HNUNG TAWLH NGAI LO MI HUAISENTE - 31

Phulraw ngaw hnuai thim deuh ruihah chuan mi hrangvâlte hnuaia inzir mêk Tinthanga leh Thangvungate chu an vâk ve a, an zukchal hnu chhui lai chu hloh palh hlau takin muangchângin an chhui a, nau rîlṭam hun a nih meuh chuan an hnu chhui lai chu an hnaih tawh hle tih a hnim rah tluk rawn tho leh mêkte aṭang chuan an hrethiam vek a, mahse rin loh takin an hnu chhui lai chu rawn chhilh hnantu an awm ve tlat mai. Zan lama an sarêp rawn beiseitu bawk kha anih ring nghalin Zînga chuan "Hei kher hi chu min chuh pui thei tawh lo ang. Hma ka hruai anga, Khûma nangin chhak leh thlang lam lo en reng rawh. Saia a hnung lo dawl a, Tinthanga leh Thangvungate kha i hmaah kal tir rawh" a rawn ti nghal a, an sazuk chhui mêk chu keipuiin a chhui ve tih hre mah se lêt san tumna reng reng an nei lo a, a theihtawp chhuah a ṭan an tum a ni. Tuibur hmuamda vêl an chhui leh hnu chuan Belkhai lui hnâr lam an thleng ta reng mai a, kawrteah kamah chuan an zukchal chhui mêk chu a lo bawk a, Zînga chuan a hmaa hnim pik chu keu da dain Zukchal ki ropui zet chu a va hmù nghal a, Khuma chu mitmei nghal zeuhvin Khuma pawh inring takin a hnungah chuan a lo ding nghal a, Zînga chuan zukchal chu tin vang vangin a zakdawhah tak a lung pawh tûrin a han ver siah mai le!! Zukchal zuan kân awk rual chuan chhak lam aṭangin zukchal sa lo beisei ve tu sakei pawh a rawn zuang dawk ve nghal zawk a, Khuma silai chu puak ve nghal ṭhuaiin chu keipui chu a tawm nghal chawih nghe nghe. Mahse, a sa huatah a fuh chiang lo deuh nge keipui ṭhankin tawh tân ngenmu pakhat lek chu thih pui tham a ni tlat lo. Rawn ding chhuak lehin Khuma te lam chu a rawn pan ta chher chher mai. A rum rite chu dawih deuh tan chuan zun cheh ṭhawt ṭhawtna tham a ni. Zinga leh Khuma silai sawh lah an la zo mai si lo, Saichhûnga chu rawn kal hmain a silai chuan sakei chuba rawn tin vang vanga, a silai puah hma deuh chuan chu kei pui chu a rawn zuang kang hman hlauh a, vanduai thlak takin Saichhûnga chuan a sahuatah kâp loin a dul nêmah a va kâp a, mahse, a tha ti chawl tur tawk lek chu a ni thunga, an awmna aṭanga hlam thum velah chuan a tla ri dawp mai a ni. Chu veleh tihngaihna dang awm tawh hek suh Tinthanga leh Thangvungate chuan an chem nen sakei awmna lamah chuan zuang pheiin sakei rawn tho chhuak mêk luah chuan an va hêm ta pawp pawp mai, keipui mangang inlêng vêl chuan Thangvunga âwm chu ham thlêr duai pahin a beng thâl chiang hle. Khuma leh Zingate chuan va pui ve nghal vatin chutia tlangval pathum laiin kut an thlâk takah chuan a mangang chu tlan chhiat a tum ta. Mahse, Lal Fapa Saichhûnga silai rawn puak ṭhuai chuan a sahuat rawn fuhin a nunna chu tihtâwp a ni ta hlauh thung. Thangvunga hliam chu an han en a, rin ai takin a lo kak thûk lo a, sakeiin a benna erawh a lu a haiin a lu chu a bek veilam chu a thi deuh ser ser hlawm a, Khumate chuan an damdawi hmuh theih ang angte la khawm in a thi chu tih tâwp an tum a, rei ngial an beih hnuah chuan an ti tawp thei ta hrâm a, an châu tlâng hle. Sapui huhâng ringawt pawh chauh