PASALṬHA LIANMAWIA BUNG - 32

Tlangvalte ruang seng hawi an han zo fel a, Zawlbuan tlangvalte chuan Zehtet ho ralbeih thiam zia chu nunna chân tlangval pariat bâk an awm ve loh dân aṭang chuan an hre fiah ta hle mai, mahse, hliam nei erawh an tam fu mai. Pasalṭha Hratzuala pawh inti pachang viau mah se a hliam chu a na hle tih a hriat a, a ni chauh ni loin Lalpa Rothanga'n kal ve tura a tih a fapa Rolianpuia pawh kal chi ziazang a lo ni hauh lo tih a pa lam hawia beisei nei taka a din sâi hlak hlak dânah chuan a hriat hle. Lianmawia leh Zamana rilru chu a buai ta nak mai, hun rei lo te kalta a an beihte kianga an ṭhian hliam tuarte hnutchhiah chu thil tih chîah an ngai si lo, an ni'n châm pui ta se, an Lalpa nunna derthâwn zia an hre chiang bawk si,vanneih thlâk takin Lalpa Rothanga chu a rawn ding chhuak a, Lianmawia lam chu hawiin "Pasalṭha, inṭhiante hliam tawrh hi lam hla kal pui atan chuan a na mah mah lo maw? Min ring zo hauhin ka ring lo a, mahse, hetah hian i hnutchhiah thei reng a nia, hliam tuar mah ni se kan ngam lohte kha an la ni reng tho va nia" dam diaia a rawn tih chuan Lianmawia chuan a hmel hmai aṭangin dawt a sawi a ring hauh lo. Zamana lam a va hawi phei a Zamana chuan amah zawk chu mitmei hmangin thutlûkna siam tûra a rawn tib avang chuan "Lalpa, kan kal ngei a ngai si a, ṭha takin in lo enkawl a ni ang chu. I fapa pawh kal chi ziazâng a ni lo e, he lamah kan tlangvalte lo kawm zawk rawh se, kan tlangvalte hi in kiangah ngaihngam takin kan kal san ang, mahse, an vun chhia pawh nangni vanga a pem belh leh anih chuan phuba ka la ngei ang, keini chu kan kal mai ang e"tih pahin Hratzuala lam chu a pan phei a, Hratzuala hliam chu a thi duh hle maia, a taksa pawh a chau tawh hle tih a mitmeng dul deuh lap tawh aṭang chuan a hriat mai a, Lianmawia chuan "Hrâta, he lama nang tal i awm loh chuan kan tlangvalte an ngaihtuahawm dawn emai, kei leh Mana kan kal zawk ange. Nang zawng i hliam bawk nen he lamah kan tlangvalte ngaih ti ngam tur talin lo awm hram ang che" tiin a ngaihna hre lo taka en rengtu Hratzuala chu a thiam takin, hliam nei chunga kal luih tum tlat mi a ni dawn tih a hriat sa avangin chhuanlam dang siamin a hrilh a. Zamana pawh chuan rawn tui hnih vein "Ni e, kan khua chu ngaihtuah hauh suh, kan bumtu vervek hian kan Lalpa chunga thil ṭha lo a tih a, amah vanga kan Lal vun chhia pawh a pilh anih chuan a vun pui chat vek khawpin ka sat ve ang dawn a ni" a rawn ti rap rap a.

