PASALṬHA LIANMAWIA BUNG - 39

Hrihtlâng khaw chhûngah chuan nunau mangang an tlân darh chum chum a, Zawlbûk bawhbêl a silai chhuang tlar ṭhapte ngên mu chuan zawlbuk chhunga riak tlangvâl tam zawkte nunna chu a lâk sak tawh a, nunau mangang leh an khaw kâng mêk pawh buaipui hman loin tlangval ho chuan anmahni rawn beitute chu a rem dân dânin an bei ve mêk bawk a, mahse, an hriat hauh loha an ralvêngte rawn tawn tlanga khua rawn lut thei Pasalṭha Thansanga hona hnuaia chem sen rawn lên Zehtet mihrâng vâl rualte hma chu a kaw duai duai mai zêl a, Thansanga chu a uai thla tawh lam mah ni se a che ziaah chuan a la intha zo vah vah hle a, pasalṭha vantlang mai mai tan chuan khin ngam chi a la ni hauh lo. A hnunga amah vêng rengtu Hratzuala leh Hrângseipuiate che tla erawh pasalṭha khual thang ve hat tán pawha zir chian fe tham a ni a, Lingrema leh Hnemluaia inkawp pawh an hmaa ding zo an awm mang lo chu a ni e. Kâr loah Hrihtlâng tlangvâlte chu an tawlh ta mai rêng a, khua lah chu a kâng khu vut vut mai bawk si. Lalpa Liankhaia chu a leihkaah dingin a khaw kâng vut vut chu a thlîra a rilru a na hle. "An rawn thleng hman ta ngang lo a ni maw" tia a kianga a upa min rawn ding thusawi chu chhân pawh chhâng loin mipuite'n khua an tlan chhiat san dawr dawr laia tlanchhe ve duh lo a, an Lal kianga thih thlangtu awm chhun, a bula ding mêk nen chuan khaw kâng alh sen zuai zuai chu an en tlawk tlawk ringawt mai a ni. Hrihtlâng tlangval ho chu an hruaitu neih chhun Bawkthanga tan hmalam pan pui theih tur khawpin huaisenna an nei tawh tlat lo, an zâm êm êm tawh zawk a, Lal tual chu an thleng chho ta dêr mai. Mahse, chu tih lai tak chuan silai rawn puakin Zehtet tlangval pakhat chu a tlu nghal tawp a, Thansanga chuan hnung lam aṭanga beih an ni tih inhre nghalin "In ding lam emaw in vei lam panin tlan r'u" tih tuar pahin a tlan zui nghal bawk a. "Hrihtlâng khaw tana bei tûrin Hmar pasalṭha Chawnzathlura ka lo kal e" tih ri chuan zawm nghalin silai chu a rawn puak leh nghal ṭhuai ṭhuai mai a, Zehtet lam pawh an tlu ve nual mai. Chem sen nen an inbawh leh tâk hnuah chuan Chawnzathlura hma chu a kaw duak duak mai a, Thansangate hriat chian em em chu, Chawnzathlura awmna hmun apiangah a aihnahphahpui Hrângdûla leh Zachhînate an awm ve ṭhin tih a ni. Tunah chuan pasalṭha pawh a khawi lam ve ve pawhin an nei ve nual ta bawk nen an han insâmte rêng rêng chu an che na hlawm kher mai le. Mahse, Pasalṭha Chhuahchawnga leh Pasalṭha Thangkunga huaisenna an thisen leh taksaa ṭhan hnantu Zehtet vâl rual râl hmaa mi kawlhsente chu an tal buai rei lo kher mai. Hmun hnihah inṭhenin hmelma ho hmachhawn pah chuan an tawlh zêl a, Thansanga hote kiangah Lingrema leh Hnemluaiate chu awmin khaw hmar lamah an tawlh zêl a, an thil tum hre hek lo Hrihtlâng ho chuan an bei zui zêl bawk a, Hratzuala leh Hrangseipuia pawhin Hmar ho chu khaw chhim lamah hruai peng zêlin, an duh tawk ta maw tihah chuan a hmaa an zâm tâk avânga tawlh kiang emaw an tihte kha an ni ta hauh lo. "Bungtlang pasalṭha Hrangseipuia ka ni ngai e" tih pahin Hrângseipuia chuan a hmaa