PASALṬHA LIANMAWIA BUNG - 22

Kawla ni chhuak chhiara thawk ṭhin hringfate chuan an thawh rah seng tûr an ni tih inhriaiin an thawk ṭâng ṭang reng ṭhin a, Zehtet khaw mipuite pawhin an hna ṭulte thawkin hun leh nî an hmang liam ve mêk zêl a, hmelma nei ve mah se lusei khaw zinga rûn châkawm loh berte zinga mi an ni miau a, an hmelma Fanai ho tan pawh rûn mai mai chî an ni tlat lo a ni. Lianmawia pawh a ni têlin a taksate chu a rawn insiam puitling chho emaw tih tûr a ni a, a ban puam lian ṭha tel tawl takte, a dâr hlai hlep hlawp leh a kawng fêk râtte, a mal pui sek ṭelh ṭawlhte chuan a ti lang lian hle a, Zamana a tiat thuak dêr mai. Zamana erawh Lianmawia ang em em a inphut mawi ni lo mah se a taksa chu en mai pawha hmachhawn huphurhawm tûr tak a ni a, Hratzuala te nen an pathuma an han ding tlâng hi chu patling leh kum lama upa ho hian ngaihsân hmêl takin an thlek leh vang vang ṭhin. An pathum zingah Hratzuala hi a ria deuh ber a, mahse sân zawngah erawh Lianmawia nen an inchen deuh reng thung. An pathuma dai hnaia nunchan an han zir tak tak mai ṭhin chu an tha zat vanglai tak a ni bawk nen an chêtna hmunte hi a pe hun mai zêl a, an kut a hmui tlângin sa lah a lian a têin an la thei hlawm bawk si nen, khaw mipuite chuan an ngaisang thei hle a, ral rama tak ve fo tawh an ni bawk a an hming pawh khaw hran hranah hria an awm tam chho ṭan ta pheuh pheuh bawk.

Chu tia muangleia an hahdam em em lai chuan zan khat chu mikhual duhawm lo tak mai Zehtet khua chuan an nei ta tlat mai a. An insawi dânah chuan khaw thlang lama awm Lal Vungtawna khua Sairêp niin an insawi a, Zehtet khuate paw'n Sairêp khua chu an hre nameuh mai, in zaruk nufa zet niin an sawi ṭhin a, pasalṭha pawh an kat nuk niin an sawi ṭhin. Chu'ng zinga an pasalṭha pahnih an Lalpa Vungtawna pawhin a chhuan ber berte pahnih Pasalṭha Hausâta leh Hrangmana te chu tlangval panga nen Zehtet khuaah chuan rawn lutin Lal inah an lut nghal a, Kapthangate chhungkua chuan Lal ina an rawn chêt dân chu an lawm teh chiam lo hle a, Kâpthanga phei chuan chem sen leka insah chawrh chawrh mai a ni a châk. Mahse, tlangaupa'n Chhuahchawnga leh Thangkungate a rawn hruai tâkah chuan an thû a ngaichâng ta zawk a, chu tih lai tak chuan upate pawh rawn thleng khawm ve mêkin Hausâta leh Hrangmanate ho chuan hmu âwm pawha awm loin zak hlek loin chaw an bâr mawlh mawlh hlawm a.