Zehtet khaw lamah erawg Upa Dawka chu tun hma zawng aiin khaw mipuite chungah chuan ṭhat a chhuah zual a, Lalpa Kapthanga thih ruala mipuite'n Lal atana an thlan ngei theihna'n mipuite tih lawm dân kawng chu a zawng nasa hle. A lo rin dânah chuan Lianmawiate'n Zawlbuan khua an han hneh anih pawhin hliam neuh neuh nei an awm dawn avang leh a thil tih tum an hriat rinna a neih miah loh avângin rawn hawna'n hun an la duh rei dawn niin a ngai a, anih loh vek pawhin an Lal fapate pahnih khan Lianmawiate an lo that anih hlauh chuan tlangval dam chhuak chhunte chu tlan chhuahte emaw an ngai ngei anga chu mi chhung chuan Lal a lo nih hman daih tawh a beisei nghe nghe. A fapate pahnih engtik lai maha mi taima ni ngai hauh lo, a u zawk phei chu mi nu zen chîng ni a an sawi ruk sep sep, fiahna awm si lo, pawh lo tawk tawh ni nghe nghe, te hian an pa thil tih tum chu an phûr pui hle a, Lal fapa han nih a han in lâk len vêl kha an châk ber a ni. Upa Dawka lah a thil tihah a hlawhtlingin khaw mipuite chuan an ngaina thuai a, Lalpa Kapthanga leh a khawnbawl upa dangte lahin an fak narawh, mahse, Lalpa Kapthanga rilru tak erawh a hlauthawng ru hle a, chu tiang chiah chuan Liansanga pawh a lo ni ve tho mai. Uai thla lam tawh ni mah se a thluaka pasalṭha finna awm chu a la bo hauh lo a, Upa Dawka leh a fapate pahnih rawn fel thar ta em em hian chhan a neiin a ring tlat a, a rilruin a han chhui kual a, Upa Dawka leh a fapa khual zin rawn haw hnu lawka Zawlbuan khaw Lal fapate an hmuh mai dânah te khan Upa Dawka hi inhnamhnawih tlatin a hria a, mahse, Upa a nihna leh thu chiang lo, finfiahna awm lo anihna avângin a rin thu chu a sawi chhuak ngam lo thung, mahse, a rûk thei ang berin Upa Dawka te pa fa chu a thlî thlâi reng thung a, Lal inah pawh a tlangnel sa tho bawk nen a leng lut zing malh malh hle a, Lalpa Kâpthanga nen chuan sawi chhuak chiah lo mah se hlauhthâwn rûkna an nei ve ve tih chu an in hre ru deuh uai uai tho.

Fûr khua a rawn hnai ṭan a, zing ni chhuak êng mawi tak ni ṭhin pawh hmuh tûr awm loin chhûm a zîng mup mup a, a khât tawkin khawpui a ri leh dûr dûr ṭhin a, ruah lah chu a sur cherh cherh reng bawk. Lal leh upate pawh leihkapui lama ṭhu chhuak loin Lal inchhûngah an tawm ṭhap a, an pasalṭha rammu a kalte rawn haw hun tûrte zêldin kualin a ṭhenin an vânglai chanchin an lo sêp rawtui nasa mai a, chutih mêk lai chuan Liansanga chu Chhuahchawnga leh Thangkunga te nen rawn inzui lût vein Lal leh upate kiangah chuan zu khawnin an rawn tî tî ve a, Chhuahchawnga leh Thangkunga hi khawnbawl upate zinga rîn luh an tum rûk mêk an nih tawh avângin upa dangte chuan upa zinga tel tlak an ni em tih fiah tumin an tî tî pui a, an ṭawng hmang leh che ziaah ṭhat lohna reng an hmu lo. Chu tih mêk lai chuan Upa Dawka fapa naupang zawk chu inthlahrun hmêl taka luh rawn dîlin Lalin phalna a pek rual chuan ṭi deuh dui hian a rawn lût