pui tham anih laiin an la inbei hrep zui nen eng anga pasalṭha tan pawh a hahthlâk lam hret chu a ni. Zînga Sazuk kah erawh a lo thi chiang hle mai a, Khuma nen chuan chan nghal sawk sawkin pali phur tûr an han siam a, ti chuan muangchângin bûk lam chu an pan ta a. Thangvunga chu hma hruai tîrin a hnungah Zînga chuan a zui zêl a, a tuar a feiin thisen a hloh nasat tehlul nen chhel takin a kal lui ve zêl a, kawng chanve vel an kal hnuah erawh a chau deuh nge ni thingtuai hawlin a kal ta thung a, puih an tum lahin ṭan taktêin a ṭang tlat bawk si, chu lo vah pasalṭha huaisen tâk ni tura chher chhuah an tum avang hrim hrimin tawrhchhel zîrna'n atana a ṭangkai zia an hre bawk. Bûk an thlen chuan chawl hahdamin an han ṭhu a, sakei an beih laite chu sawiin an hah ziate an sawi sap sap a, Thangvunga erawh lungpui nghenchhanin a lo muhil bawrh bawrh tawh thung. Bûk chhungah zawn lûtin Saichhunga chuan " Thangvunga hi haw pui mai chi a ni dawn tlat lo. Zualko kan kal mai a ngai a ni. Khuaah ka lo han kal ange. Kan bengtawia pawh nangni'n he lamah lo thiar phei u la" tiin rem a ruat a, chhun chaw te bak sawk sawkin khaw lam pan chuan a kal ta nghal a. Zinga leh Khuma leh Tinthangate chuan Saichhunga keipui kah chu harsa tak chungin bûk lamah chuan an thiar phei a, an chau tlângin buk an thlen leh meuh chuan Tinthanga pawhin tlawmngaih chhuah harsa a ti tawh hle a, zanriah chhumna tur tui a chawi zawh leh meuh phei chuan a ṭhu zawi ve ngawih ngawih hial a ni. Zînga leh Khûma te chuan rawn khapin anmahni zawk chu an rawn insangmar ṭha leh a, ti chuan zanriahte chu an buatsaih ve leh ta a. Thangvunga erawh mut tir a ṭhat zawk an rin avangin an kai tho duh lem lo a, an pathum chuan zanriah an kîl a, an ṭhianpa hliam tuara mu reng chu an rilruah a awm reng vang nge a tu a mahin an ei tam thei hauh lo. Zan riah an kîl zawh chuan an taksate pawhin ngai a rawn awh ve leh ṭan ta a, bûk kawtah chuan ṭhuin an titi a, vaibelte ṭan kaiin Khûma chuan "Sapui hi chu pawng ngam miah loh tûr a ni a, kan pawi a sawi hmasate anih loh phei chuan kutthlak hmasatu nih miah loh tûr. Ramhnuai pasalṭha an ni a, kan tihnat hmasak loh chuan min ti na hmasa mai mai ngaih bîk lo a nia. Beih a lo ngai anih pawhin fimkhur takin kan bei tur a ni, sapui hliam tuar ngat phei chu an kawlhin beih pawh an har zêk a nia"tiin Tinthanga chu a hrilh mawlh mawlh a, Tinthanga chuan "Kan lo hre lo a ni. Lo bei lo i la chuan Vunga pawhin hliam a tuar lo tur" a lo ti zuai raih a, Khûma bawk chuan "Ekhai, inthiamlo duh reng reng suh. Tiang dinhmunah kha chuan beih pawh a âwm reng a ni. Khaw lama tlangvalte an rawn thleng anga Thangvunga chu in lamah kan enkawl anga, a dam ṭha leh mai ang" tiin a ṭawng thlamuan a. Khaw lama lêng hawn ar khuan hun velah chuan an lam pan a meichher rawn inzui duah duah chu an hmu ta a, chu veleh an bûk lama an bungrua te chu lo siam fel sain an khaw tlangvalte an rawn thlen chuan Lal fapa Saichhunga sakei kah leh Thangvunga zawnna turte an han siam a, an inpeih fel ta maw tihah khaw lam pan chuan an kal chhuak ta a.