An han eikham fel chu Kâpthanga chuan "Kan pasalṭhate chu in zin tumna a hla viau a ni ang maw?" a han ti a, Hausâta chuan nui huah huah chungin "Ni e, a hla angreng khawp mai. Chhak lama lusei khaw lian ber an tih ziah Ramrikawn khaw Lalpa Lianchhunga farnu khi kan Lal fapain a duh miau si a, kan Lal fapa lah hian engtin nge maw a lo han hriat daih daih ni. Kan han hruai dawn anih hi" a rawn ti a, Chhuahchawnga chuan Ramrikawn khua tih a hriat chuan chu khaw hming chu a han ngaihtuah vang vanga a tawpah chuan a hre chhuak ta. Ramrikawn Lalpa Lianchhunga anih chuan Lalnu chu Herliani, Lalpa Dohranga fanu kha, mahse Lal Lianchhunga farnu erawh a la hre hauh lo thung. "Ramrikawn Lal fanu chuan in Lal fapa chu a lo hnial bîk hauh lo tihna a ni ngei ang maw? He tia hruai tûra in rawn thawh chhuah rum rum mai" a han ti a, Hrangmana chuan "Chu zawng kan hre hauh lo mai, kan Lal fapa hian a khualzinna lamah a lo va hmu anga a duh ta hle anih ka ring" a rawn ti a, Chhuahchawnga bawk chuan "Ramrikawn lamin awka an pawh ṭhat duh si loh che u chuan kutbengin in rawn haw mai a ngai dawn a ni maw" tiin a han fiamthu a, Hausâta 'n "Kan Lal thu pek hi kan ti hlawhtling lo ngai hauh lo. A ṭul chuan kan hruai lui anga an khua khi kan chimih ṭhak bawk ang" tia chang râta a rawn sawi rual chuan Chhuahchawnga chuan a mitmeng chu ti zîm deuh sânin Hausâta mitah tak chuan a en kal a, "In huaisen hle mai, i hming min hrilh thei em? Pasalṭha Chhuahchawnga ka ni e" a han ti chang ve rât a, Hausâta hmel danglam zuai hman chu a hmuh hmaih lo chiang hle. "Pasalṭha Hausâta ka ni e, ka aihnahphahpui hi Pasalṭha Hrangmana a ni e" a rawn ti ve leha, Thangkunga chuan "Pasalṭha Thangkunga ka ni e" tiin Hausâta te pahnih chu zâm hauh loin a entawn zak zak a. Hrangmana chuan "Kan thil tumah hian buaina emaw inrawlh tumna in nei lo ang chu maw?" a han ti a, Chhuahchawnga chuan "In khaw inkâr thu a ni a, tel ve nachhan tûr kan nei hauh lo" rawn tiin upate ho chu a tî tî pui ta daih a. Leng hâwn ar a khuan ruala Hausâta Zawlbuk pan tûr chu Kâpthanga chuan "Kan rawltharte'n an chhaih chau hle dawn che u a nia, tin, ka pa hi inhmuh angin he ti hi a ni a, kan khaw chhunga buaina in chawk chhuak anih chuan Zehtet Lal fapa, Pasalṭha Kâpthanga hian in lu ka la ngei ang" tiin a rawn thlah a.

Zawlbuk lam an pan lai chuan Hrangmana chuan "Haua, kan putarate pahnih chu min en zâm mai dawn alawm le, Pasalṭha Chhuahchawnga leh Pasalṭha Thangkunga, kan lo râl khat ngaihsân em em ṭhinte ngei kha an nih ngei ka ring e. An kum upa lam ni tawh mah se zâmna zu nei hauh lo a" a han ti charh charh a, Hausâta chuan "Ni e, pasalṭha an nih hmel bîk hliah hliah a ka hriat chu maw le. Kâpthanga an la kawl zui bawk, Pasalṭha Liansanga pawh kha he khuaa chêng hi a ni âwm e, Zehtet khua hi kan rin dân ang ngawt kha a ni hauh lo mai. Kan thlen hlima kan chêt dânin a zir si lo a, min lo buan hunah pawh kan hneh ngei ngeite lakah pawh kan tlawm zêl tûr a ni"tiin tlangval ho chu a rawn hrilh nghal zat bawk a.

Zawlbukah chuan lawi luh an han dîl a, bawhbel bawhliamin in hmel hriattirna an han neih zawh meuh chuan Hausâta leh Hrangmana chu an nui leh vur vur tawh a, an hming Zehtet tlangval ho zinga lo hre tu an awm nual avangin a nuam an ti hle. Mahse, an hming an sawi laia an hmel danglam eih lo leh, an awm ve tih pawh hria anga awm hauh lo Lianmawiate pathum chu an melh leh hrek hrek ṭhin. Inbuan an han ṭan dawn a, tlangval ho chu rawn inchhuah chhawkin Zehtet tlangval ho chuan awlsam takin Hausâta te chu an rawn chawi ta zung zung maia,thawm pawh a lian ṭha hle. Lianmawia erawh chuan "Mana an lo kal chhan hriat ka va châk em." a han ti sap a, Zamana chuan "Kan hre harin ka ring lo, zingah ipa zawt chhin la a ṭha ang" a rawn ti ve sap a, Hratzuala chuan Hrangmana zawk chu kawk zauhin "Kan tlangvalte hi a ngainep deuh em ni aw, khati em em a aṭan duh loh vei ni, han bin phar a châkawm hle mai" a rawn ti a, an pathum chuan an nui khi ṭha hlawm a.

