PASALṬHA LIANMAWIA BUNG - 42

Pasalṭha Lianmawiate'n Damdep khua an thlen chuan lo sûl haw hun a ni tawh a, Lal in lam pana kalin an han insil thlan dai te te a ti chuan zanriahte kîl hovin zan lamah chuan hlim takin an inkawm tlânga, Hratzuala pawh an khaw lama la haw loin Damdep lamah a lo la châm ve bawk a, upa ho chuan an vânglaite an sawi a, Lianmawiate chu a khât tawkin pasalṭha nuna an thil tawnte sawi tûrin an phut chhuak leh zauh zauh ve ṭhin bawk. Leng hawn ar a khuan hnu chuan an ṭin darh ta sang sang a, Lianmawia leh Hratzuala pawh zawlbuk lam pan thlain tlangvalte kiangah riahrûn a zu rem ve a. A tuk zingah Vancheuvate nen an pathumin Zehtet lam an pan ta a. Hun an nei tlem tawh a, Zamana'n a lo nghakhlel tawh viau ang tih pawh an hriat ve vek avangin an theihtawpin an kal chak a, Bualthleng khua an zu thlen a Pasalṭha tuai tir Hlunzîka pawh Zehtet lama a kal tawh thu an zu hriat phei chuan an inthlahrung ru hle a, zan khat an han riah hnuah an khaw lam chu hmanhmawh takin an pan ta a.

"Zîka a zakdawhah tak sawn aw" tih paha a dara beng thak thak tu, Pasalṭha Hrangseipuia hmel chu en zawk pahin, a hmelah chuan a lawm hle tuh a hriat a, hmeithai fapa mite hmuhsit rawn ni ṭhin kha Bualthleng khua an thlen hnuah chuan Pasalṭha Khual kai ṭhiaute'n an kai hruaia nau anga enin engkim an zirtir a ni si a, a hnukte chu a ulh thei hial a ni. Mahse, amah ringtu rinna tih thlawn tum hauh loin a silai cheng chu a han kau rap a, uluk taka a han tin leh vang vang hnu chuan silai chu a kap puak ta dur mai le, an piaha sazuk chal ram tla lai pawh chu a tlu chiang hle. A silai chu a han sawh leh sawk sawk a, Sazuk awmna lam chu a va pan nghal a, a zakdawhah tak a lo kap a, dam pui chi ni miau hek lo le,a thi chiang kher mai. Hrangseipuia kut lo beng ri chu hriain a haw vata nuih ver ver pahin a sazuk kah lu chu a han melh a, sazuk ki a hmuh tawha ropui berte zinga mi ni lo mah se a kut zala fam anihna avang chuan a tan a hlu bîk em em a ni.

Tlangval dang ho hmun danga ram chhuakte punin sazuk sa chu an va chan a, ti chuan buk lamah an thiar phei ta a. Zamana nupui neih hun atan an inbuatsaih chho mêk a ni a, Lianmawia te la awm lo mah se a awm chhun Hrangseipuiate chuan an theih tawp chhuahin Zamana tan chuan an ram chhuak a ni. Lianmawiate'n Zehtet an thlen meuh chuan an rin lawk sa ang ngeiin Zamana chuan a lo lâwm teh chiam lo hle, Lianmawiate chu an inthlahrung zualin nuam lo an ti ru hle mai a, mahse, rei lo te hnuah a hma ang bawka awmin Zamana pawh a rawn ṭawng a rawn ṭawng ve ta a, a kutphah hlai hlep hlawp a Lianmawia hnung zang ben chawrh paha "Mi nu ngaia kha leh chen i va thang le" a han tih chuan midang ho chuan an lo nuih tlawrh tlawrh a, "Lal Ngurthana'n Muallianpui khaw lam chanchin a sawi apianga i meng pawng nghal zawt zawt ṭhinte kha ka hmuh vanga kal tur a ti che u ka ni, mahse, nuam i va ti mah mah" tih paha Lianmawia na ti nuih za bawk si lo dir char char a tlawh thal tawp phei chuan an nuih a za tlâng hle a, Hratzuala lo nui uar deuh chu Zamana chuan "Nang pawh enge Muallianpui khuaah chuan i va tawn a?" tih paha a tin uaih rual chuan nui uar uar chungin a tlanchhe nghal a, an ṭhian hoa an han inhmukhawm leh chu nuam an tiin an hlim tlâng ngei mai.

