HNUNG TAWLH NGAI LO MI HUAISENTE - 32

Lalnu hmelṭha Vânkhûmi chu ngên mu tuar zîngah telin Lal Sairoliana leh a fanu Sairêngite chuan an ṭah hawm hawm a. Khawnbalw upate chu rawn kal hnaiin Lalnu chu zah takin Lal in chhûng lamah an zawn lût ta a. Lal fanu Sairengi chu a hmêlṭhain a pian a inkhaithli zarh mai a, a mawng bawr ni se lian em em si loin a chhîng deuh lah a, a nau châw bawm lah a lian mawi tawk fu. Mahse, chûng a ṭhatna zawng zawngte chu a lusûn khawharna chuan a hliahkhuh a, a nu ruang bawh a, a ṭap hawm hawm hmutute zîngah chuan insûm thei rêng an awm lo a ni. A nu ruang dâi thlân khura an zalh hnuah pawh khumpuiah bawkkhupin a nu ngaiin a rûm vawng vawnga, a pa erawh Lal tih takah inti pachang vatin a upate kiangah a ṭhu a, chutih lai tak chuan Saichhungate pawh Lal inah an lo lût ve mêk a. Lal Sairoliana chuan "Awkhai aw, min chhanhimtute kan lo mangnghilh der che u alawm maw le. Thupha ka chawi mawlh mawlh e. Khawi lam aṭanga lo kal nge in nih le?" a han ti a, Zînga chuan "Lalpa, kei leh ka naua hi Rotlâng Lal Zabiaka thlazar hnuaia chêng ve mai kan ni a. Kan ṭhiana hi Lal Zabiaka fapa Saichhûnga a ni e" tiin a chhâng a, Lal Sairoliana chuan "Zabiaka fapa maw i nih a? Zabiaka kha ka nun chhantu a ni a sin. Tunah a fapain ka khua min chhanhim sak leh ta" tiin Saichhunga hnenah chuan lawmthu a sawi mawlh mawlh a, "An pawi kan sawi pawh kan hre hauh lo. Kan khaw chhûngah rawn lûtin thlen in mi rawn dîl a, keiin mikhual kan lawm lem loh thuin ka lo chhâng mai a nia, ka khua awp betin nuam tâwlin hun an hmang a ni. Lo lang har deuh chu ni u la, ka fanu pawh hi ka chân ngei ang" a tih zawm leh zat a. Saichhûnga chuan "Lalpa, chutiang sawi a hun lo e, in tan kan tih theih tawk kan ti ve mai a ni. Keini chang lo pawh hian kha thil thleng kha hmu se an pui ve vek ang che u. Chutih rualin kan Lalnu fam hma lutuk erawh a pawi ka tiin kan thiam loh anihna chen pawh a awm tam hle mai ka ti" tiin a chhanga Lal Sairoliana chuan "Ekhai, chutiang ni lo e, Chemtei nu zawng a vanduai vang liau liau a ni e. Hawh teh u ka kiangah ṭhuthmun han rem ve teh u" tiin a ṭhut tîr a, zu te khawn hoin zanriah kîl dawn thleng chuan an inkawm hlim a. Zanriah kîl lai chuan Lal fanu Sairêngi chu a rawn tho chhuak ve a, Lal fanu fing tih takah mikhualte hmaah a tawrhna chu a thup mawi thiam hle a, mahse, tlangval satliah ni lo pasalṭha pangai tak pahnih Saichhûnga leh Tinthanga bakah khaw khat innghahna Zingchhuanate chuan engkim an hmu tlangin an hrethiam vek a, Lal fanu Sairêngi chu a puitling an tiin an ngaisang ru hle. Zanriah eikhamah chuan Zinga leh Saichhûnga te chu leihkapuiah ṭhu dunin an titi a, Tinthanga erawh Lal fanu puiin inchhung lamah a awm thung a, Saia chuan "Zînga, Rengi hi a hmel a ṭhain a fel pawh a fel viauin ka ring. Nangin hma la ang che" a rawn ti chhuak phawng mai a, Zinga chuan mak tih hmel taka Saia lam hawi pah chuan "Sailulian ât so ṭhin teh suh. I nupui tur zawngin kan kal a, chutia kei mi hmehbel leh daihte'n. Ngawi tâk rawh ni hnih khat vêl la cham i la, a lunglenna te han ziaawm se i tan ka chhai ngei ang" a han ti a Saia chuan "Zinga ka fiamthu hauh lo a nia, Rengi hi ka mi duh zawng a ni tlat lo" a han ti leh sap a, Zinga chuan Saia hmela tihtakna a hmuh chuan thawk deuh hak pahin "A va mak awm ve aw. A hmai fang