PASALṬHA LIANMAWIA BUNG - 35

Hmingthanga hliam a nain a tuar chhuak thei lo mai ang tih a hlauhawm hle a, khaw mipuite mai bakah Lal chhungkua thleng a nghawng a, Lalpa Rengliana pawh leihkapuiah ṭhuin a khat tawkin a hûi leh pap pap vei ṭhin, a mang a angin a rilru a hah hle a, a khaw tlangval ṭhangthar zinga pasalṭha huaisen an awm lo chu a tlâwm thlâk a ti hle a, Pasalṭha Thanhranga thlahtute kha Lal Dohranga thlahtute nena inpawh êm êm inzui chawt reng ṭhin an nih avângin pasalṭha an tla chham ngai hauh lo, an ni hunlaiah ngat phei chuan an chhehvel khaw hnih pasalṭhate nen ṭang hoin khawi khua pawhin rûn tinah an tin ngam lo a, an rûn nih an hlau êm êm ṭhin anih kha,tunah erawh thil thlen dân a dang ta zar mai.

Hmingthanga hliam buaipuitu bawlpu pawh a hahin a chau tawh hle a, thlan fîm far zawih zawih khawpa a thawh vâng nge, a theihna zawng zawng Hmingthanga tân a hlân a ni tih a lang chiang kher mai, mahse, a lo harh hun tûra an rinah pawh Hmingthanga chuan harh zai reng a rêl thei tlat lo a, a nupuiin ṭap pûr chunga a khât tawka a kohna te chu a hre hauh lo a ni. Chu tia an buai nilên hnu chuan zan lamah Hmingthanga nupui fanaute men pui tûrin mipui an rawn kal khâwm a, ruah lah chu a tla reng leh nghal, mahse, an tana Hmingthanga'n huaisen taka a tawrhna na tak hi ruah sur innan tîr mai maiin a hen loh zia an hre chiang a, inchhunga leng lo ho chu pawnah ṭhuin tlawmngaihna nunze mawi tak lan chhuah tîrin ruah chu an do tlawk tlawk hlawm mai a, an hmel hmaia thinrimna leh Hmingthanga lainatna lang chhuak chu a inzat hial âwm e. Lêng hnawt ar a khuan hnu lawkah chuan khaw mawng lama mangang au thâwm avâng chuan tlangval ho chu an chhuak nghal sap sap a, an zu thlen chuan nu pakhat hi luhkaah a lo ding khûr hlawk hlawk a, tlangvâlte hmel a hmuh rual chuan mittui tla zawih zawih chungin a vawkpui neih chhun sakeiin a lâk thu chu a lo sawi a, tlangval ho thinrim tawh chu thawm dim pawh tum lem loin an kal nghal buan buan mai a, thui lo te chauh an kal hman tihin an sakei um lai chuan a lo châng lêt tlat mai, Hmingthanga'n a taksaa hliam a hnutchhiah tawh sapui chu a kawlh tawh kher mai, tlangval kal hmasa ber chu zuan thluk pawh pahin a luah a hmuam nghal chat a, chutah a han thing zui leh chu dam chhuahna chî rual a ni lo. Tlangval ho thinrimna chu a zualin a sosang nasa bawk a, chempui nen an rawn bawh rawn ta, a tîrah chuan chu sakei chuan a mihring seh chu thlah mai a tum bîk lo a, mahse, a taksa hmun hrang hranga chem hnuhma a awm takah chuan huk tuar pahin a tlan chhia a, tlangval ṭhenkhat chuan umzui tum mah se ruang nen an nih bakah vawk ruang pawh hlawm tlak a awm tho bawk avangin thinrim leh beidawng ru takin an haw ta a, an rilru a nain pasalṭha huaisen tak an hruaitu atan han neih an châk kher mai, an neih chhun Hmingthanga lah rei a daih angem tih chauh a ni mai tawh si.

Lalpa Rengliana'n a tlangvalte vanduaina tawh chungchang a hriat meuh chuan chhuat laiah a vei tawn chhen a, a hmel dur khup chu hmuh a nuam lem lo hle. A châng leh râl hla tak thlîrin a en ngai a en leh vung vung ṭhin a, a upate'n han hnem tum ngial mah se, na a tiin lungawi mai chu har a ti tak zet. " U Thanhrang, Rûna nen ka kiangah la awm ve ni ula chuan ka ngaih a ngam deuh tûr, mal takin min kal san a ni" ti rilruin chhungrilah a rûm vawng vawng a, mahse, a tlangvalte hmela zâmna aia thinrimna leh huaisenna a hmu chu a lâwm a, a tlangvalte'n hetianga huaisenna rilru an put reng chuan nakin lawkah an zing aṭangin pasalṭha an la rawn chhuak ve mawlh ang tih chu a ring tlat a ni.