a, a pa, Upa Dawka chuan lo be nghal vatin "Taite, eng thil nge ni ta" a lo ti a, a fapa chuan "Ka pa, eng dang ni lo e, ka nu'n ar pui tui lâi a talh a, kan Lalpa'n a ei châk ang han suah ve rawh mi tia, ka lo kal anih hi" tih pah chuan nelawm tak anga langin a nui ver ver a, Lalpa Kâpthanga chuan "Upa Dawka te zawng in fel teh mang e, mi rêng in ngaihsak mai ka ti, tlangval kha Kâphranga nu kha lo pe ta che, a tui dawn hle mai" tiin a lo chhâng vat a, an chêt tum dân chu Liansanga leh Lalpa Kâpthanga hriat phak hauh loh anih avângin Upa Dawka nupui chawhmeh siam chu rinhlelhna châng an hre lo a ni. Tûkṭhuan ei a hun dawnah chuan an ṭin darh ve ta a, Lal chhungkua pawh tukṭhuan kîl tûrin an ṭhu ve ta a, Kâphranga chuan chaw a bar rual deuh thawin a ril a ṭam tawh tih hriat takin Upa Dawka arpui tui lai talh sa ngei mai chu a ei ta a, tui a tiin a ei zawm mawlh mawlh a ni ber, a pain "Taite, i ṭam viau a ni maw, nidangah chuan ṭam viau pawh ni la ei inah hian aia upate ngaihchân zêl tûr a ni ngai e" a tih lai chuan châwl detin a pa chaw bar tum lai chu a melh reng a, chutah "Ka pum" tih pahin chhuat laiah chuan a vial ta ngat ngat mai le, Lal nu Zikpuii hlauthawng lutuk chu a khûr nghal char char mai a, Lalpa Kâpthanga chuan a fapa chu dawm beh a han tum a, mahse, na a tih êm avângin a fapa chu dawm beh a harsa in a vial ngat ngat mai a ni. Lal in thâwm hriain Upa Dawka chu a rawn lang vat a, mahse, a rin ang ni lo a thil thleng a hmuh rual chuan a lawm lem lo hle, Lalpa Kâpthanga'n bawl pu ko tura a tih te phei chuan hnial ngam chi ni hek suh thinrim ṭun hlauthawng ru dêp dêp chungin bawlpu ko tur chuan a kal ta a. Bawlpu rawn thlen hnu chuan Kâphranga chu buaipui nghal char charin a nat dânte chu a zawt chip chiar hle a, Kâphranga hmel leh taksa lan dân aṭang chuan chhan theih niin a lang tawh tlat lo, nau rîlṭam hun a thlen meuh chuan Lal fapa Kâphranga chuan a nunna a thlah ta, naupang fel tak, aia ute tirh hnial ngai lo, ze zawiawi leh mawi tak, Lal fapa anihna hmachhuan hauh lo a, ṭhenrual kawm ṭhin mi a ni a sin le. Lalnu Zîkpuii ṭah hla chuan Zehtet khuate a vêl a, mitinin an ngainat Lal fapa Kâphranga, naupang hmelṭha tak chu an chân ta. Bawl pu ngaih a ṭha thei tlat lo, zing lama an chawhmehte chu Lalpa Kâpthanga hnênah chuan a zawt ta phawng maia, Lalpa Kâpthanga chuan a ngaihna hre lo takin a lo hrilh a, upa Dawka te chawhmeh rawn suah a sawi lai tak chuan a ni pawh a hmêl a dur ta khup mai. Mahse, engmah a la sawi duh lo thung. Rang takin tap lamah chuan an inzep phei dûn a, Upa Dawkate chawhmeh rawn suah chu bawlpu hnenah chuan pein bawl pu chuan in lamah a haw pui ta nghal a. Kâphrânga chu Lal fapa ni mah se, pi pute aṭanga an lo chîn dân pal zam tûr khawpin dân chungah an lêng bîk si lo a, chawhnu her anih meuh chuan a ruang chu lei dâiah an zalh ta. Lalpa Kapthanga te nupa tawrh chu a va na em.