a ṭhain Lusei lal fanu chu sawi loh nulate zîngah na na na chuan amah tluk hi an awm bîk hauh lo ang maw le" a han ti deuh hluai a, Zinga chuan "Chuti chu i nei dawn nia. Kei zawng la vah leh ka la duh tlat. Dam chhung kawp pui tur atan chuan duhthusam ngei neih ka duh" tiin inchhung lamah a luh san ta a. Zan lamah chuan Lal inah Lal chhungkaw khawhar hnem turin inleng an lo chuangkai sap sap a, Zîngate pawh a kil thim laiah a ṭhu ve rân bawk a. An nulate chu an hmelṭha hlawmin an mawng pawh a zâng tlâng hle a, Zinga chuan a rilruin "Kan Saia rilru hi zawng a mak ṭhin teh e. Heng nula zozai zingah hian duh pakhatmah a nei lo chu a nianga. Ka huphurh lawk ang ngeiin rei tak zin bo a ngai ngei dawn anih hi. Khuma lah a leng chhuak leh reng dawn si a, ka nu leh Thangtei ka ngaihtuah mange" a ti mawlh mawlh a. Inlêngte ṭin rual chuan Zawlbuk lam an pan ve nghal a, khual buan pawh awm loin Serte tlangval ho zîngah chuan an mu ve ta a. A tuk zîng tukṭhuan kîl lai chuan Lal Sairoliana hnenah chuan an zin chhuah chhan diktakte chu an han sawi ta a, Lal Sairoliana chuan rin ai takin a lo phûr pui ta phian mai, "Ka khua aṭanga chawhma kal lekah sawn Lal Chunglûra khua Zawlpui a awm a, a fanu Sanglûri saw a hmelṭhain rîmtu pawh a ngah a nia. Keia fanute hi chuan a nê pawh an ek pha teuh lo mai. Ka fanu hi ka chhuang ve viau a, mahse, Lal fanu Sanglûri nen chuan tehkhin chi an ni pawhin ka hre lo. Va rîm chhin u la a ṭha ang. A pa saw pate thinthawk kan tih ṭhin ang mai hian a thin hi a thawk leh phut ṭhin a, tin mikhual an lawm lo hle bawk, inphahhniam deuh tak si mahse a zuam theih miah loh turin awm u la, Saia Lal fapa i nihna kha i hman ṭangkai hun tak a ni. Chu bakah, hei Pasalṭha hmingthang Zîngchhuana in kawl a, chu lo vah ka hming in va sawi phawt chuan in tlatlum em em ang. Mahse,zanin tal chu hetah inla riak a niang chu. Kan khawharnate nangni tluka min hnêm thiam an awm si lo va"a rawn ti a. Tinthanga chuan "Zawlpui khua chu ka pa farnute khua a nia, an Lal fanu pawh ka naupan lai khan ka hmu ve tawh nghe nghe. Ka pa nen kan zin ṭumin ka pa khan khuavâng note anih saw tiin min hrilh nghe nghe a sin." a rawn ti chhuak ve phawng mai a, chu chu Sairêngi lawmah lo tlain" E, nangni hi inva inchuh buai vêl mai mai ange aw" a lo ti zauh va, Tinthanga zak lutuk chu a kun nghal daih a, a beng kawmte chu a rawn sen nghal tawn tawn a. Zinga nuih za lutukin Sairêngi lam a va hawi chuan Sairêngi pawhin a lo melh ve lai tak a ni a, an mit an la sawn rang dun hle. Chumi ni chu khaw chhungte fang kualin Zînga hming chu an lo râlkhat hriat ve fo tawh avangin an zah hlawm hle a, an ni pawhin nuam an ti hle. Lal fanu Sairêngi nen an mit pawh a intawng zing telh telh a, zanriah kîl laite chuan an innuih leh seih vei ṭhin a, zan a lo thlen meuh phei chuan inpawh takin an titi ve bawrh bawrh tawh a, Sairêngi lunglêng pawh a zia phah hle. A tuk zîngah chuan an insiam sawk sawk a, an thawmah Sairêngi pawh lo harhin chhun chaw tûr a rawn fun sak mawlh mawlh a, Zînga iptepuiah chuan khung sakin Zînga chuan midang hmuh loh hlanin a biangah chuan a piai sak zeuh va, "Kan lo let leh hunah ka lo tlawh leh ang che" tiin a hrilh ru sap bawk a, Sairêngi pawh lawm leh zah avangin sen tawn tawn chungin a nui vur vur a, ti chuan Zinga te kal liam tur chu a thlir ta a.