Lal Zabiaka chuan a fapa sakei kah chu a lu ai ngei a tum ruh hle. Zînga sazuk kah pawh a lu a ropui bawk a entu an tamin Zînga leh Khumate chu an ngaisâng zual hlawm hle a, Lal leh upate meuh pawhin Khûmate in chuangkaiin Zînga zukchal kah lu ropui zet leh a ki hreu bum maite chu an en ve nghe nghe a ni. Saichhunga sakei kah lu an ai nî chu a ropuiin khawtlângin awm nî an kham a, ruai an kîl mup mup mai a ni. Zu leh sa a tamin zan lamah pawh nula tlangvalte chu Lal mualah an chai mup mup a, Zâmliani pawh Khûma nen inngheng rialin an ṭhiante lâm chu an en a. Chu zân zet chu a nuam hle a, Lal mual aṭanga kawtchhuah chhak lam sawntlung pawng awmna chenin a âwl lo hle. Khûma pawhin Zâmliani puan chu kêuvin a mal var paw phuk mai kârah chuan a kut rawlh lutin a han zen a, an chhak lawkah Zînga leh Saichhûngate chu hnim buk phênah lo awmin Khûma che tla lai chu an kap dawm meuhin an lo thlir vung vung bawk a.

Tukṭhuan kîl lai chuan Lal Zabiaka chuan "Hei, i u Vanhmuaka chu a in dang tawh a, a ma khuaah ngei ro rêlin a ni te a chhiar ve mêk a ni. I farnu lahin khiangawiin mual min liam san tawh a, a fapa lah a hruai tel daih bawk si. Tu lawm tur nei loin i nu leh pate kan awm reng mai a, kan ṭhenrual, kan rualpuite chuan an tute an kai kawi diah diah mai anih hi. Nang pawh ranngo zawngin chhuak ve tawh la a ṭha ange. Zînga emaw Khûma hruai la, an pahniha chhuah erawh ka remti lo thung. I nu pawhin mo tha chhawr ve te pawh a châk tawh viau a nia"tiin a fapa Saichhûnga chu a hrilh malh malh a. Saia pawhin dik a ti hle, mahse, ranngo zawnga tlangval a pumpa han tei chhuah chu a peih zawng a ni lem lo hle a,mahse, a pa thu erawh hnial a tum lo thung. A nu chuan "Ni e, Taite, i nu leh pate hi kan kumte a lo upa ve ṭan tawh bawk nen. Nang lah i vak chhuak tam telh telh mai si a, kan khúa a harin naupang han kawi turte hi kan it ve a nia, naupang infiam nui ri awm lohna chhungkua chu Lal chhungkua pawh ni se a hlim tak tak thei lo a ni tih hre reng rawh" a lo ti ve bawk a, chutia a nu, hmeichhia a zawnga zahawm ber Lal nu ni awm reng a ni ti a miin an sawi ṭhin, a thusawi reng reng vîn ngai hauh lo, mahse, mi thinlung hneh em em zel thung, a kam chhuak mi dîp na tak leh zawm loh aia zawm ngei ngei châkawm ṭhin pawhin a pa lam a ṭan takah chuan a nu leh pate rilru chu a hrethiam uaih uaihin a inhria a, "Nangni'n in tihte chuan le. Zînga leh Khûmate ka lo be ve phawt anga" tiin a chaw bar chu a kham san a. Zingate in lam panin a kal ta a. Zingate unau bulah chuan a nu leh pa thusawite chu sawi chhawngin "Ka pa'n a ruala khua in chhuahsan a phal si lo a, a tu emaw zawk zawk hianin min zui u la, Tinthanga hi hruai ve bawk i la ka lo ti rilru deuh a" a ti a, Zînga chuan "Ni ang hmiang. Keimah ka lo kal ange. Khûma zawng Zamliani hmel hmu lo va a awm hunah a lungleng hmel a pe chhe leh dawn lulai emai. Lo awm vêl mai mai teh se" tiin a nui suk suk a, Khuma chuan "Tehchai che chuan. Hmeichhia vang mai mai a thil ṭul tih loh te chu ka duh zawng a ni hauh lo" a lo ti ve a, mahse, Saia leh Zîngate chuan an nuih suk suk duh chauh va. Saia chu Tinthangate in lamah kal lehin Tinthanga chhungte bulah chuan Tinthanga chu zin chhuahpui a duh thu a han sawi a, Tinthanga nu leh pate chuan lo phal viau mah se an fapa chu a la nau si a, an ṭuan ti fumtu lek anih an lo hlau em em a, mahse, Saia chuan thiam taka thlêmin a tawp a tawpah chuan an phal ve ta hrâm a. Zan lamah Lal inah inhmu khawmin Lal Zabiaka chuan "Chhîm lam tlâng dung in zawh duh anih chuanin Thingfâl khuate, Zehtet khuate in paltlang a ngai anga Zehtet aṭangin khaw thlang lam in pan thei bawk ang. Hmar lam tlang dung in zawh anih chuan Serte Lal Sairoliana saw ka ṭhian a ni a, khual ṭha thlenin a lo thleng ngei ang che u. "tiin an kalna turte chu a hrilh a, ngun taka an ngaihtuah tlân hnuah hmar lam pan zawk chu an ti tlu ta a. Zîng khawvar hmaa chhuakin Serte khaw lam chu an pan ta vang vang a.