Zanriah rêl hun lai anih chuan Pasalṭha Lianmawia leh Zamana hoin tlangvalte chu khuaah an rawn lût ta sung sung mai a, khaw mipui an hmuh hmasakte hnên aṭanga Lal fapa thih thu an hriat chuan pawi an tiin hrehawm an ti hlawm hle a ni. Mahse, an thu hawn hi Lal hnena thlen ngei a ngaih si avangin, Lal in lam chu an pan ta tho a, Lal inchhûngah chuan Lalpa Kapthanga te nupa chu lo ṭhuin Zikpuii ṭap chu Kâpthanga chuan a lo hnêm mawlh mawlh a, chu tia Lianmawiate hmêl an han hmu chu Lalnu Zikpuii ṭah chu a chhuak nasa zual sauh a, "Taite, i u Liana te an lo haw a sin" a tih laite phei chuan Lianmawia mittui pawh a luang vê hial a ni. Lalpa Käpthanga chuan Lianmawia te chu ko hrangin an chet dânte chu a zawt ta tê tê a, Lianmawiate pawhin chip chiar taka hrilhin inremna an inkarah a awm tawh thute leh an buaina rawn irh chhuah chhan chu Uoa Dawka anih thu leh Upa Dawka chet dan zawng zawng chu an sawi ta a, Lalpa Kâpthanga chuan "Ka rin dân rêng a ni, a va han tenawm lua êm. Ka fapa pawh hi a hrâi hlum anih ngei ka ring e. Keimah ngei hian a lu ka la ang" tiin a bang laia chempui chu a pan ta mai. Zamana chuan chelh vatin "Ngawi teh Lalpa, i fapa chu a hrai hlum ngei a ni tih fiahna i nghak phawt teh ang. Chu ti lo zawng a tawrh tûr kan ti kiam tihna a ni dawn a sin, lungngai reng reng suh i tlangvalte'n an mitmei reng tawh e, an ni pawh Upa Dawka chunga thinrimna leihbuak châk em em te an ni" atih chuan Lalpa Kâpthanga chu inthlah dûl deuhin a nupui kiangah chuan a lêt leh a, Zikpuii hnenah chuan Upa Dawka ruahmanna tenawm tak te chu a sawi ta vek mai, chutah le, hmeichhia a zawnga nunnêm ber mai Lalnu Zikpuii meuh pawhin "Dam reng tlak anih loh chu, i fapa thihna a mawh phurtu anih leh lek phei chuan a ruang pawh ramsate chaw atana pek tlâk zuk ni" a rawn ti ban charh mai le.

Zanriah ei hun lai mah ni se, Lianmawiate pahnihchuan Lal in chu an la chhuah san hauh lo a, Lalpa Kâpthanga te nupa lungleng chuan chaw an ei dawn hauh lo tih hriain kawng kal chau ni mah se Kâphrânga tana an tih theih tawk tiin Lal nupa te tawrhna chu an tawrh pui ve a chu tiang bawkin Lal fapa Kâphrânga thlan lai hman lo ram mu a kal tlangvalte pawhin Kâphrânga tan leh an khaw tan Upa Dawka te chu an tlan bo mai ang tih hlauin an thlî thlâi ru reng bawk.