Zawlpui khua an va thlen chuan Lal in lam pan nghal vang vangin an han thlen chuan luh an han dîl a, tlangaupa lo chhuak vatin khawi lam mi nge an nih tihte chu a lo zawt a, an ni chuan ṭha taka chhangin tlangaupa chu an lo nghak a. Lut tura a rawn hrilh hnuah chuan lûtin Lal Chunglura chuan "Kha Rotlâng lam khual maw in nih a?" a lo ti a, Saichhûnga chuan "Aw Lalpa, kei hi Lal Zabiaka fapa Saichhûnga ka ni a, ranngo zawnga kan vah vêlnaah i ṭhian Lal Sairoliana Serte Lalpa sawn i khaw lam pan tûrin min hrilh a ni" a han ti nghal charh charh a, Lal Chunglura hmel chu rang taka inthlâkin "Lal Sairoliana chu ka hmuh lohna a rei tawh hle tak mai a, a ngaihawm vung vung mai alawm le in han sawi takah chuan. Ṭhu teh u, Lal Zabiaka fapa meuhin ka khua i rawn lawi luhte chuan khual ṭha thlenin ka lo thleng ang che u. Ka inah hian innghat u la a ṭha ange"a lo ti nghal hmawk hmawk a, anni pawh chu ṭhu vein Lal Chunglura chuan hahzu te a han zûk a, Tinthanga chuan "Lalpa, khawngaihin min hrethiam la, i khawngaihna leh i thlazarna hnuaiah hian ka pa farnu neihchhun ka nîte chu him dam takin muang leiah an chêng ve a ni a, an ni hnena ka thlen min phal sak ta che" a han ti sap a, Lal Chunglura chuan Tinthanga chu en vang vangin "Tunge i nî chu min hrilh thei em" a han ti a Tinthanga chuan "Lalpa, Pi Dâwlliani a ni e" tiin a chhâng let ve a, Lalpa chuan "A nih chu maw le. An fapa, i unaupa Luahpuia khu kan en bîk mêk, nakin lawka kan khaw innghahna ni mai tur ti a kan sawi ṭhin anih khu. Tlangaupa zu hruai mai ta che" a ti a, Tinthanga chuan "Lalpa ka lawm e" tiin tlangaupa chu a zui ta a. Lal Chunglura chuan " In khaw chanchin hi kan lo râlkhat hriat ve fo tawh a, in pasalṭha Ngurzika thih thu kan hriat khan 'Rotlâng khua chu chhak pawih hoin an zuam viau palh ang a' tiin kan lo hlauthawng ru viau hman a, mahse, kha Pasalṭha Thangkhumate unau in lo kawl reng kha lo niin, an ni unau hming kha helaiah pawh hian kan lo hre bel viau a sin" a han ti a, Saia chuan "Ni e, Lalpa an ni unau khi pasalṭha Ngurzika hnuaia seilian an nia, an huaisenin kawng engkimah kan tlangvalte chung en an ni a, an nuna bet tlat inngaihtlawmna leh tlawmngaihnate khi kan chhuang viau a sin. Hei hi Pasalṭha Zingchhuana anih hi" tiin Zinga chu a han kâwk vah a. Lal Chunglura chuan mên kâwk pahin "Aw haw, a leh ta zel chuan maw. Khual ṭha tak kan thleng anih hi maw. Kan khua hian mikhual hi kan lawm lutuk ngai lo va, chu vangin in lo thlen tirh a ka lo biak danah che u khan min ngaidam dawn nia" tiin Zinga chu a bia a, Zinga chuan "Lalpa, i khaw venhimna'na i thil tih hi a ṭhain a ropui ka lo ti viau zawk a sin. Ngaihdam dilna tur engmah a awm lo ve" tiin a chhâng let a, chutih lai tak chuan Lal fanu Sanglûri chu a rawn haw ta a, a rawn luh ruala mikhual tlangval pathum a hmuh avang chuan a tim deuh chawih mai a, mahse, a pa chuan lo ko vatin "Chemte, hei Rotlâng Lal fapa leh a ṭhiante an nih hi. Rawn chibai ve ta che" a lo ti a, Saichhûnga nen an inchibai lai chuan Saichhûnga chuan a en vung vung tih a hriat avangin a zakin a lai ru hle. A kalsawn hnu chuan an titi chu a ngaithla ru kar a, ranngo zawng an ni tihte a hriat chuan an khaw nula hmelṭhate chu a ngaihtuah kual zui nghal a, "A tu tak chuan Lal fapa hmelṭha chu nei dawn ni maw. A neitu chu tu pawh lo ni se a vannei khawp ang" a ti rilru a. Zanriah kil laite chuan Saichhunga'n a lo melh leh vung vung ṭhin avângin a zakin a lai ru em em a, ni dang ang pawhin a ei tam
ngam meuh lo a ni.

