an haw ve dawn ta a, Liankimi chuan a pa leh a nau chu mittui nen a rawn thlah a, Lal Zabiaka pawhin insum har a ti ve hle. Lal Sailiana nen an inchibai lai chuan Lal Zabiaka chuan "Engkim hian tawp chin a nei, Khawlailung nen in inkara inrawlh tumna hi ka nei lo a, nangmah ngeiin chingfel thuai ang che." a ti sap a, ti chuan Rotlâng lam panin an kal ta a.

Lal Chhuanliana "Lal Sailiana mai mai chuan, a Rotlâng khuate nen inzawmna a lo siam a maw? Chherlian Laithanga lu chu i rawn la nghal daih lo nia" a han ti hrawk a, Chherliana chuan "Laithangate chhungkua leh Lal fapa Saithanga chunga kut lêntu chu ka hmelmaah ka pawm thlap ang. An ni tih loh khu chu ka tan pawimawhna nei lo vek an ni thung" a ti lêt sak a, Lal Chhuanliana chuan "Chherlian, i awka chhuak hi ka ngeng chhun zawng a ni fo mai. I fimkhur a ngai ang" a han ti let sak a, Chherliana chuan Lal in chu chhuahsan pahin "He khuaa ka awm chhan chu chiang takin i hria. I khaw mipuite hian nang ai hian min ngainain min thlamuan pui zawk a sin. An lusei pui laka chhiah khawntu hi an thinlungah an dem vek ngei ang che. I khuaa awm tura min ṭahawh lai a i thusawi kha hre reng la, ka duh loh zawngah mi nek hauh suh, dam chhan ka nei lo tih i hria, thih hlauhna hi ka nei ve lo bawk. Ka nunna lak tum zawnga i che anih pawhin ka inpeih reng e mahse, mi engemaw zat chuan pialral lamah min zui tel ve ngei bawk ang. Ka kuta thi an ni lo anih pawhin i khaw mite ngei, ka thlavang hauhtute kuta thi an ni ang" ti vawt raihin a kal nghal a. Lal Chhuanliana chuan thinur takin "A chhung leh kuate a chân vek avangin sal nula pahnih ka pe a, fathang ka awl bawk. Ka tana thil ṭha a tihte hriat sakin ka pasalṭha nunna a lak ka theihnghilh a, ka hmelma mah ni se ka lainat avangin ka khuaa awm turin ka sawm a, min ngaina lo hle tih pawh ka hria, amah a a awm awm a awm turin ka thlah zalen rei ta. Chherliana hi ka kham ta mah mah a ni" a han ti sak a, a fanu Chherliana ngaizawng em emtu Thangzuali chuan zawi sap hian "Ka pa, U Chhera hian i thu a hnial ngai chuang hleinem" a lo ti dam diai a, Lal Chhuanliana chuan a fanu thusawi chu dik pawh a ti hle, mahse, a mizia hi a kham tawh em a ni. Chherliana in zu thleng chuan a sal nulate chu koin "Lalpa hian min thah a la duh hial ang. Chutih hunah chuan ka thih rual rualin midang kutah a pe dawn che u. Chutiang thil induh loh chuan ka thusawi hi ngun takin ngaithla rawh u" tiin Khawlailung aṭanga Bungtlâng khaw panna pumpelh,an Lalpa nen chauh a an hriat rûk, leido khuate nen buaina an tawh huna khaw mipuite relhrukna'n a an lo duan rûk chu hrilh vekin "Bungtlang khua in thlen veleh Pasalṭha Laimana emaw Lal fapa Saithanga hnenah ka thih thu hrilh u la, an ni'n tih tur an hriat bakah an khuaah nuam sa takin in awm thei ang" tiin a ṭawng charh charh a, chutiang thu a sawi ta mai chu a sal nulate chuan mak an ti hle, mahse, Chherliana hmela lungngaihna inphum tlat avang chuan an zawt ngam lo a, anmahni duat taka enkawltu, vawi khat pawh an hmeichhiatna la khawih sak lo tu Chherliana sal ni lo a midang sal nih ai chuan Chherliana thusawi chu zawm ngei an tum a ni.