Liansanga Lal in kal tum chuan Upa Dawka hmanhmawh hmel taka khaw dai lam pana a kal chu a zui ru nghal a, tlan bo a tum anih ngei a ring nghe nghe. Mahse, a rin loh takin kawt chhuah a va thlen chuan Upa Dawka chu pa pakhat nen an lo ti ti lai a va hmu ta tlat mai, fimkhur taka hnaih zêlin an ṭawng thâwm a hriat phâk na chin a thlen chuan a ngaithla ta a, "Tunah hian kan Lalpa chuan a ringhlel hle tawh ang che, Lianmawiate an rawn haw tawh leh nghal a, kan chêt vat a ngai a ni. Zan inah Lal inah lawi lût la, Lal nupate i tawrh pui zia ti lang ang che. Kei pawh ka lo kal anga, Lal fapa thil eiah tûr a telloh thu i awm lai ngeiin ka lo kal ang" tih ri a hriat chuan Liansanga chu a thinrim kher mai, a lo rinhleh ber Upa Dawka pui tu chu bawl pu a ni tih a hre leh zel bawk nen, hmanhmawh tak leh fimkhur taka tawlh letin a thawm an hre phâk lo ang tih velah chuan Lal ina chanchin thlen vat tumin a tlan ta vawk vawk mai a. Lal inah chuan upa ṭhenkhat pawh an lo lawi lut tawh a, Lianmawia leh Zamana pawh an lo la awm reng a, Lianmawia te thu lo hawn chu thawm dim takin an lo khel mêk a lo ni. Liansanga'n a thu hriatte a va thlen leh phei chuan an thinrim tlâng kher mai. Lalpa Kâpthanga chuan "Ka pasalṭhate in chêt a hun dawn e. Upa Dawka leh Bawl pu hnaisai lo zet lo thlen hnua Upa Dawka chî leh kuangte leh Bawl pu chî leh kuangte Lal ina rawn hruai vat tûrin ka duh che u. Luhlul an awm anih vaih chuan na takin in che mai tûr a ni, an nunna erawh la lo hram ang che u. Ka fapa thihna hi a thlâwn hauh lo ang. Tlangaupa, Thangkunga leh Chhuangchawnga zu ko la, Upa dang rawn la thleng ve lo te pawh ko kual thuai thuai rawh"a tih rual chuan tlangaupa chu zuiin Lianmawia leh Zamana te chu an chhuak nghal a.

Upa Dawka Lal ina a han lawi luh chuan a hmel hmaia engmah ti lang hauh loin "Ekhai, zanin chu min khalh ta vek mai a, a va zahthlak tak em" a han ti a, Lalpa Kâpthanga lo nêr nuk chu Chhuahchawnga chuan nghawnk zauhin amah zawk chuan "Ekhai, ka pu hei keini phei chu kan thleng ve chauh anih hi lo ṭhu ve teh, i tî tî rêng ngaihthlak a châkawm leh tawh mai" a rawn tih chuan Upa Dawka chuan thil engkim a fel vek angah ngaiin ṭhuthmun chu phûr takin a rem ta surh surh mai a. "Chawnga te zawng keini aiin sawi tûr inngah daih zawk ang chu maw le, mi hi in fak arek leh chiam mai ṭhin a" tih pahin a nui nghal suk suk a. Chutih mêk lai chuan bawl pu pawh a rawn lût ve ta, Lalpa Kapthanga hnenah chuan a fapa chu hrai hlum anih loh thu leh thil eisual enge maw a neih vang anih a rin thu a rawn sawi ta a, Lalpa Kapthanga chuan "E a ni maw, a lawmawm e, awm lo la chu kan khua hi kan buai viau ṭhin ngei ang, i fingin i fate lah i thiam thil i hlân chhawng thian narawh, lo ṭhu la zanin chu kan zingah hian han tâl ve teh" tiin a han sawm a, Bawl pu lah hlauhthawn rukna nei sa reng a lo ni bawk nen a hnial ngam lo chu a ṭhu ve ta mai a.

Lal ina tî tî khawchang sawia an rîk hlut lai chuan Pasalṭha Lianmawia leh Zamanate chu an rawn lût a, an hnungah chuan Upa Dawka leh Bawlpu chhungte chu tlangval hoin an rawn nam lût dawt dawt bawk a, Upa Dawka mengphawk hra chu Lianmawia chuan silaia tinin "I suahsualna hi zaninah hian a tâwp ngei ang, vanneih thlâk taka ngaihdam lo ni palh ta pawh ni la, khing chen chen i suahsual ver vekna avanga ram mua kan kal hah leh, kan ṭhian nunna chântate phuba lâkna'n ka that tho tho ang che" a ti chang fak a, Bawl pu chu Zamana chuan lo tin ve rânin "Lal leh kan khaw tana i pawimawh veinen i duhamna hian pialrâlah a hnuk liam dawn che a nih hi" a ti chang fak a. Lalpa Kâpthanga chu rawn ding chhuakin "Ka fapa that tu chu dam reng tlak in ni lo e, he thila inhnamhnawihte nunna pawh hian a tuar ngei ang" tih pahin Upa Dawka fapa naupang zawk, chawhmeh suah tu mitah tak chuan a en kalh a.