Lal in lamah erawh Kâpthanga leh Liansangate chu inhnialin Kâpthanga chuan "Ka pa dinhmun heti hi a ni a, tunah chuan khawi khua mah do thei dinhmunah kan ding lo a ni, Ramrikawn khua hi Darkawn aṭang khan zan thum riaka thlen mai theih a ni a, khaw lian tak an ni, pasalṭha pawh an nei nual ngei ang, an kutah i dah mai ang u" a han ti a, Liansanga ve thung chuan "Heri kha ka ṭhian ṭha tak a ni a, tunah pasala farnu dinhmun a derthawng hle a, ka ṭan pui duh a ni. An lal fanu chu a duh lo chung ru chhuak ta se kan en liam mai mai dawn em ni?" a han ti a, Kâpthanga'n chhân tuma a kâ a han ân lai tak chuan a pa khuh kharh kharh ri chu hriaiin a pan vata" Ka pa, i harh tawh a ni maw? "a han ri a, a nupui chu koin a pangte chu a deh tir zung zung a. Lalpa Puithanga chu chau tih hriat taka rawn ṭawng chhuakin" Ka ṭhian Dohranga chi leh kuangte chu khawi hmunah pawh awm se, an tana ṭha lo thei rur thil reng reng a thlenin i phatsan tur a ni lo"tih chauh rawn sawiin a mit chu a chhing leh nghal diar diar a. Upa min chu rawn ṭawng chhuakin "Aw le, kan thu rêl chu a zo e, Liansanga hian Pasalṭha Lianmawiate ṭhian ho khu hruai se la, Ramrikawn lamah chuan palai hna lo va thawk rawh se" a rawn ti ta a.

Liansanga chu zawlbuk lam pan vatin tlangvalte mut tuma an lo inbuatsaih lai tak chu zu nang chingin bawhbel pawh bawh liam lem loin pawn lama mei pui an chhehna hmunah chuan dingin Zamana mutbu siam fel mek chu a hui zauh zauh va. Liansanga chuan "In pathum khan lo inring u la, zanlai ar khuan rualin kan inah rawn thleng rawh u, va lut vat la bawhbel bul hnaihah in mu mai dawn nia, tin, kan mikhualte sawn kan thil tih tur hi an hre tur a ni lo" a han ti charh charh a, Zamana chuan a lu lo buk khum nghauh nghauhin zawlbuk chhungah chuan a lut zui leh nghal a.

Zing khawvar ruala arpa khuang âl âl thawm chu rei lo têah naupang infiam ri nawk nawk chuan a rawn luahlân zawm lehnghal a, Hausâta te pawh an tum ram pan turin Zehtet khaw mawng lam chu an pan bawr ve lûk a, buaina engmag tawk loa an kal theih avangin an lawm hle, pasalṭha Chhuahchawnga leh Thangkunga te, uaithla tawh tih chauha an hriat ṭhin avanga zah pah nei lo taka khua rawn lawi lutte'n Chhuahchawnga leh Thangkungate an han hmuh meuh kha chuan Zehtet khaw pawi sawi chu an hlau zawk hial tawh a ni.

Ramrikawn khaw lamah chuan Lalpa Lianchhungate nupa chuan leihkapui lamah ṭhut hmun remin an fanu Chhungliani chu an chhaih nui her hera, an kawtkaia an fapa upa zawk Dochhunga tual chai chu a khât tawkin an zu au leh ṭhin a. Tap lama ei rêl mêk Lalpa Lianchhunga farnu Sanghluni chuan a vahpa infiam chu a khât tawkin a rawn en ve leh zauh zauh ṭhin a, a chhuan pawh a chhuang narawh. Chu tih lak mêk chuan khaw mawnh lam aṭanga tlangval panga silai pu chunga rawn lut mêk te chu Lalpa Lianchhunga chuan ding meuhin a han en vang vang a, tu te nge an nih a hre thei mai si lo, a kiangah chuab a nupui Lal nu Herliani chu rawn ding vein chung tlangvalte chu a han thlek vang vanga, "Aw khai aw Liansanga te zu ni reng a, eng ti tûra rawn kal nge maw an nih le" tih pahin in vhhung lamah a fanu chu pawmin a lut ta daih a.

Herliani'n Liansanga a han hmuh chuan sawi mai tûr a vân hle maia, "Liana in chanchin ka lo hria a, pawi ka ti tak zet a ni" a han ti a Liansanga chuan "E khai Heri, pawi ti mah ta che, khuanu rem ruat angah ngai tawp rawh" a rawn ti a, Herliani mitthlaah erawh an unau thum leh Thansanga te ṭhian thum Bualthleng Lal in luhkapuia an nuih ho ham ham ṭhin laite kha a rawn langa a lung a leng thar hle. Zan riahte an han ei sawk sawk a, rei lote ṭhu hahchawlin an kal chhan dik tak chu Lianmawia chuan a sawi ta a, a sawi laia Sanghluni lo ip chawih chawih an hmuh rual chuan tihluihnaa hruai an tum tih chu an hre chiang kher mai. Enge lo thleng zêl ang le?