Zawlbuk lam pana an kal lai chuan Zînga chu a phun thla bul bul a, "Zahthlak lutuk. Khatin en vung vung tawh suh ang che. Lal Sairoliana thusawi kha hre reng rawh. A pa thin kan tih ur chuan a pawi dawn a nia. A fanu a biak danah leh a fanu chungchang a sawi danah a fanu hi a chhuangin a hauh hle bawk tih i hriatthiam ve vek kha. I mit kha veng deuh hlek tawh ang che"tiin Saia chu a hau hlak hlak a, Saia lah chuan "Ka thiam loh a ni. A hmelṭha em kher a ni. Zînga he Lal fanu zûnah hian ka uai der tawh a ka hriat chu" a rawn ti a Zînga chuan "Engti kawng zawng pawhin hma kan la em em ang. Mahse, fimkhur takin. Lal Chunglura mit ti kham lo zawngin kan che ang" a ti ta a. Zawlbûk an zu thlen chuan khaw tual tlangval ṭhenkhat an lo awm a, an ni mikhualte an hmuh chuan ṭha taka lo biain nula rîm turin an hruai chhuak ve ta a. An nula rîmnaah chuan an val upa a lo awm ve a, chu pa chuan an khaw hmingte leh anmahni hmingte a han zawt vêl a, Saia pawh chuan Lal Sairoliana thusawi kha hre rengin Rotlâng Lal fapa anih thu leh a ṭhianpa chu Pasalṭha Zingchhuana anih thute a sawi ve bawk a. Zawlpui tlangvalte'n Pasalṭha Zingchhuana an kianga a awm ve tih an hriat meuh chuan an zah thar hle a, a ṭhianpa lah Lal fapa a la ni zui leh nghal. Mahse, Saichhunga chuan thiam takin a titipuia hlim takin an inkawm ho theih phah ta a. Leng hawn ar a khuan takah chuan Zawlbûk lam an pan ta a, an va thlen chuan Tinthanga leh a unaupa Luahpuia pawh an lo awm reng tawh a, Tinthanga chuan "U Sai hei ka ni fapa Luahpuia chu anih hi" tiin in hmelhriat tirnate a nei a, Saiate pawh chuan ṭha taka chhangin Luahpuia chu Rotlâng lama zin ve ngei tûrte'n an sawm bawk a. Tlangvâl lêng an haw kim ta maw tihah an nula rîmnaa awm ve Val upa kha lo ding chhuakin "Hei, zanin chu khual buan tur kan nei leh tlat mai. Rotlâng Lal fapa Saichhunga'n a ṭhianpa pasalṭha Zingchhuana a rawn zin pui a, an nau pakhat kan khaw nu Pi Dâwlliani, kan unaupa Luahpuia nu vahpa ni bawk an rawn hruai tel nghe nghe. An ni hi buan ngam kan awm em?"tiin Zawlpui tlangvalte chu a han cho phur a, an ni chuan" Awm e"an lo ti rual ṭhup a, Val upa chuan "Anih leh a bul ṭanna'n an nau kha lo chhuak se, khaw tual tlangvâl aṭangin tunge lo chhuak dawn" an tih chuan Zawlpui tlangvalte chu chhuah an inchuh nak nak hlawm mai a, mahse, tlangval pakhat chuan "Luahpuia nen