Tlangaupa chuan an lo rêl lawk tawh ang ngeiin mipuite chu Lal tualah a ko khawm ta a, koh khawm an nih chhan lah hre hek li mipuite chu an phun ri mur mur hlawm a. Lalpa Kapthanga chuan hma hruaiin a hnungah a upate'n an zui bawk a, an mimante chu Lianmawiate chuan hruai chhuakin Lal Kapthanga kiangah chuan an ṭhingṭhit tîr rawp a. Lalpa Kâpthanga chuan "Ka khua leb tui duh tak te u, zanina in hnena ka thu rawn thlen tûr hi intan hriat a nuam hauh lo ang, ka tan phei chuan a na hle. Ka upate zingah ngei kei min paihthlâk duh luat avanga ka pa unaupate khua thleng thlenga han inchhir thleng an awm ta mai leh, chu upa vervek tam chuan kan Bawlpu inremsiam puiin ka fapa an hrai hlum a ni"a tih rual chuan mipui ho chu an ri nghal mur mur a, patling thinrim thâwmte chu a rawn chhuak ta nuai nuai mai. Lalpa Kâpthanga chuan "Zaninah hian anmahni kâ aṭang ngei a thu dik in hriat hi ka duh a ni" tih pahin Lianmawia chu a mitmei zauh va, Lianmawia chua Upa Dawka chu phih tho lawpin "Khai le, han sawi ta che, i thu chah hnuhnungte pawh i sawi pah nghal dawn nia" a han ti a, Upa Dawka chuan huat hmêl taka lo enin "Nang pasalṭha satliah i pa pawh hmeithai fa, i nu leh pate inneih theihna'n a rammu a nunna chân zingah khan ka unaupa fapa a tel a tunah nang hian zak map loin thu min pe a maw?" ti hrâwkin hnuai lam chu a melh ta nghal ngar ngar a, Lianmawia'n a nawr viau pawhin sawi a tum tlat lo, a thi dawn tho tho tih a hriat vâng nge ni. Lalpa Kâpthanga chuan Upa Dawka fapa naupang zawk nghawngah chuan a chem a chuk tuah ta rap mai, chu êm zawng Upa Dawka chuan a ngaingam ngang ta lo, zawi muang a rawn ṭawng chhuakin "Lalpa Puithanga fapa thih hnu lawka Khawnbawl upa nihna chelh ka ni a, kan Lalpa khan a thih hnua Lal atan min hual rûk thu min hrilh ṭhin a, kan Lalpa nen pawh kan inpawh dûn hle nghe nghe" tih paha Kâpthanga kawkin "He fahrah pasalṭha hnaisai lo a lo lan tâk aṭang khan kan Lalpa khan min thlauh thla ta a ni, chu vangin Kâpthanga hi ka hua a, thah ka tum ta a ni. Mahse, vanduai thlak takin a fapain a tuar ta hlauh a ni. Man chhuah ka nih tâk rau rauah chuan Lal fapa thi kha pawi tihna ka nei ta lem lo e, kan Lalpa tana ka tih theih tawk anih kha" a ti zo hman awrh tihah chuan a nghawng chu a lir thla nghal tawl mai a, a hnunga Lalpa Kâpthanga chem leng chunga lo ding khûr hlawk hlawk chu a hmelah thisen chhuah châkna bâk a lang hauh lo. Bawlpu lam chu panin "Eng vanga he mi hnai sai lo hi pui nge i nih?" a han ti a Bawl pu pawh chu Upa Dawka khan a lo hneh hman hle tih a ngawih tlat dânah chuan a hriat a, Lalpa Kâpthanga chu a thinrim zual kher mai. Mahse an bawlpu fapa tlangval Chhunliana chu rawn ṭawng chhuakin" Ka pa, i va han tenawm em em ve, kan Lal phat san ngam tûr khawpa lian kan ni lo a sin, i nupui leh i fate hi zakin kan kûn reng dawn anih hi" a rawn tih rual chuan bawlpu chu rawn ṭawng chhuakin "Ka fapa i ni a ka thil tihah i inrawlh mai ni loin min ṭawiawm reng tûr i ni a sin. He Lal tlak tlai lo zet hi nei lo i la chuan in unaupa pawh a la dam ngei ang. He Lal phuahchawp leh a ṭhiante kan khuaa an rawn kal hnu lawka rûn kan tawh khan in unapa kha a thi a ni lawm ni? Zehtet khuate u Pasalṭha Hrilkunga pawh a thi a ni lawm ni? "tiin Lal puh chhiat dân tûr chu a zawng ta, mahse, Thangkunga'n a nghawnga nghet taka a rawn reh rual chuan a âng nghal chawp chawp mai a," Ka kawia hming hi a duh duh lam chî a ni hauh hleinem"tih pahin a ringruh chu a ṭhuai tliak hmawk mai le.