Zamana nupui neih hmain ni hnih chiah a awm ta maw tihah chuan ram lama chhuak pasalṭhate pawh an lo kir leh vek tawh a, Lianmawia chuan Sanghal sum sarih dawna lian a kap a, Hratzuala pawhin zukchal a kap ve bawk, a bak chu sa lian lutuk la loin sakhi chal Vancheuva kah chu an lak len leh deuh chu a ni. A hmaa Hrangseipuia leh Hlunzîkate lo kah tawh sa nen, khawtlang hrai thei ngei turah an inngai a, an phur surh surh kher mai. Ni khat a la awm tihah Paite pasalṭha Vânthangate, Lingremate leh Hnemluaiate an lo thleng ve bawk a, kawng lakah intuituahin sele sarep an lo keng nghek bawk a, inneih hun chauh an nghak ta.

Pasalṭha Thansanga nupui neih zana anchhia an dawnte, reh hlen mai loa Lianmawia nupui neih dawn thlenga um zuitu anchhia kha a bo hlen loh hlauin tlangval ho chuan an pasalṭha tan an theihtawk tiin ral an veng a, Lalpa Kapthanga pawh Thansangate mai bakah Bualthleng khaw ho tawrh kha a hretute zinga mi a ni ve a, tin Lianmawia tawrhna pawh a hriat pui ve vek avangin a awm hle hle thei lo a, anmahni rawn rûn duh an awm angem tih ngaihtuahin a phe sek a, pangai takin a nun a hmang thei lo a ni. A nupui uak tuar tuar reng pawh chu a ngaihsak hman hauh lo a ni. Mahse, khuain an chungah zah a ngaia eng em ti loin inneih chu an tlingtla a, an tum ang ngeia khawtlang hraiin an tlai hle a, nuam pawh an ti tlâng hlawm hle. Lawi ṭhat zân a han thlen meuh phei chuan Zamana chauh lo chu phur hmel pu vek an ni a, a ṭhiante ho chet dan tur chu suangtuah pawh a suangtuah ngam lo zawk a ni. Mahse, pumpelh theih ni hek suh le, a ṭhiante kiangah chuan a mu meng ve ta kar a, rei lo te hnuah Hratzuala leh Hrangseipuia chuan an nghal rawn chhuahin Zamana chu an rawn khan bet ta tlat bawk a, an mutthilh der tlat avangin Zamana tan tihngaihna awm hek lo, an ke chu zawi muanga laksawn pahin dîm takin a han nghah sak a, an in lam pana kal a tum lai tak chuan Lianmawia chu rawn tho thutin Zamana chu a rawn bawh a, chu veleh Vânthangate ho chuan an rawn phuar nghal mawlh mawlh a, tlangval dang ho lah an phur bawk nen Zamana chu an rawn hual tuau tuau hlawm a, an phuar fel hnu chuan an in lam panin Zamana chu an kal pui ta a, kawngkhar chu dim lo taka hawngin chhuat laiah Zamana chu an va theh tla a, pawnah chhuahsanin a ṭhen in hnuaiah te an luta, a ṭhen luhkaahte dingin, Zamana'n "Ṭhuamte mi rawn phelh rawh" a han tiha Ṭhuamtein phelh a han tumte chuan thawm lo siamin Ṭhuamte chu lai angreng takin an dang bet tlat maia, mahse, rei lo te hnuah Lianmawia chuan kian san tawh ang u, a rawn tih takah chuan Zawlbuk lam panin an kal ta a. Mahse, an let rei hauh lo, Zamana ṭhiante bîk chu Zamana te in lamah let leh vatin in hnuai lamah an biru ṭhap a, Zamana kâkpui lawn tum thawm chu ngaithlain Ṭhuamtei kakpui a lawn dawn ta maw tihah in chu an sawi ta mai. Zamana thinrim nuih za bawk si chuan "Lianek in la hre dawn khawp" a han ti a, Ṭhuamtei zak lutuk lah men pawh meng ngam loin a mu khawng reng ringawt a, Lianmawiate'n an kiansan hnu chuan "mawl lutuk" tih hluk pahin a nupui chungah chuan lawnin a vaibel fun chu a han khalh lian leh te te a. Ṭhuamtei na ti si deuh that that avang chuan chawl hlekin na a tih luat avanga a thlan tui rawn bawl ṭek ṭek te chu Zamana chuan hruk sakin, a hmabak chu a han tawn nawn leh a,a hlawhtling ta maw tihah chuan chet a han la chho ṭan a Ṭhuamtei pawhin na ti hle mah se, a rawn nuam chho ve tial tial bawk a, an zawh dawn hnaih lamah phei chuan an thaw dûn halh halh tawh nghe nghe. Zamana hna thawk zo chu a nupui kiangah chuan thawk hlawi hlawi pahin a mu thla a, Ṭhuamtei chu duat taka chulin a hmangaih thute a han fah leh mawlh mawlh a. Chu tih lai chuan zan lai ar a khuang al al tawh a, Zamanate nupa tan erawh mut mai a la har hle. A thawh hnihna an han beih zawh meuh phei chuan a tlai tawh hle nghe nghe. A tuk Zamana zing tho pawh a zawi hle a, a khual ṭhiante haw tum chu thlah ve mah se, a che ziaah tha thona a awm eih lo hrim hrim a, chu tak chu a ṭhiante nuih ti za tu a ni tlat. An han in mangṭha fel hnu chuan khaw lam panin an let leh ta a.