" Nang ang Lal fanu hmelṭha ka hmei i han ni mai tûr hi chu aw. " tih paha a mal leh dûl nem lai zut kual saktu Pasalṭha Hlâwncheuva chu Lal fanu Sairêngi chuan hlau khur hlawk hlawk chungin ngaihdam a dîl mawlh mawlh a. Hlâwncheuva lah chuan "Lal fanu lungngai suh ka ti na hauh lo ang che. Kan khua kan thlen hunah erawh ka hmei i ni thung ang. Tunah chuan i pa Lalna khuaah ngei i la awm e" tiin deuhsawh takin a han ṭawng khum a. Lal sût vuan a an phuar beh Serte Lal Sairoliana chu Hlâwncheuva chuan chhir zawt pahin "Khaw khat Lal ve meuh si i va chau hma ve. Ṭiau râl aṭangin hmar lamah ka rawn kal a, chauh a hnêkin ka phur zual sauh sauh a sin" a han tih khum a, Lal Sairoliana chuan "Tlangvâl zahngai hram rawh" tih chuai raih pahin amah huat hmêl taka melh tu tlangval la naupang tak, pasalṭha nunrawng leh hmingthang em em ni bawk Hlâwncheuva chu a mitmeng dul tak chuan a melh ṭawk ṭawk a. Hlâwncheuva chuan nuih sak pahin "Lalpa, i sawi ang ngeiin le. Zanin bâk kan riak tawh lo vang. I fanu erawh ka ta a ni ve tawh thung dawn a ni. Mahse, zanin na na na chu i nupui hian ka rawng min bawl sak leh rawh se." tiin Lalnu hmelṭha chuai thei lo an tih mai Vânkhûmi chu khum pui lamah a nam lût rawk rawk a. A kaihza vengtute chuan an lo nuih ṭhaw hlawm a, chu zân zet chu Serte khaw nulate tân zan duhawm loh tak a ni a, an lawmpate tan chauh va an lo khêk an thianghlimna chu halkha tlangval nunrawngte chuan lâk sakin nawm chênna'n an hman sak a. Lusei nulate an ṭah rawih rawih lai chuan Lal in leihkapuiah chuan rawlthar pakhat hi vân lam hawiin a ding a, a rilru ngaihtuahnaah an thil tih ṭhin chu ṭha tih lohna a nei lian hle. Mahse, amah kaihruaitu Hlâwncheuva thu a zawm ngei a ngai tlat bawk si.