Lal in luhkaa ruang pahnih let reng chu tlangval ṭhenkhatin an rawn la sawn a, thlân pawh laihsak loin Lal nu Zikpuii duh ang ngeiin khaw dâia khâmah ramsate chaw atan an va paih ta a ni. Upa Dawka nupui fanaute chuan Lalpa Kâpthanga hnenah chuan ngaihdam an dîl nasa hle maia mahse Lal phatsantu annih ve miah avangin a zân a zânin khua aṭangin an chhuah tîr nghal a, an Bawlpu nupui fanaute erawh an pa thil tih an pawm pui loh mai bakah a hriat pawh an lo hriat reng reng loh avangin khuaa la awm an phal sak a, Chhunliana phei chuan a pa hna a chhunzawm a la ngai ngei ang.

Hratzuala haw chak tawh lutuk lungleng chu Lal fapa Rolianpuia leh Rotawkate chuan an fiam nasa thei hle a Hratzuala lahin a chhai lai di Ngaihtei a chhuan ve zia lan tîrna rem chângah hmangin "Kan vângkhua in lo lâwi a, nakin lawka ka thai chang tûr Ngaihtei rûna kan kâi ho meuh chuan min chhuhsak dân ruahmanna insiam hialin a nia ka rinni" tiin a chhuang thei hlarh hlarh hle. Ni enge maw zât hnua Lianmawia leh Zamana an rawn lan leh meuh chuan a thin a chhe tawh hle a, an hmel a hmuh rualin a hau nghal bawrh bawrh a, "Chanchin ngaichângin kan thaw dêp dêp renga, nang ni nula mitmei pawh hmu ve hlei lo in han châwl khawmuang leh rih vêl a, min rawn hruai vat tûr che u alawm" a lo ti bawrh bawrh a, a kianga lo ṭhu ve Rolianpuia leh Rotawka te chu an lo nui nghal tlawrh a, chu tia pasalṭha huaisen pathum an hliam tawrh vânga harh kur si, che sawn thei si lo te lo ṭhu ho ṭhap an hmuh chuan Lianmawia leh Zamana te chu an nuih a za dûn hle a, Zamana chuan "Ti kha chuan i la haw thei dawn chuang lo a, kan tlangvalts ṭhenkhat haw rualin kei ka haw anga, nakinah midang ho nen Liana hoin in rawn haw dawn nia" a tih laia "Liana hoin in rawn haw dawn nia" tih chauhte chu a la rûn ta hle mai a, "Ka hoin kan haw ang, hetiang Lianmawla, ekbathlar sanga ruala kan kalte chuan kan ûm pha leh pek nang" a ti nang nang a, Lianmawia chuan "Ekhai, haw pui vat i ngai anih hi, hei Lal inah an awm tîr si che a, Lal fapa emaw i inti ve ringawt anih kha" a rawn tih lai chuan Laloa Rothanga chuan "Ekhai, ka fapa ve tho anih kha" a rawn tih fiamthu lai chuan Hratzuala chuan intithei takin Lianmawia lo a lo melh kual vêl a. Kawngkhar ri rap a reh fel ruala Lal fanu Rosangliani thing phur haw rawn pên lût zan zan mai Lianmawia'n a hmuh rual chuan hmuhnawm a ti deuh a ni ngei ang, a nak nema Zamana'n a rawn nghawk zauh rual chuan