Hun a kal zela, Zamana pawh a ṭhiante rualin zawkbuk lamah lawi ṭhin mah se, an in lam panin a haw leh ziah thunga, Lianmawia leh Hratzualate lakah chuan a insawi thei nasa hle ṭhin. Zamanate inneih hnu lawkah an khaw tlangval pakhat hian khual khuaa mi nupui a rawn hawn a, tu pawh mai chuan chu nu chu hmelṭha an ti hlawm hle a, tlangvalte pawhin an ṭhianpa chu vannei an tih thute an sawi nasa hle ṭhin. Zan khat chu Zamana kakpuilawn zo hlim, zawlbuk lawi leh tur chuan bawhbel bul a thleng tihah chuan veng mawng lam aṭanga tlangval pakhat rawn chho hi a hmu a, nupui nei thar an awm ve tho avangin chumi ni turah chuan a ngai mai a. Bawhbel chu bawh liamin a han mu a, nakinah chuan tlangval pawh kha lo let vein mei eng hnuaia a hmel fiah lo ruaia a lang chu Zamana chuan hmuin, an khaw tlangau fapa Mangliana ang a ti riau pek a, mahse, ngaih ṭhat lohna em em nei loin a mu ve leh ta mai a. Ni thum a han liam leh a, Zamana zawlbuk lawi tur chuan a hmu leh ta, Zamana chuan ngaih ṭha lem lo tak chungin Bawhbel bulah chuan a lo nghak a, chu tlangval hmuh theih loh tur chuan a biru tlat thung. A lo kal hnaia Mangliana ngei a ni tih chu Zamana chuan a hre ta a, mahse, eng ti tura kal chhuak nge anih tih hre chiang hek suh, a mut san ve leh ta mai a. A tukah chuan Lianmawiate hnenah hrilhin enthlak deuh chu an tum ta a, zan lamah chuan Mangliana chu chan chhuah tumin an mu meng kara mahse, Mangliana chu a rawn tho duh ta hauh lo. A tuk zanah pawh chu tiang bawkin zawlbuk chu a chhuahsan hauh lo. Mahse, zan thumna a lo thlenga Mangliana chhuak lai chu an hmu fuh ta a, rang taka zui ru nghalin veng mawng lam chu an pan thla a, in pakhata a lut lai hmuin chu in chu an zu pana, chutah Mangliana mi tenawm tak thil tih chu an zu man chhuak ta a, Zamana nupui neih hnu lawka nei vetu nupui khual khuaa mi hmelṭha tak kha a lo zu mutpui ṭhin a lo ni. Chu nu lah chuan zan thimah lehnghal a pasal emaw tiin muthlu lawp lawp chungte'n a lo chhawn emaw a ni anga atan hriat chhuah ngaihna awm hek suh, a khat tawka Mangliana nawmchenna a ni ta ringawt a ni.

Mangliana kakpui lawn zoin Lal mual a rawn thleng ta maw tihah chuan Zamana chuan a chhip samah ṭhamin a hmaiah chuan a han beng sawk a, Mangliana hlau lutuk chu ṭawng pawh a ṭawng ngam lo a ni. Lianmawia'n ṭhutchilh renrawn paha a zilh hrepna chu a ngaithla ulukin a inchhir hle a, a hmeichhe hmingchhiatna thlen tura a sawi mualpho anih vaih chuan an thah ngei tûr thute leh, ngawih liam puia vawi khat mah chhunzawm tawh lo tura a tih laite chuan lawm takin a zawm tur thu a lo sawi ve mawlh mawlh a ni.


An khaw nula ni ṭhin ngei laka che chu ni se a thlavang pawh an hauh na deuh mahna, mahse, khual khua aṭanga rawn lawi, chhungkhat laina hnai nei lo hmeichhe thiam lohna nei lo chunga thil thleng hi an sawi chhuak anih chuan, hmeichhe tan zahna tawp khawk an thlen sak dawn bakah, chhungkhat laina hnai nei lo anih vanga hnem tu nei loa zak taka a indawmkun tur chu an ngai ngam lo a ni.