Zehtet tlangval lu la zo chiahtu Hrângdûla lam pan chuan a tlân nghal a, Hrângdûla hawi chhuakin amah pana rawn tlân mêk chu en mai pawhin pasalṭha a ni tih a hre mai a, a lu lâk hun chhung, a kûn chhung kha rei lo hle mah se tunah a ṭan hmun siam ṭha leh tur chuan a kiangah tlangval dangte an inbei nuai nuai bawk nen hun a nei ta lo. Mahse, pasalṭha ve tak a ni bawk a, Hrângseipuia chem rawn vai rual chuan tawlh hnun pahin a chem chu a vai ve nghal zawk a, a âwm vun pui chat ṭhawt khawpa kak chu na a ti kher mai, Hrângseipuia erawh na a nei lo hlauh. Hrângdûla rawn insiamrem mêk lai chuan pan lehin a dulah chuan a ke phah hlai ṭha hlep hlawp chuan a han tlawh sawk mai a, Hrângdûla na ti lutuk chu a ṭhingṭhi nghal rawp nghe nghe. Hrângdûla lu lâk a tum lai chiah chuan a hnung lamah thil ri rawp hriaiin a han hawi let a Hrângdûla chhan rawn tumtu Zachhîna hrawk thler hnuang leh Hratzuala lo ding kak hah chu hmuin a nui suk a, Hrângdûla che ṭha thei tawh lo nghawngah chuan a tha tâwpin a han sât siah mai a, a nghawng chanve vêl thleng a chem chu a tlum lût pâwk thei hial a ni. Zachhîna leh Hrângdûla thi lai rawn hmu vektu Chawnzathlura chu rawn auin thinrim takin enge a sawi pawh hriat theih loh khawpin a râk nasa a, Hratzuala leh Hrangseipuia lam pan chuan a rawn tlan buan buan maia, a ṭhiante pahnih thihna avâng chuan khua a hmu lo tih a chiang hle a, Hratzuala leh Hrangseipuia paw'n Chawnzathlura vawi khat kut thlak chu a pawi dawn hle tih hrethiamin inveng tawn pahin an lo hmachhawn a, Chawnzathlura chuan a chem chu a hmang ṭhang tih hriat takin awmze nei takin a rawn vai ta fua fua mai a, ṭawngkam chhe tak tak a chhak chhuak deuh reng bawk. Hratzuala vanduai ni a thleng nge ni lungte rap hrualin a tlu palh ta hlauh mai, Chawnzathlura chem vai na zetin a chem a vai per sak avanga kut lawnga awm tawh Hrângseipuia tán han puih mai a harsa bawk si, Chawnzathlura Hratzuala lama a tlan phei chu a thleng dawn ṭep tihah a awmah chuan fei a rawn bûr chat mai a, Chawnzathlura chu khur hlawk hlawk chungin a han au leh nghek a, kal luih a tum leh lai takin a dûl nêmah tak chuan fei pakhat a rawn bur leh chat mai, kal lui thei zia zâng a ni ta lo. Bawkkhup thlawpin feiin a do tlat avâng chuan a lu leh a ke lam tih loh chu a kâng ur bawk a, mahse, a sîr tlûk hnuah pawh chuan harsa ti takin a la thaw ṭawk ṭawk a, Hratzuala chuan "Hrânga i kutah ka dah e" tih pahin anmahni rawn chhanna'na fei rawn khawhtu Lingrema leh Hnemluaia lam pan chuan a kal phei a. Pasalṭha Thansanga mai bakah Lingrema leh Hnemluaia hona hnuaia Zehtet tlangvalte che tla chu an khan lo hle tih hriaiin Bawkthangate chu an lo inpe diam tawh a pui turin he lamah an lo phei ve zawk a lo ni. Hmar hnam ho pawh chu tia an pasalṭha pathumte an thih takah chuan an tawlh hret hret a, an inpe ve ta nge nge a. Lal tualah chuan hruai khawmin an han hnung khirh a, khaw mipui Lal tual bêla lo awmte nen chuan an vaiin an man vek a, zanlai ar khuan hun tawh mah se chu zân rapthlak tak chu tawrh pui ve ni awm fahranin Hrihtlâng ar pa te chuan thawm an rawn chhuah hauh lo.