a harh zawk a, Lalpa Rothanga lahin a lo la nuih vur vur zui, a zah ti zûal tûrin Hratzuala chuan "Sangi hei hi anih hi Lianmawia chu, chuan hei hi chu Zamana a nia, hmeichhe tan a kianga awm a him lo" a tih lai chuan Rolianpuiate unau chu an lo nui nghal char char a, an naupan lai aṭanga an zinga ṭawngmawh leh ṭawng tlem ber Hratzuala a lunglên haw châk avanga ṭawng thei ta em em leh enge maw hleka Lianmawiate a phun khum reng mai chu mak an ti a, an in ena an nui dûn ringawt mai a ni. Lal fanu Rosangliani chuan Lianmawia chu rawn en zeuhin "A ni maw, hmanni khan ka hmu ve lo che u a, in haw leh nghal daih bawk nen, châm ve rih rawh u aw, U Hrâta pawh a la dam loh kha ka pa paw'n haw a la phal lo" a rawn ti a, a tâwp lam chu Lianmawia'n a lo en avangin a sawi pahin a sehchilh nuaia a zuih ral a ni ber. Zamana chuan "Hrâta ber hian haw a duh miau tawh si anih hi" a tih chuan Lianmawia chuan "Ni e, châm ve pawh a châkawm viau tak na a, zawi muangin kan inchhawm thla ve tawh a niang chu" a rawn ti ve ta a.

Lal fanu Rolianpuii chuan Lianmawia taksa rawn inphut chho leh ṭan te, a hmel ṭha takte chu a hmuhin Hratzuala an chhungkaw hnena a nupui tûr Chhuansangi nen an chanchin lungchhiatthlak tak a sawi avanga a lo ṭah pui hial kha a taka hmuh nuam a tiin a ngaina nghalin a inhre thei hial a, mahse, tleirawl chauh a la ni a, a nunah mipa a la la lut ngai hauh lo bawk. Lianmawia pawhin Rosangliani chu hmelṭha a ti ve hle a, mahse, a rilruah erawh Chhuansangi chauh a awm thung. A hmuh tirhah khan a khabe phir taih kha a en nghal chat a, Chhuansangi khabe phir mawi tak kha a hre chhuak nghal anih kha, mahse, Chhuansangi hmel hriat chhuah tîr thei thil dang inanna an hmelah a awm tawh lo a, an hmelṭhat dân a hran hlak a, Rosangliani chu Lal fanu ei ṭha ei tih takah a ṭha mah zawk hialin a hria a ni. Zawlbuan Lal chhungkua hian sawi tawh angin Lianmawia hmangaihna kalkawng zawh dan lungchhiatthlak tak kha Hratzuala kâ aṭangin an hre vek tawh a, a hnua Lianmawia mi â ang maia a awm a, a hriatna te a bo thut thut zêlte pawh kha an hre vek a, an lainat hlawm hle a, Lalpa Rothanga phei chuan "An lainatawm mange 'zanin hi a ral anga, zan dang a lo thlen leh hunah chuan ka lung di kiangah riah rûn ka rêm tawh ang'tiin an suangtuah ve rauh rauh âwm si a, ka tawn atan ka duh hauh lo mai, insuihzawm zai rel dawn laia mual inliam san meuh zawng a na dawn em mai"a ti vawng vawng hial a ni.