Mitthi in lamah khawhar chhungte hnêm tûrin khaw mipuite chu an kal khawm sap sap a, zan dang angte chu ni se an lawmnute mitmei hmuh inbeisei rân chungin an kal ang, mahse, tun hunah erawh an lawmnute nui mawi tak leh mitmei lam an mitthlaah a lang lo a, an vaihlo zial ngei mai han pak khuk hlarh hlarhte phei chu an suangtuah pha teuh lo. An sapui huaisar pahnihte tih hlum dân tûr mawlh chu an ngaihtuah a, zaninah pakhat chauh an bei a, a dang khawiah nge a awm ang tih chu tlangvalte rilrua zawhna awm lian tak a ni.

Lianmawiate rawn thang tawh khua an hnaih tawh hle maia, zan khat an riah hnuah khua an lut hman tawh dawn a ni, chutih rualin an kalpuite hnen aṭanga an hriat dânin sapui pahnihin Zehtet khaw mipuite a ti ral ṭhi mêk a ni a, tunah an ni pawh Zehteh ram chinah ngei an awm tawh bawk nen an fîmkhur hle a, an kalna hi ram lama Sapui chet ṭhinna hmun
Zehtet mipuite lo bawh ram aṭanga hmar chhak lam a ni a, hlat pawh a inhlat lem lo, an tawn fuh palh hlauh pawh an hlau hle. Zan riah kîlin Zamana sakhi kah chek chu an han hawp lut hruih hruih a, an chaw chhum pawh an fai hnehin an puar tlâng kher mai. An chêtna hnute tifela an inpeih fel meuh chuan ruah pawh a hân tawh a, bûk chhungah lûtin fur khaw cheng lai taka ramhnuai hnawnga han riah chu a phûrawm loh hle, mahse, Lianmawiate zawng an awmna hmun hmuna lungawi tum tlat mi, tlawmngaihna nun pui tlat ṭhin an nih avangin phun nawi hauh loin an mu ta a. Ruah chuan sur zawm leh ta'nge pawh a ti ta bîk lo a, rei loteah khua a rawn thiang chho ṭan a, chhum zîng mupte pawhin kian zai a rêla, zanlai ar khuan hun âwm vêl a rawn nih meuh chuan van laiah thla a rawn lang ta pheu mai le. Bûk chhungah pawh Lianmawia te ṭhian ho chu an hnâr suk suk tawh a, an tlangval kalpuite erawh zan dang ang bawkin mut an harsat tlâng leh hle a, Lianmawiate hnar suk suk chu zan dang ang bawkin mak tih hmel takin an en leh a, an phun leh suk suk ṭhin, chutih lai mêk chuan vehtu an nei tih pawh an hre hauh lo, an hrehawmna leh anmahni inkhawngaihna chauh chu an rilru chhungril luah tu a ni tawh si. Mahse, thawm chu a rawn hnai zêl a, an bûk zawna thla engin keipui hlimthla a rawn chhun lan tak siah rual chuan an hlau lutuk chu an ip nghal chawih chawih a, a ṭhen phei chu zun an cheh nghal hial a ni. Chu keipui lah chuan a la rawn pan ta deuh deuh leh nghal, au chhuak tûrin chakna an nei lo a, chet sawn duh hle mah se keipui huhang chu an zo lo a an awm hmunah an indawm khur hlawk hlawk mai a ni. Kei pui a rawn hnai ta maw tihah chuan bûk chhunga rawn luh tum ni awm takin a rawn awp hniam deuh a, mahse chu tih lai tak chuan vawi leh khatah a rawn puak ṭhuai mai, tlangval ho hlauthawng sa lah chu an phu nasa êm êm lehnghal a, kei pui hlawm tawl mai leh lei chara a khat tawka a rawn che leh hrut ṭhinte chu an hmuhin an râpa an hlau hlawm hle. Lianmawia te'n an silai mute an han thun fel hnua an va en leh chuan chu keipui chuan nunna rêng a lo nei tawh lo. Tlangval hlaua khur hlawk hlawkte chu Lianmawiate chuan hnêm mawlh mawlh pahin mei han nun an tum a, mahse, khua a hnawng rei tawh bawk si a thing ro han hmuh chu a har hle, thla êng ṭha viau lo phei se chu an buai viau ta ve ang. Khatia keipuiin an bûk a rawn veh lai khan Lianmawia hi a lo harh ru khiau tawh a, tlangval dangte'n sakei thawm an hre lo chu a lawm letling phian. Thawm dîm takin Zamana leh Hratzuala chu a kai tho a, hun rei tak inzui tawh an ni bawk nen chu tia zan lai laia an inkaihthawh chuan hlauhawm a hnai tih an hrethiam nghal mai a, silai lain inralring takin an awm fel ta maw tihah an thil va hmuh leh chu an tlangvalte hlauthawng khur hlawk hlawk leh keipui an bûk lo pan mêk tu kha a ni. A ruala silai mu pathum a lua a luh meuh chuan ramhnuai pasalṭha tawrhchhelna paw'n a tlin bîk lo a ni. A tûk zinga an sakei thah ruang an han en chiang chu a lian kher mai,sum riat zet a ni nghe nghe, an ni tan khaw chhung han luh pui ngaihna awm hek suh muangchang loin khaw lam panin an kal leh ta a.