Chu tia khaw mipuite leh tlangvâlte an hnung khirh mawlh mawlh lai chuan silai rawn puak ṭhuaiin Pasalṭha Thansanga hmaa rawn kal tlang mek tlangval chu a thal nghal tawp mai a, silai puahna lam an zu hawi nâk chuan Pasalṭha Bawkthanga silai hûm chunga lo nui vur vur chu hmuin tlangvâlte chuan bawh rawn an han tuma mahse aw fiak ṭhakin "Ka hriat hauh loh hlâna ka nunna lâk tumtu chuan ka hriat lai ngeiin a tum chhin thei ang" tih pahin Bawka lam chu a pan thla ta, Bawkthanga pawh chuan a duh hmu niawm takin a nui suk a, Thansanga hmel chu enin a biang dinglam ser kalh chu a hmu nghal a, "Pasalṭha Thansanga" ti supin a han nui leh sak a, a mi lu lâk chem nen chuan Thansanga chu a hmachhawn ta rân mai le. Chu lai hmuna pasalṭha pahnih inbei tûrte chu an mi uap a na dûnin huhâng an ngah kher mai pakhat zawk a vânglaia Lusei pasalṭha te zinga a ber ni pha a ni a, pakhat lah duai bîk lo Paite hnam ho zingah a hming hre lo an awm lo tih theih hial khawp a paite ho chhuanvawr lo ni ṭhin a ni a, an hun laia mi ropui ve ve, uaithla lam tawh ni ve ve bawk an ni a, tawnhriat an ngah dûn bawk nen an han inveh dân aṭangte chuan an fimkhur zia a lang chiang hle. Bawkthanga chuan Thansanga chu hnaih thut pahin a kawng zawnah a chem chu a han vai fua a, Thansanga chuan a lo bum hman hram a tawlh hnung lehin a hma ang bawka fîmkhurin an han inveh leh a, an vawi khat kut thlak chu a pawi dûn dawn hle tih a chianga, han inchhaih kual emaw ṭawngkaa han invau a awm lo a, an che zia chu an mit hmanga inzir chian sak pahin an inveh kual theuh theuh mai a ni. Bawkthanga bawk chuan hnaih phei thut pahin Thansanga kawng zawn aṭanga vaiin a lu lamah a chem chu a la chho phut mai a, Thansanga pawh a inveng hman lo teuh lo, a khabe vei lam sir kual chu a biang kî thlengin a inrîn chho kalh mai. Nuih deuh suk pahin a hma ang bawkin an han inveh dûn leh a, Bawkthanga hmelah chuan phurna em em pawh a lang chuang lo a, thisen chhuah hmasatu zawk anih vanga chan ṭha chang tûr a ni ringawt lo tih hre chiang tur khawpa tawn hriat ngah tawh a ni miau a ni. Bawkthanga'n rawn hnaih leh tuma ke a pên chiah tihah chuan Thansanga zawk chuan pan phei thutin Bawkthanga rawn pên leh tûr chiah a ke leh lam chauha a din lai tak chuan Bawkthanga dul zawnah chuan a chem chu a vai fua mai a, a vai thlawn lo tih chiang takin Bawkthanga chuan ehh deuh ṭhawt pahin a er ngawng nghawng a, chutah ṭhingṭhi hnawkin a dul ṭet aṭanga a kawchhung rawn lawr chhuak chu a hup ṭawk ṭawk a, beisei nei takin Thansanga chu a melh tlawk tlawk a, Thansanga chuan pan hnaih pahin Bawkthanga mittui rawn luang chu a hruk sak zauh va, "Pasalṭha ka ngaisang hle mai che. Nang tluka tawhkhirh ka la hre ngai hauh lo" tih pahin a lu chu a lak sak ta a. Tlangvalte chuan kut lo beng dar darin Thansanga chu an ngaihsan hmel hlawm kher mai. Thansanga chuan "Aw le, he lam chu kan zo fel ta der mai. Hmar ho rawn tel ve chhan hi kei Pasalṭha Thansanga hian ka hre duh a ni" a han tih rual chuan hmar hnam ho chu an phu deuh zuk a, an pate, an nute, an ute lo ti râlṭi a lo suat nasa êm êmtu Pasalṭha Thansanga hming an hriat rual chuan an hmelah zâmna a hmuh theih hial a ni. Hmar tlangval pakhat chu a samah ṭham sakin an rawn tel chhan chu a han zawt a, chu tlangval chuan zun cheh ṭhawt pahin "He khaw Lalpa makpa hi kan Lal anih vang a ni" a rawn ti chhuak thei ṭawk a, Thansanga chuan thlah pahin "Linga leh Hnema kha he lamah lo awm u la, tlangval sawm hnih nen khaw chhunga kan tlangvalte ruang leh hliam tuarte lo buai pui rawh u. A bak zawng Dapzâr khaw lam panin kan kal nghal ang. Ka nau Lianmawia an lo that anih vaih chuan Paite ho leh Hmar ho hian an tuar nasa hle ang"a rawn ti a, Hratzuala chuan "U Sangte i sawi anga an lo that anih hlauh chuan an tawrhna a nasa hle ang. Mahse, kan tlangvâlte hi an châu a ni, tlem tal i chhîng sek i la, vâr ṭianah tha tharin i kal teh ang u" a rawn ti a, Thansanga chuan "E ni tak e, ka thinrim luatah ngaihtuahna mumal ka pu thei lo a ni e, min ngai thiam teh u" rawn tiin tlangvalte chu khaw chhunga in kâng ve lo awmna lam pan tur chuan a ti nghal a, Lal tuala an miman an phuarte erawh tlangval sawm rual velin an vêng thung.