ngei khan inbuan teh se. Unau mah ni se, khual buan hun a ni a, an inunaunate dah ṭha rih rawh se" a lo ti a, tlangval dang ho chuan an pawm tlang tih lan tirna'n kut an lo beng dar dar a, chutah loh theih lohin Luahpuia chu a rawn chhuak ve ta a, Tinthanga nen chuan an puanvenah inman sakin an vir dun zak zak a, unau rei tak lo inhre tawh sa an ni lo bawk nen an inbuan chu an indîm loin tlangvalte mit pawh a tlai narawh. Chutia rei fe an vir dun zak zak hnu chuan Luahpuia chu a kâng ta lawp mai a, tlangvalte chu "Mikhualin a phawi e" tiin an lo au dur dur a. A thawh hnihnaah pawh rei fe hnuah Luahpuia bawk chu a kâng leh ta a, Tinthanga zawk chu chak a puan a ni ta. A dawtah Zînga chu lo pên chhuak vein Zawlpui Val upa chuan an khaw buan chak ber a ko chhuak ve nghal a, an han inhmachhawn chu an pian a inang lo hle. Zînga chu tlangval sa pan lam a ni a, tlangval zînga ek bathlar sang pawl tak a ni. A buan pui tur erawh tlangval tawi lam, sa muk ṭelh ṭawlh hi a ni a, an han inman a, an han vir dun zak zak hnu chuan Zînga chu a kâng ta lawp mai. Khaw tual tlangvalte chu an au nghal dur dur mai a, an khaw buan chak, hneh loh la tawng lo chu an chhuang hle. A thawh hnihnaah erawh Zînga chuan a tumpuipa tha pêk ṭhin dante a lo hriat chian tawh avângin a daikhalh hman zêl tawh a, a tumpuipa chuan a phawi thei ta hauh lo, Zînga lah chuan hmun remchâng a zawng ru ngar ngar a, a tumpuipa'n a bawp inkara a ke rawn rawlh a tum lai tak chuan Zînga chuan a tumpuipa chu hnaih chilh thutin a han ṭhu hniam a, chutah hnung lamah a bin ta ṭhuai mai le, thawm a ṭhain tlangvalte hmuhnawm ti lutuk chu an sahawk nasa hle. Zawlbûk bawhbel pawn lamah phei chuan patling an ding khat vek bawk. A thawh thumna an han ṭan leh chu a hma ang bawkin an vir dun leh zak zak a, Zînga chuan a tumpuipa ṭhu hniam tûr tha thlah lai tak chu nangchingin a phawi leh ta vawk mai a, chu veleh thawm chu a ai nasain a rawn awm a, an lo ral khat ngaihsan ṭhinin an khaw tual ngeia an buan chak ber a rawn hneh chu an ngaihsan zual phah nasa hle. Zînga chuan a buan pui pa chu chibaiin "Mikhual min hlahkhem dan i thiam hle mai" a han ti sap a, a tumpuipa chuan "Pasalṭha Zinga ni awm reng i ni. Keini hneh rual i ni lo ve" tiin a kal san ta a. Saichhunga erawh Lal fapa te a ni bawk nen zan a lo rei ve tial tial bawk si a, an buan ve ta lo a ni.