Nau rilṭam hun zet ni tawh mah se khaw mipuite chu feh chhuak ngam an awm lo a, nula thingphur ngam pawh an awm hek lo. Khaw chhungah chuan an inkhung ṭhap hlawm a ni. Lalpa Rengliana chuan Lianmawia te lo thlen hun nî ni tura a rin a lo ni bawk nen beisei nei takin a ring a fân leh iak iak ṭhin, chhun chaw fak a hun meuh chuan a beisei rûk chu a lo thleng ta, Lianmawiate rawn kal a hmuh chuan a lo lâwm hle a, sapui vânga an tawrhna zozaite chu a lo hrilh mawlh mawlh a, Lianmawiate pawhin pawi an tiin an khawngaih ve hle, Lal in lama innghat tûra tih an ni bawk nen an han insil thlan dâi tê tê a, ti chuan an rawn kal lama sakei an thah thute chu an sawi ta a, Lalpa Rengliana mak ti chuan ṭawng na châng pawh a hre hauh lo, tuibur hmuam da vêl zet a ngawih hnuah "Anih chuan sapui dang kan hriat lohin kan lo khawi tel reng tihna a ni maw?" a han ti a, Lianmawia chuan "Ka pa, ka rin danah chuan in khua ti mangang a ti ral ṭi tu ngei anih ka ring, a dûl nêmah silaia kahna hnu a awm a, a luah nasa takin a hliam bawk. U Hmingthanga beitu ngei anih ka ring" a rawn tih hnu chuan Lalpa Rengliana chuan "Ka fapa, ka va han chhuak tak che u em, kan buaina zatve in rawn chingfel nghal ringawt chu a ni a, a va han lawmawm tak em" a rawn ti nghal chûl a, mahse, a lawmna erawh a famkim thei lo, a chhan chu pakhat a la awm tlat.

Hmingthanga rawn harh rual chuan a nupui chu lawm luat avangin a lo ṭap nghal a, Hmingthanga pawhin a nupui hmel a hmuh chuan a hrethiam hle, mahse, sakei nen an inbeih laia a thiltawnte a ngaihtuah chhuah chuan sakei han hmachhawn leh a, han sah leh sawk sawk mai kha a ni a chak ber chu. Mahse, a hliam a la dam miau loh avângin tih theih a nei lem lo hle.

Zan lamah chuan Lianmawiate pathum chu an inring ru hle a, nihnih lai sapuiin chêt a rawn thawh tawh loh avângin a rawn chet ngei tawh pawh an ring a ni. An ring sual lo tih chu lêng hnawt an khuan hnu lawka khaw lu lama hmeithai pakhat vawk rawn lâk rual chuan a hriat kher mai, vawk chu tal chhuah a tum nasain a ṭang nasa tih chu sakeii a hnuh thlakna pem hun chuan a ti lang chiang hle. Lianmawiate chuan sapui hnu chu an chhui zui nghal a, an ni pawhin an vawi khat beihna ni tho mah se a hmahruaituah Lianmawiate thianthum chu an la ṭang fan tho a ni. Lo fing khat vêl an kal hnu chuan chu sakei chuan amab vehtu te chu a rawn bei hmasa ta phut mai, a hmasa bera kal Lianmawia chu Zamana'n bawh thlu hman lo m se chu a thi mah na. Sakei tlan chhe tûr chu Hratzuala chuan lo kâpin a luah tak a kâp puh bawk nen tlangval ho chuan chem phawrh in a rem dan ang angin an sat ta siah siah mai le, rei tlinna chi ni hek suh, chu ramhnuai pasalṭha chu awp hniam suai suai pahin a nunna chu a thlah ta.

Lalpa Rengliana'n a tlangvalte lawm ri hut hut a hriat chuan an hlawhtling tih hrethiamin nopui dawm tir ngei a tum ruh hlawm hle.