PASALṬHA LIANMAWIA BUNG - 24

Pasalṭha Liansanga hova chhuak Lianmawia te ṭhian hoin Zehtet khua an thlen meuh chuan an châu tlâng hlê a, an hruaitupa Liansanga erawh chauh pawh sawi lova Lal in lam pan nghalin Lal inah chuan chanchin a han thlen zung zung a, Lal in boruak chu a rit ru hle tih a han luh tirh aṭangin a man thuam nghal mai a, Zikpuii Lalpa Puithanga kianga ṭap pûr chunga lo ṭhu a han hmuh chuan thil awm zia chu a man thiam nghal mai a. Mitmei hmangin Zikpuii chu zawhna a han zawta Zikpuiin leihkapui lam a melh zeuh rual chuan phei ve nghalin Lal fapa Kâpthanga kiangah chuan Chhuahchawnga leh Thangkungate an lo awm ve a, khawnbawl upate pawh an lo kim hle, a tu amah chu inbe loin an melh ngai an lo melh tlawk tlawk hlawm a, Liansanga rawn kal chu Upa min chuan lo hmu vatin "E khai, kan pasalṭha chu in han tluang bawk maw? In chêt dân hriat a châkawm kher mai." a lo ti vat a, a hmel erawh a ngui deuh ruih thung. Chhuahchawnga chuan "Ekhai, rin aiin in lo thleng hma tlat mai, in hlawhtling ngei tûrah ngai i la lo ṭhu ve teh khai" a rawn tih chuan Liansanga pawh chu ṭhu vein an chet dân chu tawi fel takin a han sawi a, Lianmawia hliam thû erawh a sawi lang duh lo thung. Lal fapa Kâpthanga chuan "I naute i kaihhruaina kawngah sêlna tûr rêng i awm lo e. Mahse, i hmuh angin hei ka pa hi a zual viau tawh maia, zanin hi a daih kan ring meuh tawh lo a ni. Han biak lahin min chhân nachang reng reng a hre tawh lo a, kei pawh min hre tawh hauh lo" tiin a rawn sawia, a rilru a nain a pain a hre tawh meuh lo chu a la na hle tih a hriat bawk. Liansanga chuan "A va zia lo tak em, kan zin lai kher kher a chu tia in lo awm aw. I thu kha ka lo awih mai lo a ni" a rawn ti a, Kâpthanga chuan "Inthiam lohna tûr a awm lo e, i dinhmun angah khan ding ve ta i la, i tih ang hi ka ti ve ngei ang" a rawn ti ve bawk a. Lalpa Puithanga chuan a nunna chu a thlah lek lek tawh a, a la thaw ve ṭawk ṭawk mai chauh a ni ta. Zehtet khaw ropui chunga fel taka rorel ṭhintu Lalpa Puithanga mual liam mêk chu a khaw mipuite chuan an ui zia lan tîrna'n zan riah eikham lamah chuan Lal chhungkua men pui tûrin an rawn chhuak khawm sap sap a. Lianmawiate pawh hah pawh sawi lova kal ve nghalin Lal tualah chuan nula leh tlangvalte leh pa valai deuhte chu an ṭhu khat hmûr mai a ni.

Chu tih lai mêk chuan Zehtet khaw ram chhungah ngei khual duhawm lo takte chuan zan riah an kil mup mup a, tlai lama an sakhi kah leh sanghal kah sa chuan inhraipuarin an hlim tlâng hle. Zan riah an kîl zo chu an hruaitu pa Pasalṭha Khamvêla chu rawn ding chhuakin "Aw le, kan pasalṭhate chuan he khua hi an paltlang ngeiin a rinawm a, kan fimkhur angaih tluk zetin kan huaisen a ngai bawk ang." a rawn ti a, a bulah chuan a kaihhruai ṭhin Pasalṭha Chalbuanga chu rawn ding ve lehin "Aw le, pawl hnihah kan insian ang. Ka kianga kalte hruaiin khaw chhung hi kan en thli thlai ang. U Khama kianga kalte erawh in kal tlang anga,keini pawhin kan rawn zawm thuai che u beisei ang" a rawn ti ve leh ta a.