Serte khaw kawtchhuah an thlen chuan a lo reh ṭhap a, naupang sava veh tak ngial pawh hmuh tur a awm lo a, khaw chhung lam chu a reh ṭhiap bawk. Zînga chuan "Buaina kan tawk dawn a va ang ve." a han ti sap a, Saia chuan "Ka pa ṭhianpa anih angin kan tlan chhiat san thei lo ang. I lût vat teh ang u" tiin khaw lam pan chuan an kal nghal a. Khaw mipuite chuan an Lal fanu hmelṭha Sairêngi Halkha pasalṭha Hlâwncheuva'n Lal in aṭanga a rawn kêk chhuak lai chu mittui tla zawih zawihin an lo en reng a. Sairêngi chuan khawngaih dîlin a au lawm lawm a, a puan tla tûr chu thei leh thei loin a dawm ṭawk ṭawk bawk a, Halkha tlangval sawmhnih rual tih loh chu khuaa awmte mittui chu a tla vek a ni. Lalnu Vânkhûmi chuan Hlâwncheuva banah chuan chelhin amah hruai zawk turin a han ngen a, Hlâwncheuva lah chuan nam thlûk ṭhuai pahin a puan chu a phih thlâk sak nghal a, Lal nu saruak ngal ngata awm chu chhir zawt pahin "Nang pitar tlaktlai lo hi ka mamawh lo che" tiin Sairêngi tlan chhiat tum lai tak chu manin a beng hawi nghal sawk mai a. Sairêngi kal pui leh a tum lai tak chuan a hmaah palian tak mai hi rawn dingin silaiin a rawn tin nghal riap mai a, "Thlah rawh anih loh chuan i thi ang" tih ri chu zawi hle mah se a hrechiang kher mai. Hlâwncheuva chuan Sairêngi nam thluk tawp pahin "Uai, khual vâl huaisar tak i ni ngei ang maw?" tih pahin Sairêngi samah chuan a han kêk a, a chema a hrawka chuktuah pahin "Kiang rawh. Lal fanu nunna hi i kutah a awm e" a han ti leh sak a. Saichhunga chuan "I zui ve nghal duh leh duh loh a thu a niang chu" a ti let ve sak a. Halkha ho chu rawn hnaiin an rawlthar huaisen insual thiam em em mai, Hlâwncheuva tluk hial a an rin Zathanga chuan Saichhûnga chu silaia tinin "I zui ve nghal dawn tihna anih chu" a rawn ti ve sak a. Mahse, a hma zawna amah ang rual vêl rawn ding lam chu hawi pheiin Tinthanga nen chuan an inmelh ta ngar ngar a. Chu tih lai tak chuan Zînga chu silai lek kawh vâ chunga rawn chhuakin "Lal fanu khan a chenna khua hi a chhuah san lo ang. Anih loh chuan nunna chân tam tak kan awm ang" a rawn ti zawi sap a, Hlâwncheuva nen chuan an inen chiangin a tu zawk mah chuan an mit la sawn hmasatu nih an tum lo hle. Zînga hnungah chuan Serte tlangval la dam awm chhun tlemtete chu an lo ding ve bawk a. Hlawncheuva chuan "He hmun hi him dam taka kan chhuahsan anih chuan Lal fanu hi kan ti na lo ang. Mahse hre rawh, nang nen hian kan la intawng leh khawp ang" a ti zawi sap a, Zînga chuan "Lalpa thu thu a ni e" a tih lai tak chuan Lal in lam aṭang chuan silai rawn puak ṭhuaiin Halkha tlangval pakhat chu a thal tawp mai a, chu veleh Lal tualah chuan silai vawi li puak lehin Lusei tlangval leh Halkha pawih ho chu an inphêk nuai ta. Serte khaw pa, rammutnaa lo kal ve fo tawh, an silai tung tawhte chu an khaw chhanna'n a rawn pên chhuakin Halkha ho chu an rawn bei ve bawk a, Halkha ho chu rei lo teah an tlân ta a, Zînga chuan Hlawncheuva chu umzui vat in tuikhur kawnga a tlan lai chu a va nangching a, Zînga chuan "A tawp thlengin aw niang" a han ti sap a, Hlawncheuva pawhin "Ni e" tiin inring takin Zînga chu a hmachhawn ve bawk a, chutih lai tak chuan Zathanga leh Tinthanga pawh an lo thleng ve hlawl mai a, an ni pahnih pawh chu inbeih inpeih rengin an inhmachhawn ve nghal a, mahse chhak lam ah thawm lo awmin "An pasalṭhate kha helamah hian an tlan thla e um zui nghal rawh u" tiin an au lauh lauh a, Hlawncheuva chuan "Hun dang atan kan khek mai a niang chu. Ka tlawm rih ni mai teh se" a ti a, Zînga pawh chuan bûk nghut pahin "Ni e, pasalṭha inbeih dan dik takin le" tiin Hlawncheuva leh Zathangate tlan chhia chu a thlir liam a.