A tuk zîng Lal in lam pana an kal lai chuan Lal fanu tui chawi pawh a lo thleng ve chiah a Zînga chuan Saia chu mitmei vatin Saia pawh chuan Lal fanu Sanglûri chu a va pui vat a, Sanglûri'n "Ka lawm e" a tih sap laite chuan a mur chuaih chuaih a, chhan ngaihna pawh hre lemloin a nuih sak ringawt a. Lal inah inzui lutin eng eng emaw te sawiin an inbe leh zauh ṭhin a, a rei tial tial a, an inpawh ve ta tial tial a, Saia chuan Lal tual a thingte chu eh sakin a bulah Sangluri pawh titi siam siam chungin a lo ṭhu ve a, an inmil chho ta hle. Tukṭhuante an kil zawh hnu chuan Lalpa Chunglura chuan an thing eh zozaite chu a va hmu a, Saia hnenah chuan "Saia, i lo thawh vak mai le aw? Hahdam tak khan awm mai mai rawh. Hengte chu ti tur an tam alawm" tiin a hau ti tih deuh a, Saia chuan "Akhai, Lalpa awm awl ai chuan a nuam ka ti zawk e" tiin a lo chhang a. Nileng deuh thaw a Lal ina an inkawm hnu chuan Zingate chuan nuam an ti tawh hle a, tlangnel pawh an tlangnel tawh hle. Zan lamah Lalpa phalna ngeiin Lal fanu Sanglûri chu an kawm ve ta a, leihkapuiah ṭhuin an titi ho a, rei lo te hnuah Zinga erawh dâi kal chhuanlamin a inthiarfihlim ta daih a. Chutia an pahnih chauh va an han awm takah chuan sawi tur an haihchham dun ta hle mai. Saia chuan bûl ṭantu a nih a ngai tih hriain zak chung chungin "Lûrte, hei kan lo kal chhan chu chiang takin i hre tawh a. Nang hi kan lo kal chhan ti hlawhtlingtu ni turin ka duh che a ni" a han ti sap a, Sangluri lawm bawk si lai bawk si chuan "Ka va lawm ve" tih chauhin a chhanga Saia chuan "A, i rilru hre hmasa lo a ka hrilh che avangin min ngaidam dawn nia" a han ti leh sap a, Sangluri chuan "Ngaihdam ngaiin i awm lo ve. I rilru min hrilh a ka lawm lutuk" tiin a rawn chhang ve a, Saia chuan "Anih leh nang enge i ngaihdan ni ve le?" a han ti a Sangluri chu a han inngaihtuah vang vanga, chutah "Ka hre lo le. Naktuk zan lamah ka hrilh dawn che nia. Ka lo inngaihtuah ve phawt ange" tiin a chhang ta a.

A tukah chuan Saia leh Zingate chuan Lal fanu leh a ṭhiante thing phur chu zuiin Saia leh Lûrtei pawh an inpawhin an inngeih hle a, mahse, Saia rilru erawh a hah ru em em thung. An haw lamah te chuab Sangluri'n a duh ve lo mai ang tihte chu a hlau em em a, kawtchhuah a an ṭhut chawlh laite chuan a rilru kawmin a lo ngawi vung vung a, Sanglûri'n a rawn nghawk rual chuan harh zawkin "Ka thusawi kha i hre lo a ni maw?" a rawn tih chuan "Ah, aw, ka ngaihtuahna ka kawm nasa deuh a ni. Enge ni ta?" a han tih chuan Sangluri chuan hawi tauh san deuh hmukin "Ka sawi tawh dawn bawk lo" a rawn ti hmuk a, Saia hamhaih lutuk chuan Zînga a va melh a, a ni lah chuan a lo nuih ṭhaw ringawt a. Chutia an lo ṭhut khawmuan lai chuan Tinthanga leh Luahpuiate an lo lang hlawl mai a Zinga chuan "Kha, khawiah nge kal in tum a?" a lo ti a Tinthanga chuan "Hei Luaha thing dah sa hi kan zu pu ange kan ti anih hi. Ka nîin sa tui hâng hawp a lo chak bawk nen sakhi tuai emaw kan zu beisei ve chhin ange kan ti anih hi" a lo ti a Zinga chuan "Ni e, zu kal rawh u. Fimkhur tak khan zu che u la. Hlawhtling ngei ang che u" tiin a thlah a, an ni pawh chu an kal liam ta a. Sangluri chuan "In nauva chu a tlei hle mai a" a lo ti a, Zinga chuan "Ni e, kan khaw lamah chhung leh khat laina hnai an nei si lo va, hetia a unaupa ngei a hmuh takah chuan nuam a tiin a hlim ve hle anih hi" tiin a lo chhâng ve bawk a. Saia rilru kap rengtu chu puanchhuah a ni dawn ta. Zan thla eng dul ruih hnuaiah chuan a hma zana an ṭhutnaah bawk ṭhu dunin Saia chuan ngam leh ngam loin a han zawt ta a, Sangluri chu tuibur hmuamda vel a ngawih vang vang hnuah rawn ṭawng chhuakin "Ka pa thu thu a ni ang chu. Kei chuan min hmangaih tu leh min thlahthlam ngai lo tur mipa hi ka duh ber a, chutiang mi chu i nih ngei ka ring bawk. Eng pawh ni se ka pa thu la ve phawt u la" a tih takah chuan Saia chu a hlimin nuam a ti hle. Sangluri chu a dara bei tirin a sam chu a chûl sak hliau hliau a, chhungkua an din hunturte chu mitthlain a nui deuh suk suk reng a.