Leng hâwm ar khuan hnu lawkah chuan Pasalṭha Chalbuanga leh A hote pariat chu khuaah chuan an rawn kut ta a. Lal in lam pan ding vatin Lal tuala mipui lo ṭhu khup chu an hmuhin mak an ti hle. Chalbuanga chuan a hruaite chu let pui lehin ro an han rel ho nak nak a, chu tih lai tak chuan tlangval pakhat an lam pana lo kal mêk chu hmu vatin Chalbuanga chuan zawi muang in a pan chhet chhet a. An inkal pêl ta maw tihah chuan Chalbuanga chu rang lutuka inheri. Chu tlangval chu a chhu thlu nghal bur maia, nikhua chu a hre lo chiang hle. Rang taka kgaw dai lam a zâwn pheiin a harh hun an nghak ta a. Chu tlangval rawn harh leh lak aṭanga thu an hriat chhu mak an ti kher mai. Chalbuanga chuan "Aw le, kan chhuah leh ang che. Mahse, zanina i thil tawn hi hre reng abg che" tih pahin a hnungah chuan a rawn beng thek thek bawk a.

Chu tlangval kal hnu lawkah chuan Chalbuanga chuan "Zehtet khaw pasalṭha Liansangate an inrawlh ngei tih kan chiang ta bawk a, an Lalpa hnuk chah hun chu i nghak tlâng teh ang u a rawn ti a, a rilruah erawh ral lak sum chauh a awm thunga,"U Buang kan tlem hle si a" rawn ti tu tlangval chu melh vang vangin "Tlem te mah ni i la Lal in kan thu hnuai hmak chuan kan chungah engmah an ti thei lo" a rawn ti ve a. A tuk nileng an nghah leh hnu chuan lo sul haw hun laiin Lal in aṭang chuan ṭap thawm a lo chhuak ta phut maia,chu veleh mipui ho pawh chuan thil thlen dân hrethiamin patling hnukulh insum kârah chuan nutling lo ṭap hawm hawm rite chu a awm bawk a, an Lalpa Puithanga an ngainat leg rorel thiam em em, khua leh tuite a thinlung zawng zawnga hmangaih ṭhin tu Lal ropui chuan pialrâl lam a pan san ta.

Lianmawia zun zung let leh chuan Lal in leihkaa mi pakhat pakai chho zut chu a hmuhin mak tak maia ngaihṭhat lohna nei lo nghalin rang takin an in lam a pan nghal a, a nu chuan a silai la laite chu mak tih hmel takin a en reng nghe nghe. Chu tia an Lalpa thihna avanga an mittui tla em pawh a la ro zawh hma chuan Lal in chhungah chuan silai a puak dur ta mai le, mipuite chu an chi ai nasa kher mai. Rei lo têah kawngkhar rawn inphih hawng lawpin Chalbuanga'n Lal fapa Kâpthanga hrawka chema tin reng chunga a rawn chu an hmu nghal a. Chalbuanga chuan ring leng lawngin "In Lalpa chuan mual a liam ta. Tunah chuan inpasalṭha Liansanga biak kan duh a ni" a han ti a, chu veleh Liansanga chu rawn chhuakin Chalbuanga mitah tak chuan a en kalh bawk a. "Liansanga ka ni e" a han ti sap a, Chalbuanga chuan "Rarikawn lamah in zin niin kan lo hria a, kan ṭhian Hausata te chin kan hre duh a ni" a han ti a, chu veleh Liansanga chuan "An awm ve tawh lo tlat mai. An ni zawng pialralah fai sa ringin an khawsa tawh e, a tih rual chuan Chalbuanga chu a sa zar mai a, ṭawng leh a tum rual chiah chuan Lal in hnuai aṭangin silai a rawn puak ṭhuaia, Chalbuanga chu a aw rawl tâwpin a au a, Lianmawia'n Lal inhnuai aṭanga a ke phah a lo kah chu na a ti tih a hriat hle.

Chu zan Lalpa Puithanga chahthlak zânah chuan lungngai a indawm kûn tûr Zehtet tlangval ho chuan Chalbuanga ṭhuihhruai tlangval pariat vel lek chu an hneh vai vai kher mai le. An thina rim hle bawk nen an che na tlâng hle. Chalbuanga erawh Lianmawia chuan din hliah tlatin "A ni hi chu zawhna zawh tûr tam tak kan la nei ngei ang" a tih tlat avang chuan an khawih lem lo a ni. Inbeihna a han zo fel chu Lal fapa Kâpthanga chu rawn ding chhuakin "Zanin kan thil tawn chu a duhawm loh hle mai. Chu tih rualin buaina ata min chhanchhuak tu, kan pasalṭha huaisen kha tunge anih ka hre duh e" a han ti a, mipui te chu an reh ṭhiap bawka, tuibur hmuamda hnu velah tlangval pakhat chu rawn ṭawngin "Lalpa Lianmawia a ni e" a rawn ti ta a, Kâpthanga chuan "A va han lawmawm em. Remchang hmasa berawh keimah ngeiin chawimawina nopui ka hlâng ang" a rawn tih chuan kut an beng dur dur a.
.