Vânthanga leh Lal fanu Luahtei in biak dân vêl chu Lianmawia chuan man thiamin Vânthanga tana huatthlala tûr tak taka ṭawngkau a chheh lah a tam na rawh. Dapzar nulate zingah ngaisang lo tu an awm lo tih theih khawpa a hma nî a an huaisenna pho langtu Pasalṭha Lianmawia leh Pasalṭha Vânthangate chuan Dapzâr khuaa nula awmna in tawh phawt chu han lenna'n an tana huphurhawm loh tak vek an ni dêr tawh mai. Pasalṭha Vawrthanga lu a lâk hmaa din pawh ding ṭha thei lo khawpa chhaih châu hnâp thei tu Lianmawia huaisenna leh hmelṭhatna chuan nulate thinlung chhungril a luahkhat a, Pasalṭha Daichhâwna lu la tu Vânthanga'n an inbeih laia a kut ding lam leh vei lama chem a ken ve vete leh buai map lo a awmze nei thlapa a vai chhuak laite chu ennawm emaw tiin hmuhnawm ti takin an en ṭhup anih kha, an chet dânin a zir dûn bawk a, Dapzâr khaw ho chuan an ngaisangin chibai tu lam an tawng hnem hle.

"Pasalṭha, ka nau hnena ngaihdam ka dîl chu min phal sak hrâm rawh. I rualin ka kal ve ange, ka nau chuan min ngaihdam aia ka lu lâk a lo duh zawk anih pawhin ka inpeih reng e. Ka thiam loh a ni a, ka tuar mai tûr a ni", Lalpa Liankhaia ngenna chu hnial harsa atih êm avângin Thansanga chuan an kiangah kal tîr vein kawng lakah chuan Lal anihna ang takin zah takin a be zêl a, chungte hlei hlei chu Lal Liankhaia thinlung hnehtu leh ti keh darhtu a ni a, a pa leh Bawkthanga hun lai a ta tawh hetiang reng renga pasalṭhate'n Lal an zah hi a la hre ngai lo a, an khaw pasalṭhate chuan duh dân an neihin Lal hnenah an thlena Lal in a phal sak lo anih vaih chuan an hel mai ṭhin. Thansanga kianga ni hnih lek a awm chhung hian Lusei pasalṭhate nun ngîl zia leh, inphahhniam theih zia chu a hriat phah a, a ngaisang ru hle.

Dapzâr Lalpa kiangah chuan Lalpa Ginliana chu Lianmawia leh Vânthangate nen ding vein Thansanga kianga Lal Liankhaia lo kal ve chhan chu an inrin siak nak nak a, Ginliana hmel erawh thinrimnain a khat thung. Lal in an thlen rual chuan Liankhaia chu a nau hmaah chuan ṭhingṭhiin ngaihdam a dîl ta a, chu lai hmuna awmte zinga makti lo awm chhun chu Hrihtlâng khua aṭanga lo kal ve te chauh chu an ni. An khaw neih chhun tih chhiat sak vektu khua chu tunah tih chhiat saka a awm ve tawh bakah inchhirna mittui, dawt tello ṭawngkam nena Liankhaia'n a nau a hmachhawn ngamna chuan rah ṭha chhuahin Lal Ginliana chuan a u ṭhingṭhi chu kai thoin "I pawm kual ṭhin, sava vehnaa i hruai ṭhin, i lo zin chang apianga a hming i lam hmasak ber ziah ṭhin i nau kha ka la ni e, khua kan din thar leh anga, kan unau hian khaw ropui tak Lal kan la ni leh ve ve ang" tiin mittui hnâm sawk chungin a u chu a kuah ta a.

Thansanga mita Chawngpuii tleirawl hmelmawina a la cham reng ang chiahin Chawngpuii mitah pawh Thansanga hmelṭhatna chu a la danglam chuang lo, mahse, a biang ding lama savawm ser hnutchhiah chauh chu Thansanga a ni tih hriat awlsamna a ni ta lo a, Bawkthanga chem hnu hma a biang ding lama inrîn chho kalh chu a ni tel ve ta. An han inchibai a, an intawn hmasak ber ni te chu an mitthlaah a lang uai uai a, mahse, hmelma an nih laia intawng an nihna khan an kârah ramri a kham tlat avangin an inhmangaihnate an puitlin tir thei ta lo kha a ni a, an intawn leh ni a la her chhuak nawn leh anih chuan an lung a la lêng ve leh ngei ang.

Ginliana leh Liankhaiate unau ber an inrem tâk siah chuan mipuite sala tana man a ṭulna an hre ta lo a, Liankhaia phei chuan Lianmawia hnenah chuan an khua rûn a tum avângin ngaihdam a dîl hial a ni. Unau kâra indona lo piang chhuah chhan hi unau kâra tuah rem theih loh biahthu dî vânga Liankhaia thinurna kal zêlin a hrin chhuah ni mah se, he unau kâra indona hian unau kâra inremna a hring chhuak ta.